1. Kuyini esingazibuza khona nxa sicabangisisa ngakho konke uJehova akudalileyo?

NXA singacabangisisa ngakho konke uJehova akudalileyo singavumelana lomhubi uDavida owakhuleka esithi: “Nxa nginakana ngamazulu akho, umsebenzi weminwe yakho, inyanga lezinkanyezi ozibeke endaweni yazo, uyini umuntu osungaze uzihluphe ngaye na, indodana yomuntu ukuthi uyinanze?” (Hubo. 8:3, 4) Lathi singazibona sibancane kakhulu nxa siziqathanisa lezinto uJehova azidalileyo besesimangala ukuthi uyazihlupha ngathi. Esihlokweni lesi sizabona ukuthi uJehova kazange aphongutshengisa ukuthi ulendaba labantu bokuqala u-Adamu lo-Eva, kodwa waphinda wabenza baba ngamalunga emuli yakhe.

2. UJehova wayefuna abantwana bakhe bokuqala lapha emhlabeni benzeni?

² U-Adamu lo-Eva babengabantwana bakaJehova bokuqala lapha emhlabeni futhi yena wayenguBaba wabo olothando. Wanika imuli le imisebenzi yokwenza. Wayitshela wathi: “Zalani lande ngobunengi; wugcwaliseni umhlaba, liwubuse.” (Gen. 1:28) Wayefuna u-Adamu lo-Eva babe labantwana futhi bawugcine kuhle umhlaba, ikhaya labo. Aluba balalela benza lokho uJehova ayebatshele ukuthi bakwenze, bona kanye lezizukulwane zabo babezakuba ngamalunga emuli yakhe kuze kube nini lanini.

3. Kungani singathi u-Adamu lo-Eva babephiwe indawo eqakathekileyo emulini kaJehova?

³ U-Adamu lo-Eva babelendawo eqakathekileyo emulini kaJehova. KuHubo 8:5 uDavida wakhuluma ngendlela uJehova adala ngayo umuntu, wathi: “Wamenza wasilela kancane kulezidalwa zasezulwini, wamethesa umqhele wenkazimulo.” Abantu  kabaphiwanga amandla lokukhalipha kanye leziphiwo ezinjengezezingilosi. (Hubo. 103:20) Lanxa kunjalo ‘basilela kancane’ kuphela kulezingilosi lezi ezilamandla. UJehova wabadala ngendlela emangalisayo sibili abazali bethu bakuqala.

4. Kuyini okwenzakala ku-Adamu lo-Eva ngemva kokuhlamuka kwabo futhi sizaxoxa ngani esihlokweni lesi?

 ⁴ Okudanisayo yikuthi u-Adamu lo-Eva bathi sebonile babengaselandawo emulini kaJehova. Abakwenzayo kwabangela ukuthi izizukulwane zabo zibe lenhlupho ezinengi njengoba sizabona esihlokweni lesi. Kodwa inhloso kaJehova ayikatshintshi. Ufuna abantu abalalelayo babe ngabantwabakhe kuze kube nini lanini. Okokuqala, sizaxoxa ngokuthi uJehova utshengise njani ukuthi uyasiqakathekisa. Ngemva kwalokho sizaxoxa ngokuthi singenzani khathesi ukuze sitshengise ukuthi siyafuna ukuba ngamalunga emuli kaNkulunkulu. Sizaphetha ngokuxoxa ngezibusiso abantwana bakaJehova abalapha emhlabeni abazazikholisa kuze kube nini lanini.

5. Singatshengisa njani ukuthi siyambonga uNkulunkulu ngokusidala ngomfanekiso wakhe?

⁵ UJehova watshengisa ukuthi uyasiqakathekisa ngokusidala ngomfanekiso wakhe. (Gen. 1:26, 27) Lokhu kwenza senelise ukuba lobuntu obunjengobakhe obugoqela uthando, uzwelo, ubuqotho kanye lokulunga. (Hubo. 86:15; 145:17) Nxa singaba lobuntu lobu siyabe sidumisa uJehova futhi sitshengisa ukuthi siyambonga ngalokho asenzele khona. (1 Phet. 1:14-16) Nxa singenza lokho okufunwa nguBaba wethu osezulwini sizathokoza. Siyenelisa lokuba ngabantu uJehova abafunayo emulini yakhe ngenxa yokuthi wasidala safanana laye.

6. UJehova watshengisa njani ukuthi uyabaqakathekisa abantu ngesikhathi edala umhlaba?

⁶ UJehova wasenzela ikhaya elihle okwamagama. Walungisela abantu umhlaba kusasele isikhathi eside ukuthi adale umuntu wokuqala. (Jobe. 38:4-6; Jer. 10:12) Wadala izinto ezinengi ezinhle ukuze sikholise ukuphila ngenxa yokuthi ulendaba lathi futhi uyaphana. (Hubo. 104:14, 15, 24) Ngezinye izikhathi wayesima akhangele umsebenzi awenzileyo njalo ‘wayebona ukuthi wawumuhle.’ (Gen. 1:10, 12, 31) Watshengisa ukuthi uyabaqakathekisa abantu ngokubenza ‘babuse phezu’ kwezinto zonke ezinhle azidalayo emhlabeni. (Hubo. 8:6) Inhloso kaNkulunkulu ngeyokuthi abantu abangelasono bakholise ukunakekela izinto lezi azidalileyo kuze kube nini lanini. Uhlala umbonga yini uJehova ngethemba leli elimangalisayo?

7. UJoshuwa 24:15 utshengisa njani ukuthi abantu balenkululeko yokuzikhethela lokho abafuna ukukwenza?

⁷ UJehova usinike inkululeko yokuzikhethela lokho esifuna ukukwenza. Siyazikhethela lokho esifuna ukukwenza empilweni. (Bala uJoshuwa 24:15.) UNkulunkulu wethu osithandayo uyathokoza nxa sikhetha ukumkhonza. (Hubo. 84:11; Zaga. 27:11) Singayisebenzisa kuhle inkululeko yethu yokuzikhethela nxa sisenza lezinye izinqumo empilweni. Ake sixoxe ngenye indlela uJesu asebenzisa ngayo inkululeko yakhe yokuzikhethela.

8. UJesu wayisebenzisa njani inkululeko yakhe yokuzikhethela?

⁸ Singalingisela uJesu ngokukhetha ukwenza lokho okufunwa ngabanye kulalokho thina esifuna ukukwenza. Ngelinye ilanga uJesu labaphostoli bakhe basebedinwe befile yikho baya endaweni ethuleyo ukuze baphumule kancane. Kodwa kabazange besaphumula ngoba bafica kulexuku elalifuna ukufundiswa nguJesu. UJesu kazange alicaphukele kodwa walizwela usizi “waseqalisa ukulifundisa izinto  ezinengi.” (Mak. 6:30-34) Nxa singamlingisela uJesu ngokusebenzisa isikhathi sethu lamandla ethu sinceda abanye, siyabe sisenza ukuthi uBaba wethu osezulwini akhazinyuliswe. (Mat. 5:14-16) Kanti njalo siyabe sitshengisa uJehova ukuthi sifuna ukuba ngamalunga emuli yakhe.

9. Kuyini abazali okumele bahlale bekukhumbula?

⁹ UJehova unike abantu isibusiso sokuba labantwana kanye lomsebenzi wokubafundisa ukuthi bamthande futhi bamkhonze. Nxa ungumzali uyasiqakathekisa yini isipho lesi esiligugu? Lanxa uJehova ezibusise kakhulu izingilosi, kaziphanga isibusiso sokuba labantwana. Yikho nxa ungumzali kumele usiqakathekise isibusiso olaso sokukhulisa abantwana. Abazali baphiwe umsebenzi oqakathekileyo wokukhulisa abantwababo “ngokulaya langokuxwayisa okuvela kuJehova.” (Efe. 6:4; Dute. 6:5-7; Hubo. 127:3) Inhlanganiso kaNkulunkulu inceda abazali ngokubanika izinto ezinengi ezisekelwe eBhayibhilini ezinjengamabhuku, amavidiyo, izingoma lezihloko ezitholakala kuwebhusayithi. Kusegcekeni ukuthi uBaba wethu osezulwini leNdodana yakhe bayabathanda abantwana. (Luk. 18:15-17) UJehova uyathokoza nxa abazali bethembela kuye futhi besenza konke abangakwenza ukuze bondle abantwababo abaligugu. Abazali abenza lokhu banceda labantwababo ukuthi babe lethemba lokuba ngamalunga emuli kaJehova kuze kube nini lanini.

10-11. UJehova usipha ziphi izibusiso esebenzisa inhlawulo?

¹⁰ UJehova wanikela ngeNdodana yakhe eligugu ukuze siphinde sibe ngamalunga emuli yakhe. Njengoba sibonile  kundima 4, u-Adamu lo-Eva bathi sebonile babengaselandawo emulini kaJehova njalo labantwababo babengasenelisi ukuba ngamalunga emuli leyo. (Rom. 5:12) U-Adamu lo-Eva bakhetha ngabomo ukungamlaleli uNkulunkulu yikho kwakufanele baxotshwe sibili emulini yakhe. Kodwa kwakuzahamba njani ngabantwababo? UJehova uyabathanda abantu yikho wavula indlela yokuthi labo abamlalelayo babe ngamalunga emuli yakhe. Wakwenza lokhu ngokunikela ngeNdodana yakhe ezelwe yodwa uJesu Khristu ukuthi ibe ngumhlatshelo. (Joh. 3:16; Rom. 5:19) UNkulunkulu wakhetha abantu abathembekileyo abangu-144 000 ukuthi babe ngamadodana akhe ngenxa yomhlatshelo kaJesu.—Rom. 8:15-17; Isam. 14:1.

¹¹ Kulabanye abathembekileyo abangamamiliyoni abenza intando kaNkulunkulu. Balethemba lokuba ngamalunga emuli yakhe ngemva kokulingwa kokucina ekupheleni kweminyaka eyinkulungwane yokubusa kukaKhristu. (Hubo. 25:14; Rom. 8:20, 21) Ithemba abalalo lenza ukuthi lakhathesi babize uJehova uMdali wabo ngokuthi “Baba.” (Mat. 6:9) Abazavuswa labo bazaphiwa ithuba lokufunda ngalokho uJehova akhangelele ukuthi bakwenze. Labo abazamlalela bazacina sebengamalunga emuli yakhe.

12. Yiwuphi umbuzo esizawuphendula khathesi?

¹² Njengoba sesibonile, kunengi uJehova akwenzileyo okutshengisa ukuthi uyasiqakathekisa. Wamukela abagcotshiweyo ukuthi babe ngamadodana akhe waphinda wanika “ixuku elikhulu” ithemba lokuba ngabantwabakhe emhlabeni omutsha. (Isam. 7:9) Manje kuyini esingakwenza khathesi ukuze sitshengise uJehova ukuthi siyafuna ukuba ngamalunga emuli yakhe kuze kube nini lanini?

13. Singenzani ukuze sibe ngamalunga emuli kaNkulunkulu? (UMakho 12:30)

¹³ Tshengisa ukuthi uyamthanda uJehova ngokumkhonza ngenhliziyo yakho yonke. (Bala  uMakho 12:30.) UNkulunkulu usinike izipho ezinengi. Esinye isipho esikhulu asinike sona yikusivumela ukuthi simkhonze. Sitshengisa ukuthi siyamthanda ‘ngokulalela imilayo yakhe.’ (1 Joh. 5:3) Omunye umlayo afuna siwulalele yilowo uJesu asinika wona owokuthi senze abafundi futhi sibabhabhathize. (Mat. 28:19) Waphinda wasinika lomlayo wokuthi sithandane. (Joh. 13:35) UJehova wamukela labo abalalela imilayo yakhe emulini yezinceku zakhe ezisemhlabeni wonke.—Hubo. 15:1, 2.

14. Singatshengisa njani ukuthi siyabathanda abanye? (UMathewu 9:36-38; uRoma 12:10)

¹⁴ Bathande abanye. Uthando yibuntu bukaJehova obukhanya kulabo bonke. (1 Joh. 4:8) UJehova watshengisa ukuthi uyasithanda singakamazi lokumazi. (1 Joh. 4:9, 10) Siyabe simlingisela nxa sibathanda abanye. (Efe. 5:1) Indlela engcono kulazo zonke esingatshengisa ngayo ukuthi siyabathanda abantu yikubancedisa ukuthi bafunde ngoJehova isikhathi sisasekhona. (Bala uMathewu 9:36-38.) Nxa singenza njalo bazafunda ngalokho okumele bakwenze ukuze babe ngamalunga emuli kaNkulunkulu. Lanxa umfundi esebhabhathiziwe kufanele siqhubeke simthanda futhi simhlonipha. (1 Joh. 4:20, 21) Singakwenza njani lokho? Okunye esingakwenza yikumthemba. Ngokwesibonelo, lanxa singazwisisi ukuthi kungani enze ulutho oluthile kasisoze sicabange ukuthi ulwenze ehlose okubi. Kodwa sizatshengisa ukuthi siyamhlonipha umfowethu loba udadewethu, simbone engcono kulathi.—Bala uRoma 12:10; Flp. 2:3.

15. Ngobani okumele sibe lomusa lesihawu kubo?

¹⁵ Woba lesihawu lomusa kubo bonke abantu. Nxa sifuna ukuba ngamalunga emuli kaJehova kuze kube nini lanini kumele sisebenzise lokho okutshiwo liLizwi lakhe ezimpilweni zethu. Ngokwesibonelo, uJesu wasifundisa ukuthi kumele sibe lesihawu lomusa kubo bonke abantu ngitsho lasezitheni zethu. (Luk. 6:32-36) Ngezinye izikhathi kungaba nzima ukuthi sikwenze lokhu. Nxa sekunjalo, okungasinceda yikulingisela indlela uJesu ayecabanga layesenza ngayo. Nxa sisenza konke okusemandleni ethu ukuthi silalele uJehova futhi silingisele uJesu, siyabe sitshengisa uBaba wethu osezulwini ukuthi siyafuna ukuba ngamalunga emuli yakhe kuze kube nini lanini.

16. Singenzani ukuze singayangisi imuli kaJehova?

¹⁶ Ungayangisi imuli kaJehova. Emulini kujayelekile ukuthi umfana omncane alingisele umnewabo. Nxa umnewabo esebenzisa lokho okutshiwo liBhayibhili empilweni yakhe uba yisibonelo esihle kuye. Kodwa nxa engaqalisa ukwenza okubi angaba yisibonelo esibi. Lasemulini kaJehova kunjalo. Nxa umKhristu obethembekile angahlamuka kumbe aqalise ukuziphatha kubi loba enze ezinye izinto ezimbi abanye bangamlingisela. Abantu abenza izinto ezinje bayayiyangisa imuli kaJehova. (1 Thes. 4:3-8) Akumelanga silandele abantu abenza izinto ezimbi njalo akumelanga sivumele loba yini iphambanise ubungane bethu loBaba wethu osezulwini osithandayo.

17. Kuyini okungamelanga sikucabange njalo kungani?

¹⁷ Themba uJehova hatshi inotho. UJehova uthembisa ukuthi uzasinika ukudla, izigqoko lendawo yokuhlala nxa sifuna kuqala uMbuso wakhe futhi silandela lokho akutshoyo. (Hubo. 55:22; Mat. 6:33) Nxa sisikholwa isithembiso lesi kasisoze sicabange ukuthi izinto ezisemhlabeni lo zizasivikela njalo zisenze sithokoze. Siyakwazi ukuthi ukwenza lokho okufunwa nguJehova yikho kuphela okuzakwenza sibe lokuthula. (Flp. 4:6, 7) Lanxa silayo imali yokuthenga izinto ezinengi kumele sizibuze ukuthi silaso yini isikhathi lamandla okuthi sizisebenzise futhi sizigcine zisesimeni esihle. Kasisoze sicine sesizithanda kakhulu  yini izinto lezi? Phela kumele sikhumbule ukuthi uNkulunkulu usinike umsebenzi wokwenza. Yikho akumelanga sivumele loba yini isiphambanise. Kasifuni ngitsho ukwenza njengejaha elingazange lilandele uJesu ngenxa yokuthi lalizithanda kakhulu izinto elalilazo. Lokho kwenza lalahlekelwa yisibusiso sokukhonza uJehova lesokuba ngenye yamadodana akhe.—Mak. 10:17-22.

18. Yiziphi izibusiso abantu abalalelayo abazakuba lazo kuze kube nini lanini?

¹⁸ Abantu abalalelayo bazakuba lesibusiso esedlula zonke sokuthanda uJehova lokumkhonza kuze kube nini lanini. Labo abazaphila emhlabeni bazakholisa ukunakekela ikhaya leli elihle abalinikwa nguNkulunkulu. Sokuseduze ukuthi uMbuso kaNkulunkulu wenze umhlaba lakho konke okukuwo kuphinde kube kuhle. UJesu uzalungisa umonakalo owabangelwa ngu-Adamu lo-Eva ngesikhathi bekhetha ukutshiya imuli kaNkulunkulu. UJehova uzavusa amamiliyoni abantu njalo abanike ithuba lokuthola ukuphila okungapheliyo belempilakahle emhlabeni olipharadayisi. (Luk. 23:42, 43) Nxa abantu abakhonza uJehova sebengaselasono, bonke bazaba ‘lenkazimulo’ uDavida abhala ngayo.—Hubo. 8:5.

19. Kuyini okumele sihlale sikukhumbula?

¹⁹ Nxa ‘ungowexuku elikhulu’ ulethemba elimangalisayo. UNkulunkulu uyakuthanda futhi ufuna ube lilunga lemuli yakhe. Yikho yenza konke ongakwenza ukuze umthokozise. Hlala ucabanga ngezithembiso zakhe. Siqakathekise isibusiso sokukhonza uBaba wethu osezulwini osithandayo lesokumdumisa kuze kube nini lanini.