1. Siwudziso muni hi nga dzi girago ha gu dundrugeya khu satshavbo esi Jehovha a vangidego?

HA GU dundruga khu satshavbo esi Jehovha a si vangidego, hi na dzipwa nga edzi Dhavhidhe a dzipwidego khidzo, uye a nga gombeya ga Jehovha a bwe a lomba khuye: “Nya gu khedza ndzadzini nyi wona sigiro nya mandza yago, ngima ni dzinyeledzi u si vegidego malangani yawe, gasi ginani muthu nya gukala u mu alakanya? Gyanana nya muthu ginani nya gukala u dzi garadza khu gu gi thela kota?” (Ndzi. 8:3, 4) Kha nga Dhavhidhe, hi nga dzi fananisa ni dzinyeledzi edzi Jehovha a dzi giredego, hi wona edzi ha gu va dugwana khidzo hi bwe hi hlamala khu gu ba Jehovha a hi khathaleya. Ganiolu, Jehovha a khathalede vathu nyo pheye a gu Adhamu ni Evha, a bwe a va dzumeleya gu gira gipandre nya ndraga yaye, hongoleni hi si wonani.

2. Ginani egi Jehovha a nga ba a vbweta gu khuye Adhamu ni Evha va gira?

² Adhamu ni Evha va di ri sanana nyo pheye nigu Jehovha a diri Papayi wawe nya lihaladzo wa ndzadzini. Uye ningide patwa wowu thumo nyo wu gire. Nungungulu a di va embeya khuye: “Velegelanani, mu andra mu tadza mafu, mu ma fumela.” (Gen. 1:28) Uye a di gu vbweta gu khuye va velega sanana va bwe va khathaleya gwadi mafu. Nari khatshi va ni gu engiside, va bwe va gira esi va nga embedwa khu Nungungulu, Adhamu ni Evha ni sanana sawe va di hadzi gu simama gu gira gipandre nya ndranga ya Nungungulu kala gupindruga.

3. Khu ginani hi ganeyago gu khethu Adhamu ni Evha va di ri ni lisima ndrangani ga Nungungulu?

³ Adhamu ni Evha va di ri ni lisima ndrangani ga Nungungulu. Umo ga Ndzimo 8:5, Dhavhidhe ganede esi maningano ni sivangwa  sa Jehovha, nya nga muthu: “Aholu u mu wumbide gu tshala vbadugwana basi gu hadza gu fanana ni Nungungulu [mwendro dzingilozi NM.] U mu ambagiside wufumu ni wuzundzu.” Jehovha kha ninga vathu tshivba ya mweyo, guti ni makodzelo gu fana ni dzingilozi. (Ndzi. 103:20) Ambari ulolo, ga “gu tshala vbadugwana basi” gasi va fana ni dzingilozi. Isoso si ngu samadzisa! Tepo Jehovha a nga vanga vavelegi vathu nyo pheye, a va ningide womi nyo tsakise.

4. Ginani gi giregedego Adhamu ni Evha khu kotani nya gu mba engisa Jehovha nigu ginani hi na bhulago khigyo avba nya ndrima yeyi?

 ⁴ Ya walo khu gu, Adhamu ni Evha kha va mu engisa Nungungulu ni gu kha va ngo gira gipandre nya ndranga yaye. Isoso si vangede sigaradzo sanana savo, kha nga hi na si wonago avba nya ndrima yeyi. Ganiolu, makungo ya Jehovha kha ma vbindrugedza. Uye a gu vbweta gu khuye vathu va engisago, va khala sanana saye kala gupindruga. Gu pheya, hi na bhula khedzi Jehovha a yeyedzago khidzo gu khuye hi na ni lisima gwaye. Khavbovbo, hi na bhula khesi hi nga girago olu gasi gu yeyedza gu khethu hi ngu dzina gu khala sivbango nya ndraga ya Nungungulu. Khu mahegiso, hi bhula khu silo nya sadi, esi sanana sa Jehovha si na si manago avba mafuni kala gupindruga.

5. Hi nga yeyedza kharini gu khethu hi gu mu bonga Nungungulu kholu a hi giridego na hi ri ni makhalelo nya nga ayo yaye?

⁵ Jehovha yeyedzide gu khuye hi na ni lisima tepo a nga hi vanga na hi ri ni makhalelo nya nga ayo yaye. (Gen. 1:26, 27) Khu kotani nya olu hi vangidwego khu mufananiso wa Nungungulu, hi nga hevbuleya gu yeyedza makhalelo yaye nya yadi. Khu giyeyedzo, hi nga yeyedza lihaladzo, gupweya wusiwana, gutumbega ni gu lulama. (Ndzi. 86:15; 145:17) Ha gu haguleya makhalelo yaya, hi na ninga wuzundzo Jehovha hi bwe hi yeyedza gu khethu hi ngu mu bonga. (1 Ped. 1:14-16) Ha gu vbanya khu ndziya yi tsakisago Papayi wathu wa ndzadzini anethu hi na tsaka. Khu kotani nya olu hi gu na ni makhalelo nya nga aya ya Jehovha, hi nga khala vathu ava Jehovha ava vbwetago ndrangani gwaye.

6. Jehovha yeyedzide kharini gu khuye a ngu ninga lisima vathu tepo a nga vanga mafu?

⁶ Jehovha a hi dongisede ndranga nyo hathege. Na si gu vangi muthu nyo pheye, Jehovha a di dongiseya mafu gasi gu ninga vathu. (Joba 38:4-6; Jer. 10:12) Khu kotani nya wuwadi ni wuhindzi, Jehovha giride silo nya singi nya sadi gasi gu hi tsakisa. (Ndzi. 104:14, 15, 24) Uye dzi ningide tepo nya gu khedziseye gwadi esi a vangidego a bwe a si “wona gukhuye khyadi.” (Gen. 1:10, 12, 31) Uye ningide lithomo vathu nya gu “fumele” satshavbo silo a si vangidego mafuni. (Ndzi. 8:6) Nungungulu o vbweta gu khuye vathu nyo vbeleye va tsaka kala gupindruga tepo va khathaleyago sivangwa saye. Ina tepo yatshavbo u ngu mu bonga Jehovha khu gitumbiso gyogyo nyo tsakise?

7. Josuwa 24:15 a gu yeyedza kharini gu khuye muthu a na ni gu tshulega nya gu dzi hatheye esi a si vbwetago?

⁷ Jehovha a hi ningide lithomo nya gu hi dzi hatheye esi hi si vbwetago. Hi nga dzi hatheya esi hi na girago womini wathu. (Leri Josuwa 24:15.) Papayi wathu nya lihaladzo, a ngu tsaka tepo hi hathago gu mu thumeya. (Ndzi. 84:11; Mav. 27:11) Hi nga thumisa lithomo nya gu dzi hatheye khu gu hatha gu gira silo nya sadi. Dundrugeya khu giyeyedzo gya Jesu nya edzi a thumisidego khidzo gutshulega gwaye nya gu dzi hatheye gu gira esi a si vbwetago.

8. Ninga giyeyedzo nya edzi Jesu a thumisidego khidzo gutshulega nya gu dzi hatheye esi a si vbwetago.

⁸ Hi nga pimedzeya giyeyedzo gya Jesu, khu gu hi hatha gu thangisa gu gola ga vambe. Litshigu limwedo Jesu ni vapostoli vaye na va gu garade, va di hongola ga wulanga nyo khaguri gasi guya hefemula. Ganiolu, avo kha va si kodza gu hefemula. Gitshungu gi di va landra nigu avo va ni gu vbweta ngudzu gu hevbudzwa khu Jesu, ganiolu  Jesu kha va gorogeya. Wulangani nya isoso, uye a di va pweya wusiwana. Khu kharato ginani a giredego? “A di pheya gu va hevbudza silo nya singi.” (Marko 6:30-34) Ha gu pimedzeya Jesu khu gu thumisa tepo yathu, tshivba yathu gasi gu phasa vambe, hi na rungudza Papayi wathu wa ndzadzini. (Mat. 5:14-16) Nigu hi na yeyedza Jehovha gu khethu ha gu vbweta gu gira gipandre nya ndranga yaye.

9. Giningwa muni nya lisima Jehovha a ningedego vathu?

⁹ Jehovha ningide vathu makodzelo nyo velege sanana, ni thumo nya gu si hevbudze gu haladza Jehovha ni gu mu thumeya. Abari gu u muvelegi, ina u ngu bonga khu giningwa gegi nyo hathege? Jehovha ningide dzingilozi makodzelo nya mangi nyo mbure, ganiolu uye kha dzi ninga makodzelo nyo velege sanana. Abari gu u muvelegi, bonga khu lithomo u gu nalo nyo dandrise sanana. Vavelegi va ningidwe thumo nya lisima nya gu dandrise sanana sawe va si “hevbudza mavbanyelo nya ndruda ni githawo kha nga guruma ga Pfhumu.” (Efes. 6:4; Dhet. 6:5-7; Ndzi. 127:3) Gasi gu phasa vavelegi gu gira isoso, hengeledzano ya Nungungulu yi ngu dusa dziferameta nya dzingi dzi seketedwago umo nya Bhibhiliya, nya nga mabhuku, dzivhidhiyu, dzindzimo ni dzindrima dzi guromo umo nya sayiti. Khu lisine Papayi wathu wa ndzadzini ni Gyanana gyaye va ngu si haladza ngudzu sanana sathu. (Luka 18:15-17) Tepo vavelegi va tumbago Jehovha va bwe va gira satshavbo va si kodzago gasi gu khathaleya sanana sawe, Jehovha a gu tsaka. Nigu vavelegi vovo va gu phasa sanana sawe gu manega ni gu tumba nyo gire gipandre nya ndranga ya Nungungulu kala gupindruga!

10-11. Ginani egi Jehovha a hi ningidego khu gu thumisa dzegiso?

¹⁰ Jehovha ningede Gyanana gyaye nya gu gi gole gasi hi si kodza gu khala gambe sivbango nya ndranga yaye. Kha nga hi ganedego avba nya  ndrimana 4, tepo Adhamu ni Evha va nga ghoha kha va khala gambe sivbango nya ndranga ya Jehovha nigu sanana sawe niso. (Rom. 5:12) Adhamu ni Evha va di hatha gu mba engisa Nungungulu, khu kharato Jehovha a di va tutumisa ndrangani gwaye. Ganiolu, ginani gi nga hadzi giregeya ni sanana sawe? Jehovha a ngu haladza vathu, khu kharato giride malulamiselo nya gu sanana sa Adhamu ni Evha si engisago si gira gipandre nya ndranga yaye. Uye giride isoso khu gu thumisa muphaso wa Gyanana gyaye nyo gi gole, Jesu Kristo. (Joh. 3:16; Rom. 5:19) Jehovha hathide 144000 vathu nyo tumbege gasi va khala sanana saye, khu kotani nya muphaso wa Jesu. — Rom. 8:15-17; Gutu. 14:1.

¹¹ Nigu dzimiliyoni nya simbe sithumi nya gu tumbege, si ngu gira gugola ga Nungungulu. Iso si na ni gutumba nyo gire gipandre nya ndranga ya Nungungulu hwane nya gu lingwe nyo hegise guvbeyani nya 1000 myaga. (Ndzi. 25:14; Rom. 8:20, 21) Khu kotani nya gutumba va gu navo, avo muhuno va ngu rana Jehovha khavo Muvangi vawe ni Papayi vawe. (Mat. 6:9) Ava va na wuswago khu gufani anavo va na mana lithomo nya gu hevbule esi Jehovha a vbwetago gu khuye va gira. Avo va na hathago gu engisa milayo yaye va na gira navo gipandre nya ndranga yaye.

12. Khu gevbini giwudziso hi na hlamulago olu?

¹² Kha nga hi si wonidego, Jehovha a ngu gira silo nya singi gasi gu phara vathu khu ndziya yi yeyedzago gu khiyo a ngu va ninga lisima. Uye hathide Makristo nyo todzwe gasi ma khala sanana saye. Nigu, a gu tumbisa ava va girago gipandre nya “gitshungu nya gikhongolo” gu khala sanana saye mafuni nya maphya. (Gutu. 7:9) Ginani hi nga girago olu gasi gu yeyedza Jehovha gu khethu hi ngu dzina gu khala sivbango nya ndranga yaye kala gupindruga?

13. Ginani hi nga girago gasi hi gira gipandre nya ndranga ya Nungungulu kala gupindruga? (Marko 12:30)

¹³ Yeyedza lihaladzo lago khu Jehovha khu gu mu thumeya khu monyo wago watshavbo. (Leri  Marko 12:30.) Nungungulu khu wu wadi, a ngu hi ninga silo nya singi, nigu gimwegyo nya silo soso makodzelo nya gu mu khozeye. Ha gu yeyedza gu khethu hi ngu haladza Jehovha tepo hi landrisago “milayo yaye.” (1 Joh. 5:3) Moyo nya milayo eyi Jehovha a vbwetago gu khuye hi yi landrisa, khu owu Jesu a hi ningidego nya gu gire vapizane hi bwe hi va bhabhatisa. (Mat. 28:19) Uye gambe hi rumide gu khuye hi yede gu haladzana khu gyathu. (Joh. 13:35) Jehovha a na dzumeleya ava va engisago milayo yaye gasi va gira gipandre nya ndranga yaye. — Ndzi. 15:1, 2.

14. Hi nga yeyedza kharini gu khethu hi ngu haladza vambe? (Matewu 9:36-38; Varoma 12:10)

¹⁴ Haladza vambe. Lihaladzo likhalelo nya lisima la Jehovha. (1 Joh. 4:8) Jehovha a hi yeyedzide lihaladzo na hi si gu muti. (1 Joh. 4:9, 10) Ethu hi nga mu pimedzeya khu gu hi haladza vambe. (Efes. 5:1) Mweyo nya dzindziya hi nga yeyedzago khiyo lihaladzo khu vathu, khu gu va hevbudza maningano ni Jehovha na yi ngo romo tepo. (Leri Matewu 9:36-38.) Ha gu gira isoso, hi na va phasa guti esi va yedego gu gira gasi va khala sivbango nya ndranga ya Nungungulu. Hwane nya gu ba muthu a bhabhatisidwe, hi yede gu simama gu mu haladza ni gu mu ninga githawo. (1 Joh. 4:20, 21) Ginani gi pategago gasi gu gira isoso? Gimwegyo nya silo hi nga girago gu mu tumba. Khu giyeyedzo, ha gu mba si pwisisa gu khethu khu ginani a giridego silo nyo khaguri, kha hi yeli gu pimisa gu khethu a di gira silo sa mapimoni gwaye. Wulangani nya isoso, hi nga yeyedza gu khethu hi ngu ninga lisima ndriyathu khu gu mu wona nari tshukwana gu vbindra ethu. — Leri Varoma 12:10; Filp. 2:3.

15. Hi yede gu yeyedza wuhindzi ni wuwadi ga mani?

¹⁵ Yeyedza wuhindzi ni wuwadi ga vathu vatshavbo. Ha gu ba hi vbweta gu khala sivbango nya ndranga ya Jehovha hi yede gu thumisa esi hi si hevbulago omu nya Bhibhiliya womini gwathu. Khu giyeyedzo, Jesu hi hevbudzide gu khuye hi yede gu yeyedza wuhindzi ni wuwadi ga vathu vatshavbo gu pata ni valala vathu. (Luka 6:32-36) Dzimbe dzitepo si nga hi garadzeya gu gira esi. Ambari ulolo, hi yede gu hevbuleya gu pimisa ni gu gira silo nya ga edzi Jesu a nga ba a gira khidzo. Ha gu dzi garadzeya gu engisa Jehovha ni gu pimedzeya Jesu, hi na yeyedza Papayi wathu wa ndzadzini gu khethu hi ngu dzina gu khala sivbango nya ndranga yaye kala gupindruga.

16. Hi nga vhikeya kharini lina nya ladi nya ndranga ya Jehovha?

¹⁶ Vhikeya lina nya ladi nya ndranga ya Jehovha. Avba nya ndranga, gyanana gya gu pimedzeya esi koma wagyo a girago. Koma a gu thumisa matshina nya milayo womini gwaye, a na khala giyeyedzo nya gyadi ga nandra waye. Ganiolu, a gu gira silo nya mba sadi, nandra waye a nga pimedzeya giyeyedzo gyaye nya mba gyadi. Si ngu fana ni ndrangani ga Jehovha. Mukristo nyo tumbege a gu khala muwugeyi mwendro gu manega ni mavbanyelo nya mba yadi, vambe navo va nga mu pimedzeya va gira silo nya mba sadi. Ava va girago isoso, va gu ghoha lina nya ladi nya ndranga ya Jehovha. (1 Tes. 4:3-8) Ethu kha hi yeli gu pimedzeya siyeyedzo nya mba sadi. Nigu kha hi yeli gu dzumeleya gilo gi ghoha wupari wathu ni Papayi wathu wa ndzadzini.

17. Ginani hi yedego gu gi potsa nigu khu ginani?

¹⁷ Tumba Jehovha, u nga tumbi silo nya mafu. Jehovha tumbiside gu khuye a na hi ninga guhodza, gu ambala a bwe a hi vhikeya ha gu thangisa Mufumo waye hi bwe hi engisa milayo yaye. (Ndzi. 55:22; Mat. 6:33) Ha gu vega gupima avba nya situmbiso sesi, kha hi na nga pimisa gu khethu silo nya mafu si na hi vhikeya si bwe si hi ninga litsako. Hi ngu dziti gu khethu egi basi gi nga hi ningago gurula nya lisine gu gira gugola ga Jehovha. (Filp. 4:6, 7) Ambari ha gu ba hiri ni makodzelo nyo renge silo nya singi, hi yede gu gevisisa hi wona gu khethu ina hi na ni tepo ni tshivba nya gu si thumise ni gu si khathaleya gani. Ina ha gu bangeleya ngudzu avba nya dzithomba dzathu? Hi yede gu dundruga gu khethu  Jehovha a hi ningide thumo gasi hi wu gira ndrangani gwaye. Isoso sa gu thula gu khiso kha hi yeli gu dzumeleya gilo gi hi tsolopeteya. Khu lisine, kha hi yeli gu fana ni lidzaha lile li nga ba li gola ngudzu dzithomba nyo kala li hunga gu mba landreya Jesu. Ilo li luzide lithomo nyo thumeye Jehovha ni gu hathwa kha nga gyanana gyaye.— Marko 10:17-22.

18. Lithomo muni nya likhongolo li na manwago khu ava va engisago nigu makategwa muni va na ma manago kala gupindruga?

¹⁸ Ava va engisago va na mana lithomo nya likhongolo nya gu haladze Jehovha ni gu mu khozeya kala gupindruga. Ava va gu na ni gutumba nya gu vbanye mafuni, va na tsaka gambe tepo va na khathaleyago mafu aya Jehovha a ma vangidego gasi ma khala ndranga yawe nyo vbeleye. Nugunugu, Mufumo wa Nungungulu wu na gira gu satshavbo si gomogo mafuni si khadzisega gambe. Jesu a na lulamisa sigaradzo satshavbo hi vangedwego khu Adhamu ni Evha tepo va nga hunga gu dzi hambanisa ni ndranga ya Jehovha. Jehovha a na wusa dzimiliyoni nya vathu khu gufani a bwe a va ninga lithomo nyo vbanye kala gupindruga paradhesini mafuni na va ri ni womi nyo vbeleye. (Luka 23:42, 43) Tepo ava va thumeyago Jehovha va na khalago vathu nyo vbeleye, avo va na mana “wufumu ni wuzundzo” owu Dhavhidhe a ganedego khuwo. — Ndzi. 8:5.

19. Ginani hi yedego gu gi vegisa mapimoni gwathu?

¹⁹ Wa gu ba u romo avba nya tsawa nya va girago gipandre nya “gitshungu nya gikhongolo,” u na ni gutumba nyo tsakise. Nungungulu a ngu gu haladza nigu a gu vbweta gu khuye u lumba ndranga yaye. Khu kharato, gira satshavbo u si kodzago gasi u mu tsakisa. Tshigu ni tshigu, vegisa mapimoni gwago ni monyoni gwago situmbiso sa Nungungulu. Ninga lisima lithomo u gu nalo nyo khozeye Papayi wathu wa ndzadzini nigu ninga lisima gu vireya u gu nago nya guta mu dhumise kala gupindruga.