1. Vihula muka tunahase kuhulisa hakushinganyekanga havyuma atenga Yehova?

NGE natushinganyeka hajila yakulipwila Yehova atengelamo melu namavu, tunahase kuhulisa vihula ngana vize ahulishile Ndavichi ngwenyi: “Omu ngweji kutalanga melu ove, milimo yaminwe yove, kakweji navatanganyika evi unatenge, mutu ikiye iyaze numba umwanukenga? Mwanamutu ikiye iyaze numba umuzakamenga?” (Samu 8:3, 4) Ngana muze chapwile kuli Ndavichi, kumona vyuma vyavivulu vize atenga Yehova chinahase kutulingisa tulikomokele hakutachikiza ngwetu eji kutwanukanga. Nganomu natushimutwila, Yehova azakaminenga Alama naEve nakuvaneha nawa namutanga yenyi.

2. Uno Yehova asakile Alama naEve valinge vyuma muka?

² Alama naEve vakiko vapwile vatu vatete kutenga hano hamavu, kaha Yehova ikiye apwile Sevo. Kaha avahanyine mulimo uze vatelele kuzata. Avalwezele ngwenyi: “Semenunga muvule chikuma, muzalise hamavu, nakuwalamanga.” (Kupu. 1:28) Vatelele kusema vana nakulama kanawa mavu. Kachi nge Alama naEve vakavangijile vyuma avalwezele Yehova, kachi vakiko navana vavo vatwama lika mutanga yaYehova haya myaka yosena.

3. Mwomwo ika Yehova ahakililile Alama naEve mutanga yenyi?

³ Yehova amwene Alama naEve kupwa vavalemu hakuvahaka mutanga yenyi. Ndavichi ahanjikile mazu atwama hali Samu 8:5 kutalisa kujila Yehova atengelamo vatu ngwenyi: “Wamulingishile kupwa mwishi chindende hakumwesekesa kuli vangelo, kaha wamuvwikile upahu naluvaji.” Twatachikiza ngwetu Yehova katengele vatu nakuvahana ngolo, namangana nauhashi  ngana vize ahana vangeloko. (Samu 103:20) Chipwe ngocho, Yehova avwika vatu upahu naluvaji. Chikupu vene, Yehova atengele vatu vakulivanga mangana valivwise kuwaha kuyoya.

4. Vyuma muka vyasolokele omu Alama naEve valikangile kuli Yehova, kaha vyuma muka natushimutwila muchihande chino?

 ⁴ Chaluvinda, Alama naEve valikangile kuli Yehova, ngocho kavapwile cheka mutanga yenyiko. Nganomu natushimutwila muchihande chino, kulikanga chaAlama naEve chaneha ukalu hali vana vavo. Oloze vyuma ajinyine Yehova kavyalumukako. Asaka vatu vaze veji kumwononokanga vakapwe vana venyi haya myaka yosena. Chatete, tushimutwilenu havyuma vize vyasolola nge Yehova atumona kupwa tuvavalemu. Kufumaho, natushimutwila havyuma vize twatela kulinga mangana tusolole ngwetu twasaka kupwa mutanga yaKalunga. Chamakumishilo, natushimutwila havyuma vyamwaza vize navakalivwisa kuwaha vana vaYehova hano hamavu haya myaka yosena.

5. Tunahase kusolola ngachilihi ngwetu twavumbika Kalunga hakututenga muchifwanyisa chenyi?

⁵ Yehova atumona kupwa tuvavalemu hakututenga muchifwanyisa chenyi. (Kupu. 1:26, 27) Hakuwana nge Kalunga atutenga muchifwanyisa chenyi, ngocho tunahase kupwa navilinga vyamwaza ngana vize atwama navyo ikiye vyakufwana nge zangi, nakutetela, nakushishika nakwoloka. (Samu 86:15; 145:17) Nge natupwa navilinga kana, kaha natusolola ngwetu twavumbika Yehova nakumusakwilila havyuma atulingila. (Petu. 1, 1:14-16) Kulinganga vyuma vize asaka Setu wamwilu Yehova, nachitulingisa tuwahilile. Hakuwana nge twatwama navilinga ngana vize atwama navyo Yehova, ngocho tunahase kupwa mutanga yenyi.

6. Yehova asolwele ngachilihi ngwenyi amona vatu kupwa vavalemu?

⁶ Yehova atuwahishilile limbo lyamwaza. Yehova avangilile kutenga mavu shimbu kanda atenge mutu watete. (Yopa 38:4-6; Yele. 10:12) Hakuwana nge Yehova apwa walikoji kaha nawa muka-kuhana, ngocho atengele vyuma vyamwaza vyakutulingisa tuwahilile. (Samu 104:14, 15, 24) Kaha atalile vyuma vize atengele ‘nakumona ngwenyi vinawahe.’ (Kupu. 1:10, 12, 31) Amwene vatu kupwa vavalemu hakuvahana “ngolo” jakutala vyuma vyosena vize atengele. (Samu 8:6) Kalunga ajinyine ngwenyi vatu vakukupuka valamenga kanawa vyuma vyosena vize atengele haya myaka yosena. Uno mweji kusakwililanga Yehova hakuhana vatu mulimo kanou tahi?

7. Uno mukanda waYoshuwa 24:15 wasolola ngachilihi nge mutu atwama nalisesa lyakulisakwila vyakulinga?

⁷ Yehova atuhana lisesa lyakulisakwila vyakulinga. Etu vavene tunahase kulisakwila vyakulinga mukuyoya chetu. (Tangenu Yoshuwa 24:15.) Kalunga ketu eji kwivwanga kuwaha nge natusakula kumuzachila. (Samu 84:11; Vishi. 27:11) Tunahase kuzachisa kanawa lisesa lyetu lyakulisakwila vyakulinga mujijila jajivulu. Tutalenu hachakutalilaho chaYesu.

8. Yesu azachishile ngachilihi lisesa lyenyi lyakulisakwila vyakulinga?

⁸ Tunahase kulondezeza chakutalilaho chaYesu hakuhaka kulutwe vyuma vasaka vakwetu. Likumbi limwe omu Yesu navaposetolo jenyi vazeyele chikuma, vayile kuchihela kwaukawavo mangana vakanoke. Oloze kavanokeleko mwomwo vatu vavavulu vavakavangijile nakusaka ngwavo Yesu avanangule. Yesu kapihililileko oloze avevwililile keke. Kaha chuma muka alingile Yesu? “Aputukile kuvanangula vyuma vyavivulu.” (Mako 6:30-34) Nge natulondezeza Yesu hakuzachisa lwola lwetu, nangolo jetu mangana tukafwe vatu, kaha  natutohwesa Setu wamwilu. (Mateu 5:14-16) Natusolola nawa kuli Yehova ngwetu twasaka tupwenga mutanga yenyi.

9. Yehova ahana vatu lisesa lyakulinga ika, kaha nawa mulimo muka avahana?

⁹ Yehova ahana vatu lisesa lyakusema vana, namulimo wakuvanangula vazange Yehova nakumuzachila. Nge mwapwa muvisemi, kutala mwamona mulimo kana kupwa waulemu tahi? Numba tuhu Yehova ahana vangelo milimo yayivulu yamwaza oloze kavahana lisesa lyakusema vanako. Echi chatela kulingisa visemi vamone mulimo kanou kupwa waulemu. Visemi vavahana mulimo wakulela vana “mukuvazangamisa namukuhuhumuna chakuli Yehova.” (Efwe. 6:4; Lushi. 6:5-7; Samu 127:3) Hakusaka kukafwa visemi vazate kanawa mulimo wavo, liuka lyetu linavawahishila mikanda, najivindiyo, namyaso navihande vyeka vyahaInternet. Chikupu vene Yehova naMwanenyi vazanga vana vavandende. (Luka 18:15-17) Yehova eji kwivwanga kuwaha nge visemi navapendamina hali ikiye nakukilikita mangana vazakame vana vavo. Nge visemi navalinga ngocho, kaha navakafwa vana vavo vapwenga mutanga yaYehova haya myaka yosena.

10-11. Vyuma muka nalingi Yehova kuhichila mundando yakusokola?

¹⁰ Yehova atuhanyine Mwanenyi azanga mangana tupwenga cheka mutanga yenyi. Ngana muze twashimutwilanga  mupalangalafu 4, Alama naEve valingile shili, ngocho vakiko navana vavo kavapwile cheka mutanga yaYehovako. (Loma 5:12) Hakuwana nge Alama naEve valikangile kuli Kalunga chakusakula kumichima yavo, ngocho chatelemo kuvafumisa mutanga yenyi. Jino chuma muka alingile Yehova kuli vana vavo? Yehova awahishile vyuma mangana vana vaAlama naEve vamwe vaze navamwononoka vapwenga mutanga yenyi. Alingile ngocho hakuhana Mwanenyi umwe kaha wakulipwila Yesu Kulishitu, kupwa ndando yakusokola. (Yowa. 3:16; Loma 5:19) Echi chalingishile Kalunga asakule vatu vakushishika vakuheta ku 144,000 vapwenga vana venyi.—Loma 8:15-17; Kuso. 14:1.

¹¹ Kaha nawa mayevuyevu avatu vakushishika vaze vali nakulinga mwaya muchima waKalunga vatalilila kukapwa mutanga yaKalunga, hanyima yacheseko chamakumishilo chize nachikapwako kusongo yamyaka 1,000. (Samu 25:14; Loma 8:20, 21) Mwomwo yalutalililo kana, veji kuvulukanga Yehova, Tengi yavo ngwavo “Setu.” (Mateu 6:9) Kaha nawa vaze navakasanguka, navakapwa nakutokwa chakulinangula vyuma vize Yehova asaka ngwenyi valinge. Vosena vaze navakakavangiza vyuma mwakavalweza navakapwa mutanga yenyi.

12. Chihula muka natukumbulula?

¹² Ngana muze tunashimutwila, Yehova nalingi vyuma vyavivulu vize vyasolola nge amona vatu kupwa vavalemu. Asakula vawavisa kupwa vana venyi, kaha nawa ahana “liyongomena lyalinene” lutalililo lwakukapwa chikupu vana venyi mukaye kakahya. (Kuso. 7:9) Vyuma muka twatela kulinga oholyapwa mangana tusolole ngwetu twasaka kupwa mutanga yaYehova haya myaka yosena?

13. Chuma muka twatela kulinga mangana tupwenga mutanga yaKalunga? (Mako 12:30)

¹³ Sololenu ngwenu mwazanga Yehova hakumuzachila namichima yenu yosena. (Tangenu Mako 12:30.) Yehova atuhana vyuma vyavivulu, kaha nawa asaka tulemesenga. Tweji kusololanga ngwetu twazanga Yehova nge ‘natulamanga jishimbi jenyi.’ (Yowa. 1, 5:3) Lushimbi lumwe luze Yehova atulweza tulame shina luze atuhana Yesu lwakunangula vatu vapwenga tumbaji nakuvambapachisa. (Mateu  28:19) Yesu atulweza nawa tulizangenga navakwetu. (Yowa. 13:35) Yehova eji kwitavilanga vatu vaze veji kumwononokanga vezanga mutanga yenyi muze mwatwama vatu vaze veji kumulemesanga mukaye kosena.—Samu 15:1, 2.

14. Tunahase kusolola ngachilihi ngwetu twazanga vakwetu? (Mateu 9:36-38; Wavaka-Loma 12:10)

¹⁴ Zangenunga vakwenu. Havilinga vyosena atwama navyo Yehova, zangi yikiko yapwa yayilemu chikuma. (Yowa. 1, 4:8) Yehova atusolwelele zangi shimbu kanda tumutachikize. (Yowa. 1, 4:9, 10) Nge natuzanga vakwetu, kaha natusolola ngwetu tuli nakulondezeza Yehova. (Efwe. 5:1) Jila yimwe yakulipwila tunahase kusolwelamo ngwetu twazanga vatu shina kuvakafwa vatachikize Yehova shimbu kuchili lwola. (Tangenu Mateu 9:36-38.) Nge natulinga ngocho, kaha natuvakafwa vatachikize vyuma vatela kulinga mangana vapwenga mutanga yaKalunga. Nge mutu vanamumbapachisa, twatela kutwalaho lika kumuzanga nakumuvumbika. (Yowa. 1, 4:20, 21) Tunahase kulinga ngachilihi ngocho? Jila yimwe tunahase kulingilamo ngocho shina kumufwelela havyuma mwalinga. Chakutalilaho, nge katwatachikijile vinamulingisa alinge vyuma vimweko, kaha katwatela kukukulula ngwetu nalingi vyuma kana chakuchisakula kumuchimako. Oloze twatela kumuvumbika nakumumona ngwetu atuhambakana etu.—Tangenu Wavaka-Loma 12:10; Fwili. 2:3.

15. Vatu muka twatela kusolwela keke nalikoji?

¹⁵ Solwelenunga vatu vosena keke nalikoji. Nge tunakusaka tupwenga halizavu lyavaze navakavulukanga Yehova ngwavo Sevo haya myaka yosena, kaha twatela kukavangizanga vyuma tunakulinangula muMazu aKalunga. Chakutalilaho, Yesu anangwilenga ngwenyi, twatela kusolwelanga vatu vosena keke nalikoji kuhakilako vene navaka-kole jetu. (Luka 6:32-36) Shimbu jimwe chinahase kutukaluhwila kusolwela vilinga kanevi vaka-kole jetu. Nge cheji kutukaluhwilanga, kaha twatela kulondezeza Yesu. Nge natuzata nangolo jetu josena twononoke Yehova naYesu, kaha natusolola ngwetu twasaka kupwa mutanga yaYehova haya myaka yosena.

16. Tunahase kulingisa ngachilihi tanga yaYehova yipwenga napuho yamwaza?

¹⁶ Lingisenu tanga yaYehova yipwenga napuho yamwaza. Chakutalilaho, mutanga, kanyike afwila kulondezezanga vilinga vyayayenyi. Nge yayenyi mwakavangiza jindongi jamuMbimbiliya, kaha nasongo yenyi mwamulondezeza. Oloze nge yayenyi mwalinga vyuma vyavipi, kaha nasongo yenyi nahase kumulondezeza. Omu mukiko chapwa namutanga yaYehova. Nge muka-Kulishitu uze apwile wakushishika mwalikanga kuli Kalunga chipwe kuputuka kulinga vyuma ahunga Kalunga, kaha nahase kulingisa navakwavo vamulondezeze. Vatu vaze veji kulinganga vyuma kana veji kulingisanga tanga yaYehova yipwenga napuho yayipi. (Teso. 1, 4:3-8) Katwatela kulondezeza vatu vavilinga vyavipi nakwechelela kala chuma chituhandunune kuli Yehovako.

17. Vishinganyeka muka twatela kulihendako, kaha mwomwo ika?

¹⁷ Kanda kufwila luhetoko oloze fwelelenunga Yehova. Yehova atushika ngwenyi nge natutonda chatete Wangana wenyi nakukavangiza jishimbi jenyi, kaha mwatukafwa tuwane vyakulya, navyakuvwala, nahakusavala. (Samu 55:22; Mateu 6:33) Ngocho, katwatela kushinganyeka ngwetu luheto lwamuno mukaye lunahase kutunehela mukingo nakuwahilila chamwenemweneko. Etu twatachikiza ngwetu, chuma chinahase kutukafwa tuunde muchima shina kulinga mwaya muchima waYehova. (Fwili. 4:6, 7) Numba tuhu tunahase kulanda vyuma vyavivulu, oloze twatela kushinganyeka  numba nge tuli nalwola lwakuvizachisa nangolo jakuvilama kanawa. Kutala tunaputuka kuzanga chikuma luheto tahi? Nge mukiko, kaha twatela kutachikiza ngwetu Kalunga atuhana milimo twatela kuzata mutanga yenyi. Echi chinakulumbununa nge katwatela kwechelela kala chuma chitutanguleko. Katwatela kupwa ngana mwamukweze walunga uze akanyine kuzachila Yehova nakuhona kupwa mutanga yenyi mwomwo yakuzanga chikuma luheto apwile nalwoko.—Mako 10:17-22.

18. Vyuma muka navakalivwisa kuwaha haya myaka yosena vaze veji kwononokanga Yehova?

¹⁸ Vatu vaze veji kwononokanga Yehova navakalivwisa kuwaha kuzachila Yehova haya myaka yosena. Vaze vatwama nalutalililo lwakukayoyela hano hamavu navakalivwisa kuwaha kulama mavu. Kalinwomu Wangana waKalunga ulingise vyuma vyosena hano hamavu kupwa ngana muze vyapwile hakavanga. Yesu mwakafumisako ukalu wosena uze anehele Alama naEve omu vafumine mutanga yaKalunga. Kaha nawa Yehova mwakasangula mayevuyevu avatu vaze vafwa nakukavalingisa vakayoye haya myaka yosena mupalachise. (Luka 23:42, 43) Omu vatu navakazachilanga Yehova hano hamavu mupalachise navakapwa vakukupuka, navakasololanga “upahu naluvaji” vize asonekele Ndavichi.—Samu 8:5.

19. Vyuma muka twatela kwanuka?

¹⁹ Nge mwatwama ‘muliyongomena lyalinene,’ kaha muli nakutalilila vyuma vyamwaza. Tachikizenu ngwenu Kalunga amizanga, kaha ali nakusaka mupwenga mutanga yenyi. Shikaho zatenu kweseka noho hakumina ngolo jenu mumwivwisenga kuwaha. Kaha hakumbi hakumbi shinganyekenunga hajishiko jaKalunga. Tachikizenu ngwenu chapwa hikutokwa chikuma kuzachila Yehova, shikaho fwilenunga kumwalisa haya myaka yosena.