1. Nubuwela dhatedhene Yehova apaddusiliye, makoho baani enanidhela?

NUBUWELA makalelo Yehova apaddusiye elabo, podi wera nnofiyera owoga ethu emodhave awogile salmista Davidi. Nlabo nimodha olobela wa Yehova ni omukoha: ‘Gasugwaga odhulu, mabasa a madiinyu, mweri ni thendderi mpaddusinyu, muthu onakwa baani wi mmubuwelelege, nahuna mwana muthu odhele onthubini baani, wi mmukabelelege?’ (Sal. 8:3, 4) Ninga Davidi, noonelamo wi nihiyeva okwaranya makalelo yunnuwale elabo, podi wera nubuwela wi Yehova anoonithuwathuwela eyo enonitikiniha. Ninga nnafunihu ohudhera, Yehova keera wasamalela baahi athu obajha, Adawu ni Eva, mbwenye oliye ahenya wihina ekale epaddi ya emudhaye.

2. Mutholo baani Yehova anvahiliye Adawu ni Eva?

² Adawu ni Eva bahima oobajha okala elabo yavati ababihu oodhulu, Yehova. Yehova oojhehera wi Adawu ni Eva yere okavihera efunelo yaye. Bumwahaya oliye adhe avahege mutholo ola: ‘Mwaabale ahima mwinjhivane, mudhale elabo yatene yavati.’ (Gén. 1:28) Adawu ni Eva yere wabala ahima ni esamalelege elabo. Aliwa yahere yiwelela yakwanihera mutholo yaavahiwiwa ni Yehova, Adawu ni Eva ni ahima yabaliwege osogolo yerege okalave emudhi ya Mulugu malabo amatene.

3. Mwahaya bwaddi nigawoga wi Adawu ni Eva yaari ahima athima vamuralani wa Yehova?

³ Adawu ni Eva yaari ahima athima vemudhini ya Yehova. Va Salmos 8:5 ni notana, Davidi ohusoriha mwahaya bwaddi Yehova adhe ampaddusege muthu: ‘Nyu muhumweriha okala mug’no ohiyana ni dhopaddusiwa dhodhulu, ni muhunvaha nthithimiho ni waara.’ Hee athu oomwilini kinna enonelo, newene  kopolo dhimodhave ninga angero. (Sal. 103:20) Aliwa epaddusiwe ninga athu ‘ang’no’ ohiyana ni angero oomuzimuni. Eyo ethu yootikiniha! Yehova ahathikela ababihu oobajha murala wapama!

4. Yereye ddi ni Adawu vamodha ni Eva, ki nnaasuze ddi yohudhera ela?

 ⁴ Yowukulihaya, Adawu ni Eva ohiya okala murala wa Yehova. Ninga nnafunihu woona osogolo nahudheraga musolo ola, eyo ehatotela makathamiho aniwa yaabalegiwa. Naari dhigarive ndo, efunelo ya Yehova wodhela athu kisadduwile. Oliye anafuna wi athu owiwelela ekaleve anaaye malabo amatene. Yohudhera ela, nnere woona ethu baani Yehova eriliyena wihina atonyihedhe wi niri athima. Nindo noone ethu baani enahoweleya werana wihina ntonyihedhe wi nnofuna okosa epaddi ya murala wa Mulugu. Vogomiherava, nnere woona mareeliho ahima a Yehova enawakeliwa malabo amatene.

5. Nnatonyihedhe aavi wi nnohagalala opaddusiwa moligana ni Mulugu?

⁵ Yehova anipaddusile moligana nuliye. (Gén. 1:26, 27) Iyo nipaddusiwe moligana ni Mulugu. Yehova ohunivaha ekalelo yowunnuwelavo ninga otonyihedha dhikalelo dhimodhave ninga oliye; dhikalelo dhinanikavihera okanna emuthu oliye anafuniye mwimudhini mwaaye. Motajhiha, odhivela, thagaraga, okala oororomeleya ni wogowa. (Sal. 86:15; 145:17) Nilibiheraga otonyihedha dhikalelo ndha nnowoniha wi nnomutamalela Yehova mwaha onipaddusa moligana nuliye. (1 Ped. 1:14-16) Ohiya eyo, nnojhavo egumi ni nnohagalala.

6. Makalelo epaddusiwe elabo yavati enoniha addi wi Yehova onowavaha thima athu?

⁶ Yehova ohunegeredhela murala wapama. Ahinathi ompaddusa muthu obajha, Yehova aabajhile wapaddusela athu elabo yavati. (Jó 38:4-6; Jer. 10:12) Mwaha wodhivela ni okala muthu oovaha, Yehova opweha elabo yavati dhego dhowinjhiva dhanihagalasege. (Sal. 104:14, 15, 24) Mudhidhi imenliye wihina asugwe dhopaddusa dhaye, Yehova ‘woona wi dhihiwomela.’ (Gén. 1:10, 12, 31) Atonyihedhaga wi athu bathima, Yehova wavaha ‘owedha’ wodhela dhopaddusa dhatedhene dhapama mwilaboni yavati. (Sal. 8:6) Yofuna ya Mulugu sowi athu oologomana ekanne ohagalala ni esamalelege dhopaddusa dha Mulugu malabo amatene. We onotamalela ejhehero yosogolo?

7. Josué 24:15, anoniha aavi wi athu ehikanna ofuru wosakula?

⁷ Yehova ohunivaha ofuru wosakula. Iyo podi osakula ethu baani nnafunihu werana mwigumini mwehu. (Omwileri Josué 24:15.) Ekalelo ela enithaniwa ofuru wosakula. Yehova onohagalala nasakula omulabela. (Sal. 84:11; Pro. 27:11) Nikanna makalelo owinjhiva olabihedha pama ofuru wosakula. Kasugwa yotajhiha anivahile Yesu.

8. Yesu alabihere addi ofuru waye wosakula mudhidhi yole?

⁸ Ninga Yesu, iyo podi osakula weka efunelo yaathu amodha mburo wobajha. Wahifiya mudhidhi, Yesu ni anamaharaye yaligiwa ogomene, mwaha wa yeyo, aliwa weedda mwana olenddo wihina efwanye mburo wowithuwa. Mbwenye eyo kiyenyeye. Muthithi waathu wafwanya, mwaha athu ale yafuna Yesu ahudhihe. Yesu katakaleliwe. Ohiya eyo, oliye waweddela thagaraga. Yesu enre ddi? ‘Oliye wambela wahudhiha dhithu dhowinjhiva.’ (Mar. 6:30-34) Iyo podi omutajhiha Yesu. Iyo  podi olabihedha mudhidhi wehu ni kopolo dhehu wihina nakavihere athu amodha. Nerana ndo, nnere omuthithimiha babihu oodhulu. (Mat. 5:14-16) Ohiya eyo nnere otonyihedha wi nnofuna okala epaddi ya emudhi ya Yehova.

9. Ababi yahidduwale ddiniyani?

⁹ Yehova ohavaha athu mutholo wowabala ahima ni wowahudhiha omudhivela ni omulabela oliye. Akala we oli babi obe mayi, we onotamalela nvaho ola wavayekiwa? Ebaribari wi Yehova ohavaha thotho yowinjhiva angero, mbwenye aliwa kivahiwe ofuru ola. Bumwahaya, ababi enofwanelela ovaha thima mutholo ola wowalela aniwa. Walela ahima ‘ni malagano a Yehova’ mutholo ababi evahiwiwa; teto mabasa ootaleleya. (Efé. 6:4; Deut. 6:5-7; Sal. 127:3) Wihina ababi ekaviheriwe, nikuru na Mulugu nihavaha dhipano dhinadhela mBibliyani ninga malivuru, vidiyu, jhibo ni muselu dha mwinternetini. Eyo enotonyihedha wi babihu oodhulu ni mwanaye, Yesu, enowavaha thima azombwe ehu. (Luc. 18:15-17) Ababi yamuroromelaga Yehova ni yeragana enawedhiwa wihina yasamalelege aniwa, Yehova onohagalala. Teto ababi ala enowavaha aniwa ofuru wokala emudhi ya Yehova malabo amatene!

10-11. Wodhela mukutho wa Yesu, ofuru baani Yehova ananivahiye?

¹⁰ Yehova upeleka egumi ya mwanaye athima wihina nikale epaddi ya emudhi yaye dila yanabili. Ninga nonilihu  ddima yanennayi, Adawu ni Eva ehihiya okala epaddi ya emudhi ya Yehova, emodhave wereya naniwa. (Rom. 5:12) Adawu ni Eva kiyanna oneti umodha mwaha aliwa yere osakula omuthegela Yehova yapudhave. Ki aniwaya? Mwaha odhivela anna Yehova naathu, oliye waaja makalelo owakavihera ale yiwelele: wodhela mukutho wa Yesu Kiristu. (João 3:16; Rom. 5:19) Mwaha wa mukutho apelekile mwana oobajha a Mulugu, athu owakwana 144.000 ororomeleya enere okala ahima a Mulugu. — Rom. 8:15-17; Apo. 14:1.

¹¹ Ohiya addibilave oothikitheliwa, muthithi waathu oororomeleya enna wilibihera wihina yerena efunelo ya Mulugu peeno. Aliwa enna ojhehera okala emudhi ya Mulugu wehiwa wogomihera wa yaka txikwi wavira. (Sal. 25:14; Rom. 8:20, 21) Mwaha muthithi ola waathu okanna ejhehero ela, enere ofiyera omwithana Yehova, ninga mpaddusi, obe ‘Babiwa.’ (Mat. 6:9) Ale enahogoloseliwe okalawo, mparayizu enere okanna ofuru wohudhera omwiwelela Yehova. Yasakula omwiwelela Mulugu, naaliwaya enere okala emudhi ya Yehova.

12. Nikoho baani nnaakuliwe ovanene?

¹² Ninga nonilihu, Yehova ohutonyihedha mwamakalelo ohiyana-iyana wi athu bathima. Oliye ohenya wi addibila oothikitheliwa ekale anaaye, teto oliye ohavaha ale eli epaddi ya ‘muthithi munlubale’ ofuru wookala anaaye yafiya elabo exa. (Apo. 7:9) Ethu baani nnafunihu werana peeno enatonyihedhe wihina nnofuna okala epaddi ya emudhi ya Yehova malabo amatene?

13. Ethu baani nnahowelihu werana wihina nikale epaddi ya emudhi ya Yehova malabo amatene? (Marcos 12:30)

¹³ Omulabele Yehova ni murimawo wamutene. (Omwileri Marcos 12:30.) Nuupama waye, Yehova ohavaha athu mukono dhowinjhiva. Mukono munlubaleya fuwavaha athu ofuru womulabela oliye. Iyo nnotonyihedha wi nnomudhivela Yehova ‘nawiwelelaga malamulo aye.’ (1 João 5:3) Awogaga mwandina na Babe, Yesu ohuniruma wahudhiha athu wihina ekale anamahara ni wabaddiza. (Mat.  28:19) Oliye ohunikongomedha odhivelana mmodha nimukwaye. (João 13:35) Ale enamwiwelela podi okosa epaddi ya emudhi ya Yehova yapele elabo yatene malabwene. — Sal. 15:1, 2.

14. Nnatonyihedhe aavi wi nnowadhivela athu amodha? (Mateus 9:36-38; Romanos 12:10)

¹⁴ Okanne odhivela naathu amodha. Odhivela sikalelo yathima ya Yehova. (1 João 4:8) Yehova ambele onidhivela iyo nahinamunone. (1 João 4:9, 10) Iyo podi omutajhiha Yehova wodhela wadhivela amodha. (Efé. 5:1) Makalelo apama owoniha wi nnowadhivela athu fuwakavihera aliwa ohudhera wodhela Yehova mudhidhi wahinakwaddeye. (Omwileri Mateus 9:36-38.) Mwamakalelo yala, nnowavaha ofuru yokala mwimudhini ya Mulugu. Naarive muthuya agamanle obaddiziwa, kaniselele omudhivela ni omuriha. (1 João 4:20, 21) Nnande addi? Makalelo apama, funvilelana dhithu aneriyena. Obe nere, erana ethu nahinonelihumo kanubuwele wi erilena yapudhave. Ohiya eyo, nimuthithimihe ddibilihu ni nimonege ninga muthu athima onipitha iyo. — Omwileri Romanos 12:10; Fil. 2:3.

15. Athu baani nnafwanelelihu waweddela thagaraga ni wawerela opama?

¹⁵ Okanne thagaraga ni okale muthu apama naathu aatene. Akala nnofuna okala vaari vaathu yale enna oneti womwithana Yehova ninga Babiwa, niparihedhege mabasa dhatedhene Madhu a Mulugu enawogiwa mwigumini mwehu. Motajhiha, Yesu ohudhiha wihina iyo nnofwanelela okala athu athagaraga ni apama naathu atene, naarive naleya eri amwiddanihu. (Luc. 6:32-36) Malabo mamodha podi onirusaga werana ndo. Akala siyeyo enereya ni iyo, nihudhere wubuwela ni werana ninga Yesu. Nilibiheraga wihina nimwiwelele Yehova ni omutajhiha Yesu, nnamutonyihedha babihu oodhulu wihina nnafuna nikale epaddi ya emudhi yaye malabo amatene.

16. Nnawedhe addi obarela ekalelo yapama ya emudhi ya Yehova?

¹⁶ Obarele ekalelo yapama enna emudhi ya Yehova. Enopadduwa vamuralani mwana muzombwe ofunaga omutajhiha ddibila apogoya. Ddibile apogoya aharaga dholaga dha mBibliyani oliye anere okala yotajhiha yapama ya ddibile mug’no. Mbwenye apogoya akala anerana dhithu dhabure, podi wera ni mwaanaya mug’no anerege werana dhithu aneriyena. Eyo podi wereya ni emudhi ya Yehova. Kubuwela ddibila aali oororomeleya, vano okala gwalagwambi, othukula mweddelo wamararuwo obe weragana dhithu dhimodha dhabure. Eyo podi wathukulela athu amodha otajhiha ekalelo yaye yabure. Yowukulaya sowihina ale enerana ndo enotakaliha ekalelo yapama yemudhi yaale enamwebedha Yehova. (1 Tes. 4:3-8) Bumwahaya enofwanelela orabela pamadhene dhikalelo nda dhabure ni ohenya wihina ethu-sithu enilapelihe ni Babihu oodhulu oodhivela.

17. Mubuwelo baani wabure nihinafunihu okanna ki mwahaya bwaddi?

¹⁷ Omuroromele Yehova kuroromele dhorela. Yehova onopaganya, neeka mburo wobajha Omwene wa Mulugu ni nakala owiwelela, oliye anere onivaha yoojha, yowara ni mburo vokala. (Sal. 55:22; Mat. 6:33) Nimubuwelo yola, kanubuwelege wihina dhorela dha elabo ela podi onivaha obareleya obe ohagalala. Iyo nihinona wi makalelo apama okanna murenddele mmubuweloni fuwerana efunelo ya Yehova. (Fil. 4:6, 7) Naarive niganna korowa dhogulana dhithu dhowinjhiva, enofwanelela opendda akala nikanna mudhidhi ni kopolo yosamalela dhithu nda nnagulihu. Nnothabwa  ororomela dhorela dhehu? Kanidduwale wihina ale enafuna okala epaddi ya emudhi ya Mulugu kikale amangonya. Eyo enatapulela wi kanenye ethu-sithu onipupurusa. Iyo kannafuna omutajhiha muzombwe ole aakoddile ofuru womulabela Yehova ni wokala epaddi ya emudhi yaye  — dhatedhene dhendho dhereye mwaha othabwa ororomela mwana dhorela anniyena! — Mar. 10:17-22.

18. Oneti baani, ki mareeliho baani athu owiwelela enakanniwana?

¹⁸ Athu oororomeleya enere okanna oneti munlubale wakwaranya athu atene — womudhivela ni womwebedha Yehova malabo amatene! Ale enna ejhehero yokalawo elabo ela yavati enere ohagalala mwaha wosamalela elabo ela yavati, elabo Yehova apaddusiliye wihina okale murala wologomana waathu. Vohilegela, naambela othongiwa ni Omwene wa Mulugu, elabo ni dhopaddusiwa dhatedhene dhinere owomela. Yesu anere wamariha makathamiho atene yakumelele Adawu ni Eva nuuthega nuuthoma ohiya okala epaddi ya emudhi ya Mulugu. Yehova anere wahogolosela okalawo mbwabwadda ni mbwabwadda waathu teto, enere okanna ofuru wokalawo malabo amatene ni egumi yologomana elabo ela yawomihedhiwa wihina ekale parayizu. (Luc. 23:42, 43) Vang’no-vang’no athu owiwelela yambela ologomana, kadda muthu anere okanna ‘nthithimiho ni waara,’ mowiwanana ninga Davidi alembiye. — Sal. 8:5.

19. Yoluba yawo ekale ddi?

¹⁹ Akala we onokosa epaddi ya ‘muthithi munlubale,’ we wokanna ejhehero yapama. Mulugu onowudhivela ni anafuna wihina we okale emudhi yaye. Bumwahaya, wilibihere wihina omulabele Mulugu. Kadda labo kuddiwalege mpaganyo ola wa Mulugu mmubuweloni mwawo ni mmurimani mwawo. Otamalele oneti ola onniwena womwebedha Babi oodhulu ni ovahege thima ejhehero ela yomulabela malabo amatene!