1. Σο αβέλα αμαρέ γκοντιάτε κάνα σκεφτίνασα σαρέ οντουλά σο λατσσαρντάς ο Ιεχωβά;

ΚΑΝΑ σκεφτίνασα σαρέ οντουλά σο λατσσαρντάς ο Ιεχωβά, μπέκιμ τι νιωθίνασα σαρ ο ψαλμωδός Δαβίδ, σο βακερντάς πι προσευχιάτε: «Κάνα ντικχάβα το ουρανός, ο πράγματα σο κερντάν τι βαστέντζαρ, ο τσσιμούτ ντα ο τσεργανιά σο ετοιμαντάν, σο ισί ο τζενό ντα τθερέσα-λες τι γκοντιάτε ή ο τσσαβό ι τζενέσκο ντα φροντίνεσα-λες;» (Ψαλμ. 8:3, 4) Σαρ ο Δαβίδ, αντικάς αμέν-ντα μπέκιμ τι σκεφτίνασα καζόμ χουρντέ ισινάμ ανγκλάλ κο τσεργανιά σο κερντάς ο Ιεχωβά ντα ισινάμ πφερντέ εκτίμηση σο τθερέλα-αμέν ο Ιεχωβά πι γκοντιάτε. Όμως, σαρ κα ντικχάς, ο Ιεχωβά όχι σάντε ντινάς προσοχή κο πρώτα τζενέ, κο Αδάμ ντα κι Εύα, αλλά τσσουντάς-λεν αντρέ πι φαμιλιάτε-ντα.

2. Σο μανγκλάς ο Ιεχωβά κατά Αδάμ ντα κατά Εύα τι κερέν;

² Ο Αδάμ ντα η Εύα ισινέ ο πρώτα τσσαβέ ι Ιεχωβάσκε κι πφουβ, ντα ο Ιεχωβά ισινέ λένγκο Ντατ κο ουρανός σο μανγκέλας-λεν μπουτ. Ντινάς κο Αδάμ ντα κι Εύα εκ μπουτί τι κερέν. Ο Ντεβέλ βακερντάς λένγκε: «Τι κερέν μπουτέ τσσαβέν ντα τι αβγατίντιβεν, τι πφερέν ι πφουβ ντα τι τθερέν-λα τουμένγκε». (Γέν. 1:​28) Μανγκλάς λένταρ τι κερέν τσσαβέν ντα τι φροντίνεν ι πφουβ. Άμα ντινέας καν ντα κερντέας οντουβά σο μανγκλάς λένταρ ο Ιεχωβά τι κερέν, εμ βον εμ λένγκε τσσαβέ κα ατσσόνας αντρέ κι φαμιλί κι Ντεβλέσκι για πάντα.

3. Σόσκε μπορίνασα τι βακεράς ότι ο Αδάμ ντα η Εύα τθερένας εκ σημαντική θέση αντρέ κι φαμιλί κι Ιεχωβάσκι;

³ Ο Αδάμ ντα η Εύα τθερένας εκ σημαντική θέση αντρέ κι φαμιλί κι Ιεχωβάσκι. Κο εδάφιος Ψαλμός 8:5 ο Δαβίδ βακερντάς ακαβά ι τζενέσκε σο λατσσαρντάς ο Ιεχωβά: «Κερντάν-λες χάνικ πιο τελέ κατά άγγελοι ντα τσσουντάν οπρά-λέστε δόξα ντα λάμψη». Ισί μπαγιά ότι ο Ντεβέλ να κερντάς ι τζενέν τι τθερέν  ι ζορ, ι γκοντί ντα ο ικανότητες ι αγγελόνγκε. (Ψαλμ. 103:​20) Αλλά ο τζενέ ισί σάντε «χάνικ πιο τελέ» οντουλέ ζουρανέ αγγελόνταρ. Καζόμ σουκάρ ισί ανταβά! Κάνα ο Ιεχωβά κερντάς αμαρέ πρώτε νταντές ντα νταγιά, ντινάς-λεν εκ μπουτ σουκάρ ζωή.

4. Σο αβιλό-πες κο Αδάμ ντα κι Εύα επειδή να ντινέ καν κο Ιεχωβά, ντα σο κα ντικχάς ανταλέ μαθημάστε;

 ⁴ Δυστυχώς, επειδή ο Αδάμ ντα η Εύα να ντινέ καν κο Ιεχωβά, τσσιναντέ τι αβέν αντρέ λέσκε φαμιλιάτε. Ανταβά αντάς μπαρέ προβλήματα λένγκε τσσαβένγκε, σαρ κα ντικχάς πιο σοράν ανταλέ μαθημάστε. Αλλά οντουβά σο τθερέλας ο Ιεχωβά πι γκοντιάτε να αλλαξάλο. Βοβ μανγκέλα ο τζενέ σο ντένα-λες καν τι αβέν λέσκε τσσαβέ για πάντα. Πρώτα, κα ντικχάς σαρ σικαντάς αμένγκε ο Ιεχωβά ότι ισινάμ σημαντικοί λέσκε. Σοράν, κα ντικχάς σο μπορίνασα τι κεράς ακανά για τι σικαβάς ότι μανγκάσα τι αβάς αντρέ κι φαμιλί κι Ντεβλέσκι. Κο τέλος, κα ντικχάς ο ευλογίες σο κα τθερέν ατθέ κι πφουβ για πάντα οντουλά σο ισί αντρέ κι φαμιλί κι Ιεχωβάσκι.

5. Σαρ μπορίνασα τι σικαβάς αμαρί εκτίμηση κο Ντεβέλ σο κερντάς-αμέν τι μοιάζας λέστε;

⁵ Ο Ιεχωβά σικαντάς ότι ισινάμ σημαντικοί λέσκε κάνα κερντάς-αμέν τι μοιάζας λέστε. (Γέν. 1:​26, 27) Επειδή ισινάμ κερντέ τι μοιάζας κο Ντεβέλ, σικλιάσα τι σικαβάς ο σουκάρ ιδιότητες σο τθερέλα βοβ. Για παράδειγμας, μπορίνασα τι σικλιάς τι μανγκάς ι γιαβερέν, τι τζιτζίνας λένγκε, τι αβάς αφοσιωμέ ντα τι αβάς δίκαιοι. (Ψαλμ. 86:​15· 145:​17) Κάνα σικλιάσα τι τθεράς ασακέ ιδιότητες, δοξάνασα ι Ιεχωβάς ντα σικαβάσα λέσκε αμαρί εκτίμηση. (1 Πέτρ. 1:​14-16) Κάνα κεράσα ο πράγματα αντικάς σαρ μανγκέλα αμαρό Ντατ, ο Ιεχωβά, ισινάμ ευτυχισμέ. Επίσης, επειδή ο Ιεχωβά κερντάς-αμέν τι μοιάζας λέστε, μπορίνασα τι αβάς ο τζενέ σο μανγκέλα τι τθερέλ αντρέ πι φαμιλιάτε.

6. Σαρ σικαντάς ο Ιεχωβά ότι ισί σημαντικοί λέσκε ο τζενέ κάνα κερντάς ι πφουβ;

⁶ Ο Ιεχωβά κερντάς αμένγκε εκ μπουτ σουκάρ κχερ. Μπουτ καιρός πριν τι κερέλ ι πρώτε τζενές, ο Ιεχωβά κερντάς ι πφουβ ι τζενένγκε. (Ιώβ 38:​4-6· Ιερ. 10:​12) Επειδή ισί λατσσό ντα ντέλα αντράλ πι γκίσταρ, ο Ιεχωβά κερντάς μπουτ λατσσέ πράγματα σο ντένα-αμέν χαρά. (Ψαλμ. 104:​14, 15, 24) Μπάζιμα, ανέλας πι γκοντιάτε οντουλά σο κερντάς ντα “ντικχέλας ότι ισινέ λατσσέ”. (Γέν. 1:​10, 12, 31) Σικαντάς ότι ισί σημαντικοί λέσκε ο τζενέ κάνα τσσουντάς-λεν “τι κερέν κουμάντος” σαρέ ο σουκάρ πράγματα σο κερντάς κι πφουβ. (Ψαλμ. 8:6) Οντουβά σο τθερέλα πι γκοντιάτε ο Ντεβέλ ισί τι τθερέν ο τέλεια τζενέ ι χαρά τι φροντίνεν για πάντα ανταλά σουκάρ πράγματα σο κερντάς. Βακερένα τουμέν ευχαριστώ κάθε ντιβές κο Ιεχωβά σο ντινάς-αμέν πο λάφι τι κερέλ-λες ανταβά αμένγκε;

7. Σαρ σικαβέλα ο εδάφιος Ιησούς του Ναυή 24:​15 ότι ο τζενό τθερέλα ι ελευθερία τι τραμπίνελ σο κα κερέλ;

⁷ Ο Ιεχωβά ντινάς-αμέν ι ελευθερία τι τραμπίνας σο κα κεράς. Μπορίνασα τι τραμπίνας σο κα κεράς αμαρέ ζωγιάτε. (Διαβάνεν Ιησούς του Ναυή 24:​15) Αμαρό Ντεβέλ σο μανγκέλα-αμέν μπουτ χαιρίνελα κάνα τραμπίνασα τι υπηρετίνας-λες. (Ψαλμ. 84:​11· Παρ. 27:​11) Μπορίνασα τι χρησιμοποιήνας ι ελευθερία σο τθεράσα τι τραμπίνας σο κα κεράς για τι λας γιαβερά-ντα λατσσέ αποφάσεις. Ντικχέν ο παράδειγμας ι Ιησούσκο.

8. Καβά ισί εκ τρόπος σο χρησιμοποιηντάς ο Ιησούς ι ελευθερία σο τθερέλας τι τραμπίνελ σο κα κερέλ;

⁸ Μπορίνασα τι μοιάζας κο Ιησούς κάνα τραμπίνασα τι τσσουβάς ο λατσσιπέ ι γιαβερένγκο πιο οπρέ αμαρέσταρ. Εκ ντιβές, κάνα ο Ιησούς ντα λέσκε απόστολοι ισινέ μπουτ κχινέ, γκιλέ εκχέ ήσυχε τθανέστε σο πακιάνας ότι οτθέ κα ξεκουράντιβενας. Αλλά να μπορισάλε τι ξεκουράντιβεν. Αρακχλέ-λεν μπουτ τζενέ σο μπεσένας σαρ σαρ τι σικλιόν κατά Ιησούς. Ανταβά να πειραντάς ι Ιησούς. Οκιά μπάνταρ, τζιτζισάλο οντουλέ τζενένγκε.  Σο κερντάς; «Αρχισάλο τι σικλιαρέλ-λεν μπουτ πράγματα». (Μάρκ. 6:​30-34) Κάνα μοιάζασα κο Ιησούς ντα ντάσα αμαρέ σαατίσταρ ντα αμαρέ ζοριάταρ για τι βοηθίνας γιαβερέν, δοξάνασα αμαρέ Νταντές, ι Ιεχωβάς. (Ματθ. 5:​14-16) Επίσης, σικαβάσα κο Ιεχωβά ότι μανγκάσα τι αβάς αντρέ λέσκε φαμιλιάτε.

9. Καβά σουκάρ προνόμιος ντινάς ο Ιεχωβά κο τζενέ;

⁹ Ο Ιεχωβά ντινάς κο τζενέ ι ικανότητα τι κερέν τσσαβέν, αλλά εμ ι ευθύνη τι σικλιαρέν-λεν για τι μανγκέν-λες ντα τι υπηρετίνεν-λες. Άμα ισινέν ντατ ή ντάι, εκτιμίνενα ανταβά σουκάρ δώρος; Παρόλο σο ο Ιεχωβά ευλογιντάς ι αγγελόν μπουτ, να ντινάς-λεν ο προνόμιος τι τθερέν τσσαβέν. Οτθάρ, άμα ισινέν ντατ ή ντάι, τι αβέν πφερντέ εκτίμηση σο τθερένα ανταβά προνόμιος. Ο νταντά ντα ο νταγιά τθερένα ι σημαντική ευθύνη τι ντεν πουμαρέ τσσαβέντε «ι διόρθωση ντα ο συμβουλές ι Ιεχωβάσκε». (Εφεσ. 6:4· Δευτ. 6:​5-7· Ψαλμ. 127:3) Για τι βοηθίνελ ι νταντέν ντα ι νταΐν, η οργάνωση ι Ντεβλέσκι νικαβέλα μπουτ πράγματα αντράλ κατά Γραφή, σαρ ισί ο έντυπα, ο βίντεα, ο γκιλιά ντα ο θέματα κο Ίντερνετ. Σίγουρα, εμ ο Ιεχωβά εμ λέσκο Τσσαβό μανγκένα μπουτ αμαρέ χουρντέ τσσαβέν. (Λουκ. 18:​15-17) Κάνα ο νταντά ντα ο νταγιά μανγκένα ι Ιεχωβάσκι βοήθεια ντα κερένα ο πιο λατσσό για τι φροντίνεν πουμαρέ τσσαβέν, βοβ χαιρίνελα. Ανταλά νταντά ντα νταγιά βοηθίνενα πουμαρέ τσσαβέν τι τθερέν ι ελπίδα τι αβέν αντρέ κι φαμιλί κι Ιεχωβάσκι για πάντα!

10, 11. Σο κερντάς ο Ιεχωβά αμένγκε αντράλ κατά λύτρος;

¹⁰ Ο Ιεχωβά ντινάς πι πιο λατσσέ Τσσαβές για τι μπορίνας τι αβάς πάλι αντρέ Λέσκε φαμιλιάτε. Σαρ ντικχλάμ κι  παράγραφος 4, κάνα ο Αδάμ ντα η Εύα αμαρτιντέ, τσσιναντέ τι αβέν αντρέ κι φαμιλί κι Ιεχωβάσκι εμ βον εμ λένγκε τσσαβέ. (Ρωμ. 5:​12) Ο Αδάμ ντα η Εύα τραμπιντέ μα τι ντεν καν ι Ντεβλές, οντουλέσκε-ντα ο Ντεβέλ νικαντάς-λεν αβρί πι φαμιλιάταρ. Αλλά σο κα αβέλας-πες λένγκε τσσαβέντζαρ; Ο Ιεχωβά μανγκέλα ι τζενέν, οτθάρ κερντάς κάτι για τι αβέν τσσαβέ λέσκε οντουλά σο κα ντένας-λες καν. Οντουβά σο κερντάς ισινέ τι ντελ σαρ θυσία πι μοναδικέ Τσσαβές, ι Ιησού Χριστός. (Ιωάν. 3:​16· Ρωμ. 5:​19) Αντράλ κατά θυσία ι Ιησούσκι, ο Ιεχωβά μπορισάλο τι τραμπίνελ 144.000 πιστέ τζενέν για τι αβέν λέσκε τσσαβέ.​—Ρωμ. 8:​15-17· Αποκ. 14:1.

¹¹ Επίσης, εκατομμύρια γιαβερά πιστά τζενέ κερένα πουμαρέ ζωγιάτε οντουβά σο μανγκέλα ο Ντεβέλ. Τθερένα ι ελπίδα τι αβέν αντρέ κι φαμιλί κι Ντεβλέσκι σοράν κατά τελευταία δοκιμασία κάνα κα τελειώνεν ο χίλια μπρεσά. (Ψαλμ. 25:​14· Ρωμ. 8:​20, 21) Επειδή τθερένα ανταγιά ελπίδα, ατζέ-ντα ακανά βακερένα ι Ιεχωβάσκε, Οντουλέσκε σο κερντάς-λεν, «Ντάντε». (Ματθ. 6:9) Ντα οντουλέντε σο κα τζουβντιόν πάλι κα ντιντιόλ η ευκαιρία τι σικλιόν σο μανγκέλα λένταρ ο Ιεχωβά. Οντουλά σο κα τραμπίνεν τι ντεν-λες καν κα αβέν βον-ντα αντρέ λέσκε φαμιλιάτε.

12. Καλέ ερωτησιάτε κα απαντίνας ακανά;

¹² Σαρ ντικχλάμ, ο Ιεχωβά κερντάς μπουτ πράγματα για τι σικαβέλ ότι ισί σημαντικοί λέσκε ο τζενέ. Τραμπιντάς ι χρισμέ τζενέν για τι αβέν λέσκε τσσαβέ ντα ντινάς κο «μπαρό πλήθος» ι ελπίδα τι αβέν λέσκε τσσαβέ κο νεβό ντουνιάς. (Αποκ. 7:9) Σαρ μπορίνασα τι σικαβάς ακανά κο Ιεχωβά ότι μανγκάσα τι αβάς αντρέ λέσκε φαμιλιάτε για πάντα;

13. Σο μπορίνασα τι κεράς για τι αβάς αντρέ κι φαμιλί κι Ντεβλέσκι; (Μάρκος 12:30)

¹³ Τι σικαβέν ότι μανγκένα ι Ιεχωβάς κάνα υπηρετίνενα-λες σαρέ τουμαρέ γκίσαρ. (Διαβάνεν Μάρκος 12:​30) Μπέκιμ εκ κατά πιο σημαντικά δώρα σο ντινάς-αμέν λατσσιμάσαρ ο Ντεβέλ ισί ότι μπορίνασα τι ντας-λες λατρεία. Σικαβάσα κο Ιεχωβά ότι μανγκάσα-λες κάνα “κεράσα λέσκε εντολές”. (1 Ιωάν.  5:3) Εκ κατά εντολές σο μανγκέλα ο Ιεχωβά τι ντας καν ισί η εντολή σο βακερντάς ο Ιησούς τι κεράς μαθητέν ντα τι μπολάς-λεν. (Ματθ. 28:​19) Επίσης, βακερντάς αμένγκε τι μανγκάς ο εκ ι γιαβερές. (Ιωάν. 13:​35) Ο Ιεχωβά κα κερέλ σαρέ οντουλέν σο ντένα-λες καν τι αβέν αντρέ λέσκε φαμιλιάτε σο ισί σαρό κο ντουνιάς ντα ντένα-λες λατρεία.​—Ψαλμ. 15:1, 2.

14. Σαρ μπορίνασα τι σικαβάς αγάπη ι γιαβερένγκε; (Ματθαίος 9:​36-38· Ρωμαίους 12:10)

¹⁴ Τι σικαβέν ότι μανγκένα ι γιαβερέν. Η αγάπη ισί η πιο σημαντική ιδιότητα ι Ιεχωβάσκι. (1 Ιωάν. 4:8) Ο Ιεχωβά σικαντάς ότι μανγκέλα-αμέν πριν τι σικλιάς-λες. (1 Ιωάν. 4:9, 10) Μοιάζασα λέστε κάνα σικαβάσα ότι μανγκάσα ι γιαβερέν. (Εφεσ. 5:1) Εκ κατά πιο λατσσέ τρόπους για τι σικαβάς ότι μανγκάσα ι τζενέν ισί τι βοηθίνας-λεν τι σικλιόν ι Ιεχωβάσκε καζόμ ισί ατζέ σαάτι. (Διαβάνεν Ματθαίος 9:​36-38) Κάνα κεράσα-λες ανταβά, ντάσα-λεν ι ευκαιρία τι σικλιόν σο πρέπει τι κερέν για τι αβέν αντρέ κι φαμιλί κι Ντεβλέσκι. Κάνα μπολντιόλα εκ τζενό, πρέπει τι συνεχίνας τι μανγκάς-λες ντα τι σεβάνας-λες. (1 Ιωάν. 4:​20, 21) Σαρ κεράσα-λες ανταβά; Εκ παράδειγμας ισί τι πακιάς ότι οντουβά σο τσσίντελα-λες τι κερέλ οντουλά σο κερέλα ισί λατσσιμάσκε. Οτθάρ, άμα ναστί αγαβάσα σόσκε κερντάς εκ πράγμας, να κα πακιάς ότι κερντάς-λες επειδή τθερέλας κάτι γκεραλό πι γκοντιάτε. Οκιά μπάνταρ, κα σικαβάς σεβασμός αμαρέ πφραλέσκε ντα κα πακιάς ότι ισί πιο οπρέ αμένταρ.​—Διαβάνεν Ρωμαίους 12:​10· Φιλιπ. 2:3.

15. Κάσκε πρέπει τι σικαβάς έλεος ντα λατσσιπέ;

¹⁵ Τι σικαβέν έλεος ντα λατσσιπέ σαρέ ι τζενένγκε. Άμα μανγκάσα τι αβάς αντρέ κι φαμιλί κι Ιεχωβάσκι για πάντα, πρέπει τι κεράς αμαρέ ζωγιάτε οντουλά σο βακερέλα ο Λάφι ι Ντεβλέσκο. Για παράδειγμας, ο Ιησούς σικλιαρντάς ότι πρέπει τι σικαβάς έλεος ντα λατσσιπέ σαρέ ι τζενένγκε, ατζέ-ντα αμαρέ ντουσμανίνγκε. (Λουκ. 6:​32-36) Μπάζιμα, ανταβά μπορεί τι αβέλ αμένγκε δύσκολος. Άμα αβέλα-πες κάτι ασακό, πρέπει τι σικλιάς τι σκεφτίνας ντα τι κεράς ο πράγματα σαρ ο Ιησούς. Κάνα κεράσα ο πιο λατσσό σο μπορίνασα για τι ντας καν κο Ιεχωβά ντα τι μοιάζας κο Ιησούς, σικαβάσα αμαρέ Νταντέσκε, ι Ιεχωβάσκε, ότι μανγκάσα τι αβάς αντρέ λέσκε φαμιλιάτε για πάντα.

16. Σαρ μπορίνασα τι αρακχαβάς ο λατσσό ναβ σο τθερέλα η φαμιλί ι Ιεχωβάσκι;

¹⁶ Τι αρακχαβέν ο λατσσό ναβ σο τθερέλα η φαμιλί ι Ιεχωβάσκι. Εκχέ φαμιλιάτε, μπουτ φαρ εκ χουρντό τσσαβό μανγκέλα τι μοιάζελ πι μπαρέ πφραλέστε. Άμα ο μπαρό τσσαβό κερέλα πι ζωγιάτε ο αρχές ι Γραφιάκε, κα αβέλ λατσσό παράδειγμας πι χουρντέ πφραλέσκε. Αλλά άμα κα αρχίνελ τι κερέλ μπέτι πράγματα, σοράν μπορεί τι κερέλ-λεν λέσκο χουρντό πφραλ-ντα. Κάτι ασακό αβέλα-πες κι φαμιλί κι Ιεχωβάσκι-ντα. Άμα εκ Χριστιανός σο ισινέ πιστός αβιλό αποστάτης ή κερέλα λουμνικανέ ή γιαβερά γκεραλέ πράγματα, μπορεί γιαβερά-ντα τι μοιάζεν λέστε ντα τι κερέν βον-ντα μπέτι πράγματα. Οντουλά σο κερένα-λες ανταβά χαλαβένα ο λατσσό ναβ σο τθερέλα η φαμιλί ι Ιεχωβάσκι. (1 Θεσ. 4:​3-8) Δεν πρέπει τι κεράς αμέν-ντα οντουβά σο κερένα βον ούτε πρέπει τι μουκχάς καέκ πράγμας τι κερέλ ζιάνι κι φιλία σο τθεράσα αμαρέ Νταντέσαρ.

17. Καλέ τροπόσαρ δεν πρέπει τι σκεφτίνας, ντα σόσκε;

¹⁷ Τι ντεν μπέσα κο Ιεχωβά ντα όχι κο υλικά πράγματα. Ο Ιεχωβά ντέλα πο λάφι ότι κα ντελ-αμέν χαμπέ, σέα ντα κχερ άμα τσσουβάσα πρώτα λέσκι Βασιλεία ντα άμα κεράσα αμαρέ ζωγιάτε οντουλά σο βακερέλα βοβ. (Ψαλμ. 55:​22· Ματθ. 6:​33) Κάνα ντάσα λέσκε μπέσα, να κα σκεφτίνας ότι ο υλικά πράγματα ανταλέ ντουνιάσκε κα αρακχαβέν-αμέν ντα κα ντεν-αμέν χαρά. Τζανάσα ότι κα τθεράς ειρήνη αμαρέ γκοντιάτε σάντε άμα κεράσα οντουβά σο μανγκέλα ο Ιεχωβά. (Φιλιπ.  4:6, 7) Ατζέ-ντα άμα τθεράσα ο λοβέ τι κινάς μπουτ πράγματα, πρέπει τι σκεφτίνας άμα τθεράσα ο σαάτι ντα ι ζορ για τι χρησιμοποιήνας-λεν ντα τι περιποιήνας-λεν. Μήπως κα περάς κι παγίδα τι μανγκάς μπουτ αμαρέ υλικά πράγματα; Πρέπει τι ντας-αμέν γκοντί ότι ο Ιεχωβά μπεκλεντίνελα αμένταρ τι κεράς μερικά πράγματα αντρέ λέσκε φαμιλιάτε. Ανταβά μανγκέλα τι βακερέλ ότι δεν πρέπει τι μουκχάς ο υλικά πράγματα τι ταρτίνεν αμαρί προσοχή. Σίγουρα, να μανγκάσα τι αβάς σαρ ο τερνό σο μανγκέλας αζόμ μπουτ ο πράγματα σο τθερέλας ντα αντικάς αποφασιντάς μα τι τζαλ παλάλ κο Ιησούς. Οτθάρ, χασαρντάς ι ευκαιρία τι υπηρετίνελ ι Ιεχωβάς ντα τι αβέλ τσσαβό λέσκο!​—Μάρκ. 10:​17-22.

18. Καβά μπαρό προνόμιος ντα καλά ευλογίες κα τθερέν για πάντα ο τζενέ σο ντένα καν κο Ντεβέλ;

¹⁸ Ο τζενέ σο ντένα καν κο Ντεβέλ κα τθερέν ο μπαρό προνόμιος τι μανγκέν ντα τι υπηρετίνεν ι Ιεχωβάς για πάντα! Οντουλά σο τθερένα ι ελπίδα τι τζουβντιόν κι πφουβ κα τθερέν ι χαρά-ντα τι φροντίνεν ι πφουβ, σο κερντάς-λα ο Ιεχωβά για τι αβέλ λένγκο τέλειος κχερ. Ατζεχάνικ, η Βασιλεία ι Ντεβλέσκι κα κερέλ ι πφουβ ντα σαρέ ο πράγματα τι αβέν πάλι σουκάρ. Ο Ιησούς κα νασκιαρέλ σαρέ ο προβλήματα σο αβιλέ επειδή ο Αδάμ ντα η Εύα αποφασιντέ τι νασέν κατά Ντεβλέσκι φαμιλί. Ο Ιεχωβά κα τζουβντιαρέλ εκατομμύριε τζενέν ντα κα ντελ-λεν ι ευκαιρία τι τθερέν τέλεια υγεία ντα τι τζουβντιόν για πάντα εκχέ πφουβιάτε σο κα αβέλ παράδεισος. (Λουκ. 23:​42, 43) Καζόμ ο τζενέ σο υπηρετίνενα ι Ιεχωβάς κα αβέν τέλειοι, κα τθερέν ι «δόξα ντα [ι] λάμψη» σο βακερντάς ο Δαβίδ.​—Ψαλμ. 8:5.

19. Καλά πράγματα πρέπει τι τθεράς αμαρέ γκοντιάτε;

¹⁹ Άμα ισινέν αντρέ κο «μπαρό πλήθος», τθερένα εκ μπουτ σουκάρ ελπίδα. Ο Ντεβέλ μανγκέλα-τουμέν. Μανγκέλα τι αβέν αντρέ λέσκε φαμιλιάτε. Οτθάρ, τι κερέν σο νακχέλα τουμαρέ βαστένταρ για τι κερέν λέσκο γκι. Κάθε ντιβές, τι τθερέν τουμαρέ γκοντιάτε ντα τουμαρέ γκίστε οντουλά σο βακερντάς ο Ντεβέλ ότι κα κερέλ. Τι αβέν πφερντέ εκτίμηση σο τθερένα ο προνόμιος τι ντεν λατρεία αμαρέ Νταντές, ι Ιεχωβάς, σο μανγκέλα-αμέν μπουτ ντα τι πακιάν ότι ισί μπουτ σημαντική η ελπίδα σο τθερένα τι δοξάνεν-λες για πάντα!