1. Mibuzyo nzi njotukonzya kubuzya kuti naa twayeeya kujatikizya zintu zyoonse Jehova nzyaakalenga?

CIINDI notuzinzibala kuyeeya kujatikizya zyoonse Jehova nzyaakalenga, tulakonzya kulimvwa mbuli mbwaakalimvwa sintembauzyo Davida, iwakapaila kuli Jehova akubuzya kuti: “Nendibona majulu aako, imilimo yaminwe yako, imwezi anyenyeezi nzyookabamba, ino muntu ninzi ooyo ngobikkila maano, amwanaamuntu ooyo ngolanganya?” (Int. 8:3, 4) Mbubwenya mbuli Davida, tulakonzya kuyeeya kujatikizya mbotuli baniini, twalyeezyanisya kunyenyeezi Jehova nzyaakalenga alimwi ambocikkomanisya kubona Jehova mbwatubikkila maano. Pele mbubwenya mbotutiibone, Jehova wakababikkila maano bantu bakusaanguna ba Adamu a Eva, alimwi wakababikka kuba cibeela camukwasyi wakwe.

2. Ino Jehova wakajisi makanze nzi kujatikizya bana bakwe bakusaanguna anyika?

² Ba Adamu a Eva bakali bana ba Jehova bakusaanguna anyika, alimwi Jehova wakali Usyi wabo wakujulu siluyando. Jehova wakapa banabukwetene aaba mulimo wakucita. Wakabaambila kuti: “Amuzyalane muvwule, muzuzye nyika akuyeendelezya.” (Matl. 1:28) Bakeelede kuba abana alimwi akuulanganya kabotu munzi wabo waanyika. Ikuti nobakazumanana kumumvwida Leza akucita ncaakabaambilide, ba Adamu a Eva alimwi abana babo nobakazumanana kuba cibeela camukwasyi wa Leza mane kukabe kutamani.

3. Nkaambo nzi ncotwaambila kuti Jehova wakapa ba Adamu a Eva busena buyandika kapati mumukwasyi wakwe?

³ Ba Adamu a Eva bakajisi busena buyandika kapati mumukwasyi  wa Jehova. Mbubwenya mbokulembedwe ku Intembauzyo 8:5 alimwi amubupanduluzi buyungizyidwe, Davida wakaamba boobu kujatikizya Jehova naakalenga muntu: “Wakamucesya aniini kwiinda bangelo, mpoonya wakamusamika musini wabulemu abweebesi.” Masimpe, bantu tiibakapegwa nguzu alimwi abusongo, izyeelene abangelo. (Int. 103:20) Pele bantu ‘bakacesyegwa aaniini’ kwiinda zilenge eezyi zilaanguzu. Amuciyeeyele buyo! Ciindi Jehova naakalenga bazyali besu bakusaanguna wakabapa buumi bubotu.

4. Ncinzi cakacitika kuli ba Adamu a Eva nobatakamumvwida Jehova, alimwi ncinzi ncotutiibandike mucibalo eeci?

 ⁴ Cuusisya ncakuti, mbwaanga ba Adamu a Eva tiibakamumvwida Jehova, tiibakazumanana kuba cibeela camukwasyi wakwe. Mbubwenya mbotutiibandike mucibalo eeci, ncobakacita cakaleta mapenzi kubana babo. Pele makanze aa Jehova taacincide. Uyanda kuti bantu bamvwida bakabe bana bakwe kukabe kutamani. Tulabandika Jehova mbwaatondezya kale kuti tulayandika kulinguwe. Kumane, tulabandika ncotukonzya kucita lino kutondezya kuti tulayanda kuba cibeela camukwasyi wa Leza. Mpoonya kumamanino, tulabandika zilongezyo zya Jehova nzyobayookkomanina bana bakwe mane kukabe kutamani.

5. Mbuti mbotukonzya kutondezya kuti tulamulumba Leza akaambo kakutulenga mucinkozya cakwe?

⁵ Jehova wakatondezya kuti ulatuyanda kwiinda mukutulenga mucinkozya cakwe. (Matl. 1:26, 27) Akaambo kakuti twakalengwa mucinkozya ca Leza, tulakonzya kutondezya bube bunji bubotu mbuli luyando, luzyalo, kusyomeka alimwi abululami. (Int. 86:15; 145:17) Ciindi notuba abube oobu, tulamulemeka Jehova alimwi akutondezya kuti tulalumba. (1Pet. 1:14-16) Ciindi notupona munzila iimukkomanisya Taateesu wakujulu, andiswe tulakkomana. Alimwi kwiinda mukutulenga mucinkozya cakwe, Jehova wakatupa nguzu zyakucikonzya kuba bantu mbayanda mumukwasyi wakwe.

6. Mbuti Jehova mbwaakatondezya kuti ulabayanda bantu ciindi naakalenga nyika?

⁶ Jehova wakatupangila munzi uulibedelede. Katanalenga muntu wakusaanguna, Jehova wakabambila bantu nyika. (Job. 38:4-6; Jer. 10:12) Akaambo kakuti ulaaluzyalo alimwi mwaabi, Jehova wakalenga zintu zinji zibotu kutegwa katukkomana. (Int. 104:14, 15, 24) Aciindi cimwi, wakalanga zintu nzyaakalenga ‘akubona kuti nzibotu.’ (Matl. 1:10, 12, 31) Wakatondezya kuti ulabayanda bantu kwiinda mukubapa “kweendelezya” zilenge zyakwe zibotu zyaanyika. (Int. 8:6) Makanze aa Leza ngakuti bantu balondokede kabakkomene kulanganya zilenge eezyi mane kukabe kutamani. Sena mulamulumba Jehova lyoonse akaambo kacisyomezyo eeco cibotu?

7. Mbuti lugwalo lwa Joshua 24:15 mbolutondezya kuti muntu ulijisi lwaanguluko lwakulisalila?

⁷ Jehova wakatupa cipego calwaanguluko lwakulisalila. Tulakonzya kusala ncotuyoocita mubuumi. (Amubale Joshua 24:15.) Leza wesu siluyando ulakkomana ciindi notusala kumubelekela. (Int. 84:11; Tus. 27:11) Tulakonzya kulubelesya lwaanguluko lwakulisalila munzila zinji. Atulange cikozyanyo comwe Jesu mwaakalubelesya lwaanguluko lwakulisalila.

8. Amupe cikozyanyo icitondezya Jesu mbwaakalubelesya lwaanguluko lwakulisalila.

⁸ Kwiinda mukutobela cikozyanyo ca Jesu, tulakonzya kusala kubikka nzyobayandika bamwi mubusena bwakusaanguna. Bumwi buzuba ciindi Jesu abaapostolo bakwe nobakakatede, bakaunka kubusena bumwi buumwine kutegwa balyookezye. Pele tiibakalyookezya pe. Nkamu yabantu yakabajana, alimwi bakali kuyandisisya kuti Jesu abayiisye. Pele  Jesu kunyina naakabanyemena pe. Muciindi caboobo, wakabeetelela bantu aaba. Aboobo ino ncinzi ncaakacita Jesu? “Wakatalika kubayiisya zintu zinji.” (Mk. 6:30-34) Ciindi notumwiiya Jesu kwiinda mukwaaba ciindi alimwi anguzu zyesu kugwasya bamwi, tulemeka Taateesu wakujulu. (Mt. 5:14-16) Alimwi tutondezya Jehova kuti tulayanda kuba cibeela camukwasyi wakwe.

9. Ncinzi bazyali ncobeelede kuyeeya?

⁹ Jehova wakapa bantu coolwe cakuba abana, alimwi amukuli wakuyiisya bana kumuyanda alimwi akumubelekela. Ikuti naa muli muzyali, sena mulalumba kuba acoolwe eeci? Nokuba kuti Jehova wakapa bangelo zyoolwe zinji, pele tanaakabapa coolwe cakuba abana. Aboobo kuti kamuli muzyali, amutondezye kulumba kucoolwe cakuba abana. Bazyali bakapegwa mukuli uusetekene wakukomezya bana “mululayo alwiiyo lwa Jehova.” (Ef. 6:4; Dt. 6:5-7; Int. 127:3) Ikugwasya bazyali, mbunga ya Leza yapanga zibelesyo zinji ziyeeme a Bbaibbele, mbuli mabbuku, mavidiyo, nyimbo alimwi azibalo zyaa intaneti. Cilalibonya kuti, Taateesu wakujulu alimwi a Mwanaakwe balabayanda bana. (Lk. 18:15-17) Ciindi bazyali nobasyoma Jehova, alimwi akubeleka canguzu kulanganya bana babo bayandwa, Jehova ulakkomana. Alimwi bazyali bali boobu, bagwasya bana kuba abulangizi bwakuba cibeela camukwasyi wa Jehova mane kukabe kutamani!

10-11. Ncinzi Jehova ncaapa kuti cikonzyeke kulindiswe kwiinda mucinunuzyo?

¹⁰ Jehova wakapa Mwanaakwe uuyandwa kutegwa tube acoolwe alimwi cakuba cibeela camukwasyi wakwe. Mbubwenya mbokwaambwa  mumuncali wane, ciindi ba Adamu a Eva nobakabisya, balo alimwi abana babo, tiibakacili cibeela camukwasyi wa Jehova. (Rom. 5:12) Ba Adamu a Eva tiibakamumvwida Leza acaali, aboobo cakali kweelela kuti batandwe mumukwasyi wa Leza. Pele ino mbuti kujatikizya bana babo? Mbwaanga Jehova ulabayanda bantu, wakabikka bubambe bwakuti akati kabana babo aabo ibamvwida bakabe acoolwe cakuba cibeela camukwasyi wakwe. Wakapa kuti eeci cikonzyeke kwiinda mucipaizyo ca Mwanaakwe simuzyalwaalikke, Jesu Kristo. (Joh. 3:16; Rom. 5:19) Jehova wakapa kuti bantu basyomeka ibali 144,000, babe bana bakwe kwiinda mucituuzyo ca Jesu.—Rom. 8:15-17; Ciy. 14:1.

¹¹ Kuyungizya waawo, bantu banji basyomeka ibamvwida, bacita kuyanda kwa Leza. Bajisi bulangizi bwakuyooba cibeela camukwasyi wa Leza, waakwiinda musunko wamamanino, kumamanino aamyaka iili 1,000. (Int. 25:14; Rom. 8:20, 21) Akaambo kabulangizi oobo, noliba lino, baita Jehova Mulengi kuti “Taateesu.” (Mt. 6:9) Abalo aabo ibayoobusyigwa bayoopegwa coolwe cakwiiya kujatikizya Jehova ncayanda kulimbabo. Aabo ibayoozumina kutobela busolozi bwakwe, kumbele bayooba cibeela camukwasyi wakwe abalo.

12. Mubuzyo nzi ngotutiingule?

¹² Mbubwenya mbotwabona, Jehova wakacita kale zintu zinji kutondezya kuti bantu ulabayanda. Bananike wakabapa kale coolwe cakuba bana bakwe, alimwi ‘bankamu mpati’ wakabapa bulangizi bwakuti bayooba bana bakwe munyika mpya. (Ciy. 7:9) Ncinzi ncotukonzya kucita kutondezya Jehova kuti tulayanda kuba cibeela camukwasyi wakwe mane kukabe kutamani?

13. Ncinzi ncotukonzya kucita kutegwa tube cibeela camukwasyi wa Leza? (Mk. 12:30)

¹³ Amutondezye kuti mulamuyanda Jehova kwiinda mukumubelekela amoyo wanu woonse. (Amubale Marko 12:30.) Akati kazipego zyoonse Leza nzyaakatupa, cimwi cipati  akati kazipego eezyo, ncoolwe cakumukomba. Tulatondezya kuti tulamuyanda Jehova kwiinda ‘mukubamba milawo yakwe.’ (1Joh. 5:3) Kaamba kujatikizya ncobayanda Bausyi, Jesu wakatulailila kugwasya bantu kuba basikwiiya akubabbapatizya. (Mt. 28:19) Alimwi wakatulailila kuti katuyandana. (Joh. 13:35) Jehova ulabatambula aabo ibatobela malailile aakwe mumukwasyi wabakombi bakwe nyika yoonse.—Int. 15:1, 2.

14. Mbuti mbotukonzya kutondezya kuti tulabayanda bamwi? (Matayo 9:36-38; Baroma 12:10)

¹⁴ Amutondezye kuti mulabayanda bamwi. Luyando mbube bwa Jehova buyandika kapati. (1Joh. 4:8) Jehova wakataanguna kutuyanda swebo katutana muzyiba. (1Joh. 4:9, 10) Tulamwiiya ciindi notutondezya kuti tulabayanda bamwi. (Ef. 5:1) Nzila imwi mbotu motukonzya kutondezya kuti tulabayanda bantu, nkwiinda mukubagwasya kwiiya kujatikizya Jehova ciindi nociciliko. (Amubale Matayo 9:36-38.) Kwiinda mukucita boobo, tulabapa coolwe cakuba abulangizi bwakuba cibeela camukwasyi wa Leza. Ciindi muntu naamana kubbapatizyigwa, tweelede kuzumanana kumuyanda alimwi akumulemeka. (1Joh. 4:20, 21) Inga twacita buti oobo? Munzila imwi, tulatondezya kuti ujisi makanze mabotu. Mucikozyanyo, kuti kamutamvwisyi kaambo ncaacitila cintu cimwi munzila imwi, tatukayeeyi kuti ulaliyanda. Muciindi caboobo, tuyootondezya kuti tulamuyanda, kwiinda mukumubona kuti ulatwiinda.—Amubale Baroma 12:10; Flp. 2:3.

15. Mbaani mbotweelede kutondezya luse alimwi aluzyalo?

¹⁵ Amutondezye luse alimwi aluzyalo kubantu boonse. Kuti katuyanda kuba cibeela camukwasyi wa Jehova mane kukabe kutamani, tweelede kutobela ncolyaamba Jwi lya Leza mubuumi bwesu. Mucikozyanyo, Jesu wakatuyiisya kuti tweelede kutondezya luse aluzyalo kubantu boonse, kubikkilizya abasinkondoma. (Lk. 6:32-36) Zimwi ziindi kucita boobu kulakonzya kutukatazya. Ikuti kacili boobo, tweelede kuyeeya alimwi akucita zintu mbuli mbwaakali kucita Jesu. Ciindi notubeleka canguzu kumvwida Jehova alimwi akwiiya Jesu, tutondezya Taateesu wakujulu kuti tulayanda kuba cibeela camukwasyi wakwe mane kukabe kutamani.

16. Mbuti mbotukonzya kukwabilila mpuwo mbotu yamukwasyi wa Jehova?

¹⁶ Amukwabilile mpuwo mbotu yamukwasyi wa Jehova. Mumukwasyi, kanji-kanji mwana musyoonto ulaiya eezyo nzyacita mupati wakwe. Kuti mupati wakwe katobela njiisyo zyamu Bbaibbele mubuumi bwakwe, uyooba cikozyanyo cibotu kumusyoonto wakwe. Pele kuti wakatalika kucita zintu zibyaabi, awalo musyoonto wakwe uyootobela cikozyanyo cakwe cibyaabi. Oobo mbocibede amumukwasyi wa Jehova. Kuti Munakristo iwakali kusyomeka waba siluleyo, watalika kutalilemeka naa kucita zintu zibyaabi, ibamwi balakonzya kumwiiya akutalika kucita zintu zibyaabi. Aabo ibacita zintu zili boobu, banyonganya mpuwo mbotu yamukwasyi wabakombi ba Jehova. (1Tes. 4:3-8) Tatweelede kutobela zikozyanyo zibyaabi alimwi akutazumizya cintu cili coonse kunyonganya cilongwe cesu a Taateesu wakujulu.

17. Nkuyeeya kuli buti nkotweelede kutantamuka, alimwi nkaambo nzi?

¹⁷ Amusyome Jehova ikutali zintu zyakumubili. Jehova usyomezya kuti uyootupa zyakulya, zyakusama alimwi akwakoona ikuti twabikka Bwami bwakwe mubusena bwakusaanguna alimwi akupona kweelana azyeelelo zyakwe ziluleme. (Int. 55:22; Mt. 6:33) Kuti twacisyoma cisyomezyo eeci, tatukayeeyi kuti zintu zyakumubili zyamunyika eeyi ziyootukwabilila alimwi akutupa lukkomano. Tulizyi kuti nzila ilikke motukonzya kujana luumuno lwini-lwini lwamumizeezo, nkwiinda mukucita kuyanda  kwa Jehova. (Flp. 4:6, 7) Nokuba kuti tulijisi mali akuula zintu zinji, tweelede kulanga-langa naa tulijisi ciindi anguzu zyakuzibelesya alimwi akuzilanganya zintu eezyo. Sena eeci inga catupa kubikkila kapati maano kuzintu zyesu zyakumubili? Tweelede kuyeeya kuti Leza wakatupa mulimo wakucita mumukwasyi wakwe. Eeci caamba kuti tatweelede kunyonganizyigwa. Mubwini tatuyandi kuba mbuli mulombwana iwakasweekelwa coolwe cakubelekela Jehova, acakuba umwi wabana bakwe, akaambo buyo kakuti wakali kuyandisya zintu zimwi zyakumubili.—Mk. 10:17-22.

18. Ino ncoolwe nzi alimwi azilongezyo nzyobayoojana ibantu bamvwida mane kukabe kutamani?

¹⁸ Bantu bamvwida bayookkomana acoolwe ciinda zyoonse, coolwe cakumuyanda alimwi akumukomba Jehova mane kukabe kutamani! Aabo ibajisi bulangizi bwakuyoopona aano aanyika, bayookkomana kulanganya nyika yalo Jehova njaakabalengela kuti kauli munzi wabo mubotu. Lino-lino Bwami bwa Leza buyoobambulula nyika, azintu zyoonse izili mumo kutegwa zikabote alimwi. Jesu uyakwaamana mapenzi oonse aakaletwa akaambo kakusala nkobakacita ba Adamu a Eva, ikuzwa mumukwasyi wa Leza. Jehova uyoobusya bantu banji akubapa coolwe cakupona buumi butamani ibulondokede anyika iyoobambululwa kuba paradaiso. (Lk 23:42, 43) Ciindi bantu babelekela Jehova baakulondoka, bayooba ‘abulemu alimwi abweebesi’ mbwaakalemba Davida.—Int. 8:5.

19. Ncinzi ncotweelede kuyeeya?

¹⁹ Ikuti kamuli cibeela ‘cankamu mpati’, mujisi bulangizi bubotu kapati. Leza ulamuyanda; alimwi uyanda kuti mube cibeela camukwasyi wakwe. Aboobo amubeleke canguzu kutegwa mumukkomanisye. Buzuba abuzuba, kamuziyeeya zisyomezyo zya Leza. Amutondezye kulumba kucoolwe cakukomba Taateesu wakujulu alimwi abulangizi bwakumutembaula mane kukabe kutamani.