1. N’nga pyofuka viivi vinokaana i-yo nathuulelanga vyothene vipanduchile Yohova?

NATHUULELENGA vyopanduchiwa vyevyo vipanduchile Yohova, ninooda vivwa ninga wamasalimo Davide wenuo alembile ira: “Miyo ndaing’ana dhulu, basa la vibuno vinyu, mwedi na nyenyedi visaka-edhile nyo, mutu okwa mbaani ira mumthulelenga, na mwanamutu okumela tumbuluni mbaani ira mumsamalenga?” (Sal. 8:3, 4) Mofwanafwana na Davide ninoona limburo loyeva lelo linokala i-yo na vyopanduchiwa vyothene nodabwa ira Yohova unonithuulela. Ninga vinofuna i-yo ona, kai ira Yohova aona atu oroma Adamu na Eva ninga atu oroma baa-i mbwenye ninga atu a banjani mwee.

2. N’nga ifunelo ya Yohova waa-imee oroma vailambo yavathi ali yoi a-vi?

² Adamu na Eva tali a-ima oroma baliwa vailambo yavathi thitho Yohova ali Babiwa waudhivela wadhuludhulu. Liye adedi-edha ira banjali likale anamabala aatu. Ngumwasiwa Nlungu atoonga ira: “Mubalane mwiinjive mudhali-e ilambo yothene yavathi, thitho mwiing’anele.” (Maro. 1:28) Ee-no tanofwanela kaana a-ima thitho samalela pama ilambo yavathi. Aakale ninga tatovwela no-arela ifunelo ya Yohova, Adamu na Eva vambo-i naa-imiwa tangakanle anamabala a banja la Nlungu lodhowa nodhowa.

3. Mwasiwa ngwan’ni ninooda onga ira Adamu na Eva tatowachela limburo lolemezeya mu banjani la Yohova?

³ Adamu na Eva tatokaana limburo lolemezeya vinjinji mu banjani la Yohova. Ninga vilembiwile va Salimo 8:5 na madhu a chindo, Davide atoonga vyevi voonga panduchiwa waatu  a Yohova. Voonga ira: “Mwatom’yevi-a vang’ono mofwanafwana na angelo ee-no mwatomwari-a titimi-o na lemezo ninga ichapowa yaumwene.” Pyaimbaimbari ira atu katiwachenle kopolo thitho zelu ninga angelo. (Sal. 103:20) Ee-no ‘atu mboyeveela’ mokwaranyedha vyopanduchiwa vya kopolo vyauzimu. Kathuulelani! Yohova atoava-a makolwi-u oroma maromelo apama.

4. N’nga chini jaireile na limburo la Adamu na Eva mu banjani la Yohova, thitho chini inofuna i-yo tapanya mu yofunjedha yei?

⁴ Pyatangaranga ira Adamu na Eva tatoluza ngari yokala mu banjani la Yohova. Vyo-arelavo viwa ali vyothakala wa maziziwa ninga vinofuna i-yo ona mu yofunjedha yei. Mbwenye ifunelo ya Yohova kichinjile. Liye unofuna ira atu ovwela takale a-imee odhowa nodhowa. Va ee-ni dhoweni nitapanyeni mwemo Yohova munilemezile liye. Vo-arela ninofuna nitapanye vinaire i-yo va ee-ni vyooni-a ira ninofuna kala ikundu ya banja la Nlungu. Vomari-a ninofuna nitapanye maraeli-o anofuna dhawachela a-ima a Yohova vailambo yavathi modhowa nodhowa.

5. Mwasiwa ngwan’ni ninofwanela msimba Nlungu mwasa onipanducha mwiifwanafwani-o yee?

⁵ Yohova utonilemeza vonipanducha mwiifwanafwani-o yee. (Maro. 1:26, 27) Mwasa oi nipanduchiwile mwiifwanafwani-o ya Nlungu, ninooda ulukuli-a nooni-a makalelwee manjinji ninga udhivela, tangaranga, roromeleya na longomana. (Sal. 86:15; 145:17) Nadhilimbi-edhanga kaana makalelo enala, ninolemeza Yohova nosikimizeli-a ira ninomdhiveliwi-a Babi-u wadhulu nakalanga aimwerumweru thitho vokwakwanana vina i-yo. (1 Pe. 1:14-16) Nairanga vyongo mu ndhila yomdhiveliwi-a i-yo thitho ninokala osangalala. Vonipanducha mwiifwanafwani-o yee Yohova utoniva-a zelu ira niodenga kala banjanimwee.

6. N’nga Yohova alemezile a-vi atu vopanducha ilambo yavathi?

⁶ Yohova utonisaka-edhela limburo lapama. Yohova a-anapanduche atu liye atosaka-edha pama ilambo yavathi. (Yobo 38:4-6; Jer. 10:12) Mwasa okala ovuruwana nokala ova-a modhala mandha, Yohova utoniva-a vyongo vinjinji vyapama vyoi niodenga sangalalana. (Sal. 104:14, 15, 24) Hora inango anoing’ana basa lee la vyopanducha noona ira “vili pama.” (Maro. 1:10, 12, 31) Atolemeza atu “voava-a utongi” va mabasee apama othene availambo yavathi. (Sal. 8:6) Ifunelo ya Nlungu choi atu olongomana takalenga aimwerumweru vosamalela mabasee malukulu odhowa nodhowa. N’nga hora dhothene munomsimba Yohova namwasa wa vyolanyedha vyapamavi?

7. N’nga lemba la Yoswa 24:15, linooni-a a-vi ira mutu utokaana ufulu osakula?

⁷ Yohova utoniva-a ufulu osakula vyoira. Ninooda sakula ndhila ina-arelenga i-yo vaingumi-u. (Muleri Yoswa 24:15.) Nlungwi-u waudhivela unosangalala nasakula mlambelanga liye. (Sal. 84:11; Sang. 27:11) Ninooda i-ndi-edha basa ufulwi-u vosakula vyongo mwazelu. Ninooda i-ndi-edha basa ufulwi-u mwandhila dho-iyana i-yana. Ninofuna nitapanye ifwanafwani-o yaongile Yesu.

8. N’nga Yesu a-indi-edhile a-vi basa zelu dhee dhosakula vyoira?

⁸ Vo-arela ifwanafwani-o ya Yesu ninooda sakula e-la vifunelo vyaatu enango vasogolo. Hora dhinango Yesu vambo-i ya anama-arelee tangawa-eile tatodhowa limburo n’nango ira tamavume. Mbwenye kavyaodeile. Mwinji waatu watoafwanya weo tangali ovikumbanyedha ira tafunji-iwe. Mbwenye  Yesu kaathakaleliwile. Malo mwa vyevyo liye atoavwela tangaranga atwao. N’nga chini vyairile Yesu? Liye “atoroma afunji-a vyongo vinjinji.” (Marku 6:30-34) Nasazi-edhanga Yesu vodhilimbi-edha i-ndi-edha basa hora na kopolo dhi-u vokami-a atu enango, ninomtitimi-a Babi-u wadhuludhulu. (Mat. 5:14-16) Thitho ninom’moni-a Yohova ira nili ofunechecha ira ikundu ya banjalee.

9. N’nga anamabala tanofwanela thuulelengan’ni?

⁹ Yohova atoava-a atu zelu dhobala a-ima na izo yowafunji-a dhiveliwana mlabela liye. Akala ira nyo muli baba munosimba yotuva yavakundui? Angalive ira Angelo mbavadhulu thitho oraeli-iwa na Yohova katina ngari ninga yen’na. Vothuulela vyevyo, ale tana a-ima tanofwanela i-ndi-edha basa ngari yen’na voiranga vyevyo. Anamabala tatova-iwa inyindelo na izo yavakundu yolela a-imiwa “mu malangi-o a Yohova na afunji-a mathuulelwee.” (Aef. 6:4; Dotor. 6:5-7; Sal. 127:3) Vofuna kami-a anamabala, gulu la Nlungu linokumi-a mafaramento okumela Bibilya ninga mabukhu, mavidiyo, nyumbo na vyongo vinango vyokami-a vyofwanyeya vainternet. Pyooneelatu ira Babi-u wadhulu thitho mwanee anoadhiveliwana vinjinji azombwe. (Luka 18:15-17) Anamabala tanyindelanga Yohova voira iliyothene vosamalela a-imiwa odhiveliwiwa, Yohova unokala osangalala. Anamabala ninga enala anova-a a-imiwa idedi-edho yokala banjani la Yohova modhowa nodhowa.

10-11. Njingari iivi iniva-idhe Yohova dhela mu khuto wa Yesu?

¹⁰ Yohova atovelela mwanee ofuneya ira niwelele kala banjanimwee. Ninga viongiwile mu ndima ya 4, Adamu na Eva tatoluza ngari yokala banjani la Yohova, naa-imene thitho tatoluza ngari yen’na. (Aroma 5:12) Adamu na Eva tatosakula a-vwela Nlungu mwakomove, ngumwasiwa aliwa tanofwanela langiwa. N’nga a-imiwa? Mwaudhivela Yohova utoira masasa-edho oi atu ofwanelela tawacheliwe banjanimwee. Liye utoira masasa-edho enala dhela mukhuto wa mwanee obaliwa eka, Yesu Kristu. (Juwau 3:16; Aroma 5:19) Dhela mukhuto wa Yesu atu okwakwana 144,000 tatokaana ngari yokala a-ima a Nlungu.—Aroma 8:15-17; Apok. 14:1.

¹¹ Thangani-avo vyevyo mamilau aatu ororomeleya enao ali ovwela ifunelo ya Nlungu atokaana idedi-edho yodhakala banjani la Nlungu vanduli vothathuliwa wa Satana vavira vyawa 1.000. (Sal. 25:14; Aroma 8:20, 21) Vokaana idedi-edho yen’na va ee-ni anomromola Yohova namapanducha ira ngu “Babiwa.” (Mat. 6:9) Thangani-avo vyevyo othene anofuna dhavenyathi-iwa anodha kaana ngari yofunjedha ifunelo ya Yohova, thitho othene anofuna dha-arela malangi-o anodha kala banjani mwee.

12. N’nga chofuka iivi inofuna i-yo wakula chineneeva?

¹² Ninga vioni i-yo Yohova utoirana vyongo vinjinji vooni-a ira unoona atu kala ofuneya. Liye utosakula ozoziwa kala a-imee, thitho utova-a idedi-edho wa mwinji nlukulu kala a-imee mu madhu achineneeva. (Apok. 7:9) N’nga ninaire a-vi ira nim’moni-e Yohova ira ninofuna kala banjani mwee dhowa nodhowa?

13. N’nga ninaire a-vi ira nioode ira ikundu ya banja la Nlungu lodhowa nodhowa?

¹³ Nioni-enga udhivela wa Yohova vonlabela na rimi-u othene. (Muleri Marku 12:30.) Va vyongo vyothene viniva-idhe Yohova mooma rima, yotuva ilukulu choi nimlabelenga. Ninooni-a ira ninomdhiveliwana Yohova ‘navwelanga malamulwee.’ (1 Ju. 5:3)  Voonga dhina la Babee Yesu utoniwandela ira nisakenga anamafunjedha nowabadiza. (Mat. 28:19) Liye utoniwandela thitho ira nidhiveliwengana unango na fwee. (Juwau 13:35) Yohova unosakula atu ovwela ira taire ikundu ya banjalee lavailambo yavathi laatu ale anomlambela.—Sal. 15:1, 2.

14. N’nga ninathonyi-edhe a-vi ira ninowadhiveliwana atu? (Mateu 9:36-38; Aroma 12:10)

¹⁴ Nioni-enga udhivela waatu enango. Udhivela tikalelo limbo-i lofuneya la Yohova. Yohova utooni-a udhivela na-ana m’mwidhiwe. (1 Ju. 4:9, 10) I-yo ninomsazi-edha Yohova naoni-angana udhivela unango na fwee. (Aef. 5:1) Ndhila imbo-i yowadhiveliwana atu kuwafunji-a vyoonga Yohova vahora i-adhila. (Muleri Mateu 9:36-38.) Nairanga vyevyo ninodha ava-a ngari yooda kala banjani la Nlungu lavailambo yothene yavathi. Vanduli voi mutu utobadiziwa, ninofwanela dhowanave mdhiveliwana nomlemeza. (1 Ju. 4:20, 21) N’nga vyevi vinothangani-avon’ni? Vaikundu inango ninooda mva-a ngari yooda kaikela akala pyoodeya. Mofwanafwani-a kaninofwanela onga ira utokaana vifunelo vyothakala venango idyani. Malo mwa vyevyo ninooda m’mona bali-u kala ofuneya thitho onikwaranya.—Muleri Aroma 12:10; Afil. 2:3.

15. N’nga mbaani anofuna i-yo aoni-a tangaranga nooma rima?

¹⁵ Naavwelenga tangaranga atu othene noaomela rima. Akala ninofuna kala vambo-i naatu ale anom’mwitana Yohova ira ngu Babiwa odhowa nodhowa ninofwanela indi-edha basa madhu a Nlungu vaingumi-u. Mofwanafwani-a, Yesu utonifunji-a ira ninofwanela aavwelanga tangaranga atuothene noaomela rima tangani-avo amwidani-u. (Luka 6:32-36) Mbwenye hora dhinango irana vyevi korucha. Akala ti ee-no ninofwanela funjedha ira nithuulelenga noirana vyongo ninga Yesu. Naira vinaoda i-yo vomvwela Yohova nomsazi-edha Yesu, niooni-a Babi-u wadhuludhulu ira ninofuna ira ikundu ya banjalee lodhowa nodhowa.

16. N’nga ninavunele a-vi limbili la banja la Yohova?

¹⁶ Nivunelenga limbili la banja la Yohova. Vabanjani kai vyailendo ira mwana atukulele makalelo andimuwee. Akala ira mwana wandimuwa uno-arela makundo a Bibilyani vaingumiyee unokala ifwanafwani-o yapama wa ng’onweeo. Mbwenye akala ira mwana wandimuwa utoroma irana vyongo vyothakala ng’onweeo unoroma a-rela makalelo othakala a ndimuwee. Vyevyo vinooda ireya banjani la Yohova. Kathuulelani ira kristau voroma ali ororomeleya mbwenye utopanduwa liye sakula irangana vyongo vyothakala. Vyevyo vinodha iri-a ira atu enango ta-arelenga ifwanafwani-o yee yothakaliyo. Atu anoira e-no anothakali-a limbili lapama la banja la Yohova. (1 Atez. 4:3-8) Ngumwasiwa ninofwanela rambela vifwanafwani-o vyothene vyothakala, thitho kanirumeli-e iliyothene niimwanani-a mkwivela Babi-u waudhivela Yohova.

17. N’nga ninofwanela rambela kaana mathuulelo oi a-vi, n’nga namwasa wan’ni?

¹⁷ Nim’nyindelenga Yohova a-kala nyindela vyongo vyaututuni. Yohova utonilanyedha ira na-elanga valimburo loroma Umwene nokala ovwela, liye unodha niva-a vyodya, vyowara na limburo logona. (Sal. 55:22; Mat. 6:33) Na mwasa wa vyevyo, kaninofwanela onanga ira vyongo vyaututuni vya ilamboi vinooda nivunela venango niva-a imwerumweru. I-yo nitoidhiwa ira yongo imbo-i inaniva-e imwerumweru kuirana ifunelo ya Yohova. (Afil. 4:6, 7) Masiki ira nitokaana kobiri dhooda gulana vyongo vinjinji, ninofwanela thuulela  akala ira nitokaana hora na kopolo dhooda i-ndi-edha basa vyongovyo. N’nga ninodhiveliwana vyongo vina i-yo? Mbwenye nithuulelenga ira Nlungu utoniva-a basa ira niode lilaba banjanimwee. Vyevyo vinothapulela ira kaninofwanela dodomi-iwa na yongo iliyothene. Kaninofuna navang’onovene kala ninga zombwe mwinango wenuo ukondile ngari yomlabela Yohova thitho kala gulu laa-imee mwasa wa vyongo vyoeva vyevyo vyana liye vailambo yavathi!—Marku 10:17-22.

18. N’nga mbamaraeli-o aavi atu ovwela anofuna aliwa dhasangalalana dhowa nodhowa?

¹⁸ Atu anjinji anodha sangalala na ngari ilukulu yomlabela Yohova dhowa nodhowa. Atu anofuna dhakala vailambo yavathi anodha sangalala laba basa losamalela ilambo yobaleya yeyo Yohova isaka-edhile liye ira tadhakalemo. Mo-odembuwa Umwene wa Nlungu unodha saka-edha vyongo vyothene vailambo yavathi ira vikale pama. Yesu unodha mali-a nyarwa dhothene dhiromeile na mwasa oi Adamu na Eva tatosakula kumamo banjani la Nlungu. Yohova unodha venyathi-a mamiliau aatu noava-a ngari ira tadhakaena ingumi yo-omala thitho yapama mwiilambo inofuna liye dhaisaka-edha kala paradaizo. (Luka 23:42, 43) Atu omlabela Yohova, tadhakala olongomana uliwethene unodha oni-a “titimi-o na lemezo” lelo lalembile Davide.—Sal. 8:5.

19. N’nga ninofwanela thuulelangan’ni?

¹⁹ Akala muli gulu la, “mwinji nlukulu” idhiwani ira munodedi-edha vyongo vyapama vinjinji. Nlungu unoudhiveliwanani thitho unofuna ira mukale banjanimwee. Ee-no mwiirenga jilijothene jinaodenyo ira Nlungu aodenga udhiveliwanani. Dambo lililothene muthuulelenga vyolanyedha vya Yohova. Musimbenga ngari inanyo yomlabela Babi-u wadhulu thitho musangalalenga na idedi-edho inanyo yomsimbanga dhowa nodhowa.