1. Twanganayibulya amabulyo wahi omughulu tukalengekanaya oko byosi ebyo Yehova ahangyika?

OMUGHULU tukalengekanaya oko byosi ebyo Yehova ahangyika, twanganayowa ng’omuhandiki w’Esyonyimbo ye Dawidi oyo wabulaya Yehova omo musabe ati: “Omugulu ngasamalira olubula lwawe, emibírí y’eminwe yawe, n’omukera n’esyongununu, ebyo wabirihira aho wabyo, kwe mundu niki kwehi? Uti ukamwibuka kwehi?” (Esy. 8:3, 4) Twamabilengekania oko kanya kake ako twikeremo, nga Dawidi neryo itwalingiriraniako n’obunene b’obuhangwa, itwanganasweka eriminya ngoko Yehova atutsomene. Aliwe ngoko tukendilangira, Yehova syabya atsomene abandu b’erimbere ye Adamu na Eva lisa, aliwe kandi abya abaghanzire mo b’omo kihanda kiwe.

2. Yehova abya anzire Adamu na Eva ibakolaki?

² Adamu na Eva babya bana b’erimbere omo kihanda kya Yehova eky’oko kihugho, kandi Yehova abya Tata wabo w’elubula owo lwanzo. Mwaha Adamu na Eva b’omubírí w’erikola. OMungu mwabwirabo ati: “Mubute mukanyirire, musulaye ekihugo, mugondayekyo.” (Enz. 1:28) Kyabya kitolere ibabuta abana, kandi ibasugha ekihugho obwikalo bwabo. Adamu na Eva nga bowa oMungu n’erikola erikwamana n’erisonda liwe, bangasighere omo kihanda ky’oMungu mo kera na kera.

3. Busanaki twanganabugha tuti Adamu na Eva babya n’omwanya owasikire omo kihanda kya Yehova?

³ Adamu na Eva babya bawite omwanya owasikire omo kihanda kya Yehova. Ngoko tukasoma omo Esyonyimbo 8:5, Dawidi mwabugha oko mundu oyo Yehova ahangyika ati: “Nikwa, wabirimuyira mo muke [oko bamalaika] kandi wabirimusingya omo lukengerwa n’erisikya ly’Omwami.” Ni kwenene abandu sibawite akaghala, obwenge, n’obutoki obulingirirene nobw’abamalaika. (Esy. 103:20) Aliwe, abandu mubayirwa mo “bake” kulenga abamalaika abali n’akaghala. Terilengekania oko mwatsi  w’eriswekya ono. Omughulu Yehova ahangyika ababuti betu b’erimbere, mwabaha engebe eyuwene kundu.

4. Ekyahikira Adamu na Eva busana n’eritendyowa Yehova niki, kandi omo mwatsi ono tukendikania okuki?

 ⁴ Eky’obulighe Adamu na Eva mubatasikya Yehova, neryo mubaherya akanya kabo k’omo kihanda kiwe. Ekyo mokyaletera olubuto lwabo lw’ebitsibu ngoko tukendilangira omo mwatsi ono. Aliwe, erisonda lya Yehova moritabinduka. Anzire abakamowa ibasyabya bana biwe kera na kera. Okwitsuka, tulebaye ngoko Yehova abiritukangania ngoko akatulangira mo b’obughuli, kandi tukendikania oko ekyo tutolere itwakola lino tutoke erikangania ngoko twanzire erisyabya b’omo kihanda ky’oMungu. Oko nduli tukendikania oko emyatsi mibuya eyo abanzire erisyabya bana b’oMungu bakasyatsemera oko kihugho ko kera na kera.

5. Twangakangania oMungu yo tuti ngoko tukasima busana mwatuhangyika n’emibere eyo ali nayo?

⁵ Yehova mwakangania ngoko atusikirye erituhangyika omo kisosekano kiwe. (Enz. 1:26, 27) Kundi Yehova mwatuhangyika omo kisosekano kiwe, twanganigha erikangania emibere mibuya ng’olwanzo, erikwira abandu b’obulighe, obutaleghula n’obutunganene. (Esy. 86:15; 145:17) Omughulu tukakulaya emibere eyo, tukaha Yehova y’olukengerwa kandi tukamukanganaya erisima lyetu. (1 Pet. 1:14-16) Omughulu tukabya n’emighendere eyikatsemesaya Tata wetu w’elubula tukatsema. Kandi kundi tuwite emibere eyiri ng’eya Yehova, twanganatoka eribya bandu abo Yehova anzire ibabya omo kihanda kiwe.

6. Yehova mwakangania ati ngoko asikirye abandu omughulu abateghekaniraya ekihugho?

⁶ Yehova mwatuteghekanirya obwikalo obuwene. Embere oMungu abumbe omundu w’erimbere, mwateghekanirya abandu b’ekihugho. (Yobu 38:4-6; Yer. 10:12) Kundi Yehova ni mubuya kandi ni mwenge, mwabumbira abandu b’ebindu bingyi batoke eribya n’obutseme. (Esy. 104:14, 15, 24) Yehova abere abilengekania oko ebyo alyabumba ‘mwalangira ngoko byowene kutsibu.’ (Enz. 1:10, 12, 31) OMungu mwakangania ngoko asikirye abandu eribayira mo “batabali oko” bindu byosi ebyahangyika oko kihugho. (Esy. 8:6) OMungu anzire abandu abahika-hikene ibabya n’obutseme kera na kera oko kihugho bakasugha ebihangyikwa bibuya biwe. Ukanasima Yehova y’obuli-kiro busana n’endaghane mbuya eyo?

7. Yosua 24:15 ikakanganaya yiti ngoko omundu awite obwiranda bw’eriyisombolera?

⁷ Yehova mwatuha ekihembo ky’obwiranda bw’eriyisombolera. Twanganasombola nga tukendikwama nzira yahi omo ngebe yetu. (Soma Yosua 24:15.) Yehova mwatuha obutoki bw’erisombola, nibughambu tuwite obwiranda bw’erisombola eky’erikola. OMungu wetu w’olwanzo akatsema omughulu tukasombola erimukolera. (Esy. 84:11; Emi. 27:11) Wanganakolesya obwiranda bwaghu obo eriyisogha ndeke omo syonzira nyingyi. Tukanaye oko ky’erileberyako kya Yesu.

8. Ulete eky’erileberyako ekikakanganaya ngoko Yesu abya akakolesya obwiranda bwiwe bw’erisombola?

⁸ Twanganakwama eky’erileberyako kya Yesu erisombola erihira ebiyitawa by’abandi by’embere sy’ebiyitawa byetu. Kiro kighuma abakwenda ba Yesu ibabiriluha, mubaya ahate bandu bakalengekania bati aho ho bakendiluhukira. Aliwe mubitabya bitya. Ekikumula ky’abandu mukyasa ibanasi ngoko Yesu akendibakangirirya. Aliwe Yesu mwatahitana oko bandu abo. Omo mwanya w’erihitana, Yesu mwabakwira obulighe. Mwakolaki? “Mwatsuka erikangiriryabo emyatsi mingyi.” (Mar. 6:30-34) Omughulu tukakwama emibere ya Yesu omw’iherera akaghala ketu, n’endambi yetu busana n’eriwatikya abandi, tukaletera Tata  wetu w’elubula y’olukengerwa. (Mat. 5:14-16) Kandi tukakanganaya Yehova ngoko twanzire eribya b’omo kihanda kiwe.

9. Yehova mwaha abandu b’ekihembo kyahi eky’obughuli?

⁹ Yehova mwaha abandu b’obutoki bw’eributa abana amabaha n’omubírí w’eribakangirirya erimwanza n’erimukolera. Wamabya iwuli mubuti, ukanatsemera ekihembo ky’obughuli ekyo? Abamalaika nomo banawite obutoki bungyi, Yehova mwatabaha obutoki bw’eributa abana. Busana n’ekyo, wamabya iwuli mubuti utsemere olusunzo lwaghu olw’erilembera abana. Yehova mwaha ababuti b’omubírí “w’erikunga n’erikangirirya [abana babo] omwikangirirya ly’Omukama.” (Efe. 6:4; Ebi. 6:5-7; Esy. 127:3) Eriwatikya ababuti batoke erikangirirya abana, endondeko ya Yehova yabiriteghekania amakangirirya mangyi awahulikirirene n’eBiblia; ng’ebitsapo, esyovideo, esyonyimbo n’eyindi myatsi mingyi eyiri oko Enternete. Kwenene, Tata wetu w’elubula na Mughala wiwe banzire abana. (Luka 18:15-17) Omughulu ababuti bakayiketera Yehova, n’erikola ekyosi-kyosi ekyo bangatoka eriteya abana babo bakatsemesaya Yehova. Ababuti abakakola batya, bakawatikaya abana babo eribya n’amaha w’erisyabya omo kihanda kya Yehova mo kera na kera!

10-11. Yehova mwaleka mwatsi wahi iniatokekana okwitwe omo nzira y’embanulo?

¹⁰ Yehova mwatuha Mughala wiwe mwanzwa tutoke erisyasyabya omo kihanda kiwe. Ngoko tulyalangira omo  nungu y’akani 4 omughulu Adamu na Eva bakola erilolo, mubahiwa omo kihanda kya Yehova, n’abana babo kutya. (Rom. 5:12) Kusangwa Adamu na Eva mubakolerera erilolo, babya batolere ibahiwa omo kihanda kya Yehova. Nikwa tubughe tutiki oko bana babo? Kundi Yehova anzire abandu mwateghekanirya abana ba Adamu abakendisyamowa b’enzira y’eritasyasubibwa omo kihanda kiwe. Mwakola ekyo omo nzira y’embanulo y’oMwana wiwe kyusa nibughambu yo Yesu Kristo. (Yoa. 3:16; Rom. 5:19) Busana n’embanulo ya Yesu, Yehova akaligha aBakristo bataleghula 144 000 eribya bana biwe.​—Rom. 8:15-17; Erib. 14:1.

¹¹ Kandi hane n’amamiliyoni w’abandu abataleghula abakakola erisonda ly’oMungu. Ibo bawite amaha aw’erisyabya omo kihanda ky’oMungu enyuma sy’erilengwako erikendisyabya oko nduli y’emyaka elfu moya. (Esy. 25:14; Rom. 8:20, 21) Kusangwa bali n’amaha ayo, bakahula Yehova mo Muhangyiki kandi mo “Tata.” (Mat. 6:9) Abakendisyalubukibwa nabo bakendisyahabwa akanya k’erigha oko ebyo Yehova anzire ibakola. Abakendisyaligha erikwama obusondoli bwiwe nabo bakendisyabya omo kihanda kiwe.

12. Tukasonda erisubirya oko ribulyo ryahi?

¹² Ngoko tulyalangira, Yehova abiritukolera myatsi mingyi eyikakanganaya ngoko atusikirye. Abiriligha aBakristo abahirirwe kw’amaghuta mo bana biwe, kandi abiriha ab’omo “Endeko nene” bamaha aw’erisyabya bana biwe omo kihugho kihya-kihya. (Erib. 7:9) Litolere itwakolaki lino erikangania Yehova ngoko twanzire erisyabya omo kihanda kiwe mo kera na kera?

13. Litolere itwakolaki tutoke eribya b’omo kihanda ky’oMungu? (Mariko 12:30)

¹³ Ukanganaye olwanzo lwaghu oko Yehova omwimukolera n’omutima waghu wosi. (Soma Mariko 12:30.) Yehova abirituha ebihembo bingyi. Ekighuma ky’oko bihembo ebyo b’obutoki bw’erimuramya. ‘Tukakanganaya Yehova ngoko tumwanzire, omughulu tukasikaya ebyalayiro biwe.’ (1 Yoa. 5:3) Ekighuma ky’oko byalayiro ebyo Yehova anzire itwasikya, ky’ekyalayiro ekyo Yesu atuha eky’eriyira  abigha n’eribatisyabo. (Mat. 28:19) Kandi mwatubwira ati twanzane. (Yoa. 13:35) Yehova akasyakokya abosi abakasikaya ebyalayiro biwe b’omo kihanda ky’abaramya biwe eky’omo kihugho kyosi.​—Esy. 15:1, 2.

14. Twangakangania tuti ngoko twanzire abandi? (Matayo 9:36-38; Abanya Roma 12:10)

¹⁴ Wanze abandi. Olwanzo w’omubere mukulu wa Yehova. (1 Yoa. 4:8) Yehova mwatsuka eritwanza embere tumuminye. (1 Yoa. 4:9, 10) Tukigha erikwama emibere yiwe omughulu tukanza abandi. (Efe. 5:1) Enzira nguma eyo tukakanganayamo ngoko twanzire abandi, ly’eribawatikya erigha eriminya Yehova ihakine akatambi. (Soma Matayo 9:36-38.) Twamakola tutya itwamabaha akanya k’eriminya ebyo batolere erikola batoke erisyabya omo kihanda ky’oMungu. Enyuma sy’eribatisibwa ly’omundu litolere itwayitsinga erimwanza n’erimusikya. (1 Yoa. 4:20, 21) Twangakola ekyo kyo tuti? Omwatsi mughuma ly’eribya itunayiketere mughala wetu kutse mwali wetu. Eky’erileberyako, twamabya isitwasi ekiryaleka inyakola omwatsi mulebe, isitwalengekanaya tuti alyakolawo n’amalengekania mabi. Omo mwanya w’ekyo, tukasikaya baghala betu n’eribalangira mo babuya kutulaba.​—Soma Abanya Roma 12:10; Flp. 2:3.

15. Abo litolere itwabya tukaghanyira n’eribakangania obubuya ni bahi?

¹⁵ Ubye n’omutima w’obughanyiri kandi ubye mubuya oko bandu bosi. Twamabya itwanzire erisyabya oko batolere eryahula Yehova mo Tata wabo kera na kera, litolere itwakolesya eKinywa kiwe ky’omo ngebe yetu. Ekyerileberyako, Yesu mwatukangirirya ati itwabya tukaghanyira abandi n’erikangania obubuya oko bandu bosi nibya n’oko syonzighu syetu. (Luka 6:32-36) Hanganabya omughulu erikola tutya iryakala. Byamabya bitya, tutolere itwalengekania n’erikola nga Yesu. Omughulu tukayikasa erisikya Yehova na Yesu, tukakanganaya Tata wetu w’elubula ngoko twanzire erisyabya omo kihanda kiwe mo kera na kera.

16. Twamanza eritendihemula ekihanda kya Yehova siritolere tukakolaki?

¹⁶ Isiwahemula ekihanda kya Yehova. Omo kihanda abakiri balere babeghere erikwama ebyo bakulu babo bakakola. Oyukulire amabibya akakolesya esyokanuni sy’eBiblia sy’omo ngebe yiwe, inyakendibya eky’erileberyako ekyuwene oko balere biwe. Omukulu wabo amabibya akakola ebituwene, abalere biwe banganakwama emibere mibi yiwe. Kobine bitya n’omo kihanda kya Yehova. Omukristo mutaleghula amabitsuka eribya n’amalengekania w’eriyisamambula oko kwenene, kutse iniatsuka erikola emyatsi eyituwene abandi banganasonda erimukwama omo mibere yiwe mibi eyo. Abakakola batya bakahemula ekihanda kya Yehova. (1 Tes. 4:3-8) Situtolere erikwama eby’erileberyako ebituwene kandi isitwaligha ekindu kyosi-kyosi kitsandaye obwira bwetu na Tata wetu w’elubula owo lwanzo.

17. Litolere itwayihighula oko malengekania wahi, kandi busanaki?

¹⁷ Uyiketere Yehova omo mwanya w’eriyiketera ebindu by’ekinya-mubiri. Yehova akatulagha erituha akalyo, ebyeryambala, n’obwikalo twamabihira oBwami bwiwe bw’embere n’erisikya esyokanuni siwe esitunganene. (Esy. 55:22; Mat. 6:33) Twamabibya itunikirirye endaghane eyo isitwendilengekania tuti ebindu by’ekinya-mubiri ebyo kihugho kikatulagha bikendituletera obuholo n’obutseme b’omughulu muli. (Flp. 4:6, 7) Tunasi ngoko ekyangatuwatikya eritekana omo bulengekania ry’erikola erisonda lya Yehova. Nomo twangabya n’obutoki bw’erighula ebindu bingyi, ni ky’omughaso eriminya nga tunawite endambi n’akaghala akerisughabyo. Nina ky’omughaso erihira amalengekania wetu wosi w’oko bindu ebyo tuwiteko?  Ni ky’omughaso eriminya ngoko Yehova abirituha omubírí w’erikola omo kihanda kiwe. Ekyo nibughambu isitwaligha ekyangaherya obulengekania bwetu. Sitwanzire eribya ng’omulwana oyo wabya anzire ebindu biwe byo kutsibu n’eryo amaghana erikolera Yehova. Busana n’ekyo mwaherya akanya k’erikolera Yehova n’erisyabya mughuma w’oko bana biwe.​—Mar 10:17-22.

18. Abandu abakowa Yehova bakendisyabana miyisa yahi kera na kera?

¹⁸ Abandu abakasikaya oMungu bakendisyatsemera olusunzo lunene kutsibu olw’eryanza Yehova n’erisyamuramya kera na kera! N’abali n’amaha w’erisyikala oko kihugho nabo bakendisyatsemera erikala oko kihugho ekyo Yehova ateghekanaya ndeke-ndeke eribya bwikalo. Hakisiya hake oMungu inyuwania ekihugho n’ebyosi ebiri kukyo erilabira oBwami bwiwe. Yesu akendisyabughaho ebitsibu byosi ebyasira omwisombola libi lya Adamu na Eva ely’eriyilusya omo kihanda ky’oMungu. Yehova akendisyalubukya amamiliyoni w’abandu n’eribaha akanya k’eribana engebe y’erikota, n’emibiri eyihika-hikene oko kihugho ekikasyabya paradiso. (Luka 23:42, 43) Omughulu abandu bosi abakakolera Yehova bakasyahika-hikana, bakasyabya “n’olukengerwa n’erisikya” ngoko Dawidi ahandika.​—Esy. 8:5.

19. Litolere itwabya itunibukireki?

¹⁹ Wamabya iwuli oko abomo “ndeko nene,” uwite amaha awuwene. OMungu akwanzire; anzire iwabya w’omo kihanda kiwe. Busana n’ekyo ukole ngoko wangatoka utoke erimutsemesya. Obuli kiro esyondaghane sya Yehova sibye omo bwenge bwaghu, nomo mutima waghu. Utsemere olusunzo olo uwite olw’eriramya Tata wetu w’elubula kandi utsemere amaha w’erisyamupipa kera na kera!