1. Ko ni mbvunzo uponi womwe uchabwera m’maganizo mwathu tikaganizira vose vomwe Yahova adasika?

TIKAMBAGANIZIRA va chilengedwe chomwe Yahova adasika tingabve ninge momwe wamasalimo Davide adabvera. Iye adabvunza ivi mpemphero: ‘Nikanyag’ana kudzulu, basa ya vala vanu, mwezi na nyenyezi zomwe mudakonza, nichaganiza kuti: Munthu ni mbani kuti mumbamuganizire, ndipo mwana wa munthu wochokera kupfumbi ni mbani kuti mumbamusamalire?’ (Sal. 8:3, 4) Ninge Davide, tikawona kukula kwa chilengedwe, tingadabwe peno Yahova angatiganizire ise wanthu. Ndipo tikati tiwone, sikuti Yahova ambandowaganizira wanthu woyambirira wale Adamu na Hava komasoti wenze mbali ya banja yake.

2. Ko chakulinga cha Yahova chenze chiponi kwa Adamu na Hava?

² Adamu na Hava wenze wana woyambirira pa dziko yapasi womwe Yahova adasika, ndipo Yahova wenze Baba wawo wakudzulu wachikondi. Iye ambadikhira kuti banja mweyi ikhale yabwino maninge. Mulungu adawauza kuti: ‘Muberekane, muwande, mudzadze dziko yapasi ndipo muinyag’anire.’ (Gen. 1:28) Iwo adakakhala na wana na kuinyang’anira bwino dziko yomwe yenze muyi wawo. Iwo adakabvera bwinobwino Yahova pa cholinga chomwe wenze nacho kwa iwo, Adamu na Hava pabodzi na mbadwa zawo adakapitiriza kukhala mu banja ya Mulungu mpakana kalekale.

3. Ko ndawa chani tingalewe kuti Adamu na Hava wenze adapasiwa malo yolemekezeka mu banja ya Yahova?

³ Adamu na Hava wenze na malo yolemekezeka m’banja ya Yahova. Ninge mwaviri nemberewe pa Salimo 8:5 na mawu ya mnyantsi, Davide adalewa ivi pankhani ya Yahova pakusika wanthu: ‘Mudamuchepesa pan’gono pakulinganiza na angelo  ndipo mudamuvazika ulemu na ulemerero ninge chisote chachifumu.’ Shuwadi, wanthu alibe kupasiwa mphanvu zolingana na volengewa vanzeru na vamphanvu ninge angelo. (Sal. 103:20) Ndipo wanthu ndiwo wokha womwe ‘adachepesewa pang’ono’ kusiyana na volengewa vauzimu. Donganizani vimwivi! Yahova adapereka chiyambi chabwino maninge kwa azibereki wathu woyambirira.

4. Ko nchani chomwe chidachitikira Adamu na Hava pa malo yawo mu banja ya Yahova, ndipo tikambirane chani mu nkhani ino?

 ⁴ Nivopasa ntsisi kuti Adamu na Hava adaluza malo yawo mu banja ya Yahova. Vimwevi vidabweresa mabvuto yakulu kwa mbadwa zawo. Ninge momwe tiwonere mu msolo uno kutsogolo uku. Koma chakulinga cha Yahova chilibe kuchinja. Iye achada wanthu wobvera kuti akhale wana wake mpakana kalekale. Chakuyamba, naboni tikambirane momwe Yahova watilemekezera, patsogolo pake tikambirane vomwe tingachite manjeuno vomwe vingawonese kuti tichada kukhala mu banja ya Mulungu. Pomalizira, tikambirane va madaliso yomwe wana wa Mulungu adzakondwe nayo pa dziko yapasi mpakana kalekale.

5. Ko tingalemekeze tani Mulungu ndawa ya kutisika muchifaniziro chake?

⁵ Yahova adatilemekeza mwa kutisika mu chifaniziro chake. (Gen. 1:26, 27) Ndawa yakuti tidasikiwa mu chifaniziro cha Mulungu, tingakwanise kukhala na makhalidwe ninge chikondi, chifundo, kukhulupirika na chilungamo. (Sal. 86:15; 145:17) Tikambakulisa makhalidwe ninge mwaya, tichalemekeza Yahova ndipo tichakhala tikuwonesa kuti tinkumutembeja. (1 Pet. 1:14-16) Tikambachita vinthu vomwe vichakondweresa Ababa wathu wakudzulu, tichakhala wokondwa na wokhutira. Ndawa ya kutisika mu chifaniziro chake, Yahova adatikonza munjira yakuti timbakwanise kukhala wanthu womwe iye achada kuti akhale mu banja yake.

6. Ko Yahova adalemekeza tani wanthu pomwe angakonza dziko yapasi?

⁶ Yahova adatikonzera muyi wabwino maninge. Akanati wasika munthu woyambirira, Iye adakonzeratu dziko kuti wanthu adzakhalemo. (Yobu 38:4-6; Yer. 10:12) Ndawa yakuti iye ni wanzeru na wopasa, Yahova achapereka vinthu vizinji vabwino vakuti isepano timbakondwe navo. (Sal. 104:14, 15, 24) Nthawe zinango, iye adaganizira va basa yomwe adaphata, ndipo ‘adawona kuti venze bwino.’ (Gen. 1:10, 12, 31) Iye adalemekeza wanthu pakuwawuza kuti ‘anyang’anire’ chilengedwe chose cha padziko yapasi. (Sal. 8:6) Chakulinga cha Mulungu chenze chakuti wanthu wa ungwiro akondwe pakusamalira basa ikulu mweyi mpakana kalekale. Ko imwepo nthawe zose muchatembeja Mulungu ndawa ya mphaso yabwino mweyi?

7. Ko lemba ya Yoswa 24:15 ichawonesa tani kuti wanthu anaufulu wosalula?

⁷ Yahova adatipasa mphaso ya ufulu wosalula. Tingasalule moyo womwe tichada kukhala naye. (Lewengani Yoswa 24:15.) Mphanvu yakukwanisa kusalula mweyi ni yabwino maninge, ndipo Ababa wathu wakudzulu achakondwa tikasalula kumutumikira. (Sal. 84:11; Miy. 27:11) Tingakwanise kuphatisira basa ufulu wathu wakusalula mu njira zizinji. Wonani chitsanzo chomwe Yesu adawonesa.

8. Ko ni njira ibodzi iponi yomwe Yesu adaphatisira basa ufulu wake wosalula?

⁸ Mwakutewedzera chitsanzo cha Yesu, tingasalule kuikha vofuna va anango patsogolo pa vathu. Ndipo pomwe Yesu na wopfunzira wake adaneta, iwo adayenda kumalo kwawokhawokha kuti akapumule. Koma iwo alibe kukwanisa kupumula. Chigulu cha wanthu  chidawagumana ndipo wanthu mwawo ambafunisisa kupfunzisiwa na Yesu. Koma Yesu alibe kukalipa. M’malomwake, iye adawabvera ntsisi. Ko ni chiyani chomwe Yesu adachita? ‘Iye adayamba kuwapfunzisa vinthu vizinji.’ (Maliko 6:30-34) Tikambatewedzera Yesu mwakuchita vose vomwe tingakwanise kuphatisira basa nthawe na mphanvu zathu kuti tithandize anango, tichabweresa ulemerero kwa Ababa wathu wakudzulu. (Mat. 5:14-16) Ndipo tichawonesa Yahova kuti tikufuna kukhala mbali ya banja yake.

9. Ko ni mphaso yapadera iponi yomwe Yahova adapasa wanthu?

⁹ Yahova adapereka mwayi kwa wanthu kuti ambakwanise kubereka wana, pabodzi na udindo wakuwapfunzisa kukonda na kumutumikira. Peno imwepo ndimwe m’bereki, ko muchatembeja mphaso mweyi yapadera? Olo kuti angelo niwodalisiwa maninge na Yahova, iwo alibe mphaso mweyi yokhala na wana. Na mwevi m’maganizo, wale womwe ankulera wana achadikana kulemekeza mwayi moyu. Azibereki adapasiwa mphaso yapadera mweyi kuti ‘alere wana wawo mu malangizo ya Yahova.’ (Aef. 6:4; Deut. 6:5-7; Sal. 127:3) Pakufuna kuthandiza azibereki, gulu ya Mulungu yakonza vinthu vizinji ninge mabukhu, mavidiyo, nyimbo na nkhani zizinji za pa intaneti. Vinkuchita kuwoneseratu kuti Ababa wathu wakudzulu pabodzi na Mwana wake achakonda wana. (Luka 18:15-17) Azibereki achalemekeza Yahova akambamuthemba na kuchita vose vangakwanise. Azibereki watene achapereka mwayi kwa wana wawo kuti adzakhale mu banja ya Yahova mpakana kalekale!

10-11. Ko Yahova wachitisa viponi kukhala vokwanisika ndawa ya dipo?

¹⁰ Yahova adapereka Mwana wake wapamoyo kuti tikwanise kukhala pomwe mu banja Yake. Ninge mwatanenera  mundime ya 4, Adamu na Hava adaluza mwayi wokhala m’banja ya Yahova, ndipo adachitisa kuti wana wawo aluzembo mwayi moyu. (Aro. 5:12) Adamu na Hava adalekera dala kubvera Mulungu, ndipo iye adawachosa mu banja yake. Manje tani va mbadwa zake? Mwachikondi Yahova adakonza makonzedwe kwa wale womwe niwodikana kukhala mu banja yake. Iye adachita vimwevi pophatisira basa ntsembe ya Mwana wake wobadwa yekha, Yesu Khrisitu. (Yoh. 3:16; Aro. 5:19) Ndawa ya ntsembe ya Yesu, wanthu wokwana 144.000 adasaluliwa na Mulungu kuti akhale wana wake.—Aro. 8:15-17; Chiv. 14:1.

¹¹ Kuyingizira pamwapa, mamidyau ya wanthu wokhulupirika ni wobvera ndipo ankuchita vomwe Yahova achada. Iwo ankudikhira kudzakhala m’banja ya Mulungu chikadzapita chiyeso chomalizira kumapeto kwa magole 1000. (Sal. 25:14; Aro. 8:20, 21) Na chidikhiro chimwechi m’maganizo mwawo manjeuno, iwo achabvera Yahova yemwe ni ‘Baba’ na Mulengi wawo. (Mat. 6:9) Wanthu womwe adzamukisiwe adzakhalembo na mwayi wopfunzira vomwe Yahova achada kuti iwo ambachite. Wale womwe adzabvere malamulo yake adzakhalembo m’banja mwake.

12. Ko tidawire mbvunzo uponi?

¹² Ninga mwatawonera kale, Yahova wakhala ankuchita vinthu vizinji vowonesa kuti achalemekeza wanthu. Iye wabvuma kuti wodzozewa akhale wana wake ndipo wapasa ‘wa gulu ikulu’ chidikhiro chakudzakhala wana wake mudziko inyowani. (Chiv. 7:9) Ko nchani chatingachite manjeuno pakuwonesa kuti tinkufuna kukhala wana wake mpaka kalekale?

13. Nchani chatingachite kuti tikhale m’banja ya Mulungu? (Maliko 12:30)

¹³ Wonesani kuti muchakonda Yahova mwa kumutumikira na moyo wose. (Lewengani  Maliko 12:30.) Yahova mwachikondi adatipasa mphaso zizinji. Koma panango mphaso ikulu maninge ni shungu yadatipasa yofuna kumutumikira. Tichawonesa kuti timukonda Yahova mwa ‘kusunga malamulo yake.’ (1 Yoh. 5:3) Lamulo inango yomwe Yahova achada kuti timbabvere ni yomwe Yesu adapereka yakuti mbapfunzisani wanthu na kuwabatiza. (Mat. 28:19) Iye adatilamula pomwe kuti timbakondane. (Yoh. 13:35) Yahova adzatambire wanthu wose wobvera kuti akhale m’banja ya atumiki wake wa padziko yose.—Sal. 15:1, 2.

14. Ko tingawonese tani chikondi kwa anango? (Mateyu 9:36-38; Aroma 12:10)

¹⁴ Mbakondani anango. Chikondi ndiyo khalidwe ikulu ya Yahova. (1 Yoh. 4:8) Yahova adatiwonesa chikondi olo panthawe yomwe tenze takanati kumudziwa. (1 Yoh. 4:9, 10) Tikambakonda anzathu ndiye kuti tinkumutewedzera. (Aef. 5:1) Njira ibodzi yabwino yowonesa kuti tichakonda wanthu ni kuwathandiza kudziwa Yahova nthawe idakalipo. (Lewengani Mateyu 9:36-38.) Tikambachita vimwevi, ndiye kuti tinkuwathandiza kuti akhalembo m’banja ya Mulungu. Munthu akabatizika, tichadekana kupitiriza kumuwonesa chikondi na ulemu. (1 Yoh. 4:20, 21) Ko tingachite tani vimwevi? Chinthu chibodzi ni kumuwonesa kuti timuthemba. Mwakulinganiza, peno tinkubvesalini ndawa yake wachita vinthu vinango, tichadekanalini kuganiza kuti wachita vimwevi ndawa yodzikonda. Koma timbamuwonese ulemu m’bale wathu mwa kumuwona kuti atiposha.—Lewengani Aroma 12:10; Afil. 2:3.

15. Ko ni mbani womwe tichadekana kuwabvera chifundo na kuwakomera moyo?

¹⁵ Mbabverani chifundo wanthu wose na kuwakomera moyo. Peno tinkufuna kukhala m’banja ya Yahova mpakana kalekale, tichadekana kuphatisa basa Mawu ya Yahova pamoyo wathu. Mwakulinganiza, Yesu adapfunzisa kuti tichadekana kubvera chifundo na kukomera moyo wanthu wose, olo adani wathu. (Luka 6:32-36) Koma nthawe zinango vimwivi vingakhale voshupa kwa ise. Ndipomwapa tichadekana kupfunzira kuchita vinthu ninge Yesu. Tikambachita vose vatingakwanise pakubvera Yahova na kutewedzera Mwana wake, tichawonesa Ababa wathu wakudzulu kuti tichada kukhala m’banja yake mpakana kalekale.

16. Ko tingateteze tani mbiri ya banja ya Yahova?

¹⁶ Tetezani mbiri ya banja ya Yahova. M’banja, kazinji-kazinji mwana wachilumbwana n’diki angatewedzere nkulu wake. Nkulu wake akambaphatisira basa mpfundo za m’Baibolo pamoyo wake, iye adzapereke chitsanzo chabwino kwa n’diki wake. Koma nkulu wake akambachita vinthu voipa, n’diki wake angatengerembo chitsanzo choipa. Nchibodzibodzimbo na vomwe vichachitika m’banja ya Yahova. Peno Mkhrisitu wokhulupirika wayamba mpatuko panango khalidwe yachigololo na chinyengo, anango angatewedzerembo chitsanzo chake choipa. Wanthu womwe angamutewedzere angadzonge ushamwali wawo na Yahova. (1 Ates. 4:3-8) Tichadekana kupewa vitsanzo voipa va wanthu mwawa ndipo ayi kuti tibvume kuti chilichose chitifutuse kwa Ababa wathu wakudzulu.

17. Ko tichadekana kupewa kuganizira chani, ndipo ndawa chani?

¹⁷ Thembani Yahova osati vinthu vakuthupi. Yahova achatipolomisa kuti adzatipase chakudya, vovala na malo yokhala tikapitiriza kufagafaga Ufumu wake chakuyamba na kumbakhala mobverana na mpfundo zake zolungama. (Sal. 55:22; Mat. 6:33) Kuganizira vimwevi kudzatithandize kupewa kuganizira kuti vinthu vakuthupi vomwe dziko ichapereka, vingatithandize kukhala motetezeka na mokondwa mpaka kalekale. Tinkudziwa kuti njira ibodzi yomwe ingatithandize kukhala na  chimwemwe chaicho chomwe mzimu uchapereka ni kuchita vomwe Yahova achada. (Afil. 4:6, 7) Isepano tikagula vinthu vizinji, tichadekana soti kukhala na nthawe ikulu ya kuvisamalira. Ko vimwevi vingatichitiselini kumbandoganizira va vinthu vathu? Tichadekana kukumbukira kuti Mulungu adikhira kuti tikhale munthu wobala vipaso m’banja yake. Vimwevi vinkutanthauza kuti tichadekanalini kusokonezewa. Isepano tifunalini kukhala ninge mulumbwana ule wolemera yemwe adaluza mwayi wotumikira Yahova ndawa ya kukonda chuma chake!—Maliko 10:17-22.

18. Ko ni ulemelero na madaliso yaponi yomwe wanthu wobvera adzakondwe nayo mpaka kalekale?

¹⁸ Wanthu wobvera adzakhale na mwayi ukulu wokonda Yahova na kumutumikira mpakana kalekale. Wale womwe adzakhale padziko yapasi adzakondwe na kusamalira dziko yomwe Yahova adawapasa kuti ikhale muyi wawo. Manjemanje Ufumu wa Mulungu udzakonze vinthu vose kukhala soti vanyowani. Yesu adzamalise mavuto yose yomwe yadabwera ndawa yakuti Adamu na Hava adalamba kukhala m’banja ya Mulungu. Yahova adzamukise wanthu azinji nkuwapasa mwayi wokhala na moyo wabwino m’paradaiso. (Luka 23:42, 43) Atumiki wa Yahova wa padziko yapasi akambadzakhala wangwiro pang’ono-pang’ono, aliyese adzakhale na ‘ulemelero na ulemu’ womwe Davide adanemba.—Sal. 8:5.

19. Ko tichadekana kumbaganizira chani ntsiku iliyose?

¹⁹ Peno imwepo ndimwe wa ‘gulu ikulu’ dziwani kuti munkudikhira vinthu vabwino. Yahova akukondani imwepo ndipo achada kuti mukhale m’banja yake. Ndipomwapa chitani vose vamungakwanise kuti mumbamukondwerese. Yesesani kumbaganizira vomwe Mulungu adatipolomisa. Tembejani mwayi wamunawo wotumikira Ababa wathu wakudzulu kuti mudzakwanise kumutamanda mpaka kalekale!