1. Karik ita husu pergunta saida bainhira hanoin kona-ba Jeová nia kriasaun?

KUANDU ita hanoin kona-ba buat hotu neʼebé Jeová kria ona, karik ita sente hanesan liurai David neʼebé halo orasaun: “Bainhira haʼu haree lalehan neʼebé Ita kria ona, no serbisu neʼebé Ita halo ho Ita-nia liman-fuan, fulan no fitun sira neʼebé Ita halo ona, haʼu hanoin: Ema iha folin saida hodi Ita nafatin hanoin nia? No ema nia oan-mane iha folin saida hodi Ita tau matan ba nia?” (Sal 8:3, 4) Hanesan David, karik ita hanoin katak ita mak kiʼik deʼit se kompara ho fitun sira no ita sente admira tanba Jeová hanoin ita. Mai ita koʼalia kona-ba oinsá Jeová tau matan ba Adão no Eva no mós halo sira sai parte ba ninia família.

2. Saida mak Jeová nia hakarak ba Adão no Eva?

² Adão no Eva mak Jeová nia oan primeiru iha mundu no Jeová mak sira-nia Aman neʼebé hadomi sira. Nia fó knaar ba Adão no Eva, hodi dehan: “Iha oan no sai barak bá, halo nakonu no domina rai neʼe.” (Gén 1:28) Jeová hakarak atu Adão no Eva iha oan no tau matan didiʼak ba mundu neʼe. Se uluk Adão no Eva apoia Jeová nia hakarak, sira no sira-nia oan sei sai parte ba Jeová nia família ba nafatin.

3. Oinsá ita hatene katak Jeová hafolin Adão no Eva?

³ Jeová hafolin Adão no Eva nuʼudar parte ba ninia família. Iha Salmo 8:5, David koʼalia kona-ba ema neʼebé Jeová kria: “Ita kria nia kiʼik liu fali anju sira, no Ita tau koroa glória no kmanek nian ba nia.” Jeová la kria ema ho forsa, matenek no abilidade neʼebé hanesan ho anju sira. (Sal 103:20) Maromak kria ema kiʼik liu uitoan duké  anju sira neʼebé iha kbiit boot. Neʼe furak tebes. Kuandu Jeová kria Adão no Eva, nia fó sira moris neʼebé kapás.

4. Saida mak akontese ba Adão no Eva tanba kontra Jeová? Iha lisaun neʼe, ita sei aprende saida?

 ⁴ Triste mak tanba Adão no Eva la halo tuir Jeová, sira la sai tan parte ba ninia família. Neʼe hamosu problema ba sira-nia bei-oan sira hanesan ita sei aprende iha lisaun neʼe. Maibé Jeová nia hakarak la troka. Nia hakarak ema hotu neʼebé laran-metin atu sai ninia oan ba nafatin. Primeiru, mai ita aprende oinsá Jeová hatudu katak nia hafolin ita. Tuirmai, ita sei aprende oinsá atu hatudu katak ita hakarak sai parte ba Jeová nia família. No ikusliu, ita mós sei aprende kona-ba bensaun oioin neʼebé Jeová nia família iha rai sei simu.

5. Oinsá ita bele hatudu agradese ba Jeová tanba nia kria ita tuir ninia ilas?

⁵ Jeová hafolin ita hodi kria ita tuir ninia ilas. (Gén 1:26, 27) Tanba Maromak kria ita tuir ninia ilas, ita bele haburas no hatudu ninia hahalok sira hanesan domin, laran-sadiʼa, laran-metin no justisa. (Sal 86:15; 145:17) Bainhira ita hatudu hahalok sira hanesan neʼe, ita fó glória no hatudu agradese ba Jeová. (1 Ped 1:14-16) Bainhira ita hatudu hahalok neʼebé halo nia kontente, ita mós sei sente kontente. Tanba ita bele hatudu hahalok hanesan Jeová, ita bele sai parte ba ninia família.

6. Oinsá Jeová hafolin ema bainhira kria mundu?

⁶ Jeová prepara hela-fatin neʼebé furak ba ita. Kleur antes Jeová kria ema, nia prepara uluk mundu ba ema. (Job 38:4-6; Jer 10:12) Tanba Jeová laran-diʼak no laran-luak, nia kria buat diʼak oioin atu halo ita kontente. (Sal 104:14, 15, 24) Dala ruma nia uza tempu atu hanoin kona-ba buat neʼebé nia kria ona no nia dehan “katak ida-neʼe diʼak”. (Gén 1:10, 12, 31) Nia hafolin ema hodi fó kbiit ba sira atu domina buat hotu iha rai. (Sal 8:6) Maromak hakarak ema neʼebé perfeitu atu sente kontente no tau matan ba ninia kriasaun ba nafatin. Ita fó agradese beibeik ba Jeová kona-ba neʼe ka lae?

7. Oinsá Josué 24:15 hatudu katak ita iha liberdade atu halo desizaun rasik?

⁷ Jeová fó ita liberdade atu halo desizaun rasik. Ita bele deside rasik buat neʼebé ita hakarak atu halo iha ita-nia moris. (Lee Josué 24:15.) Aman Jeová kontente tebes bainhira ita deside atu serbí nia. (Sal 84:11; Prov 27:11) Ita bele uza liberdade neʼe atu halo desizaun diʼak oioin. Hanoin toʼok kona-ba Jesus nia ezemplu.

8. Fó toʼok ezemplu kona-ba oinsá Jesus uza ninia liberdade atu hili.

⁸ Ita bele banati-tuir Jesus nia ezemplu liuhusi buka uluk ema seluk nia diʼak duké ita-nian rasik. Loron ida, bainhira Jesus no ninia apóstolu sira kole loos, sira buka fatin hakmatek atu bele deskansa. Maibé sira la konsege deskansa. Ema-lubun buka-hetan sira no hakarak Jesus atu hanorin sira. Jesus la sai hirus ba ema-lubun neʼe. Nia hanoin tebes sira. Tan neʼe, “nia hahú hanorin sira buat barak”. (Mc 6:30-34) Bainhira ita banati-tuir Jesus hodi fó ita-nia tempu no enerjia atu ajuda ema seluk, ita fó glória ba Aman Jeová. (Mt 5:14-16) Ita mós hatudu katak ita hakarak sai parte ba Jeová nia família.

9. Abilidade espesiál saida mak Jeová fó ba ema?

 ⁹ Jeová fó ba ema abilidade atu bele iha oan, no mós responsabilidade atu hanorin sira-nia oan atu hadomi no serbí Jeová. Se Ita mak inan ka aman, Ita hafolin prezente furak neʼe ka lae? Maski Jeová fó anju sira abilidade oioin, maibé nia la fó ba sira abilidade atu iha oan. Tan neʼe, se Ita mak inan ka aman, Ita presiza hafolin Ita-nia knaar atu haboot oan sira. Jeová fó Ita responsabilidade importante atu haboot oan sira “ho dixiplina no ho hanorin neʼebé tuir Jeová nia hakarak”. (Éf 6:4; Deut 6:5-7; Sal 127:3) Atu ajuda inan-aman sira, Maromak nia organizasaun prepara informasaun barak neʼebé bazeia ba Bíblia hanesan publikasaun sira, vídeo, múzika no informasaun online. Ida-neʼe hatudu ho klaru katak Jeová no Jesus hadomi ita-nia oan sira. (Lc 18:15-17) Bainhira inan-aman sadere ba Jeová no hakaʼas an atu tau matan ba sira-nia oan, neʼe halo Jeová sente kontente. Hodi halo nuneʼe, inan-aman ajuda sira-nia oan atu hetan oportunidade hodi sai parte ba Jeová nia família ba nafatin.

10-11. Liuhusi Jesus nia sakrifísiu, Jeová loke dalan ba ema atu hetan saida?

¹⁰ Jeová fó ninia Oan-Mane nuʼudar sakrifísiu atu ita bele sai fali parte ba ninia família. Hanesan temi iha  parágrafu haat, Adão no Eva laʼós tan parte ba Jeová nia família no sira mós halakon oportunidade ba sira-nia oan atu sai parte ba Jeová nia família. (Rom 5:12) Adão no Eva hili atu kontra Jeová, tan neʼe sira merese atu la sai tan parte ba Jeová nia família. Maibé oinsá ho sira-nia oan no bei-oan? Jeová hadomi ema, tan neʼe nia loke dalan ba Adão no Eva nia oan sira neʼebé laran-metin atu sai parte ba ninia família. Nia halo nuneʼe hodi fó ninia Oan-Mane mesak Jesus Kristu nuʼudar sakrifísiu. (João 3:16; Rom 5:19) Jeová bele hili ema naʼin-144.000 neʼebé laran-metin atu sai ninia oan-hakiak tanba Jesus nia sakrifísiu.—Rom 8:15-17; Apok 14:1.

¹¹ Iha mós ema millaun ba millaun neʼebé halo tuir Jeová nia hakarak ho laran-metin. Sira iha esperansa atu sai parte ba Maromak nia família depois koko ba dala ikus kuandu Kristu nia Ukun ba tinan rihun ida remata. (Sal 25:14; Rom 8:20, 21) Tanba sira iha esperansa neʼe, agora sira bele bolu Jeová nuʼudar “Aman”. (Mt 6:9) Ema neʼebé moris-hiʼas mós sei hetan oportunidade atu aprende kona-ba Jeová nia hakarak. Sira neʼebé halo tuir Jeová nia matadalan mós sei sai parte ba Jeová nia família.

12. Ita sei buka resposta ba pergunta saida?

¹² Hanesan ita aprende ona, Jeová halo buat oioin atu hatudu katak nia hafolin ema. Nia hili ona ema neʼebé iha esperansa atu bá lalehan atu sai ninia oan-hakiak no nia fó esperansa ba “ema-lubun boot” atu sai ninia oan iha dalan neʼebé kompletu iha mundu foun. (Apok 7:9) Saida mak ita bele halo agora atu hatudu katak ita hakarak sai parte ba Jeová nia família ba nafatin?

13. Saida mak ita presiza halo atu sai parte ba Jeová nia família? (Marcos 12:30)

¹³ Hatudu Ita-nia domin ba Jeová liuhusi serbí nia ho laran tomak. (Lee Marcos 12:30.) Maromak fó ita prezente furak oioin no prezente ida neʼebé furak liu mak ita-nia abilidade atu adora nia.  Ita hatudu katak ita hadomi nia liuhusi “halo tuir ninia ukun-fuan sira”. (1 João 5:3) Mandamentu ida neʼebé Jeová hakarak ita atu halo tuir mak Jesus nia mandamentu atu hanorin ema atu sai dixípulu no fó batizmu ba sira. (Mt 28:19) Nia mós haruka ita atu hadomi malu. (João 13:35) Jeová sei simu ema neʼebé halo tuir ninia mandamentu sira atu sai parte ba ninia família iha mundu tomak neʼebé adora nia.—Sal 15:1, 2.

14. Oinsá ita hatudu domin ba ema seluk? (Mateus 9:36-38; Roma 12:10)

¹⁴ Hatudu domin ba malu. Jeová nia hahalok importante liu mak domin. (1 João 4:8) Jeová hadomi ita maski ita seidauk koñese nia. (1 João 4:9, 10) Ita banati-tuir Jeová bainhira ita hatudu domin ba ema seluk. (Éf 5:1) Dalan diʼak liu atu hadomi ema seluk mak hodi ajuda sira atu aprende kona-ba Jeová bainhira sei iha tempu. (Lee Mateus 9:36-38.) Hodi halo nuneʼe, ita fó oportunidade ba sira atu sai parte ba Jeová nia família. Kuandu ema ida hetan tiha batizmu, ita tenke kontinua hatudu domin no respeitu nia. (1 João 4:20, 21) Oinsá ita bele halo ida-neʼe? Ita la duvida ho ninia motivu atu halo buat ruma. Maski ita la komprende tanbasá nia halo buat ruma, maibé ita lakohi hanoin katak nia halo ida-neʼe tanba hanoin an deʼit. Duké halo nuneʼe, ita hatudu respeitu ba nia no haree nia boot liu fali ita.—Lee Roma 12:10; Flp 2:3.

15. Ita presiza hatudu laran-sadiʼa no laran-diʼak ba sé?

¹⁵ Hatudu laran-sadiʼa no laran-diʼak ba ema hotu. Se ita hakarak sai parte ba Jeová nia família ba nafatin, ita tenke aplika Bíblia nia matadalan iha ita-nia moris. Porezemplu, Jesus hanorin katak ita presiza hatudu laran-sadiʼa no laran-diʼak ba ema hotu, inklui ba ita-nia inimigu. (Lc 6:32-36) Dala ruma susar atu halo ida-neʼe. Se nuneʼe, ita presiza aprende oinsá atu hatudu hahalok no hanoin hanesan Jesus. Bainhira ita hakaʼas an atu halo tuir Jeová no banati-tuir Jesus, ita hatudu ba Jeová katak ita hakarak atu sai parte ba ninia família ba nafatin.

16. Oinsá ita bele proteje Jeová nia família nia reputasaun?

¹⁶ Proteje Jeová nia família nia reputasaun. Iha família laran, baibain alin sira halo tuir sira-nia maun nia ezemplu. Se maun sira aplika Bíblia nia prinsípiu, sira sei sai nuʼudar ezemplu diʼak ba alin sira. Se maun sira halo buat neʼebé sala, sira-nia alin mós sei halo tuir sira. Jeová nia família mós hanesan neʼe. Se irmaun ka irmán ida kontra lia-loos, halo hahalok la morál ka halo hahalok aat oioin, karik irmaun-irmán seluk sei banati-tuir nia no halo buat neʼebé sala. Sira-nia hahalok sei estraga Jeová nia família nia reputasaun. (1 Tes 4:3-8) Ita labele halo tuir ezemplu sira neʼebé la diʼak. Keta husik buat ida atu estraga ita-nia relasaun diʼak ho Jeová.

17. Ita tenke hasees an husi hanoin saida no tanbasá?

¹⁷ Tau fiar ba Jeová laʼós ba rikusoin. Se ita buka uluk Jeová nia Ukun no moris tuir ninia prinsípiu sira, nia promete katak nia sei fó hahán, roupa no hela-fatin ba ita. (Sal 55:22; Mt 6:33) Bainhira ita tau fiar ba promesa neʼe, ita sei la hanoin katak rikusoin mak bele proteje no halo ita kontente. Dalan ida deʼit atu bele sente dame mak hodi halo Jeová nia hakarak. (Flp 4:6, 7) Maski karik  ita-nia osan toʼo atu sosa buat oioin, maibé ita tenke hanoin uluk se ita iha forsa no tempu atu tau matan ba buat sira-neʼe ka lae. Ita hafolin demais buat neʼebé ita iha ka lae? Ita presiza hanoin-hetan katak Maromak fó knaar ba ita atu halo. Tan neʼe, ita labele husik buat seluk dada ita-nia atensaun. Ita lakohi sai hanesan mane joven neʼebé la simu oportunidade atu serbí Jeová no mós atu sai Maromak nia oan-hakiak tanba deʼit hafolin demais buat neʼebé nia iha.—Mc 10:17-22.

18. Ema neʼebé halo tuir Maromak sei hetan priviléjiu no bensaun saida?

¹⁸ Ema sira neʼebé halo tuir Jeová sei hetan priviléjiu atu adora no hadomi Jeová ba nafatin. Sira neʼebé iha esperansa atu hela iha rai sei iha knaar atu tau matan ba mundu neʼebé Jeová kria ho perfeitu. Lakleur tan, Maromak nia Ukun sei halo mundu no buat hotu sai furak fali. Jesus sei rezolve problema hotu neʼebé mosu tanba Adão no Eva nia desizaun atu husik Jeová nia família. Jeová sei fó moris-hiʼas ba ema millaun ba millaun no fó ba sira oportunidade atu moris ba nafatin ho saúde diʼak iha mundu paraízu. (Lc 23:42, 43) Bainhira ema neʼebé serbí Jeová sai perfeitu, sira hotu sei simu glória neʼebé temi iha David nia Salmo.—Sal 8:5.

19. Ita presiza hanoin-hetan saida?

¹⁹ Se ita mak parte ba “ema-lubun boot”, ita iha esperansa neʼebé furak. Maromak hadomi ita, no nia hakarak ita atu sai parte ba ninia família. Tan neʼe, hakaʼas an atu halo nia kontente. Loroloron hanoin-hetan kona-ba ninia promesa sira. Hafolin ita-nia priviléjiu atu adora Jeová no ita-nia esperansa atu fó hahiʼi nia ba nafatin.