1. Ino ty mety ho avy an’eritserintsika lafa tsika mandiniky ty raha iaby niforonini-Jehovah?

MAHATSERIKY vatany ty raha iaby namboarini-Jehovah. Nivola ho zao Davida lafa nandiniky ty sisany amy raha rey: “Laha henteako ty lanitsinao, azy asani-rantsantananao iny, ho zay koa ty vola noho ty basia niforoninao, ino moa ty olombelo mety maty ro tiarovinao? Ino koa moa ty anak’olombelo ro karakaranao?” (Sal. 8:3, 4) Hitani-Davida hoe tena kelikely vatany ie laha ampitovizy amy basia niforonini-Jehovah rey, ka tena nitseriky ie hoe midary azy Jehovah. Mety hanan’eritseritsy ho zay koa tsika. Fe ho hitantsika ato fa tsy hoe nikarakarani-Jehovah avao ry Adama noho Eva, azy olombelo voalohany rey, fa nataony fianakaviany mihintsy.

2. Ino ty raha nitea-Ndranahary hataoni-Adama noho Eva?

² Adama noho Eva ty anakini-Jehovah voalohany tan-tany etoy. Tena niteani-Jehovah mpivaly reo. Nameany asa rozy le nivolaniny hoe: “Manàna taranaky, le mihamaroa ka fenò ty tany. Anjakao ty tany.” (Gen. 1:28) Teani-Jehovah hiteraky maro rozy sady teany hikarakara soa ani-tany toy. Laha nataoni-Adama noho Eva avao ze raha nampanaovi-Ndranahary an-drozy, le ho tanaty fianakavia-Ndranahary avao zisiky farany rozy noho ty taranakin-drozy.

3. Manino tsika ro afaky mivola hoe nameani-Jehovah tombontsoa bevata tanaty fianakaviany tao Adama noho Eva?

³ Tanaty fianakaviani-Jehovah Adama noho Eva. Tena tombontsoa raha zay. Niresaky mikasiky ty namoronani-Jehovah ty olombelo Davida amy Salamo 8:5 ao, le zao ty nivolaniny laha hentea miaraky amy fanamariha ambany pejy: “Fa nataonao ambany kelikelini-anjely rey ie, sady nisatrofanao voninahitsy noho famirapirata.” Marina fa tsy nataoni-Jehovah mitovy amy  anjely ty olombelo laha amy resaky hery, fahaiza, noho raha vitany. (Sal. 103:20) Fe zista “ambany kelikelini-anjely” mahery reo avao ty olombelo. Mba eritsereto avao zay! Nataoni-Jehovah soasoa biby ty fiainani-razantsika voalohany rey tamy rozy vo niforoniny.

4. Nanao akory Adama noho Eva lafa tsy nanoriky ty safàni-Jehovah, le ino ty hodinihintsika amy lahatsoratsy toy?

 ⁴ Mampalahelo fa tsy nanoriky ty safàni-Jehovah ry Adama noho Eva, ka lasa tsy tanaty fianakaviani-Jehovah sasy. Nanday problemo bevata ho ani-taranakin-drozy raha zay. Mbo hohenteantsika afarafara ao moa zay. Fe tsy niova ty raha tea-Ndranahary hatao. Teany ho anany zisiky farany ty olo manoriky ty safàny. Ndao tse moa hohenteantsika hoe akory ty nampisehoani-Jehovah hoe teany vatany tsika. Bakeo horesahintsika hoe ino ty azontsika atao henanizao mba hampisehoa hoe ta ho anatini-fianakavia-Ndranahary tsika. Le amy farany, hodinihintsika hoe ino iaby ty raha soa ho azoni-ze anatini-fianakavia-Ndranahary lafa rozy ho velo zisiky farany an-tany etoy.

5. Natao-Ndranahary mitovy soraky aminy tsika. Akory ty hampisehoantsika aminy hoe ankasitrahantsika raha zay?

⁵ Nasondrotsini-Jehovah tsika le nataony mitovy soraky aminy. (Gen. 1:26, 27) Afaky hana ani-ze toetsy soa ananany zany tsika. Afaky mampiseho fitiava, ohatsy, tsika, le afaky miferinay, tsy mivaliky, noho manao ty marina. (Sal. 86:15; 145:17) Lafa mana ani-toetsy reo tsika, le manome voninahitsy ani-Jehovah sady mampiseho hoe mankasitraky azy. (1 Pet. 1:14-16) Ho falifaly noho ho afa-po koa tsika lafa manao ze mahafalifaly ani-Babantsika an-danitsy any iny. Teany ho anatini-fianakaviany mihintsy aza tsika satria mana toetsy manahaky ty azy.

6. Ino ty mampiseho hoe nanome voninahitsy ty olombelo Jehovah lafa namoro ani-tany toy?

⁶ Nanao pilasy soasoa ho antsika Jehovah. Fa nanamboatsy tany soasoa ho antsika olombelo Jehovah, ela biby talohani-namoronany ty olombelo voalohany. (Joba 38:4-6; Jer. 10:12) Soa fanahy noho matariky ie ka nameany raha soa maro tsika mba hahafalifaly antsika. (Sal. 104:14, 15, 24) Nisy fotoa ie nandiniky ani-raha niforoniny rey, le ‘hitany fa soa raha rey.’ (Gen. 1:10, 12, 31) Nameany voninahitsy ty olombelo kanao nengàny “hanjaka” amy raha soasoa iaby namboariny an-tany etoy reo. (Sal. 8:6) Tea-Ndranahary ho lavorary ty olombelo sady ho falifaly hikarakara ty raha namboariny an-tany etoy zisiky farany. Mba misaotsy ani-Jehovah matetiky va iha amy raha soa ampitamaniny zay?

7. Akory ty ampisehoani-​Josoa 24:15 hoe afaky mifily ze teantsika tsika olombelo?

⁷ Nataoni-Jehovah afaky manapa-kevitsy malalaky tsika. Afaky mifily ty raha hataontsika amy ty fiainantsika zany tsika. (Vakio Josoa 24:15.) Tena falifaly Ndranaharintsika be fitiava iny laha mifily hanompo azy tsika. (Sal. 84:11; Ohab. 27:11) Afaky mandramby fanapahan-kevitsy soa maro hafa koa tsika. Mba diniho tse moa ty raha nataoni-Jesosy.

8. Miresaha raha raiky mampiseho hoe nahay nifily ty raha tokony hataony Jesosy.

⁸ Afaky manahaky ani-Jesosy tsika amy ty raha filintsika hatao, zany hoe ze hahasoa olo tse ro ataontsika voalohany zay vo ty ahintsika. Ndraiky andro, ohatsy, nivozaky biby Jesosy noho apostoliny rey. Namonjy pilasy mitoka amy zay rozy fa ta hitofatofa. Fe tsy afaky nitofa mihintsy rozy satria nihitani-vahoaky be rey. Fe tsy neloky Jesosy. Hainy hoe tena ta hahazo ty fampianarany vahoaky rey ka niferinesany. Ka ino amy zay ty nataony? “Nanomboky nampianatsy an-drozy raha maro ie.”  (Mar. 6:30-34) Manome voninahitsy ani-Babantsika an-danitsy any iny tsika laha mampiasa ty fotoantsika noho ty herintsika mba hanampea olo, manahaky nataoni-Jesosy iny. (Mat. 5:14-16) Atorontsika ani-Jehovah koa amy zay hoe ta ho anatini-fianakaviany tsika.

9. Ino ty raha tokony hotiarovin’olo manan’anaky?

⁹ Nataoni-Jehovah afaky manan’anaky ty olombelo sady nameany andraikitsy hampianatsy ani-ajà rey ho tea ani-Jehovah noho hanompo azy. Laha manan’anaky iha, ankasitrahanao va fanomeza io? Ty anjely aloha nameani-Jehovah fitahia maro, fe tombontsoa raiky io tsy nameany an-drozy. Tsy afaky miteraky rozy. Ka laha manan’anaky zany iha, le tiarovo fa tena tombontsoa bevata ty nameani-Jehovah anao. Atokisani-Jehovah iha, le nankininy aminao ty fitezà ani-ajà reo mifanaraky amy ‘ty fananarany noho ty fomba fisainany.’ (Efes. 6:4; Deot. 6:5-7; Sal. 127:3) Manampy ty olo manan’anaky hahavita ani-zay ty fandamina-Ndranahary ka mampiboaky raha maro miory amy Baiboly. Anatini-zay, ohatsy, ty boky noho gazety, video, hira, noho lahatsoratsy amy internet ao. Tena teani-Babantsika an-danitsy any iny noho Anakilahiny iny ajà reo. (Lioka 18:15-17) Tena falifaly Jehovah lafa miantehitsy aminy noho manao ze fara heriny ty olo raiky mba hikarakarà ty anany. Lafa manao ani-zay ty olo manan’anaky le mety ho lasa anatini-fianakaviani-Jehovah zisiky farany ajà iny!

10-11. Ino ty raha ho azontsika vokatsini-vilim-panavota iny?

¹⁰ Nameani-Jehovah antsika Anakilahiny farani-ze teany iny mba hahavy antsika ho lasa anatini-fianakaviany ndraiky. Fa niresahintsika tamy  fehintsoratsy 4 teroy hoe lafa nanota Adama noho Eva le tsy afaky ho anatini-fianakaviani-Jehovah sasy, le ho zay koa ty taranakiny. (Rom. 5:12) Kinahini-Adama noho Eva mihintsy ty tsy nanoriky ty safà-Ndranahary. Fa tsy maeva ho amy fianakaviani-Jehovah ao sasy zany rozy. Ka manao akory ty taranakin-drozy? Teani-Jehovah ty olombelo ka nanao fandahara ie mba ho tafilitsy anatini-fianakaviany ze olo manoriky ty safàny. Nengany hatao soro Jesosy Kristy, azy Anakilahiny toka iny. (Jaona 3:16; Rom. 5:19) Nisy vokany soa soro nataoni-Jesosy iny, satria lasa nisy olombelo tsy mivaliky 144 000 natsanga-Ndranahary ho anany.​—Rom. 8:15-17; Apok. 14:1.

¹¹ Fe tsy zay avao. Tsy voaisaky ty olo tsy mivaliky amy Ndranahary noho manoriky ty safàny. Mitamà hilitsy anatini-fianakavia-Ndranahary koa olo reo lafa vita ty fitsapà farany, afarani-1 000 tao. (Sal. 25:14; Rom. 8:20, 21) Tena atokisan-drozy raha tamanin-drozy zay ka ndre henanizao aza rozy fa mikaiky ani-Jehovah, azy Mpamoro iny, hoe “Baba.” (Mat. 6:9) Ho afaky hianatsy ty sitrapo-Ndranahary koa olo fa nimaty rey lafa hovelomy ndraiky. Hampiliri-Ndranahary anatini-fianakaviany koa rozy laha manaraky ty fitarihany.

12. Ino ty fanontanea hovaleantsika henanizao?

¹² Nihitantsika teo hoe fa maro ty raha nataoni-Jehovah mba hampisehoany hoe lafovily aminy tsika. Natsangany ho anany ty voahosotsy, le nampitamaniny koa ty “vahoaky be” hoe ho lasa anany rozy lafa amy tontolo vaovao ao. (Apok. 7:9) Ino ty azontsika atao henanizao mba hampisehoa hoe ta ho anatini-fianakavia-Ndranahary zisiky farany tsika?

13. Ino ty tokony hataontsika laha ta ho anatini-fianakavia-Ndranahary tsika? (Marka 12:30)

¹³ Atorò hoe teanao Jehovah ka manompoa azy amy ty fonao iaby. (Vakio Marka 12:30.) Soa fanahy amintsika Jehovah ka maro ty raha soa fa nameany antsika. Afaky manompo azy, ohatsy, tsika. Zay vasa ty farani-bevata amy ty  raha soa nameany antsika. Atorontsika hoe tea azy tsika lafa ‘orihintsika ty didiny.’ (1 Jaona 5:3) Raiky amy didiny zay, ohatsy, azy nivolanini-Jesosy iny hoe mila ataontsika mpianatsy noho ataontsika batisa ty olo. (Mat. 28:19) Nandidy antsika hifankatea koa ie. (Jaona 13:35) Fianakavia raiky avao ty mpanomponi-Jehovah amy tany toy iaby, le rambesiny ao ze olo manaraky ty didiny.​—Sal. 15:1, 2.

14. Ino ty azontsika atao mba hampisehoa hoe tea olo tsika? (Matio 9:36-38; Romanina 12:10)

¹⁴ Miezaha ho tea olo. Fitiava ro toetsy tena mampiavaky ani-Jehovah. (1 Jaona 4:8) Fa niteany aza tsika ndre mbo tsy nahay azy. (1 Jaona 4:9, 10) Manahaky azy koa tsika laha tea olo. (Efes. 5:1) Mety hahita hevitsy maro tsika laha ta hampiseho ani-zay. Fe toy ty tena farani-soa: Ampeantsika rozy hahay ani-Jehovah tany mbo tsy tara. (Vakio Matio 9:36-38.) Laha manao ani-zay tsika le manampy an-drozy ho anatini-fianakavia-Ndranahary. Ndre lafa vita batisa aza ty olo raiky le mbo tokony ho teantsika noho ho hajàntsika avao. (1 Jaona 4:20, 21) Akory ty fanaova ani-zay? Matoky azy, ohatsy, tsika fa tsy marikariky azy. Laha tsy azontsika hoe ino ty antony nahavy azy nanao raha raiky, le tsy hieritseritsy tsika hoe hatea tena ty nanaovany ani-raha iny. Ty mifanohitsy amy zay ro hataontsika, zany hoe hanaja ani-rahalahintsika iny tsika le hieritseritsy hoe anabo mandilatsy antsika ie.​—Vakio Romanina 12:10; Fil. 2:3.

15. Ia iaby ty tokony ho ferinesantsika noho hampisehoantsika hasoam-panahy?

¹⁵ Miezaha hiferinay noho ho soa fanahy amin’olo iaby. Laha ta ho anatini-fianakaviani-Jehovah avao zisiky farany tsika, le tsy maintsy orihintsika amy fiainantsika ze raha volanini-Safà-Ndranahary. Nampianatsy antsika, ohatsy, Jesosy hoe tokony ho ferinesantsika noho hampisehoantsika hasoam-panahy ty olo iaby, ndre ty fahavalontsika aza. (Lioka 6:32-36) Mety ho sarotsy ty manao ani-zay kindraiky. Fe lafa tratsini-zay tsika, le tokony hoezahintsika ampitovizy amy ty ahini-Jesosy ty raha eritseretintsika noho ty raha ataontsika. Mila manao ze fara herintsika tsika mba hanoriha ty safàni-Jehovah noho hanahafa ani-Jesosy. Asehontsika amy Babantsika an-danitsy any iny amy zay hoe ta ho anatini-fianakaviany avao tsika zisiky farany.

16. Ino ty azontsika atao mba ho soa laza avao ty fianakaviani-Jehovah?

¹⁶ Anovo avao ze hahasoa laza ty fianakaviani-Jehovah. Amy ty olo trano raiky, matetiky ajà rey manahaky ani-ze bebe an-trano ao avao. Laha manaraky ty torolalani-Baiboly, ohatsy, zokiny rey le hotahafini-zainy rey raha zay. Fa laha manao raha raty rozy, le hanaraky ani-zay koa azy kelikely rey. Manahaky ani-zay koa fianakaviani-Jehovah io. Laha misy Kristiana raiky nitea ani-Jehovah fe lasa mivadi-pinoa na mijangajanga na manao raha raty hafa, le mety hanahaky azy koa ty olo hafa ka hanao raha raty. Manimba ty lazani-fianakaviani-Jehovah raha zay. (1 Tes. 4:3-8) Tokony hialantsika lavitsy ty modely raty. Tsy tokony hisy raha hengantsika hanimba ty fifandrambesantsika amy Babantsika an-danitsy any iny mihintsy.

17. Ino ty raha tsy tokony hoeritseretintsika, le ino ty antony?

¹⁷ Matokisa ani-Jehovah fa ka miantehitsy amy hanana. Fa nampitamà Jehovah hoe hameany hany, siky, noho fialofa tsika. Hameany ani-reo hoasany tsika laha ataontsika amy pilasy voalohany ty Fanjakàny sady orihintsika ty fitsipikiny. (Sal. 55:22; Mat. 6:33) Laha matoky ani-fampitamanany io tsika, le tsy hieritseritsy mihintsy hoe afaky miaro antsika noho hahasambatsy antsika ty raha amy tontolo toy eto. Haintsika fa tsy ho sambatsy mihintsy tsika laha tsy manao ty sitraponi-Jehovah. (Fil. 4: 6, 7) Ndre manan-drala hiviliana raha maro aza tsika, le soa ty mieritseritsy ani-fanontanea retoa: ‘Hana fotoa noho hery hampiasà ani-raha toy avao va aho? Ho vitako va ty hikarakara ani-raha toy?’ Mety hivahatsy marè amy ty raha ananantsika va tsika? Soa ho tiarontsika fa nisy asa nampanaovini-Jehovah ani-ze olo anatini-fianakaviany. Tsy tokony hisy raha hengantsika hanelingely antsika zany. Tsy teantsika ty hanahaky ani-mpamaraky niresaky tamy Jesosy iny. Tsy naneky hanompo ani-Jehovah ie. Ty hateany ani-raha vitsivitsy ananany an-tany etoy rey avao ro tsy nanekeany hatsangani-Jehovah ho anany!​—Mar. 10:17-22.

18. Ino iaby ty tombontsoa noho fitahia ho azoni-ze olo manoriky safà?

¹⁸ Tombontsoa bevata ty ho azoni-ze olo manoriky safà satria afaky ho tea ani-Jehovah noho hanompo azy zisiky farany rozy! Ho falifaly biby koa azy mitamà hiay an-tany etoy rey satria hikarakara ani-tany namea-Ndranahary an-drozy toy rozy. Sisa kely le hamboarini-Fanjakà-Ndranahary tany toy noho ze raha iaby aminy eo ka ho lasa soasoa ndraiky. Marina fa nifily hiala tamy fianakavia-Ndranahary Adama noho Eva, fe harenini-Jesosy iaby ze problemo naterakini-fanapahan-kevitsin-drozy iny. Hovelomi-Ndranahary ndraiky olo maro biby fa nimaty rey, le hiay zisiky farany amy paradisa an-tany etoy sady ho salama soa. (Lioka 23:42, 43) Lafa lasa lavorary iaby ty olo manompo ani-Jehovah, le samby hana ani-“voninahitsy noho famirapirata” nivolanini-Davida iny.​—Sal. 8:5.

19. Ino ty raha tokony hotiarovintsika avao?

¹⁹ Soasoa biby ty raha tamaninao laha anatini-“vahoaky be” iha. Tea anao Ndranahary ka teany ho anatini-fianakaviany iha. Anovo zany ze fara herinao mba hahafalifaly azy. Ataovo am-po noho an’eritseritsy avao raha ampitamani-Ndranahary reo sanandro, le anovo mifanaraky amy zay iaby ze raha ataonao. Mana tombontsoa hanompo ani-Babantsika teantsika an-danitsy any iny iha. Ankasitrahanao va tombontsoanao io ka maniry hanompo azy avao iha zisiky farany?