1. Madoso gahi gakarhuyishira omu bwenge erhi rhwakarhanya kw’ebi Yehova alemire?

ERHI rhurhanya kw’ebi Yehova alemire byoshi, rhwanaciyumva nk’oku omwandisi w’ennanga Daudi aciyumvagya erhi adosa ntya omu isala: ‘Nkalola amalunga walemaga, nkalola omwezi n’enyenyezi wajiraga waziheba yo, nnancidose nti: Omuntu aligi munganaci obu okâmukengêra? Mwene muntu aligi nndi obu okâmushibirira?’ (Enna. 8:3, 4, Mashi Bible) Aka Daudi, rhwanarhanya kunganaci rhuba basungunu bwenene erhi rhwakacigerera oku nyenyezi Yehova alemaga na ntyo rhwanasomerwa okubona Yehova anarhushibirire. Cikone, nk’oku rhwayish’ibona, Yehova arhalonzagya mpu amanye Adamu na Eva kone, ci abajira babe baguma b’omu mulala gwage.

2. Muhigo guhi Yehova agwerhe enyanya z’abana bage barhanzi ba hanw’igulu?

² Adamu na Eva bo bali bana barhanzi ba Yehova ba hanw’igulu, na Yehova âli Ishe wabo w’omu mpingu w’obuzigire. Alilonzize oyo mulume na mukage baburhe nka lungu lyo abantu b’omu mulala gwage bayushûka. Nnâmahanga ababwira ntya: “Muburhe, muyololoke, mubumbe igulu munalirhegeke.” (Murh. 1:28) Alilonzize baburhe abana n’okushibirira igulu bulya ho hali aha mwabo. Bacirhumikirage Nnâmahanga n’okujira ebi ali bahunyire, Adamu na Eva n’iburha lyabo bakabezîre baguma bw’omu mulala gwa Nnâmahanga ensiku n’amango.

3. Bulya gurhi rhwakaderha oku Adamu na Eva balihîrwe enafasi y’olukengwa omu mulala gwa Yehova?

³ Adamu na Eva bagwerhe enafasi y’olukengwa omu mulala gwa Yehova. Nk’oku biyerekinwe omu Ennanga 8:5, NWT, n’amahugûlo g’idako, Daudi aderha ntya okubiyerekire oku Yehova alemiremwo omuntu: “Wàmujizire munyi hisungunu hyone kuli bamalahika, wamuyambika ishungwe ly’irenge n’obukuze.”  Kobinali, bene bantu barhahâbagwa emisi, obwenge n’obuhashe buli nk’obwa bamalahika. (Enna. 103:20) Bene bantu babà ‘banyi hisungunu hyone’ kulusha abo bamalahika b’emisi bwenene. K’oko kurhakusomezizi? Kobinali Yehova alihire ababusi birhu barhanzi omurhondêro mwinja.

4. Gurhi enafasi ya Adamu na Eva y’omu mulala gwa Yehova yayishir’iba, na bici rhwaganirira mw’eci cigabi?

 ⁴ Eby’okugayisa, kuli kubona oku Adamu na Eva baheza enafasi yabo omu mulala gwa Yehova. Oko bajiraga kwalerhera iburha lyabo buhanya bunji, nk’oku rhwayish’ibona mw’eci cigabi. Cikone omuhigo gwa Yehova gurhasag’ishanja. Alonzize bene bantu bamurhumikira babe bana bage ensiku n’amango. Rhuganirirage gurhi Yehova arhuhiremwo olukengwa. Rhwacibiganirira ebi rhushinganine rhujire ene lyo rhuyerekana oku rhulonzize rhube baguma bw’omu mulala gwa Nnâmahanga. Na buzinda, rhwaganirira emigisho abana ba Yehova ba hanw’igulu bayish’ishagalukira ensiku n’amango.

5. Gurhi rhwakahamwo Yehova irenge okubona arhulemire oku nshusho yage?

⁵ Yehova arhuhire olukengwa erhi arhulema oku nshusho yage. (Murh. 1:26, 27) Bulya rhwalemirwe oku nshusho ya Nnâmahanga, rhwanaba na morhere manji gali nk’agage n’okugayerekana, kwa lwiganyo, obuzigire, obonjo, obwishwekerezi n’obushinganyanya. (Enna. 86:15; 145:17) Erhi rhuyerekana ago morhere, rhunahe Yehova irenge n’okuyerekana oku rhumuvuzire omunkwa. (1 Pt. 1:14-16) Erhi rhucigendesa omu njira esimisize Larha wirhu w’omu mpingu, rhunabe n’omwishingo n’okurhimûkwa. N’erhi Yehova arhulema oku nshusho yage, arhuhâ obuhashe bw’okuba bantu alonzize babe baguma b’omu mulala gwage.

6. Gurhi Yehova ahîremwo bene bantu olukengwa amango arheganyagya igulu?

⁶ Yehova arhujirira ahantu hago-hago h’okulama. Embere Yehova aleme omuntu, arhang’irheganyiza bene bantu igulu balamamo. (Ayu. 38:4-6; Yer. 10:12) Bulya aba mwinja anaba muhânyi, Yehova arhurheganyigiza bintu binji binja lyo rhubishagalukira. (Enna. 104:14, 15, 24) Mango maguma arhanya kw’ebi alemire, na buzinda “abona oku binali binja.” (Murh. 1:10, 12, 31) Ahîre bene bantu olukengwa erhi abaha “obuhashe bw’okurhegeka” emikolo yage yoshi minja alemaga hanw’igulu. (Enna. 8:6, NWT) Omuhigo gwa Nnâmahanga kuba kulonza bene bantu bimana babe n’omwishingo omu kushibirira eyo mikolo yoshi ensiku n’amango. K’onavuge Nnâmahanga omunkwa ngasi mango kw’eco ciragane cinja arhuhîre?

7. Gurhi olwandiko lwa Yozwe 24:15 luyerekinemwo oku bene bantu bajira oluhûma lw’okucishoga?

⁷ Yehova arhuhîre oluhembo lw’oluhûma lw’okucishoga. Rhwanacishoga ebi rhwajira omu kalamo kirhu. (Osome Yozwe 24:15.) Obuhashe bw’okucishoga ebi rhulonzize bunahamagalwe luhûma lw’okucishoga. Larha wirhu w’omu mpingu anashagaluke bwenene erhi rhucishoga okumukolera. (Enna. 84:11; Mig. 27:11) Rhwanakolesa bwinja oluhûma lwirhu lw’okucishoga omu njira ziri lubero. Rhuganirire olwiganyo Yezu arhulekire.

8. Omu njira nguma nci Yezu akolesize obuhashe bwage bw’okucishoga?

⁸ Omu kuyiga olwiganyo lwa Yezu, rhwanacishoga okukahira amalagirire g’abandi oku nafasi ntanzi embere z’agirhu. Mango maguma Yezu n’entumwa zage bal’irhamire bwenene, balonza ahantu hali akahwenyenye lyo baj’irhamûka. Cikone birhahashikanaga barhamûke. Ehitû hy’abantu hyabarhimana aho, banakagilindirira okuyigirizibwa na Yezu. Cikone oko kurhagayisagya Yezu. Lubero n’oko, ayumviza abo bantu obonjo. Na gurhigi ajijire muli ako  kanga? “Arhondera okubayigiriza binji.” (Mk. 6:30-34) Erhi rhuyiga olwiganyo lwa Yezu omu kuhâna akasanzi kirhu n’emisi yirhu lyo rhurhabala abandi, oko kunalerhere Larha wirhu w’omu mpingu irenge. (Mt. 5:14-16) Na kandi rhunayereke Yehova oku rhulonzize rhube baguma b’omu mulala gwage.

9. Bici ababusi bashinganine bakakengera?

⁹ Yehova ahîre bene bantu obuhashe bw’okuburha abana, anabaha omukolo gw’okubayigiriza bazigire Yehova n’okumukolera. Akaba oli mubusi, k’onashagalukire olo luhembo lwago-lwago? Ciru akaba bamalahika bagishirwe na Yehova, barhahâbagwa olo lukengwa. Omu kurhanya kuli oko, balya bali balera abana bashinganine bashagalukire olwo lukengwa bahâbirwe lw’okubalera. Ababusi bahâbirwe omuhako, mukolo gwabulagirire gw’okulera abana babo omu ‘kubahana bulya buhane burhenzire emwa Nyakasane [Yehova, NWT].’ (Ef. 6:4, Mashi Bible; Lush. 6:5-7; Enna. 127:3) Ikubuliro lya Yehova lyarheganyize bikolanwa binji biyimangire oku Bibliya lyo lirhabala ababusi, kwa lwiganyo, ebicapo, amavideo, emiziki, n’ebindi biba oku Enternete. Kobinali, Larha wirhu w’omu mpingu n’Omugala banazigire emisole yirhu. (Lk. 18:15-17) Yehova anashagaluke bwenene, erhi ababusi bakamulangalira n’okujira okwabo koshi lyo bashibirira abana babo. N’abo babusi banahe abana babo obulyo b’okuyishiba cigabi c’omulala gwa Yehova ensiku n’amango!

10-11. Bici Yehova ajijire bihashikane kugerera engombôlo?

¹⁰ Yehova ahâna Omugala muzigirwa bwenene lyo rhucib’iba baguma bw’omu mulala gwage. Nk’oku rhwabonaga omu  cifungo ca 4, Adamu na Eva baheza enafasi yabo omu mulala gwa Yehova, banayihegeza abana babo. (Rm. 5:12) Adamu na Eva bacishoga okurharhumikira Nnâmahanga, na ntyo oko kwarhuma abakaga omu mulala gwage. Cikone bicigi byahikire iburha lyabo? Enyanya z’obuzigire bwage, Yehova arhôla omuhigo gwakahashisa bana baguma na baguma bw’omu iburha lya Adamu bayemire okumurhumikira, bayishiba baguma bw’omu mulala gwage. Ajijire ntyo kugerera enterekêro y’Omugala cusha, Yezu Kristu. (Yn. 3:16; Rm. 5:19) Na ntyo kugerera enterekêro Yezu ahânaga, bantu 144 000 babezire bishwekerezi kuli Nnâmahanga bayemerirwe okuba bana balere ba Nyamuzinda.​—Rm. 8:15-17; Maf. 14:1.

¹¹ Na kandi, emiliyoni y’abantu bishwekerezi, bali barhumikira n’okujira obulonza bwa Nnâmahanga. Bagwerhe obulangalire bw’okuyishiba baguma bw’omu mulala gwa Nnâmahanga loshi-loshi oku buzinda bw’amarhangulo mazinda gayishiba enyuma z’Emyaka Cihumbi y’Oburhegesi bwa Kristu. (Enna. 25:14; Rm. 8:20, 21) Okubona bagwerhe obo bulangalire, ciru na muli gano mango banahamagala Yehova, Lulema wabo, “Larha.” (Mt. 6:9) Abanafûlwè nabo bayish’ihâbwa obulyo bw’okuyiga ebi Yehova alonzize bajire. Abayish’iyemera obulongozi bwage bayishihikira nabo aha babà baguma bw’omu mulala gwage.

12. Idoso lihi rhukola rhwashuzako?

¹² Nk’oku rhwabwine, Yehova arhôzire omuhigo gw’okuha bene bantu olukengwa omu njira nyinji. Kuhika buno abashîge amavurha bakola babà bana bage balere, ahâ “ehitû hy’abantu” obulangalire bw’okuyishiba bana bage loshi-loshi omw’igulu lihyahya. (Maf. 7:9) Bici rhwakajira muli gano mango lyo rhuyereka Yehova oku rhulonzize okuba baguma bw’omu mulala gwage ensiku n’amango?

13. Bici rhwakajira lyo rhuba baguma bw’omu mulala gwa Nnâmahanga? (Marko 12:30)

¹³ Oyereke Yehova oku omuzigire omu kumukolera n’omurhima gwawe goshi. (Osome Marko 12:30.) Omu bintu byoshi Yehova  arhuhîre, nkaba akantu kaguma kakulu ka muli ebyo byoshi buli buhashe b’okumuharamya. Rhunayereke Yehova oku rhumuzigire omu “kushimba amarhegeko gage.” (1 Yn. 5:3) Egarhi k’amarhegeko Yehova alonzize rhushimbe, hali irhegeko Yezu arhuhâga ly’okujira abanafunzi rhunababatize. (Mt. 28:19) Na kandi arhurhegesire oku rhuzigirane. (Yn. 13:35) Yehova anajire abantu barhumikira amarhegeko gage babe baguma bw’omu mulala gwage gw’omw’igulu lyoshi.​—Enna. 15:1, 2.

14. Gurhi rhwakayekamw’abandi oku rhubazigire? (Mateyo 9:36-38; Abaroma 12:10)

¹⁴ Okazigira abandi. Obuzigire bo buba borhere bukulu bwa Yehova. (1 Yn. 4:8) Yehova ayerekine oku aba arhuzigire ciru n’embere rhumumanye. (1 Yn. 4:9, 10) Rhunayige olwiganyo lwage erhi rhuyereka abandi obuzigire. (Ef. 5:1) Enjira nguma nyinja rhwakayekamw’abandi oku rhubazigire kuli kubarhabala bayige binji lugenda Yehova obu ehisanzi hy’okujira ntyo hicihali. (Osome Mateyo 9:36-38.) Erhi rhwakajira ntyo, rhwanabaha obulyo bw’okuyishiba baguma bw’omu mulala gwa Nnâmahanga. Ciru n’enyuma z’omuntu okubatizibwa, rhushinganine rhugendekere rhwamuzigira n’okumukenga. (1 Yn. 4:20, 21) Gurhi rhwakajiramwo ntyo? Akantu kaguma rhwakajira, kuli kumuyereka oku rhumulangalire. Kwa lwiganyo, rhurhakamushobeka mpu bintu bibi erhi ntanya za kucikaliza zamushumagya aje omu okuli. Lubero n’oko, rhwanayereka mwene wirhu erhi mwali wirhu oku rhumukenzire, omu kumuyereka oku arhulushire.​—Osome Abaroma 12:10; Fl. 2:3.

15. Bandi rhushinganine rhukababalira n’okujirira aminja?

¹⁵ Obe wa kubabalira na wakujirira abantu boshi aminja. Akaba rhulonzize rhube egarhi ka balya bakahash’ihamagala Yehova Ishe wabo ensiku n’amango, rhushinganine rhukakolesa Akanwa kage omu kalamo kirhu. Kwa lwiganyo, Yezu ayigirizize oku rhushinganine rhukababalira n’okujirira abantu boshi aminja, ciru n’abashombanyi birhu. (Lk. 6:32-36) Cikone hali amango rhubona oku kuli kuzibu okujira ntyo. Erhi akaba ntyo kobiri, rhushinganine rhuyige okurhanya n’okujira aka Yezu. Erhi rhujira okwirhu koshi lyo rhurhumikira Yehova n’okuyiga olwiganyo lwa Yezu, rhunayerese Larha wirhu w’omu mpingu oku rhulonzize rhube baguma b’omu mulala gwage ensiku n’amango.

16. Gurhi rhwakalangamw’irenge ly’omulala gwa Yehova?

¹⁶ Olange irenge ly’omulala gwa Yehova. Kanji-kanji, omu mulala binabonekane oku omurhabana murho anakalugiyiga engeso za mukulu wage. Erhi enfûla yakakolesa amakanuni g’Ebibliya omu kalamo, anayerekana olwiganyo lwinja kuli mulumuna wage. Erhi oyo mukulu akakajira ebintu bibi, mulumuna wage naye anayish’ihikira aha ayiga olwiganyo lwage lubi. Ko n’oko ko binayorha omu mulala gwa Yehova. Erhi Omukristu wali mwishwekerezi akayahukirwa n’entanya z’abagoma erhi arhondere okujira ebintu bibi, abandi bali omu cigamba banajamw’enshumi z’okumukulikira mw’olo lugenzi lubi. Abajira ntyo banaheze irenge ly’omulala gwa Yehova. (1 Ts. 4:3-8) Rushinganine rhuyake okukulikira ezo nyiganyo ngalugalu na nta kantu koshi-koshi rhwayemeraga karhusheregeza obwîra bwirhu haguma na Larha wirhu w’obuzigire.

17. Ntanya za gurhi rhushinganine rhuyake, na bulya gurhi?

¹⁷ Olangalire Yehova ci arhali bintu by’omubiri. Yehova alaganyize oku erhi rhwakahira Obwami oku nafasi ntanzi n’erhi rhwakalama nk’oku amakanuni gage gadesire, anarhuhâ ebiryo, emishangi, n’aharhwakalama. (Enna. 55:22; Mt. 6:33) Erhi rhwakakakengera ntyo, rhwanayaka okukarhanya oku ebintu by’omubiri er’igulu lihâna byanarhuma rhwaba n’omurhula n’omwishingo gw’ensiku zoshi. Rhuyishi oku enjira nguma yone rhwakabamwo  n’omurhula gw’ekandalala kuli kujira obulonza bwa Yehova. (Fl. 4:6, 7) Ciru ankaba rhugwerhe obuhashe bw’okugula bintu binji, rhwanacidosa erhi rhugwerhe emisi y’okukabikolesa n’akasanzi k’okukabishibirira. Ka rhwacishwekerera kw’ebyo bintu bwenene? Rhushinganine rhukengere oku Nnâmahanga arhuhire omukolo gw’okujira omu mulala gwage. Kw’okuderha oku rhurhashinganini rhuhikire aha rhwabula kuba masu. Kobinali, rhurhalonzizi rhube nka gulya musole gwalahiraga obulyo gwahâbagwa bw’okukolera Yehova, n’okuba muguma w’omu bana bage balere, bulya alicishwekire oku birugu bya hanw’igulu!​—Mk. 10:17-22.

18. Lukengwa luhi lunene na migisho ehi bene bantu barhumikira Yehova banashagalukire ensiku n’amango?

¹⁸ Bene bantu barhumikira Yehova banashagalukire olukengwa lunene kulusha byoshi: okuzigira n’okuharamya Yehova ensiku n’amango! Abagwerhe obulangalire bw’okuyishilama hanw’igulu banashagalukire okushibirira er’igulu Yehova arheganyagya oku habe aha mwabo. Hano hofi-hofi omu Bwami bwa Nnâmahanga igulu na ngasi bilamako byoshi byacibiba binja-binja. Yezu anayuse ngasi mazibu goshi gadwirhwe na Adamu na Eva erhi bacishoga okurhenga omu mulala gwa Nnâmahanga. Yehova anafûlè emiliyoni y’abantu bafîre n’okubahâ obulyo bw’okulama ensiku n’amango omw’igulu lyayish’ihindulwa paradizo. (Lk. 23:42, 43) Oku abantu bw’omu mulala gwa Yehova bayishihikira aha babà bimana, ko na ngasi muguma wabo anayerekane “ishungwe ly’irenge n’obukuze,” Daudi ayandikaga enyanya zabyo.​—Enna. 8:5, NWT.

19. Bici rhushinganine rhukakengera?

¹⁹ Erhi akaba oli muguma w’omu ‘hitû hy’abantu,’ ogwerhe obulangalire bwinja. Nnâmahanga akuzigire, analonzize obe muguma w’omu mulala gwage. Co cirhumire ojire okwawe koshi ly’omushagalusa. Ngasi lusiku okakengera n’okubîka omu murhima gwawe ebiragane byoshi Yehova alaganyize. Oshagalukire olukengwa ogwerhe lw’okuharamya Larha wirhu muzigirwa w’omu mpingu, onashagalukire obulyo ogwerhe bw’okuyishimukuza ensiku n’amango!