1. Ntia biyuvu tulendi tiyula bu tudimbitilaka mu bima biabiansoni bia sala Yehova?

BU TUDIMBITILAKA mu bima biabiansoni bia sala Yehova, tulendi kwizi bâ na mabanza mamosi na Davide wasambila ebu: “Bu nimonaka mazulu maku, bisalu bia milembo miaku, ngonda na mbwetete zi wakubika. Ngano muntu ni nani ngatu wamubanzila, mpe mwana muntu ni nani ngatu wamukipa?” (Mik. 8:3, 4) Ntiana Davide, mbo tuyitukuku bu tubakulaka ti ni bu sa ti tibuka tia fioti kwa tie neto mu nza, Yehova mbo katukipaka beto bansoni. Kâ, ntiana bu tumona wo, Yehova mbo keri kipaka bantu ba ntete, Adame na Eva, mpe mu kanda diandi beri.

2. Ngano Yehova ntia kani dieri nandi mu bungu dia bala bandi ba ntete ba ha mutoto?

² Adame na Eva beri bala ba ntete ba Yehova ha mutoto, mpe Yehova weri Tata’awu dia luzolo dia ku mazulu. Weri nandi ti bantu bo ba bole babutana, mpe babâ kanda. Wabatêla ti: “Funaneno mpe bêno babingi, fuluseno mutoto mpe yâleno wo.” (Mba. 1:28) Wafwanakana babâ na bala, mpe batomo kipa mutoto. Tala ti batumamana mu misamu Nzambi mi keri ba lombaka mu yirika, Adame, Eva, na bala bawu mbo baketi bâ mankululu mu kanda dia Nzambi.

3. Mu bungu dia nti tulendi têla ti Adame na Eva tibuka tia mbote tieri nawu mu kanda dia Yehova?

³ Adame na Eva tibuka tia mbote tieri nawu mu kanda dia Yehova. Mu Mikunga 8:5 na mu note ya verse yo, Davide wazonzela mpila Yehova yi kasarila muntu bu katâ: “Fioti kwa fiakondo konga wamusa ntiana bambazi, mpe wamulwika mpu ya  mukembo na ya buzitu.” Wa matieleka, bantu ka bena na lenda, na mayela mpe na ngolo zimosi ko na bambazi. (Mik. 103:20) Kâ, bantu “fioti kwa fiakondo” mu bâ ntiana mbazi zo ze na ngolo. Wa nkatika wa nzitukulu wena! Yehova bu kasala bibuti bieto bia ntete, wabahana luzingu lwa nkatika lwa toma.

4. Ngano nti biaturila Adame na Eva mu bungu ti bakolamana Yehova, mpe nti tuzonzela mu timoko ti?

 ⁴ Musamu wa tiari, Adame na Eva bahombesa tibuka tiawu mu kanda dia Yehova. Musamu wo wanatina bala bawu mpasi zazingi, ntiana bu tumona wo mu timoko ti. Kâ, kani dia Yehova ka diasoba ko. Zololo ti bantu bamutumamanaka babâ bala bandi ntangu zazansoni. Ntete-ntete, mbo tuzonzela ka bwe Yehova keka tu songela ti ntalu twena kwe Yandi. Ha manima, mbo tuzonzela ka bwe tulendi sa bwawu bu mu songela ti tuzololo tabâ na tibuka mu kanda dia Nzambi. Mpe ku nsuka, mbo tuzonzela tusakumunu twa mankululu tu baka bala ba Yehova babâka ha mutoto.

5. Mu bungu ti watusala mu tifwani tiandi, bwe tulendi kembela Nzambi?

⁵ Yehova wasongela ti ntalu twena kwe Yandi bu katusala mu tifwani tiandi. (Mba. 1:26, 27) Mu bungu ti Nzambi watusala mu tifwani tiandi, tulendi longoka, mpe tulendi sarila bifu biandi bia toma, ntiana luzolo, tiari tia mutima, tifu tia kwikama na buderede. (Mik. 86:15; 145:17) Bu tukwe sariri ngolo mu bâ na bifu bio, mbo tukembela Yehova, mpe mbo tusongela ti tonda tumutondaka. (1 Pi. 1:14-16) Bu tudiatilaka mu mpila yitâka Tata’eto dia ku mazulu nsayi, mbo tubâka mu nsayi. Bu katusala mu tifwani tiandi, Yehova watuhana lenda dia bâ mpila ya bantu ba kazololo mu kanda diandi.

6. Bwe Yehova kasongela ti bantu ntalu bena mu ntangu yi kasala mutoto?

⁶ Yehova watukubikila nzo ya nzitukulu. Ntangu zazingi ntete kasala bakala dia ntete, Yehova watikubikila mutoto mu bungu dia bantu. (Yobe 38:4-6; Yer. 10:12) Mu bungu ti nsayi ye nandi mpe kaba kakabaka, Yehova wasala bima biabingi bia toma mu bungu dia beto, ngatu tamona nsayi. (Mik. 104:14, 15, 24) Ntangu zakaka, bu keri banzaka mu bima bi kasala, mbo keri monaka ti bia nkatika bia mbote bieri. (Mba. 1:10, 12, 31) Wasongela ti bantu ntalu bena bu kabahana lutumu mu bima biabiansoni bi kasala bia nzitukulu ha mutoto. (Mik. 8:6) Nzambi zololo ti bantu ba lunga bamona nsayi ya kipaka bima bio biabiansoni bia toma ntangu zazansoni. Ngano mbo vulu tondaka Yehova mu bungu dia kani dio dia toma?

7. Ngano bwe Yoswa 24:15 yisongelaka ti bantu timpwanza tia sola tie nawu?

⁷ Yehova watuhana timpwanza tia sola. Tulendi sola ka nti tusa mu luzingu lweto. (Tanga Yoswa 24:15.) Nzambi’eto ya luzolo mbo kabâka mu nsayi mu ntangu yi tusolaka mu mu sarila. (Mik. 84:11; Bin. 27:11) Tulendi sarila timpwanza tieto tia sola mu mpila zazingi. Tataleno mpila Yezu yi kasarila tio.

8. Hana tifwani tita songela mpila Yezu yi kasarila timpwanza tiandi tia sola?

⁸ Tulendi landa tifwani tia Yezu bu tusola mu tekesa nsatu za bantu bakaka ntete za beto beni. Lumbu timosi, Yezu na ntumwa zandi ba nguria ba fwatika beri, mpe bayenda ku mbuka ya dzuna ngatu bahuma. Kâ ka babaka ntangu ya huma ko. Pôka dia bantu diabadzukula, mpe mbo beri dingaka na timina diadiansoni ti Yezu kabalongesa. Kâ Yezu ka fwema ko, wamona tiari mu bungu dia bantu bo. Ngano Yezu nti kasa? Wabatika mu ba longesa misamu miamingi. (Mak. 6:30-34) Bu tulandaka tifwani  tia Yezu mu sarila ntangu’eto na ngolo zeto mu bakisa bantu bakaka, mbo tukembelaka Tata’eto dia ku mazulu. (Mat. 5:14-16) Mpe mbo tusongelaka kwe Yehova ti tuzololo tabâ mu kanda diandi.

9. Ngano Yehova ntia kabu dia nzitukulu kahana kwe bantu?

⁹ Yehova wahana bantu lenda dia bâ na bala, na dema dia ba longesa mu mu zolo na mu mu sarila. Tala ti nge tibuti tiena, ngano kabu dio dia nzitukulu dia zoloko? Ni bu sa ti Yehova watomo sakumuna bambazi, ka bena na lenda dio ko. Buna, tala ti nge tibuti tiena, songela ti mbo tondaka mu bungu dia bweso bo bwa sansa bala. Yehova wahana kwe bibuti, dema dia mfunu dia sansa bala “mu mitieno na ndwengosolo za Yehova.” (Efz. 6:4, NWT; Lub. 6:5-7; Mik. 127:3) Mu bakisa bibuti, organizasio ya Nzambi mbo yidukisaka bisalulu biabingi bisikamanaka mu Bibila, ntiana mikanda, video, mikunga na bima biakaka mu Internet. Wa matieleka, Tata’eto dia ku mazulu na Mwana’andi batomono zolo bantwenia. (Like 18:15-17) Bibuti bu bisikirilaka Yehova, mpe bu bisarilaka ngolo zawu zazansoni mu kipa bala bawu ba ntalu, Yehova mbo kayangalalaka. Mpe bibuti bia mpila yo, mbo bihanaka bweso kwe bala bawu bwa bâ mu kanda dia Yehova ntangu zazansoni!

10-11. Ngano Yehova ntia bweso katuhana mu nzila ya nkûlulu?

¹⁰ Yehova wahana Mwana’andi wa ntalu, ngatu tavutu bâ na bweso bwa bâ mu kanda diandi. Ntiana bu tuzonzele wo mu  paragrafe 4, Adame na Eva bahombesa tibuka tiawu mu kanda dia Yehova, mpe bahombesa tibuka tia bala bawu. (Rom. 5:12) Adame na Eva basola mu kolamana Nzambi, buna wafwanakana babakatula mu kanda diandi. Kâ, nti biaketi turila bala bawu? Yehova bantu ba kazololo, ntiangu kahana bweso kwe bala bawu batumamanaka babâ mu kanda diandi. Wasila bo mu nzila ya mukayulu wa Mwana’andi wa wumosi, Yezu Kristo. (Za 3:16; Rom. 5:19) Mu nzila ya mukayulu wo, bantu 144 000 ba kwikama bakwizi bâ bala ba Nzambi.​—Rom. 8:15-17; Nza. 14:1.

¹¹ Milio za bantu bakaka ba kwikama basarilaka luzolo lwa Nzambi. Tivuvu tie nawu tia bâ mu kanda dia Nzambi, ha manima ma ntontolo za mansukina zibatika ha manima ma luyalu lwa mvula 1 000. (Mik. 25:14; Rom. 8:20, 21) Mu bungu ti tivuvu tio tie nawu, tûka lumbu ti mbo batâka Mvangi’awu Yehova: “Tata” (Mat. 6:9) Bô bavumbuka kwe ba fwa, mbo babâ mpe na bweso bwa longoka misamu Yehova mi kakêlaka mu bawu. Bô basola mu tumamana lutwalusu lwandi, bawu mpe mbo bakwizi bâ mu kanda diandi.

12. Ntia tiyuvu tuhanina mvutu bwawu bu?

¹² Ntiana bu tuta wa mona, Yehova wabonga nzengolo ya zangula bantu mu mpila zazingi. Watisolela Bakristo ba tumbu babâ bala bandi, mpe wahana tivuvu kwe yungi dia bantu mu kwizi bâ bala bandi mu nza ya môna. (Nza. 7:9) Ngano nti tulendi sa lumbu ti mu songela kwe Yehova ti tuzololo tabâ mu kanda diandi mankululu

13. Nti tulendi sa mu bâ mu kanda dia Nzambi? (Mak 12:30)

¹³ Songela luzolo lwaku mu Yehova bu mu sarila mu mutima’aku wawansoni. (Tanga Marke 12:30.) Mu bima biabiansoni bia tu hana Nzambi na nsayi yayansoni, kampe dimosi dia makabu ma manene, ni lenda dia mu sambila. Mbo tusongelaka ti Yehova Yandi tuzololo, bu tutumamanaka ntumunu zandi. (1 Za 5:3) Mu ntumunu Yehova zi kazololo tatumamana, mwe na ntumunu ya hana Yezu  ya kubika milongoki na ya ba batisa. (Mat. 28:19) Watulomba mpe mu zolosono beto na beto. (Za 13:35) Yehova mbo katambula bantu batumamanaka ntumunu zandi mu kanda diandi dia mu nza ya mukaka dia bisari biandi bia kwikama.​—Mik. 15:1, 2.

14. Bwe tulendi songela luzolo kwe bantu bakaka? (Matie 9:36-38; Bisi-Rome 12:10)

¹⁴ Songela luzolo kwe bakaka. Luzolo ni tifu tia ntete tia Yehova. (1 Za 4:8) Yehova watoko tu zolo ntete tamuzolo. (1 Za 4:9, 10) Mbo tulandaka tifwani tiandi, bu tusongelaka luzolo kwe bakaka. (Efz. 5:1) Mpila yimosi ya mbote yi tulendi songela kwe bantu ti bawu tuzololo, ni mu ba bakisa mu longoka mu zaba Yehova bwawu bu bu tatiri na ntangu. (Tanga Matie 9:36-38.) Bu tubabakisaka, balendi kwizi longoka mu zaba misamu mie nawu nsatu mu kota mu kanda dia Nzambi. Muntu bu kamana batusu, ha manima tufweti tatamana mu mu zolo na mu mu zitisa. (1 Za 4:20, 21) Bwe tulendi wa sila? Mbo tubâ na lukwikulu mu yandi. Mu tifwani, tala ti ka tuta bakula ko ka mu bungu dia nti kata yirika musamu, ka tubanza ko ti mabanza ma bwimi me nandi. Kâ, mbo tusongela buzitu kwe mpangi’eto bu tumubongela ntiana’eti yandi tu yôkele.​—Tanga Bisi-Rome 12:10; Flp. 2:3.

15. Kwe banani tufweti songela tiari na nsayi?

¹⁵ Fwilaka bantu babansoni tiari, mpe basongelaka nsayi. Tala ti tuzololo tabâ mu kanda dia Yehova ntangu zazansoni, tufweti sarila Zu dia Nzambi mu luzingu lweto. Mu tifwani, Yezu walongesa ti tufweti songela tiari na nsayi kwe bantu babansoni, na kwe mbeni zeto mpe. (Like 6:32-36) Ntangu zakaka tulendi mona ti musamu wa mpasi wena kwe beto mu sila bo. Tala ti ni bo, tulendi longoka mu banza na mu diatila ntiana Yezu. Bu tusarilaka ngolo mu tumamana Yehova na mu landa tifwani tia Yezu, mbo tusongelaka kwe Tata’eto dia ku mazulu ti tuzololo tabâ mu kanda diandi ntangu zazansoni.

16. Ngano bwe tulendi kengerela nkumbu ya kanda dia Yehova?

¹⁶ Kengerela nkumbu ya kanda dia Yehova. Mu kanda, mwana wa fioti mbo kavulu landaka bifu bia yaya’andi. Tala ti yaya mitieno mia Bibila kasarilaka mu luzingu lwandi, mbo kabâ tifwani tia mbote mu bungu dia mpangi’andi. Tala ti yaya batikiri mu yirika misamu mia mbi, mpangi’andi lendi landa tifwani tiandi tia mbi. Mpila mosi kwa mpe mu kanda dia Yehova. Tala ti Mukristo wa kwikama wubatikiri mu bâ na mbanzulu za ba-aposta, peleko weka sarila bunsuza, peleko weka diatila mu mpila yakaka ya mbi, Bakristo bakaka balendi landa ndiatulu’andi ya mbi. Bô badiatilaka bo, mbo babebesaka nkumbu ya kanda dia Yehova. (1 Tes. 4:3-8) Ka tufweti’â talanda bifwani bia mbi ko, mpe ka tufweti’â tabika na kani tima ko tiatunata mala na Tata’eto dia ku mazulu dia luzolo.

17. Ntia mpila mbanzulu tufweti lembo landa, mpe mu bungu dia nti?

¹⁷ Sikirila Yehova, kani wasikirila bima bia tinsuni. Yehova watukanisina ti mbo katuhana bidia, binkuti na bibuka bia bêla tala ti tutûriri Timfumu tiandi ha tibuka tia ntete, mpe tudiatiri mu mitieno miandi mia buderede. (Mik. 55:22; Mat. 6:33) Tamana kwikila mu kani dio, ka tubanza ko ti bima bia tinsuni bia nza yi mbo bitukengerela, mpe ka tubanza ko ti mbo bitutâ nsayi ya matieleka. Tuzebi ti mpila ya yimosi ya bâ na tidzunu tia mutima tia matieleka, ni mu sarila luzolo lwa Yehova. (Flp. 4:6, 7) Ni bu sa ti lenda die neto dia sumba bima biabingi, tufweti tiyula tala ti wa matieleka ntangu ye neto na ngolo za sarila bio na za kipa bio. Ngano mutima’eto mu bimvwama wena? Tufweti bambukaka  ti Nzambi, tisalu katuhana mu kanda diandi. Wuzololo tâ ti ka tufweti’â tabâ na mabanza yeko-yeko ko. Ka tuzololo’â ko tabâ ntiana ntwenia ya bakala yatomo zolo bima bieri nandi, mpe wakala mu landa Yezu. Buna, wahombesa bweso bwa sarila Yehova na bwa bâ mosi wa bala bandi.​—Mak 10:17-22.

18. Ngano bantu batumamanaka ntia bweso, mpe ntia tusakumunu twa mankululu babaka?

¹⁸ Bantu batumamanaka mbo babaka bweso bwa bunene bwa zolo na bwa sambila Yehova mankululu! Bô mpe bê na tivuvu tia bâ ha mutoto, mbo babâ na nsayi ya kipa mutoto wa toma, Yehova wu kasala mu mpila ya lunga, mpe ye nzo’awu. Ntamana mutoto na bima biabiansoni bie ha mutoto mbo bibâ bia môna mu nzila ya luyalu lwa Timfumu tia Nzambi. Yezu mbo kakatula misamu mia nata bukolo bwa Adame na Eva bu babonga nzengolo ya katuka mu kanda dia Nzambi. Yehova mbo kavumbula milio za bantu bafwa, mpe mbo kabahana bweso bwa bâ mankululu na tikolela tia lunga ku Paradi. (Like 23:42, 43) Malembe-malembe, kanda dia bisari bia kwikama bu dikwizi bâ dia lunga, muna muntu mbo kakwizi bâ na mukembo mpe na buzitu bwa zonzela Davide.​—Mik. 8:5.

19. Ntia musamu tufweti bambukilaka?

¹⁹ Tala ti mu “yungi dia bantu” wena, tivuvu tia toma tie naku. Nzambi nge kazololo; zololo ti wabâ mu kanda diandi. Buna, sa miamiansoni mi lenda mu mu tâ nsayi. Bilumbu biabiansoni, bâka na makani ma Nzambi mu mabanza maku na mu mutima’aku. Yangalala mu bweso bwaku bwa sambila Tata’eto dia ku mazulu, mpe zolo tivuvu tiaku tia kembela Yehova mankululu!