1. Ngapi atu lizuvhu apa atu gazadara ko koyininke eyi ga sita Jehova?

APA atu gazadara ko koyininke eyi ga sita Jehova, ose nampo kuvhura tu lizuvhe ngwendi Ndafita ogu ga uyungire nonkango edi asi: “Nsene ni tara eguru, yirugana yomawoko goge, kwedi nonombungururu edi wa wapaikira pomavango gayo, muntu ngano yinke nye, o ka mu gazare, ndi munwamuntu o ka mu dingure?” (Epis. 8:3, 4) Ngwendi Ndafita, ose kuvhura tu lizuvhe asi tu vanunu mokutuhetakanesa neyi ga sita Jehova. Ano eyi kuvhura kututetukisa monkedi omu Jehova a tu pakere mbili. Nye natu ka dimburura asi Jehova kapi tupu ga pakerere mbili vantu wokuhova oAdamu naEva, nye ga va ninkire hena va hame kepata lyendi.

2. Yisinke ga harerere Jehova oAdamu naEva va rugane?

² Adamu naEva kwa kere vana vaJehova wokuhova ava ga sitire pevhu, ano Jehova kwa kere Guhyawo geharo. Age kwa harerere valikwali ava va kare nepata lyenene. Karunga kwa va tanterere asi: “Livhareni mu zwide evhu, makura ruvharo rweni ngaru li pangere.” (Gen. 1:28) Karunga kwa va harerere va kare novana ntani va pakere mbili evhu. Ngano asi oAdamu naEva va limburukwire Jehova nokurugana eyi ga va pulire, awo ngano va twikilire kuhama kepata lyaJehova kumwe novana vawo.

3. Morwasinke tuna kuuyungira asi oAdamu naEva kwava pere situmbukira somulyo mepata lyaJehova?

³ Adamu naEva kwa kere nositumbukira somulyo mepata lyaJehova. MEpisarome 8:5 Ndafita kwa uyungire kuhamena  vantu ava ga sita Jehova asi: “Ove kwa mu hupisira ko kokanunu-nunu . . . yiyo wa mu pa efumano nouyerere.” Yimo, vantu kapi vava sita va hetakane novaengeli mononkondo nomonondunge. (Epis. 103:20) Nye nampili ngoso, vantu va lisiga unene novaengeli. Ayo kutetukisa sili! Jehova kwa pere vakurona vetu wokuhova eparu lyewa.

4. Yisinke ya horokera oAdamu naEva morwa kudira kulimburukwa Jehova ntani yisinke natu kazogera mosirongwa esi?

 ⁴ Nye ehudi, oAdamu naEva kapi va twikilire kukara mepata lyaJehova. Ngomu natu ka yi lironga mosirongwa esi, natu kadimburura asi eyi va rugene kwa retera ruvharo rwawo maudigu. Nye sitambo saJehova kapi sa litjindja. Age ana hara vantu wovalimburukwi va kare vana vendi dogoro narunye. Pomuhowo, tu zeni tu ka zogere omu Jehova ga yi likida asi ose mulyo kwendi. Ntani natu ka zogera eyi twa hepa kurugana ngesi tu hame kepata lyaKarunga. Ano konyima natu ka zogera yininke yoyiwa eyi ngava ka hafera narunye vantu ava va hamena kepata lyaJehova.

5. Ngapi natu likida rupandu kwaJehova kweyi ga tu sita noyikara ngwendi yendi?

⁵ Jehova kwayi likida asi ose mulyo pokutusita tu mu fane moyikara. (Gen. 1:26, 27) Mokumona asi ose kwa tu sita tu mu fane, ose kuvhura kutunga po yikara ngwendi eharo, nkenda, ulimburukwi ntani uhungami. (Epis. 86:15; 145:17) Nsene tu tunga po yikara eyi, ose ngatu likida efumadeko kwaJehova ntani ngatu likida rupandu kweyi ga tu ruganena. (1 Pet. 1:14-16) Ose ngatu hafa nsene tu rugana eyi ayi hafesa Guhyetu gemeguru. Mokumona asi age kwa tu sita tu mu fane, Jehova kwa tu pa evhuliko lyokurugana ko yuma yipo tu vhure kukara vantu ava ga harera mepata lyendi.

6. Ngapi ga yi likida Jehova asi vantu mulyo apa ga sitire evhu?

⁶ Jehova kwa tu wapaikira embo lyewa. Komeho Jehova a site muntu gokuhova, age kwa sitire evhu yipo likare embo lyovantu. (Joba 38:4-6; Jer. 10:12) Mokumona asi Jehova ga kara neharo ntani nougavi, age kwa sita yininke yoyinzi yipo tu yi hafere. (Epis. 104:14, 15, 24) Poyiruwo yimwe, age nga gazadara ko kweyi ga sita ntani nga yi ‘tara asi yina wapa.’ (Gen. 1:10, 12, 31) Jehova kwa yi likida asi muntu mulyo, pokumutumba a kare “mupangeli” goyininke nayinye eyi ga sita pevhu. (Epis. 8:6) Sitambo saJehova kuna kara asi vantu wokusikilira mo ngava ka pakere mbili yininke nayinye eyi ga sita. Ove nkenye apa kupandura Jehova koyininke yoyiwa eyi ga tumbwidira ndi?

7. Ngapi etjangwa lyaJosuwa 24:15 lya yi likida asi vantu kwa kara noumanguruki wokutura po matokoro?

⁷ Jehova kwa tu pa umanguruki wokutura po matokoro. Ose kuvhura kutokora nyamwetu eyi tuna hara kurugana meparu. (Resa Josuwa 24:15.) Jehova kuhafa apa atu tokora kumukarera. (Epis. 84:11; Yis. 27:11) Ose kuvhura tu ruganese umanguruki ou pokutura po matokoro gomawa. Tu tareni sihonena esi ga tulire po Jesus.

8. Gava sihonena omu Jesus ga ruganesere umanguruki wendi pokutura po matokoro.

⁸ Ose kuvhura kuhonena Jesus pokutura yihepwa yovakwetu muhowo kupitakana yetu. Sikando simwe apa Jesus novapositoli vendi va rorokere, awo kwa zire kevango limwe lyokulimwenena yipo va ka pwizumuke. Nye kapi va pwizumukire. Mbunga zonene kwa va kweme, ano awo kwa here Jesus a va ronge. Nye Jesus kapi ga handukire. Age kwa fililire vantu nkenda. Yisinke ga rugene  Jesus? “Makura ta tameke kuvaronga yoyinzi.” (Mar. 6:30-34) Apa atu ruganesa siruwo setu nononkondo detu pokuvatera wopeke, ayo kugava efumano lyenene kwaGuhyetu gemeguru. (Mat. 5:14-16) Ntani ose ngatu yi likida asi tuna hara kuhamena kepata lyendi.

9. Uhwi musinke womulyo ga gava Jehova kovakurona?

⁹ Jehova kwa pa vantu evhuliko lyokukara novana ntani nositumbukira sokuvaronga va mu hare noku mukarera. Nsene asi ove mukurona, wa kara norupandu kouhwi owo womulyo ga ku pa Jehova ndi? Nampili ngomu Jehova ga pa vaengeli situmbukira somulyo, nye age kapi ga va pa evhuliko lyokukara novana. Yipo nye, nsene wa kara novanona wa hepa kuhafera situmbukira oso. Vakurona kwa va pa situmbukira somulyo sokurera vana vawo “kuliza neyi ga hara Hompa.” (Efe. 6:4; Deut. 6:5-7; Epis. 127:3) Mokuvatera vakondi va ronge vana vawo, mbunga zaJehova kwa pwagesa yiruganeso yokuliza noBibeli ngwendi yimbapiratjangwa, novidiyo, nonsumo ntani yirongwa yokointaneta. Eyi kulikida asi Guhyetu gemeguru naMunwendi Jesus kwa hara vanonagona. (Ruk. 18:15-17) Apa vakurona ava huguvara mwaJehova nokupakera mbili vana vawo, ayo kumuhafesa sili unene. Ano monkedi zangoso, vakondi kuvatera vana vawo yipo nawo va ya hame kepata lyaJehova.

10-11. Yisinke ngasi ka sikisa mo sizoweseso?

¹⁰ Jehova kwa geve Munwendi gelike a huru yipo nose tu hame hena kepata lyendi. Ngomu vana yi tumbura  moparagarafu 4 Adamu naEva kapi hena va ya heme kepata lyaJehova kukwatera mo noruvharo rwawo. (Rom. 5:12) Adamu naEva kwa tokwere kudira kulimburukwa Jehova. Yipo nye, awo va hepere kuvagusa mo mepata lyaJehova. Nye yinke ngayi horokera epata lyawo? Jehova kwa tulire po ewapaiko yipo vana vawo ava ava mulimburukwa va hame hena kepata lyendi. Age kwa yi rugene eyi pokugava nzambo zaMunwendi a huru Jesus Kristusa. (Joh. 3:16; Rom. 5:19) Nzambo zaJesus kwa ninkisa vantu 144 000 wokulimburukwa yipo va kare vana vaKarunga.—Rom. 8:15-17; Ehor. 14:1.

¹¹ Ntani hena, mamiliyona govakareli vaKarunga wovalimburukwi kuna kurugana mpango zendi. Awo ngava ka hamena kepata lyaKarunga konyima zeheteko lyokuhulilira kehagero lyonomvhura eyovi. (Epis. 25:14; Rom. 8:20, 21) Mokumona asi va kara nehuguvaro olyo, awo kutumbura Jehova asi ‘Guhyawo.’ (Mat. 6:9) Vantu ava ngava ka vhumbura, nawo ngava kalironga eyi Jehova ga va harera va rugane. Ano ava ngava ka limburukwa nompango dendi, nawo ngava ka hama kepata lyaJehova.

12. Epuro musinke natu ka limburura ngesi?

¹² Ngomu tuna yi mono, yininke yinzi ga rugana Jehova mokulikida asi vantu mulyo. Age ga ninka vagwaveka va kare vana vendi ntani age kwa tumbwidira “emukurumbunga” mokukakara vana vendi mouzuni woupe. (Ehor. 7:9) Yisinke natu rugana ngesi mokuyilikida asi tuna hara kuhama kepata lyaJehova dogoro narunye?

13. Yisinke natu rugana yipo tu hamene kepata lyaJehova? (Marukusa 12:30)

¹³ Likida eharo lyoge kwaJehova, pokumukarera nomutjima goge nagunye. (Resa Marukusa 12:30.) Karunga kwa tu pa mauhwi gomanzi, nye uhwi umwe wounene ou ga tu pa kuna kara pokumukarera. Ose kulikida Jehova asi twa mu hara pokulimburukwa nompango dendi. (1 Joh. 5:3) Mpango zimwe ezi a na tu harere Jehova tu limburukwe kuna kara ezi ga tu pere Jesus zokutulisa  po varongwa nokuvakuhwa. (Mat. 28:19) Age hena kwa tu pangera tu lihara-hare. (Joh. 13:35) Jehova nga tambura navenye ava ava mulimburukwa yipo va hamene kepata lyendi lyouzuni mudima.—Epis. 15:1, 2.

14. Ngapi omu natu likida eharo wopeke? (Mateusa 9:36-38; Varoma 12:10)

¹⁴ Likida eharo wopeke. Eharo kuna kara sikara sosinene po saJehova. (1 Joh. 4:8) Jehova yige ga hova kutulikida eharo komeho tu ya mu dive. (1 Joh. 4:9, 10) Ose kumuhonena apa atu likida eharo wopeke. (Efe. 5:1) Nkedi zimwe zomulyo unene omu natu likida wopeke eharo, kuna kara pokuvavatera va lironge kuhamena Jehova paapa sina kara ko siruwo. (Resa Mateusa 9:36-38.) Nsene tu rugana ngoso, awo ngava diva eyi nayi va vatera yipo va hame kepata lyaJehova. Konyima zapa gumwe a gwana ekuho, ayo ya kara nomulyo tu mu hare nokumufumadeka. (1 Joh. 4:20, 21) Ngapi natu yi rugana? Nkedi zimwe omu natu yi rugana kuna kara pokumuhuguvara ntani nokufumadeka etokoro eli ana tura po. Pasihonena, ose kapi ngatu kara nomutaro gomudona nsene ana tura epuko lyongandi. Nye ose ngatu mu fumadeka nokumutara asi ga tu pita mekuto.—Resa Varoma 12:10; Fil. 2:3.

15. Wolye ava natu likida nkenda nombili?

¹⁵ Likida nkenda nombili kovantu navenye. Nsene tuna hara kuhama kepata lyaJehova narunye, twa hepa kutura pasirugana nonkango dendi momaparu getu. Jesus kwa rongere asi twa hepa kukara nonkenda nombili kovantu navenye kukwatera mo nonkore detu. (Ruk. 6:32-36) Poyiruwo yimwe, kuvhura yi tu karere udigu kuyirugana. Nsene yimo ngoso, twa hepa kuhonena Jesus monkedi omu nga gazara nomu nga rugana yininke. Apa atu rugana paapa twa hulira tu limburukwe Jehova noku honena Jesus, ose ku yi likida kwaGuhyetu gemeguru asi tuna hara kuhama kepata lyendi dogoro narunye.

16. Ngapi natu popera epata lyaJehova?

¹⁶ Popera epata lyaJehova. Mepata, munona gomumati nkenye apa kuhonena eyi a rugana mukurwendi gomumati. Nsene munona gomumati gomukondi a sikisa mo nompango doBibeli meparu lyendi, age nga tulira po mumbyendi sihonena sosiwa. Nsene munona gomukondi a tameka kurugana yoyidona, mumbyendi nage kuvhura kumuhonena. Ayo ya lifana nepata lyaJehova. Nsene Mukriste a kara murwanesi ndi a tameka kurugana yininke yoyidona, vamwe kuvhura ngava mu honene. Vantu ava ava rugana yininke oyo, kuswaukisa epata lyovakareli vaJehova. (1 Tes. 4:3-8) Yipo nye, twa hepa kunyokera po kukwama yininke yoyidona ntani na nkenye eyi nayi tu gusa ko kwaGuhyetu geharo.

17. Yisinke twa hepa kunyokera po kugazara ntani morwasinke?

¹⁷ Huguvara mwaJehova mevango lyokuhuguvara moyininke yopanyama. Jehova kwa tu tumbwidira asi ngatu pa nondya, yidwara ntani nomararo nsene tupu tu tura muhowo Uhompa nokulimburukwa nompango dendi. (Epis. 55:22; Mat. 6:33) Nsene tu huguvara etumbwidiro olyo, kapi ngatu gazara asi yininke yomouzuni ou ngayi tu popera noku turetera ruhafo rokukarerera. Ose twa yi diva asi nkedi zimwe tupu omu natu kara nombili kuna kara pokurugana mpango zaJehova. (Fil. 4:6, 7) Nsene tu randa yininke yoyinzi, twa hepa kugazadara ko nsene ngatu kara nosiruwo nononkodo doku yipakera mbili. Ose twa hara unene yiweka yetu ndi? Twa hepa kudiworoka asi Karunga kwa tu pa yirugana eyi twa hepa kurugana mepata lyendi.  Eyi kutanta asi twa hepa kunyokera po yininke eyi nayi tu donganesa. Kapi tuna hara kukara ngwendi mugara ogu ga nyokere kukwama Jesus morwa kwa here eyi ga wekere.—Mar. 10:17-22.

18. Mpito musinke ngava gwana vantu wovalimburukwi ntani mauwa musinke ngava ka hafera?

¹⁸ Vantu wovalimburukwi ngava ka gwana mpito zoku hara Jehova noku ka mu karera dogoro narunye! Ava va kara nehuguvaro lyokukaparukira pevhu, ngava ka hafera kupakera mbili uzuni ou ga sita Karunga. Uhompa vaKarunga ntaantani tupu u ka wapukurure uzuni nanayinye eyi ya kara mo. Jesus nga ka gusa po maudigu nagenye aga ga wiza po morwa eyi va rugene oAdamu naEva. Jehova nga ka vhumbura mamiliyona govantu nokukavapa mpito va ka paruke narunye moparadisa moukanguki wokusikilira mo. (Ruk. 23:42, 43) Apa vakareli vaJehova vepevhu ngava ka sikilira mo, awo ngava ka gwana “efumano nouyerere” ngwendi moomu tupu gayi tjenge Ndafita.—Epis. 8:5.

19. Yisinke twa hepa kudiworoka?

¹⁹ Nsene asi ove kwa hamena kemukurumbunga, ove kwa kara nehuguvaro lyewa. Karunga kwa ku hara ntani ana hara o hamene kepata lyendi. Yipo nye, rugana paapa wa hulira yipo o mu hafese. Diworoka nkenye ezuva matumbwidiro aga nga ka sikisa mo Karunga. Hafera kukarera Jehova nkenye ezuva ntani nokumuhamberera narunye!