1. Re ka ikwa bjang ge re nagana ka dilo ka moka tšeo Jehofa a di bopilego?

GE RE nagana ka dilo ka moka tšeo Jehofa a di bopilego re ka ikwa go swana le mopsalme Dafida, yoo a ilego a botšiša Jehofa gore: “Ge ke bona magodimo a gago, mediro ya menwana ya gago, kgwedi le dinaledi tšeo o di dirilego, gona motho wa nama le madi ke eng moo o bilego o dula o nagana ka yena, le gona ngwana wa motho wa lefaseng ke eng ge o bile o mo hlokomela?” (Ps. 8:3, 4) Go swana le Dafida, re ka ipona eka ga re selo ge re ipapetša le dinaledi tšeo Jehofa a di bopilego, gomme ra makatšwa ke gore Jehofa o na le taba le rena. Le gona mo sehlogong se re tlo bona gore Jehofa o be a na le taba le batho ba mathomo e lego Adama le Efa e bile a ba dirile gore e be karolo ya lapa la gagwe.

2. Jehofa o be a nyaka gore Adama le Efa ba dire eng?

² Batho ba pele bao Jehofa a ilego a ba bopa mo lefaseng e be e le Adama le Efa, gomme Jehofa e be e le Tatago bona wa legodimong yoo a ba ratago. O be a sa nyake gore ba no dula ka lapeng la gagwe ba sa dire selo. Modimo o ile a re go bona: “Tswalang le ate le tlale lefase le be le le fenye.” (Gen. 1:28) O be a nyaka gore ba be le bana e bile ba hlokomele lefase leo a bego a ba file lona. Ge nkabe Adama le Efa ba ile ba theetša Modimo go tloga mathomong, bona le bana ba bona nkabe e bile karolo ya lapa la Modimo ka mo go sa felego.

3. Ke ka baka la’ng re ka re Jehofa o be a neile Adama le Efa karolo e bohlokwa ka lapeng la gagwe?

³ Adama le Efa ba be ba na le karolo e bohlokwa ka lapeng la Jehofa. Go ya ka Psalme 8:5, Dafida o boletše ka motho yoo Modimo a mmopilego gore: “O mo dirile gore a be ka tlasana ga barongwa, ke moka wa mo rweša mphapahlogo wa letago le botse.” Ke nnete gore Modimo ga se a nea batho matla, bohlale  le bokgoni bja go swana le bja barongwa. (Ps. 103:20) Eupša o bopile batho gore ba be “ka tlasana” ga barongwa. Ruri seo se a makatša! Jehofa o be a neile batswadi ba rena ba mathomo bophelo bjo bobotse kudu.

4. Go diregile’ng ka Adama le Efa ka ge ba ile ba se kwe Jehofa, gona re tlo boledišana ka eng sehlogong se?

 ⁴ Sa go nyamiša ke gore ka ge Adama le Efa ba se ba kwa Jehofa, ba ile ba se sa ba karolo ya lapa la gagwe. Ka baka leo, se se ile sa dira gore bana ba bona ba welwe ke mathata a magolo, e lego seo re tlago go boledišana ka sona ka moragonyana sehlogong se. Eupša Jehofa ga se a fetoga. O sa nyaka gore batho bao ba mo kwago e be bana ba gagwe ka mo go sa felego. Sa pele, re tlo kwa gore Jehofa o re bontšhitše bjang gore re bohlokwa go yena. Ke moka ra tla ra kwa gore re ka dira eng go bontšha gore re nyaka go ba karolo ya lapa la gagwe. Mafelelong re tlo kwa gore ke dilo dife tše dibotse tšeo Jehofa a tlago go di direla bana ba gagwe ba mo lefaseng go ya go ile.

5. Re ka bontšha bjang gore re leboga Modimo ka ge a re bopile ka seswantšho sa gagwe?

⁵ Jehofa o bontšhitše gore re bohlokwa ka go re bopa ka seswantšho sa gagwe. (Gen. 1:26, 27) Ka ge re bopilwe ka seswantšho sa Modimo, re ka kgona go ba le dika tše dintši tše dibotse tša go swana le lerato, kwelobohloko, go botega le go ba le toka. (Ps. 86:15; 145:17) Ge re na le dika tše, re dira gore Jehofa a retwe e bile re bontšha gore re a mo leboga. (1 Pet. 1:14-16) Ge re itshwara ka tsela yeo e kgahlišago Tatago rena wa legodimong, re a thaba e bile re a kgotsofala. Le gona ka ge Jehofa a re bopile ka seswantšho sa gagwe, re ka kgona go ba batho bao a ba nyakago ka lapeng la gagwe.

6. Jehofa o bontšhitše bjang gore batho ba bohlokwa go yena ge a be a bopa lefase?

⁶ Jehofa o re diretše legae le lebotse. O ile a bopa lefase nako e telele pele a ka bopa batho. (Jobo 38:4-6; Jer. 10:12) Ka ge Jehofa a le botho e bile a sa timane, o re diretše dilo tše dintši tše dibotse gore re thabe. (Ps. 104:14, 15, 24) Ka nako e nngwe o ile a naganišiša ka dilo ka moka tšeo a di dirilego ke moka a ‘bona e le tše dibotse.’ (Gen. 1:10, 12, 31) O bontšhitše gore batho ba bohlokwa go yena ka go dira gore ba “buše” dilo ka moka tše dibotse tšeo a di bopilego mo lefaseng. (Ps. 8:6) Modimo o nyaka gore batho bao ba phethagetšego ba tle ba hlokomele dilo ka moka tše dibotse tšeo a di bopilego go ya go ile. Na o dula o leboga Jehofa ka seo?

7. Joshua 24:15 e bontšha bjang gore re na le tokologo ya go itirela diphetho?

⁷ Jehofa o re file tokologo ya gore re itirele diphetho. Re ka ikgethela gore re nyaka go dira eng bophelong. (Bala Joshua 24:15.) Modimo wa rena yo a re ratago o a thaba ge re kgetha go mo hlankela. (Ps. 84:11; Die. 27:11) Re ka diriša tokologo ye ya rena go dira diphetho tše dingwe tše dintši tše dibotse. Nagana kamoo Jesu a ilego a diriša tokologo ya gagwe ya go itirela diphetho.

8. Nea mohlala wa kamoo Jesu a ilego a diriša tokologo ya gagwe ya go itirela diphetho.

⁸ Re ka ekiša Jesu ka gore re kgethe go etiša batho ba bangwe pele. Nakong e nngwe ge Jesu le baapostola ba gagwe ba be ba lapile kudu, ba ile ba ya lefelong leo le homotšego gore ba yo khutša. Eupša ga se ba ka ba kgona go khutša. Ka baka la’ng? Ka gobane batho ba bantši ba ile ba ba bona gomme ba tla go bona ka ge ba be ba nyaka gore Jesu a ba rute. Eupša Jesu ga se a ka a tenega. Go e na le moo o ile a kwela batho bao bohloko. O ile a dira’ng? O ile “a thoma go [ba] ruta dilo tše  dintši.” (Mar. 6:30-34) Ge re ekiša Jesu ka go diriša matla a rena le nako ya rena go thuša batho ba bangwe, re dira gore Tatago rena wa legodimong a retwe. (Mat. 5:14-16) Le gona re bontšha Jehofa gore re nyaka go ba karolo ya lapa la gagwe.

9. Jehofa o file batho tokelo efe?

⁹ Jehofa o file batho tokelo ya gore ba be le bana le boikarabelo bja gore ba ba rute go mo rata le go mo hlankela. Ge e ba o le motswadi, na o leboga mpho ye e bohlokwa? Le ge Jehofa a šegofaditše barongwa kudu, eupša ga se a ba nea tokelo ye ya go ba le bana. Ka gona ge e ba o le motswadi o swanetše go leboga tokelo yeo Jehofa a go filego yona ya go godiša bana. Modimo o file batswadi boikarabelo bjo bohlokwa bja go godiša bana ba bona “ka tayo le temošo ya Jehofa.” (Baef. 6:4; Doit. 6:5-7; Ps. 127:3) Mokgatlo wa Modimo o nea batswadi dilo tše dintši tšeo di theilwego Beibeleng tše bjalo ka dikgatišo, dibidio, dikoša le dilo tše dingwe wepesaeteng ya rena tšeo di ka ba thušago gore ba godiše bana ba bona gabotse. Go molaleng gore Tatago rena wa legodimong le Morwa wa gagwe ba rata bana. (Luka 18:15-17) Ge batswadi ba ithekga ka Jehofa le go dira sohle seo ba ka se kgonago go godiša bana ba bona, Jehofa o tlo thaba. Le gona batswadi bao ba tla be ba nea bana ba bona sebaka sa gore e tle e be karolo ya lapa la Jehofa ka mo go sa felego!

10-11. Ke’ng seo Jehofa a dirilego gore se kgonege ka baka la sehlabelo sa Jesu sa topollo?

¹⁰ Jehofa o re file morwa wa gagwe yo a rategago kudu gore a re hwele e le gore re kgone go ba karolo ya lapa la gagwe gape. Ka ge re boletše go  serapa 4, ka morago ga gore Adama le Efa ba dire sebe ba ile ba se sa ba karolo ya lapa la Modimo gomme seo se ile sa ama le bana ba bona. (Baroma 5:12) Adama le Efa ba ile ba kgetha go se sa kwa Modimo, gomme Modimo o ile a se sa ba amogela gore e be karolo ya lapa la gagwe. Eupša go be go tlo direga’ng ka bana ba bona? Ka ge Jehofa a rata batho, o dirile gore go kgonege gore bana ba Adama le Efa bao ba mo kwago ba be karolo ya lapa la gagwe. O dirile se ka go romela Jesu Kriste e lego Morwa wa gagwe yo a tswetšwego a nnoši gore a tle a re hwele. (Joh. 3:16; Baroma 5:19) Se se dirile gore Modimo a kgone go tlotša batho ba 144 000 bao ba botegago ka moya wa gagwe o mokgethwa gore e be barwa ba gagwe.—Baroma 8:15-17; Kut. 14:1.

¹¹ Le gona batho ba dimilione bao ba botegago e bile ba kwago Modimo, ba na le kholofelo ya go tlo ba karolo ya lapa la Modimo ka morago ga teko ya mafelelo mafelelong a mengwaga e sekete. (Ps. 25:14; Baroma 8:20, 21) Ka ge ba na le kholofelo ye, ba šetše ba thomile go bitša Jehofa Mmopi wa bona gore ke ‘Tate.’ (Mat. 6:9) Le gona, bao ba tla bego ba tsošitšwe bahung ba tla newa sebaka sa gore ba ithute gore Jehofa o nyaka ba dira eng. Ge e ba ba ka kgetha go kwa Jehofa le bona mafelelong e tla ba karolo ya lapa la gagwe.

12. Ga bjale re tlo araba potšišo efe?

¹² Ka ge re šetše re bone, Jehofa o bontšhitše ka ditsela tše dintši gore o tšea batho ba le bohlokwa kudu go yena. O šetše a kgethile batlotšwa gore e be barwa ba gagwe, e bile o tshepiša gore ba “lešaba le legolo” e tlo ba bana ba gagwe lefaseng le lefsa. (Kut. 7:9) Re ka dira’ng go bontšha Jehofa gore re nyaka go ba karolo ya lapa la gagwe go ya go ile?

13. Re ka dira’ng gore re be karolo ya lapa la Modimo? (Mareka 12:30)

¹³ Bontšha gore o rata Jehofa ka go mo hlankela ka pelo ya gago ka moka. (Bala Mareka 12:30.) Modimo o re file dilo tše dintši kudu.  E nngwe ya dilo tše dikgolo tšeo a re filego tšona ke tokelo ya go mo hlankela. Re bontšha Jehofa gore re a mo rata ka go ‘boloka ditaelo tša gagwe.’ (1 Joh. 5:3) Taelo e nngwe yeo Jehofa a nyakago re e latela ke yeo Jesu a re neilego yona ya gore re dire batho barutiwa le go ba kolobetša. (Mat. 28:19) O re laetše le gore re ratane. (Joh. 13:35) Jehofa o amogela bao ba latelago melao ya gagwe gore e be karolo ya lapa la gagwe le legolo.—Ps. 15:1, 2.

14. Re ka bontšha ba bangwe bjang gore re a ba rata? (Mateo 9:36-38; Baroma 12:10)

¹⁴ Rata ba bangwe. Seka se segolo kudu sa Jehofa ke lerato. (1 Joh. 4:8) Jehofa o bontšhitše gore o a re rata le pele re ka mo tseba. (1 Joh. 4:9, 10) Ge re bontšha ba bangwe gore re a ba rata, re tla ba re bontšha gore re a mo ekiša. (Baef. 5:1) Tsela e nngwe e kaone yeo re ka bontšhago gore re rata batho ba bangwe ke ka go ba thuša go ithuta ka Jehofa go sa na le nako. (Bala Mateo 9:36-38.) Ge re ba ruta, ba tla kgona go bona gore ba swanetše go dira eng gore ba be karolo ya lapa la Modimo. Ka morago ga gore motho yo re ithutago le yena Beibele a kolobetšwe, re swanetše go tšwela pele re mo rata le go mo hlompha. (1 Joh. 4:20, 21) Re ka dira seo bjang? Re ka leka go mmontšha gore re a mo tshepa. Ka mohlala, ge e ba a dirile selo se itšego ga se ra swanela go phetha ka gore o dirile seo gore a ikhole. Go e na le moo re swanetše go mo hlompha gomme re tšee gore o re feta ka bogolo.—Bala Baroma 12:10; Bafil. 2:3.

15. Ke bomang bao re swanetšego go ba bontšha kgaugelo le botho?

¹⁵ Bontšha batho ka moka kgaugelo le botho. Ge e ba re nyaka go ba karolo ya lapa la Jehofa go ya go ile, re swanetše go diriša seo re ithutago sona ka Beibeleng. Ka mohlala, Jesu o re rutile gore re swanetše go bontšha batho ka moka kgaugelo le botho, go akaretša le manaba a rena. (Luka 6:32-36) Eupša ka dinako tše dingwe re ka hwetša go le thata go dira se. Ge e ba re ikwa bjalo, re swanetše go ithuta go nagana le go dira dilo go swana le Jesu. Ge re dira sohle seo re ka se kgonago go kwa Jehofa le go ekiša Jesu, re tla be re bontšha Tatago rena wa legodimong gore re nyaka go ba karolo ya lapa la gagwe go ya go ile.

16. Re ka dira’ng gore re se ke ra senya leina le lebotse la lapa la Jehofa?

¹⁶ Šireletša leina le lebotse la lapa la Jehofa. Gantši ka lapeng ngwana yo monyenyane o ekiša yo mogolo. Ge e ba ngwana yo mogolo a diriša seo a ithutago sona ka Beibeleng, o tlo beela yo monyenyane mohlala o mobotse. Eupša ge e ba ngwana yoo yo mogolo a ka kgetha go dira dilo tše mpe, le yo monyenyane a ka lekega go mo latela. Le ka lapeng la Jehofa go bjalo. Ge e ba Mokriste yo a bego a botega a ka thoma go ba mohlanogi le go dira dilo tšeo Modimo a sa di amogelego, a ka dira gore ba bangwe ka phuthegong ba mo latele. Yena le bao ba kgethago go mo latela ba tlo senya leina le lebotse la lapa la Jehofa. (1 Bathes. 4:3-8) Ga se ra swanela go latela mehlala e mebe le go dira selo le ge e le sefe seo se ka dirago gore re se ke ra ba karolo ya lapa la Tatago rena wa legodimong.

17. Ke dilo dife tšeo re sa swanelago go nagana ka tšona, gona ka baka la’ng?

¹⁷ Tshepa Jehofa go e na le go tshepa mahumo. Jehofa o re tshepišitše gore o tla re fa dijo, diaparo le madulo ge e ba re etiša Mmušo wa gagwe pele le go kwa melao ya gagwe. (Ps. 55:22; Mat. 6:33) Ge e ba re tshepa gore o tlo re direla dilo tše, re ka se nagane gore mahumo a lefase le a tlo re šireletša le go dira gore re thabe. Re a tseba gore selo seo se ka re thušago go ba le khutšo ya nnete ke go dira thato ya Jehofa. (Bafil. 4:6, 7) Le ge re ka ba le tšhelete ya go reka dilo tše dintši, re swanetše go ipotšiša  gore: Na ka nnete re na le nako goba matla a go diriša dilo tšeo le go di hlokomela? Le gona re ipotšiše le gore, na dilo tšeo re nago le tšona di swanetše go tla pele maphelong a rena? Re swanetše go gopola gore Modimo o re file mošomo woo re swanetšego go o dira ka lapeng la gagwe. Seo se ra gore ga se ra swanela go dumelela selo le ge e le sefe se re šitiša. Ruri ga re nyake go swana le lesogana leo le bego le rata dilo tša lona kudu moo le ilego la fetwa ke sebaka sa gore le hlankele Jehofa le tokelo ya gore Jehofa a tle a le dire yo mongwe wa barwa ba gagwe!—Mar. 10:17-22.

18. Batho bao ba kwago Jehofa ba tla ba le tokelo efe e kgolo, gona ke ditšhegofatšo dife tšeo ba tlago go di thabela go ya go ile?

¹⁸ Batho bao ba kwago Jehofa ba tla ba le tokelo e kgolokgolo ya go mo rata le go mo hlankela go ya go ile. Bao ba nago le tokelo ya go tlo phela ka mo go sa felego mo lefaseng, ba tla thabela go hlokomela lefase le le lebotse leo Jehofa a le diretšego batho. Kgauswinyane ge Mmušo wa Modimo o tla be o buša, lefase le dilo ka moka tše di lego go lona di tlo fetoga tše difsa. Jesu o tlo rarolla mathata ka moka ao a bakilwego ke phetho ya Adama le Efa ge ba be ba kgetha go se sa ba karolo ya lapa la Modimo. Jehofa o tlo tsoša batho ba bantšintši bahung, le go ba nea sebaka sa go tlo phela gabotse lefaseng leo le tla bego le fetogile paradeise. (Luka 23:42, 43) Ge mafelelong batho bao e lego karolo ya lapa la Jehofa ba phethagetše, yo mongwe le yo mongwe wa bona o tla bonagatša “letago le botse” tšeo Dafida a ilego a ngwala ka tšona.—Ps. 8:5.

19. Ke’ng seo re swanetšego go dula re se gopola?

¹⁹ Ge e ba o le karolo ya “lešaba le legolo,” o na le kholofelo e kgahlišago kudu. Modimo o a go rata e bile o nyaka gore o be karolo ya lapa la gagwe. Ka gona dira sohle seo o ka se kgonago go mo thabiša. Letšatši le lengwe le le lengwe, dula o gopola ka kholofetšo yeo Modimo a go neilego yona. Bontšha Tatago wa legodimong gore o leboga tokelo yeo a go neilego yona ya go mo hlankela le kholofelo yeo o nago le yona ya go tlo mo tumiša go ya go ile!