1. Hadia zi tumbu ba dödöda na taʼangerönusi fefu niwöwöi Yehowa?

NA TAʼANGERÖNUSI fefu niwöwöi Yehowa ba dalu mbanua, tola manö tarasoi zimane nirasoi Dawido me imane ba wangandrönia, ”Me ufakhölö ndraʼo wamaigi talu mbanua, halöwö dangau, baŵa awö ndröfi nifazökhimö, umane: Haniha niha andrö irege itörö tödöu ia, ba haniha nono niha andrö irege öʼameʼegö tödö ia?” (Si. 8:3, 4) Simane Dawido, tola manö ahöli-höli dödöda börö me iʼameʼegö tödö ita Yehowa hewaʼae na no ide-ide sibai ita moroi ba niwöwöinia si so ba dalu mbanua. Iʼameʼegö tödö sibai göi niha siföföna Yehowa, yaʼia daʼö Adamo ba Khawa. Hizaʼi, tenga ha daʼö. Simane nitutunöda dania, itemaʼö göi ira Yehowa tobali ösi nomonia.

2. Hadia niʼandrö Yehowa khö Gadamo hegöi Khawa?

² Adamo hegöi Khawa zi tobali ono siaʼa khö Yehowa ba gulidanö, ba yaʼia zi tobali Amara safönu faʼomasi si so ba zorugo. Ibeʼe khöra Yehowa noro dödö sinangea lafalua. Imane khöra, ”Miʼoʼono ba miʼoyaʼö ami, mifoʼösi gulidanö ba mifatörö ia.” (1 Mo. 1:28) Omasi ia na laʼokhögö ndraono ba larorogö gulidanö. Na so khöra woloʼö ba lafalua hadia niʼandrö Lowalangi, lö tebulö tobali ira ösi nomonia, ba simanö göi ngaʼötöra.

3. Hana wa tola tawaʼö wa no tebeʼe nahia solakhömi khö Gadamo hegöi Khawa ba nösi nomo Yehowa?

³ No laʼokhögö nahia solakhömi ira Adamo ba Khawa ba nösi nomo Yehowa. Simane nisura ba Zinunö 8:5, imane Dawido sanandrösa ba lala womböwöi Yehowa niha gulidanö, ”No öʼide-ideʼö ia maʼifu moroi khö ndra malaʼika, ba öfotakula ia faoma lakhömi ba sumange.” Sindruhu sa, faʼabölö hegöi faʼatua-tua  nibeʼe Yehowa ba niha gulidanö lö fagölö simane nibeʼenia khö ndra malaʼika. (Si. 103:20) Hizaʼi, ha ”maʼifu” iʼide-ideʼö niha gulidanö moroi khö ndra malaʼika sagabölö. Tatu ahöli sibai dödöda! Me iwöwöi ndra tuada Yehowa, no ibeʼe khöra waʼauri si sökhi sibai.

4. Hadia zalua khö Gadamo hegöi Khawa börö me lö laʼoʼö niwaʼö Yehowa, ba hadia nitutunöda ba artikel daʼa?

 ⁴ Alimagö sibai, lö saʼae farahu Gadamo hegöi Khawa ba nösi nomo Yehowa. Simane niʼilada dania ba artikel daʼa, daʼö mbörö wa oya sibai gabula dödö salua ba ngaʼötöra. Hizaʼi, lö si tebulö gohitö dödö Yehowa. Omasi ia na tobali ösi nomonia sagötö faʼara fefu niha soloʼö khönia. Si oföna, datatutunö hewisa wangoromaʼö Yehowa wa no sebua böli ita ba wamaiginia. Aefa daʼö, tatutunö hadia zi tola tafalua iadaʼa ba wangoromaʼö wa omasi ita tobali ösi nomo Lowalangi. Safuria, tatutunö hadia manö howu-howu nibeʼe Yehowa ba nösi nomonia si so ba gulidanö sagötö faʼara.

5. Hewisa wangoromaʼöda wa taʼandrö sibai saohagölö khö Lowalangi börö me no ifazökhi ita si fakhili-khili khönia?

⁵ Ifazokhi ita Yehowa si fakhili-khili khonia. (1 Mo. 1:26, 27) Börö me fakhili-khili ita khö Lowalangi, tola taforomaʼö mbua-buania sahöli-höli dödöda, simane faʼomasi, faʼahakhö dödö, faʼalöfaröi, hegöi faʼatulö. (Si. 86:15; 145:17) Na taʼokhögö mbua-bua simane daʼö, no tafosumange Yehowa ba taforomaʼö wa mangandrö sibai saohagölö ita khönia. (1 Fe. 1:14-16) Na taʼomusoiʼö dödö Namada si so ba zorugo moroi ba gamuatada, tola tarasoi waʼomuso dödö. Baero daʼö, börö me tola taforomaʼö mbua-bua niʼokhögö Yehowa, tola taʼomusoiʼö dödönia irege itemaʼö ita tobali ösi nomonia.

6. Me ifazökhi gulidanö, hewisa wangoromaʼö Yehowa wa no sebua böli niha ba wamaiginia?

⁶ Ihenaigö khöda Yehowa nahia waʼatoröi si sökhi sibai. Fatua lö ifazökhi niha siföföna Yehowa, no ihenaigö gulidanö si tobali nahia waʼatoröi niha. (Yob. 38:4-6; Yer. 10:12) Börö me iʼameʼegö tödö ita ba oböwö ia, oya sibai ngawalö zi sökhi nifazökhinia ba gulidanö andre enaʼö tarasoi waʼomuso dödö. (Si. 104:14, 15, 24) Itaria ibeʼe ginötönia ba wonehegö omböila dangania, ba ”iʼila Lowalangi wa si sökhi daʼö fefu”. (1 Mo. 1:10, 12, 31) Börö me no sebua böli niha ba wamaiginia, ibeʼe khöra ”kuaso ba wamatörö” fefu niwöwöinia si so ba gulidanö. (Si. 8:6) Omasi Lowalangi na laʼomusoiʼö dödöra ira niha soʼahonoa ba gulidanö ba wamalua halöwö daʼö sagötö faʼara. Hadia asese öʼandrö saohagölö khö Yehowa ba mbuʼusa li sahöli-höli dödö si no ibeʼe?

7. Simane nitutunö ba Yosua 24:15, hadia zangoromaʼö wa no itehegö Yehowa ba niha gulidanö ba wangai angetula samösa?

⁷ Itehegö khöda Yehowa ba wangai angetula samösa. Tola tafili hadia zomasi ita tafalua ba waʼaurida. (Baso Yosua 24:15.) Omuso dödö Lowalangida sebua faʼomasi na tafili ba wamosumange yaʼia. (Si. 84:11; Amd. 27:11) Baero daʼö, tola göi tahalö gangetula si sökhi tanö böʼö. Nehegö atö duma-duma nibeʼe Yesu.

8. Hewisa wameʼe Yesu duma-duma si sökhi ba wangai angetula samösa?

⁸ Omasi Yesu ba wangofönaiʼö soguna ba niha böʼö, tenga soguna khönia samösa. Samuza inötö, me erege sibai dödönia hegöi ira nifahaʼönia, möi ira ba nahia si lö niha-niha enaʼö tola molombase ira ba daʼö. Hizaʼi, lö lasöndra wolombase. Hadia mbörö? Börö me so niha sato sangondrasi yaʼira ba wamondrondrongo famahaʼö Yesu. Hewaʼae simanö, lö mofönu Yesu. Börö me ahakhö dödönia ba  niha sato andrö, ”oya ifahaʼö ira”. (Mrk. 6:30-34) Na tabeʼe göi ginötö hegöi faʼabölöda ba wanolo niha böʼö simane nifalua Yesu, no tafolakhömi Namada si so ba zorugo. (Mat. 5:14-16) No göi taforomaʼö khönia wa omasi ita farahu ba nösi nomonia.

9. Hadia mbuala si tohude nibeʼe Yehowa ba niha gulidanö?

⁹ No ibeʼe Yehowa ba niha mbuala ba wangokhögö iraono, ba ibeʼe khöra noro dödö ba wamahaʼö iraonora andrö ba wangomasiʼö hegöi ba wamosumange yaʼia. Na no tobali ndraʼugö samösa satua, hadia öʼandrö saohagölö ba mbuala si tohude nibeʼe Yehowa andre? Hewaʼae na oya sibai howu-howu nibeʼe Yehowa khö ndra malaʼika, lö nibeʼenia khöra mbuala si tohude ba wangokhögö iraono. Börö daʼö, yaʼami ira satua, moguna miʼandrö saohagölö me no tebeʼe khömi mbuala andrö. Ifaduhusi tödö khömi Yehowa noro dödö ba wangebuaʼö iraonomi hegöi ba wameʼe khöra ’fotu si fao fanuturu lala’. (Ef. 6:4; 5 Mo. 6:5-7; Si. 127:3) Ba wanolo ira satua, no ihenaigö organisasi Lowalangi ngawalö wakake si teʼodane-dane ba Zura Niʼamoniʼö, simane publikasi, video, musik, hegöi artikel ba situs webda. Ba daʼa taʼila wa iʼomasiʼö sibai ndraono side-ide Yehowa hegöi Yesu. (Luk. 18:15-17) Omuso dödö Yehowa na laʼodaligö ia ira satua ba lafalua wondrege zi sökhi ba wondrorogö iraonora sebua böli. Na lafalua daʼö, no latolo ndraonora tobali ösi nomo Yehowa sagötö faʼara!

10-11. Hadia mbua nitemada börö me no ibeʼe khöda höli Yehowa?

¹⁰ Ibeʼe khöda Nononia fondrege zebua böli enaʼö tola ifuli tobali ita ösi nomonia. Simane si no tatutunö ba  ngenoli si 4, tenga saʼae ösi nomo Yehowa Gadamo hegöi Khawa, ba simane daʼö göi ngaʼötöra. (Rom. 5:12) Börö me laʼodödögö ira Adamo hegöi Khawa ba wanawö oroisa Lowalangi, no sinangea na muheta ira moroi ba nösi nomonia. Hizaʼi, hadia zalua ba ngaʼötöra? Börö waʼomasi Yehowa ba niha gulidanö, iʼalui lala enaʼö tola tobali ira ösi nomonia. Ifalua daʼö me ifatenge Nononia si ha sambua, Yesu Keriso, ba wangöhöli niha gulidanö. (Yoh. 3:16; Rom. 5:19) Börö höli nibeʼe Yesu andrö, so 144.000 niha si lö faröi nifili tobali ono Lowalangi.​—Rom. 8:15-17; Fam. 14:1.

¹¹ Baero daʼö, so hauga zuta niha tanö böʼö si lö faröi ba woloʼö niwaʼö Lowalangi. Laʼokhögö dötönafö tobali ösi nomo Lowalangi na lö faröi ira sagötö fanandraigö safuria ba gamozua Wamatörö si Saribu Fakhe. (Si. 25:14; Rom. 8:20, 21) Börö me laʼokhögö dötönafö simane daʼö, tola lakaoni ”Ama” khö Yehowa, Somböi yaʼira. (Mat. 6:9) Tebeʼe göi ginötö ba niha nisusugi dania ba wamahaʼö yaʼira sanandrösa ba gohitö dödö Yehowa khöra. Ba gafuriata, fefu niha sangai angetula ba woloʼö niwaʼö Lowalangi, tola göi tobali ira ösi nomonia.

12. Hadia wanofu nitutunöda iadaʼa?

¹² Simane si no tatutunö, oya zi no ifalua Yehowa ba wangoromaʼö wa no sebua böli niha gulidanö ba wamaiginia. No ituyu ndra niha nibayoini tobali ononia, ba no ibeʼe göi khö ndra ”ngawawa sato sibai” dötönafö tobali ononia ba gulidanö si bohou. (Fam. 7:9) Hadia zi tola tafalua iadaʼa ba wangoromaʼö khö Yehowa wa omasi ita tobali ösi nomonia sagötö faʼara?

13. Hadia zinangea tafalua enaʼö tola tobali ita ösi nomo Lowalangi? (Mareko 12:30)

¹³ Foromaʼö waʼomasiu khö Yehowa, fosumange ia soroi ba dödö. (Baso Mareko 12:30.) Oya sibai mbuala si no ibeʼe khöda Lowalangi. Sambua mbuala fondrege zebua nibeʼenia yaʼia daʼö faʼabölö ba wamosumange  yaʼia. No taforomaʼö khö Yehowa wa taʼomasiʼö ia na ”taʼoʼö goroisania”. (1 Yo. 5:3) Sambua goroisa somasi Yehowa enaʼö taʼoʼö yaʼia daʼö oroisa nibeʼe Yesu khöda ba wombaliʼö nifahaʼö hegöi ba wamayagö yaʼira idanö. (Mat. 28:19) Iʼoroisi göi khöda enaʼö faoma taʼomasiʼö nawöda. (Yoh. 13:35) Itemaʼö dozi niha soloʼö oroisania Yehowa tobali ösi nomo samosumange yaʼia ba zi sagörö ulidanö.​—Si. 15:1, 2.

14. Hewisa wangoromaʼöda faʼomasi ba niha böʼö? (Mataiʼo 9:36-38; Roma 12:10)

¹⁴ Foromaʼö waʼomasi ba niha böʼö. Faʼomasi andrö amuata Yehowa fondrege zi tohude. (1 Yo. 4:8) No iforomaʼö khöda Yehowa wa iʼomasiʼö ita fatua lö aboto ba dödöda haniha ia. (1 Yo. 4:9, 10) No taʼoʼö duma-duma nibeʼenia na taʼomasiʼö göi niha böʼö. (Ef. 5:1) Sambua lala si tohude si tola tafalua ba wangoromaʼö faʼomasi ba niha böʼö yaʼia daʼö na tafahaʼö ira sanandrösa khö Yehowa, fatua so ginötö. (Baso Mataiʼo 9:36-38.) Na tafalua daʼö, tola laʼila hadia zinangea lafalua enaʼö tobali ira ösi nomo Lowalangi. Na no tebayagö idanö zi samösa niha, böi tebulö taʼomasiʼö ba taʼameʼegö tödö ia. (1 Yo. 4:20, 21) Hewisa lalada ba wamalua daʼö? Moguna taforomaʼö wa taʼameʼegö tödö ndra talifusöda ba tawaʼö wa abölö tohude ira moroi khöda. Baero daʼö, moguna göi taforomaʼö wa tafaduhusi tödö ira. Hewaʼae na lö taʼila hadia gohitö dödöra ba wamalua hadia ia, böi tawaʼö tödöda wa lafalua daʼö ba wangalui tana khöra.​—Baso Roma 12:10; Fil. 2:3.

15. Haʼökhö taforomaʼö waʼasökhi dödö hegöi faʼahakhö dödö?

¹⁵ Foromaʼö waʼasökhi dödö hegöi faʼahakhö dödö ba niha fefu. Na omasi ita tabaliʼö Amada Yehowa andrö sagötö faʼara, moguna tafalua goroisania. Duma-dumania, ifahaʼö ita Yesu ba wangoromaʼö faʼasökhi dödö hegöi faʼahakhö dödö ba niha fefu, tefarahu ba daʼö niha si faʼudu khöda. (Luk. 6:32-36) Sindruhu sa, itaria abua wamalua daʼö. Hizaʼi, tola tafalua daʼö na tafahaʼö ita ba woloʼö lala wangera-ngera hegöi amuata Yesu. Na taforege ba wamalua oroisa Yehowa hegöi ba woloʼö duma-duma nibeʼe Yesu, no taforomaʼö khö Namada si so ba zorugo wa omasi ita tobali ösi nomonia sagötö faʼara.

16. Hewisa wondrorogöda töi si sökhi niʼokhögö nösi nomo Yehowa?

¹⁶ Rorogö döi si sökhi niʼokhögö nösi nomo Yehowa. Ba zi sambua ösi nomo, si toʼölönia iʼoʼö gamuata gaʼania si samösa akhi. Na ifalua goi-goi Zura Niʼamoniʼö gaʼania andrö, tola tobali ia duma-duma si sökhi khö nakhinia. Hizaʼi, na ifalua gamuata si lö sökhi gaʼania, tola manö iʼoʼö göi daʼö akhinia. Simanö göi ba nösi nomo Yehowa. Na so niha Keriso sondröi sindruhu, samalua amuata wohorö, mazui samalua amuata si lö sökhi tanö böʼö, tola manö tedönisi dödö ndra niha Keriso tanö böʼö ba laʼoʼö gamuatania andrö. Tola möi fangobousi döi si sökhi niʼokhögö nösi nomo Yehowa daʼö. (1 Te. 4:3-8) Börö daʼö, böi taʼoʼö duma-duma si lö sökhi nifalua niha böʼö ba böi tatehegö so zamakiko fahuwusada khö Namada si so ba zorugo.

17. Hadia lala wangera-ngera sinangea tatimbagö, ba hadia mbörö?

¹⁷ Odaligö Yehowa, tenga okhötau. No ifabu’ u Yehowa wa hasambalö ihenaigö göda, nukhada, hegöi nahia waʼatoröida na taʼofönaiʼö Wamatörönia ba tafalua hadia zatulö ba wamaiginia. (Si. 55:22; Mat. 6:33) Böi tawaʼö tödöda wa tola ilumöʼö ita kefe mazui iʼasogö khöda waʼomuso dödö. Awena tola tarasoi waʼohahau dödö sindruhu na tafalua zomasi Yehowa. (Fil. 4:6, 7) Hewaʼae na oya gama-gama si tola öʼöli, angeragö atö daʼa: Hadia so ginötö hegöi faʼabölögu ba wangogunaʼö hegöi  ba wondrorogö fefu gama-gama andrö? Hadia abölö uʼomasiʼö dania gama-gama niʼöligu andrö? Moguna tatörö tödöda wa so noro dödö sinangea tafalua yaʼita ösi nomo Lowalangi. Börö daʼö, böi tatehegö mangoloi dödöda. Böi tobali ita simane si samösa ira matua si kayo si lö omasi tobali soloʼö khö Yesu börö me talafo iʼomasiʼö gokhötania. Lua-luania, lö saʼae tebeʼe khönia ginötö ba wamosumange Yehowa ba lö tefili ia tobali ono Lowalangi!​—Mrk. 10:17-22.

18. Hadia döi si sökhi hegöi howu-howu nitema niha soloʼö khö Yehowa?

¹⁸ Fefu niha soloʼö khö Yehowa hasambalö laʼokhögö döi si sökhi ba wangomasiʼö hegöi ba wamosumange yaʼia sagötö faʼara! Omuso göi dödö nono mbanua Yehowa ba wondrorogö ulidanö andre, si no ifazökhi Yehowa tobali nahia waʼatoröira soʼahonoa. Ba zi lö ara tö, hasambalö ibohouni gulidanö andre Famatörö Lowalangi. Hasambalö iheta Yesu fefu gabula dödö salua börö wamadaö Gadamo hegöi Khawa. Hasambalö isusugi Yehowa niha si no mate si hauga zuta faʼato, ba tebeʼe khöra ginötö ba wangokhögö faʼauri soʼahonoa ba gulidanö faradaiso sagötö faʼara. (Luk. 23:42, 43) Na no moʼahonoa fefu nösi nomo Yehowa si so ba gulidanö, hasambalö latema ”lakhömi ba sumange” simane nisura Dawido ba zinunönia.​—Si. 8:5.

19. Hadia zinangea tatörö tödöda?

¹⁹ Na tefarahu ndraʼugö ba ”ngawawa sato sibai”, no öʼokhögö dötönafö si sökhi ba zi so miföna. Iʼomasiʼö ndraʼugö Lowalangi, omasi ia na tobali ösi nomonia ndraʼugö. Börö daʼö, forege ba wangomusoiʼö tödönia. Foromaʼö ba waʼaurimö sero maʼökhö wa sindruhu-ndruhu ödöna-döna mbuʼusa li Lowalangi. Ameʼegö tödö döi si sökhi si no öʼokhögö me tola öfosumange ba ösuno Namada si so ba zorugo sagötö faʼara!