1. Tikaganizila vinthu vonse vechilenga Yehova, kansi tingalikonshe makonso otyani?

TIKOGANIZILA ngako za chilengedwe chikulu chechilenga Yehova payakine tingolimvwa monga ni mwenzemvwila wamasalimo Davide, nthawe iyakine yove epemphela kwa Yehova ndipo ekonsha kuti: “Nikalolesha kululu, ntchito ya vikumo vanu, mwezi na nyenyezi vemwipanga, kansi munthu wakufwa niŵani kuti mwaomuganizila, soti mwana wa munthu niŵani kuti mwaomusamalila?” (Sal. 8:3, 4) Molingana na Davide, keno tuzindikila kuti sewo nise atontho ngako polinganija na chilengedwe, tingochita chidwi kuti Yehova otisamalila. Koma monga mwatikuti tiwonele mu nkhani ino, Yehova aliyechite tyala chidwi na ŵala ŵanthu oyambilila Adamu na Hava koma eŵalolasoti kuti ankhale mbali ya banja yake.

2. Kansi Yehova enze na cholinga chotyani chokhuza ŵana ŵake oyambilila pano pachalo?

² Adamu na Hava enze ŵana oyambilila pano pachalo a Yehova, ndipo Yehova enze Atata ŵawo ŵakululu achikondi. Yehova enzeyembekezela kuti Adamu na Hava avyale ŵana. Tetyo, yove eŵauja kuti: “Muvyalane, mupake, muzuje chalo, soti muchilolele.” (Gen. 1:28) Adamu na Hava enzefunikila kunkhala na ŵana komasoti kuchisamalila luweme chalo. Kuti ove enze emvwila nokwanilisha ntchito yechipasiwa, ove pamozi na ŵana ŵawo sembe epitilija kunkhala m’banja ya Mulungu mpaka kale-kale.

3. Ndaŵa yanji tinganene kuti Adamu na Hava epasiwa malo aweme ngako m’banja ya Yehova?

³ Adamu na Hava enze na malo aweme ngako m’banja ya Yehova. Pa Salimo 8:5 na mawu a mnyansi, pofotokoza kuti Yehova elenga munthu, Davide elemba kuti: “Mwewo mwimuchefya patontho polinganija na angelo, pavuli pake mwimuvwalika ulemelelo  na ulemu monga chisote chachifumu.” N’chendi kuti Yehova aliyepase ŵanthu mphamvu, nzelu na maluso olingana na angelo. (Sal. 103:20) Koma munthu ‘echingomuchefyako patontho’ polinganija na angelo. Koma ganizilani! Kulaŵila chendi, Yehova pechilenga makolo ŵasu oyambilila eŵapasa moyo uweme ngako.

4. Kansi n’chinji chichitikila Adamu na Hava chifukwa chosamvwila Yehova, ndipo tikambilane chinji mu nkhani ino?

 ⁴ Chomvwisha chisoni n’chakuti Adamu na Hava eluza malo ŵawo aweme ngako m’banja ya Yehova. Ndipo monga mwatikuti tiwonele mu nkhani ino, vechichita ove vileta mavuto anyinji kuli ŵana ŵawo. Olo n’tetyo, cholinga cha Yehova kuli ŵanthu chiliyechinje. Yove akalifuna mphela kuti ŵala ŵanthu omvwila ankhale ŵana ŵake mpaka kale-kale. Choyamba, tiyeni tikambilane mwechiwoneshela Yehova kuti sewo nise ofunika ngako kuli yove. Pavuli pake, tikambilane vatingachite palipano kuti tiwoneshe kuti tufuna kunkhala m’banja ya Mulungu. Pamapeto pake, tikambilane madaliso ŵati azalondele ŵana a Yehova pano pachalo nosangalala nawo mpaka kale-kale.

5. Kansi tingawoneshe tyani kuti tutembeja Mulungu chifukwa chotilenga m’chifanizilo chake?

⁵ Yehova ewonesha kuti otiwona kuti nise ofunika potilenga m’chifanizilo chake. (Gen. 1:26, 27) Pakuti sewo tilengewa m’chifanizilo cha Mulungu, tingakwanishe kukulisha komasoti kuwonesha minkhalidwe inyinji iweme ngako yalinayo yove monga chikondi, chisomo, kukhulupilika komasoti chilungamo. (Sal. 86:15; 145:17) Tikoyeja-yeja kuti tiwoneshe minkhalidwe yamene iyi, tulemekeza Yehova ndipo tuwonesha kuti tumutembeja. (1 Pet. 1:14-16) Keno tuchita vinthu mu njila yamene ingakondweleshe Atata ŵasu ŵakululu, sewo nase tunkhala osangalala. Komasoti chifukwa chakuti etilenga m’chifanizilo chake, tingakwanishe kunkhala ntundu wa ŵanthu ŵakufuna yove kuti ankhale m’banja yake.

6. Kansi Mulungu penzelenga chino chalo ewonesha tyani kuti ŵanthu ni ofunika ngako?

⁶ Yehova etipasa malo aweme ngako kuti sewo tikonkhalamo. Kukali vyaka vinyinji Yehova akaliyelenga munthu woyambilila, yove enze epanga kale chalo kuti ŵanthu azankhalemo. (Yobu 38:4-6; Yer. 10:12) Chifukwa chakuti ni muweme ntima komasoti wopasa, Yehova elenga vinthu vamene ivi viweme kuti vukotikondwelesha. (Sal. 104:14, 15, 24) Nthawe iyakine, Yehova pechiganizila vinthu vonse vechilenga “ewona kuti vili luweme.” (Gen. 1:10, 12, 31) Pofuna kuwonesha kuti ŵanthu ni ofunika, Yehova eŵapasa mphamvu kuti akololela vinthu vonse viweme vechilenga yove pano pachalo. (Sal. 8:6) Mulungu ofuna kuti ŵanthu angwilo azangalale posamalila chilengedwe chake chiweme ngako mpaka kale-kale. Kansi mwewo mumutembeja Mulungu nthawe zonse chifukwa cha vinthu viweme vamene ivi valonjeza?

7. Kansi lemba ya Yoswa 24:15, yuwonesha tyani kuti ŵanthu ali na ufulu wosankha?

⁷ Yehova etipasa ufulu wosankha. Sewo tingakwanishe kusankha vatufuna kuchita pa moyo wasu. (Ŵelengani Yoswa 24:15.) Mulungu wasu wachikondi osangalala ngako keno sewo tasankha kumutumikila. (Sal. 84:11; Miy. 27:11) Tingakwanishe kukatishila ntchito ufulu wamene uyu posankha vochita mwanzelu. Ganizilani chisanzo cha mwamene Yesu mwechikatishila ntchito ufulu wake wosankha.

8. Kansi ni njila imozi yotyani yechikatishila ntchito luweme Yesu ufulu wake wosankha?

⁸ Tingatolele chisanzo cha Yesu, keno tuika vofuna va ayasu pasogolo mmalo mwa vofuna vasu. Pa nthawe iyakine, Yesu na atumwi ŵake pechiŵeŵa ngako eluta ku malo ayakine kuti akapumule. Olo n’tetyo, vamene ivi viliyekwanishike. Gulu ikulu ya ŵanthu iŵakonkha, ndipo  ŵanthu amene amene awo enzefunishisha kuti Yesu aŵaphunzise. Koma Yesu, aliyeŵakalipile ŵanthu amene awo. Mmalomwake, yove eŵamvwila chisoni. Lomba kansi Yesu echita tyani? “Yove eyamba kuŵaphunzisa vinthu vinyinji.” (Mk. 6:30-34) Keno tukokenkheja Yesu pokatishila ntchito nthawe na mphamvu zasu poyavya ayakine, tulemekeza Atata ŵasu ŵakululu. (Mt. 5:14-16) Tumuwoneshasoti Yehova kuti tufuna kunkhala m’banja yake.

9. Kansi makolo apasiwa mwayi wotyani?

⁹ Yehova elenga ŵanthu kuti akonkhala na ŵana, ndipo eŵapasa udindo wophunzisa ŵana amene awo kuti akomukonda komasoti kumutumikila. Keno nimwe makolo, kansi mutembeja mwayi wamene uyu wechikupasani Yehova? Angelo aliyepasiwe mwayi wamene uyu olo kuti epasiwa luso yochita vinthu vinyinji. Poganizila mfundo yamene iyi, makolo amene olela ŵana ofunika kuwona kuti wamene uyu ni udindo wofunika ngako. Makolo apasiwa udindo wofunika ngako wolela ŵana ŵawo “m’malangizo a Yehova noŵaphunzisa kaganizidwe kake.” (Aef. 6:4; Deut. 6:5-7; Sal. 127:3) Pofuna kuyavya makolo, gulu ya Yehova yupeleka vinthu vuyavya pophunzila Baibolo monga mabuku, mavidiyo, nyimbo komasoti vinthu viyakine kupitila pa webisaiti. N’vowonekelatu kuti Atata ŵasu ŵakululu komasoti Mwana wake oŵakonda ngako ŵana. (Lk. 18:15-17) Keno makolo odalila Yehova nochita vonse vangakwanishe posamalila ŵana ŵawo amene ni a ntengo wapatali, Yehova osangalala. Ndipo makolo oteti oyavya ŵana ŵawo kunkhala na chiyembekezo chakuzankhala m’banja ya Yehova mpaka kale-kale!

10-11. Kansi Yehova wachita chinji pokatishila ntchito nsembe ya Mwana wake?

¹⁰ Yehova epeleka Mwana wake wapantima na cholinga chakuti sewo taŵanthu tinkhalesoti m’banja Yake. Monga ni mwatawonela mu  ndime 4, Adamu na Hava aliyepitilije kunkhala m’banja ya Yehova ndipo vamene ivi vikhuzasoti ŵana ŵawo. (Aro. 5:12) Mwalona, Adamu na Hava aliyemvwile Mulungu, tetyo mpomvwika kuti yove eŵachosa m’banja yake. Lomba tyani ponena za ŵana ŵawo? Mwachikondi, Yehova ekonza zakuti azatole ŵana omvwila ŵa Adamu noŵaikasoti m’banja yake. Yove echita vamene ivi pokatishila ntchito nsembe ya Mwana wake wokondewa Yesu Khilisitu. (Yoh. 3:16; Aro. 5:19) Chifukwa cha nsembe yamene iyi, ŵanthu okwana 144.000 okhulupilika owonewa monga ŵana a Mulungu.—Aro. 8:15-17; Chiv. 14:1.

¹¹ Kuyangijila pamene apo, ŵanthu mamiliyoni anyinji amene ni okhulupilika omvwila komasoti kuchita vakufuna Mulungu. Ove ali na chiyembekezo chakuzankhala m’banja ya Mulungu pavuli pa mayeselo osilijila, vikazasila vyaka 1.000. (Sal. 25:14; Aro. 8:20, 21) Chifukwa cha chiyembekezo chamene ichi, olo palipano ŵanthu amene aŵa otomola Yehova wamene ni Nyamalenga wawo kuti “Atata.” (Mt. 6:9) Ŵanthu amene akuti azaushiwe nawo azapasiwe mwayi wakuti azaphunzile vakufuna Mulungu kuti akochita. Ŵanthu amene akuti azasankhe kumvwila, azapasiwesoti mwayi wakuti ankhale m’banja yake.

12. Kansi lomba tikambilane konsho yotyani?

¹² Monga ni mwatawonela, Yehova wachita kale vinyinji powonesha kuti owona ŵanthu kuti ni ofunika. Yove watola kale ozozewa kuti ankhale ŵana ŵake, ndipo wapeleka chiyembekezo kuli “gulu ikulu” chakuti azankhale ŵana ŵake m’chalo chanyowani. (Chiv. 7:9) Lomba kansi tufunika kuchita chinji palipano kuti tiwoneshe kuti tufuna kuzankhala m’banja ya Yehova mpaka kale-kale?

13. Kansi n’chinji chatingachite kuti tinkhale m’banja ya Mulungu? (Maliko 12:30)

¹³ Tikowonesha kuti tukonda Yehova pomutumikila na ntima wasu wonse. (Ŵelengani  Maliko 12:30.) Pali vinthu vinyinji vatipasa Yehova mowama ntima, ndipo imozi mwa mphaso zikulu-zikulu zatipasa ni mwayi wakuti tikomulambila. Tuwonesha kuti tukonda Yehova ‘tikosunga malamulo ŵake.’ (1 Yoh. 5:3) Polaŵila mmalo mwa Atata ŵake, Yesu etilamula kuti tikoyavya ŵanthu kunkhala ophunzila ŵake komasoti kuŵabatiza. (Mt. 28:19) Yove etilamulasoti kuti tikokondana. (Yoh. 13:35) Yehova azalondele onse ŵala omvwila m’banja yake ya pachalo chonse ya ŵanthu amene omulambila.—Sal. 15:1, 2.

14. Kansi tingawoneshe tyani kuti tukonda ayasu? (Mateyu 9:36-38; Aroma 12:10)

¹⁴ Tikokonda ŵanthu ayasu. Chikondi ni nkhalidwe ikulu ya Yehova. (1 Yoh. 4:8) Yove ewonesha kuti otikonda sewo tikaliyemuziŵa olo patontho. (1 Yoh. 4:9, 10) Tumukonkheja Yehova keno tukonda ŵanthu ayasu. (Aef. 5:1) Njila imozi yatingawoneshele kuti tukonda ŵanthu ayakine ni kuŵayavya kuziŵa vokhuza Yehova nthawe ikalipo. (Ŵelengani Mateyu 9:36-38.) Tikochita vamene ivi, tunkhala kuti tuŵapasa mwayi wakuti ankhale na chiyembekezo chakuzankhala m’banja ya Mulungu. Munthu akabatiziwa, tufunika kupitilija kumuwonesha chikondi komasoti kumulemekeza. (1 Yoh. 4:20, 21) Kansi tingachite tyani vamene ivi? Njila iyakine yatingachitile vamene ivi, ni kuwonesha kuti tukaikilalini volinga vake. Mwachisanzo, keno tiliyemvwishe chifukwa chachitila yove vinthu viyakine, tingakulumijelini kuganiza kuti wachita vamene ivo na volinga viipa. Mmalomwake, tingawoneshe kuti tulemekeza m’bale wasu wamene uyo pomuwona kuti otipambana.—Ŵelengani Aroma 12:10; Afil. 2:3.

15. Kansi niŵani ŵatufunikila kuwamila ntima komasoti kuŵachitila chifundo?

¹⁵ Tikochitila chifundo ŵanthu onse komasoti kuŵawamila ntima. Keno tufuna kupitilija kunkhala m’banja ya Yehova, tufunika kukatishila ntchito vatuphunzila m’Mawu a Mulungu pa moyo wasu. Mwachisanzo, Yesu etiphunzisa kuti tufunika kuchitila chifundo komasoti kuwamila ntima ŵanthu onse kupamikijapo adani ŵasu. (Lk. 6:32-36) Koma nthawe ziyakine, kuchita vamene ivi kungankhale kovuta. Keno vili tetyo, tufunika kuphunzila kuti tikoganizila komasoti kuchita vinthu monga ni Yesu. Keno tuyeja-yeja kuchita vonse vatingakwanishe pomvwila Yehova komasoti kukonkheja Yesu, tuwonesha Atata ŵasu ŵakululu kuti tufuna kuzankhala m’banja yake mpaka kale-kale.

16. Kansi tingateteze tyani mbili iweme ya banja ya Yehova?

¹⁶ Tikoteteza mbili iweme ya banja ya Yehova. M’banja ni vinthulini vachilwendo kuwona mwana otolela chisanzo cha nkulu wake. Keno mwana nkulu wamene uyo okatishila ntchito mfundo za m’Baibolo pa moyo wake, angankhale chisanzo chiweme ngako kuli nsaza wake. Koma keno mwana nkulu wamene uyo ochita viipa, nsaza wake naye otolelako vamene ivo. Vamene ivi niye vingachitikesoti m’banja ya Yehova. Keno Mkhilisitu wokhulupilika wayamba kunkhala na maganizo ampatuko olo keno wasankha kuchita viipa, Akhilisitu ayakine angayambe kumukonkheja. Ŵanthu amene ochita vamene ivi, oipisha mbili ya banja ya Yehova. (1 Ates. 4:3-8) Tetyo, tufunikalini kukonkheja ŵanthu aipa ndipo tufunikalini kulola chilichonse kutilekanisha na Atata ŵasu ŵakulu amene ni achikondi.

17. Kansi tufunika kupewa kunkhala na maganizo otyani, ndipo ndaŵa yanji?

¹⁷ Tikodalila Yehova osati chuma. Yehova olonjeza kuti akotipasa vakulya, vovwala na poyona keno tuika Ufumu wake pa malo oyamba komasoti keno tuchita vinthu mokatijana na mfundo zake zolungama. (Sal. 55:22; Mt. 6:33) Chifukwa cha vamene ivi, sewo tupewa kuganiza kuti chuma komasoti vinthu muli ichi chalo vingatiyavye kunkhala otetezeka olosoti osangalala. Tuziŵa kuti chingatiyavye kufwana  ntendele ngawo-ngawo wamuntima ni kuchita vakufuna Yehova mphela. (Afil. 4:6, 7) Olo kuti tingakwanishe kugula vinthu vinyinji, tufunika kuganizila keno tingankhale na nthawe komasoti mphamvu zokatishila ntchito vinthu vamene ivo komasoti kuvisamalila. Kansi tukonda ngako vinthu vatili navo? Tufunika kukumbukila kuti Mulungu watipasa ntchito yakuti tikokata m’banja yake. Vamene ivi vutanthauza kuti tufunikalini kulola kusokonezewa na chilichonse. Tingafunelini olo patontho kunkhala monga ni mulumbwana muyakine wamene ekana mwayi wotumikila Yehova komasoti kunkhala m’gulu ya ŵana ŵake—chifukwa cha vinthu vitontho vechifwana muli ichi chalo!—Mk. 10:17-22.

18. Kansi ŵanthu omvwila azasangalale na madaliso otyani mpaka kale-kale?

¹⁸ Ŵanthu omvwila azasangalale na mwayi ukulu—wolambila komasoti wokonda Yehova mpaka kale-kale! Ŵanthu akuti azankhale pano pachalo azasangalale kukata ntchito yosamalila chino chalo chiweme chechiŵakonzela Yehova kuti akonkhalamo. Kwalombapano Ufumu wa Mulungu uzakonze vinthu vonse pano pachalo kuti vinkhalesoti viweme. Yesu azasilije mavuto onse amene eyamba chifukwa chakuti Adamu na Hava esankha kuchoka m’banja ya Mulungu. Yehova azaushe ŵanthu mamiliyoni noŵapasa mwayi wakuti ankhale na moyo wosasila komasoti wathanzi m’chalo chakuti azakonze kunkhala paladaiso. (Lk. 23:42, 43) Ŵanthu amene olambila Yehova akazankhala angwilo, aliyense akowonesha “ulemelelo na ulemu” wamene Davide wechilemba.—Sal. 8:5.

19. Kansi tufunika kukumbukila chinji?

¹⁹ Keno muli “m’gulu ikulu” ikuti izankhale pano pachalo, muyembekezela vinthu viweme ngako. Mulungu okukondani mwewo, ndipo ofuna kuti munkhale m’banja yake. Tetyo, mukochita vonse vamungakwanishe kuti yove akosangalala namwe. Nsiku iliyonse mukokumbukila komasoti kuganizila malonjezo a Yehova. Mukotembeja mwayi wamuli nawo wolambila Atata ŵasu ŵakululu, ndipo mukosangalala na chiyembekezo chamuli nacho chakuzamutamanda mpaka kale-kale!