1. ¿Kanaj tlenon totlajtoltiaj ijkuak tikitaj nochi tlen Jehová yokichijchiuj?

IJKUAK titlanemiliaj itech nochi tlen Jehová yokichijchiuj, kanaj tomachiliaj ken tekiuaj David, akin okitlajtolti: “Ijkuak [...] nikita on cielo yejuan tejua otikchijchiu, on metstli niman on sitlalimej yejuan ompa ne otikintlalij, ijkin ninotlajtoltia: ¿Man tline tikita ueyixtiokej on tlaltikpaktlakamej, niman tline nochipa tikinnelnamiki, niman impampa yejuamej timotenmati?” (Sal. 8:3, 4). Ijkon ken David, kanaj timojkatlachiaj ijkuak tikitaj kenon Jehová melak techtlasojtla maski xtiuejueyimej ijkon ken sitlalimej. San ika, ken tikitaskej, Jehová xsan okinchijchiuj Adán iuan Eva, yejua okimitak kentla ikoneuan yeskiaj.

2. ¿Tlenon kinekiya Jehová makichiuakan Adán iuan Eva?

² Jehová kachtopa okinchijchiuj Adán iuan Eva ipan yejuin tlaltikpaktli, niman yejua katka intaj. Pampa Jehová kinekiya manomiyekilikan, ijkin okimijli: “Xkimpiyakan miyekej nemokoneuan. Xtemiltikan in tlaltikpaktli, niman xkinmomaktikan on michimej, niman on yolkej yejuan patlanij, niman nochi kech yolkej yejuan noteuilanaj” (Gén. 1:28). Kinekiya makinpiyakan inkoneuan niman makitlajpiyakan tlaltikpaktli. Tla Adán niman Eva tetlakamatiskiaj niman kichiuaskiaj tlen Jehová kinekiya, yejua nochipa kimitaskia ken ikoneuan.

3. ¿Tleka uelis tikijtoskej ika Jehová okintlakaitak Adán iuan Eva?

³ Jehová okiteititi ika okintlakaitak Adán iuan Eva pampa  okimitak ken ikoneuan. Ijkuak David tlanemilijtoya itech ken Jehová otexchijchiuj, yejua okijli: “Tejua otikinkchijchiu on tlaltikpaktlakamej sa kechkich opoliuito para yeskiaj ken tejua, niman nochimej otikinmakak ueyilistli niman tetlakaitalistli” (Sal. 8:5). Jehová xotechmakak kojtilistli nion tlamachilistli ijkon ken ángeles (Sal. 103:20). San ika, “sa kechkich opoliuito” para tiyeskiaj ken ángeles. ¡Yejuin melak temojkatlachialti! Ijkuak Jehová okichijchiuj Adán iuan Eva, kinekiya ika inyojlo manemikan.

4. ¿Tlenon ipan onochiuj Adán iuan Eva, niman tlenon tikitaskej ipan yejuin tlamachtijli?

 ⁴ Teyolkoko pampa Adán iuan Eva xokitlakamatkej Jehová niman yejua xok okimitak ken ikoneuan. Ijkon ken tikitaskej ipan yejuin tlamachtijli, yejuin okichiuj ika ikoneuan Adán iuan Eva melak matlajyouikan. Jehová xnopatla, yejua ok kineki ika akin kitlakamatij nochipa manemikan. Amantsin tikitaskej kenon Jehová yotechtlakaitak. Sakin, tikitaskej tlenon noneki tikchiuaskej para tikteititiskej ika tiknekij tiikoneuan yeskej Jehová. Sa ika tlami, tikitaskej kenon Jehová kinteochiuas nochimej ikoneuan ipan yejuin tlaltikpaktli.

5. ¿Kenon tikititiaj Jehová ika tiktlasojkamatij pampa otexchijchiuj ijkon ken yejua tlanemilia?

⁵ Jehová otechititi ika techtlakaita pampa otexchijchiuj ijkon ken yejua tlanemilia (Gén. 1:26, 27). Ika yejon ueli titetlasojtlaj, titeikneliaj, timelajkanemij niman tiknekij manochiua tlen kuajli ijkon ken yejua (Sal. 86:15; 145:17). Ijkuak tokojtiliaj tikchiuaskej ijkon ken Jehová, tikteititiaj ika tiktlakaitaj niman ika tiktlasojkamatij nochi tlen yokichiuj topampa (1 Ped. 1:14-16). Tla tikchiuaj tlen kineki toTajtsin, melak tiyolpakiskej niman ika toyojlo tinemiskej. Noijki, pampa Jehová otexchijchiuj ijkon ken yejua tlanemilia uelis tikchiuaskej tlen kineki makichiua se ikoneuj.

6. ¿Kenon okiteititi Jehová ika techtlakaita ijkuak okichijchiuj tlaltikpaktli?

⁶ Jehová yotexchijchiuili kampa tichantiskej. Ijkuak Jehová xikichijchiuaya Adán iuan Eva, yejua kualtsin yokichijchiujka tlaltikpaktli (Job 38:4-6; Jer. 10:12). Pampa yejua melak yolkuajli niman kuelita kitemakas okichijchiuj miyek tlen uelis techyolpaktis (Sal. 104:14, 15, 24). Ijkuak Jehová tlanemiliaya itech nochi tlen okichijchiuj, kitaya “ika nochi kuajli okis” (Gén. 1:10, 12, 31). Jehová noijki otechititi ika otechtlakaitak pampa otechmaktili nochi tlen onka ipan yejuin tlaltikpaktli (Sal. 8:6). Yejua kineki ika ikoneuan, akin xok tlajtlakolejkej yeskej, nochipa makitlajpiyakan tlen yokichijchiuj ipan yejuin tlaltikpaktli. ¿Tiktlasojkamachiliaj Jehová ipampa tlen yokijto techmakas?

7. ¿Kenon techititia Josué 24:15 ika uelis tiktlapejpeniskej tlen tikchiuaskej?

⁷ Jehová techkauilia matiktlapejpenikan tlen tikchiuaskej. Yejua ika, tejuamej ueli tiktlapejpeniaj tlenon tiknekij tikchiuaskej ipan tonemilis (xpoua Josué 24:15). Jehová melak yolpaki ijkuak tiktlapejpeniaj tiktekichiuiliskej (Sal. 84:11; Prov. 27:11). Onka miyek tlen toTajtsin kuelita, tlen tejuamej uelis tiktlapejpeniskej. Matikitakan kenon uelis tikchiuaskej ijkon ken Jesús.

8. Xkijto kenon Jesús okitlapejpeni kichiuas tlen kuajli.

⁸ Jesús nochipa otlanemili intech oksekimej, niman tejuamej noijki uelis ijkon tikchiuaskej. Se tonajli, Jesús iuan inomachtijkauan melak siaujtoyaj, ika yejon, okitejtemotoj kanon ueliskia noseuiskiaj.  San ika, xouel onoseuijkej pampa ompa nemiyaj miyekej akin kinekiyaj kikakiskej Jesús. Yejua xokualan, yej okimikneli niman “opeu kinmachtia miyek tlajtlamach” (Mar. 6:30-34). Ijkuak tiktekitiltiaj totiempo niman tokojtilis para tikinpaleuiskej oksekimej, ijkon ken Jesús okichiuj, tikueyichiuaj toTajtsin Jehová (Mat. 5:14-16). Ijkon tikteititiaj ika tiknekij tiikoneuan yeskej.

9. ¿Tlenon xnoneki kilkauaskej tajtin?

⁹ Jehová okichiuj matiuelikan matikinpiyakan tokoneuan niman yotechnauati matikinmachtikan makitlasojtlakan niman makitekichiuilikan. Tla tejua tikinpiya mokoneuan, ¿tikpatiojkaita yejon kualtsin tetlayokolijli? Jehová okichiuj ika ángeles mauelikan makichiuakan miyek tlemach. San ika, xokichiuj mauelikan makinpiyakan inkoneuan. Ika yejon, tajtin noneki kitlasojkamatiskej pampa kinpiyaj inkoneuan. Jehová yokinnauati tajtin kenon kuajli kimiskaltiskej inkoneuan. Yejua kimijlia: “Kuajli xkinmachtikan niman xkinchikajkanotsakan” (Efes. 6:4; Deut. 6:5-7; Sal. 127:3). Ika yejon, yokinmakak amatlajkuiloltin, videos, tlakuikaltin niman tlamachtiltin ipan jw.org tlen nokixtiaj ipan Biblia. Kuajli nesi ika toTajtsin iuan iKoneuj kintlasojtlaj tokoneuan (Luc. 18:15-17). Jehová yolpaki ijkuak kita ika tajtin itech tlaneltokaj niman nokojtiliaj kuajli kintlajpiyaskej inkoneuan. Tajtin akin ijkon kichiuaj kinpaleuiyaj inkoneuan para noijki uelis yeskej ikoneuan Jehová.

10, 11. ¿Tlenon ouel onochiuj pampa Jesús onotemakak topampa?

¹⁰ Jehová okitemakak itlasojkaKonetsin pampa kineki ika oksejpa matochiuakan ikoneuan. Ken otikitakej ipan  párrafo 4, Jehová xok okimitak Adán iuan Eva ken ikoneuan (Rom. 5:12). ¿Tleka? Pampa yejuamej okitlapejpenijkej xkitlakamatiskej. Pampa intech tiualeuaj, Jehová noijki xok techitaya ken ikoneuan. San ika, pampa melak techtlasojtla, itlaj okichiuj para oksejpa matochiuakan ikoneuan. ¿Tlenon okichiuj? Okuajtitlan isenteKonetsin, Jesucristo (Juan 3:16; Rom. 5:19). Pampa Jesús onotemakak topampa, toTajtsin noijki ouel okintlapejpeni 144,000 tlaltikpakchanejkej akin itech yolmelajkanemij (Rom. 8:15-17; Apoc. 14:1).

¹¹ Aman, melak miyekej kitlakamatstokej toTajtsin niman kichiujtokej tlen yejua kineki. Yejuamej kimatstokej ika, tla melajkanemij hasta itlamiyan mil xiuitl, uelis nochiuaskej ikoneuan toTajtsin (Sal. 25:14; Rom. 8:20, 21). Ika yejon, desde aman ueli tiknotsaj Jehová ken toTaj (Mat. 6:9). Noijki, akin yoliuiskej niman xokixmatkej Jehová uelis kixmatiskej niman kasikamatiskej tlenon kineki makichiuakan. Akin kitlakamatiskej uelis nochiuaskej ken ikoneuan para nochipa.

12. ¿Tlenon tiknankiliskej amantsin?

¹² Ken yotikitakej, Jehová kuajli yokiteititi ika melak techtlakaita. Jehová yokichiuj ika tokniuan tlapejpeniltin niman akin nemiskej ipan yejuin tlaltikpaktli manochiuakan ikoneuan (Apoc. 7:9). ¿Tlenon uelis tikchiuaskej para tikititiskej Jehová ika tiknekij nochipa tiikoneuan yeskej?

13. ¿Tlenon noneki tikchiuaskej tla tiknekij ika Jehová nochipa matechita ken ikoneuan? (Marcos 12:30).

¹³ Matiktekichiuilikan Jehová ika nochi toyojlo niman ijkon tikititiskej ika tiktlasojtlaj (xpoua Marcos 12:30). Pampa Jehová melak techtlasojtla miyek tlen yotechtlayokoli. Niman melak techyolpaktia pampa techkauilia matikueyichiuakan. Ijkuak  tejuamej tiktlakamatij, tikititiaj ika tiktlasojtlaj (1 Juan 5:3). Yejua, itechkopa Jesús, otechnauati matitemachtikan niman matikinpaleuikan oksekimej manoapolaktikan (Mat. 28:19, TNM). Jesús noijki otechnauati matikintlasojtlakan oksekimej (Juan 13:35). Jehová kinselis ken ikoneuan nochimej akin kitlakamatiskej (Sal. 15:1, 2).

14. ¿Kenon tikteititiaj ika tikintlasojtlaj oksekimej? (Mateo 9:36-38; Romanos 12:10).

¹⁴ Matikintlasojtlakan oksekimej. Biblia kijtoua ika Jehová tlasojtlalistli (1 Juan 4:8). Ijkuak tejuamej xitikixmatiyaj, yejua itechtlasojtlaya (1 Juan 4:9, 10). Ijkuak tikintlasojtlaj oksekimej, tikteititiaj ika tikchiujtokej ijkon ken yejua (Efes. 5:1). Uelis tikimititiskej oksekimej ika tikintlasojtlaj tla tikinpaleuiyaj makixmatikan Jehová aman ika ok onka tiempo (xpoua Mateo 9:36-38). Ijkon, yejuamej noijki uelis nochiuaskej ikoneuan toTajtsin. Ijkuak yakaj noapolaktia, ok noneki tiktlasojtlaskej niman tiktlakaitaskej (1 Juan 4:20, 21). Noijki, maka matiknemilikan ika yejua kineki kichiuas itlaj tlen xkuajli noso ika san itech tlanemilia. Noneki tiktlakaitaskej niman tiknemiliskej ika yejua más ueyixtika xijkon ken tejuamej (xpoua Romanos 12:10; Filip. 2:3).

15. ¿Akinomej noneki tikimikneliskej niman kuajli tikinnotsaskej?

¹⁵ Nochimej matikimiknelikan niman kuajli matikinnotsakan. Tla tiknekij ika toTajtsin nochipa matechita ken ikoneuan, noneki tikchiuaskej tlen yotechnauati ipan Biblia. Jesús otechititi ika noneki nochimej tikimikneliskej niman kuajli tikinnotsaskej, hasta totlauelikniuan (Luc. 6:32-36). San ika, kanaj kemantika yejon ouijtika tikitaj tikchiuaskej. Tla ijkon topan nochiua, noneki tokojtiliskej titlanemiliskej niman tikchiuaskej ken Jesús. Ijkuak tokojtiliaj tiktlakamatiskej Jehová niman tikchiuaskej ken Jesús, tikititiaj toTajtsin ika tiknekij nochipa tiikoneuan yeskej.

16. ¿Tlenon uelis tikchiuaskej para nochipa machipaujto ikalpan Jehová?

¹⁶ Maka matiktsojkuilotikan ikalpan Jehová. Ipan se familia, kokonej akin pitentsitsintin kichiuaj ijkon ken imikniuan akin iuejueyimej. Tla akin iuejueyimej nokojtiliaj kichiuaskej tlen Biblia kijtoua, akin pipitikej noijki kichiuaskej tlen kuajli. San ika, tla yejuamej kichiuaj tlen xkuajli, imikniuan akin pipitikej noijki kichiuaskej tlen xkuajli. Ipan ikalpan Jehová noijki ijkon panoua. Tla se tokniuj kikaua Jehová, peua kixnamiki ikalpan toTajtsin, auilnemi niman tekajkayaua, kanaj oksekimej noijki ijkon kichiuaskej. Akin ijkon kichiuaj kitsojkuilotiaj ikalpan Jehová (1 Tes. 4:3-8). Maka matikchiuakan tlen xkuajli kichiuaj oksekimej niman maka itlaj matijkauilikan matechxelo itech toTajtsin.

17. ¿Tlenon xnoneki tiknemiliskej, niman tleka?

¹⁷ Maka matitlaneltokakan itech tlen tikpiyaj, yej matitlaneltokakan itech Jehová. Jehová kuajli yotechijli ika tla tokojtiliaj tiktekichiuiliskej niman tikintlakamatij itlanauatiluan, yejua techmakas tlen tikuaskej, tlen ika totlakentiskej niman kampa tichantiskej (Sal. 55:22; Mat. 6:33). Yejua ika, xtiknemiliaj ika tlen onka ipan yejuin tlaltikpaktli uelis techpaleuis noso techyolpaktis. Kuajli tikmatstokej ika san tla tikchiuaj tlen Jehová kineki, ika toyojlo tinemiskej (Filip. 4:6, 7). Maski tla tikpiyaj tomin para tijkouaskej miyek tlemach, noneki tiknemiliskej tla uelis tikintekitiltiskej niman tikintlajpiyaskej. Matotlajtoltikan: “¿Sajnoye niktlasojtla nochi tlen nikpiya?”. Matikilnamikikan  ika Jehová kineki kuajli matiktekichiuilikan. Yejua ika, maka matijkauilikan itlaj matechtelti. Nion achijtsin xtiknekij tikchiuaskej ken on telpochtli akin Jesús okijli manochiua inomachtijkauj, akin xokinek kitekichiuilis Jehová nion xokinek nochiuas ken ikoneuj. ¿Niman tleka xokinek? Pampa sajnoye kitlasojtlaya nochi tlen kipiaya (Mar. 10:17-22).

18. ¿Tlenon uelis kichiuaskej niman tlenon kiseliskej nochimej akin tetlakamatiskej?

¹⁸ Akin kitlakamatiskej Jehová, nochipa kitlasojtlaskej niman kiueyichiuaskej. Akin nikan nemiskej melak yolpakiskej pampa kitlajpiyaskej yejuin kualtsin tlaltikpaktli, tlen Jehová yotexchijchiuili. Sa achijtsin poliui para iTekiuajyo toTajtsin kiyenkuilis nochi tlen onka ipan yejuin tlaltikpaktli. Jesús kipopolos nochi tlajyouilistli tlen otechpanoltilijkej Adán iuan Eva. Niman Jehová kinyolitis nochimej akin yomijkej niman kinkauilis nochipa manemikan ipan xochitlalpan niman maka keman makualokan (Luc. 23:42, 43). Ijkuak ikoneuan Jehová akin nemiskej ipan yejuin tlaltikpaktli xok kipiyaskej tlajtlakojli, kiteititiskej “ueyilistli niman tetlakaitalistli” tlen David okiteneujka (Sal. 8:5).

19. ¿Tlenon noneki tikilnamikiskej?

¹⁹ Melak kualtsin yes ijkuak tinochimej tinemiskej ipan xochitlalpan. ToTajtsin mitstlasojtla niman nochipa kineki mitsitas ken ikoneuj. Ika yejon, nochipa xmokojtili tikyolpaktis. Mojmostla xkilnamiki tlen Jehová yomitsijli mitsmakas. Xtlasojkamachili toTajtsin pampa techkauilis nochipa matiktekichiuilikan niman matikueyichiuakan.