1. Jehova thil siam zawng zawngte kan ngaihtuah hian kan rilruah eng zawhnate nge lo awm mai thei?

JEHOVA thil siam zawng zawngte kan ngaihtuah hian, fakna hla phuahtu Davida angin kan awm ngei ang, ani chuan: “I vân, i kut chhuakte, thla leh arsi i ruathote khi, ka ngaihtuah châng chuan, “mihring hi eng nge maw a niha, i hriat reng ṭhin ni?” tiin a sawi. (Sâm 8:3, 4) Davida angin, keini pawh Jehova thil siam arsi ropui tak takte nên kan inkhaikhin hian, kan têtzia kan inhre chhuak mai thei. Mahse, kan la hmuh tûr angin, Jehova chuan mihring hmasa ber Adama leh Evi chu a hre satliah mai ni lovin, a chhûngkaw zîngah a telh a ni.

2. A lei lam fa hmasa berte tâna Jehova thiltum chu eng nge ni?

² Adama leh Evi chu Jehova lei lam fa hmasa berte an ni a, Jehova chu hmangaihna nei tak an Pa vâna mi a ni. Ani chuan chu nupa tuak chu hnathawh tûr a pe a. An hnênah: “Chi tam tak thlaha lo pungin, leilung hi luah khat ula, in thu thuin awmtîr rawh u,” tiin a hrilh a ni. (Gen. 1:28) Anni chuan fate neiin, an chênna lei chu ṭha takin an enkawl a ngai a. Adama leh Evi’n an tâna Jehova thiltum mila thuâwih taka thil an tih chuan, an thlahte nên chatuanin Pathian chhûngkaw zîngah an tel reng ang.

3. Engvângin nge Adama leh Evi’n Jehova chhûngkuaah hmun pawimawh tak an nei tia kan sawi theih?

³ Adama leh Evi chuan Jehova chhûngkuaah hmun pawimawh tak an nei a. Sâm 8:5-naa chhinchhiah angin, Davida chuan Jehova siam mihring chungchângah heti hian a sawi a ni: “Ani chu vântirhkohte aia hnuai deuh chauhvin i siam a, ropuina leh chawimawina i khumtîr a,” tiin. Ni e, mihringte chu vântirhkohte neih ang chakna te, finna te, leh theihnate pêk  an ni lo. (Sâm 103:20) Mahse, anni chu chûng vântirhkoh thiltithei takte aia ‘hnuai deuh chauhva’ siam an ni a. Han ngaihtuah teh! Jehova chuan kan nu leh pa hmasa berte chu bul ṭanna ṭha tak a pe a ni.

4. Adama leh Evi’n Jehova thu an âwih loh khân, an chungah eng nge thleng a, he thuziakah hian eng nge kan sawiho vang?

 ⁴ Lungchhiatthlâk takin, Adama leh Evi chuan Jehova chhûngkuaa an hmun neih chu an hloh va. A dawta thuziaka kan hmuh tûr angin, chu chuan an thlahte chungah nghawng ṭha lo tak a nei a ni. Mahse, Jehova thiltum chu a inthlâk danglam chuang lo. Thuâwih mihringte chu chatuana a fate ni tûrin a duh a. A hmasain, Jehova’n min chawimawi dân chu i lo sawiho vang u. Chumi hnuah, Pathian chhûngkuaa tel kan duhzia kan lantîr theih dân kan sawiho vang. A tâwpah, Jehova lei lam chhûngkaw dawn tûr chatuan malsâwmnate pawh kan sawiho bawk ang.

5. Engtin nge Pathian chu a anpuia min siam avânga kan chawimawi theih?

⁵Jehova’n a anpuia min siamin min chawimawi. (Gen. 1:26, 27) Pathian anpuia siam kan nih avângin, a mize duhawm tam tak hmangaihna te, khawngaihna te, leh rinawmnate chu kan nei theiin, kan lantîr thei a. (Sâm 86:15; 145:17) Hêng miziate kan neih chhoh hian Jehova kan chawimawiin, a chunga kan lâwmzia kan lantîr a ni. (1 Pet. 1:14-16) Kan Pa vâna mi tilâwm zâwnga kan nun hian hlimna leh lungawina kan nei a. Jehova chuan a anpuia min siamin, a chhûngkaw zînga tel tûra a duh ang mite nih theihna min pe a ni.

6. Engtin nge Jehova’n mihringte tâna leilung buatsaihsakin anni chu a chawimawi?

⁶Jehova’n kan tân chênna in ṭha tak min buatsaihsak. Jehova’n mihring hmasa ber a siam hma aṭang daih tawh khân, leilung hi mihringte chênna atân a buatsaih tawh a. (Job. 38:4-6; Jer. 10:12) Ngilnei tak leh thilphal tak a nih avângin, thil ṭha tam tak min pe a ni. (Sâm 104:14, 15, 24) Chûng a thilsiamte chu hun pea a han ngaihtuah hian, “ṭha a ti hle a.” (Gen. 1:10, 12, 31) Ani chuan mihringte chu leia a thilsiam mak tak tak ‘chungah thu neihtîrin’ a chawimawi a ni. (Sâm 8:6) Pathian thiltum chu mihring ṭha famkimte’n chûng a thilsiam mawi takte chatuana an enkawl hi a ni. Chu a thutiam ropui tak avângin Jehova chungah lâwmna i lantîr fo ṭhîn em?

7. Engtin nge Josua 24:15-nain mihringin zalên taka duh thlan theihna kan nei tih a târ lan?

⁷Jehova’n zalên taka duh thlan theihna min pe. Kan nun kawng zawh tûrah duh kan thlang thei a. (Josua 24:15 chhiar rawh.) Hmangaihna nei tak Pathian chu a rawngbâwl tûra duh kan thlan hian a hlim a ni. (Sâm 84:11; Thuf. 27:11) Zalên taka duh thlan theihna kan neih chu dinhmun tam takah ṭha takin kan hmang thei a. Tûnah, Isua entawn tûr siam hi i lo ngaihtuah ang u.

8. Isua’n zalên taka duh thlan theihna a hman dân kawng khat chu eng nge ni?

⁸ Mahni ṭhatna tûr aia mi dangte ṭhatna tûr dah pawimawh zâwkin Isua kan entawn thei a. Ni khat chu, Isua leh a tirhkohte chu an chauh êm avângin, chawlh hahdam theihna tûr hmun fianrial lam panin an kal a. Mahse, an châwl hman lo. Mipui chuan rawn hmuin, Isua zirtîrnate chu hriat an châk hle a. Mahse, Isua chu an chungah a thinur lo. Chu aiin, mipui chu a khawngaih hle a ni. Chuvângin, eng nge a tih tâk? “Ani chuan thu tam tak a zirtîr ta a.” (Mk. 6:30-34) Mi dangte ṭanpui nâna kan hun leh thate pea Isua kan entawn hian, kan Pa vâna mi kan chawimawi tihna a ni. (Mt. 5:14-16) Chu bâkah, Jehova hnênah a chhûngkaw zînga tel kan duhzia kan lantîr tihna a ni bawk.

9. Nu leh pate’n eng nge an hriat reng ang?

 ⁹Jehova’n mihringte chu fa neih theihna bâkah, amah hmangaih tûr leh a rawngbâwl tûra zirtîr theihna chanvo a pe. Nu leh pa i nih chuan, chu thilpêk ṭha tak avângin i lâwm em? Jehova’n vântirhkote chu thiltihtheihna tam tak pe mah se, fate neih theihna erawh a pe lo. Chu chu hre rengin, fa nei nu leh pate chuan an chanvo neih chu an ngaihlu hle tûr a ni. Nu leh pate chu ‘Lalpa thununna leh zilhnaa’ an fate enkawl tûra mawhphurhna pawimawh tak pêk an ni. (Eph. 6:4; Deut. 6:5-7; Sâm 127:3) Pathian inawpna pâwl chuan nu leh pate ṭanpui nân thu leh hla chhuah te, video te, rimawi te, leh online-a hmuh theih thuziakte ang chi Bible ṭanchhan hmanraw tam tak a buatsaih a. Kan Pa vâna mi leh a Fapa chuan ṭhalaite chu an ngaihlu hle tih a chiang a ni. (Lk. 18:15-17) Nu leh pate’n Jehova an rinchhan a, theih tâwp chhuaha fate an ngaihsak hian, Jehova chu a lâwm a. Chutiang nu leh pate chuan an fate chu chatuana Jehova chhûngkuaa tel theihna hun remchâng an pe a ni.

10-11. Jehova’n tlanna hmangin kan tân eng nge min ruahmansak?

¹⁰Jehova’n a chhûngkaw zînga kan tel leh theih nân a Fapa duh tak min pe.  Paragraph 4-naa târ lan angin, Adama leh Evi chuan Jehova chhûngkuaa an hmun neih an hloh avângin an thlahte pawhin an chân phah a. (Rom 5:12) Adama leh Evi chu duh rêng vânga Pathian thu âwih lo an nih avângin, a chhûngkaw zînga tel tlâk an ni lo. A nih chuan, an thlahte chungchâng hi eng nge ni ve? Jehova’n mihringte a hmangaih êm avângin, a thu âwihtute chu a chhûngkaw zînga an tel leh theih nân ruahmanna a siam a. Chu ruahmanna chu a Fapa mal neih chhun Isua Krista inthawina hmangin a siam a ni. (Joh. 3:16; Rom 5:19) Isua inthawina zârah, rinawmna vawngtu mihringte zînga mi 1,44,000-te chuan Pathian fate nih theihna chanvo hlu an nei a ni.—Rom 8:15-17; Thup. 14:1.

¹¹ Chu bâkah, mi rinawm dang maktaduai tam takte pawhin thuâwih takin Pathian duh zâwng an ti a. Anni chuan Kum Sâng Rorêl tâwpa fiahna hnuhnûng ber zawhah Pathian chhûngkaw zînga mite ni tûra beiseina an nei a ni. (Sâm 25:14; Rom 8:20, 21) Chu beiseina chu hre rengin, tûnah ngei pawh an Siamtu Jehova chu “Pa” tiin an ko a ni. (Mt. 6:9) Mitthi tholehte pawhin Jehova’n an laka a thil phûtte zir theihna hun remchâng an nei bawk ang. Ṭha taka Pathian kaihhruaina chhâng lêttute pawh a tâwpah a chhûngkaw zînga mite an ni ang.

12. Eng zawhna nge kan chhân ang?

¹² Kan hriat tawh angin, Jehova chuan mihringte chu kawng tam takin a chawimawi tawh a. Hriak thihte chu a fate angin a pawm tawh a, ‘mipui tam takte’ chu khawvêl tharah a fate ni tûrin beiseina a pe a ni. (Thup. 7:9) Jehova chhûngkaw zînga tel kan duhzia engtin nge tûnah kan lantîr theih?

13. Pathian chhûngkuaa tel tûrin eng nge kan tih theih? (Marka 12:30)

¹³Thinglung zawng zawnga a rawngbâwlin Jehova i hmangaihzia lantîr rawh. (Marka 12:30 chhiar rawh.) Pathianin hmangaihna nei taka min pêkte zînga thilpêk ropui ber pakhat chu amah chibai bûk theihna hi a ni a. Jehova kan hmangaihzia chu ‘a thupêkte kan zawmna’ hmangin kan lantîr a ni. (1 Joh. 5:3) Jehova’n zâwm tûra min duh a thupêk zînga pakhat chu zirtîrte siama, baptisma chantîr tûra Isua thupêk hi a ni a. (Mt. 28:19) Chu bâkah, inhmangaih tawn tûrin thu min pe bawk. (Joh. 13:35) Jehova chuan a thu  âwihtute chu khawvêl pum huap a chhûngkaw zîngah a telh ang.—Sâm 15:1, 2.

14. Engtin nge mi dangte chunga hmangaihna kan lantîr theih? (Matthaia 9:36-38; Rom 12:10)

¹⁴Mi dang chungah hmangaihna lantîr rawh. Hmangaihna hi Jehova mize pawimawh ber a ni a. (1 Joh. 4:8) Ani chuan amah kan hriat hma aṭang rêngin kan chungah hmangaihna a lantîr a. (1 Joh. 4:9, 10) Mi dangte chunga hmangaihna kan lantîr hian amah kan entawn tihna a ni. (Eph. 5:1) Mite chunga hmangaihna kan lantîr theih dân kawng ṭha ber zînga pakhat chu hun a la awm laia Jehova chanchin hre tûra ṭanpui hi a ni. (Matthaia 9:36-38 chhiar rawh.) Chutianga tiin, mite chu Pathian chhûngkuaa tel theihna hun remchâng kan pe a. Mi chu baptisma a chan hnuah pawh, kan la hmangaih chhunzawm zêl tûr a ni. (1 Joh. 4:20, 21) Engtin nge chu chu kan tih theih? Kan tih theih dân kawng khat chu a theih phawt chuan, rilru ṭha a pu tih kan ring tlat ang. Entîr nân, a thiltih eng emaw kan hriatthiam loh hunah, rilru chhia pu niin kan ngai nghâl mai lo vang a. Chu aiin, ani chu kan aia ṭha zâwkah ruatin, kan chawimawi zâwk ang.—Rom 12:10 chhiar rawh; Phil. 2:3.

15. Tute chungah nge zahngaihna leh khawngaihna kan lantîr ang?

¹⁵Mi zawng zawng chungah zahngaihna leh khawngaihna lantîr rawh. Jehova chu Pa anga chatuana ko theitute zînga tel ve kan duh chuan Bible zirtîrnate chu kan nunpui tûr a ni. Entîr nân, Isua chuan kan hmêlmate pawh tiamin, mi zawng zawng chungah zahngaihna leh khawngaihna lantîr tûrin min zirtîr a. (Lk. 6:32-36) A thu zirtîrte zawm chu harsa tih châng kan nei mai thei. Chutiang a nih chuan, Isua ngaihtuah dân leh thiltih dânte chu kan entawn tûr a ni a. Theih tâwp chhuaha Jehova thu kan âwiha, Isua kan entawn hian kan Pa vâna mi hnênah a chhûngkaw zînga tel kan duhzia kan lantîr tihna a ni.

16. Engtin nge Jehova chhûngkaw hming ṭhatna chu kan humhim theih?

¹⁶Jehova chhûngkaw hming ṭhatna chu humhim rawh. Mihring chhûngkuaah pawh, naupang zâwkte’n an ute an entawn ṭhîn hi thil pângngai tak a ni. Upa zâwkte’n Bible thu bulte an nunpui chuan, an naute tân entawn tûr ṭha an siam a ni ang. Upa zâwkte’n thil dik lo an ti a nih chuan, naupang zâwkte’n chu entawn tûr ṭha lo chu an zui mai thei bawk. Jehova chhûngkuaah pawh chutiang bawk chu a ni. Kristian rinawm tak lo ni tawh ṭhîn chuan a hnuah kalpên duhna rilru put hmang emaw, nungchang bawlhhlawhna leh nunkawng ṭha lo zawh duhna emaw a neih chuan, unau dangte chuan amah anga thil sual tih duhna an nei thei a. Chutiang mite chuan Jehova chhûngkaw hming ṭhatna an tichhia a ni. (1 Thes. 4:3-8) Entawn tûr ṭha lote chu hnâwlin, eng mahin hmangaihna nei tak kan Pa vâna mi nêna kan inlaichînna a tihchhiat chu kan phal tûr a ni lo.

17. Eng ang rilru put hmang nge kan hnâwl ang a, engvângin nge?

¹⁷Sum leh pai ni lovin Jehova rinchhan rawh. Jehova chuan a Lalram kan zawn hmasak a, a tehna felte mila kan nun chuan, kan mamawh ei leh bâr te, silh leh fên te, leh chênna tûr inte min pe ang tih min tiam a. (Sâm 55:22; Mt. 6:33) Chu chu rilruah vawng rengin, he khawvêla sum leh pai lama hausaknate hian himna leh hlimna tluantling min pe thei tih ngaih dân chu kan pumpelh a ni. Rilru thlamuanna neih theih dân kawng awm chhun chu Jehova duh zâwng tih a ni tih kan hria a. (Phil. 4:6, 7) Thil tam tak kan lei thei a nih pawhin, chûng thilte hman nân leh enkawl nân hun leh thate kan pêk theih dâwn leh dâwn loh kan ngaihtuah tûr a ni. Kan thil neihahte hian kan rilru  kan lo pe lutuk em? Pathianin a chhûngkuaah hnathawh tûr min pe tih kan hre reng tûr a ni a. Chu chu kan rilru kal pêntîr kan phal tûr a ni lo tihna a ni. Leia a thil neih tlêm tê a ngaihhlut êm avânga Jehova rawngbâwl theihna hun remchâng leh a fate zînga mi nih theihna chanvo hlu hnâwltu tlangvâl ang nih chu kan duh lo ngei ang!—Mk. 10:17-22.

18. Thuâwih mihringte chuan eng chawimawina leh malsâwmnate nge chatuana an neih ang?

¹⁸ Thuâwih mihringte chuan chawimawina azawnga ropui ber—Jehova hmangaih a, chatuana amah chibai bûk theihna chanvo hlu an nei ang! Lei lam beiseina neite pawhin Jehova’n an chênna atâna ṭha famkima a siam he leilung mawi tak enkawlin hlimna an nei ang a. Nakin lawkah, Pathian Lalram chuan leilung leh a chhûnga chêng zawng zawngte chu mawi takin a siam leh ang. Isua chuan Adama leh Evi’n Pathian chhûngkaw zînga tel an duh loh avânga lo awm harsatnate chu a siam ṭha ang a. Jehova chuan mi maktaduai tam takte chu thihna ata kai tho lehin, hrisêlna ṭha famkim neia chatuana nun theihna leh lei hi paradis-a chantîr theihna hun remchâng a pe ang. (Lk. 23:42, 43) Jehova lei lam chhûngkaw zînga telte chuan ṭhat famkimna an neih hunah, mi tinte chuan Davida ziah angin “ropuina leh chawimawina” an chang tawh ang.—Sâm 8:5.

19. Eng nge kan hriat reng ang?

¹⁹ “Mipui tam tak” zînga tel i nih chuan, beiseina ropui tak i nei a. Pathianin a hmangaih che a; a chhûngkaw zînga tel tûrin a duh che a ni. Chuvângin, amah tilâwm tûrin i tih theih apiang ti ang che. Pathian thutiamte chu i rilru leh thinlunga ngaihtuahin i nî tin nun hmang ang che. Kan Pa vâna mi chibai bûk theihna chanvo leh chatuana amah fak theihna i neih chu ngaihlu ang che!