1. Waut wunda wie veleicht, wan wie äwa aul daut nodenkjen, waut Jehova jemoakt haft?

WAN wie äwa aul daut nodenkjen, waut Jehova jemoakt haft, dan jeit ons daut veleicht soo aus dän Psalmenschriewa David, waut en een Jebäd säd: “Wan ekj dän Himmel see, dän diene Finjasch jemoakt haben, un de Mon un de Stierns, dee du häajestalt hast, waut es een Mensch, daut du aun am denkjst, een Menschenkjint, daut du die daut aunnemst?” (Psa. 8:4-5). Veleicht denkj wie krakjt soo aus David, daut wie mau sea kjlien sent em Vejlikj met aul de Stierns, waut Jehova jemoakt haft. Un woomäajlich wunda wie dan, wuarom Jehova verheipts aun ons denkjt. Oba soo aus wie seenen woaren, docht Jehova nich bloos aun de ieeschte Menschen Adam un Eva, oba dee kunnen mau rajcht to siene Famielje jehieren.

2. Waut vonne Oppgow jeef Jehova Adam un Eva?

² Adam un Eva wieren Jehova siene ieeschte Kjinja hia oppe Ieed un hee wia dee äa leeftolja himlischa Voda. Hee jeef an uk eene Oppgow en siene Famielje un säd: “Mucht jie Kjinja haben un junt äwa de gaunze Ieed vemieren, un äwa de Ieed rejieren” (1. Mo. 1:28). Adam un Eva sullen Kjinja haben un fein no de Ieed oppaussen. Wan dee jehuarsom jewast wieren un daut jedonen hauden, waut Jehova von an haben wull, dan hauden dee un äare Kjinja fa emma kunt to Gott siene Famielje jehieren.

3. Wuarom kjenn wie sajen, daut Adam un Eva en Jehova siene Famielje väl wieet wieren?

³ Adam un Eva wieren väl wieet en Jehova siene Famielje. En Psalm 8:6 räd David doavon, woo Jehova dän Mensch muak, un säd: “Du hast am nich väl weinja aus Gott jemoakt  [ooda aus “de Enjel”, NW, Fn.], un hast am met Iea un Harlichkjeit jekjreent.” De Enjel sent stoakja un kjlieekja aus de Menschen un vestonen sikj uk met mea (Psa. 103:20). Un doch haft Jehova de Menschen Iea un Harlichkjeit jejäft. Daut es schia nich to jleewen, waut fa een wundascheenet Läwen Jehova de ieeschte Menschen jeef!

4. Waut wort met Adam un Eva, wäajen dee ojjehuarsom wieren, un waut woa wie en disen Artikjel seenen?

 ⁴ Daut es schod, daut Adam un Eva Jehova ojjehuarsom wieren un nich mea to siene Famielje jehieren kunnen. Daut brocht uk väl Schoden äwa äare Nokomen, soo aus wie lota en disen Artikjel noch seenen woaren. Oba daut, waut Jehova sikj väajenomen haft, haft sikj nich jeendat. Hee well noch emma, daut jehuarsome Menschen fa emma siene Kjinja sennen kjennen. Nu well wie mol seenen, woo Jehova jewäsen haft, daut hee ons väl räakjent. Dan woa wie doavon räden, woo wie nu aul wiesen kjennen, daut wie to siene Famielje jehieren wellen, un met waut Jehova siene Kjinja hia oppe Ieed fa emma säajnen woat.

5. Woo kjenn wie wiesen, daut wie Gott dankboa sent, daut hee ons en sien Bilt jemoakt haft?

⁵Wiels Jehova ons väl räakjent, muak hee ons soo, daut wie am likjnen (1. Mo. 1:26-27). Wäajen wie en Gott sien Bilt jemoakt sent, kjenn wie siene wundascheene Ieejenschoften nodoonen. Wie kjennen aundre biejlikj Leew un Metleet wiesen un tru un jerajcht sennen (Psa. 86:15; 145:17). Wan wie daut doonen, dan iea wie Jehova un bewiesen, daut wie am dankboa sent (1. Pet. 1:14-16). Wan wie ons soo benämen, aus ons himlischa Voda daut haben well, dan sent wie schaftich un tofräd. Un wiels Jehova ons en sien Bilt jemoakt haft, kjenn wie daut lieren, soone Menschen to woaren, aus hee en siene Famielje haben well.

6. Woo wees Jehova, daut hee de Menschen väl räakjend, aus hee de Ieed muak?

⁶Jehova muak een feinet Tus fa ons reed. Lang ea Jehova de ieeschte Menschen muak, muak hee de Ieed fa de Menschen reed (Hiob 38:4-6; Jer. 10:12). Wiels Jehova soo derchjedocht un friejäwrich es, muak hee äwajenuach scheene Sachen, wua wie Freid aun haben kjennen (Psa. 104:14-15, 24). Eenjemol docht hee äwa aul daut no, waut hee jemoakt haud, un “sach daut daut goot wia” (1. Mo. 1:10, 12, 31). Hee ieed de Menschen doaderch, daut hee an äwa aul daut aunstald, waut hee oppe Ieed jemoakt haud (Psa. 8:7). Jehova haft sikj väajenomen, daut volkomne Menschen noch mol fa emma de Freid haben kjennen, sikj om aul daut scheene to kjemren, waut hee jemoakt haft. Dankst du am pinkjlich fa dit wundascheene Vespräakjen?

7. Woo wiest Josua 24:15, daut de Menschen eenen frieen Wellen haben?

⁷Jehova haft ons de Frieheit jejäft selfst to entscheiden. Daut nant eena dän frieen Wellen. Wie kjennen ons utläsen, waut wie en ons Läwen doonen wellen (läs Josua 24:15). Ons leeftolja Gott freit sikj, wan wie ons entscheiden am to deenen (Psa. 84:12; Spr. 27:11). Wie kjennen onsen frieen Wellen brucken, om väl veschiednet to entscheiden. See wie mol, woo Jesus sienen frieen Wellen brukt.

8. Woo brukt Jesus sienen frieen Wellen? Jeff een Biespel.

⁸ Jesus wia dolla om aundre bekjemmat aus om sikj selfst un wie kjennen am nodoonen. Opp eene Sauz wieren hee un de Apostel sea meed un reisden no eene ruje Städ, wua dee sikj vereiwen wullen. Oba daut schauft nich. Eene groote Häad Menschen fungen an un wullen waut von Jesus  lieren. Oba Jesus wort nich doll. Enne Städ daut jaumad am daut äwa de Menschen. “Un soo funk hee wada aun, an to lieren” (Mar. 6:30-34). Wan wie Jesus nodoonen un onse Tiet un Krauft wellich brucken, om aundre to halpen, dan iea wie onsen himlischen Voda (Mat. 5:14-16). Un wie wiesen am uk, daut wie to siene Famielje jehieren wellen.

9. Waut sellen de Elren em Denkj hoolen?

⁹Jehova haft de Menschen soo jemoakt, daut dee Kjinja haben kjennen, un haft an de Oppgow jejäft, de Kjinja to lieren, daut dee am leewen un deenen sellen. Wan jie Kjinja haben, sent jie dan dankboa doafäa? Jehova haft de Enjel sea jesäajent, oba dee kjennen nich Kjinja haben. Doawäajen sellen dee, waut Elren sent, daut sea schazen. Waut vonne wichtje Oppgow haft Jehova de Elren jejäft? De Schreft sajcht: “Trakjt dee christlich opp un doot dee em christlichen Senn trajchtwiesen” (Efs. 6:4; 5. Mo. 6:5-7; Psa. 127:3). Jehova siene Organisazion haft väl rutjejäft, om de Elren to halpen, biejlikj biblische Bieekja, Videos, Leeda un Artikjels em Internet. Daut wiest, daut ons himlischa Voda un sien Sän de junge Menschen väl räakjnen (Luk. 18:15-17). Wan de Elren sikj opp Jehova veloten un äa bastet doonen, om no äare wieetvolle Kjinja opptopaussen, dan es Jehova sea tofräd. Un doaderch halpen de Elren äare Kjinja uk, daut see noch mol fa emma to Jehova siene Famielje jehieren kjennen!

10-11. Waut muak Jehova derch daut Leesjelt mäajlich?

¹⁰Jehova jeef sienen leefsten Sän, daut wie noch mol wada kjennen to siene Famielje jehieren. En  Varsch 4 en disen Artikjel hab je wie jeseenen, daut Adam un Eva sindijden un nich mea Poat von Jehova siene Famielje sennen kunnen un äare Kjinja uk nich (Reem. 5:12). Adam un Eva hauden sikj daut vedeent, wiels dee Gott met Fliet ojjehuarsom wieren. Oba woo steit daut met äare Kjinja? Ut Leew kjeem Jehova doafäa opp, daut jehuarsome Menschen wada kunnen Poat von siene Famielje woaren. Hee deed daut derch daut Opfa von sienen eensjen Sän Jesus Christus (Joh. 3:16; Reem. 5:19). Wiels Jesus sien Läwen jeef, kunn Jehova 144 000 true Menschen aus siene Säns aunnämen (Reem. 8:15-17; Opb. 14:1).

¹¹ Un daut jeft noch millionende aundre, waut tru Gott sienen Wellen doonen. Dee haben de Hopninj, daut see no de latste Proow opp Enj von de dusent Joa kjennen to Gott siene Famielje jehieren (Psa. 25:14; Reem. 8:20-21). Wiels dee dise Hopninj haben, nanen dee äaren Schepfa Jehova nu aul äaren “Voda” (Mat. 6:9). Un dee, waut vom Doot oppstonen, woaren dan lieren kjennen, waut Jehova von an haben well. Wan dee daut nokomen, dan woaren dee uk kjennen Poat von siene Famielje woaren.

12. Äwa waut vonne Froag woa wie nu räden?

¹² Nu hab wie jeseenen, daut Jehova väl jedonen haft, om to wiesen, daut hee de Menschen väl räakjent. De Jesaulwde haft hee aul aus siene Säns aunjenomen un dee von de groote Häad haft hee de Hopninj jejäft, daut see en de niee Welt kjennen siene Kjinja sennen (Opb. 7:9). Woo kjenn wie Jehova nu aul wiesen, daut wie fa emma to siene Famielje jehieren wellen?

13. Waut kjenn wie doonen toom fa emma Poat von Gott siene Famielje woaren? (Markus 12:30).

¹³Wies Jehova diene Leew doaderch, daut du am met dien gaunzet Hoat deenst (läs Markus 12:30). Ut Leew haft Gott ons een deel Jeschenkja jejäft un eent von daut jratste es woomäajlich, daut wie am deenen kjennen. Wie wiesen Jehova onse Leew, wan wie “siene Jebooten” hoolen (1. Joh.  5:3). Eent von siene Jebooten es, daut wie sellen Jinja moaken un dee deepen, soo aus Jesus säd (Mat. 28:19). Hee säd uk, daut wie Leew unjarenaunda haben sullen (Joh. 13:35). Deejanje, waut Jehova jehorchen, woaren to de groote Famielje äwa de gaunze Welt jehieren kjennen, waut am deenen (Psa. 15:1-2).

14. Woo kjenn wie aundre Leew wiesen? (Matäus 9:36-38; Reema 12:10).

¹⁴Wies aundre Leew. Leew es Jehova siene wichtichste Ieejenschoft (1. Joh. 4:8). Hee wees ons aul Leew, ea wia am verheipts kjanden (1. Joh. 4:9-10). Un wie kjennen am nodoonen, wan wie aundre Leew wiesen (Efs. 5:1). Daut doo wie biejlikj, wan wie de Menschen halpen Jehova kjanen to lieren, soo lang aus doa noch Tiet es (läs Matäus 9:36-38). Opp dee Wajch haben dee de Jeläajenheit to lieren, waut see doonen motten, daut see uk kjennen to Gott siene Famielje jehieren. Un wan sikj wäa deepen lat, dan sell wie dän wieda leewen un respakjten (1. Joh. 4:20-21). Woo kjenn wie daut doonen? Eent wudd biejlikj sennen, daut wie ons opp dän veloten. Wan dee dan mol waut deit, waut wie nich vestonen kjennen, dan woa wie nich fuaz denkjen, daut dee daut utem schlajchten Senn deed ooda wäajen dee ekjich wia. Enne Städ daut woa wie dän ieren un fa hecha talen aus ons selfst (läs Reema 12:10; Filip. 2:3).

15. To wäm sell wie leeftolich sennen un Metjefeel haben?

¹⁵Sie to aulem leeftolich un hab Metjefeel. Wan wie fa emma wellen to Jehova siene Famielje jehieren, dan mott wie daut doonen, waut sien Wuat sajcht. Jesus lieed biejlikj, daut wie emma sullen leeftolich sennen un met aulem Metjefeel haben, mau rajcht met onse Fiend (Luk. 6:32-36). Daut es nich emma leicht. Oba wie motten lieren, soo to denkjen un to haundlen aus Jesus. Wan wie ons bastet doonen, om Jehova to jehorchen un en Jesus siene Footspoaren to gonen, dan wies wie onsen himlischen Voda, daut wie fa emma wellen to siene Famielje jehieren.

16. Waut kjenn wie doonen, daut wie Jehova siene Famielje nich eenen schlajchten Nomen moaken?

¹⁶Moak Jehova siene Famielje nich eenen schlajchten Nomen. En eene Famielje es daut foaken soo, daut een kjliena Jung sienen elren Brooda nodeit. Wan de elra Brooda sikj no biblische Gruntsauzen recht, dan es hee een goodet Biespel fa dän jinjren. Oba wan de elra Brooda waut orrajchtet deit, dan kaun de jinjra Brooda dän uk leicht nodoonen. Biejlikj soo es daut en Jehova siene Famielje. Wan een trua Brooda vom Gloowen auffelt ooda een orreinet Läwen fieet ooda sestwaut schlajchtet deit, dan kaun daut leicht sennen, daut aundre dän nodoonen woaren. Wan dee daut doonen, dan moaken dee Jehova siene Famielje eenen schlajchten Nomen (1. Tess. 4:3-8). Wie motten oppaussen, daut wie nich schlajchte Biespels nodoonen un daut wie ons derch nuscht von onsen leeftoljen himlischen Voda aufbrinjen loten.

17. Woo sell wie nich denkjen, un wuarom nich?

¹⁷Velot die opp Jehova un nich opp tietelje Sachen. Jehova vesprakjt ons, daut wie Äten, Kjleeda un een Dak äwarem Kopp haben woaren, wan wie daut ieeschte no sien Kjennichrikj sieekjen un soo läwen, aus hee daut fa rajcht talt (Psa. 55:23; Mat. 6:33). Wan wie doaraun denkjen, dan woa wie nich jleewen, daut de tietelje Sachen, waut daut en dise Welt jeft, ons woare Sechaheit un Tofrädenheit brinjen kjennen. Wie weeten, daut wie bloos ennalich Fräd haben woaren, wan wie Jehova sienen Wellen doonen (Filip. 4:6-7). Veleicht hab wie jenuach Jelt toom ons väl kjeepen. Oba hab wie uk jenuach Tiet un Krauft toom dise Sachen  brucken un unjahoolen? Kunn wie doa met eenst too sea aun henjen? Wie motten doaraun denkjen, daut Gott väl Oabeit fa ons haft en siene Famielje. Un wie wellen ons nich doavon auflenkjen loten. Secha well wie nich soo woaren aus de rikja junga Maun, waut soo sea aun siene Sachen honk, daut hee nich Jesus nofoljen deed. Opp dee Wajch vespäld hee de Jeläajenheit Jehova to deenen un aus eent von siene Säns aunjenomen to woaren (Mar. 10:17-22).

18. Waut vonne groote Iea un waut fa goodet woaren jehuarsome Menschen fa emma beläwen kjennen?

¹⁸ De jehuarsome Menschen woaren de jratste Iea beläwen kjennen, waut daut jeft! Dee woaren Jehova fa emma leewen un deenen kjennen. Deejanje, waut dan em Paradies läwen woaren, woaren de Freid haben, sikj om de wundascheene Ieed to kjemren, waut Jehova soo fein enjerecht haft. Boolt woat Gott sien Kjennichrikj dän Ieedbaul un aules, waut doabowen es, wada en Ordninj brinjen. Jesus woat dän Schoden wada gootmoaken, waut Adam un Eva aunjerecht haben, aus dee Gott siene Famielje veleeten. Jehova woat millionende vom Doot oppwakjen, un dee woaren kjennen eewich em Paradies oppe Ieed läwen un gaunz jesunt sennen (Luk. 23:42; 23:43, NW). Wan Jehova siene Deena volkomen woaren, dan woaren dee aula de “Iea un Harlichkjeit” haben, wua David mol von schreef (Psa. 8:6).

19. Waut sell wie em Denkj hoolen?

¹⁹ Wan du to de groote Häad jehieescht, dan hast du eene wundascheene Hopninj. Gott leeft die un well, daut du to siene Famielje jehieren saust. Doo aules, waut du kaust, om am to jefaulen. Bewies jieda Dach, daut du Gott siene Vespräakjungen em Denkj helst un väl räakjenst. Sie dankboa, daut du onsen himlischen Voda deenen kaust un daut du de Hopninj hast, am noch mol fa emma to preisen!