1. D sã n tags bũmb nins fãa a Zeova sẽn naanã yelle, d tõe n soka d mens tɩ bõe?

TÕND sã n tags bũmb nins fãa a Zeova sẽn naanã yelle, d tõe n talla yɩɩn-gʋlsd a Davɩɩd tagsgã buudu. A pʋʋsa a Zeova n yeel yaa: “Mam sã n get saasã sẽn yaa yãmb nus tʋʋmã, la m get kiuugã ne ãdsã yãmb sẽn ning-b b zĩisẽ wã. Mam sokda m meng yaa: ‘Ninsaal yõod zema bõe, tɩ yãmb tẽr a yelle? Ninsaal yaa bõe, tɩ yãmb get a yelle?’” (Yɩɩn. 8:4, 5) Wa a Davɩɩde, tõnd me sã n ges bũmb nins fãa a Zeova sẽn naanã, n neẽ tɩ d pa zem baa fʋɩ, la t’a geta d yell baa ne rẽ fãa wã tõe n ling-d lame. D na n yãame t’a Zeova ra pa get d yaab a Ãdem ne a Awa yell bal ye. A ra kɩtame tɩ b naag a zakã neba.

2. Bõe la a Zeova ra rat t’a Ãdem ne a Awa maane?

² A Ãdem ne a Awa n yɩ a Zeova pipi kamb tẽngã zugu, t’a Zeova ra yaa b Ba sẽn nong-b wʋsgo. A kõ-b-la tʋʋmd b sẽn segd n tʋme. Wẽnnaam yeel-b lame yaa: “Rog-y kamb n fɩɩg n pid dũniyã, la y soog-a.” (Sɩng. 1:28) A sẽn da rat yaa b rog kamba, la b ges tẽngã yell neere. A Ãdem ne a Awa sã n da sak n tũ a Zeova sẽn dat tɩ b maanã, bãmb ne b yagensã fãa ra na n kell n yɩɩ a zakã neb wakat sẽn kõn sa yĩnga.

3. Bõe yĩng tɩ d tõe n yeel t’a Zeova sẽn naan a Ãdem ne a Awa to-to wã ra wilgdame t’a nand-b-la hal wʋsgo?

³ A Zeova sẽn naan a Ãdem ne a Awa to-to tɩ b na n naag a zakã nebã ra wilgdame t’a nand-b-la wʋsgo. Yɩɩn-sõamyã 8:5, MN wã pʋgẽ, a Davɩɩd goma a Zeova sẽn naan ninsaal to-to wã yell n yeel yaa: “Yãmb naan-a lame tɩ kellẽ bilf t’a ta malɛgsã. Yãmb kõ-a-la ziir la neerem.” Yaa  sɩd t’a Zeova pa naan ninsaalbã tɩ b pãngã, b yamã la b minimã ta malɛgsã ye. (Yɩɩn. 103:20) La a naan-b lame tɩ “kellẽ bilf” tɩ b ta malɛgsã sẽn tar pãng wʋsgã. Ad sɩd yaa bõn-sõng tɛkẽ! Sɩd-sɩdã, a Zeova kõo a Ãdem ne a Awa vɩɩm sẽn da tar bark wʋsgo.

4. Bõe n paam a Ãdem ne a Awa, b sẽn beeg a Zeova wã yĩnga? Bõe yell la d na n gom sõs-kangã pʋgẽ?

 ⁴ Bʋko, a Ãdem ne a Awa kɩɩsa a Zeova, tɩ kɩt tɩ b ra pa le yaa a zakã neb ye. Wa d sẽn na n yã sõs-kãngã pʋgẽ wã, b sẽn kɩɩs a Zeova wã waa ne zu-loees wʋsg b yagensã zugu. La a Zeova raabã pa toeem ye. A ratame tɩ neb nins sẽn na n sak yẽ wã yɩ a kamb wakat sẽn kõn sa yĩnga. Bɩ d reng n ges bũmb kẽer a sẽn maane, tɩ wilgdẽ t’a nand-d-la wʋsgo. Rẽ poore, d na n yãa bũmb ning d sẽn tõe n maan masã menga, n wilg tɩ d rat n naaga a zakã neba. Sẽn na n baase, d na n yãa a Zeova tẽng zug kambã sẽn na n wa paam bark nins wakat sẽn kõn sa.

5. Wãn to la d tõe n waoog Wẽnnaam a sẽn naan tõnd n wõneg a mengã yĩnga?

⁵ A Zeova naana tõnd n wõneg a mengã. (Sɩng. 1:26, 27) A Zeova sẽn naan tõnd n wõneg a mengã yĩnga, d tõe n bɩɩsa zʋg-sõma buud toor-toore. Wala makre, nonglem, nimbãan-zoeere, maan-sɩda, la tɩrlem. (Yɩɩn. 86:15; 145:17) D sã n bɩɩsd zʋg-sõma-kãensã, d waoogda a Zeova, la d wilgdẽ tɩ d sũur nooma ne-a. (1 Pɩy. 1:14-16) D yel-manesmã sã n tat d saasẽ Ba wã yam, kõt-d-la sũ-noogo. D sẽn tar a Zeova zʋg-sõma wã buudã, kɩtame tɩ d tõe n yɩ neb nins buud a sẽn dat a zakã pʋgã.

6. Wãn to la a Zeova wilg t’a nanda ninsaalbã, a sẽn segl tẽngã to-to wã yĩnga?

⁶ A Zeova segla zĩig sẽn yaa sõma wʋsgo, ninsaalbã yĩnga. Yʋʋm wʋsg nand t’a Zeova naan pipi ninsaalã, a reng n segla tẽngã. (Zoob 38:4-6; Zer. 10:12) A Zeova sẽn yaa kõat la maan-neer soabã yĩnga, a naana bõn-sõma buud toor-toore, sẽn na yɩl tɩ d paam sũ-noogo. (Yɩɩn. 104:14, 15, 24) A tagsa bũmb nins fãa a sẽn naanã zugu, la a yãame tɩ yaa sõma hal wʋsgo. A wilgame t’a nanda ninsaalbã, a sẽn kɩt tɩ b na n “soog” bõn-sõma nins fãa a sẽn naan tẽngã zugã. (Yɩɩn. 8:7) Wẽnnaam raabã yaa tɩ ninsaalb sẽn zems zãng ges bũmb nins fãa a sẽn naanã yell wakat sẽn kõn sa yĩnga, tɩ kõt-b sũ-noogo. Yãmb pʋʋsda a Zeova bark wakat fãa rẽ yĩng bɩ?

7. Wãn to la Zozoe 24:15 wilgd tɩ ninsaal tõe n yãka a toorẽ yam?

⁷ A Zeova naana tõndo, tɩ d tõe n yãk d toorẽ yam. D tõe n yãka d sẽn dat n maan vɩɩmã pʋgẽ. (Karm-y Zozoe 24:15.) D sã n yãk yam n na n tũ d Wẽnnaamã sẽn nong-dã, a sũur nooma ne rẽ. (Yɩɩn. 84:11; Yel. 27:11) D sẽn tõe n yãk d toorẽ yamã yĩnga, d tõe n yãka yam n maan bõn-sõma wʋsgo. D ges a Zeezi sẽn kõ tõnd mak-sõng rẽ wɛɛngẽ to-to.

8. Bõe la a Zeezi maan-yã, a sẽn tõe n yãk a toorẽ yamã yĩnga?

⁸ D sã n yãk yam n lʋɩɩsd d taabã raab taoore, d rɩkda a Zeezi togs-n-taare. Daar a ye, a Zeezi ne a tʋm-tʋmdbã ra yɛɛ wʋsgo. B kẽnga zĩig sẽn yaa sɩddd n na n tɩ vʋʋse. La b pa paam n vʋʋs ye. Neb kʋʋng n wa b nengẽ, n da rat t’a Zeezi zãms-b bũmb wʋsgo. La a Zeezi sũur pa yik ye. B nimbãaneg pʋd n yõk-a lame. Bõe la a maan-yã? A “sɩngame n  zãmsd-b bũmb wʋsgo.” (Mark 6:30-34) Wa a Zeezi, tõnd me sã n dɩkd d pãngã la d sẽkã n sõngd d taabã, waoogda d saasẽ Ba wã. (Mat. 5:14-16) Wilgdame me tɩ d rat n yɩɩ a Zeova zakã neda.

9. Bõe la roagdbã pa segd n yĩmi?

⁹ A Zeova naana ninsaalbã tɩ b tõe n dog kamba, la b zãms b kambã tɩ b wa nong-a la b tũud-a. Y sã n yaa roagda, y sũur nooma ne a Zeova sẽn kɩt tɩ y tõe n maan woto wã bɩ? A Zeova kõo malɛgsã tõog tɩ b tõe n maan bũmb toor-toore, la a pa kõ-b tõog tɩ b tõe n dog kamb ye. Woto wã, y sã n yaa roagda, bɩ y wilg tɩ y sũur nooma ne y sẽn paam n tõe n dog kamb la y wub-bã. Wẽnnaam kõo roagdbã tʋʋm-kãseng sẽn yaa wub b kambã a ‘Zeova kiblgã la a saglsã pʋsẽ.’ (Efɛ. 6:4; Tõo. 6:5-7; Yɩɩn. 127:3) A Zeova siglgã yiisda bũmb wʋsg sẽn tik Biiblã zugu, n na n sõng roagdbã. Wala makre, sɛba, video-rãmba, yɩɩla, la bũmb a taab sẽn be tõnd sɩtã pʋgẽ. Yaa vẽeneg tɩ d saasẽ Ba wã ne a Bi-riblã nonga kom-bɩɩsã wʋsgo. (Luk 18:15-17) Roagdbã sã n teeg a Zeova la b maand b sẽn tõe fãa n na n ges b kambã b sẽn nongã yelle, noom-a lame. Roagdb nins sẽn maand woto wã sõngda b kambã tɩ b tõe n wa lebg a Zeova zakã neb wakat sẽn kõn sa yĩnga.

10-11. Ne a Zeezi maoongã maasem, bõe la a Zeova kɩt tɩ d tõe n wa paame?

¹⁰ A Zeova rɩka a Bi-riblã a sẽn nongã n kõ tõnd yĩnga, tɩ kɩt tɩ d le tõe n paam n lebg a zakã neba. Wa d sẽn yã  sull a naasã pʋgẽ wã, a Ãdem ne a Awa kɩɩsa a Zeova tɩ kɩt tɩ b pa le yaa a zakã neb ye. Kɩtame me tɩ b kambã la b yagensã ra pa tõe n naag a Zeova zakã neb ye. (Rom. 5:12) A Ãdem ne a Awa yãka yam n kɩɩs a Zeova. Dẽnd a sẽn kɩt tɩ b pa le yaa a zakã nebã zemsame. La b kambã ne b yagensã yẽ? A Zeova sẽn nong ninsaalbã yĩnga, a kɩtame tɩ b kamb nins sẽn na n yɩ sakdbã tõe n paam n yɩ a zakã neba. Yaa ne a Zeezi Kirist sẽn yaa a Bi-ribl sẽn ka to wã maoongã maasem la a maan woto. (Zã 3:16; Rom. 5:19) A Zeezi maoongã maasem yĩnga, Wẽnnaam yãka neb 144 000 sẽn maand sɩd ne-a tɩ b na n lebg a kamba.—Rom. 8:15-17; Vẽn. 14:1.

¹¹ Sẽn paase, neb milyõ-rãmb sẽn yaa wẽn-sakdb n maand Wẽnnaam daabã. B saagdame n na n wa lebg Wẽnnaam zakã neba. Na n yɩɩ yaoolem makrã sẽn na n zĩnd a Zeezi naamã sẽn na n kaoos yʋʋm tusrã saabẽ wã poore. (Yɩɩn. 25:14; Rom. 8:20, 21) B sẽn saagd woto wã yĩnga, masã menga, b zoe n boonda a Zeova sẽn yaa b Naandã tɩ b “Ba.” (Mat. 6:9) Sẽn na n vʋʋg-bã me na n paam n bãnga a Zeova sẽn dat tɩ b maan bũmb ningã, tɩ sẽn na n sak-b n maan Wẽnnaam daabã me wa paam n naag a zakã neba.

12. Sok-bʋg la d na n leok masã?

¹² Wa d sẽn yã wã, a Zeova zoe n maana bũmb wʋsgo, n wilg t’a nanda ninsaalbã. A zoe n yãka sẽn paam-b vʋʋsem sõngã zaeebã tɩ b yaa a kamba, la a kɩt tɩ ‘kʋʋn-kãsengã’ neb saagd n na n wa lebg a kamb dũni-paalgã pʋgẽ. (Vẽn. 7:9) Bõe la d tõe n maan masã menga, n wilg a Zeova tɩ d ratame n lebg a zakã ned wakat sẽn kõn sa yĩnga?

13. Bõe la d tõe n maane, n wa lebg a Zeova zakã neda? (Mark 12:30)

¹³ Tũ-y-yã a Zeova ne y sũur fãa n wilg tɩ  y nong-a lame. (Karm-y Mark 12:30.) A Zeova sẽn kɩt tɩ d tõe n tũ-a wã naaga kũun nins sẽn yaa sõma wʋsg n yɩɩdã. D wilgdame tɩ d nonga a Zeova, d sã n sakd a noyã. (1 Zã 5:3) A Zeezi sẽn kõ noor tɩ d sõng nebã tɩ b lebg a karen-biisi, la d lis-bã me naaga noy nins a Zeova sẽn dat tɩ d sakã. (Mat. 28:19) A leb n kõo noor tɩ d nong taaba. (Zã 13:35) A Zeova na n sakame tɩ neb nins sẽn tũud a noyã naag a nin-buiidã sẽn be dũniyã gill zug n yaa wa zak a ye nebã.—Yɩɩn. 15:1, 2.

14. Wãn to la d tõe n wilg tɩ d nonga d taabã? (Matiye 9:36-38; Rom dãmbã 12:10)

¹⁴ Wilg-y tɩ y nonga y taabã. Nonglmã yaa a Zeova zʋg-sõng ning sẽn yaa kãseng n tɩ yɩɩdã. (1 Zã 4:8) A Zeova wilgame t’a nong-d lame, nand meng tɩ d bãng-a. (1 Zã 4:9, 10) D sã n wilgdẽ tɩ d nonga d taabã, d rɩkda a togs-n-taare. (Efɛ. 5:1) Bõn-kãseng me d sẽn tõe n maan n wilg tɩ d nonga d taabã, yaa d sẽn na n sõng-b tɩ b bãng a Zeova tɩ nan ket n tõe. (Karm-y Matiye 9:36-38.) D sã n maand woto, b na n tõog n bãnga bũmb nins b sẽn segd n maane, n wa lebg Wẽnnaam zakã neba. Ned sã n wa reeg lisgu, d segd n kell n nong-a lame la d nand-a. (1 Zã 4:20, 21) Wãn to la d tõe n maan rẽ? Bũmb a ye d sẽn tõe n maane, yaa d sẽn na n sak n deeg t’a tara yam-sõngo. Wala makre, a sã n wa maan bũmb tɩ d pa wʋmd a võore, d pa na n tags tɩ yaa ne yam-wẽng ye. D pʋd n na n wilgame tɩ d waoogd-a lame, n tagsdẽ t’a yɩɩda tõndo.—Karm-y Rom dãmb 12:10; Fili. 2:3.

15. Ãnd dãmb la d segd n maand neer la d kʋmd b nimbãanega?

¹⁵ Maand-y nebã fãa neere, la y kʋmd b nimbãanega. D sã n dat n wa naag a Zeova zakã neb wakat sẽn kõn sa yĩnga, d segd n tũuda a Gomdã sẽn yet bũmb ningã. Wala makre, a Zeezi yeelame tɩ d maand nebã fãa neere, la d kʋmd b nimbãanega, baa d bɛɛbã menga. (Luk 6:32-36) Woto maaneg tõeeme n pa nana ye. Sã n wa yaa woto, d segd n talla a Zeezi tagsgã la a manesmã buudu. D sã n maand d sẽn tõe fãa n sakd a Zeova la d rɩkd a Zeezi togs-n-taare, d wilgda d saasẽ Ba wã tɩ d rat n yɩɩ a zakã ned wakat sẽn kõn sa yĩnga.

16. Wãn to la d tõe n kogl a Zeova zakã neb yʋ-noogã?

¹⁶ Kogl-y-yã a Zeova zakã neb yʋ-noogã. Zak pʋgẽ, yao wae n dat n dɩka a kẽem togs-n-taare. Kẽemã sã n tũud Biiblã noyã la a saglsã a vɩɩmã pʋgẽ, a na n yɩɩ mak-sõng n kõ a yaoã. Kẽemã sã n tʋmd tʋʋm-yoodo, yaoã tõe n dɩka a togs-n-taare. Yaa woto me a Zeova zakã pʋga. Kiris-ned sẽn maand sɩd ne Wẽnnaam sã n wa lebg sɩdã kɩɩsda, bɩ n tʋmd tʋʋm-dẽgdo, neb a taabã tõe n wa rat n dɩka a togs-n-taare, n maand sẽn yaa wẽnga. Neb nins sẽn maand woto wã sãamda a Zeova zakã neb yʋʋre. (1 Tes. 4:3-8) D pa segd n dɩk neb nins sẽn maand wẽngã togs-n-taar ye. D pa segd me n bas tɩ baa fʋɩ sãam tõnd ne a Zeova zoodã ye.

17. Bõe la d pa segd n tagse, la bõe yĩnga?

¹⁷ Teeg-y-yã a Zeova, la y ra teeg arzɛgsã ye. A Zeova pʋlmame t’a na n gesame tɩ d paam rɩɩbo, futu, gãag zĩiga, d sã n deng n baood a Rĩungã la d sakd a noyã sẽn yaa tɩrsã. (Yɩɩn. 55:23; Mat. 6:33) Woto yĩnga, d pa na n tagsdẽ tɩ dũni-kãngã arzɛgsã na n kogl-d lame la kõ-d sũ-noog hakɩɩk ye. D miime tɩ yaa d sã n maand a Zeova raabã bal la d na n paam sũur pʋgẽ bãane. (Fili. 4:6, 7) Baa  d sã n tar ligd n tõe n da teed wʋsgo, d segd n soka d meng n gese, rẽ yĩnga d na n sɩd paama sẽk la pãng n tall te-kãensã n tʋm la d ges b yell tɩ ra sãam sɩda? Rẽ yĩnga, d pa na n wa nong bũmb nins d sẽn tarã tɩ loog noor sɩda? D segd n tẽegame tɩ Wẽnnaam kõ-d-la tʋʋmd tɩ d segd n tʋm a zakã pʋgẽ. Dẽnd d pa segd n bas tɩ bũmb tiis-d ye. Yaa vẽeneg tɩ d pa rat n yɩ wa rao ning sẽn yãk yam t’a pa na n tũ a Zeezi, a sẽn da nong bũmb nins a sẽn tarã tɩ loog noorã yĩnga. Woto kɩtame t’a pa tũ a Zeova, n paam n lebg a zakã ned ye.—Mark 10:17-22.

18. Bõe la wẽn-sakdbã na n wa paam tɩ yaa zu-zẽkr sẽn ka to, la bark-bʋs la b na n paam wakat fãa yĩnga?

¹⁸ Neb nins sẽn yaa sakdbã na n wa paam n nonga a Zeova la b tũ-a wakat sẽn kõn sa. Woto yaa zu-zẽkr sẽn ka to! Sẽn paase, neb nins sẽn saagd n na n vɩɩmd tẽngã zugã na n wa paam n gesa tẽngã a Zeova sẽn naan t’a sõmblmã ka to n kõ-b tɩ b vɩɩmd a zugã yelle. Ka la bilfu, Wẽnnaam Rĩungã na n kɩtame tɩ tẽngã la bũmb nins fãa sẽn be a zugã le yɩ neere. A Zeezi na n welga yɛl nins fãa a Ãdem ne a Awa kɩɩsgã sẽn wa ne wã. A Zeova na n vʋʋga neb milyõ-rãmba, n kɩt tɩ b tõe n wa paam n vɩɩmd wakat sẽn kõn sa dũniyã sẽn na n lebg arzãnã pʋgẽ, n tar laafɩ la keelem. (Luk 23:42, 43) Neb nins sẽn tũud a Zeova wã sã n wa lebg neb sẽn zems zãnga, b ned kam fãa na n paama “ziir la waoogr” ning yell a Davɩɩd sẽn gomã.—Yɩɩn. 8:6.

19. Bõe yell la d segd n tagsd daar fãa?

¹⁹ Y sã n yaa ‘kʋʋn-kãsengã’ neda, bãng-y tɩ y sẽn saagd n na wa paam bũmb ninsã sɩd ka to ye. Wẽnnaam nong-y lame, la a rat tɩ y wa lebg a zakã neda. Rẽ wã, maan-y y sẽn tõe fãa n ta a yam. Daar fãa bɩ y tagsd Wẽnnaam pʋlemsã yelle. Wilg-y tɩ y nanda y sẽn paam n tũud d saasẽ Ba wã, la tɩ y sũur nooma y sẽn paam n na n wa tũ-a wakat sẽn kõn sa yĩngã.