1. Mihu itshi tuajiya gudihula gula tudi mutangigiza ima yafugile Yehowa?

TANGUA tuana tala ima yagasue yafugile Yehowa, tuana gudivua gifua muyimbi wa ngimbo Davidi. Wahudile Yehowa mu gisambu egi: ‘Tangua ngana tala dilu wafugile nu midimo ya mago aye nu mbeji nu themua walondele, mukua muthu udi nanyi hagula ulandule gumutangiza? Muene udi nanyi hagula ulandule gumubamba?’ (Ngi. 8:3, 4) Gifua Davidi, gula esue nji tuazula tangua dia gutangigiza luholo tudi tuazonda gutuama dia themua jiafugile Yehowa, mbatukotelesa egi idi diago ndaga ya gushimana luholo Yehowa wana gututangiza. Gifua luholo tuza guyimona mu longo edi, Yehowa wakhalele mubamba Adama nu Eva nu waanginyishile nji mukatshi dia fami yenji.

2. Itshi Yehowa wakhalele mutshigina egi Adama nu Eva akalagale?

² Adama nu Eva akhalele ana a thomo Yehowa wafugile ha mavu. Yehowa wakhalele Sh’awo wa guzumba mu dilu. Wakhalele mutshigina egi Adama nu Eva avuale ana ako mu fami. Waawambelele egi: ‘Vualenu ana avula, mubue nu ajigulu avula, muzalese mavu nu muahinyine.’ (Gis. 1:28) Nzambi wakhalele mutshigina egi avuale ana nu abambe mavu. Gula nga Adama nu Eva atumagele Nzambi nu akalegele ndaga jiaatogele muene nga ene nu ajigulu asalele mu fami ya Nzambi mayilago.

3. Mukunda natshi tudi muzuela egi Yehowa wahanele Adama nu Eva fundo dia ndando mu fami yenji?

³ Adama nu Eva akhalele nu fundo dia ndando mu fami ya Yehowa. Mu mukanda wa Ngimbo 8:5 Davidi udi muzuelela luholo  Yehowa wafugile muthu egi: ‘Wamufugilego nu ngolo jia luholo lumoshi nu anjelo, wamusudigishile gipho gia lutumbu nu ginemua.’ Yadiago Yehowa wafugilego athu nu ngolo nu ndunge jia luholo lumoshi nu anjelo. (Ngi. 103:20) Tangiza gale! Athu ana khala ndo nu ‘ngolo jia luholo lumoshi’ nu anjelo, uvi tangua Yehowa wafugile mvuaji jietu jia thomo, waahanele luendu lua gukhala nu gusuanguluga mu monyo wawo.

4. Ndaga itshi yabuidile Adama nu Eva? Itshi tuza muzuelela mu longo edi?

 ⁴ Ndaga ya gikenene idi egi Adama nu Eva atotesele fundo diawo mu fami ya Yehowa. Gifua luholo tuza guyimona mu longo edi, ndaga yene yabatele malamba avula gudi ajigulu awo. Uvi Yehowa wasombegelego felela dienji. Wana tshigina egi athu ana gumutumagela akhale an’enji mayilago. Henyaha tuzuelelenu thomo luholo Yehowa wamonesele egi wana gutuzula nu ndando. Gungima tuza mumona ndaga tuajiya gukalagala ha gumonesa egi tudi mutshigina gukhala mu fami ya Nzambi. Tuza nji mumona gubonga ana a Yehowa mbaaheta ha mavu mayilago.

5. Luholo lutshi tuajiya gumonesa egi tuana hana Nzambi mersi luholo watufugile mu gifuanesa gienji?

⁵ Yehowa wamonesele egi wana gutuzula nu ndando luholo watufugile mu gifuanesa gienji. (Gis. 1:26, 27) Luholo tuafugiwe mu gifuanesa gia Nzambi tuajiya gulonguga luholo lua gumonesa makalegelo enji abonga. Ha gufezegesa, tuajiya gumonesa guzumba, khenda, gujinginyina nu khadilo dia gukalagala ndaga mu luholo luabonga. (Ngi. 86:15; 145:17) Gula tuakudisa makalegela awa, mbatutumbuisa Yehowa nu mbatumonesa egi tuana gumuhana mersi. (1 Phet. 1:14-16) Tangua tuana kalagala ndaga jiana suanguluisa Sh’etu wa mu dilu, tuana khala nu gusuanguluga. Luholo Yehowa watufugile mu gifuanesa gienji, watuhanele makalegelo anyi ana gutukuatesa ha gukhala mu fami yenji.

6. Luholo lutshi Yehowa wamonesele egi wana zula athu nu ndando tangua afugile mavu?

⁶ Yehowa walondele fundo diabonga mukunda nu esue. Yehowa wadiangele gulonda mavu mukunda nu athu gutuama dia gufuga yala wa thomo. (Yobo 38:4-6; Yel. 10:12) Luholo Yehowa wana khala nu gisemo nu khadilo dia guhana, wafugile ima yavula yabonga hagula tukhale nu gusuanguluga. (Ngi. 104:14, 15, 24) Gungima dia gufuga ima yagasue, wazudile tangua dia gutangigiza mukunda nu ima yene, gungima ‘wamonele egi idi yabonga.’ (Gis. 1:10, 12, 31) Yehowa wamonesele egi wana zula athu nu ndando luholo waahanele ginemo gia ‘guhinyina ima yagasue’ yafugile muene ha mavu. (Ngi. 8:6) Felela dia Nzambi diakhala egi athu atagana akhale nu gusuanguluga ha gubamba ima yafugile muene mayilago. Wana hana Yehowa mersi tangua diagasue mukunda nu felela edi diabonga ba?

7. Luholo lutshi Yoshua 24:15 idi mumonesa egi athu ana khala nu luendu lua guditombela ndaga?

⁷ Yehowa watuhanele luendu lua guditombela ndaga. Tuajiya guditombela ndaga mbatukalagala mu monyo wetu. (Tanga Yoshua 24:15.) Nzambi wetu wa guzumba wana khala nu gusuanguluga tangua tuana tomba ha gumukalegela. (Ngi. 84:11; Ish. 27:11) Tuajiya gukalegela luendu luetu lua guditombela ndaga ha guzula ba desizio avula abonga. Tutadilenu gale gifezegeselo gia Yesu.

8. Hana gifezegeselo gimoshi gidi mumonesa luholo Yesu wakalegele luendu luenji lua guditombela ndaga?

⁸ Tuajiya gulandula gifezegeselo gia Yesu gula tudi mutomba ha guhaga gubonga gua athu ako ha fundo dia thomo. Lusugu lumoshi, Yesu nu alandudi’enji akhalele aguhuila akambele fundo diabonga  hagula ajiya guhuluguga. Uvi ahulugugile ndo handaga athu avula ajile guasanga, akhalele mutshigina egi Yesu a alongese. Yesu waavuidilego khabu, uvi waavuidile khenda. Na ndaga itshi Yesu watshitshile giwa? ‘Wasendesele gualongesa ndaga jiavula.’ (Mako 6:30-34) Tuana tumbuisa Sh’etu wa mu dilu tangua tuana landula gifezegeselo gia Yesu gia gukalegela tangua nu ngolo jietu ha gukuatesa athu ako. (Mat. 5:14-16) Tuana monesa nji Yehowa egi tudi mutshigina gukhala mu fami yenji.

9. Kado tshi ga ndando Yehowa wahanele athu?

⁹ Yehowa wahanele athu luendu lua guvuala ana nu ginemo gia gualongesa ha gumuzumba nu ha gumukombelela. Gula udi mvuaji wana suanguluga nu kado gaga ga ndando ba? Yehowa wahanele anjelo ndunge jiavula jia gushimana, uvi waahanelego luendu lua guvuala ana. Hene gula udi mvuaji, suanguluga nu luendu lua guhanewe lua guvuala ana. Mvuaji jiahanewe ginemo gia ndando gia gusansa an’awo mu ‘malongo nu mu mikhuala ya Yehowa.’ (Ef. 6:4; Mikh. 6:5-7; Ngi. 127:3) Organizasio wa Yehowa wana zola ikadigilo yavula idi mukotelesa Biblia gifua mikanda, ba video, miziki nu ikadigilo iko idi mu jw.org ha gukuatesa mvuaji. Yadiago Sh’etu wa mu dilu nu Mun’enji ana zumba an’etu. (Luka 18:15-17) Yehowa wana suanguluga tangua mvuaji jiana gumushila mutshima nu luholo ana tshita ngolo ha gusansa an’awo. Mvuaji jiana tshita ngenyi jiana hana an’awo felela dia gukhala mu fami ya Yehowa mayilago!

10-11. Ndaga itshi Yehowa watukalegele mu njila ya mulambu wa Yesu?

¹⁰ Yehowa wahanele Mun’enji ana zumba muavula hagula tuajiya gukhala luko enya fami yenji. Gifua luholo tuayimonyi mu  paragrafe 4, Adama nu Eva atotesele fundo diawo nu dia an’awo mu fami ya Yehowa. (Lomo 5:12) Atombele ha gulumbugila Nzambi, hene akayewe mu fami yenji. Uvi ndaga itshi yabuidile an’awo? Yehowa wana guzumba athu, hene alondele ndaga hagula ana a Adama nu Eva anyi ana gumutumagela angine luko mu fami yenji. Watshitshile ndaga yene mu njila ya mulambu wahanele Mun’enji mumoshi wa mumoshi Yesu Klisto. (Yone 3:16; Lomo 5:19) Mu njila ya mulambu wa Yesu, Yehowa watombele athu 144 000 agujinginyina ha gubua an’enji.—Lomo 8:15-17; Yat. 14:1.

¹¹ Ba milio a athu adi agujinginyina gudi Nzambi ana kalagala gutshigina guenji. Ana khala nu felela dia gukhala mu fami yenji gungima dia gulolewa gua gisugishilo, gusuga ya ivo 1000. (Ngi. 25:14; Lomo 8:20, 21) Luholo adi nu felela dia luholo elu, ana tamega Yehowa Mufugi wawo egi ‘Tata.’ (Mat. 6:9) Athu mbaafuzumuga mbakhala nji nu luendu lua gulonguga ndaga Yehowa adi mutshigina egi akalagale. Athu anyi mbaatumagela malongo ene mbaangina nji mu fami ya Yehowa.

12. Tuza muhana mvutu gu muhu utshi?

¹² Gifua luholo tuayimonyi, Yehowa wakalegele ndaga jiavula jidi mumonesa egi wana zula athu nu ndando. Watombele Aklisto ambiwe maji mu nyuma ha gukhala an’enji. Wahanele nji ‘thundu yakoma ya athu’ felela dia gukhala an’enji mu mavu ahe-ahe. (Yat. 7:9) Ndaga tshi tudi naye gukalagala ha gumonesa Yehowa egi tudi mutshigina gukhala mu fami yenji mayilago?

13. Ndaga itshi tuajiya gutshita ha gungina mu fami ya Nzambi? (Mako 12:30)

¹³ Kalegela Yehowa nu mutshima waye wagasue ha gumonesa egi wana gumuzumba. (Tanga Mako 12:30.) Yehowa watuhanele ima  yavula diago. Mukatshi dia ima yene, tuajiya gutanga luendu luakoma lua gumukombelela. Tuana monesa egi tuana zumba Yehowa, tangua tuana ‘tumagela mikhuala yenji.’ (1 Yone 5:3) Yehowa wana tshigina egi tutumagele mukhuala watuhanele Yesu wa gubuisa athu alandudi nu guabatiza. (Mat. 28:19) Watuhanele nji mukhuala wa guzumba athu ako. (Yone 13:35) Yehowa wana mbawunginyisa athu ana gumukombelela mu fami ya akombeledi enji a ha mavu a mudidi.—Ngi. 15:1, 2.

14. Ha gutadila Matayo 9:36-38 nu Lomo 12:10, luholo lutshi tuajiya gumonesa egi tuana zumba athu ako?

¹⁴ Khala muzumba athu ako. Guzumba gudi khadilo dia thomo dia Yehowa. (1 Yone 4:8) Yehowa wadiangele gutuzumba gutuama egi tumujiye. (1 Yone 4:9, 10) Tuana landula gifezegeselo gienji tangua tuana zumba athu ako. (Ef. 5:1) Tuajiya gumonesa egi tuana zumba athu ako gula tudi gua longesa ndaga jiatadila Yehowa. (Tanga Matayo 9:36-38.) Gula tuatshita ngenyi, mbatuakuatesa ha gujiya ndaga ajiya gukalagala ha gungina mu fami ya Nzambi. Gula muthu wabatijiwa tudi naye gulandula gumuzumba nu gumunemesa. (1 Yone 4:20, 21) Luholo lushi tuajiya guyikalagala? Ndaga ya thomo idi egi tudi naye gumushila mutshima. Ha gufezegesa, gula wakalagala ndaga imoshi tushigo mukotelesa muabonga, tushigo naye gutangiza egi wayikalagala nu matangi abola. Uvi tudi naye gumonesa egi tuana zula aphangi’etu nu ndando nu guamona egi atubalega.—Tanga Lomo 12:10; Fili. 2:3.

15. Akhuatshi tudi naye guvuila khenda nu gumonesela gisemo?

¹⁵ Khala muvuila athu agasue khenda nu guamonesela gisemo. Gula tudi mutshigina gukhala mu fami ya Yehowa mayilago, tudi naye gukalegela ndaga jidi mu Mbimbi Yenji mu monyo wetu. Ha gufezegesa, Yesu walongesele egi tudi naye guvuila athu agasue khenda nu guamonesele gisemo, ikhale adi mbalagaji jietu. (Luka 6:32-36) Matangua ako tuajiya gumona egi idi lamba ha guyikalagala. Gula idi ngenyi, tudi naye gulonguga luholo tuajiya gutangiza nu gukalagala ndaga gifua Yesu. Tangua tuana tshita yagasue ha gutumagela Yehowa nu ha gulandula gifezegeselo gia Yesu, tuana monesa Sh’etu wa mu dilu egi tuana tshigina gukhala mu fami yenji mayilago.

16. Luholo lutshi tuajiya gubamba lukuma lua fami ya Yehowa?

¹⁶ Mbamba lukuma lua fami ya Yehowa. Matangua avula mu fami, galenge gana landula ndaga jiana kalagala mukulutu wenji. Gula mukulutu udi mukalegela malongo a Biblia mu monyo wenji mbawuhana galenge genji gifezegeselo giabonga gia gulandula. Uvi gula udi mukalagala ndaga jiabola, galenge genji gajiya nji gulandula gifezegeselo gienji. Idi luholo lumoshi nji mu fami ya Yehowa. Gula Muklisto mumoshi wakhalele wa gujinginyina gudi Yehowa wabua aposta nga udi mukalagala ndaga jiabola, athu ako ajiya nji gulandula gifesegeselo gienji. Athu ana kalagala ndaga jia luholo elu, ana bolesa lukuma lua fami ya akombeledi a Yehowa. (1 Tes. 4:3-8) Tudi naye gutuna gulandula ifezegeselo yabola jiajiya gututuma ha gubolesa ufuta wetu nu Sh’etu wa guzumba udi mu dilu.

17. Matangi a luholo lutshi tudi naye gutuna? Mukunda natshi?

¹⁷ Sha mutshima gudi Yehowa uvi mu ima ya gujingila ndo. Yehowa watulayele egi mbawutuhana ima ya gudia, milele nu fundo dia gubanda gula tudi muhaga Ufumu wenji ha fundo dia thomo nu gula tudi mutumagela mikhuala yenji. (Ngi. 55:22; Mat. 6:33) Gula tuashila laji edi mutshima, mbatutangizago egi ima ya gujingila ya ha mavu  awa yajiya gutubamba nga gutuhana gusuanguluga. Tudi mujiya egi tuajiya gukhala mu guhuima gua giamatshidia phamba gula tudi mukalagala gutshigina gua Yehowa. (Fili. 4:6, 7) Gula tuana kalagala ngolo ha gusumba ima yavula, tudi naye gudihula egi: Mbatukhala diago nu tangua nu ngolo jia gukalegela ima yene nu guyibamba ba? Mbayituzula tangua diavula ba? Tushigo naye gujimbila egi Nzambi watuhanele mudimo wa gukalagala mu fami yenji. Hene, tushigo naye gubemba nga gima gimoshi gituzule tangua dia gukalagala mudimo wene. Tushigo naye gukhala gifua muvuala yonu watunyile gulandula Yesu, handaga wakhalele muzumba ima ya gujingila. Watotesele luendu lua gukalegela Yehowa nu lua gukhala mukatshi dia an’enji!—Mako 10:17-22.

18. Luendu lutshi luakoma athu adi mutumagela Nzambi mbaaheta? Gubonga gutshi mbaaheta mayilago?

¹⁸ Athu ana kombelela Yehowa mbaakhala nu luendu luakoma lua gumuzumba nu lua gumukombelela mayilago! Athu adi nu felela dia gujinga ha mavu mbaakhala nji nu ha guabamba handaga Yehowa wafugile mavu mukunda nu ene. Gualeha ndo Ufumu wa Nzambi mbawubuisa luko mavu nu ima yagasue idi hene yabonga diago. Yesu mbawulondega ndaga jiagasue jiabolele mukunda nu gubola guakalegele Adama nu Eva. Yehowa mbawufuzumuna athu afuile gale nu mbawahana monyo wa mayilago nu sante yatagana. Mbawubuisa mavu phaladiso. (Luka 23:42, 43) Tangua akombeledi a Yehowa mbaabua athu atagana, mukut’awo agasue mbaakhala nu ‘lutumbu nu ginemua’ gifua luholo Davidi wayisonegele.—Ngi. 8:5.

19. Ndaga jitshi tudi naye gulandula gutangiza?

¹⁹ Gula udi mukatshi dia ‘thundu yakoma ya athu’ jiya egi udi nu felela diabonga diago. Nzambi wana guguzumba, wana tshigina egi ukhale mukatshi dia fami yenji. Kalagala yagasue ha gumusuanguisa. Khala mutangiza ndaga jiatulayele Nzambi lusugu nu lusugu. Khala musuanguluga nu luendu luaye lua gukombelela Sh’etu wa mu dilu. Khala nji muzula felele diaye dia gumutumbuisa mayilago nu ndando!