1. Niinzi nzitukonzya kulibuzya kuti twayeeyesesya atala azintu zyoonse nzyaakalenga Jehova?

KUTI twayeeyesesya atala azintu zyoonse Jehova nzyaakalenga, tulakonzya kulimvwa mbuli mbaakalimvwa sintembawuzyo Davida naakakomba kati: “Nendibona majulu aako, imilimo yaminwe yako, imwezi anyenyeezi nzyookabamba, ino muntu ninzi ooyo ngobikkila maano, amwanaamuntu ooyo ngolanganya?” (Int. 8:3, 4) Mbuli Davida, kuti twalanga nyenyeezi nzyaakalenga Jehova, tulakonzya kulibona kuti tuli baniini loko. Kuziba kuti Jehova ulatubikkila maanu nikuba kuti tuli baniini kupa kuti tubotelwe loko. Pesi mbuli mbututabone, Jehova taakababikkila maanu luzutu bantu bakusaanguna Adamu aEva pesi wakapa kuti babe mumpuli yakwe.

2. Jehova wakali kuyanda kuti bana bakwe bakusaanguna baanyika bachiteenzi?

² Adamu aEva bakali bana baJehova bakusaanguna baanyika alubo Jehova wakali Taata wabo wakujulu uuli aaluyando. Kuli mulimu Leza ngwaakali kuyanda kuti bachite. Wakababuzya kuti: “Amuzyalane muvwule, muzuzye nyika akuyeendelezya.” (Matl. 1:28) Leza wakali kuyanda kuti babe aabana akuti bayilanganie kabotu nyika. Kaansinga bakaswiilila akuchita zintu zyoonse Jehova nzyaakabalayilila, bakali kuyoozumanana kuba mumpuli yaJehova kukabe kutamani kuswaanizya abana babo.

3. Nkamboonzi nitukonzya kwaamba kuti Adamu aEva bakali kuyandikana mumpuli yaJehova?

³ Adamu aEva bakali kuyandikana mumpuli yaJehova. Mbuli mbukulembedwe muli Intembauzyo 8:5 amumakani aamunsi, naakali kwaambuula atala aJehova mbaakalenga muntu, Davida  wakati: “Wakamucesya aniini kwiinda bangelo, mpoonya wakamusamika musini wabulemu abweebesi.” Nisimpe kuti bangelo bali aaluzibo, busongo amanguzu kwiinda bantu. (Int. 103:20) Pesi bantu ‘bakachesegwa aaniini biyo’ kubangelo. Eezi zilagambya. Nisimpe, Jehova wakapa bazyali besu bakusaanguna buumi bubotu.

4. Niinzi zyakachitika kuli Adamu aEva akaambo kakutaswiilila Jehova alubo tulalanga-langaanzi muchiiyo eechi?

 ⁴ Zilawusisya kuti Adamu aEva teebakazumanana kuba mumpuli yaJehova nkaambo bakabisya. Eezi zyakapa kuti bana babo ambabo basweekelwe aachilongezyo eechi mbuli mbututabone kunembo. Pesi makanze aaJehova tanachincha pe. Uyanda kuti bantu bamuswiilila babe bana bakwe kukabe kutamani. Lino atubone Jehova mbaakatondeezya kuti utubona katuyandikana. Mpawo tuzoobona zintu nzitweelede kuchita kuti tutondeezye kuti tuyanda kuba mumpuli yaLeza. Alubo kumamanino, tuyoobona zilongezyo nzibayoojana bana baLeza aanyika kukabe kutamani.

5. Kujana twatondeezya biyeni kuti tulamulumba Jehova akaambo kakutulenga muchikozyano chakwe?

⁵ Jehova wakatondeezya kuti utubona katuyandikana kwiinda mukutulenga muchikozyano chakwe. (Matl. 1:26, 27) Akaambo kakuti twakalengwa muchikozyano chaLeza, tulakonzya kubelekela kuba aabuntu bubotu mbwalaabo akubutondeezya. Muchikozyano, tulakonzya kuba bantu baluleme, kutondeezya bamwi luyando, kubeetelela, akusyomeka. (Int. 86:15; 145:17) Chiindi nitubeleka changuzu kuti tutondeezye buntu oobu, nga tulikupa kuti Jehova alemekwe alubo nga tulikutondeezya kuti tulamulumba. (1 Pet. 1:14-16) Kuti twaba aabuntu bupa kuti Taateesu wakujulu abotelwe andiswe tulabotelwa. Alubo tuyooyelela kuba mumpuli yakwe.

6. Chiindi naakalenga nyika, Jehova wakatondeezya biyeni kuti ubabona kabayandikana bantu?

⁶ Jehova wakalengela bantu muunzi mubotu. Kakuchisyeede chiindi chilamfu kuti azoolenge muntu wakusaanguna, Jehova wakasaanguna kulenga nyika kuchitila kuti bazookkale mumo. (Job. 38:4-6; Jer. 10:12) Akaambo kakuti uli aaluzyalo alubo mwaabi, Jehova wakalenga zintu zyiingi zibotu kuchitila kuti tubotelwe. (Int. 104:14, 15, 24) Chiindi Jehova naakamaninsya kulenga zimwi zintu, wakazilanga mpawo wakabona kuti zyakali ‘zibotu kapati.’ (Matl. 1:10, 12, 31) Wakapa bantu bulemu kwiinda mukupa kuti ‘beendelezye milimu’ yakwe yaanyika. (Int. 8:6) Alubo Jehova uyanda kuti bantu bamaninide bazoobotelwe kulangania zintu nzyaakalenga kukabe kutamani. Nga wamulumba na Jehova akaambo kachisyomezyo eechi chibotu?

7. Lugwalo lwa Joshua 24:15 lutondeezya biyeni kuti bantu bali aalwaangunuko lwakulisalila?

⁷ Jehova wakatupa chipo chalwaangunuko lwakulisalila. Tulakonzya kulisalila zintu nzituyanda kuchita mubuumi. (Bala Joshua 24:15.) Leza wesu siluyando ulabotelwa kuti twasala kumubelekela. (Int. 84:11; Tus. 27:11) Tulakonzya kubelesya lwaangunuko oolu kuti tusale kabotu muzintu zisiyene-siyene nzituchita. Atubone kuti Jesu wakalubelesya biyeni lwaangunuko oolu.

8. Jesu wakalubelesya biyeni lwaangunuko lwakwe lwakulisalila?

⁸ Tulakonzya kutobelezya chikozyano chaJesu kwiinda mukusala kubikka zintu ziyandwa aabamwi mubusena bwakusaanguna kwiinda nzituyanda. Limwi zuba Jesu abaapostolo bakwe bakali bakatala mpawo bakayanduula busena bwakatalikwe bantu kuchitila kuti bakalyookezye. Pesi taakwe nibakazoolyookezya pe. Nkaambo nkamu yabantu yakabatobela  alubo yakali kuyanda kuyiisigwa aaJesu. Jesu wakachitaanzi? Taakabanyemena pe pesi wakabeetelela alubo “wakatalika kubayiisya zintu zinji.” (Mk. 6:30-34) Kuti twatobelezya Jesu kwiinda mukubelesya chiindi chesu amanguzu eesu kuti tugwasye bamwi nga tulikupa kuti Taateesu wakujulu alemekwe. (Mt. 5:14-16) Alubo nga tulikutondeezya Jehova kuti tuyanda kuba mumpuli yakwe.

9. Nchiichili chipo chiyandikana loko Jehova nchaakapa bantu?

⁹ Jehova wakapa kuti bantu bakonzye kuba aabana alubo wakabapa mulimu wakuti babayiisye kuti bamuyande akumubelekela. Kuti kuli muzyali, ulachilumba na chipo eechi chiyandikana loko? Nikuba kuti Jehova wakalenga bangelo kabasumpukide kwiinda bantu pesi taakabapa pe chilongezyo chakuba aabana. Nkinkaako, kuti kuli muzyali weelede kutondeezya kuti ulachilumba chilongezyo eechi chakukomezya bana. Bazyali bakapegwa mulimu uuyandikana loko wakukomezya bana babo “mululayo alwiiyo lwa Jehova.” (Ef. 6:4; Dt. 6:5-7; Int. 127:3) Mbunga yaLeza yakagwisya zibelesyo zisiyene-siyene kuti ikonzye kugwasya bazyali, zili mbuli mabbuku, mavidiyo, nyimbo amakani aajanika aawebbusayiti yesu. Zilaantanganana kuti Taateesu wakujulu aMwanaakwe babayanda loko bana. (Lk. 18:15-17) Kuti bazyali batobelezya nzibabuzigwa aaJehova akubeleka changuzu chiindi nibakomezya bana babo, Jehova ulabotelwa. Alubo kuti bachita oobo, nga balikugwasya bana babo kuti babe aabulangilizi bwakuzooba mumpuli yaJehova kukabe kutamani.

10-11. Niinzi nzyaakatuchitila Jehova kwiinda muchinunuzyo?

¹⁰ Jehova wakatupa Mwanaakwe ngwayandisya kuchitila kuti tukonzye kuba mumpuli yakwe lubo. Mbuli mbutwabona  mufuka 4, Adamu aEva teebakazumanana kuba mumpuli yaJehova nkaambo bakabisya alubo bakapa kuti bana babo basweekelwe aachilongezyo eechi. (Rom. 5:12) Adamu aEva bakasala kutaswiilila Leza achaali, nkinkaako kwakali kweelela kuti Leza abagwisye mumpuli yakwe. Ani niinzi nzyaakachita kubana babo? Akaambo kaluyando, Jehova wakachita mabambe aakuti bana baAdamu baswiilila bakonzye kuba mumpuli yakwe. Wakazichita eezi kwiinda mukutupa Mwanaakwe simuzyalwaalikke, Jesu Kristu kuti atufwide. (Joh. 3:16; Rom. 5:19) Akaambo kachinunuzyo chaJesu, Leza ulikusala bantu bali 144 000 basyomeka kuti babe bana bakwe.—Rom. 8:15-17; Ciy. 14:1.

¹¹ Alubo kuli mamiliyoni aabantu basyomeka alubo baswiilila Leza. Bantu aabo bali aabulangilizi bwakuyooba mumpuli yaLeza nibayoozunda kusunkwa kwamamanino kuyoochitika yakumana minyaka iili 1 000. (Int. 25:14; Rom. 8:20, 21) Akaambo kabulangilizi oobu mbubalaabo, nikuba lino bayita Jehova Mulengi wabo kuti, ‘Taata.’ (Mt. 6:9) Aabo batakabusigwe ambabo bayoojana mweenya wakuyiisigwa atala anzyayanda Leza. Batakaswiilile malayilile aakwe bayooba mumpuli yakwe.

12. Nguuli mubuzyo ngututasandule?

¹² Mbuli mbutwabona Jehova wakatuchitila zintu zyiingi zitondeezya kuti utubona katuyandikana. Ulikusala maKristu bananikidwe kuti babe bana bakwe alubo wakapa “nkamu mpati” bulangilizi bwakuyooba bana bakwe munyika mpya. (Ciy. 7:9) Lino atusandule mubuzyo wakuti, niinzi nzitweelede kuchita lino kuti tutondeezye kuti tuyanda kuba mumpuli yaJehova kukabe kutamani?

13. Niinzi nchitweelede kuchita kuti tube mumpuli yaLeza? (Mk. 12:30)

¹³ Tondeezya kuti ulamuyanda Jehova kwiinda mukumubelekela amoyo wako woonse. (Bala Marko 12:30.) Leza utupede zipo  zyiingi loko. Chimwi chipo chipati nchatupede nchakumukomba. Tweelede kutondeezya kuti tulamuyanda Jehova kwiinda ‘mukubamba milawo yakwe.’ (1 Joh. 5:3) Umwi mulawu Jehova ngwayanda kuti tuswiilile ngooyo wakaambwa aaJesu wakuti tugwasye bantu kuti babe basikwiiya akubabbabbatizya. (Mt. 28:19) Alubo wakatulayilila kuti tuyandane. (Joh. 13:35) Jehova ulabatambula aabo baswiilila milawu yakwe kuti babe mumpuli yabakombi bakwe bamunyika yoonse.—Int. 15:1, 2.

14. Kujana twatondeezya biyeni kuti tulabayanda bamwi? (Matayo 9:36-38; Baroma 12:10)

¹⁴ Tondeezya kuti ulabayanda bamwi. Luyando mbubuntu bupati mbwalaabo Jehova. (1 Joh. 4:8) Jehova wakatutondeezya luyando katutanamuziba pe. (1 Joh. 4:9, 10) Kuti twatondeezya bamwi kuti tulabayanda nga tulikutobelezya chikozyano chakwe. (Ef. 5:1) Imwi nzila njitukonzya kutondeezya kuti tulabayanda bantu nkwiinda mukubagwasya kuti bayiye atala aJehova kakuchili chiindi. (Bala Matayo 9:36-38.) Chiindi nituli kubayiisya nga tulikubagwasya kuti bazibe zintu nzibeelede kuchita kuti bakonzye kuba mumpuli yaLeza. Kuti muntu wabbabbatizigwa tweelede kuzumanana kumuyanda akumulemeka. (1 Joh. 4:20, 21) Nga tulazichita biyeni eezi? Imwi nzila nkwiinda mukutondeezya kuti tulamusyoma. Muchikozyano, kuti wachita chimwi chintu nchitutamvwisisisyi kabotu tatweelede kuyeeya kuti uli aamakanze atali kabotu. Pesi tweelede kumulemeka mukombima alubo tumubone kuti ulatwiinda.—Bala Baroma 12:10; Flp. 2:3.

15. Mbaani mbitweelede kutondeezya luse akufwida luzyalo?

¹⁵ Tondeezya luse alubo ubafwide luzyalo bantu boonse. Kuti katuyanda kuba mumpuli yaJehova kukabe kutamani tweelede kuswiilila malayilile aali muJwi lyakwe. Muchikozyano, Jesu wakayiisya kuti tweelede kutondeezya luse akubafwida luzyalo bantu boonse kuswaanizya abasinkondoma. (Lk. 6:32-36) Chimwi chiindi, eezi zilakonzya kutuyumina. Kuti kakuli boobo, tweelede kubelekela kuba aamaboneno aali mbuli ngaakalaawo Jesu akuchita zintu mbuli mbaakali kuchita. Kuti twabeleka changuzu kuti tuswiilile Jehova akutobelezya Jesu, nga tulikutondeezya Taateesu wakujulu kuti tuyanda kuba mumpuli yakwe kukabe kutamani.

16. Tweelede kuchitaanzi kuti mpuli yaJehova ikkale kayili aampuwo mbotu?

¹⁶ Chita zintu zitape kuti mpuli yaJehova ikkale kayili aampuwo mbotu. Mumpuli, chiindi chiingi mwanike utobelezya zintu zichitwa amukulana wakwe. Kuti mukulana waswiilila malayilile aali muBbayibbele, ulaba chikozyano chilikabotu kumwanike wakwe. Pesi kuti mukulana wachita zintu zibi, mwanike wakwe ulakonzya kutobelezya chikozyano chakwe chitali kabotu. Mbukubede amumpuli yaJehova. Kuti muKristu uusyomeka wasaanguna kuba siluleyo, kuchita bwaamu akuchita zimwi zintu zitali kabotu, bamwi balakonzya kutobelezya chikozyano chakwe chitali kabotu. Bantu bachita oobo, bapa kuti mpuli yabakombi baJehova itabi aampuwo mbotu. (1 Tes. 4:3-8) Tatweelede kutobelezya zintu zitali kabotu zichitwa aabamwi alubo tatweelede kuzumizya kufumbwa chintu kuti chinyonganie bweenzuma mbutulaabo aTaateesu wakujulu uli aaluyando.

17. Ngaali maboneno ngituteelede kubaawo alubo nkamboonzi?

¹⁷ Syoma Jehova kutali kusyoma bunoti. Jehova utusyomezya kuti ulatugwasya kuti tujane chakulya, zyakuzwaata aakukkala kuti twabikka Bwaami bwakwe mubusena bwakusaanguna akuti twapona kweendelana amilawu yakwe iili muBbayibbele. (Int. 55:22; Mt. 6:33) Kuti twasyoma Jehova, tatukayeeyi kuti bunoti buli munyika bulakonzya kutukwabilila  akupa kuti tubotelwe kukabe kutamani. Tulizi kuti kuchita kuyanda kwaJehova, nkuko akulikke kupa kuti tube aaluumuno lwachoonzyo. (Flp. 4:6, 7) Kuti katuli aamali yakuula zintu zyiingi, katutanawula tweelede kulibuzya kuti, ‘Tuli aacho na chiindi amanguzu aakuti tuzibelesye zintu eezyo akuzilangania? Tatukooyandisya zintu eezyo na kwiinda Leza?’ Tutalubi kuti Leza utupede mulimu wakuchita mumpuli yakwe. Eezi zyaamba kuti tatweelede kuzumizya kufumbwa chintu kuti chitukachizye kuchita mulimu ooyu. Tatuyandi biya pe kuba mbuli mwaalumi wakasweekelwa aachilongezyo chakubelekela Jehova achilongezyo chakusalwa kuba mwanaakwe akaambo kakuyandisya bunoti.—Mk. 10:17-22.

18. Nchiichili chilongezyo chipati bantu baswiilila Leza nchibayooba aacho alubo nziizili zilongezyo nzibayoojana aanyika kukabe kutamani?

¹⁸ Bantu baswiilila Leza bayooba aachilongezyo chipati loko chakuyanda Jehova akumukomba kukabe kutamani. Aabo bali aabulangilizi bwakuyoopona aanyika, bayoobotelwa kulangania nyika Jehova njaakalenga kuti ibe muunzi wabo mubotu. Lino-lino Bwaami bwaLeza buyoopa kuti nyika azintu zili mulinjiyo zibe mbuli mbaakakanzide Leza kumasaangunino. Jesu uyoomaninsya mapenzi woonse akeetwa aaAdamu aEva chiindi nibakasala kuzwa mumpuli yaLeza. Jehova uyoobusya mamiliyoni aabantu bakafwa akubapa bulangilizi bwakuyoopona buumi butamani muparadayizi kabamaninide. (Lk. 23:42, 43) Bakombi baJehova nibakumaninina bayooba ‘abulemu abweebesi’ mbwaakaamba Davida.—Int. 8:5.

19. Tweelede kukkala katuyeeya atalaanzi?

¹⁹ Kuti kuli umwi ‘wankamu mpati’ uli aabulangilizi bubotu loko. Leza ulakuyanda alubo uyanda kuti ube mumpuli yakwe. Nkinkaako chita zyoonse nzukonzya kuti umubotezye. Buzuba abuzuba, kkala kuyeeya atala azisyomezyo zyaJehova. Chibone kachiyandikana chilongezyo nchulaacho chakukomba Taateesu wakujulu alubo ububone kabuyandikana bulangilizi mbulaabo bwakuyoomutembawula kukabe kutamani.