1. Ninji pinafuna kucitika kuna ife tingayang’ana pinthu pyonsene pidacita Yahova?

TINGANYEREZERA thangwi ya pinthu pyonsene pidacita Yahova, panango tinakhala na mabvero mabodzi ene ninga akhali na Dhavidhi wakuti acita phembero mbabvundza: ‘Ndingayang’ana kudzulu, mbandiona mabasa a manja anu, mwezi na nyenyezi zidacita imwe, kodi munthu mbani toera munkumbuke, pontho mbani mwana wa munthu toera muntsalakane?’ (Masal. 8:3, 4) Ninga Dhavidhi, tingayang’ana pinthu pyonsene pidacita Yahova panango tinadzumatirwa mbatinyerezera kuti ndife ang’ono kakamwe toera Yahova atitsalakane.

2. Kodi Yahova akhafuna kuti Adhamu na Eva acitenji?

² Adhamu na Eva akhali ana akutoma a Yahova pa dziko yapantsi, pontho iye akhali babawo waufuni. Yahova aapasa basa toera acite. Iye aapanga: ‘Balanani, munjipe, dzadzani dziko yapantsi mbamuitsalakana.’ (Gen. 1:28) Natenepa iwo akhafunika kubala ana na kutsalakana dziko yapantsi. Adhamu na Eva mbadabvera Yahova na kucita pyonsene pidapangwa iwo, iwo na anawo mbadakhala kwenda na kwenda.

3. Thangwi yanji tinakwanisa kulonga kuti Adhamu na Eva akhali akufunika kuna Yahova pabodzi na aanju?

³ Adhamu na Eva akhali akufunika kakamwe kuna Yahova pabodzi na aanju. Mwakubverana na Masalmo 8:5, Dhavidhi alonga thangwi ya njira idacita Yahova munthu kuti: ‘Imwe mwancepesa pang’ono kupiringana aanju, pontho imwe mwampasa mbiri na cilemedzo.’ Mwandimomwene, Yahova nee apasa anthu mphambvu, udziwisi na maluso ninga aanju. (Masal. 103:20) Mbwenye anthu ‘acepeswa pang’ono’ mukulandaniswa na aanju akuti ndi amphambvu kakamwe. Pyenepi ndi  pyakudzumatirisa kakamwe! Mwandimomwene, pidacita Yahova Adhamu na Eva iye akhadaapasa umaso wadidi kakamwe.

4. Ninji pidacitika kuna Adhamu na Eva thangwi yakukhonda kubvera Yahova, pontho tinadinganji mu nsolo uno?

 ⁴ Mwakutsukwalisa Adhamu na Eva nee abvera Yahova, natenepa iwo asiya kucita khundu ya atumiki ace. Pyenepi pyabweresa nyatwa zizinji kuna iwo pabodzi na anawo ninga pinafuna kuona ife mu nsolo uno. Mbwenye cifuniro ca Yahova nee cacinja. Iye asafuna kuti anthu anambvera akhale anace kwenda na kwenda. Pakutoma tinaona kuti Yahova apangiza tani kuti ndife akufunika. Buluka penepo tinaona pinthu pisafunika ife kucita toera ticite khundu ya atumiki ace. Pakumalisa, tinaona nkhombo zinafuna kudzakhala na atumiki a Yahova pa dziko yapantsi kwenda na kwenda.

5. Tinapangiza tani kuti tisalemedza Mulungu thangwi yakuticita mwakulandana na iye?

⁵ Yahova apangiza kuti ndife akufunika thangwi yakuticita mwakulandana na iye. (Gen. 1:26, 27) Nakuti ife tacitwa mwakulandana na Mulungu, tinakwanisa kupangiza makhaliro ace adidi kakamwe ninga ufuni, ntsisi, kukhulupirika na ulungami. (Masal. 86:15; 145:17) Tingapangiza makhaliro anewa tisalemedza Yahova, pontho tinapangiza kuti tisapereka takhuta kuna iye. (1 Ped. 1:14-16) Tingapangiza makhaliro anakomerwa na Babathu wakudzulu, ife tinakhala akutsandzaya. Nakuti Yahova aticita mwakulandana na iye, iye atipasa maluso akuti anatiphedza toera kucita khundu ya atumiki ace.

6. Yahova apangiza tani kuti anthu ndi akufunika mu ndzidzi udacita iye dziko yapantsi?

⁶ Yahova aticitira dziko yapantsi yakuti ndi yadidi kakamwe. Mbadzati kucita munthu, pakutoma Yahova acita dziko yapantsi toera anthu akhalemo. (Yobe 38:4-6; Yer. 10:12) Nakuti Yahova ndi wakupasa mwakudzala manja, iye acita pinthu pizinji pyadidi toera titsandzaye napyo. (Masal. 104:14, 15, 24) Pontho pidamala iye kucita pinthu pyenepi, iye aona kuti pinthu pyonsene ‘pikhali mwadidi.’ (Gen. 1:10, 12, 31) Kusiyapo pyenepi, Yahova apangiza kuti anthu ndi akufunika kakamwe mukuapanga toera ‘atonge’ pinthu pyonsene pyadidi pidacita iye pa dziko yapantsi. (Masal. 8:6) Natenepa Mulungu asafuna kuti anthu aungwiro atsalakane pinthu pyonsene pidacita iye, kwenda na kwenda. Kodi imwe musapereka takhuta kuna Yahova kazinji kene thangwi ya pikiro ineyi yakutsandzayisa?

7. Kodi lemba ya Yoswa 24:15, isapangiza tani kuti anthu ali na ufulu wakusankhula?

⁷ Yahova atipasa ufulu wakusankhula. Natenepa ife tisakwanisa kusankhula pinthu pinafuna ife kucita mu umaso wathu. (Lerini Yoswa 24:15.) Mulungu wathu waufuni asakomerwa kakamwe ife tingasankhula kuntumikira. (Masal. 84:11; Mis. 27:11) Ife tinakwanisa kuphatisira ufulu wathu wakusankhula toera kucita pisankhulo pizinji pyadidi. Cincino tendeni tione kuti Yezu aphatisira tani ufulu wace wakusankhula.

8. Kodi Yezu apangiza tani kuti aphatisira mwadidi ufulu wace wakusankhula?

⁸ Ife tinakwanisa kutowezera citsandzo ca Yezu tingaikha pifuno pya anthu anango pa mbuto yakutoma. Ntsiku inango, Yezu na apostolo ace akhadaneta kakamwe, natenepa iwo aenda ku mbuto inango toera apume. Mbwenye iwo nee akwanisa kupuma, thangwi anthu azinji aatowera, pontho anthu anewa akhafuna kakamwe kupfundziswa na Yezu. Mbwenye Yezu nee aipirwa. M’mbuto mwace, iye aabvera ntsisi, mbatoma “kuapfundzisa pinthu  pizinji.” (Marko 6:30-34) Tingatowezera Yezu mukuphatisira ndzidzi na mphambvu zathu toera kuphedza anango, ife tinapasa mbiri Babathu wakudzulu. (Mat. 5:14-16) Kusiyapo pyenepi, ife tinapangiza kuna Yahova kuti tisafuna kucita khundu ya atumiki ace.

9. Ndi muoni upi udapereka Yahova kuna anyakubala?

⁹ Yahova apasa anthu mwai wakubala ana, pontho aapasa basa yakupfundzisa anawo toera afune Yahova na kuntumikira. Khala imwe ndimwe nyakubala, kodi musapereka takhuta thangwi ya muoni unoyu? Maseze aanju apaswa maluso mazinji akudzumatirisa na Yahova, iwo nee apaswa mwai unoyu wakubala ana. Na thangwi ineyi, khala ndimwe nyakubala perekani takhuta thangwi ya mwai unoyu wakubala ana. Kusiyapo pyenepi, anyakubala apaswa basa yakufunika kakamwe yakupfundzisa anawo na ‘kualanga mwakubverana na pinalonga Yahova.’ (Aef. 6:4; Deut. 6:5-7; Masal. 127:3) Toera kuphedza anyakubala, gulu ya Yahova isapereka pinthu pizinji ninga mabukhu, mavidhyu, nyimbo na mphangwa zinango zinagumanika mu saiti yathu. Mwakukhonda penula, Yahova na Yezu Kristu asafuna kakamwe anang’ono. (Luka 18:15-17) Natenepa anyakubala anganyindira Yahova mbacita pyonsene pinakwanisa iwo toera kutsalakana anawo, Yahova asakomerwa kakamwe. Pontho anyakubala anewa asaphedza anawo toera atumikire Yahova kwenda na kwenda.

10-11. Ndi pinthu pipi pinacita Yahova mukuphatisira ntsembe yaciomboli?

¹⁰ Yahova apereka Mwanace wakufunika kakamwe toera ife tikwanise kucita pontho khundu ya atumiki Ace. Ninga pidalonga ife mu  ndima 4, Adhamu na Eva pabodzi na anawo aluza mwai wakucita khundu ya atumiki a Yahova. (Aroma 5:12) Adhamu na Eva asankhula kukhonda bvera Mulungu, natenepa iwo nee akhalabve akuthema toera kucita khundu ya atumiki a Yahova. Mphapo ndiye tani anawo? Mwaufuni, Yahova acita masasanyiro toera iwo akwanise kucita khundu ya atumiki ace. Iye acita pyenepi mukuphatisira ntsembe ya Mwanace, Yezu Kristu. (Juwau 3:16; Aroma 5:19) Na thangwi ya ntsembe ineyi, Yahova asankhula anthu akukhulupirika akukwana 144.000 toera akhale anace.—Aroma 8:15-17; Apok. 14:1.

¹¹ Kusiyapo anthu anewa, mamiliyau a anthu anango akukhulupirika asatumikirambo Mulungu. Kusiyapo pyenepi, iwo asadikhirambo kucita khundu ya atumiki a Mulungu kwenda na kwenda pakumala kwa mayesero akumalisa kunkhomo kwa pyaka 1.000. (Masal. 25:14; Aroma 8:20, 21) Thangwi ya cidikhiro ceneci, iwo asaona Yahova ninga Nciti wawo na ‘Babawo.’ (Mat. 6:9) Kusiyapo pyenepi, anthu anafuna kudzalamuswa muli akufa, Yahova anadzaapasa mwai toera kupfundza pya iye. Ale anafuna kudzabvera pitsogolero pyace anadzacitambo khundu ya atumiki ace.

12. Ndi mbvundzo upi unafuna ife kutawira cincino?

¹² Ninga taona, Yahova acita pinthu pizinji toera kupangiza kuti anthu ndi akufunika kakamwe. Iye asankhula anyakudzodzwa toera akhale anace, pontho apasa “mwinji ukulu” cidikhiro ca kudzakhala anace mu dziko ipswa. (Apok. 7:9) Mphapo tisafunika kucitanji cincino toera tipangize kuna Yahova kuti tisafuna kucita khundu ya atumiki ace kwenda na kwenda?

13. Tisafunika kucitanji toera tikwanise kucita khundu ya atumiki a Yahova? (Marko 12:30)

¹³ Pangizani ufuni wanu kuna Yahova mukuntumikira na ntima wanu onsene. (Lerini Marko 12:30.) Mulungu atipasa pinthu pizinji. Cibodzi mwa pinthu pyenepi ndi maluso ali na  ife toera kumulambira. Ife tinapangiza kuti tisafuna Yahova ‘tingabvera matongero ace.’ (1 Juwau 5:3) Mabodzi mwa matongero anewa ndi ale adalonga Yezu akucita anyakupfundza na kuabatiza. (Mat. 28:19) Kusiyapo pyenepi, iye atipasambo ntemo wakufunana unango na ndzace. (Juwau 13:35) Yahova asatawirisa kuti ale onsene anambvera acite khundu ya alambiri ace pa dziko yonsene yapantsi.—Masal. 15:1, 2.

14. Tinapangiza tani ufuni kuna anango? (Mateu 9:36-38; Aroma 12:10)

¹⁴ Funani anango. Ufuni ndi n’khaliro wakufunika kakamwe kuna Yahova. (1 Juwau 4:8) Yahova apangiza ufuni kuna ife mbatidzati kundziwa. (1 Juwau 4:9, 10) Ife tinakwanisa kuntowezera tingafunambo anango. (Aef. 5:1) Njira ibodzi yakufunika kakamwe toera kupangiza ufuni kuna anthu ndi kuaphedza toera apfundze pya Yahova ndzidzi mbuciripo. (Lerini Mateu 9:36-38.) Tingacita pyenepi, ife tinaaphedza toera akwanise kudziwa pinthu pisafunika iwo kucita kuti acite khundu ya atumiki a Mulungu. Kusiyapo pyenepi, munthu angamala kubatizwa tisafunika kupitiriza kunfuna na kumulemedza. (1 Juwau 4:20, 21) Mphapo tinacita tani pyenepi? Njira ibodzi yakucita pyenepi ndi kunsimba thangwi ya cisankhulo cidacita iye. Mbwenye iye angacita cinthu cakuti nee tacibvesesa mwadidi, nee tisafunika kumpenula. M’mbuto mwace, ife tisafunika kumulemedza mbatimuona ninga nkulu kupiringana ife.—Lerini Aroma 12:10; Afil. 2:3.

15. Tisafunika kukhala antsisi na akukoma ntima kuna ani?

¹⁵ Khalani antsisi na akukoma ntima kuna anthu onsene. Khala ife tisafuna kucita khundu ya atumiki a Yahova kwenda na kwenda, tisafunika kuphatisira pinalonga Bhibhlya mu umaso wathu. Mwacitsandzo, Yezu alonga kuti tisafunika kukhala antsisi na akukoma ntima kuna anthu onsene, kuphatanizambo anyamalwa athu. (Luka 6:32-36) Midzidzi inango, panango pyenepi pinakhala pyakunentsa kuna ife toera kupicita. Khala ndi tenepo, ife tisafunika kupfundza kunyerezera na kucita pinthu ninga Yezu. Tingawangisira toera kubvera Yahova na kutowezera Yezu, tinapangiza kuna Babathu wakudzulu kuti tisafuna kucita khundu ya atumiki ace kwenda na kwenda.

16. Thangwi yanji tisafunika kupangiza makhaliro adidi pakati pa atumiki a Yahova?

¹⁶ Pangizani makhaliro adidi pakati pa atumiki a Yahova. Pa banja, mwana wang’ono kazinji kene asatowezera pinthu pinacita mano wace. Mano wace angaphatisira midida ya Bhibhlya, iye anakhala citsandzo cadidi kuna m’bale wace wang’ono. Mbwenye mano wace angacita pinthu pyakuipa, ng’ono wace anatowezerambo pibodzi pyene. Munjira ibodzi ene, pyenepi pisacitikambo pakati pa atumiki a Yahova. Khala Nkristu wakukhulupirika apanduka mbatoma kucita pinthu pyakuipa, anango anakwanisa kutowezera pinthu pinacita iye. Anthu anacita pyenepi asaipisa makhaliro a alambiri a Yahova. (1 Ates. 4:3-8) Natenepa ife nee tisafunika kutowezera pinthu pinacita anthu anewa akuipa, pontho nee tisafunika kucita pinthu pyakuti pinafudza uxamwali wathu na Babathu wakudzulu.

17. Ndi manyerezero api akuti tisafunika kuacalira, pontho thangwi yanji?

¹⁷ Nyindirani Yahova, tayu pinthu pyakumanungo. Yahova apikira kuti iye anatipasa cakudya, cakubvala na pakugona tingaikha pa mbuto yakutoma Umambo wace na kubvera midida yace yakulungama. (Masal. 55:22; Mat. 6:33) Tinganyindira pikiro ineyi, ife nee tinanyerezera kuti pinthu pyakumanungo pya dziko ino pinakwanisa kutitsidzikiza na kutipasa umaso wakutsandzaya kwenda na kwenda.  Ife tisadziwa kuti tinakwanisa kukhala na ntendere wandimomwene basi ene tingacita cifuno ca Yahova. (Afil. 4:6, 7) Maseze tikwanise kugula pinthu pizinji, ife tisafunika kunyerezera khala tinakwanisa kukhala na ndzidzi peno mphambvu toera kupiphatisira na kupitsalakana. Kodi imwe musanyindira kakamwe pinthu piri na imwe? Ife tisafunika kukumbuka kuti Mulungu atipasa basa toera kuicita pakati pa atumiki ace. Natenepa ife nee tisafunika kutawira kudzudzumiswa na pinthu pinango. Mwandimomwene ife nee tisafuna kukhala ninga mamuna wakuti akhafuna kakamwe mpfuma kupiringana kukhala nyakupfundza wa Yezu. Thangwi iye aluza mwai wakutumikira Yahova na kukhala m’bodzi wa anace.—Marko 10:17-22.

18. Ndi nkhombo zipi zakukhonda mala zinafuna kudzatambira anthu akubvera?

¹⁸ Anthu akubvera anadzakhala na mwai ukulu kakamwe wakufuna Yahova na kumulambira kwenda na kwenda. Ale anafuna kudzakhala pa dziko yapantsi anadzatsandzaya na kutsalakana dziko yapantsi yadidi kakamwe idapaswa iwo na Yahova toera ikhale mudzi wawo. Mwakukhonda dembuka, Umambo wa Mulungu unadzacitisa kuti dziko yapantsi na pinthu pyonsene pikhale pontho mwadidi kakamwe. Yezu anadzamalisa nyatwa zonsene zidadzesa Adhamu na Eva thangwi yakukhonda kubvera Mulungu. Yahova anadzalamusa muli akufa pikwi na pikwi pya anthu mbaapasa mwai wakukhala na ungumi wadidi na umaso wakwenda na kwenda mu paraizu pa dziko yapantsi. (Luka 23:42, 43) Anthu onsene anatumikira Yahova angadzakhala aungwiro, iwo anadzapaswa ‘mbiri na cilemedzo’ ninga pidalemba Dhavidhi.—Masal. 8:5.

19. Ninji pisafunika ife kunyerezera ntsiku zonsene?

¹⁹ Khala imwe musacita khundu ya “mwinji ukulu” muli na cidikhiro cadidi kakamwe. Mulungu asakufunani, pontho asafuna kuti imwe mucite khundu ya atumiki ace. Natenepa citani pyonsene pinakwanisa imwe toera kunkomeresa. Ntsiku zonsene nyerezerani mwacidikhodikho mapikiro a Mulungu. Pontho lemedzani mwai uli na imwe wakulambira Yahova na kunsimba kwenda na kwenda.