1. Woopó wɔkɔnge wokoka ntoyelá lá wɔɔngɔ winá w’okanelaso kenkfumɔ kɛ Yehova ndatonge?

WINÁ w’okanelaso lá kenkfumɔ kɛ Yehova ndatonge, tokoka ndawoka etengo ontshumbi yeembo Davidɛ, kanga lopolisa Yehova lá lɔlɔmbɔ ante: ‘Winá wɔ molendaka olongo wɔko, elemo w’akɔla wako, ngɔndɔ la tɔɔtɔ tɔngawɔngɛ, onto wongovɔ oyɛnde na djɛ wɛ ndoowila yimba, ko wɔna onto oyɛnde na djɛ wɛ ndookanela?’ (Yee. 8:3, 4) Etengo Davidɛ, iso nkoka nkanela wopo woyɛso daambi má ndawɛdjɛ la tɔɔtɔ tɔ Yehova ndatonge ko nkamɔ lá wopo wɔ Yehova otilande yimba. Koko, etengo isɔngɛna, Yehova atilá anto wa ntondo, Adama nya Eva yimba toko, koko awɔsaka lonkina etengo ase nkfumbo kɛnde.

2. Kɛkɔnge kɛ Yehova ndasangola lá nkambo djɛ wana wande wa ntondo welá looko?

² Adama nya Eva wayalaka wana wa ntondo wa Yehova welá looko, edjinge Yehova ayalaka Papa kɛwɔ kɛ ngandji kel’olongo. Nde ananghaka djɛ wadji la wome wasɔ mbota djɛ mfudjɛ nkfumbo. Ndjambe ashimelaka ante: ‘Nyowote, nyofule, nyolodjɛ looko, edjinge nyoowapamele.’ (Ewa. 1:28) Iwɔ wayalaka ladjɛ mbota wana la nama looko, intaselo kɛwɔ wɔlɔ. Otakindjɛwɔ ndjala la ntshunamo edjinge nangha kɛnɛ kalɔmbisa Yehova djɛ nangha, ntshimi Adama nya Eva la tonkana la tonkanola tɔwɔ watshikalaka ase nkfumbo kɛ Ndjambe lotshinda lotshinda.

3. Lamo okokaso ntepela ente Adama nya Eva wayalaka la mpipo kɛ lomo efula lá nkfumbo kɛ Yehova?

³ Adama nya Eva wayalaki la mpipo kɛ lomo efula lá nkfumbo kɛ Yehova. Etengo yombofunama lá Yeembo 8:5 edjinge lá nɔtɛ kɛnde, Davidɛ atepelaka lá nkambo djɛ etongelo kɛ Yehova  k’onto ante: ‘Wɛ oonánghaka ndambo l’anse kɛ andjelo, edjinge wɛ ɔɔlɔtshɛka lomo la lonkfunda.’ Nsɔsɔlɔ, anto lako ntonghama la nkfulu, balo l’akoka etengo andjelo. (Yee. 103:20) Koko, anto walekɔ ngo ‘ndambo l’anse’ kɛ ntongami djɛ nkfulu djɛ nyuma djɛsɔ. Kokanela nkambo djɛsɔ! Winá wɔ Yehova ndatonge ambotshi waso wa ntondo, nde apɛyɛka nsɔsɔlɔ lowiko lɔ wɔlɔ.

4. Kɛkɔnge kekomelisa Adama nya Eva m’ɔtɛ w’iyapendola Ndjambe, Ko kɛkɔnge kɔkɔpaso nyɛna lá djamba djɛnɛ?

 ⁴ Yɛnyi nde, Adama nya Eva watshutshɛka mpipo keyalaki lawɔ lá nkfumbo kɛ Yehova. Etengo isɔngɛna lá djamba djɛnɛ, nkambo djɛsɔ djeyalaka l’eposelo wɛ nyɛtshi efula te tonkana la tonkanola tɔwɔ. Koko ikanyi yɛ Yehova, itatshikitana. Nde nkɔpaka djɛ anto walekɔ la ntshunamo ndjala wana wande lotshinda lotshinda. Ntondotondo, tokolenda wopo wɔ Yehova ndatɔpɛyɛ lomo. Masɔ, tɔngɛna kɛnɛ k’okokaso nangha win’ɔsɔ, djɛ nyɛnyɛ ente iso nkɔpaka ndjala ase nkfumbo kɛ Ndjambe. L’ekomo, tɔngɛna ɛtshɔkɔ wɛ wana wa Yehova welá looko, yongosasanga la wɛkɔ lotshinda lotshinda.

5. Wopo wɔkɔnge w’okokaso mpɛyɛ Ndjambe lomo má wopo wɔ ndatotonge l’ɛfɔ kɛnde?

⁵ Yehova atilaka lomo má ntotonga l’ɛfɔ kɛnde. (Ewa. 1:26, 27) Mande totongamaka l’ɛfɔ kɛ Ndjambe, iso nkoka nyɛnyɛ nanghedji djɛnde djɛ wɔlɔ, ndjɔmbɔmba ngandji, djandji, nkɔmano, la sii. (Yee. 86:15; 145:17) Winá w’ɛnyɛso nanghendji djɛsɔ, iso numɛka Yehova la nyɛnyɛka ente, tolekɔ la djedjɛ tende. (1 Pɛ. 1:14-16) Winá w’owikaso lá yopo yesasangɛ Yehova, iso ndjalaka l’osasa. Edjinge má ntotonga l’ɛfɔ kɛnde, Yehova atɔpɛyɛka akoka w’iso ndjala yopo y’anto yɔkɔpande lá nkfumbo kɛnde.

6. Wopo wɔkɔnge Yehova ndile anto lomo winá wɔ ndalɔngɔsɔlaka looko?

⁶ Yehova atɔlɔngɔsɔlaka intaselo kɛ wɔlɔ efula. Ilá efula lá ntondo kɛnde ntonga onto, Yehova alɔngɔsɔlaka looko lá nkambo dj’anto. (Djɔ. 38:4-6; Jɛr. 10:12) Mande nde alekɔ oloko wɔlɔ edjinge kanga lokapo, Yehova atotongelaka nkete djɛ wɔlɔ efula djɛ ntɔpɛyɛ osasa. (Yee. 104:14, 15, 24) Lá winá ɛmɔtshi, nde ɔsaki winá djɛ ntɔnɔla lá kɛnɛ kɛ ndatonge, edjinge nde ‘ɛnaka ante dekɔ wɔlɔ.’ (Ewa. 1:10, 12, 31) Nde ilaka anto lomo má ndaapɛyɛ lotshungɔ lɔ ‘ndjapemela’ nkete nkfumɔ djɛ wɔlɔ djɛ ndantonge lá looko. (Yee. 8:6) Ikanyi yɛ Ndjambende anto wa djɔ mba osasa má nama nkete djɛ wɔlɔ djɛ ndatonge lotshinda lotshinda. Ongokawoyɛke Yehova lokasa mbala la mbala m’ɔtɛ wɔ daka djɛ wɔlɔ djɛsɔ?

7. Wopo wɔkɔnge Yosua 24:15 ɛnyɛnde djɛ onto alekɔ la lotshungɔ lɔ nsɔna kɛnɛ kɔkɔpande?

⁷ Yehova atɔpɛyɛka lotshungɔ lɔ nsɔna. Iso nkoka nsɔna kɛnɛ k’ɔkɔpaso nangha lá lowiko. (Wala Yosua 24:15.) Nkoka djɛ nsɔna kɛnɛ kɔkɔpaso ndeke etawɔ lotshungɔ lɔ nsɔna. Ndjambe kɛso kɛ ngandji nsasangaka winá w’ɔsɔnaso djɛ ndookambela. (Yee. 84:11; Woo. 27:11) Tokoka nkamba la lotshungɔ lɔso lɔ nsɔna má ndɔsa akano ankina wa wɔlɔ efula. Tokolenda ndjɔmbɔmba kɛmɔtshi k’ɛnyɛ wopo wɔ Yeso ndakambe la lotshungɔ lɔnde.

8. Kɔpɛyɛ ndjɔmbɔmba k’ɛnyɛ wopo wɔ Yeso ndakambe la lotshungɔ lɔnde lɔ nsɔna?

⁸ Iso nkoka ndjokola ndjɔmbamba kɛ Yeso, ma nsɔna djɛ ndjilaka wapɔ w’anto ankina, lá ntondo kɛ wɛso. Lofu lɔmɔtshi Yeso nya apɔstɔlɔ wande walɛmbaka efula, ko watshɔka l’edjena kɛmɔtshi kɛ vu dj’iwɔ ntohomola. Koko, watahomola. Oloyi w’ekekete w’anto wakilikaka, edjinge wayalaka la djonyi djɛ ndakanyema me Yeso. Koko Yeso atomala. Nde okelaka anto wasɔ djandji. Ya kɛkɔnge kɛ Yeso  ndananghe? ‘Nde awangaka ndaalakanyɛ akambo efula.’ (Mar. 6:30-34) Ntsha iso ndjokola Yeso má ndambola winá la wolo wɔso djɛ nkotshɛ anto ankina, tongolumɛ Papa kɛso kel’olongo. (Mat. 5:14-16) Lonkina, tɔngɛnyɛ Yehova ente iso nkɔpaka ndjala ase nkfumbo kɛnde.

9. Odjito wɔkɔnge wɔ lomo Yehova ndɔmbɔpɛyɛ ambotshi?

⁹ Yehova apɛyɛka anto nkoka djɛ mbota wana la odjito wɔ ndaalakanyɛ dj’iwɔ ndɔɔkɔpa la ndookambela. Ntsha oyɛnde ombotshi, ongoyalake la djedjɛ l’odjito wɔ lomo wɔsɔ? Kaanga Yehova ndapɛyɛ andjelo akoka wa wɔlɔ efula, nde lako ndaapɛyɛ nkoka djɛ mbota wana. Djɛkondeke, ntsha olekɔ ombotshi, yala la djedjɛ l’odjito wokotshɛ wɔ mbongola wana. Ambotshi wawaka mpeyi, ntepela ente odjito w’ekina wɔ mbongola wana wawɔ lá ‘onkfumbelo edjinge l’alako wa Yehova.’ (Ɛfɛ. 6:4; Mvu. 6:5-7; Yee. 127:3) Djɛ nkotshɛ ambotshi, olonghanyelo wɔ Ndjambe woposɛ mpeko efula djemá Bible, ndjɔmbɔmba enkanda, wavideo, teembo, la nkete nkina djel’Ɛntɛrnɛtɛ. Nyɛnamaka papoo ente, Yehova nya wɔnande nkɔpaka dangala efula. (Luka 18:15-17) Winá wɔ ambotshi oyawɛkɛwɔ te Yehova la onanghawɔ kenkfumɔ k’okokawɔ nangha djɛ nama wana wawɔ, Yehova nsasangaka. Lonkina, ambotshi wa nghɔsɔ mpɛyɛka wana wawɔ mpeyi kɛ ndjala ase nkfumbo kɛ Yehova lotshinda lotshinda!

10-11. Akambo wakɔna wa Yehova ndongotonanghela má lotshimbo l’oshinga wɔ mbendo?

¹⁰ Yehova alambolaka Wɔnande wɔ lomo efula dj’iso nkalɔ ndjala ase nkfumbo kɛ Nde lonkina. Etengo sotepelaki  l’etenyi 4, Adama nya Eva watshutshɛka mpipo kɛwɔ lá nkfumbo kɛ Yehova, edjinge watshutsheyɛka kaanga wana wawɔ. (Ɔrɔ. 5:12) Adama nya Eva wasɔnaka djɛ mpendola Ndjambe, djɛkondeke iyɛlama djɛ nkilikama má nkfumbo kɛnde. Ko otepelaso nge lá nkambo djɛ tonkanola tɔnde? La ngandji kenkfumɔ, Yehova ananghaka djɛ wana wande wangoyala la ntshunamo tende, ndjawolama lá nkfumbo kɛnde. Nde ananghaka nkambo djɛsɔ ma olambo wɔ ɛtɔyi kɛ Wɔnande kɛ ndawote, Yeso Kristo. (Dj. 3:16; Ɔrɔ. 5:19) M’olambo wɔ Yeso wɔsɔ, anto 144 000 wangotshikala la nkɔmano wasɔmaka dj’iwɔ ndjawolama etengo wana wa Ndjambe.​—Ɔrɔ. 8:15-17; Ndj. 14:1.

¹¹ Lonkina, miliyɔ inkina y’anto wa nkɔmano wananghaka ekɔpa kɛ Ndjambe la ntshunamo nkfumɔ. Iwɔ walekɔ la nkongi djɛ ndjala ase nkfumbo kɛ Ndjambe m’ɔkɔngɔ w’ohemba w’ekomo, l’ekomo k’ɛnɔnyi kinunu. (Yee. 25:14; Ɔrɔ. 8:20, 21) Mande walekɔ la nkongi djɛsɔ, kaanga má win’ɔsɔ, iwɔ ndɔsaka Yehova Ontongi wɔwɔ etengo ‘Papa’ kɛwɔ. (Mat. 6:9) Anto wangokfundɔ iwɔ lawɔ wangowa mbamba kɛ ndjeka djɛ ndjewa kɛnɛ kɛ Yehova alɔmbande. Wanɛ wasɔna djɛ nkilika ɛlɔndjɛlɔ kɛnde, wangokoma edjinge iwɔ ase nkfumbo kɛnde.

12. Woopó wɔkɔnge w’ɔkɔpaso nkadjimola win’ɔsɔ?

¹² Etengo sɔmbɛna, Yehova atilaka lomo lá topo efula. Nde amboshiyɛka ndjawola ankfutami etengo wana wande, edjinge ambɔpɛyɛ oloyi w’ekekete w’anto nkongi, dj’iwɔ ndoyala wana wande l’andja wa bango. (Ndj. 7:9) Ko kɛkɔnge k’okokaso nangha má win’ɔsɔ djɛ nyɛnyɛ Yehova ente iso nkɔpaka ndjala ase nkfumbo kɛnde lotshinda lotshinda?

13. Kɛkɔnge k’okokaso nangha djɛ ntshikala lá nkfumbo kɛ Ndjambe? (Mar. 12:30)

¹³ Ɛnyɛ ente wɛ nkɔpaka Yehova má ndookambela l’oloko wɔko onkfumɔ. (Wala Marko 12:30.) L’anteyi k’efula k’epapɛyɛ wɛ  Ndjambe ndatɔpɛyɛ la wɔlɔ onkfumɔ, opapɛyɛ woleka ekeketende nkoka djɛ ndɔɔtɛmɔla. Iso nyɛnyɛka Yehova ente iso ndɔɔkɔpaka má nɛmɛyɛ ɛlɛmbɛ wɛnde.’ (1 Dj. 5:3) Ɔlɛmbɛ ɔmɔtshi wɔ Yehova ɔkɔpande iso nɛmɛyɛnde, ɔlɔmbɛ wɔ Yeso ndatɔpɛyɛ wɔ nkfumba anto ambeki, la ndaabatiza. (Mat. 28:19) Nde atilelaka lonkina ɔlɛmbɛ wɔ nkɔpana l’anteyi kɛso. (Dj. 13:35) Yehova ndongolaka wanɛ walɛmɛyɛ ɛlɛmbɛ wɛnde, lá nkfumbo k’enkambi wɛnde wel’andja w’otondo.​—Yee. 15:1, 2.

14. Wopo wɔkɔnge w’okokaso nyɛnyɛ ente iso nkɔpaka anto ankina? (Mateo 9:36-38; Ɔrɔma 12:10)

¹⁴ Tɛnyɛ anto ankina ngandji. Ngandji alekɔ djekeka djɛ Yehova djeleka djonyi. (1 Dj. 4:8) Yehova atɛnyɛka ngandji lá ntondo k’iso ndoowewa. (1 Dj. 4:9, 10) Iso ndoowokolaka winá w’ɛnyɛso anto ankina ngandji. (Ɛfɛ. 5:1) Yopo yeleka wɔlɔ y’okokaso nyɛnyɛ ente iso nkɔpaka anto ankinande má ndaalakanyɛ akambo walendana la Yehova má win’ɔsɔ. (Wala Mateo 9:36-38.) Má nangha nghɔsɔ, iso ndaapɛyɛka mbamba kɛ ndjeka kɛnɛ koyɛwɔ ladjɛ nangha dj’iwɔ nkoma ase nkfumbo kɛ Ndjambe. M’ɔkɔngɔ w’onto ndongola batisimo, iso ladjɛ nkindjɛ ndɔɔkɔpa edjinge ndɔɔlɛmɛyɛ. (1 Dj. 4:20, 21) Wopo wɔkɔnge? Yopo imɔtshinde, ndoowilela oloko. Ndjɔmbɔmba, topakoke ndookanela nyɛtshi kana nfɛnyɛ ente nde alekɔ l’ekoma wɛ nyɛtshi. Koko, iso ladjɛ nyɛnyɛ ente iso nɛmɛyɛka wananyɔ waso, má ndaawɔsa ente iwɔ ntoleka.​—Wala Ɔrɔma 12:10; Flp. 2:3.

15. Anto wakɔna w’oyɛso ladjɛ ndjoka nkɛtshi edjinge ndjala l’oloko wɔlɔ tewɔ?

¹⁵ Toyale la nkɛtshi edjinge l’oloko wɔlɔ te anto ankfumɔ. Ntsha iso nkɔpaka ndjala l’anteyi k’anto wangetaka Yehova ambɔ Papa kɛwɔ lotshinda lotshinda, iso ladjɛ nkamba l’Otepela wɔ Ndjambe lá mbiko yɛso. Ndjɔmbɔmba, Yeso alakanyɛka ante iso ladjɛ ndjala la nkɛtshi edjinge l’oloko wɔlɔ te anto ankfumɔ, ayale kaanga antonyi waso. (Luka 6:32-36) Tokoka ndjala l’okakasano wɔ nangha nkambo djɛsɔ lá winá ɛmɔtshi. Ntsha oyɛwɔ nde nghɔsɔ, iso ladjɛ ndjeka djɛ nkanelaka edjinge nanghaka akambo etengo Yeso. Winá wonanghaso la wolo djɛ nɛmɛyɛ Yehova la ndjokola Yeso, iso nyɛnyɛka Papa kɛso kel’olongo ente, tɔkɔpa ndjala lá nkfumbo kɛnde lotshinda lotshinda.

16. Wopo wɔkɔnge w’okokaso nama lokumu l’ase nkfumbo kɛ Yehova?

¹⁶ Tolame lokumu l’ase nkfumbo kɛ Yehova. Mbala efula lá nkfumbo, wakfune ndjokolaka kɛnɛ kenangha amama yɛwɔ. Ntsha wɔna wɔ ntondo angokambake la tɔkfɔ tɔ Bible lá lowiko lɔnde, nde angɔpɛyɛ ndjɔmbɔmba kɛ wɔlɔ le ankfune wande. Koko ntsha wɔna wɔ ntondo amboyapɛyɛ l’akambo wa nyɛtshi, ankfune wande nkoka nkilika lokolo lɔnde lɔ nyɛtshi. Nghɔsɔ ndeke oyɛwɔ kaanga lá nkfumbo kɛ Yehova. Ntsha Okristo woyalaki ntondo la nkɔmano, ambokoma apɔsta, kana amboyala l’enanghedji kɛmɔtshi kɛ nyɛtshi, anto ankina nkoka ndoowokola. Anto wanangha nghɔsɔ, ntshitaka lokumu lɔ nkfumbo k’antɛmɔdji yɛ Yehova. (1 Te. 4:3-8) Iso ladjɛ ntona djɛ nkilika ndjɔmbɔmba yɛ nyɛtshi la ipa ndjawola djɛ kaanga ekete kɛmɔ ntshita djokanelo djɛso la Papa kɛso kel’olongo.

17. Kɛkɔnge k’oyɛso ladjɛ ndjewɔ djɛ nkanela, ko lamo?

¹⁷ Yawɛkɛ te Yehova koko ape tá nkete djelá demba. Yehova atolakaka ante angɔtɔpɛyɛ nkete djɛ ndɛ, ntshendja, la edjena kɛ ndjetama ntsha iso mpetshɛ Onkfumi wɔnde l’edjena kɛ ntondo edjinge mbika lá yopo y’okana l’ɛlɛmbɛ wɛnde wɛ sii. (Yee. 55:22; Mat. 6:33) Ntsha iso ndawɛkɛ lá daka djɛsɔ, topangokanela ente nkete djɛ demba djel’andja wanɛ djengɔtɔpɛyɛ vu edjinge osasa wɔ nsɔsɔlɔ. Iso  ndjewaka ente yopo ngo imɔ yokokaso mba vu djelá wɔɔngɔ djɛ nsɔsɔlɔ nde, nangha ɛkɔpa kɛ Yehova. (Flp. 4:6, 7) Kaanga ntsha tolekɔ l’akoka wa nsomba nkete efula, iso ladjɛ ndenda ntsha tongowa winá kana wolo wɔ nkamba la nama nkete djɛkɔ. Topóngooleka ndoyapɛyɛ efula lá nkete djokotshɛso? Iso ladjɛ mvungɔka ente Ndjambe atɔpɛyɛka edjito wɛ nangha lá nkfumbo kɛnde. Kɛsɔ nyɛnyɛka djɛ topakoke ndjawola nyime yimba yɛso m’eteyi. Topakombola ndjala etengo olangala wotshutshisa mbamba kɛ nkambela Yehova edjinge kɛ ndjawolama me wɔnande m’ɔtɛ wɔ ngandji k’efula k’indakɔpaka nkete djelá demba!​—Mar. 10:17-22.

18. Lomo la ɛtshɔkɔ wɛkɔnge w’ipawɔsɔdjɔmba wengosasanga l’anto wangoyala la ntshunamo lotshinda lotshinda?

¹⁸ Anto walekɔ la ntshunamo wangowa lomo lopawɔsɔdjɔmba, lɔ nkɔpaka la ntɛmɔlaka Yehova lotshinda lotshinda! Anto walekɔ la nkongi djɛ nsɛna lá looko wangoyala lonkina l’osasa wɔ nama looko lɔ Yehova ndaatongela djɛ ndjala intaselo kɛwɔ kɛ djɔ. Lako ilá Onkfumi wɔ Ndjambe wɔwɔnge looko edjinge nkete nkfumɔ djelekɔ l’eteyi. Yeso angosiyɛ ekakasano enkfumɔ weposisa má nkano djɛ nyɛtshi dj’ɔsisa Adama nya Eva. Yehova angokfundola miliyɔ y’anto edjinge angaapɛyɛ mpeyi kɛ mbika lotshinda lotshinda l’alemba wa wɔlɔ, lá looko longokadjimɔ parakiso. (Luka 23:42, 43) Winá wɔ nkfumbo kelá looko k’antɛmɔdji yɛ Yehova yongokoma djɔ, iwɔ wangowa ‘lomo la lonkfunda’ lɔ Davidɛ ndafune.​—Yee. 8:5.

19. Kɛkɔnge k’oyɛso ladjɛ nama lá wɔɔngɔ?

¹⁹ Ntsha olekɔ l’anteyi kɛ ‘oloyi w’ekekete w’anto,’ mbɔ olekɔ la nkongi djɛ wɔlɔ efula. Ndjambe nkɔkɔpaka, nde nkɔpaka wɛ ndjala ose nkfumbo kɛnde. Djɛkondeke nangha k’enkfumɔ k’okokɛ nangha djɛ ndoosasangɛ. Wikaka mfu inkfumɔ l’alaka wa Ndjambe lá wɔɔngɔ la l’oloko wɔko. Sasangaka la mpeyi k’okotshɛ kɛ ntɛmɔla Papa kɛko kel’olongo, edjinge ɔsa mpeyi kelekɔ lawɛ kɛ ndoolumɛ lotshinda lotshinda la ntshina!