1. Ki kestion nou kapav poz noumem kan nou reflesi lor tou seki Zeova inn kree?

KAN nou reflesi lor tou bann kitsoz ki Zeova inn kree, kitfwa nou ena mem santiman ki David. Dan enn lapriyer, David ti dir: “Kan mo admir lesiel, travay ki to lame finn fer, kan mo get avek admirasion lalinn ek zetwal ki to finn met anplas, ki valer imin ena pou ki li dan to panse? Ki enn sinp kreatir imin ete, pou to pran li otan kont?” (Ps. 8:3, 4) Parey kouma David, kitfwa nou panse ki nou bien tipti konpare ar bann zetwal ki Zeova inn kree, ek nou etone ki Li pran nou kont. Selman, kouma nou pou trouve dan sa lartik-la, Zeova pa ti zis pran kont nou bann premie paran, Adan ek Ev, me Li ti osi donn zot enn plas dan so fami.

2. Ki kitsoz Zeova ti demann Adan ek Ev pou fer?

² Zeova ti bien kontan so bann premie zanfan imin, Adan ek Ev. Zot ti form parti so fami, ek Li ti atann ki zot fer travay ki Li ti donn zot. Zeova ti dir zot: “Gagn zanfan, vinn boukou, ranpli later ek ena kontrol lor li.” (Zen. 1:28) Adan ek Ev ti bizin gagn bann zanfan ek zot ti bizin okip later. Si zot ti obeir Zeova ek zot ti fer seki Li ti demann zot, Adan ek Ev, ek zot bann zanfan osi, ti pou kontign form parti dan fami Zeova.

3. Kifer nou kapav dir ki Zeova ti donn Adan ek Ev enn plas inportan dan so fami?

³ Adan ek Ev ti ena enn plas inportan dan fami Zeova. Konsernan bann imin, David ti dir dan Psom 8:5: “To’nn fer li inpe pli ba ki bann anz, ek to finn kouronn li ar laglwar ek enn gran bote.” Li vre ki Zeova pa’nn donn bann imin mem pwisans, mem lintelizans, ek mem kapasite ki bann anz. (Ps. 103:20) Selman, bann imin zot zis “inpe pli  ba” ki sa bann anz bien pwisan la. Reflesi lor la! Kan Zeova ti kree nou bann premie paran, Li ti donn zot enn zoli lavi.

4. Ki ti ariv Adan ek Ev parski zot ti dezobeir Zeova, ek ki nou pou examine dan sa lartik-la?

 ⁴ Malerezman, Adan ek Ev ti perdi zot plas dan fami Zeova. Ek kouma nou pou trouve dan sa lartik-la, zot bann desandan inn gagn boukou problem akoz sa. Me proze Zeova pa’nn sanze. Li anvi ki bann dimounn ki obeir Li, zot vinn so bann zanfan pou touletan. Dan sa lartik-la, nou pou trouve kouma Zeova inn montre ki nou ena valer pou Li. Apre sa, nou pou trouve seki nou nou kapav fer pou montre Zeova ki nou anvi form parti dan so fami. Alafin, nou pou koz lor bann benediksion ki bann zanfan Zeova, ki lor later, pou gagne pou touletan.

5. Kouma Zeova inn montre ki nou ena valer pou Li kan Li’nn kree nou dan so resanblans?

⁵ Zeova inn kree nou dan so resanblans. (Zen. 1:26, 27) Akoz sa, nou kapav devlop ek manifeste bann zoli kalite, kouma lamour, konpasion, fidelite, ek lazistis. (Ps. 86:15; 145:17) Kan nou devlop sa bann kalite-la, nou donn Zeova laglwar ek nou montre ki nou ena rekonesans anver Li. (1 Pier 1:14-16) Kan nou azir dan enn fason ki fer nou Papa plezir, sa rann nou ere. Anplis, Zeova inn kree nou dan so resanblans ek Li’nn donn nou kapasite pou vinn bann dimounn ki kapav form parti dan so fami.

6. Kouma Zeova inn montre ki nou ena valer pou Li kan Li’nn kree later?

⁶ Zeova inn prepar enn zoli plas pou nou reste. Avan ki Zeova kree nou bann premie paran, Li ti pran boukou letan pou prepar later. (Zob 38:4-6; Zer. 10:12) Zeova Li enn Bondie ki bon ek zenere, ek Li’nn kree boukou kitsoz pou rann nou ere. (Ps. 104:14, 15, 24) Detanzantan, Zeova ti pran letan pou reflesi lor seki Li ti kree, ek Li “ti trouve ki sa ti bon.” (Zen. 1:10, 12, 31) Zeova inn montre ki bann imin ena valer pou Li, kan Li’nn donn zot lotorite pou diriz lor tou bann kitsoz ki Li’nn kree lor later. (Ps. 8:6) Bondie so proze se ki bann imin parfe okip bann kitsoz ki Li’nn kree ek ki sa rann zot ere. Eski souvan to remersie Zeova pou sa zoli promes-la?

7. Kouma Zozwe 24:15 montre nou ki bann dimounn ena liberte pou swazir?

⁷ Zeova inn donn nou liberte pou swazir. Nou kapav swazir ki nou anvi fer ar nou lavi. (Lir Zozwe 24:15. *) Me nou fer leker Zeova kontan kan nou swazir pou servi Li. (Ps. 84:11; Prov. 27:11) Nou kapav servi nou liberte pou swazir pou pran bann lezot bon desizion osi. Anou gete seki nou kapav aprann ar lexanp Zezi.

8. Sit enn fason kouma Zezi ti servi so liberte pou swazir.

⁸ Nou kapav imit lexanp Zezi kan nou swazir pou fer lintere lezot pas avan nou prop lintere. Enn zour, Zezi ek so bann zapot ti bien fatige. Alor, zot ti al dan enn plas trankil pou zot kapav repoz inpe. Me zot pa ti reisi repoze. Kifer? Parski enn lafoul dimounn ti vinn get zot ek zot ti anvi ki Zezi ansegn zot. Selman, Zezi pa ti ankoler. Li ti ena pitie pou sa bann dimounn-la. Alor, ki li ti fer? “Li [ti] koumans ansegn zot boukou kiksoz.” (Mark  6:30-34) Kan nou swiv lexanp Zezi ek nou servi nou letan ek nou lenerzi pou ed lezot, nou donn laglwar nou Papa ki dan lesiel. (Mat. 5:14-16) Ek nou montre osi ki nou anvi form parti dan so fami.

9. Ki kado extraordiner Zeova inn donn bann imin?

⁹ Zeova inn donn bann imin kapasite pou gagn bann zanfan, ek Li’nn donn zot responsabilite pou ansegn zot zanfan, pou ki bann-la kontan Li ek servi Li. Si to enn paran, eski to apresie sa kado extraordiner la? Zeova inn donn bann anz boukou kapasite extraordiner, me Li pa’nn donn zot kapasite pou gagn bann zanfan. Alor, si to ena enn zanfan, to bizin ena rekonesans pou privilez ki Zeova inn donn twa. Bann paran inn gagn enn gran responsabilite, zot bizin elve zot bann zanfan “dan disiplinn ek lansegnman” Zeova. (Efe. 6:4; Det. 6:5-7; Ps. 127:3) Pou ed bann paran, lorganizasion Zeova donn zot boukou zouti ki baze lor Labib, kouma bann piblikasion, bann video, bann sante, ek bann lartik lor Internet. Li kler ki Zeova ek Zezi bien kontan bann zanfan! (Lik 18:15-17) Zeova bien kontan kan bann paran kont lor Li ek kan zot fer zot maximum pou pran swin zot zanfan. Anplis, kan bann paran fer sa, zot donn zot zanfan posibilite pou form parti dan fami Zeova!

10-11. Gras-a laranson, ki posibilite Zeova inn donn nou?

¹⁰ Zeova inn donn nou so Garson pou ki nou kapav re-form parti dan So fami. Kouma nou’nn trouve dan  paragraf 4, Adan ek Ev ti perdi zot plas dan fami Zeova. Ek akoz zot, zot bann zanfan osi ti perdi zot plas. (Rom. 5:12) Adan ek Ev ti swazir pou dezobeir Bondie, alor zot pa ti merite pou form parti dan fami Zeova. Me ki ti pou ariv zot bann desandan? Zeova kontan bann imin, alor Li’nn pran bann dispozision pou ki bann desandan Adan ki obeir Li, zot kapav re-form parti dan So fami. Li’nn fer sa gras-a sakrifis So Garson, ki Li bien kontan, Zezi Kris. (Zan 3:16; Rom. 5:19) Gras-a sakrifis Zezi, Zeova inn kapav adopte, kouma So bann garson, 144,000 imin ki fidel.​—Rom. 8:15-17; Rev. 14:1.

¹¹ Anplis, ena bann milyon lezot fidel serviter Zeova ki pe obeir Li ek fer So volonte. Apre leprev final, alafin Regn Mil An Zezi Kris, zot pou gagn posibilite pou form parti dan fami Zeova. (Ps. 25:14; Rom. 8:20, 21) Akoz sa, depi asterla-mem, zot kapav apel zot Kreater Zeova, “Papa.” (Mat. 6:9) Bann dimounn ki pou resisite osi pou gagn posibilite pou aprann konn Zeova. Lerla, bann ki swazir pou obeir Zeova, zot osi zot pou kapav form parti dan So fami.

12. Ki kestion nou pou reponn asterla?

¹² Kouma nou’nn trouve, Zeova inn fer boukou kitsoz pou montre ki bann imin ena valer pou Li. Li’nn fini adopte bann Kretien ki ena lesperans pou al dan lesiel kouma So bann garson, ek Li’nn donn bann dimounn ki form parti dan “gran lafoul” posibilite pou vinn so bann zanfan dan lemond nouvo. (Rev. 7:9) Asterla, ki nou bizin fer pou montre Zeova ki nou anvi form parti dan so fami?

13. Ki nou bizin fer pou ki nou kapav form parti dan fami Zeova? (Mark 12:30)

¹³ Montre Zeova ki to kontan Li kan to servi Li avek tou to leker. (Lir Mark 12:30.) Zeova inn donn nou boukou zoli  kado. Enn parmi bann pli zoli kado ki Zeova inn donn nou se posibilite pou ador Li. Nou montre Zeova ki nou kontan Li kan nou “obeir so komannman.” (1 Zan 5:3) Enn parmi bann komannman ki Zeova anvi nou obeir se komannman ki Zezi inn donn nou, setadir fer bann disip ek batiz zot. (Mat. 28:19) Zezi inn osi donn nou lord pou kontan nou kamarad. (Zan 13:35) Kan enn kikenn obeir bann komannman Zeova, li gagn posibilite pou form parti dan fami bann serviter Zeova ki lor later.​—Ps. 15:1, 2.

14. Kouma nou kapav montre lamour anver lezot? (Matie 9:36-38; Romin 12:10)

¹⁴ Montre lamour anver lezot. Lamour se kalite prinsipal Zeova. (1 Zan 4:8) Avan mem ki nou konn Zeova, Li ti deza montre lamour anver nou. (1 Zan 4:9, 10) Nou imit lexanp Zeova kan nou montre lamour anver lezot. (Efe. 5:1) Enn parmi bann pli bon fason ki nou kapav montre lamour anver lezot, se kan nou ed zot pou aprann konn Zeova, tanki ankor ena letan pou fer sa. (Lir Matie 9:36-38.) Kan nou fer sa, nou donn zot posibilite pou form parti dan fami Bondie. Apre ki enn kikenn pran batem, nou bizin kontign kontan li ek ena respe pou li. (1 Zan 4:20, 21) Kouma nou kapav fer sa? Enn fason ki nou fer sa, se kan nou pa dout so bann mobil. Par exanp, si nou pa konpran kifer li’nn fer enn kitsoz, fode pa nou panse ki li’nn fer sa parski li ena bann move lintansion. Okontrer, nou pou montre ki nou ena respe pou nou frer kan nou konsider li kouma pli siperyer ki nou.​—Lir Romin 12:10; Fil. 2:3.

15. Anver kisannla nou bizin montre konpasion ek bonte?

¹⁵ Montre konpasion ek bonte anver tou dimounn. Si nou anvi form parti dan fami Zeova, nou bizin met an pratik seki nou aprann dan Labib. Par exanp, Zezi inn ansegn nou ki nou bizin montre konpasion ek bonte anver tou dimounn, mem nou bann lennmi. (Lik 6:32-36) Kitfwa nou kapav trouv sa difisil pou fer. Si nou dan sa sitiasion-la, alor nou bizin aprann pans ek azir parey kouma Zezi. Kan nou fer nou best pou obeir Zeova ek pou imit Zezi, nou montre nou Papa ki dan lesiel ki nou anvi form parti dan so fami.

16. Kouma nou kapav protez repitasion fami Zeova?

¹⁶ Protez repitasion fami Zeova. Dan enn fami kot ena plizir zanfan, seki pli tipti-la bien souvan pou esey fer parey kouma seki pli gran-la. Si gran zanfan-la aplik bann prinsip Labib dan so lavi, li pou enn bon lexanp pou bann ki tipti. Me si li fer bann move kitsoz, bann lezot zanfan kitfwa pou swiv so move lexanp. Li parey dan fami Zeova osi. Si enn Kretien, ki ti fidel avan, vinn enn aposta ouswa fer bann move kitsoz, kitfwa lezot Kretien pou rod fer parey kouma li. Bann Kretien ki azir dan sa fason-la, zot gat repitasion fami Zeova. (1 Tes. 4:3-8, NW) Fode pa nou swiv bann move lexanp, ek nou bizin pa les nanye gat nou lamitie avek nou Papa ki kontan nou.

17. Ki fason panse nou bizin rezete, ek kifer?

¹⁷ Met to konfians dan Zeova, pa dan bann kitsoz materyel. Zeova promet nou ki Li pou donn nou manze, linz, ek enn plas pou reste, si nou met so Rwayom an premie dan nou lavi ek si nou viv an-akor avek So bann prinsip. (Ps. 55:22; Mat. 6:33) Si nou ena konfians dan sa promes-la, nou pa pou panse ki bann kitsoz materyel pou protez nou ek rann nou ere. Nou  kone ki sel fason ki nou kapav gagn vre lape se kan nou fer volonte Zeova. (Fil. 4:6, 7) Mem si nou ena larzan ek ki nou kapav aste boukou kitsoz, nou bizin demann noumem si nou pou vremem ena letan ek lenerzi pou servi ek antretenir sa bann kitsoz-la. Nou bizin fer bien atansion ki bann kitsoz materyel pa vinn tro inportan pou nou! Fode pa nou bliye osi ki Zeova inn donn nou enn travay pou fer. Alor, nou bizin pa les nanye distrer nou. Nou pa anvi resanble sa zenn zom ki ti refiz swiv Zezi la parski li ti plis kontan so bann dibien materyel. Anplis, sa zom-la ti perdi posibilite pou servi Zeova ek pou vinn enn parmi So bann garson!​—Mark 10:17-22.

18. Ki gran loner ek ki benediksion bann dimounn ki obeir Zeova pou gagne pou touletan?

¹⁸ Bann dimounn ki obeir Zeova pou gagn pli gran loner ki ena: Zot pou gagn loner pou kontan ek ador Zeova pou touletan! Bann dimounn ki ena lesperans pou viv lor later, zot pou osi gagn privilez pou okip later, sa zoli planet ki Zeova inn kree pou nou la. Biento, Rwayom Bondie pou fer later ek tou bann kitsoz ki ena lor la re-vinn zoli. Finn ena boukou problem depi ki Adan ek Ev inn desid pou kit fami Zeova, me biento Zezi pou regle tou sa bann problem-la. Zeova pou resisit bann milyon dimounn ek Li pou donn zot posibilite pou viv pou touletan lor later ki pou vinn enn paradi. Anplis, zot pou ena enn bon lasante. (Lik 23:42, 43, NW) Kan bann dimounn ki servi Zeova pou vinn parfe, zot pou gagn “laglwar ek loner” ki mansione dan Psom 8:5.

19. Ki kitsoz nou bizin rapel?

¹⁹ Si to form parti dan “gran lafoul,” to ena enn zoli lesperans. Bondie kontan twa ek Li anvi ki to vinn enn manb so fami. Alor, fer tou seki to kapav pou fer Li plezir. Dan to lavi toulezour, rapel bien bann promes ki Zeova inn fer twa. Apresie privilez ki to ena pou ador nou Papa ki dan lesiel, ek apresie osi posibilite ki to ena pou donn Li loner pou touletan!