1. Yihowa kalaqinore baala hiincineemmo woyite, mayine hendammora dandiineemmo?

YIHOWA kalaqinota halaˈlado kalqete alame hendeemmo woyite, ninkeno faarsaasinchu Daawiti yiinore yinammora dandiineemmo. Isi huuccatto assiˈranni togo yiino: “Angakki looso gordo, basensara woroottore agananna beeddahe laˈnanni woyite, isire hedattora isi mannu ayeti? Towatattosira isi mannu maati?” (Far. 8:3, 4) Ninkeno Daawiti gede, kalqete alame hendiro garire ikkinoommokkita huwantammora dandiineemmo; qoleno Yihowa ninke daafira hedasi dhagge ikkitankera dandiitanno. Ikkirono, aanchine ronseemmonte gede, Yihowa umi mannira yaano Addaaminna Heewani daafira hedinoha calla ikkikkinni, maatesi wido assinonsa.

2. Yihowa umo uullate aana heedhino oososira hedinori maati?

² Umo uullate aana heedhinori Yihowa ooso, Addaaminna Heewaniiti; isi insara baxillaancho iimi Annansaati. Yihowa insara looso uyinonsa. Togo yiinonsa: “Ille ilamme, sirchiˈne baatto woˈmo; baattono kiˈne gashshitinannita ikkito.” (Kal. 1:28) Yihowa hedinohu, insa ooso iltanno gedeetinna qaensa ikkitino baatto towaattanno gedeeti. Addaaminna Heewani Maganoho hajajante yiinonsare assitinoha ikkoommero, insano oosonsano hegerera Maganu maate wido ikkite heeˈra dandiitanno.

3. Yihowa Addaamiranna Heewanira maatesi giddo ayirrado qeecha uyinonsa yineemmohu mayiraati?

³ Addaamiranna Heewanira Yihowa maate giddo ayirradu qeechi noonsa. Daawiti Faarso 8:5 aana, Yihowa kalaqo ikkinohu manchi beetti daafira togo yiino: “Sokkaasinetewiinni shiimare ajishshe, ayirrinyunna galatu baˈlatto woroottosi.”  Hige mannu oosora sokkaasinennite geeshshi wolqa, egennonna dandoo diuyinoonninsa. (Far. 103:20) Ikkirono, mannu ooso kuri wolqaataamma ayyaanu kalaqonni ‘shiimarella ajjanno.’ Tini dhagge diˈˈikkitanno? Addanko, Yihowa umi anninkeranna amankera dhagge ikkitanno heeshsho uyinonsa.

4. Addaaminna Heewani Yihowara hajajama giwino daafira ma ikkino? Konni birxichira maa ronseemmo?

 ⁴ Hige ma assinanni, Addaaminna Heewani Yihowa maate giddo noonsa qeecha huˈnino. Konni birxichira gedensoonni ronseemmonte gede, insa assooti oosonsano baasa gawajjino. Ikkirono, Yihowa hedinore diagurino. Isi, hajajamanno manni hegerera oososi ikke heeˈrara hasiˈrino. Hanni umo, Yihowa ayirrisinonkehu hiittoonniitiro laˈno. Hakkiinni, Maganu maate wido ikka hasiˈneemmota leellishate xa maa assa dandiineemmoro ronseemmo. Jeefoteno, Yihowa ooso uullate aana hegerera afidhanno atoote laˈneemmo.

5. Maganu danisinni kalaqinonke daafira iso ayirrisa dandiineemmohu hiittoonniiti?

⁵ Yihowa danisinni kalaqe ayirrisinonke. (Kal. 1:26, 27) Maganu daninni kalaqammoommore ikkinoommo daafira, batinye kaajja akattasi lawishshaho baxille, mararro, ammanamanna keeraanchimma lossiˈranna leellisha dandiineemmo. (Far. 86:15; 145:17) Togoo akatta heedhannonke gede sharrammeemmo woyite, Yihowa ayirrinsanni heeˈnoommo, hattono isira galatu noonketa leellinshanni heeˈnoommo. (1 Phe. 1:14-16) Iimi Annanke hagiirsiisanno amanyooti heeˈrinkero, hagiirru noo heeshsho heeˈneemmo. Qoleno Yihowa daninni kalaqammoommo daafira, isi maatesi wido ikkara hasiˈranno manni gedee manna ikka dandiineemmo.

6. Yihowa baatto kalaqi woyite mannu ooso ayirrisinohu hiittoonniiti?

⁶ Yihowa kaajja qae qixxeessinonke. Yihowa umi mancho kalaqara lowo diri albaanni, mannu ooso heedhara baatto kalaqino. (Iyo. 38:4-6; Erm. 10:12) Yihowa shaqqadonna dancha Magano ikkino daafira, hagiidhineemmo gede assannonkeha batinye dancha coye qixxeessino. (Far. 104:14, 15, 24) Isi kalaqino coye lae, “dancha ikkinota” afino. (Kal. 1:10, 12, 31) Isi mannu ooso uullate aana nooha wole kalaqama baala gashshitanno gede ‘moohise’ ayirrisinonsa. (Far. 8:6) Maganu hedo, guuta ikkino manni konne dhagge ikkanno kalaqama towaatanni hegerera hagiidhanni heeˈranno gedeeti. Tenne dhagge ikkitanno hexxora Yihowa ganyite galatatto?

7. Iyyaasu 24:15 mannu oosora doodhate dandoo noonsata leellishshannohu hiittoonniiti?

⁷ Yihowa doodhate dandoo uyinonke. Hakko daafira, hiittoo heeshsho heeˈneemmoro doodha dandiineemmo. (Iyyaasu 24:15 nabbawi.) Baxannonke Maganinke isira soqqama doodhineemmo woyite hagiidhanno. (Far. 84:11; Law. 27:11) Doodhate dandoonke horoonsiˈne, batinye dancha coye assa dandiineemmo. Hanni Yesuusi tennera dancha lawishsha ikkinonke gara laˈno.

8. Yesuusi doodhate dandoosi horoonsiˈrino doogga giddo mitte hiitteeti?

⁸ Yesuusi lawishsha harunsine, uminketa ikkikkinni wolootu hasatto balaxisiisa doodha dandiineemmo. Mitte higge Yesuusinna rosaanosi lowo geeshsha daafurtino daafira, fooliishshidhara mannu nookkiwa hadhino. Kayinni coyi heddino gede diˈˈikkino. Lowo manni Yesuusi rosiisansara quqquxamino daafira, hakkiira marino. Ikkirono, Yesuusi tennera dihifatamino. Hatteentenni isi dayino manna mararino. Marare ma assiyya?  “Lowo coye rosiisinsa.” (Maq. 6:30-34) Ninkeno Yesuusi lawishsha harunsine, woloota kaaˈlate yannankenna wolqanke uyineemmoha ikkiro, iimi Anninke ayirranno gede assineemmo. (Mat. 5:14-16) Qoleno Yihowa maate wido ikka hasiˈneemmota leellinsheemmo.

9. Yihowa mannu oosora hiittee baxxitino elto uyino?

⁹ Yihowa mannaho ooso ilate dandoo uyinonsa; qoleno oosonsa iso baxxannonna isira soqqantanno gede assite lossitara qeecha uyinonsa. Ooso iloottoha ikkiro, tenne baxxitino elto naadatto? Yihowa sokkaasine lowo geeshsha maassiˈrinonsaha ikkirono, ooso ilate dandoo diuyinonsa. Hakko daafira, ooso ilte lossidhanni noori tenne qoossonsa naada hasiissannonsa. Yihowa annuwatenna amuuwaho oosonsa “Mootichu amaalenni” seejjitanni lossitanno gede jawa qeecha uyinonsa. (Efe. 6:4; Mar. 6:5-7; Far. 127:3) Maganu dirijjite annuwanna amuuwa kaaˈlate, Qullaawu Maxaafi aana xintaminoha batinye uduunne lawishshaho borro, viidiyo, faarsonna webisayitenke aana fulannore qixxeessitino. Addanko, iimi Anninkenna Beettisi oosonke baxxanno. (Luq. 18:15-17) Annuwunna amuuwu Yihowa addaxxitannohanna muxxe oosonsa towaaxxate dandiiture baala assitannoha ikkiro, Yihowara tashshi yaannosi. Qoleno hatto assitanno annuwinna amuuwi, oosonsano hegerera Yihowa maate wido ikkitanno gede kaaˈlitannonsa!

10-11. Yihowa wodote kakkalo widoonni mayi faro faninonke?

¹⁰ Yihowa wirro maatesi wido ikka dandiineemmo gede, muxxe Beettosi uyinonke.  Gufo 4te laˈnummonte gede, Addaaminna Heewani Yihowa maate giddo noonsa qeecha huˈnitino; qoleno oosonsano konne qeecha hoogganno gede assitino. (Rom. 5:12) Addaaminna Heewani Maganoho afanni heeˈrenni finqilino daafira, maatesi wido ikka dihasiissannonsa. Oosonsana? Yihowa manna baxanno daafira, Addaami ooso giddonni hajajantannori maatesi wido ikkitanno doogo qixxeessino. Isi tenne assinohu mittu Beettisi Yesuusi Kiristoosi kakkalo widoonniiti. (Yoh. 3:16; Rom. 5:19) Yesuusi kakkalo widoonni, Maganu minshe nookkiha ikke heeˈrinoha 144,000 manna oososi asse adhino.—Rom. 8:15-17; Aju. 14:1.

¹¹ Qoleno, lowo miliyoone ikkannohu wolu ammanamino manni owaate Maganu fajjo wonshanni no. Konni mannira Kumu Diri Gashshooti gumulora jeefote fonqoli gedensaanni, Maganu maate wido ikkate hexxo noonsa. (Far. 25:14; Rom. 8:20, 21) Tini hexxo noonsa daafira, insa xa nafa Kalaqaanchonsa Yihowa “Annanke” yite woshshitanno. (Mat. 6:9) Reyotenni kaˈannorino, Yihowa ma assitara hasiˈrannoro rossanno faro afidhanno. Kuri giddonnino Yihowara hajajama doodhitannori maatesi wido ikkitanno.

12. Xa hiittee xaˈmora dawaro afiˈneemmo?

¹² Kageeshsha ronsummonte gede, Yihowa mannu ooso ayirrisannota leellishannore duuchare assino. Isi buurantinore oososi asse adhe kaino; lowo daga wido ikkitinorira kayinni haaro alamera oososi ikkitanno gede hexxo uyinonsa. (Aju. 7:9) Ikkina hegerera Yihowa maate wido ikka hasiˈneemmota leellishate xa maa assa dandiineemmo?

13. Maganu maate wido ikkate maa assa dandiineemmo? (Maq. 12:30)

¹³ Yihowara woˈmu wodanikkinni soqqante iso baxattota leellishi. (Maarqoosi 12:30 nabbawi.) Maganu shaqqillunni lowo elto uyinonke; uyinonkete jajjabba elto giddo mitte, iso magansiˈrate dandoonkeeti. Yihowa ‘hajajo agadhine’ iso banxeemmota leellinsheemmo. (1 Yoh. 5:3) Yihowa  agadhinammora hasiˈranno hajajo giddo mitte, Yesuusi manna rosaano assinammora uyinonke hajajooti. (Mat. 28:19) Isi mimmito banxeemmo gedeno hajajinonke. (Yoh. 13:35) Yihowa isira hajajantannore alamete doyichora noo maatesi wido ikkitanno gede assanno.—Far. 15:1, 2.

14. Mannaho baxille leellisha dandiineemmohu hiittoonniiti? (Mat. 9:36-38; Rom. 12:10)

¹⁴ Mannaho baxille leellishi. Yihowahu qaru akati baxilleho. (1 Yoh. 4:8) Yihowa baxille leellishinonkehu iso afa nafa anfummosikkinniiti. (1 Yoh. 4:9, 10) Mannaho baxille leellinsheemmoha ikkiro, isi faale haˈnanni heeˈnoommo. (Efe. 5:1) Mannaho baxille leellinsheemmote qara doogga giddo mitte, yanna gooffukki mannu Yihowa afanno gede kaaˈlate. (Maatewoosi 9:36-38 nabbawi.) Hatto assineemmo woyite, insano Maganu maate wido ikkate assa hasiissannonsare affanno gede kaaˈlinanni heeˈnoommo. Mittu manchi cuuami gedensaannino iso baxanna ayirrisa agura dihasiissannonke. (1 Yoh. 4:20, 21) Tenne assa dandiineemmohu hiittoonniiti? Tenne assa dandiineemmo doogga giddo mitte, iso ammanate. Lawishshaho, mitto coye assinohu bushare hedeeti woy umisi qiniitira yeeti yine dihendeemmo. Hatteentenni, rodiinke ninke roorannota ammanne ayirrinseemmosi.—Roomu Sokka 12:10 nabbawi; Fil. 2:3.

15. Shaqqillenna danchumma leellisha hasiissannonkehu ayeooraati?

¹⁵ Mannu baalunkura shaqqillenna danchumma leellishi. Hegerera Yihowa maate wido ikkine heeˈra hasiˈnummoro, Maganu Qaali yaannore assa hasiissannonke. Lawishshu gedera, Yesuusi mannu baalunkura wole agurina diinnankera nafa shaqqillenna danchumma leellinsheemmo gede rosiisinonke. (Luq. 6:32-36) Tenne assa mito woyite qarra ikkitankera dandiitanno. Hakko daafira, Yesuusi hedanno garinni hedanna isi assinore assa rosa hasiissannonke. Yihowara hajajamatenna Yesuusi faale haˈrate dandiinummore baala assineemmoha ikkiro, hegerera Yihowa maate wido ikka hasiˈneemmota leellinsheemmo.

16. Yihowa maate suˈmi mishamannokki gede assa dandiineemmohu hiittoonniiti?

¹⁶ Yihowa maate suˈmi mishamannokki gede qorophi. Duucha woyite, maatete giddo maaˈniidi qaaqqi bayiru assinore assanno. Bayiriidihu Qullaawu Maxaafi biddishshi garinni heeˈrannoha ikkiro, maaˈnu rodiisira dancha lawishsha ikkanno. Bayiru bushare assannoha ikkiro, maaˈniidihuno isi faale haˈre bushare assara dandaanno. Yihowa maate giddono hattooti. Mittu ammaname heeˈrino Kiristaanchi agure kaadaasincho ikkiro, woy amanyoote baˈino heeshsho heeˈra hanafiro, wolootuno isi faale hadhe bushare assate doogantara dandiitanno. Hatto assitannori Yihowa maate suˈmi mishamanno gede assitanno. (1 Tes. 4:3-8) Busha lawishsha harunsineemmokki gede qorophanna baxillaanchu iimi Anninkewiinni xeertiˈneemmo gede assannonkere baalankare giwa hasiissannonke.

17. Mayine heda dihasiissannonke? Mayira?

¹⁷ Maalaamittete coye ikkikkinni Yihowa addaxxi. Yihowa balanxe Gashshootesi hasiˈneemmoha ikkironna keeraanchu seerisi garinni heeˈneemmoha ikkiro, sagale, uddanonna mine aankera qaale eino. (Far. 55:22; Mat. 6:33) Yihowa yiinore addaxxineemmoha ikkiro, tenne alamera afiˈnannihu maalaamittete coyi agarooshshenna geedanno hagiirre aannonke yine dihexxineemmo. Giddiidi keere afiˈneemmohu Yihowa fajjo wonshinummoro calla ikkinota anfoommo. (Fil. 4:6, 7) Anga assiteennanke lowore hidha dandiineemmoha ikkiro nafa, hidhineemmo uduunne horoonsiˈneemmotinna towaaxxineemmo  yanna noonkeronna teˈee buuxiˈra hasiissannonke. Noonke jajja woy uduunne quwa saˈne banxeemmokka? Maganu maatesi giddo loonsammora uyinonke loosi noota dea dihasiissannonke. Hakko daafira, hedonke bebbeehannori heeˈrannokki gede qoropha hasiissannonke. Noosi jajja lowo geeshsha baxino daafira Yesuusa harunsa giwi manchi gede ikka dihasiˈneemmo. Konni manchira Yihowara soqqamatenna isi beetto ikkate qoosso gatte baˈinosi!—Maq. 10:17-22.

18. Owaatu manni hegerera afiˈranno ayirrinyinna atooti hiikkonneeti?

¹⁸ Owaatu manni ayirrinye baala roorino ayirrinye afiˈranno; hakkuno, hegerera Yihowa baxatenna iso magansiˈrate qoossooti! Qoleno, uullate aana heeˈrate hexxo noonsari, Yihowa biifise kalaqinota tenne uulla towaattanni hagiidhitanno. Muli yannara, Maganu Gashshooti giddo uullanna uullate aana noohu heeshsho afiˈrino kalaqami baalu haarooˈmanno. Addaaminna Heewani Maganu maate giddonni fule daafinore baala Yesuusi dhaawanno. Yihowa lowo miliyoone ikkanno manna reyotenni kayise, gannate ikkitanno baattora guuta ordu fayyimma afidhe hegerera heedhanno faro fanannonsa. (Luq. 23:42, 43) Uullate aana heedhannori Yihowa maate miilla guuta ikkitanno woyite, mittu mittunku manchi Daawiti yii ‘ayirrinye’ afiˈranno.—Far. 8:5.

19. Hiittee coyibba hiinca hasiissannonke?

¹⁹ Ati ‘lowo daga’ widootiro, dhagge ikkitanno hexxo noohe. Maganu baxannohe; hattono maatesi wido ikkattora hasiˈranno. Hakko daafira, iso hagiirsiisate dandiittore baala assi. Barru barrunku Maganu uyinohe hexxo hiinci. Shaqqado iimi Annanke magansiˈrate qoossokkinna hegerera iso guwisiˈrate hexxokki godowinta naadi!