1. San wi kan aksi wisrefi te wi e denki ala den sani di Yehovah meki?

TE WI e prakseri ala den sani di Yehovah meki na hemel, dan kande wi e firi leki a psalm skrifiman David, di ben begi Yehovah èn di ben aksi en: „Te mi e luku yu hemel, den sani di yu meki, a mun nanga den stari di yu meki, dan mi e aksi misrefi: ’San na wan libisma taki yu e prakseri en? San na a pikin fu wan libisma taki yu e sorgu en?’” (Ps. 8:3, 4) Kande wi e denki taki wi pikin srefisrefi te wi e teki wisrefi gersi nanga den stari di Yehovah meki. Aladi dati de so, toku a de wan kefalek moi sani taki Yehovah e poti prakseri na wi. Ma soleki fa wi o si, dan Yehovah no ben e sorgu nomo gi den fosi libisma, Adam nanga Eva, ma a ben teki den na ini en famiri tu.

2. San Yehovah ben wani taki Adam nanga Eva ben musu du?

² Adam nanga Eva ben de den fosi pikin fu Yehovah na grontapu èn Yehovah ben de den lobi-ati hemel Papa. Yehovah ben gi a trowpaar disi wan wroko fu du. Gado taigi den: „Meki pikin èn kon furu, teleki unu kon lai na grontapu èn basi ala sani na grontapu” (Gen. 1:28). Gado ben wani taki den ben musu meki pikin èn sorgu gi a grontapu di de a tanpresi fu den. Efu Adam nanga Eva ben o gi yesi èn den ben o du san Gado aksi fu den, dan den nanga den pikin ben o tan de na ini a famiri fu Gado fu têgo.

3. Fu san ede wi kan taki dati Adam nanga Eva kisi wan moi grani na ini Yehovah en famiri?

³ Adam nanga Eva ben abi wan moi grani na ini a famiri fu Yehovah. Luku san David ben taki na Psalm 8:5 fu den  libisma di Yehovah ben meki: „Yu meki a kon de pikinso moro lagi leki den engel, yu gi en glori nanga grani.” A tru taki libisma no kisi a srefi krakti nanga koni leki den engel èn den no man du den srefi sani leki den engel (Ps. 103:20). Ma libisma „de pikinso moro lagi” leki den tranga engel. Prakseri a sani dati! Yehovah gi wi fosi papa nanga mama wan bigi grani na ini en famiri.

4. San pasa nanga Adam nanga Eva fu di den trangayesi Yehovah èn san wi o luku na ini na artikel disi?

 ⁴ Ma a sari taki Adam nanga Eva lasi a grani fu de na ini Yehovah en famiri, fu di den trangayesi en. A sani disi tyari takru bakapisi kon gi den bakapikin, soleki fa wi o si moro fara na ini na artikel disi. Ma a sani di Yehovah wani gi libisma no kenki. A wani taki libisma di e gi yesi na en tron en pikin fu têgo. Meki wi go luku fosi fa Yehovah gi wi grani. Baka dati wi o luku san wi kan du now fu sori taki wi wani de na ini a famiri fu Gado. Leki lasti, wi o luku den blesi di den pikin fu Yehovah o kisi dyaso na grontapu fu têgo.

5. Fa wi kan sori Gado taki wi de nanga tangi taki a meki wi fu de leki en?

⁵ Yehovah gi wi grani fu di a meki wi fu de leki en (Gen. 1:26, 27). Fu di Gado meki wi fu de leki en, meki wi kan leri fu kisi ala den moi fasi fu en. Fu eksempre, wi kan sori lobi, sari-ati, wi kan du san reti èn wi kan tai hori na trawan (Ps. 86:15; 145:17). Te wi e sori den fasi disi, dan wi e gi Yehovah glori èn wi e sori taki wi de nanga tangi gi san a du gi wi (1 Petr. 1:14-16). Wi o de koloku te wi e libi na a fasi di wi hemel Papa feni bun. Boiti dati, fu di wi meki fu de leki Gado, meki wi kan tron sma di Yehovah wani na ini en famiri.

6. Fa Yehovah gi libisma grani di a meki grontapu?

⁶ Yehovah gi wi wan moi presi fu tan. Langa ten fosi Yehovah meki a fosi man, a sreka a grontapu gi libisma (Yob 38:4-6; Yer. 10:12). Yehovah na wan Gado di abi switifasi èn a e gi sani bogobogo. Dati meki a sorgu taki wi abi furu bun sani na grontapu di e gi wi prisiri (Ps. 104:14, 15, 24). Son leisi Yehovah ben e luku den sani di a meki èn a ben „si taki den bun” (Gen. 1:10, 12, 31). A gi libisma grani fu di a poti den „leki basi” fu ala den moi sani di a meki (Ps. 8:6). Gado wani taki libisma di no abi sondu, o prisiri fu têgo nanga a wroko di den kisi fu sorgu gi den moi sani di a meki na grontapu. Yu abi a gwenti fu taki Yehovah tangi gi a moi sani dati di a pramisi?

7. Fa Yosua 24:15 e sori taki libisma abi a grani fu teki den eigi bosroiti?

⁷ Yehovah gi wi a grani fu teki wi eigi bosroiti. Wi kan bosroiti san wi o du na ini wi libi. (Leisi Yosua 24:15.) A Gado fu wi di lobi wi, e prisiri te wi e bosroiti fu dini en (Ps. 84:11; Odo 27:11). Wi kan teki tra bun bosroiti tu na ini a libi. Luku na eksempre di Yesus gi wi ini a tori disi.

8. Fa Yesus gebroiki a grani di a abi fu teki en eigi bosroiti?

⁸ Neleki Yesus, wi kan bosroiti fu poti den afersi fu trawan fosi wi eigi afersi. Wan leisi di Yesus nanga den apostel fu en ben weri srefisrefi, den go na wan tiri presi fu rostu pikinso. Ma den no ben man rostu. Furu sma ben kon suku den fu di den ben wani kisi leri fu Yesus. Yesus no ben kisi atibron. Na presi fu dati, a sari den sma. San Yesus du? „A bigin leri den furu sani” (Mark. 6:30-34). Te wi e  teki na eksempre fu Yesus èn wi e gi wi ten nanga krakti fu yepi trawan, dan wi e gi wi hemel Papa glori (Mat. 5:14-16). Èn wi e sori Yehovah tu taki wi wani de na ini en famiri.

9. Sortu moi grani Yehovah gi libisma?

⁹ Yehovah gi libisma a grani fu meki pikin. A gi den a frantwortu tu fu leri den pikin fu lobi Yehovah èn fu dini en. Efu yu na wan papa noso mama, yu e warderi a spesrutu grani disi? Aladi Yehovah gi den engel furu moi grani, toku a no gi den a grani fu meki pikin. Sobun, efu yu na wan papa noso mama, yu kan de nanga tangi gi a grani di yu abi fu kweki pikin. Papa nanga mama kisi a prenspari frantwortu fu kweki den pikin „nanga a leri èn nanga den rai fu Yehovah” (Ef. 6:4; Deut. 6:5-7; Ps. 127:3). Na organisâsi fu Gado e yepi papa nanga mama fu kweki den pikin, fu di den e gi wi furu sani fu gi den pikin leri fu Bijbel. Wi e kisi sani soleki buku, video, poku, nanga tra sani tapu a website fu wi. A de krin taki wi hemel Papa nanga en Manpikin lobi den yonguwan fu wi (Luk. 18:15-17). Te papa nanga mama e frutrow taki Yehovah o yepi den kweki den pikin bun èn te den srefi e du ala san den man fu sorgu bun gi den pikin di de wan gudu, dan Yehovah o breiti nanga den. Den papa nanga mama di e du dati, e gi den pikin na okasi fu kon tu na ini a famiri fu Yehovah fu têgo.

10-11. San Yehovah seti nanga yepi fu a lusu-paiman?

¹⁰ Yehovah gi en wan-enkri Manpikin so taki wi man kon na ini a famiri fu En baka. Soleki fa wi si na ini  paragraaf 4, dan Adam nanga Eva kon lasi a grani fu de na ini Yehovah en famiri èn den meki taki den pikin fu den no ben o man de tu na ini a famiri fu Yehovah (Rom. 5:12). Fu di Adam nanga Eva trangayesi Gado fu espresi, meki den no ben mag de moro na ini Gado en famiri. Ma fa a de nanga den bakapikin fu den? Fu di Yehovah lobi libisma, meki a seti sani gi den sma di e gi yesi na en fu kon baka na ini a famiri fu en. A du dati nanga yepi fu a frulusu-ofrandi fu a wan-enkri Manpikin fu en, Yesus Krestes (Yoh. 3:16; Rom. 5:19). Fu di Yesus gi en libi leki ofrandi, meki Yehovah ben man teki 144.000 sma di tan gi yesi na en leki en manpikin.​—Rom. 8:15-17; Openb. 14:1.

¹¹ Boiti dati, milyunmilyun sma de di e tan gi yesi na Gado awinsi san e pasa. Den abi a howpu fu kon na ini a famiri fu Gado, baka a lasti tesi na a kaba fu a Dusun Yari Tiri fu Yesus (Ps. 25:14; Rom. 8:20, 21). Fu di den abi a howpu dati èn den e si Yehovah leki den Mekiman, meki nownow kaba den e kari en „Tata” (Mat. 6:9). Den sma di kisi wan opobaka o kisi na okasi tu fu leri san Yehovah e aksi fu den. Den sma di e bosroiti fu gi yesi na en o kon na ini en famiri tu.

12. Sortu aksi wi o luku now?

¹² Soleki fa wi si, Yehovah du furu sani kaba fu gi libisma grani. A teki salfuwan kaba leki en manpikin èn a gi den sma fu a „bigi ipi” a howpu fu tron en pikin na ini a nyun grontapu (Openb. 7:9). San wi kan du now fu sori Yehovah taki wi wani de na ini en famiri?

13. San wi kan du fu kon na ini a famiri fu Gado? (Markus 12:30)

¹³ Sori taki yu lobi Yehovah fu di yu e dini en nanga yu heri ati. (Leisi Markus  12:30.) Gado gi wi furu bun sani. Ma wan fu den moro bigi sani di a gi wi na taki wi man anbegi en. Wi e sori Yehovah taki wi lobi en te wi e „hori den komando fu en” (1 Yoh. 5:3). Wan fu den komando di Yehovah wani taki wi hori, na a komando di Yesus gi taki wi musu meki sma tron disipel èn dopu den (Mat. 28:19). A gi wi a komando tu fu lobi makandra (Yoh. 13:35). Yehovah e teki ala den sma di e gi yesi na den komando fu en, na ini en famiri. Den sma disi e kon abi brada nanga sisa na heri grontapu di e anbegi Yehovah makandra nanga den.​—Ps. 15:1, 2.

14. Fa wi kan sori lobi gi trawan? (Mateyus 9:36-38; Romesma 12:10)

¹⁴ Sori lobi gi trawan. Lobi na a moro prenspari fasi fu Yehovah (1 Yoh. 4:8). Yehovah sori taki a lobi wi, srefi fosi wi ben sabi en (1 Yoh. 4:9, 10). Wi e teki na eksempre fu en te wi e sori trawan taki wi lobi den (Ef. 5:1). Wan fu den moro bun fasi fa wi kan sori lobi gi tra sma, na te wi e yepi den fu kon sabi Yehovah now di ten de ete fu du dati. (Leisi Mateyus 9:36-38.) Te wi e yepi sma na so wan fasi, dan den kan kon sabi san den musu du fu kon na ini a famiri fu Gado. Te wan sma dopu kaba, dan wi musu tan sori lobi nanga lespeki gi en (1 Yoh. 4:20, 21). Fa wi e du dati? Wan sani, na taki wi e sori taki wi e frutrow en. Fu eksempre, efu wi no e frustan fu san ede a du wan sani, dan wi no o prakseri wantewante taki a e denki ensrefi nomo. Na presi fu dati, wi o gi wi brada nanga sisa grani fu di wi o si den moro hei leki wi srefi.​—Leisi Romesma 12:10; Fil. 2:3.

15. Gi suma wi musu sori sari-ati nanga switifasi?

¹⁵ Sori sari-ati nanga switifasi gi ala sma. Efu wi wani de na ini a famiri fu Yehovah fu têgo, dan wi musu du den sani di wi e leri fu Gado Wortu. Fu eksempre, Yesus leri wi taki wi musu sori sari-ati nanga switifasi gi ala sma, srefi gi wi feanti (Luk. 6:32-36). A kan muilek son leisi fu du dati. Efu dati de so, wi musu leri fu denki leki Yesus èn fu du sani neleki en. Te wi e du ala san wi man fu gi yesi na Yehovah èn fu teki na eksempre fu Yesus, dan wi e sori wi Papa na hemel taki wi wani de na ini en famiri fu têgo.

16. Fa wi kan sorgu taki noti e gi Yehovah en famiri porinen?

¹⁶ No meki noti gi Yehovah en famiri porinen. A de so nofo tron na ini wan osofamiri, taki wan pikin boi o du san en bigi brada e du. Efu a bigi brada e du san Bijbel e taki, dan a o de wan bun eksempre gi en pikin brada. Ma efu a bigi brada e du ogri, dan a pikin brada kan go du den ogri dati tu. Na so a de tu na ini Yehovah en famiri. Efu wan Kresten di ben e dini Yehovah tron wan sma di e kon nanga falsi leri, noso a e du hurudu èn a e tyari ensrefi na wan fasi di no fiti, dan trawan kan waka na en baka èn den kan go du den srefi sani dati tu. Den sma di e du disi e gi Yehovah en famiri porinen (1 Tes. 4:3-8). Wi no musu waka baka sma di e du ogri èn wi no musu meki nowan sani hari wi puru fu wi hemel Papa di lobi wi.

17. Nanga sortu denki wi musu luku bun, èn fu san ede?

¹⁷ Frutrow tapu Yehovah na presi fu frutrow tapu gudu. Yehovah pramisi wi taki a o sorgu taki wi abi nyanyan, krosi, nanga wan presi fu tan efu wi e suku en Kownukondre fosi èn efu wi e gi yesi na den bun wet fu en (Ps. 55:22; Mat. 6:33).  Te wi e frutrow a pramisi dati, dan wi no o denki taki den gudu fu a grontapu disi o kibri wi, noso taki den o meki wi de koloku. Wi sabi taki a wan-enkri fasi fa wi kan de koloku trutru na te wi e du a wani fu Yehovah (Fil. 4:6, 7). Srefi efu wi abi a moni fu bai furu sani, toku wi musu aksi wisrefi efu wi abi a ten noso a krakti fu gebroiki den sani dati èn fu sorgu taki den tan bun. A de so taki wi no man libi moro sondro den sani di wi abi? Wi no musu frigiti taki Gado gi wi wan wroko na ini a famiri fu en. Disi wani taki dati wi no musu meki nowan sani puru wi prakseri na a wroko dati. Wi no wani de leki a yongu man di ben lobi den gudu fu en so te taki a bosroiti fu no tron wan bakaman fu Yesus. Disi meki taki a lasi na okasi fu dini Yehovah èn fu tron wan fu den manpikin fu en.​—Mark. 10:17-22.

18. Sortu bigi grani èn sortu blesi libisma o kisi fu ala ten te den e gi yesi na Gado?

¹⁸ Libisma di e gi yesi na Yehovah o abi a moro bigi grani di de. Dati na fu lobi èn anbegi Yehovah fu ala ten. Den sma di abi a howpu fu libi na grontapu o abi a grani tu fu sorgu gi a moi grontapu di Yehovah meki gi den fu tan. Heri esi Gado Kownukondre o meki grontapu nanga ala sani na tapu kon moi baka. Yesus o puru ala den problema di Adam nanga Eva tyari kon di den bosroiti fu gowe libi a famiri fu Gado. Yehovah o meki milyunmilyun sma di dede kon na libi baka. Den no o siki moro èn den o kisi na okasi fu libi fu têgo na ini wan grontapu di kenki kon tron wan paradijs (Luk. 23:42, 43). Te libisma di e dini Yehovah no o abi sondu moro te fu kaba, dan den alamala o kisi a „glori nanga grani” fu san David ben skrifi.​—Ps. 8:5.

19. San wi musu hori na prakseri?

¹⁹ Efu yu na fu a „bigi ipi”, dan yu abi wan tumusi moi howpu. Gado lobi yu èn a wani taki yu kon na ini a famiri fu en. Sobun, du ala san yu man fu du san a taki. Sori ibri dei taki yu e warderi den pramisi fu Gado èn taki yu e du sani fu kisi den pramisi dati. Warderi a grani di yu abi fu anbegi a lobi-ati hemel Papa fu wi èn a grani fu prèise en fu têgo!