1. Wapi bakesion lendá kwizila beto na yintu ntangu beto ke kanisá na nyonso yina Yehova yidiká?

NTANGU beto ke kanisá na nyonso yina Yehova yidiká, beto lenda banda kutala bamambu faso David. Yandi zonzá na mosi ya balusambu ya yandi: ‘Ntangu mu ke talá zulu ya nge, bisalu ya misapi ya nge, Ngonda na ba-etwale yina nge yidiká, muntu ke nani samu nge kanisa na yandi, mpe mwana ya muntu ke nani samu nge kipe yandi?’ (Nku. 8:3, 4) Faso David, beto mpe lenda tala ti beto ke kaka fioti na mantwala ya bima nyonso ya nene yina Yehova yidiká. Na yawu, ya lenda vanda mpasi na beto na kundima ti Yehova ke kipeke beto. Kasi, faso beto ke tala yawu, Yehova suká ve kaka na kuyidika bantu ya ntete Adam na Eve. Yandi kotisá mpe bawu na kati ya dikanda ya yandi.

2. Wapi yina vandá dikanisi ya Yehova samu na bana ya yandi ya ntete awa na ntoto?

² Adam na Eve vandá bana ya Yehova ya ntete awa na ntoto. Mpe Yehova, Tata ya bawu, vandá zolá bawu mingi. Samu ba vandá na kati ya famiye ya yandi, Yehova vandá vingila ba sala yina yandi vandá lomba na bawu. Yandi zonzá na bawu: “Beno buta mingi [mpe] beno kuma mingi, beno fulusa ntoto [mpe] beno yala [na zulu ya yawu].” (Kub. 1:28) Yandi zolá ba buta bana mpe ba kipe ntoto. Si ba kuwá Yehova mpe ba salá yina yandi zonzá na bawu, Adam na Eve mpe bana ya bawu zolá vanda na kati ya dikanda ya Yehova tii bubu yayi.

3. Yinki ke na lakisá ti Adam na Eve vandá ve kaka bantu ya mpamba na kati ya famiye ya Yehova?

³ Faso Yehova vandá bakila Adam na Eve vandá lakisa ti ba vandá ve kaka bantu ya mpamba na meso ya yandi. Na Nkunga 8:5, tala yinki David zonzá na faso Yehova yidiká muntu: ‘Nge yidikak’ yandi mwa fioti na yinsi ya ba-ange, mpe nge pesak’ yandi  nkembo na lukumu.’ Ya vrai, bantu ke ve na ngolo mpe mayela faso ba-ange. (Nku. 103:20) Kasi, ata ba ke na ngolo ya mingi, ba-ange lutila beto kaka “mwa fioti.” Yinki ya ke na lakisá? Ya ke na lakisá ti, ntangu Yehova yidiká papa na mama ya beto ya ntete, Adam na Eve, yandi pesá bawu luzingu ya kitoko.

4. Yinki kuminá Adam na Eve samu ba mangá kuwa Yehova, mpe na wapi bakesion beto ke kuzwa bareponse na artikle yayi?

 ⁴ Yintu ngolo ya Adam na Eve salá ti ba vanda dyaka ve na kati ya dikanda ya Yehova. Ya ke kyadi mingi. Faso beto ke tala yawu na artikle yayi, disumu ya bawu salá ti bamambu beba samu na bana ya bawu. Kasi, dikanisi ya Yehova me chanje ve. Yandi ke kaka na nsatu ti bantu yina ke kuwa yandi kota na kati ya famiye ya yandi. Yinki Yehova salá samu na kulakisa ti beto ke na valere na meso ya yandi? Yinki beto ke sala samu na kukota na kati ya famiye ya yandi? Wapi bima ya mbote Yehova me bumbila na bantu nyonso yina ke ndima kukuma bana ya yandi? Beto ke kuzwa bareponse na artikle yayi.

5. Wa’ faso beto lenda vutula matondo na Yehova na yina yandi yidiká beto na kifwani ya yandi?

⁵ Yehova yidiká beto na kifwani ya yandi. (Kub. 1:26, 27) Samu beto salamá na kifwani ya Nzambi, beto lenda landa bifu ya yandi. Beto lenda lakisa luzolo, ntima ya mbote, kuvanda ya kukangama na bampangi mpe kuyiina mambu ya kutengama. (Nku. 86:15; 145:17) Si beto kulisa bifu yayi na bantima ya beto, beto ke pesa nkembo na Yehova mpe ya ke faso ya kuvutula yandi matondo. (1 Pi. 1:14-16) Ntangu beto ke salá bamambu yina ke sepelisá Tata ya beto ya zulu, beto mosi mpe ke zwá kilengi. Dyaka, samu beto lenda lakisa bifu mosi na Yehova, yandi lenda ndima beto na kati ya dikanda ya yandi.

6. Wa’ faso Yehova pesá valere na bantu ntangu yandi yidiká ntoto?

⁶ Yehova yidiká yinzo ya kitoko samu na beto. Ntama, ntangu yandi yidiká ntete ve bantu, Yehova bongisá ntoto samu na bawu. (Yobi 38:4-6; Yer. 10:12) Yehova ke na ntima ya mbote mpe na kifu ya kukabulá. Ni na yawu, yandi salá bima mingi ya mbote samu beto vanda na kilengi. (Nku. 104:14, 15, 24) Na manima ya kuyidika bima nyonso yayi, Yehova ‘talá ti ya vandá mbote.’ (Kub. 1:10, 12, 31) Yehova pesá bantu valere na yina yandi pesá bawu ‘lutumu na zulu’ ya bima nyonso yina yandi yidiká awa na ntoto. (Nku. 8:6) Nzambi zola ti bantu ya kulunga tala kilengi ya kukipe ntangu nyonso bima ya kitoko yina yandi yidiká. Beto me lunga kuvutula matondo na Yehova samu na dikanisi ya kitoko yina yandi ke na yawu samu na bantu.

7. Wa’ faso Yosua 24:15 ke na lakisá ti bantu ke na liberte ya kusala bamambu yina ba me zola?

⁷ Yehova pesá beto liberte ya kusala bamambu faso beto me zola. Beto lenda sola faso ya kunata luzingu ya beto. (Tanga Yosua 24:15.) Ntangu beto ke solá kusadila Nzambi, yandi ke vandá na kilengi. (Nku. 84:11; Bin. 27:11) Na bamambu ya nkaka mpe, beto lenda sadila liberte ya beto na faso ya mbote. Beto tala ekzample yina Yesu bikilá beto.

8. Pesa ekzample yina ke na lakisá mosi ya bafaso yina Yesu sadilá liberte ya yandi?

⁸ Faso Yesu, beto lenda sola kutula bambote ya bampangi na mantwala ya beto mosi. Kilumbu mosi Yesu na ba-apotre ya yandi vandá ya kulemba. Na yawu, ba kwendá kisika mosi samu na kupema. Kasi ba lendá ve kusala yawu. Bantu mingi landá bawu samu ba vandá na nsatu Yesu longa bawu. Ata Yesu vandá ya kulemba, yandi dasukilá ve bawu. Kasi, yandi talá kyadi ya bawu. Na yawu, yinki yandi salá? “Yandi [bandá] na kulongisa bawu mambu mingi.” (Mrk. 6:30-34) Samu na kulanda kifwani ya Yesu, beto lenda sadila ntangu mpe bangolo ya beto na  kusadisa bampangi. Kusala yawu ke pesa nkembo na Tata ya beto ya zulu. (Mat. 5:14-16) Dyaka, beto ke lakisa na Yehova ti beto ke na nsatu ya kukota na kati ya famiye ya yandi.

9. Wapi dikabu ya nene Yehova pesá na bantu?

⁹ Yehova pesá bantu dikabu ya kubuta bana, mpe kisalu ya kulonga bawu na kuzola mpe kusadila yandi. Si nge ke na bana, nge ke sepelá kwandi na dikabu yayi? Ata ba-ange ke na ngolo ya kusala bamambu mingi ya nene, kasi Yehova pesá dikabu ya kubuta kaka na bantu. Na yawu, si nge ke na bana, sepela na bweso yina ke na nge ya kukulisa bawu. Yehova zola ti nge kulisa bana ya nge na ‘malongi mpe misiku ya yandi.’ (Ef. 6:4; Kul. 6:5-7; Nku. 127:3) Samu na kusadisa bibuti, organizasion ya Yehova ke tulá malongi ya Biblia na kati ya mikanda, bavideo, banzimbu mpe bima ya nkaka yina ke basiká na site ya beto. Ya ke na talaná pwelele ti Tata ya beto ya zulu na mwana ya yandi ke zolá bana. (Luke 18:15-17) Ntangu bapapa na bamama ke salá bangolo samu na kulonga bana ya bawu mpe ntangu ba ke sadilá bima yina Yehova ke pesá samu na kusala yawu, Yehova ke vandá na kilengi. Nyonso yina ba ke salá ke sadisa bana ya bawu na kuzwa kivuvu ya kukota na kati ya famiye ya Yehova mpe kuvanda ntangu nyonso bana ya yandi.

10-11. Samu Yehova pesá mwana ya yandi samu na masumu ya beto, wapi kivuvu beto ke na yawu?

¹⁰ Samu Yehova pesá mwana ya yandi samu na masumu ya beto, beto lenda kota dyaka na kati ya famiye ya yandi. Faso beto talak’ yawu na  paragrafe 4, ntangu Adam na Ève salá disumu, bawu na bana ya bawu lendá dyaka ve kuvanda na kati ya dikanda ya Yehova. (Rom. 5:12) Adam na Ève salá bamambu na nko. Na yawu, Yehova bingisá bawu na dikanda ya yandi. Kasi, yinki zolá salama samu na bana ya bawu? Yehova ke zolá bantu. Na yawu, yandi salá nyonso samu bana ya Adam yina ke kuwa yandi kota na kati ya famiye ya yandi. Yandi salak’ yawu na nzila ya sakrifise ya Yesu Kristo. (Yoa. 3:16; Rom. 5:19) Samu Yesu kufwá, Nzambi lenda ndima bantu 144000 yina ke ya kukangama na yandi, kukuma bana ya yandi mpe kukwenda vanda na zulu.—Rom. 8:15-17; Luz. 14:1.

¹¹ Katula bantu 144000, bamilion ya bantu ya nkaka yina ke kuwá Nzambi, ke na kivuvu ya kukota na kati ya famiye ya yandi. Ba ke kuma bana ya Nzambi na nsuka ya bamvula 1000, ntangu Satan ke meka bantu mbala ya nsuka. (Nku. 25:14; Rom. 8:20, 21) Samu ba ke na kivuvu yayi, bubu yayi deja ba lenda bokila Yehova “Tata.” (Mat. 6:9) Ntangu bantu ya kufwa ke vumbuka, bawu mpe ke longoka bamambu yina Yehova ke na vingilá ba sala. Na manima, si ba ndima kusadila yandi, bawu mpe ke kota na kati ya famiye ya yandi.

12. Na wapi kesion beto mase kuzwa reponse?

¹² Faso beto me tala yawu, Yehova me sala bima mingi samu na kulakisa ti bantu ke na valere na meso ya yandi. Na yawu, bubu yayi deja, yandi ke na ndimá bakristo ya nkaka faso bana ya yandi mpe ke na bokilá bawu na zulu. Yandi me pesa mpe na bamilion ya bantu yina ke na kati ya ‘kimvuka ya nene ya bantu,’ kivuvu ya kukuma bana ya yandi na yinza ya malu-malu. (Luz. 7:9) Yinki nge lenda sala bubu yayi samu na kulakisa na Yehova ti nge ke na nsatu ya kuvanda ntangu nyonso na kati ya dikanda ya yandi?

13. Yinki beto lenda sala samu na kuvanda na kati ya famiye ya Yehova? (Marke 12:30)

¹³ Sadila Yehova na ntima ya nge nyonso samu na kulakisa yandi ti nge ke zolak’ yandi. (Tanga Marke 12:30.) Na luzolo nyonso, Yehova pesá beto bima mingi ya mbote. Na kati ya babima yango, mosi ya nene ke nsatu ya beto ya kusambila yandi. Beto ke lakisá Yehova ti beto ke zolak’ yandi ntangu beto ke ‘landá misiku ya  yandi.’ (1 Yoa. 5:3) Mosi ya misiku yina Yehova zola beto landa ni yina Yesu pesá: kulonga bantu mpe kunata bawu tii na bateme. (Mat. 28:19) Yesu zonzá mpe na beto na kuzola bampangi. (Yoa. 13:35) Yehova ke yamba ba yina nyonso ke landá misiku ya yandi na kati ya dikanda ya nene ya bisadi ya yandi.—Nku. 15:1, 2.

14. Wa’ faso beto lenda lakisa luzolo na bampangi ya beto? (Matayi 9:36-38; Baroma 12:10)

¹⁴ Lakisa luzolo na bampangi. Kifu ya Yehova ya kulutila nene ke ni luzolo. (1 Yoa. 4:8) Yehova lakisá beto luzolo ntangu beto zabá ntete ve yandi. (1 Yoa. 4:9, 10) Beto ke landá kifwani ya yandi ntangu beto ke zolá bampangi. (Ef. 5:1) Mosi ya bafaso ya kulakisa ti beto ke zolá bantu ni ya kulonga bawu mambu ya Yehova avan nsuka ya yinza yayi kuma. (Tanga Matayi 9:36-38.) Si beto sala yawu, beto ke sadisa bawu na kuvanda na kivuvu ya kukota na kati ya famiye ya Yehova. Ata ntangu muntu yina ke longoká Biblia ke zwa bateme, beto zolá kontinye kulakisa yandi luzolo mpe kupesa yandi buzitu. (1 Yoa. 4:20, 21) Wa’ faso beto lenda sala yawu? Mosi ya bafaso ya kusala yawu ni ya kulakisa yandi ti beto ke salak’ yandi konfianse. Na kifwani, si beto zaba ve samu na yinki yandi me sala mwa mambu, beto zolá kanisa ve ti yandi me sala yawu na makanisi ya yimbi. Beto me lunga kupesa mpangi ya beto buzitu mpe kutala ti yandi me lutila beto. —Tanga Baroma 12:10; Flp. 2:3.

15. Na banani beto me lunga kulakisa ntima ya kyadi mpe ya mbote?

¹⁵ Lakisa ntima ya kyadi mpe ya mbote na bantu nyonso. Si beto ke na nsatu ya kuvanda ntangu nyonso na kati ya dikanda ya Yehova, beto me lunga kusadila mambu ya Biblia na luzingu ya beto. Na kifwani, Yesu zonzá ti beto zolá lakisa ntima ya kyadi mpe ya mbote na bantu nyonso, ata mpe na ba yina ke yiiná beto. (Luke 6:32-36) Bantangu ya nkaka, ya lenda vanda mpasi na beto na kusala yawu. Si ya ke ni faso yina, beto zolá longoka kukanisa mpe kusala bamambu faso Yesu. Ntangu beto ke salá nyonso samu na kulanda misiku ya Yehova mpe kifwani ya Yesu, beto ke lakisá na Tata ya beto ya zulu ti, beto ke na nsatu ya kuvanda ntangu nyonso na kati ya famiye ya yandi.

16. Wapi bamambu beto zolá sala ve samu na kutalisa nkumbu ya Yehova mpe famiye ya yandi nsoni?

¹⁶ Samu nge ke na kati ya dikanda ya Yehova, kutalisa ve nkumbu ya yandi nsoni. Na kati ya bafamiye, baleki ke landá mingi bamambu yina ke salá bayaya ya bawu. Si bayaya ke landá bamambu yina Biblia ke zonzá, ba ke vanda ba-ekzample ya mbote samu na baleki ya bawu. Kasi, si bayaya me banda kusala bamambu ya yimbi, baleki mpe lenda sala faso bawu. Na kati ya famiye ya Yehova, bamambu mpe ke salamá faso yayi. Si mpangi mosi yina ke ya kukangama na Yehova depwi ntama me banda kuzonzila yimbi ya organizasion ya Yehova to mase nata luzingu ya yimbi, bampangi lenda banda kusala faso yandi. Ba yina ke salá faso yayi ke talisá nkumbu ya Yehova mpe ya dikanda ya yandi nsoni. (1 Tes. 4:3-8) Beto manga kulanda ba yina nyonso ke ve ba-ekzample ya mbote. Mpe beto zolá bika ata kima kubebisa kikamarade ya beto na Yehova.

17. Wapi makanisi beto zolá losa mpe samu na yinki?

¹⁷ Tula ntima ya nge na Yehova, kasi na mbongo ve. Yehova zonzá ti yandi ke pesa beto madya, bilele mpe kisika ya kuvanda si beto tula Kimfumu ya yandi na plase ya ntete na luzingu ya beto mpe beto landa misiku ya yandi. (Nku. 55:22; Mat. 6:33) Si beto ndima mambu yayi, beto ke kanisa ve ti mbongo mpe bima ya yinza yayi lendá bumba beto to kupesa beto kilengi na luzingu. Beto zaba ti, faso kaka mosi ya kuzwa kizunu ya ntima ke ni ya kusala bamambu yina Yehova ke na zonzá na beto. (Flp. 4:6, 7) Ata beto ke na mbongo ya kusumba bima nyonso yina beto me zola, beto zolá yufula si beto ke vanda na ntangu mpe bangolo ya kukipe  bima yango. Bima yina ke na nge mase baka kwandi plase ya ntete na luzingu ya nge? Beto zimbana ve ti Nzambi ke na vingilá beto sala kisalu ya beto na kati ya dikanda ya yandi. Ya zola zonza ti beto zolá bika ve bima ya nkaka baka ntangu mpe ngolo yina beto zolá pesa na kisalu ya Yehova. Na ntangu ya Yesu, bakala mosi yina Yesu zonzá na kulanda yandi, mangá kusala yawu. Yandi vandá zola mingi bivwama yina vandá na yandi. Na yawu, yandi losá okazion ya nene ya kukuma mosi ya bana ya Yehova mpe kukwenda vanda na zulu. Beto sala ve faso yandi!—Mrk. 10:17-22.

18. Wapi bima ya nene mpe ya mbote ke kuzwa ba yina nyonso ke kuwá Yehova?

¹⁸ Ba yina ke kuwá Yehova ke kuzwa bweso ya kuzola yandi mpe ya kusadila yandi ntangu nyonso! Ba yina ke kuzwa luzingu ya ntangu nyonso awa na ntoto ke tala kilengi ya kukipe yinzo ya kitoko yina Yehova yidiká samu na bantu. Na bilumbu ke kwiza, Kimfumu ya Nzambi ke bongisa ntoto mpe bima nyonso yina ke na kati. Yesu ke katula bamambu nyonso ya yimbi yina kwizá ntangu Adam na Ève mangá kuvanda dyaka na kati ya dikanda ya Yehova. Yehova ke vumbula bamilion ya bantu mpe ke pesa bawu okazion ya kuzwa luzingu ya ntangu nyonso. Ba ke vanda na sante ya mbote mpe ba ke zinga na zulu ya ntoto yina ke kuma paradi. (Luke 23:42, 43) Ntangu ba yina ke vanda na ntoto ke kuma na banzutu ya kulunga, bawu nyonso ke vanda na ‘nkembo mpe lukumu’ yina David soniká.—Nku. 8:5.

19. Na yinki beto zolá kanisa ntangu nyonso?

¹⁹ Si nge ke na kati ya ‘kimvuka ya nene ya bantu,’ nge ke na kivuvu mosi ya kitoko. Zaba ti Nzambi ke zolá nge mpe yandi ke na nsatu nge vanda kaka na kati ya famiye ya yandi. Na yawu, sala nyonso samu na kusepelisa ntima ya yandi. Bilumbu nyonso ya luzingu ya nge, kanisa na babima ya mbote yina yandi me bumbila nge na mantwala. Pesa valere na nyonso yina Tata ya beto ya zulu me sala samu nge vanda kisadi ya yandi bubu yayi, mpe nge kuzwa kivuvu ya kusambila yandi ntangu nyonso.