1. ¿Toni ueliskia timotajtaniskej keman itech titanemiliaj nochi tein Jiova kichijchiuak?

KEMAN itech titanemiliaj nochi tein Jiova kichijchiuak, xa timomachiliaj kemej David, akin kitajtanij itech se netataujtil: “Keman nikita iluikak, tein tikchijchiuak ika momajpiluan, metsti uan sitalimej tein tejua tikchijchiuak, ¿toni chiujkej taltikpaknenkej akin miki yejua ika tikelnamiktok uan ikoneuj taltikpaknenkej yejua ika tikyekpia?” (Sal. 8:3, 4). Keman tikitaj sitalimej, xa tiknemiliaj ke semi titsikitsitsin, ijkon kemej David momachiliaya, uan xa tikmoujkaitaj maj Jiova toka motekipacho. Sayoj ke itech nejin tamachtilis tikitaskej ke Jiova amo sayoj ininka motekipachouaya Adán uan Eva, ta no kichiuak maj moajsinij iniuan ichankauan.

2. ¿Toni kinekia Jiova maj kichiuanij Adán uan Eva?

² Adán uan Eva katkaj yekinika ikoneuan Jiova nikan taltikpak uan yejuatsin katka ininPopaj akin semi kintasojtaya. Jiova kinmakak se tekit. Kiniluij: “Xikinpiakan miakej konemej, ximomiakilikan, ximomoyauakan itech taltikpak uan xikixyekanakan” (Gén. 1:28). Kinekia maj kinpianij konemej uan maj kiyekpianij taltikpak. Komo Adán uan Eva kitakamatiskiaj Jiova uan kichiuaskiaj tein yejuatsin kinnauatijka, yejuan uan ininkoneuan yeskiaj ichankauan nochipaya.

3. ¿Keyej ueli tikijtouaj ke Jiova kinpatiuitaya Adán uan Eva keman kikauak maj yeskiaj ichankauan?

³ Jiova kinextij ke semi kinpatiuitaya Adán uan Eva keman kikauak maj yeskiaj ichankauan. Hebreos 2:7 ika tajtoua  keman Dios kichijchiuak taltikpaknenkej uan kijtoua: “Tikchiualtij ke in taltikpakuani ma amo semi ueyichiuanime [...]. Uan [...] ma kachi ueyi chiuanime in ángeles. Pero kachi satepan Tejuatsin tikonueyipantalij in taltikpakuani uan tikinonmouiskapouak”. Melauj ke Dios amo kimakak taltikpaknenkej chikaualis uan tamatilis tein kinmakak ángeles nion ueli kichiua tein yejuan kichiuaj (Sal. 103:20). Maski ijkon, ‘kiueyipantalij’ taltikpaknenkej. ¡Semi tikmoujkaitaj nejin! Jiova semi kualtsin kinchijchiuak Adán uan Eva.

4. ¿Toni kinpanok Adán uan Eva, uan toni tikitaskej itech nejin tamachtilis?

 ⁴ Sayoj ke Adán uan Eva amo kisentokakejok kemej ichankauan Jiova. Kemej satepan tikitaskej, nejin semi kintajyouiltiani ininkoneuan. Sayoj ke Jiova kisentoka kineki maj akin kitakamatij, nochipaya ikoneuan. Yekinika tikitaskej keniuj Jiova technextiliani ke semi techpatiuita. Ompa tikitaskej toni uelis tikchiuaskej axkan tein ika tiknextiskej ke tiknekij tiyeskij ichankauan uan satepan tikitaskej toni tatiochiualismej kipiaskej nochipaya ikoneuan Jiova nikan taltikpak.

5. ¿Keniuj tiknextiliaj Dios ke timotasojkamatij porin techchijchiuak kemej uelis tiknextiskej ikualneskayouan?

⁵ Jiova techchijchiuak kemej uelis tiknextiskej ikualneskayouan (Gén. 1:26, 27). Kemej tichijchiujtokej kemej Dios, uelis tikpiaskej kualneskayomej tein yejuatsin kipia. Kemej neskayot, uelis titetasojtaskej, titeikneliskej, amo titekauaskej uan tiknextiskej melaujkayot (Sal. 86:15; 145:17). Keman timochikauaj tiknextiskej nejin kualneskayomej, tikueyitaliaj Jiova uan tiknextiliaj ke timotasojkamatij (1 Ped. 1:14-16). Komo tikchiuaj tein kiyolpaktia toTajtsin Jiova, tiyolpakij uan kuali timomachiliaj. Uan no, kemej Jiova techchijchiuak kemej uelis tiknextiskej ikualneskayouan, uelis tiyeskij akin yejuatsin kineki maj mochiuakan ichankauan.

6. ¿Keniuj kinextij Jiova ke kinpatiuita taltikpakneminij keman kichijchiuak taltikpak?

⁶ Jiova techchijchiuilij kampa tinemiskej. Miak xiujmej achto ke kichijchiuaskia yekinika takat, kichijchiuak taltikpak (Job 38:4-6; Jer. 10:12). Kemej semi yolkuali uan kualtakat, techchijchiuilij miak taman porin kineki maj tiyolpakikan (Sal. 104:14, 15, 24). Kemansa itech tanemiliaya tein kichijchiujka uan “kiitak ke nejin kuali katka” (Gén. 1:10, 12, 31). Kinextij ke kinpatiuita taltikpakneminij keman kikauak maj yejuan kiyekpiakan nochi tein kichijchiuak tein semi kualtsin (Sal. 8:6). Keman taltikpakneminij amo tajtakolejkejok yeskij, Dios kineki maj kiyekpiakan nochipaya nochi tein kichijchiuak uan maj kinyolpakti kichiuaskej. ¿Nochipa tiktasojkamatiliaj Jiova nejin tein kijtoua ke mochiuas satepan?

7. ¿Keniuj kinextia Josué 24:15 ke tejuan ueli tikixpejpenaj toni tikchiuaskej?

⁷ Jiova techkaua maj tejuan tikixpejpenakan toni tikchiuaskej. Yejua ika ueli tikixtaliaj toni tikchiuaskej itech tonemilis (xikonixtajtolti Josué 24:15). ToDios akin semi techtasojta yolpaki keman tikixtaliaj tiktekitiliskej (Sal. 84:11; Prov. 27:11). Uelis kuali titaixpejpenaskej itech miak taman. Maj tikitakan neskayot tein techkauilij Jesús.

8. Xikonijto se taman kemej Jesús taixpejpenak.

⁸ Jesús kitayekanaltij kichiuas tein oksekin kinpaleuiskia, uan tejuan no uelis tikchiuaskej kemej yejua. Se tonal, Jesús uan itatitaniluan semi sioujtoyaj uan kinekiaj moseuiskej, yejua ika yajkej kampa taseujtoya. Sayoj ke amo uelik moseuijkej porin kinajsitoj miakej taltikpakneminij akin kinekiaj kikakiskej itamachtilisuan Jesús. Yejua amo kualanik,  ta kiniknelij uan “peuak kinmachtia ika miak tataman tamachtilisme” (Mar. 6:30-34). Keman tikuij totiempo uan tochikaualis porin tiknekij tikinpaleuiskej oksekin ijkon kemej kichiuak Jesús, tikueyitaliaj toTajtsin Jiova (Mat. 5:14-16). Uan ijkon tiknextiliaj ke tiknekij tiyeskij ichankauan.

9. ¿Toni kualtsin netetayokolil kinmakak Jiova taltikpakneminij?

⁹ Jiova kichiuak maj taltikpakneminij uelikan kinpiakan konemej uan kinnauatia tetatmej maj kinpaleuikan maj kitasojtakan uan maj kitekitilikan. Komo tikonpia konemej, ¿tikontasojkamati nejon kualtsin netetayokolil? Maski ángeles ueli kichiuaj miak taman, Jiova amo kichiuak maj uelikan kinpiakan konemej. Yejua ika tetatmej moneki kitasojkamatiskej nejin kualtsin tatiochiualis. Jiova kinnauatia tetatmej maj kiniskaltikan ininkoneuan “itech itamachtilis uan itayolmajxitilis” yejuatsin (Efes. 6:4, TNM; Deut. 6:5-7; Sal. 127:3). Kemej inechikol Dios kineki kinpaleuis tetatmej, kinmaka miak nepaleuilmej tein kisaj itech Biblia, kemej amaixmej, videos, nekuikatilmej uan okseki tamachtilis tein moajsi itech jw.org. Nejin kinextia ke toTajtsin Jiova uan iKonetsin kintasojtaj tokoneuan (Luc. 18:15-17). Jiova kiyolpaktia kiitas ke tetatmej iuan takuaujtamatij uan ke mochikauaj kinyekpiaskej ininkoneuan. Tetatmej akin kichiuaj nejin, kinpaleuiaj ininkoneuan maj ueli moajsikan kemej ichankauan Jiova nochipaya.

10, 11. ¿Toni ueli kichiua Jiova porin iKonetsin kitemakak inemilis?

¹⁰ Jiova kitemakak iKonetsin akin okachi kitasojta porin kinekia maj oksepa timoajsikan kemej ichankauan. Kemej tikitakej itech  párrafo 4, Adán uan Eva amo kisentokakejok kemej ichankauan Jiova uan kichiujkej maj ininkoneuan amo no yeskiaj ichankauan (Rom. 5:12). Kemej Adán uan Eva kiixtalijkej amo kitakamatiskej Dios, amo kinamikia maj kisentokanijok kemej ichankauan. ¿Uan toni kinpanoskia ininkoneuan? Kemej Jiova semi kintasojta, kichiuak tein kinpaleuiskia akin tatakamatiskiaj maj mochiuakan ichankauan. Kichiuak nejin keman iKonetsin, Jesucristo, kitemakak inemilis (Juan 3:16; Rom. 5:19). Kemej Jesús kitemakak inemilis, Dios uelik kinselij kemej iKoneuan 144,000 taltikpakneminij akin kitakamatij (Rom. 8:15-17; Apoc. 14:1).

¹¹ Uan no, moajsij millones taltikpakneminij akin kitakamatij Dios uan kichiujtokej tein yejuatsin kineki. Yejuan kichiaj senkis mochiuaskej ichankauan Jiova satepan ke tamis 1,000 xiujmej, keman senkis kinextiskejya ke kinekij kitekitiliskej (Sal. 25:14; Rom. 8:20, 21). Kemej kichiaj nejon, axkan kiluiajya “Toueyitajtsin” (Mat. 6:9). Uan akin oksepa nemiskej no uelis kiixmatiskej tein Jiova kineki maj kichiuakan. Akin kiixtaliskej kitakamatiskej, satepan no mochiuaskej ichankauan.

12. ¿Katiyejua netajtanil tiknankiliskej?

¹² Kemej tikitakejya, Jiova kichiuani miak taman tein ika kinextia ke kinpatiuita taltikpakneminij. Kinselijya tokniuan taixpejpenalmej kemej ikoneuan, uan “uel miak tagayot” kichiaj senkis mochiuaskej ikoneuan itech Xochital (Apoc. 7:9). ¿Toni uelis tikchiuaskej axkan tein ika tiknextiliskej Jiova ke tiknekij tiyeskij ichankauan nochipaya?

13. ¿Toni moneki tikchiuaskej komo tiknekij tiyeskij ichankauan Jiova? (Marcos 12:30).

¹³ Maj tiktekitilikan Jiova ika nochi toyolo uan ijkon tiknextiliskej ke tiktasojtaj (xikonixtajtolti Marcos 12:30). Jiova techmakani miak netetayokolilmej porin semi techtasojta, sayoj ke maj ueli tikueyichiuakan yejua  okachi ueyi netetayokolil tein techmakak. Keman tiktakamatij itanauatiluan tiknextiliaj ke tiktasojtaj (1 Juan 5:3). Se tanauatil yejua tein Jesús techmakak. Yejua kijtoj ke moneki tikinpaleuiskej oksekin maj mochiuakan itatojtokakauan uan maj moauikan (Mat. 28:19). Jesús no technauatij maj timotasojtakan (Juan 13:35). Jiova kinselis kemej ichankauan akin kitakamatij, uan kiueyichiuaskej iniuan ichankauan akin moajsij itech nochi taltikpak (Sal. 15:1, 2).

14. ¿Keniuj tiknextiaj ke tikintasojtaj oksekin? (Mateo 9:36-38; Romanos 12:10).

¹⁴ Maj tikintasojtakan oksekin. Netasojtalis yejua kualneskayot tein Jiova okachi kinextia (1 Juan 4:8). Achto ke tikixmatiskiaj, yejuatsin ipa techtasojtayaya (1 Juan 4:9, 10). Keman tikintasojtaj oksekin, tikchiuaj kemej yejuatsin (Efes. 5:1). Okachi uelis tiknextiskej ke tikintasojtaj taltikpakneminij komo tikinpaleuiaj maj kiixmatikan Jiova axkan ke ueliok (xikonixtajtolti Mateo 9:36-38). Keman tikchiuaj nejin, tikinpaleuiaj maj kimatikan keniuj uelis mochiuaskej ichankauan Dios. Keman se taltikpaknenkej moauia, moneki tiksentokaskej tiktasojtaskej uan tikpoujkaitaskej (1 Juan 4:20, 21). Kemej neskayot, komo amo tikajsikamatij keyej kichiuak teisa, maj amo tiknemilikan ke kitemouaya techyolkokos oso ke amo yolkuali. Okachi kuali maj tiknextikan ke tikpoujkaitaj keman tiknemiliskej ke okachi ueyichiujkej (xikonixtajtolti Romanos 12:10; Filip. 2:3).

15. ¿Akonimej moneki tikinikneliskej uan tiyeskij tikualtakamej iniuan?

¹⁵ Maj tikiniknelikan nochin taltikpakneminij uan maj tikualtakamej iniuan. Komo tiknekij tiyeskij ichankauan Jiova nochipaya moneki tikchiuaskej tein Biblia tamachtia. Kemej neskayot, Jesús tamachtij ke moneki tikinikneliskej nochin taltikpakneminij uan tiyeskij tikualtakamej iniuan, hasta iniuan akin techtauelitaj (Luc. 6:32-36). Kemansa xa ouij techkisa tikchiuaskej nejin. Yejua ika moneki timochikauaskej titanemiliskej kemej Jesús uan tikchiuaskej kemej yejua. Keman timochikauaj tiktakamatiskej Jiova uan tikchiuaskej kemej Jesús, tiknextiliaj toTajtsin ke tiknekij tiyeskij ichankauan nochipaya.

16. ¿Keniuj uelis titapaleuiskej maj kuali ininka motajto ichankauan Jiova?

¹⁶ Maj titapaleuikan maj kuali ininka motajto ichankauan Jiova. Miakpa, konemej kichiuaj tein kiitaj ke kichiuaj ininikniuan akin tayekanaj. Komo akin tayekanaj kichiuaj tein Biblia tamachtia, kinkauiliskej se kuali neskayot. Sayoj ke komo kichiuaj tein amo kuali, konemej xa no kichiuaskej kemej yejuan. Iniuan ichankauan Jiova no ijkon panoua. Komo se tokniuj kikaua uan kiixnamiki tamachtilis tein melauak, oso peua auilnemi oso takajkayaua, oksekin xa no kichiuaskej kemej yejua. Akin kichiuaj nejin, kichiuaj maj amo kuali ininka motajto nochin itekitikauan Jiova (1 Tes. 4:3-8). Maj amo tikchiuakan kemej akin kichiuaj tein amo kuali uan maj amo tikauakan maj nion teyi kichiua maj amo kuali timouikakanok iuan toTajtsin Jiova akin semi techtasojta.

17. ¿Toni amo moneki tiknemiliskej, uan keyej?

¹⁷ Maj titakuaujtamatikan iuan Jiova uan amo itech tomin oso okseki taman. Jiova kijtoua ke komo tiktayekanaltiaj iTekiuajyo uan tikchiuaj tein tanauatia, techmakas tein tikuaskej, tein timotaliliskej uan kani tinemiskej (Sal. 55:22; Mat. 6:33). Yejua ika maj amo tiknemilikan ke tomin oso okseki taman techpaleuis uan kichiuas maj tiyolpakikan. Tikmatij ke tiyolpakiskej sayoj komo tikchiuaj tein Jiova kineki (Filip. 4:6, 7). Hasta komo ueli timokouiliaj miak taman, moneki tiknemiliskej ox yekmelauj tikuiskej uan ox uelis tikyekpiaskej. Maj timotajtanikan: “¿Semi nikpatiuita  tein nikpia?”. Maj tikelnamikikan ke Jiova techmakatok se tekit uan yejua ika amo moneki tikauaskej maj nion teyi techtapololti. Amo tiknekij tiyeskij kemej telpoch akin semi kipatiuitak tein kipiaya uan amo kinekik mochiuas itatojtokakauj Jesús. Nejon telpoch kiixtopeuak kitekitilis Jiova uan mochiuas semej ikoneuan satepan (Mar. 10:17-22).

18. ¿Toni tatiochiualismej kipiaskej nochipaya akin kitakamatij Jiova?

¹⁸ Akin kitakamatij Jiova kipiaskej se ueyi tatiochiualis: kitasojtaskej uan kiueyichiuaskej nochipaya. Akin kichiaj nikan nemiskej no semi yolpakiskej porin kiyekpiaskej kualtsin taltikpak tein Jiova semi kuali kinchijchiuilij. Amo uejkaua, iTekiuajyo Dios kichiuas maj taltikpak oksepa kualtsin moita. Jesús kiixpolos nochi tein amo kuali tein Adán uan Eva kichiujkej maj onkani keman amo kinekkejok yeskij ichankauan Dios. Uan Jiova kichiuas maj oksepa nemikan millones taltikpakneminij uan maj ueli nemikan nochipaya itech se Xochital nikan taltikpak uan maj amo kemanok kokolispeuakan (Luc. 23:42, 43). Keman itekitikauan Jiova nikan taltikpak amo yeskijok tajtakolejkej kinextiskej ke Dios ‘kinueyipantalij uan kinonmouiskapouak’ ijkon kemej kijtoua Biblia (Heb. 2:7).

19. ¿Toni moneki tikelnamikiskej?

¹⁹ Komo tejuatsin semej “uel miak tagayot”, tikonchia tikonselis se taman tein semi kualtsin. Dios mitsontasojta uan kineki xionmoajsi iniuan ichankauan. Yejua ika xionmochikaua tikonyolpaktis. Mojmostaj xikonelnamikto tein Dios kijtoua ke kichiuas. Tikonpia tatiochiualis tikonueyichiuas toTajtsin Jiova uan tikonchia tikonueyichiuas nochipaya. Semi xikonpatiuita nejon tatiochiualis.