1. Nitubaasa kwebuuza bibuuzo ki twateekateeka aha bintu byona ebi Yehova yaahangire?

TWATEEKATEEKA ahari byona ebi Yehova yaahangire, nitubaasa kwehurira nka Daudi omuhandiiki wa Zaaburi owaashabire ati: ‘Ku ndikuteekateeka aha iguru ryawe eri waahangire n’engaro zaawe, okwezi n’enyonyoozi ebi waataireho, omuntu ni kintu ki iwe kumwijuka? Nari shi omwana w’omuntu iwe” okumureeberera? (Zab. 8:3, 4) Naitwe nka Daudi, nitubaasa kwereeba nka bakye munonga twayegyeragyeranisa n’ebindi ebi Yehova yaahangire, reero kitutangaaze kureeba ngu Yehova naatufaho. Kwonka nk’oku turikuza kureeba, Yehova akaba naafayo aha bantu b’okubanza Adamu na Haawa, kandi bakaba bari omu ka ye.

2. Yehova akaba naayenda ngu abaana be ab’okubanza bakore ki?

² Adamu na Haawa nibo baabaire bari abaana ba Yehova ab’okubanza omu nsi, kandi akaba ari Ishebo ow’omu iguru. Akaba abainemu amatsiko g’okukanyisa oruzaaro. Akabagira ati: “Muzaare, mukanye, mwijure ensi, ebe eyaanyu” mugireeberere. (Kut. 1:28) Akaba naayenda ngu bazaare abaana kandi bareeberere eka yaabo ey’omu nsi. Ku ogire ngu Adamu na Haawa bakakora ebirikuhikaana n’ekigyendererwa kya Yehova, bakaba nibaija kuguma bari omu ka ya Yehova n’oruzaaro rwabo.

3. Ahabw’enki turikubaasa kugira ngu Yehova akaha Adamu na Haawa omwanya gw’ekitiinisa omu ka ye?

³ Adamu na Haawa bakaba baine omwanya gw’ekitiinisa omu ka ya Yehova. Nk’oku kiri omu Zaaburi 8:5, Daudi akagamba aha ku Yehova yaahangire omuntu ati: “Okamuhanga yaaburaho kakye kwingana na [baamaraika], waamujweka ekirunga  ky’ekitiinisa n’okuhimbisibwa.” N’amazima, abantu tibaine amaani, okwetegyereza, n’okubaasa nk’okwa baamaraika. (Zab. 103:20) Kwonka, ‘nibaburaho kakye kwingana’ na baamaraika b’amaani abo. Teekateeka ahari ekyo! Yehova buzima abazaire baitu ab’okubanza akabaha entandikiriro nungi!

4. Adamu na Haawa bakatwara bata omwanya gwabo omu ka ya Yehova, kandi nituza kwega ki omu kicweka eki?

 ⁴ Eky’obusaasi, Adamu na Haawa bakafeerwa omwanya gwabo omu ka ya Yehova. Eki kikarugiramu oruzaaro rwabo oburemeezi, nk’oku turikuza kureeba omu kicweka eky’omu maisho. Kwonka ekigyendererwa kya Yehova tikirahindukire. Naayenda ngu abantu abarikumworobera bagume bari abaana be ebiro byona. Ka tubanze tureebe oku Yehova ayorekire ngu turi ab’ekitiinisa. Bwanyima nituza kushwijuma eki turikubaasa kukora hati kworeka ngu nitwenda kuba bamwe aha b’eka ya Ruhanga. Aha muheru, nituza kureeba emigisha ei Yehova arikwenda ngu abaana be ab’omu nsi beesiimiremu ebiro byona.

5. Nitubaasa kuha tuta Ruhanga ekitiinisa ahabw’okutuhanga omu kishushani kye?

⁵ Yehova akatuha ekitiinisa arikutuhanga omu kishushani kye. (Kut. 1:26, 27) Ahabw’okugira ngu tuhangirwe omu kishushani kya Ruhanga, twine emitwarize erikushushana n’eye, nka rukundo, esaasi, obwesigwa, n’okuhikiirira. (Zab. 86:15; 145:17) Twagira emitwarize nk’egyo, nituha Yehova ekitiinisa, kandi tworeka ngu nitumusiima. (1 Pet. 1:14-16) Twatwaza omu muringo ogurikushemeza Tataitwe ow’omu iguru, nitugira okushemererwa n’okumarwa. Kandi ahabw’okugira ngu Yehova akatuhanga omu kishushani kye, nitubaasa kugira emitwarize ei arikwenda ngu ab’eka ye bagire.

6. Yehova akaha ata abantu ekitiinisa obu yaabaire naatebeekanisa ensi?

⁶ Yehova akatutebeekanisiza eka y’omutaano. Ira munonga Yehova akatebeekanisa ensi, atakahangire omuntu w’okubanza. (Yob. 38:4-6; Yer. 10:12) Ahabw’okugira ngu Yehova naafayo kandi n’efura, akatuhangira ebintu birungi bingi kugira ngu tubyesiimiremu. (Zab. 104:14, 15, 24) Obumwe akaba areeba ebi yaaheza kuhanga, kandi areeba “biri birungi munonga.” (Kut. 1:10, 12, 31) Akaha abantu ekitiinisa ‘arikubategyekyesa’ ebintu birungi byona ebi yaahangire omu nsi. (Zab. 8:6) Ruhanga naayenda ngu abantu abahikiriire bagire bashemererwe ebiro byona barikureeberera ebihangirwe ebi byona nyamurungi. Mbwenu shi nookira kwebaza Yehova ahabw’okuraganisa kw’omuhendo oku?

7. Ebiri omu Yoshua 24:15 nibyoreka bita ngu omuntu aine obugabe bw’okwecweramu?

⁷ Yehova akatuha ekiconco ky’okwecweramu. Nitubaasa kucwamu eki turikwenda kukora. (Shoma Yoshua 24:15.) Okubaasa kw’okucwamu nikwetwa obugabe bw’okwecweramu. Tataitwe owa rukundo naashemererwa twacwamu kumuheereza. (Zab. 84:11; Enf. 27:11) Nitubaasa kukoresa obugabe bwaitu bw’okwecweramu omu miringo mingi. Teekateeka aha ky’okureeberaho kimwe oku Yesu yaakoreise obugabe bwe obw’okwecweramu.

8. Ni muringo ki gumwe ogu Yesu yaakoreisemu obugabe bwe bw’okucwamu?

⁸ Turikutooreza Yesu, nitubaasa kucwamu kwebembeza eby’abandi omu mwanya gw’ebyaitu. Izooba rimwe obu Yesu n’entumwa ze baabaire baruhire munonga, bakaza omu mwanya ogwehereire kuhuumuraho. Kwonka tibarabaasize kuhuumura. Abantu baingi bakabashangayo, barikwenda ngu Yesu abeegyese. Kwonka eki tikiragwisize kubi Yesu. Kureka, akabagirira esaasi. Mbwenu shi akakora ki?  ‘Akatandika kubeegyesa bingi.’ (Mak. 6:30-34) Twatooreza Yesu turikukoresa obwire bwaitu n’amaani gaitu kuhwera abandi, nituhimbisisa Tataitwe ow’omu iguru. (Mat. 5:14-16) Kandi nitworeka Yehova ngu nitwenda kuba bamwe aha b’eka ye.

9. Niki eki abazaire baine kuguma nibaijuka?

⁹ Yehova akaha abantu obugabe bw’okuzaara abaana, n’obujunaanizibwa bw’okubeegyesa kumukunda n’okumuheereza. Ku oraabe ori omuzaire, noosiima ekiconco ky’omutaano eki? N’obu Yehova araabe yaahaire baamaraika okubaasa kw’omutaano, beitu tarabahaire omugisha gw’okuzaara. Abaine abaana baijuka ekyo, nibatwara omugisha gwabo gw’okworora abaana nk’ogw’omuhendo. Abazaire bahairwe obujunaanizibwa bw’omuhendo obw’okworora abaana baabo omu kuhana n’okutendeka kwa Yehova. (Efe. 6:4; Bir. 6:5-7; Zab. 127:3) Ekibiina kya Ruhanga kubaasa kuhwera abazaire, kishohoize ebintu bingi ebirikwegamira ahari Baibuli, nk’ebitabo, vidiyo, ebyeshongoro, n’ebicweka by’aha mukura. Buzima, Tataitwe ow’omu iguru n’Omwana we nibakunda abaana baitu. (Luk. 18:15-17) Abazaire baayesiga Yehova bakateeraho nk’oku barikubaasa kureeberera abaana baabo ab’omuhendo, Yehova naashemererwa. Kandi abazaire abo nibaha abaana baabo amatsiko g’okwija kuba omu ka ya Yehova ebiro byona!

10-11. Yehova atubaasiise kutunga mugisha ki ahabw’ekitambo?

¹⁰ Yehova akahayo Omwana we ow’omuhendo kugira ngu tugarukye tube omu ka ye. Nk’oku kirikworekwa omu  kacweka 4, Adamu na Haawa bakafeerwa omwanya gwabo omu ka ya Yehova, kandi bakagufeerereza n’abaana baabo. (Rom. 5:12) Adamu na Haawa bakagomera Ruhanga nkana, n’ahabw’ekyo bakaba bahikire kutabarwa nk’abaana b’eka ye. Kandi shi oruzaaro rwabo? Omu muringo gwa rukundo Yehova akataho entebeekanisa kugira ngu abaana baabo abeesigwa bagarurwe omu ka ye. Eki akakikora kurabira omu kitambo ky’Omwana we omwe wenka ou yaayehangiire, Yesu Kristo. (Yoh. 3:16; Rom. 5:19) Ahabw’ekitambo kya Yesu, abantu 144,000 abeesigwa, Ruhanga naabaakiira nk’abaana be.​—Rom. 8:15-17; Kush. 14:1.

¹¹ Kandi, obutabarwa bw’abantu nibakora ebi Ruhanga arikukunda omu bwesigwa. Kandi baine amatsiko g’okwija kuba omu ka ya Ruhanga bwanyima y’okugyezibwa okurikuhererukayo aha muheru y’Obutegyeki obw’Emyaka Rukumi. (Zab. 25:14; Rom. 8:20, 21) Twine amatsiko ago, nangwa na hati nitweta Yehova “Tataitwe.” (Mat. 6:9) N’abaraazoorwe nibaija kuheebwa omugisha gw’okwega ebi Yehova arikwenda ngu bakore. Kandi abaraacwemu kumworobera, nabo nibaija kurugaho nibeegaita aha ka ye.

12. Nituza kugarukamu kibuuzo ki?

¹² Nk’oku twaheza kureeba, Yehova yaakozire bingi kworeka ngu naaha abantu ekitiinisa. Yaaherize kwakiira entoore kuba abaana be, kandi ahaire abantu nyamwingi amatsiko g’okuba abaana be omu bwijwire omu nsi ensya. (Kush. 7:9) Nitubaasa kukora ki hati kworeka ngu nitwenda kuba bamwe aha b’eka ya Yehova ebiro byona?

13. Nitubaasa kukora ki kuba bamwe aha b’eka ya Ruhanga? (Mako 12:30)

¹³ Yoreka ngu nookunda Yehova orikumuheereza n’omutima gwawe gwona. (Shoma Mako 12:30.) Omu bintu byona ebi Ruhanga atuhaire, ekirikubaasa kuba nikikira byona n’ekiconco ky’okumuramya. Nitworeka  ngu nitukunda Yehova ‘turikworobera ebiragiro bye.’ (1 Yoh. 5:3) Kimwe aha biragiro ebi Yehova arikwenda ngu tworobere, n’eki Yesu yaatuhaire eky’okuhindura abantu abeegi, n’okubabatiza. (Mat. 28:19) Kandi Yesu akatuha n’ekiragiro ky’okukundana. (Yoh. 13:35) Abarikworobera Yehova hati naija kubataatsya omu ka ye ey’abarikumuramya omu nsi yoona.​—Zab. 15:1, 2.

14. Nitubaasa kworeka tuta ngu nitukunda abandi? (Matayo 9:36-38; Abarooma 12:10)

¹⁴ Kunda abandi. Rukundo nigwo mutwarize gwa Yehova omukuru. (1 Yoh. 4:8) Yehova akooreka ngu naatukunda n’okumumanya tutakamumanyire. (1 Yoh. 4:9, 10) Nitumutooreza twayoreka ngu nitukunda abandi. (Efe. 5:1) Gumwe aha miringo mirungi ey’okworeka ngu nitukunda abantu n’okubahwera kwega ebirikukwata ahari Yehova hakiriyo obwire. (Shoma Matayo 9:36-38.) Omu kukora tutyo, nitubahwera kugira amatsiko g’okuba omu ka ya Ruhanga. Bwanyima y’omuntu kubatizibwa, twine kugumizamu nitumukunda kandi nitumuha ekitiinisa. (1 Yoh. 4:20, 21) Eki nikitwariramu ki? Kimwe aharibyo, n’okwetantara kumubangaanisaho kyaba nikibaasika. Nk’eky’okureeberaho, yaakora ekintu titurikwija kuteekateeka ngu yaakikora ahabw’okweyendeza. Omu mwanya gw’ekyo, nituha ow’eishe-emwe ekitiinisa, turikumutwara nk’orikutukira.​—Shoma Abarooma 12:10; Fil. 2:3.

15. Ni baahi abu twine kugirira embabazi n’esaasi?

¹⁵ Girira abantu boona embabazi n’esaasi. Twaba nitwenda kuba bamwe aha bahikire kweta Yehova Ishebo ebiro byona, twine kugyendera aha biri omu Kigambo kya Ruhanga. Nk’eky’okureeberaho, Yesu akeegyesa ngu twine kugirira abantu boona embabazi n’esaasi, nangwa n’abazigu baitu. (Luk. 6:32-36) Obumwe eki nikitugumira kukikora. Kyaba nikwo kiri, twine kwega kuteekateeka nka Yesu n’okutwaza nkawe. Twateeraho kworobera Yehova n’okutooreza Yesu, nitwija kworeka Tataitwe ow’omu iguru ngu nitwenda kuba bamwe aha b’eka ye ebiro byona.

16. Nitubaasa kurinda tuta eiziina ry’eka ya Yehova?

¹⁶ Rinda eiziina ry’eka ya Yehova. Omu ka eya butoosha, aboojo bato nibakira kutooreza bakuru baabo. Omwojo omukuru yaagyendera aha misingye ya Baibuli, naateeraho omurumuna eky’eky’okureeberaho kirungi. Kwonka omukuru yaakora ebitahikire, n’omurumuna naabaasa kumutooreza ahabw’okutaho eky’okureeberaho kibi. Nikyo kimwe n’eka ya Yehova. Omukristaayo omwesigwa bwanyima yaayehagura aha mazima, nari akacwamu kuguma naakora ebihagaro, abandi nibabaasa kumwegaitaho omu kukora ebibi. Abo abarikukora batyo nibashiisha eiziina ry’ab’eka ya Yehova abarikumuramya. (1 Tes. 4:3-8) Twine kwetantara kutooreza eby’okureeberaho ebibi, twangye n’okwikiriza ekintu kyona kutwiriza hare na Tataitwe ow’omu iguru owa rukundo.

17. Ni miteekateekyere ki ei twine kwetantara, kandi ahabw’enki?

¹⁷ Yesigye Yehova omu mwanya gw’eby’obugaiga. Yehova naaturaganisa kutuha eby’okurya, eby’okujwara, n’oburaaro twayebembeza Obukama bwe n’emitindo ye ehikiriire. (Zab. 55:22; Mat. 6:33) Twine ekyo omu biteekateeko, nitwetantara kuteekateeka ngu eby’obugaiga by’ensi egi nibituha oburinzi n’okushemererwa okw’obutwire. Nitumanya ngu omuringo gwonka ogu turikubaasa kutungamu obusingye obwabuzima, n’okukora ebi Yehova arikukunda. (Fil. 4:6, 7) Nangwa n’obu twakuba nitubaasa kugura ebintu bingi, twine kuteekateeka yaaba buzima twine  obwire nari amaani g’okubireeberera. Mbwenu shi torikubaasa kushanga otaire munonga omutima aha bintu ebyo? Ijuka ngu Ruhanga atwinemu amatsiko g’okuba abakozi abeeziriki omu ka ye. Eki nikimanyisa ngu titwine kwikiriza ekintu kyona kutuhuzya. Buzima titurikwenda kuba nk’omutsigazi owaayangire omugisha gw’okuheereza Yehova n’okuba omwe aha baana be ahabw’okuhamira aha bintu bikye eby’omu nsi!​—Mak. 10:17-22.

18. Ni kitiinisa ki eky’amaani n’emigisha ei abeesigwa baraayesiimiremu ebiro byona?

¹⁸ Abantu abarikworoba nibaija kugira ekitiinisa ekirikukirirayo kimwe, nigwo omugisha gw’okukunda Yehova n’okumuheereza ebiro byona! Abaine amatsiko g’okutuura omu nsi ebiro byona nibaija kwesiima kureeberera ensi ei Yehova yaatebeekaniise gye kuba eka yaabo. Juba Obukama bwa Ruhanga ku buraabe nibutegyeka, ebiine amagara byona nibiija kugarurwa busya. Yesu naija kwihaho embeera mbi ezaareetsirweho Adamu na Haawa obu baacwamu kuruga omu ka ya Ruhanga. Yehova naija kuzoora obukaikuru bw’abantu abahe omugisha gw’okutuuraho ebiro byona omu nsi eraabe ehindwirwe paradiso baine amagara agahikiriire. (Luk. 23:42, 43) Abarikuramya Yehova omu ka ye ey’omu nsi ku baraabe abahikiriire, buri omwe naija kugira ‘ekitiinisa n’okuhimbisibwa’ ebi Daudi yaagambireho.​—Zab. 8:5.

19. Tushemereire kuguma nitwija ki?

¹⁹ Ku oraabe ori omwe aha bantu nyamwingi, oine amatsiko g’omuhendo. Ruhanga naakukunda, kandi naayenda ngu obe omwe aha b’eka ye. N’ahabw’ekyo kora kyona ekirikubaasika kumushemeza. Buri izooba guma nooteekateeka aha biraganiso bya Ruhanga, kandi obite omu mutima gwawe. Twara omugisha gwawe gw’okuramya Tataitwe ow’omu iguru nk’ogw’omuhendo, kandi yesiimire omu matsiko gaawe ag’okumuhimbisa ebiro byona!