1. ¿Xamo tlen timotlajtlaniaj ijkuak timokuayejyekouaj nochi tlen Jehová okichijchi?

IJKUAK timokuayejyekouaj ken Jehová okichijchi iluikak, xamo timokuayejyekouaj ken David. Ye okilui Jehová: “Ijkuak nikita iluikak, metstli, sitlalimej uan nochi tlen otikchijchi ika momauan, ¿tleka tikinmilnamiki tlaltikpaktlakamej uan tikinmaluia?” (Sal. 8:3, 4). Ijkon ken David xamo timokuayejyekouaj tejuan titsikitsitsintin uan amo ken sitlalimej uan techtlajtlachialtia Jehová kineki techpaleuis. Tikitaskej ken okinpaleui Adán uan Eva uan okinek ma pouikan iuan ifamilia.

2. ¿Tlen okinekiaya Jehová ma kichiuakan tlen achto ikoneuan?

² Nikan tlaltikpak Adán uan Eva okatkaj achto ikoneuan Jehová uan ye okatka intajtsin uan sapanoua okintlasojtlaya. Ye okinekiaya miakej ma pouikan iuan ifamilia. Ik non, okinmilui: “Ximomiaktilikan uan ximochiuakan nanmiakej, xiktemitikan tlaltikpak uan xikmaluikan” (Gén. 1:28). Ye okinekiaya ma kinpiakan inkoneuan uan ma kimaluikan tlaltikpak. Tla Adán uan Eva kichiuaskiaj tlen Jehová okinekiaya, yejuan uan inkoneuan nochipa pouiskiaj iuan ifamilia.

3. ¿Tleka uelis tikijtoskej Jehová okintlakaitak Adán uan Eva?

³ Jehová okinkauili Adán uan Eva ma pouikan iuan ifamilia, ijkon okiteititi okintlakaitak. Ijkuak David okijto ken otechchijchi toTajtsin Dios, okijto: “Tlakatl okachitsi otiktsikitsintili ke n ángelteh, iwa otikchi maweyixto iwa matlanawati” (Heb. 2:7). ToTajtsin Dios otechchijchi pero amo ken ángeles, yejuan okachi chikauakej uan okachi  ixtlamatkej (Sal. 103:20). Maski yejuan ijkon, tejuan toTajtsin Dios san ‘okachitsi otechtsikitsintili’. ¡Techtlajtlachialtia ken Jehová okichijchi Adán uan Eva uan okinekiaya kualtsin ma yetokan uan ma yolpakikan!

4. ¿Tlen okinpanok Adán uan Eva uan tlen timomachtiskej?

 ⁴ Teyolkoko Adán uan Eva amo okitlakamatkej Jehová, ik non, ye okichi ayakmo ma pouikan iuan ifamilia. Itech nin tlamachtil tikitaskej, nochtin tiikoneuan titlajyouiaj porque yejuan amo otetlakamatkej. Pero Jehová kineki kuali ma tiyetokan, ye kineki akinmej kitlakamatij nochipa ma yetokan ikoneuan. Tikitaskej ken yokiteititi Jehová techtlakaita. Noijki tikitaskej tlen moneki tikchiuaskej tla tiknekij tipouiskej iuan ifamilia. Satepan tikitaskej ken techteochiuas Jehová nikan tlaltikpak.

5. ¿Ken tikteititiaj tiktlasojkamatiliaj Jehová porque otechchijchi ken ye?

⁵ Jehová okiteititi techtlakaita porque otechchijchi ken ye (Gén. 1:26, 27). Ye otechchijchi, ik non, uelis titetlasojtlaskej, titeiknomatiskej uan nochipa tikchiuaskej tlen kuali (Sal. 86:15; 145:17). Tla timochijchikauaj ijkon tikchiuaj, tiktlakaitaskej Jehová uan tikititiskej tiktlasojkamatiliaj (1 Ped. 1:14-16). Tla tikchiuaj tlen ye kipaktia, kuali timomachiliskej uan tiyolpakiskej. Uelis tikchiuaskej ijkon ken kineki porque otechchijchi ken ye.

6. ¿Ken okintlakaitak Jehová akinmej okinchijchi?

⁶ Jehová okichijchi kualtsin kanin tichantij. Ye achto okiyektlali tlaltikpak ijkuak ayamo ikaj okichijchiuaya (Job 38:4-6; Jer. 10:12). Ye sapanoua yolkuali uan kipaktia kitemakas tlen kipia, ik non, okichijchi miak tlamantli para ma tiyolpakikan (Sal. 104:14, 15, 24). Ualeua omokuayejyekouaya tlen okichijchi uan okijtouaya kuali okatka (Gén. 1:10, 12, 31). Okintlakaitak tlaltikpaktlakamej, ik non, okinkauili ma kiyekanakan nochi tlen okichijchi itech tlaltikpak (Sal. 8:6). Jehová kineki tinochtin nochipa ma tikmaluikan tlen ye okichijchi uan ma tiyolpakikan. Ik non, ¿nochipa tiktlasojkamatiliaj porque non techiluia tikchiuaskej satepan?

7. ¿Ken kiteititia Josué 24:15 tejuan uelis tikpejpenaskej tlen tikchiuaskej?

⁷ Jehová techkauilia ma tikpejpenakan tlen tiknekij tikchiuaskej. Nin ken se tetliokolil, ik non, tejuan uelis tikitaskej tlen tikchiuaskej (xiktlajtolti Josué 24:15). Ijkuak tikpejpenaj tiktekichiuiliskej Jehová, ye yolpaki (Sal. 84:11; Prov. 27:11). Itech miak tlamantli uelis tikteititiskej tikpejpenaj tikchiuaskej tlen kuali. Ma tikitakan ken okichi Jesús.

8. Xikijto tlen okipejpenki kichiuas Jesús.

⁸ Jesús okipejpenki kinpaleuis oksekimej, tejuan noijki uelis ijkon tikchiuaskej. Se tonal imachtijkauan osotlauayaj uan okitemotoj kanin moseuiskiaj. Pero amo ueli ijkon okichijkej porque miakej ompa oajsitoj para kikakiskiaj tlen Jesús otlamachtiaya. Ye amo okualanki, okinmiknomatki uan “san miak opé kinmachtia” (Mar. 6:30-34). Ijkuak timochijchikauaj tikchiuaj ken Jesús uan tikinpaleuiaj oksekimej, tikueyichiuaj toTajtsin Dios (Mat. 5:14-16). Noijki ijkon tikteititiaj tiknekij tipouiskej iuan ifamilia.

9. ¿Tlen kualtsin tetliokolil okinmakak Jehová tetajmej?

 ⁹ Jehová otechchijchi para uelis tikinpiaskej tokoneuan uan moneki tikinmachtiskej ma kitlasojtlakan uan ma kitekichiuilikan. Tla tejuatsin tikinpia mokoneuan, ¿tikpatioita tlen Jehová omitsmakak? Maski Jehová okinmakak chikaualistli ángeles para uelis kichiuaskej miak tlamantli tlen techtlajtlachialtia, amo okinchijchi para ma kinpiakan inkoneuan. Ik non, tetajmej moneki motlasojkamatiskej porque toTajtsin Dios okinmakak se kualtsin tetliokolil. Ye kineki tetajmej ma kinmiskaltikan inkoneuan ika “tlanonotsálistli iwa ika itlajtol” (Efes. 6:4; Deut. 6:5-7; Sal. 127:3). Ialtepe Jehová kinpaleuia tetajmej, ik non, kinmaka miak tlamantli tlen kisa itech Biblia, amatlajkuilolmej, videos, tlatsotsonali uan tlamachtilmej tlen katej itech internet. Non kiteititia Jehová uan Jesús kintlasojtlaj konemej (Luc. 18:15-17). Jehová kiyolpaktia ijkuak kita tetajmej tlaneltokaj uan mochijchikauaj kinmaluiaj inkoneuan. Akinmej ijkon kichiuaj kinpaleuiaj inkoneuan ma kipejpenakan ma pouikan nochipa iuan ifamilia Jehová.

10, 11. ¿Tlen yokichi uan tlen kichiuas Jehová porque iKone topatka omotemakak?

¹⁰ Jehová okitemakak iKone uan ijkon uelis oksepa tipouiskej iuan ifamilia. Itech  párrafo 4 otikitakej Adán uan Eva ayakmo opouikej iuan ifamilia Jehová uan inkoneuan noijki ayakmo ompa opouiayaj (Rom. 5:12). Adán uan Eva okipejpenkej amo kitlakamatiskej Jehová, ik non, yejuan ayakmo uelis pouiskiaj iuan ifamilia. Pero ¿tlen kinpanoskia inkoneuan? Jehová okintlasojtlak, ik non, okichi seki tlamantli para akinmej kitlakamatiskiaj pouiskiaj iuan ifamilia. ¿Tlen okichi? Okitemakak san ye se ikone topatka ma kimiktikan (Juan 3:16; Rom. 5:19). Non okichi toTajtsin Dios ma kinseli ken ikoneuan 144,000 tlen nochipa kitlakamatij (Rom. 8:15-17; Apoc. 14:1).

¹¹ Noijki axkan katej miakej tlen kichiuaj ijkon ken Jehová kineki. Ijkuak tlamis mil xiuitl kiteititiskej kox kitlakamatij Jehová, tla ijkon kichiuaj pouiskej iuan ifamilia (Sal. 25:14; Rom. 8:20, 21). Kineltokaj ijkon panos, ik non, axkan kiluiaj “Totajtsi” (Mat. 6:9). Noijki akinmej kinyolitis Jehová uelis kimatiskej tlen ye kineki ma kichiuakan. Akinmej kipejpenaskej kitlakamatiskej noijki pouiskej iuan ifamilia.

12. ¿Tlen tiknankiliskej?

¹² Yotikitakej Jehová techtlakaita porque yotechmakak miak tlamantli. Ye yikinmita tlapejpenalmej ken ikoneuan uan akinmej pouij itech “senmiaktikeh tlaltikpaktlakah” kinmiluia noijki yetoskej ikoneuan itech xochitlali (Apoc. 7:9). ¿Tlen moneki tikchiuaskej para tikititiskej Jehová tiknekij nochipa tipouiskej iuan ifamilia?

13. ¿Tlen moneki tikchiuaskej tla tiknekij tipouiskej iuan ifamilia Jehová? (Marcos 12:30).

¹³ Ma tiktekichiuilikan Jehová ika nochi toyolo uan ijkon tikteititiskej tiktlasojtlaj (xiktlajtolti Marcos 12:30). Jehová yotechmakak miak tlamantli uan ijkon techititia techtlasojtla. Pero se ueyi tetliokolil, techkauilia ma tikueyichiuakan. Tikteititiaj tiktlasojtlaj ijkuak tiktlakamatij (1 Juan 5:3). Noijki ijkon  tikchiuaj ijkuak tiktlakamatij tlen Jesús otlanauati: ma tikinpaleuikan oksekimej ma mochiuakan imachtijkauan uan ma moapolaktikan (Mat. 28:19, TNM). Ye noijki otlanauati ma timotlasojtlakan (Juan 13:35). Jehová kinkauilis ma pouikan iuan ifamilia akinmej kitlakamatij (Sal. 15:1, 2).

14. ¿Ken tikteititiaj titetlasojtlaj? (Mateo 9:36-38; Romanos 12:10).

¹⁴ Ma titetlasojtlakan. Jehová okachi kipatioita tetlasojtlas (1 Juan 4:8). Ye yotechtlasojtlaya maski ayamo otikixmatiayaj (1 Juan 4:9, 10). Ijkuak titetlasojtlaj tikchiuaj ken ye kichiua (Efes. 5:1, TNM). Tikteititiaj tikintlasojtlaj oksekimej tla tikinpaleuiaj ma kixmatikan Jehová (xiktlajtolti Mateo 9:36-38). Ijkon satepan uelis pouiskej iuan ifamilia. Akinmej moapolaktiaj ok moneki ma tikintlasojtlakan uan ma tikintlakaitakan (1 Juan 4:20, 21). ¿Ken uelis ijkon tikchiuaskej? Ijkuak oksekimej itlaj amo kuali kichiuaj amo ma timokuayejyekokan ijkon okinekej kichiuaskej noso san intech motekipachouaj, ik non, ijkon kichiuaj. Okachi kuali ma tikintlakaitakan uan ma tikinmitakan okachi “weyijkatitokeh” (xiktlajtolti Romanos 12:10; Filip. 2:3).

15. ¿Akinmej moneki tikinchiuiliskej tlen kuali uan tikinmiknomatiskej?

¹⁵ Nochtin ma tikinchiuilikan tlen kuali uan ma tikinmiknomatikan. Tla tiknekij tipouiskej nochipa iuan ifamilia Jehová, moneki tikchiuaskej tlen techmachtia iTlajtol. Jesús otlamachti moneki nochtin tikinchiuiliskej tlen kuali uan tikinmiknomatiskej, noijki moneki ijkon tikchiuaskej iuan akinmej techkokoliaj (Luc. 6:32-36). Xamo ualeua tikitaskej oui ijkon tikchiuaskej pero ma timochijchikauakan ma timokuayejyekokan uan ma tikchiuakan ken Jesús. Tikteititiaj tiknekij tipouiskej nochipa iuan ifamilia Jehová ijkuak timochijchikauaj tiktlakamatiskej uan tikchiuaj ken Jesús.

16. ¿Ken uelis titlapaleuiskej kuali ma tlajtokan itech ifamilia Jehová?

¹⁶ Ma titlapaleuikan kuali ma tlajtokan itech ifamilia Jehová. Konemej kichiuaj ijkon ken inmikni tlen okachi ueyi. Tla ye kichiua tlen kijtouaj principios bíblicos, non uelis kinpaleuis ikniuan. Pero tla kichiua tlen amo kuali, ikniuan noijki ijkon kichiuaskej. Ijkon panoua iuan ifamilia Jehová. Tla se itekipanojka ayakmo kitlakamati uan kixnamiki ialtepe noso peua auilnemi uan peua kichiua okseki tlamantli tlen amo kuali, oksekimej noijki kinekiskej ijkon kichiuaskej. Uan non kichiuas amo kuali ma tlajtokan itech ifamilia Jehová (1 Tes. 4:3-8). Amo ma tikchiuakan ken akinmej ijkon kichiuaj uan nochipa ma timouikakan iuan Jehová.

17. ¿Tlen amo moneki timokuayejyekoskej uan tleka?

¹⁷ Ma titlaneltokakan itech Jehová uan amo itech okseki tlamantli. Jehová techiluia tla nochipa tiktlakamatij uan tikpaleuiaj iTekiuajkayo, ye techmakas tlen tikkuaskej, tlen tikmokentiskej uan kanin tichantiskej (Sal. 55:22; Mat. 6:33). Ik non, amo ma timokuayejyekokan tiyolpakiskej tla tikpiaj miak tlamantli. Ma tikilnamiktokan kuali timomachiliskej tla tikchiuaj tlen Jehová kineki (Filip. 4:6, 7). Xamo uelis tikmokouiskej miak tlamantli pero moneki tikitaskej tla timajxiliskej tiktekitiltiskej uan tikmaluiskej.  Ik non, ma timotlajtlanikan: “¿Okachi nikpatioita tlen nikpia?”. Ma tikilnamikikan Jehová kineki kuali ma tiktekichiuilikan, ik non, amitlaj ma techtsakuili ijkon tikchiuaskej. Amo ma tikchiuakan ken telpochtli tlen okatka ijkuak Jesús okatka, amo okinek kitekichiuilis Jehová uan amo okinek pouis iuan ikoneuan. ¿Tleka ijkon okichi? Porque okachi okipatioitak seki tlamantli tlen okipiaya (Mar. 10:17-22).

18. ¿Ken kinteochiuas Jehová akinmej nochipa kitlakamatiskej?

¹⁸ Nochtin akinmej kitlakamatij Jehová nochipa kitlasojtlaskej uan kiueyichiuaskej. Akinmej chantiskej nikan tlaltikpak tlapaleuiskej kualtsin ma mota ijkon ken Jehová yiuejkika okinekiaya ma yeto. ITekiuajkayo toTajtsin Dios kichiuas kualtsin ma mota tlaltikpak ijkon ken achto omotaya. Jesús kiyektlalis tlen okijtlakojkej Adán uan Eva ijkuak okipejpenkej ayakmo pouiskej iuan ifamilia Jehová. Ye kinyolitis miakej uan kinkauilis ma kipejpenakan tla kinekij nochipa yoltoskej nikan tlaltikpak itech se xochitlali uan amo keman mokokoskej (Luc. 23:42, 43, TNM). Ijkuak nochi ifamilia Jehová ayakmo tikpiaskej tlajtlakoli, tikteititiskej tlamantli tlen okijto David (Heb. 2:7).

19. ¿Tlen moneki tikilnamikis?

¹⁹ Tla tejuatsin tipoui iuan “senmiaktikeh tlaltikpaktlakah” tikselis se kualtsin tlateochiualistli. ToTajtsin Dios mitstlasojtla uan kineki xipoui iuan ifamilia. Ik non, ximochijchikaua nochipa tikyolpaktis. Ika nochi moyolo mojmostla xikilnamiki tlen ye kichiuas. Xikpatioita tikueyichiuas Jehová uan nochipa ijkon xikchiua.