MUTWE WA KUFUNDA 30
Nemekai Kifulo Kyenu mu Kisemi kya Yehoba
“Mwamulengele kukepakotu pacheche pa bamalaika, kabiji mwamuvwikile lukumo ne munema.”—SALA. 8:5, tubyambo twa munshi.
LWIMBO 123 Tukookelenga Lesa mu Bukishinka
BIJI MU UNO MUTWE *
1. Ñanyi bwipuzho bo twakonsha kwishikisha inge twalanguluka pa bintu byonse byalenga Yehoba?
UMVWE twalanguluka pa bintu byonse byalenga Yehoba, twakonsha kumvwatu byonka byaumvwine nyimbi wa masalamo aye Davida. Walombele kwi Yehoba ne kwipuzha’mba: “Inge namona jiulu, mingilo ya minwe yenu, ñondo ne tubangabanga byo mwalengele, ndanguluka namba nanchi muntu ufwa ye ñanyi byo mumuvuluka, ne mwana muntu ye ñanyi byo mumuta muchima?” (Sala. 8:3, 4) Byonkatu byo kyajinga kwi Davida, ne atweba twakonsha kwimona kukepa inge twiesakanya ku tubangabanga twalenga Yehoba ne kukumya pa kuyuka’mba Yehoba wituta muchima. Bino tusakufunda pe Yehoba byo atele muchima bantu batanshi, ko kuba’mba Adama ne Evwa kabiji bajinga lubaji lwa kisemi kyanji.
2. Yehoba wakebelenga’mba baana banji batanshi bobenga ka?
2 Adama ne Evwa bo bajinga baana batanshi ba kwa Yehoba, kabiji Yehoba wajinga Shabo wa mwiulu wa butemwe. Waketekejile bano bamulume ne mukazhi kusemununa. Lesa wibabuujile’mba: “Semainga ne kusemununa, muyuzhe ntanda.” (Nte. 1:28) Lesa wakebelenga amba bakekale na baana ne kulama bulongo ntanda. Umvwe bakookejile Yehoba ne kuba byo ebabuujile, Adama ne Evwa ne baana babo inge batwajijile kwikala mu kisemi kya Lesa myaka ne myaka.
3. Mambo ka o twakonsha kwambila’mba Adama ne Evwa bebapele kifulo kyanema mu kisemi kya Yehoba?
3 Adama ne Evwa bajinga na kifulo kyanema bingi mu kisemi kya Yehoba. Kwesakana na byaamba Salamo 8:5 ne tubyambo twa munshi, Davida waambile pa muntu Yehoba ye alengele kuba’mba: “Mwamulengele kukepakotu pacheche pa bamalaika, kabiji mwamuvwikile lukumo ne munema.” Kya kine, Yehoba kechi wapele bantu bulume, maana ne ngovu kwesakana pamo na bamalaika ne. (Sala. 103:20) Bino bantu ‘bakepakotu pacheche’ inge kwibesakanya ku bamalaika. Kino ke kya kukumya bingi. Yehoba byo alengele bansemi betu batanshi, wibapele bwikalo bwawama bingi.
4. Ki ka kyamwekele kwi Adama ne Evwa byo basatukijile Yehoba, kabiji tusakwisamba pa ka mu uno mutwe?
4 Ba Adama ne Evwa byo bamusatukijile Yehoba, balekele kwikala mu kisemi kyanji. Kintu kyo baubile kyatamine bingi. Kino kyaletela baana babo bya malwa byonka byo tusakufunda mu uno mutwe. Pano bino, kyaswa muchima wa Yehoba ku bantu kechi kyapimpulwa ne. Ukeba bantu ba lukookelo kwikala baana banji myaka ne myaka. Patanshi tusakwisamba pe Yehoba byo amwesha’mba witunemeka bingi. Kya bubiji, tusakwisamba pa byo twakonsha kuba pa kuba’mba twikale mu kisemi kya Lesa. Kyapelako, tusakwisamba pa mapesho akeyowanga bantu ba Yehoba bakekalanga pano pa ntanda myaka ne myaka.
YEHOBA WANEMEKA BINGI BANTU
Mu ñanyi mashinda Yehoba mo amweshesha’mba witunemeka? (Monai mafuka 5-11) *
5. Twakonsha kumwesha byepi amba tusanta pa kulengwa mu kipasha kya Lesa?
5 Yehoba witunemeka pa kwitulenga mu kipasha kyanji. (Nte. 1:26, 27) Byo kiji kuba’mba twalengwa mu kipasha kya Lesa, twakonsha kwikala na byubilo byanji byawama, nabiji butemwe, kifyele, bukishinka, ne bololoke. (Sala. 86:15; 145:17) Inge twibikako kwikala na bino byubilo, tunemeka Yehoba ne kumupa lukumo. (1 Pe. 1:14-16) Kabiji inge ketube bintu bitokesha ku muchima Shetu wa mwiulu, twikala na lusekelo. Yehoba byo etulengele mu kipasha kyanji, witupele bulume bwa kwikala mu kisemi kyanji.
6. Yehoba wanemekele byepi bantu kimye kyo anengezhezhenga ntanda?
6 Yehoba witunengezhejile muzhi wawama. Yehoba saka akyangye kulenga muntu mutanshi, wanengezhezhe ntanda kuba’mba pakekalenga bantu. (Yoba 38:4-6; Yele. 10:12) Na mambo a kuba’mba Yehoba uji na lusa kabiji mpanyi, witunengezhejile bintu byavula bingi byawama kuba’mba tukeyowenga. (Sala. 104:14, 15, 24) Bimye bimo, walangulukanga pa bintu byo alengele, kabiji “wibimwene’mba byawama.” (Nte. 1:10, 12, 31) Wanemekele bantu kupichila mu kwibapa “bukalama bwa pa” bintu byonse byawama byo alengele pano pa ntanda. (Sala. 8:6) Lesa ukeba’mba bantu balumbuluka bakeyowenga kulama bilengwa byanji myaka ne myaka. Nanchi musanchila Yehoba kimye kyonse pa uno mulaye wawama nyi?
7. Kinembelo kya Yoshua 24:15 kimwesha byepi kuba’mba muntu uji na luusa lwa kwifuukwila bintu?
7 Yehoba witupa bupe bwa kwifuukwila bintu. Twakonsha kwisajila bintu byo tukeba kuba mu bwikalo. (Tangai Yoshua 24:15.) Lesa wetu wa butemwe usangalala bingi inge twasalapo kumwingijila. (Sala. 84:11; Maana 27:11) Twakonsha kwingijisha luusa lwetu lwa kwifuukwila kuba bintu byawama byavula. Langulukai pa byaubile Yesu.
8. Ñanyi jishinda jimo Yesu jo aingijishishemo luusa lwanji lwa kwifuukwila bintu?
8 Twakonsha kulondela Yesu kupichila mu kusalapo kunemeka bikeba bakwetu, kechi kutangizhako byo tukeba atweba bene ne. Juba jimo, Yesu ne batumwa banji bakookele bingi, kabiji bayile ku mpunzha kwazhindama kuba’mba bakokolokeko. Pano bino, kechi bakokolokele ne. Jibumba jibalondejile, kabiji bano bantu bakebeshe kuba’mba Yesu ebafunjishe. Bino Yesu kechi wibazhingijile ne. Pakuba wibobijile lusa. Onkao mambo, Yesu waubile byepi? “Watendekele kwibafunjisha bintu byavula.” (Mako 6:30-34) Umvwe ke tulondele byaubanga Yesu kupichila mu kwingijisha kimye kyetu ne ngovu kukwasha bakwetu, tupana lukumo kwi Shetu wa mwiulu. (Mat. 5:14-16) Kabiji tumwesha Yehoba amba tukeba kwikala mu kisemi kyanji.
9. Bansemi bafwainwa kuvulukanga ñanyi kishinka?
9 Yehoba wapa bantu bupe bwa kusema baana, ne mwingilo wa kwibafunjisha kumutemwa ne kumwingijila. Umvwe mwi bansemi, nanchi musanta pa buno bupe bwanema nyi? Nangwa kya kuba Yehoba wapa bamalaika maana ne bulume bwa kuba bintu byavula bingi, bino kechi wibapapo kino kya bupe ne. Onkao mambo, inge mwi bansemi, mwafwainwa kunemeka buno bupe bwimupa Lesa. Bansemi bebapa mwingilo wanema bingi wa kukomesha baana babo “mu kwibajimuna ne kwibafunjisha maana a Yehoba.” (Efi. 6:4; Mpitu. 6:5-7; Sala. 127:3) Pa kukwasha bansemi kwingila uno mwingilo bulongo, jibumba ja Lesa janengezha bingijisho byaimena pa Baibolo, nabiji mabuku, mavidyo, nyimbo, ne bibaaba bya pa Intaneti. Kya kine, Shetu wa mwiulu ne Mwananji batemwa bingi baana betu. (Luka 18:15-17) Umvwe bansemi bakinka manungo mwi Yehoba ne kwingila na ngovu kulama bulongo baana babo, Yehoba umvwa bingi bulongo. Kabiji bansemi ba uno mutundu bakwasha baana babo kwikala na luketekelo lwa kwikala mu kisemi kya Yehoba myaka ne myaka!
10-11. Na mambo a bukuzhi, Yehoba witukwasha kuba byepi?
10 Yehoba wapaine Mwananji ye atemwisha kuba’mba tubwele mu kisemi kyanji. Byonka byo twaambapo mu jifuka 4, Adama ne Evwa bafuminemo mu kisemi kya Yehoba, kabiji baana babo nabo kechi bakonsheshe kwikala mu kisemi kya Lesa ne. (Loma 5:12) Adama ne Evwa basatukijile Lesa kya nshijitu. Onkao mambo, kyayijilemo Lesa kwibapangamo mu kisemi kyanji. Pano kyakonsheshe kwikala byepi ku baana babo? Yehoba watemwa bantu, onkao mambo, wanengezhezhe jishinda ja kubwezhezhamo baana babo ba lukookelo mu kisemi kyanji. Waubile bino kupichila mu kitapisho kya Mwananji ye atemwisha, Yesu Kilishitu. (Yoa. 3:16; Loma 5:19) Na mambo a kitapisho kya kwa Yesu, Lesa wasajile bantu ba kishinka 144,000 kwikala ke baana banji.—Loma 8:15-17; Lum. 14:1.
11 Kabiji biumbi ne biumbi bya bantu bakwabo ba kishinka babena kukookela Lesa ne kuba kyaswa muchima wanji. Baji na luketekelo lwa kwikala mu kisemi kya Lesa inge bashinda lweseko lukapelako ku mpelo ya myaka kiumbi. (Sala. 25:14; Loma 8:20, 21) Na mambo a luno luketekelo lo baji nalo, ne lunotu batela Yehoba, Mulenga wabo amba “Tata.” (Mat. 6:9) Aba bakasangulwa nabo bakebapa kimye kya kufunda pe Yehoba. Aba bakasalapo kukookela lutangijilo lwanji nabo bakekala mu kisemi kyanji.
12. Ñanyi bwipuzho bo tusa kukumbula?
12 Byonka byo twamona, Yehoba wauba bintu byavula bingi bimwesha’mba wanemeka bantu. Bena Kilishitu bashingwa wibasala kala kwikala baana banji, kabiji ba mu “jibumba jikatampe” wibapa luketekelo lwa kukekala baana banji mu ntanda ipya. (Lum. 7:9) Pano twakonsha kuba byepi luno pa kuba’mba tumweshe’mba tubena kukeba kwikala mu kisemi kyanji myaka ne myaka?
MWESHAI YEHOBA KUBA’MBA MUKEBA KWIKALA MU KISEMI KYANJI
13. Ñanyi kintu kimo kyo twakonsha kuba pa kuba’mba twikale mu kisemi kya Lesa? (Mako 12:30)
13 Mweshainga’mba mwatemwa Yehoba kupichila mu kumwingijila na muchima wenu yense. (Tangai Mako 12:30.) Lesa witupa bya bupe byavula bingi, kabiji kampe bupe bwakilamo kunema ke kumupopwela. Tumwesha Yehoba kuba’mba twamutemwa inge ke ‘tulondele mikambizho yanji.’ (1 Yoa. 5:3) Mukambizho umo Yehoba ye akeba’mba tulondelenga ke mukambizho waambile Yesu wa kufunjisha bantu kwikala baana ba bwanga ne kwibabatizha. (Mat. 28:19) Kabiji witukambizha ne kwitemwa atweba bene na bene. (Yoa. 13:35) Yehoba utambwila mu kisemi kyanji kya bapopweshi mwaya ntanda yonse bantu ba lukookelo.—Sala. 15:1, 2.
14. Twakonsha kumwesha byepi amba twatemwa bantu? (Mateo 9:36-38; Loma 12:10)
14 Mweshainga bakwenu butemwe. Butemwe kyo kyubilo kikatampe kya Yehoba. (1 Yoa. 4:8) Yehoba witutemenwe saka tukyangye ne kumuyuka. (1 Yoa. 4:9, 10) Tulondela byubilo byanji inge ke tumwesha bakwetu butemwe. (Efi. 5:1) Jishinda jawama kumwesheshamo amba twatemwa bantu ke kwibakwasha kufunda pe Yehoba kimye saka kikyangye kupwa. (Tangai Mateo 9:36-38.) Inge twibakwasha, bakonsha kuyuka byo bafwainwa kuba pa kuba’mba bakekale mu kisemi kya Lesa. Muntu inge wabatizhiwa, twafwainwa kutwajijila kumutemwa ne kumunemeka. (1 Yoa. 4:20, 21) Kino kyavwangamo kuba byepi? Kyavwangamo kumuketekela. Inge wauba kintu kimo, kechi tukafikenatu kupwisha mu muchima amba uji na byubilo byatama ne. Pakuba tukatwajijila kumunemeka, mambo tuvuluka’mba witukila.—Tangai Loma 12:10; Fili. 2:3.
15. Bañanyi bo twafwainwa kubilanga lusa ne kifyele?
15 Ubilainga bantu bonse lusa ne kifyele. Inge tukeba kwikala pa bantu bakatelanga Yehoba amba Shabo myaka ne myaka, twafwainwa kwingijishanga byo tufunda mu Mambo a Lesa. Yesu wafunjishe’mba twafwainwa kubilanga bantu bonse lusa ne kifyele kubikapotu ne balwanyi betu. (Luka 6:32-36) Bimye bimo kikatazha bingi kuba kino. Onkao mambo, twafwainwa kufunda kulanguluka ne kuba bintu byonka byaubanga Yesu. Umvwe twaingila na ngovu kukookela Yehoba ne kulondela Yesu, tumwesha Shetu wa mwiulu amba tubena kukeba kwikala mu kisemi kyanji myaka ne myaka.
16. Twakonsha kuzhikijila byepi jizhina ja kisemi kya Yehoba?
16 Zhikijilainga jizhina ja kisemi kya Yehoba. Javula mu kisemi, banyike balondela byuba bakolojabo. Umvwe mwana wa mukulumpe ke engijishe mafunde a mu Baibolo mu bwikalo bwanji, ne bankasanji bakalondelanga mu ngayo yanji. Umvwe mwana wa mukulumpe watendeka kuba byatama, bankasanji bakonsha kulondela byubilo byanji. Byo byo kiji ne mu kisemi kya Yehoba. Inge mwina Kilishitu wa kishinka watendeka kwikala na milanguluko ya bunsatuki nangwa watendeka kwikala bwikalo buncha, bakwabo bakonsha kutendeka kulondela byubilo byanji byatama. Aba boba bino batamisha jizhina ja kisemi kya bapopweshi ba Yehoba. (1 Tesa. 4:3-8) Kechi twafwainwa kulondela bantu baji na byubilo byatama nangwa kwibaswisha kwitufumya kwi Shetu wa butemwe wa mwiulu ne.
17. Milanguluko ya mutundu ka yo twafwainwa kuchinuzhuka, kabiji mambo ka?
17 Ketekelai mwi Yehoba, kechi kuketekela mu bintu bya ku mubiji ne. Yehoba walaya kuba’mba uketukebela kajo, bya kuvwala, ne mwa kwikala inge twatangizhako Bufumu bwanji patanshi ne kulondela malamuna anji aoloka. (Sala. 55:22; Mat. 6:33) Onkao mambo, tuchinuzhuka kulanguluka’mba kwikala na bintu bya mu ino ntanda kuketuzhikijila ne kwituletela lusekelo lwa myaka. Twayuka kuba’mba lusekelo lwa kine lufumatu mu kuba kyaswa muchima wa Yehoba. (Fili. 4:6, 7) Nangwatu inge tuji na mali a kupotamo bintu byavula, twafwainwa kulangulukapo inge kya kuba tuji na kimye nangwa ngovu ya kwingijisha byo byo bintu ne kwibilama bulongo. Abya tukatemwa bingi bintu byo tuji nabyo ne kulangulukangatu pa bino bintu kimye kyonse nyi? Twafwainwa kuvulukanga’mba Lesa witupa mingilo ya kuba mu kisemi kyanji. Kino kibena kulumbulula’mba kechi twafwainwa kulabikwa na bintu bikwabo ne. Kechi twafwainwa kwikala nobe nsongwalume wakaine kwingijila Yehoba ne kwikala mwananji na mambo a kutemwisha bintu bya pano pa ntanda ne.—Mako 10:17-22.
BINTU BIKEYOWANGA BAANA BA YEHOBA MYAKA NE MYAKA
18. Ñanyi munema ne mapesho akeyowanga bantu ba lukookelo myaka ne myaka?
18 Bantu ba lukookelo bakekala na munema wa kine kine, ko kuba’mba kutemwa Yehoba ne kumwingijila myaka ne myaka. Aba baji na luketekelo lwa kwikala pano pa ntanda bakekala na lusekelo byo bakawamishanga ino ntanda Yehoba yo ebanengezhejile kwikala muzhi wabo. Katatakatu Bufumu bwa Lesa bukawamishe ntanda ne bilengwa byonse bijipo. Yesu ukafumyapo makatazho onse aishile kimye Adama ne Evwa kyo bafuukwilepo kufuma mu kisemi kya Lesa. Yehoba ukasangula biumbi ne biumbi bya bantu bafwa ne kwibapa luketekelo lwa kwikala na bumi bwawama mu ntanda ikekala ke paladisa. (Luka 23:42, 43) Kisemi kya pano pa ntanda kya bapopweshi ba Yehoba byo bakekala balumbuluka, bonse bakekala na “lukumo ne munema” waambilepo Davida.—Sala. 8:5.
19. Ñanyi kintu kyo twafwainwa kulangulukangapo kimye kyonse?
19 Umvwe muji mu “jibumba jikatampe,” muji na luketekelo lwawama bingi. Lesa wimutemwa; ukeba’mba mwikale mu kisemi kyanji. Onkao mambo, ingilainga papelela bulume bwenu kumutokesha ku muchima. Langulukainga pa milaye ya Lesa kimye kyonse. Nemekai kupopwela Shetu wa mwiulu ne luketekelo lwa kumutota myaka ne myaka.
LWIMBO 107 Tumweshenga Butemwe bwa Lesa
^ jifu. 5 Pa kuba’mba kisemi kikale na lusekelo, yense mu kisemi wafwainwa kuyuka mwingilo wanji ne kutundaika lukwatankano. Nsemi wa mulume utangijila kisemi kyanji mu butemwe, nsemi wa mukazhi umutundaika, kabiji baana bakookela bansemi babo. Byo byo kiji ne mu kisemi kya Yehoba. Kuji bintu Lesa wetu byo akeba’mba tubenga, kabiji inge ke tube bino bintu, tukekala mu kisemi kya bapopweshi ba Yehoba myaka ne myaka.
^ jifu. 55 KULUMBULULA KIPIKICHALA: Kulengwa mu kipasha kya Lesa kwalengela ba mulume ne mukazhi kwimweshanga butemwe ne kifyele ne kutemwa baana babo ne kwibobila kifyele. Bano ba mulume ne mukazhi batemwa Yehoba. Kabiji bamwesha’mba banemeka bupe bwa kwikala na baana kupichila mu kufunjisha baana babo kutemwa Yehoba ne kumwingijila. Bansemi babena kwingijisha vidyo pa kulumbulula ene mambo Yehoba o apainyijile Yesu kwikala bukuzhi. Kabiji babena kwibafunjisha kuba’mba mu Paladisa, tukalamanga bulongo ntanda ne banyama myaka ne myaka.
