1. Taem iumi lukluk lo moon and olketa star, datwan maet mekem iumi for tingim wanem?

TAEM iumi lukluk lo moon and olketa star wea Jehovah wakem, maet iumi garem tingting olsem David wea raetem disfala Psalm. Hem sei: ‘Taem mi lukap go long skae an mi lukim mun an olketa sta wea yu putum long barava ples blong olketa, mi save tingting olsem, “Mifala pipol i samting nating nomoa. Hemi no fitim nomoa fo yu tingting long mifala. ?Fo wanem nomoa yu lukaftarem gudfala long mifala?”’ (Sams 8:3, 4) Olsem David, maet iumi tingse iumi samting nating nomoa, so iumi barava tinghae Jehovah hem lukaftarem iumi. Iumi savve Jehovah tingim iumi olketa man and laekem iumi for insaed lo famili blo hem bikos lo wanem hem duim for Adam and Eve.

2. Wanem nao plan blo Jehovah for Adam and Eve?

² Tufala first pikinini blo Jehovah lo earth hem Adam and Eve, and hem Dadi blo olketa. God talem tufala wanem hem expectim tufala for duim. Hem sei tufala mas garem olketa pikinini and lukaftarem earth. (Jenesis 1:28) Sapos Adam and Eve followim plan blo God, tufala and olketa lo laen blo tufala bae insaed lo famili blo Jehovah for olowe.

3. Why nao iumi savve sei Adam and Eve garem spesol position insaed famili blo Jehovah?

³ Wanem nao position blo Adam and Eve insaed famili blo Jehovah? Psalm 8:5 and footnote lo NW storyim hao God ting lo olketa man. David sei: “Iu mekem [man] lelebet low winim olketa angel. Iu mekhae lo hem and givim  glory lo hem.” Hem tru, God no givim man sem paoa and savve olsem hem givim lo olketa angel. (Sams 103:20) Bat Jehovah mekhae and givim glory lo olketa man. Hem spesol samting for Adam and Eve for garem datkaen position insaed famili blo Jehovah.

4. Why nao Adam and Eve no fit for stap insaed lo famili blo Jehovah, and wanem nao bae iumi storyim lo disfala study?

 ⁴ Adam and Eve no obeyim Jehovah, so tufala no fit for stap insaed lo famili blo Hem. Bae iumi storyim bihaen nogud samting wea olketa lo laen blo tufala kasem from datwan. Bat plan blo Jehovah no change. Hem laekem olketa wea obeyim hem for stap insaed lo famili blo hem for olowe. Firstaem, bae iumi storyim wanem Jehovah duim wea showimaot hem lovem iumi. Then bae iumi storyim wanem iumi savve duim for showimaot iumi laek for insaed famili blo God. And last samting, bae iumi storyim olketa blessing wea iumi bae kasem.

5. Hao nao iumi savve mekhae lo Jehovah?

⁵ Jehovah wakem iumi for garem olketa wei blo hem. (Jenesis 1:26, 27) From datwan iumi savve garem olketa gudfala wei olsem Jehovah for showimaot love, sorre lo narawan, faithful, and duim olketa gud samting. (Sams 86:15; 145:17) Taem iumi waka hard for garem olketa kaen wei olsem, iumi mekhae lo Jehovah and showimaot iumi tinghae lo hem. (1 Pet. 1:14-16) And taem iumi showimaot olketa gudfala wei, datwan mekem iumi hapi and satisfae, and mekem iumi fit for stap insaed lo famili blo Jehovah.

6. Hao nao Jehovah showimaot hem tingim olketa man taem hem wakem earth?

⁶ Jehovah wakem earth for iumi enjoyim laef. Longfala taem bifor Jehovah wakem firstfala man Adam, hem redyim disfala earth for olketa man stap lo hem. (Job 38:4-7; Jeremaea 10:12) From Jehovah hem kaen tumas, hem wakem staka gud samting for mekem iumi enjoyim laef. (Sams 104:14, 15, 24) Bihaen Jehovah wakem earth hem fit for sei “hemi gud.” (Jenesis 1:10, 12, 31) God givim olketa man privilege for “lukaftarem” olketa nambawan samting wea hem wakem lo earth. (Sams 8:6) Hem plan blo God for olketa man for duim datwan for olowe. Hem gud for evritaem talem thankiu lo Jehovah for datfala nambawan hope for future.

7. Hao nao Josua 24:15 showimaot man seleva fit for disaedem olketa samting?

⁷ Jehovah letem iumiseleva for disaedem olketa samting. Iumi savve disaed for worshipim Jehovah or nomoa. (Readim Josua 24:15.) Jehovah hem barava hapi taem iumi disaed for worshipim hem. (Sams 84:11; Provebs 27:11) Iumi savve disaed tu for duim olketa nara samting wea mekem Jehovah hapi. Tingim example blo Jesus.

8. Wanem nao gud samting Jesus duim for narawan?

⁸ Iumi savve followim example blo Jesus taem iumi tingim olketa narawan firstaem. Wanfala taem Jesus and olketa aposol barava taed so olketa go lo wanfala kwaet ples for rest lelebet, bat staka pipol kam lo Jesus and laekem hem for teachim olketa. Nomata olsem, Jesus no kros, bat hem laek helpem olketa. So wanem nao hem duim? “Hem teachim  olketa plande samting.” (Mark 6:30-34) Sapos iumi iusim taem and strong blo iumi for helpem olketa narawan olsem Jesus duim, datwan bae mekhae lo Jehovah. (Matt. 5:14-16) And bae iumi showimaot iumi laek for insaed lo famili blo Jehovah.

9. Wanem spesol present nao Jehovah givim lo parents?

⁹ Jehovah wakem pipol for garem pikinini, and parents shud teachim pikinini for lovem and worshipim Jehovah. Sapos iu dadi or mami, waswe, iu tinghae lo disfala present from Jehovah for garem pikinini? Jehovah givim olketa angel staka gud samting, bat olketa no savve garem pikinini. So olketa dadi and mami shud tinghae lo privilege for garem pikinini. And tu, parents shud “stretem and trainim [pikinini] followim samting wea Jehovah talem.” (Eph. 6:4; Diutronomi 6:5-7; Sams 127:3) For helpem parents for duim datwan, organization blo Jehovah provaedem olketa Bible pablikeson, video, olketa song, and olketa nara samting lo website. Datwan showimaot Jehovah and Jesus barava lovem olketa pikinini. (Luke 18:15-17) Jehovah hapi taem parents followim direction blo hem and lukaftarem gud olketa pikinini. Taem parents duim datwan, pikinini tu bae garem chance for insaed famili blo Jehovah for olowe!

10-11. Wanem nao iumi fit for kasem from Jesus dae for iumi?

¹⁰ Jehovah letem Son blo hem for dae mekem iumi fit for insaed famili blo hem. Olsem iumi storyim lo  paragraf 4, from Adam and Eve sin, tufala and olketa lo laen blo tufala no fit for insaed famili blo Jehovah. (Rome 5:12) Adam and Eve min for no obeyim God, so God aotem tufala from famili blo hem. Bat waswe lo olketa from laen blo tufala? Jehovah adoptim samfala wea faithful lo hem for kam insaed lo famili blo hem. Sakrifaes blo Jesus nao mekem olketa fit for kasem datwan. (John 3:16; Rome 5:19) Bible sei God hem adoptim 144,000 wea faithful for kamap olketa son blo hem.—Rome 8:15-17; Rev. 14:1.

¹¹ Olketa narawan wea faithful lo God bae garem chance for stap insaed famili blo God for olowe bihaen datfala last test lo end blo thousand year rul blo Jesus. (Sams 25:14; Rome 8:20, 21) Nomata olsem, distaem iumi savve kolem Jehovah “Dadi” blo iumi. (Matt. 6:9) Olketa wea dae finis and laef bak bae garem chance for lane abaotem wanem Jehovah laekem olketa for duim, and olketa wea duim wanem Jehovah laekem bae fit for insaed famili blo Jehovah tu.

12. Wanem kwestin bae iumi ansarem distaem?

¹² Olsem iumi storyim finis, Jehovah duim staka samting wea showimaot hem lovem iumi olketa man. Hem adoptim finis olketa anointed Christian for kamap olketa son blo hem, and hem givim chance for olketa lo “big crowd” for insaed lo famili blo hem for olowe. (Rev. 7:9) Wanem nao iumi mas duim wea bae showimaot iumi laek for insaed lo famili blo Jehovah for olowe?

13. Wanem nao iumi savve duim mekem iumi insaed lo famili blo God? (Mark 12:30)

¹³ Showimaot iumi lovem Jehovah taem iumi worshipim hem lo full heart blo iumi. (Readim Mark 12:30.) Wanfala nambawan samting wea iumi savve duim nao  hem for worshipim Jehovah. Iumi showimaot iumi lovem Jehovah taem iumi “obeyim olketa law bilong hem.” (1 John 5:3) Jesus talemaot samting wea Dadi blo hem laekem iumi for duim, wea hem nao for teachim pipol for kamap olketa disaepol. (Matt. 28:19) Jesus talem iumi for lovem each other tu. (John 13:35) Taem iumi obeyim Jehovah bae hem laekem iumi for insaed lo famili blo hem.​—Sams 15:1, 2.

14. Hao nao iumi savve showimaot love lo olketa narawan? (Matthew 9:36-38; Rome 12:10)

¹⁴ Showimaot love lo olketa narawan. Jehovah nao first wan for showimaot love. (1 John 4:8) Hem lovem iumi nomata iumi no savve yet lo hem. (1 John 4:9, 10) Iumi followim example blo hem taem iumi showimaot love lo olketa narawan. (Eph. 5:1) Wanfala wei iumi savve showimaot love lo pipol hem for helpem olketa for lane abaotem Jehovah distaem. (Readim Matthew 9:36-38.) Datwan bae givim chance lo olketa for joinim famili blo God. Nomata sapos samwan hem baptaes finis, iumi mas gohed for respectim and showimaot love lo hem. (1 John 4:20, 21) Olsem example, sapos iumi no hapi lo samting wea hem duim, bae iumi no judgem hem and sei hem nogud man. Bat bae iumi trae for minim hem, showimaot respect lo hem, and no tingse iumi winim hem.​—Readim Rome 12:10; Phil. 2:3.

15. Iumi shud kaen and showimaot mercy lo hu?

¹⁵ Kaen and showimaot mercy lo narawan. Sapos iumi laek for insaed famili blo Jehovah, iumi mas followim wanem Bible talem. Olsem example, Jesus teachim iumi for kaen and showimaot mercy lo narawan, nomata olketa enemy blo iumi tu. (Luke 6:32-36) Maet samfala taem hem no isi samting for duim. Nomata olsem, iumi mas followim example blo Jesus for kaen lo narawan and showimaot mercy. Datwan bae showimaot iumi laek for insaed lo famili blo Jehovah for olowe.

16. Wanem nao iumi no laek for duim?

¹⁶ No duim eni samting wea mek shame lo pipol blo Jehovah. Insaed lo famili, smol brata savve laek for followim wanem big brata blo hem duim. Sapos big brata followim olketa Bible principle, bae hem gud example for smol brata blo hem. Bat sapos big brata duim olketa samting wea no stret, maet smol brata followim nogud wei blo hem. Hem semsem tu lo famili blo Jehovah. Taem wanfala Christian kamap apostate, or hem durong, or hem duim eni nara nogud samting, maet samfala brata or sista followim nogud wei blo hem. Olketa wea duim datwan savve mek shame lo pipol blo Jehovah. (1 Thess. 4:3-8) Iumi no laek followim nogud wei blo narawan wea datwan bae spoelem hao iumi fren witim Jehovah.

17. Wanem kaen tingting nao iumi shud no garem? Explainim.

¹⁷ Trustim Jehovah and no olketa material samting. Jehovah promis for provaedem kaikai, kaleko, and ples for stap taem Kingdom hem first samting lo laef blo iumi, and from iumi followim olketa raeteous standard blo hem. (Sams 55:22; Matt. 6:33) So no tingse olketa material samting savve mekem iumi hapi or for stap gud. Iumi savve main samting wea bae mekem iumi hapi hem for duim wanem Jehovah laekem. (Phil. 4:6, 7) Nomata maet iumi garem inaf selen for  peim staka samting, waswe, hem tekem staka taem and strong blo iumi for iusim and lukaftarem olketa samting hia? Tingim, God expectim iumi for busy lo waka blo hem, so iumi mas no busy tumas lo olketa nara samting. Iumi no laek for olsem datfala man wea laekem tumas olketa samting wea hem ownim. Bikos lo datwan, hem disaed for no followim Jesus and misstim chance for worshipim God and for God adoptim hem for insaed lo famili blo Hem.—Mark 10:17-22.

18. Wanem nao olketa privilege and blessing wea bae iumi kasem lo niu world?

¹⁸ Olketa wea obeyim Jehovah and wea bae gohed stap lo earth, olketa bae kasem nambawan privilege for lovem and worshipim Jehovah for olowe! Iumi bae garem privilege tu for lukaftarem disfala nambawan earth wea God wakem for iumi. Klosap nao Kingdom blo God bae mekem earth and evri samting lo earth for gud bak moa. Jesus bae stretem evri problem wea kamaot from Adam and Eve tufala sin. Jehovah bae resurrectim staka million pipol and givim chance for olketa laef olowe lo paradaes wea no eniwan bae sik. (Luke 23:42, 43) Taem iumi wea insaed lo famili blo Jehovah lo earth kamap perfect, iumi bae kasem datfala “glory” wea David story abaotem.​—Ps. 8:5, NW.

19. Wanem nao iumi laek for duim distaem?

¹⁹ Sapos iumi insaed lo datfala “big crowd,” iumi garem wanfala nambawan hope. God lovem iumi and hem laekem iumi for insaed lo famili blo hem. So iumi laek for evritaem duim olketa samting wea mekem Jehovah hapi and evritaem tingim olketa promis blo hem. And tu, iumi tinghae lo privilege for worshipim Dadi blo iumi and datfala chance for iumi laef olowe!