1. Kasi tingajifumba mafumbo wuli para tingaghanaghanira vyose ivyo Yehova wali kulenga?

PARA tikughanaghanira vyose ivyo Yehova wali kulenga, tingajipulika nga umo wakajipulikira wamasalimo Davide, uyo wakalomba kwa Yehova na kufumba kuti: “Para nkhulaŵiska machanya ghinu, milimo ya minwe yinu, mwezi na nyenyezi ivyo mwanozga, kasi munthu ni njani kuti mumukumbuke, na mwana wa munthu kuti mumupwelelere?” (Sal. 8:3, 4) Nga ni Davide, tingajiwona nga kuti tili ŵachoko chomene pakuyaniska na nyenyezi izo Yehova wali kulenga, ndipo tingamba kuzizwa na fundo yakuti Yehova wakuŵikako mahara kwa ise. Kweni nga umo tiwonerenge mu nkhani iyi, Yehova wakaŵapwelelera ŵanthu ŵakwambilira, Adamu na Eva, ndipo nawo ŵakaŵa mu mbumba yake.

2. Kasi Yehova wakakhumbanga kuti Adamu na Eva ŵachite vichi?

² Adamu na Eva ŵakaŵa ŵana ŵakwamba ŵa Yehova pa charu chapasi, ndipo Yehova wakaŵa Dada wawo wachitemwa. Yehova wakakhazganga kuti mbumba iyi yiŵenge yakovwira chomene. Chiuta wakaŵaphalira kuti: “Babanani, mwandane muzuzge charu chapasi na kuchithereska.” (Gen. 1:28) Iyo wakakhumbanga kuti ŵaŵe na ŵana na kupwelelera makora chikaya chawo icho ni charu chapasi. Ŵaŵenge kuti ŵakapulikira na kuchita ivyo Yehova wakaŵaphalira, mphanyi Adamu na Eva pamoza na ŵana ŵawo ŵakulutilira kuŵa mu mbumba ya Chiuta kwamuyirayira.

3. Chifukwa wuli tingati Yehova wakapa Adamu na Eva malo ghawemi chomene mu mbumba yake?

³ Adamu na Eva ŵakaŵa na malo ghawemi chomene mu mbumba ya Yehova. Nga umo pali kulembekera pa Salimo 8:5, Davide pakuyowoya za umo Yehova wakalengera munthu, wakati: “Muli kumuchefya pachoko ku ŵangelo, muli kumuvwalika uchindami na ntchindi.” Mbunenesko kuti Yehova wandapeleke kwa munthu  nkhongono, mahara kweniso maluso agho ŵangelo ŵali nagho. (Sal. 103:20) Ndipouli, ŵanthu wali ‘kuŵachepeskako’ waka pachoko pakuyaniska na ŵangelo ŵankhongono. Ichi ntchakuzizwiska chomene. Yehova wakaŵapa umoyo uwemi chomene ŵapapi ŵithu ŵakwamba.

4. Kasi ntchivichi chikachitikira Adamu na Eva chifukwa chakuti ŵakamupulikira yayi Yehova, ndipo tidumbiskanenge vichi mu nkhani iyi?

 ⁴ Chachitima ntchakuti Adamu na Eva ŵakamupulikira yayi Yehova, ntheura ŵakaŵaso mu mbumba yake yayi. Ivi vili kwiziska masuzgo ghanandi chomene ku ŵana wose ŵa Adamu, nga umo tiwonerenge cha kuumaliro kwa nkhani iyi. Kweni khumbo la Yehova lindasinthe. Iyo wakukhumba kuti ŵanthu ŵakupulikira ŵaŵe ŵana ŵake muyirayira. Chakwamba, tidumbiskanenge umo Yehova walongolera kuti ndise ŵakuzirwa chomene kwa iyo. Kufuma apo, tidumbiskanenge ivyo tingachita pasono kulongora kuti tikukhumba kuŵa mu mbumba ya Chiuta. Ndipo paumaliro, tiwonenge vitumbiko ivyo ŵana ŵa Yehova ŵazamuŵa navyo kwamuyirayira.

5. Kasi tingalongora wuli kuti tikumuwonga Chiuta kuti wali kutilenga mu chikozgo chake?

⁵ Yehova wali kulongora kuti ndise ŵakuzirwa pakutilenga mu chikozgo chake. (Gen. 1:26, 27) Chifukwa chakuti tili kulengeka mu chikozgo cha Chiuta, tingasambira na kulongora mikhaliro yake yiwemi. Mwachiyelezgero, tingalongora chitemwa, chiwuravi, kugomezgeka, na urunji. (Sal. 86:15; 145:17) Para tili na mikhaliro iyi, tikuchindika Yehova kweniso tikulongora kuti tikumuwonga. (1 Pet. 1:14-16) Para tikuchita vinthu ivyo vikukondweska Adada ŵithu ŵakuchanya tikuŵa ŵakukondwa chomene. Ndipo chifukwa chakuti tili kulengeka mu chikozgo cha Yehova, nase tingaŵa ŵanthu awo wakukhumba kuti ŵaŵe mu mbumba yake.

6. Kasi Yehova wakalongora wuli kuti ŵanthu wakuŵawona kuti mbakuzirwa apo wakalenganga charu chapasi?

⁶ Yehova wakatinozgera chikaya chiwemi chomene. Pambere wandalenge munthu wakwamba, Yehova wakaŵanozgera dankha charu ŵanthu. (Yobu 38:4-6; Yer. 10:12) Chifukwa chakuti wakutighanaghanira kweniso ngwakupa, Yehova wali kulenga vinthu viwemi vinandi kuti ise tikondwenge. (Sal. 104:14, 15, 24) Nyengo zinyake wakaghanaghanirangapo pa ivyo wali kulenga ndipo “wakawona kuti ni viwemi.” (Gen. 1:10, 12, 31) Wakalongora kuti ŵanthu mbakuzirwa pakuŵapa “mazaza” pa vinthu vyose vyakutowa ivyo wali kulenga pa charu chapasi. (Sal. 8:6) Khumbo la Yehova ndakuti ŵanthu ŵakufikapo ŵazakakondwenge pakupwelelera chilengiwa chake chakutowa kwamuyirayira. Kasi nyengo zose mukumuwonga Yehova chifukwa cha layizgo lake liwemi ili?

7. Kasi lemba la Joshuwa 24:15, likulongora wuli kuti munthu wali na wanangwa wakusankha?

⁷ Yehova wali kutipa wanangwa wakusankha. Tingasankha ivyo tikukhumba kuchita pa umoyo withu. (Ŵazgani Joshuwa 24:15.) Chiuta withu wachitemwa wakukondwa para tasankha kumuteŵetera. (Sal. 84:11; Zinth. 27:11) Tingagwiliskira ntchito mwamahara wanangwa withu wakusankha munthowa zinandi. Wonani umo Yesu wakagwiliskira ntchito wanangwa wakusankha kweniso umo tingamuyezgera.

8. Pelekani chiyelezgero cha umo Yesu wakagwiliskira ntchito wanangwa wake wakusankha.

⁸ Tingayezga Yesu para tikudangizga vyakukhumba vya ŵanyithu m’malo mwa vithu. Zuŵa linyake apo Yesu na ŵapositole ŵakavuka chomene, ŵakaluta ku malo ghamayiyi kuti ŵakapumurepo. Kweni ŵakapumura yayi. Mzinda ukaŵasanga kwenekuko, ndipo ukakhumbisiskanga chomene kusambizgika na Yesu. Kweni Yesu wakakwiya yayi. M’malo mwake, wakaŵalengera lusungu ŵanthu aŵa. Kasi wakachita wuli? “Wakamba kuŵasambizga vinthu vinandi.”  (Mrk. 6:30-34) Para tikuyezga Yesu pakugwiliskira ntchito nyengo na nkhongono zithu kovwira ŵanji, tikupeleka uchindami kwa Adada ŵithu ŵakuchanya. (Mat. 5:14-16) Kweniso tikulongora Yehova kuti tikukhumba kuŵa mu mbumba yake.

9. Kasi ntchawanangwa wuli chapadera icho Yehova wali kupeleka ku ŵanthu?

⁹ Yehova wali kuŵapa ŵanthu mwaŵi wakuti ŵaŵenge na ŵana, kweniso udindo wakuti ŵaŵasambizgenge kumutemwa na kumuteŵetera. Usange ndimwe mupapi, kasi mukuwonga mwaŵi wapadera uwu? Nangauli ŵangelo mbakutumbikika chomene na Yehova, kweni ŵandapike mwaŵi uwu. Ntheura para ndimwe mupapi, muwongenge mwaŵi wapadera uwu wakulera ŵana. Ŵapapi ŵapika ntchito yakuzirwa chomene yakulera ŵana ŵawo “pa kuŵalanga na kuŵasambizga maghanoghano gha Yehova.” (Efe. 6:4; Doto. 6:5-7; Sal. 127:3) Gulu la Yehova likupeleka vinthu vinandi kuti liwovwire ŵapapi kusambizga ŵana ŵawo. Vinthu ivi ni nga magazini, mavidiyo, sumu na nkhani za pa webusayiti yithu, ndipo fundo zake zikufuma mu Baibolo. Apa vikulongolerathu kuti Adada ŵithu ŵakuchanya na Mwana wawo ŵakutemwa chomene ŵana ŵachoko. (Luka 18:15-17) Para ŵapapi ŵakugomezga Yehova na kuchita vyose ivyo ŵangafiska pakulera ŵana ŵawo, Yehova wakukondwa chomene. Ndipo para ŵakuchita nthena, ŵakovwiraso ŵana ŵawo kuŵa na chigomezgo chakuŵa mu mbumba ya Yehova kwamuyirayira.

10-11. Kasi Yehova watipa mwaŵi wuli kwizira mu sembe yakuwombora?

¹⁰ Yehova wakapeleka Mwana wake wapadera mwakuti tiŵeso na mwaŵi wakuŵa mu mbumba yake. Nga umo tayowoyera mu  ndime 4, Adamu na Eva ŵati ŵananga, iwo pamoza na ŵana ŵawo ŵakataya mwaŵi wakuŵa mu mbumba ya Yehova. (Rom. 5:12) Adamu na Eva ŵakalekera dala kupulikira Chiuta, ntheura chikaŵa chakwenelera nadi kuti ŵafumemo mu mbumba yake. Kweni wuli pakuyowoya vya ŵana ŵawo? Yehova wakutemwa ŵanthu, ntheura wakasanga nthowa yakuti ŵana awo ŵakumupulikira ŵaŵe mu mbumba yake. Wakachita ivi kwizira mu sembe yakuwombora ya Mwana wake wapadera, Yesu Khristu. (Yoh. 3:16; Rom. 5:19) Ndipo chifukwa cha sembe iyi, Yehova wakusankha ŵanthu ŵakugomezgeka 144,000 kuti ŵaŵe ŵana ŵake.​—Rom. 8:15-17; Chivu. 14:1.

¹¹ Mwakusazgirapo, ŵanthu ŵakugomezgeka mamiliyoni ghanandi ŵakuchita khumbo la Chiuta na mtima wose. Ndipo ŵali na chigomezgo chakuzakaŵa mu mbumba ya Chiuta kwamuyirayira, para ŵajumpha chiyezgo chaumaliro icho chizamuchitika kuumaliro wa vyaka 1,000. (Sal. 25:14; Rom. 8:20, 21) Chifukwa chakuti ŵali na chigomezgo ichi, ŵali kwamba kale kuchema Yehova kuti “Adada.” (Mat. 6:9) Kweniso awo ŵazamuwuskika, nawo ŵazamupika mwaŵi wakusambira ivyo Yehova wakukhumba kwa iwo. Ndipo awo ŵazamusankha kupulikira ulongozgi wake, nawo ŵazamuŵa mu mbumba yake.

12. Kasi tizgorenge fumbo wuli sono?

¹² Nga umo tawonera, Yehova wachita kale vinthu vinandi ivyo vikulongora kuti ŵanthu wakuŵawona kuti mbakuzirwa kwa iyo. Ndipo ŵakuphakazgika wali kuŵazgora kale kuŵa ŵana ŵake, kweniso ŵa “mzinda ukuru” waŵapa chigomezgo chakuti ŵazakaŵe ŵana ŵake mu charu chiphya. (Chivu. 7:9) Kasi tingachita vichi sono kuti tilongore Yehova kuti tikukhumba kuŵa mu mbumba yake muyirayira?

13. Kasi tikwenera kuchita vichi kuti tiŵe mu mbumba ya Yehova? (Mrk. 12:30)

¹³ Longorani kuti mukutemwa Yehova mwakumuteŵetera na mtima wose. (Ŵazgani Mariko 12:30.) Pa vyawanangwa vyose ivyo Chiuta wali kutipa, panji chimoza mwa vyawanangwa vyakuzirwa chomene, ni mwaŵi wakuti timusopenge.  Tikulongora Yehova kuti tikumutemwa para ‘tikusungilira malango ghake.’ (1 Yoh. 5:3) Ndipo dango limoza ilo Yehova wakukhumba kuti tipulikirenge, ni ilo Yesu wakapeleka lakuti tikazgore ŵanthu kuŵa ŵasambiri na kuŵabapatiza. (Mat. 28:19) Wakayowoyaso kuti titemwanenge yumoza na munyake. (Yoh. 13:35) Yehova wakupokelera wose awo ŵakupulikira malango ghake kuti ŵaŵe mu mbumba yake ya pa charu chapasi.​—Sal. 15:1, 2.

14. Kasi tingalongora wuli kuti tikutemwa ŵanji? (Mateyu 9:36-38; Ŵaroma 12:10)

¹⁴ Mutemwenge ŵanji. Chitemwa ni mukhaliro wakuzirwa chomene uwo Yehova wali nawo. (1 Yoh. 4:8) Yehova wakalongora chitemwa chake pambere tindamumanye na kumumanya wuwo yayi. (1 Yoh. 4:9, 10) Tikuyezga Yehova para nase tikulongora chitemwa ku ŵanyithu. (Efe. 5:1) Yimoza mwa nthowa ziwemi chomene izo tingalongolera chitemwa ku ŵanji, ni para tikuŵasambizga vya Yehova apo nyengo yichalipo. (Ŵazgani Mateyu 9:36-38.) Para tichitenge nthena, tiŵawovwirenge kuti ŵamanye ivyo ŵakwenera kuchita kuti ŵaŵe mu mbumba ya Yehova. Nanga ni para munthu wabatizika, tikwenera kulutilira kumutemwa na kumuchindika. (1 Yoh. 4:20, 21) Kasi tingachita wuli nthena? Tikwenera kumugomezga na kuwona kuti wali na vilato viwemi. Mwachiyelezgero, para tikupulikiska yayi chifukwa icho wachitira chinthu chinyake, timukayikirenge yayi na kwamba kuwona kuti wakujighanaghanira yekha. M’malo mwake, timuchindikenge mubali withu, na kuwona kuti wakutiluska pa vinyake.​—Ŵazgani Ŵaroma 12:10; Fil. 2:3.

15. Kasi mbanjani awo tikwenera kuŵalongora lusungu?

¹⁵ Longorani lusungu na uwemi ku ŵanthu wose. Usange tikukhumba nadi kuŵa mu mbumba ya Yehova muyirayira, tikwenera kulondezga ivyo Mazgu gha Chiuta ghakuyowoya pa umoyo withu wa zuŵa na zuŵa. Mwachiyelezgero, Yesu wakasambizga kuti tikwenera kulongora lusungu na uwemi ku ŵanthu wose, nanga kungaŵa ku ŵalwani ŵithu. (Luka 6:32-36) Kweni nyengo zinyake chingaŵa chakusuzga kuchita nthena. Usange vyaŵa nthena, tikwenera kughanaghana na kuchita vinthu nga ni Yesu. Para tikuchita vyose ivyo tingafiska kuti tipulikirenge Yehova na kuyezga Yesu, tikulongora Adada ŵithu ŵakuchanya kuti tikukhumba kuŵa mu mbumba yawo muyirayira.

16. Kasi tingavikilira wuli lumbiri lwa mbumba ya Yehova?

¹⁶ Vikilirani lumbiri lwa mbumba ya Yehova. Mu mbumba za ŵanthu, kanandi mwana muchoko wakutolera ivyo ŵakuru ŵake ŵakuchita. Para ŵakuru ŵake ŵakulondezga fundo za mu Baibolo pa umoyo wawo, ŵakuŵa chiyelezgero chiwemi kwa iyo. Kweni para ŵakuchita vinthu viheni, munung’una wawo nayo wangamba kuchita vinthu viheni. Vikuyana waka na mbumba ya Yehova. Usange Mkhristu wakugomezgeka wagaluka panji wakuchita vinthu vyambura kwenelera, ŵanyake nawo ŵangamba kutolera ivyo wakuchita, nakwamba kuchita vinthu viheni. Awo ŵakuchita nthena, ŵakunanga mbiri ya mbumba ya Yehova. (1 Tes. 4:3-8) Tikwenera kugega ŵanthu awo ŵakuchita vinthu viheni na kuleka kuzomerezga chilichose kunanga ubwezi withu na Adada ŵithu ŵakuchanya awo ŵakutitemwa chomene.

17. Kasi ni maghanoghano wuli agho tikwenera kugega, ndipo chifukwa wuli?

¹⁷ Gomezgani Yehova m’malo mwa vinthu vyakuthupi. Yehova walayizga kuti watovwirenge kusanga chakurya, vyakuvwara na malo ghakukhala para tikupenja dankha Ufumu wake na kulondezga fundo zake zaurunji. (Sal. 55:22; Mat. 6:33) Para tigomezgenge layizgo ili, tighanaghanengepo yayi kuti vinthu vyakuthupi ivyo charu ichi chikupeleka ndivyo vingativikilira na kutovwira kuti tiŵe ŵakukondwa. Tikumanya kuti tingaŵa na mtende weneko pekha para tikuchita khumbo la Yehova. (Fil. 4:6, 7) Nanga tingaŵa kuti tingakwaniska kugura vinthu  vinandi, tikwenera kuwonaso usange tili na nyengo yakukwana na nkhongono za kuvigwiliskira ntchito na kupwelelera vinthu ivyo. Kasi tikwenera kuŵika chomene mahara ku vinthu vithu vyakuthupi? Tikwenera kukumbuka kuti Chiuta watipa ntchito yakuti tichite mu mbumba yake. Ichi chikung’anamura kuti tikwenera kuzomerezga yayi kutimbanizgika na chinthu chinyake. Tikwenera yayi kuŵa nga ni munyamata yura wakakana mwaŵi wakuteŵetera Yehova, kweniso wakuŵa mwana wake wakusoleka chifukwa chakuti wakatemwanga chomene vinthu vyakuthupi ivyo wakaŵa navyo.​—Mrk. 10:17-22.

18. Kasi ni vitumbiko wuli ivyo ŵanthu ŵakupulikira ŵazamusangwa navyo?

¹⁸ Ŵanthu ŵakupulikira ŵazamukondwa chomene kuŵa na mwaŵi wakutemwa Yehova na kumusopa muyirayira. Awo ŵali na chilindizga cha kuzakakhala pa charu chapasi, nawo ŵazamuŵaso ŵakukondwa kupwelelera charu chakutowa, icho Yehova wakalenga kuti ŵakhalengemo. Sonosono apa, Ufumu wa Chiuta uzgorenge charu chapasi na vyose ivyo vilimo kuŵaso viwemi chomene. Yesu wazamumazga masuzgo ghose agho ghakamba chifukwa cha ivyo Adamu na Eva ŵakasankha pakuleka mbumba ya Chiuta. Yehova wazamuwuska ŵanthu mamiliyoni ghanandi na kuŵapa mwaŵi wakukhala umoyo wamuyirayira wambura kulwara mu charu icho chizamuŵa kuti chazgoka paradiso. (Luka 23:42, 43) Para ŵanthu awo ŵakuteŵetera Yehova ŵazakaŵa ŵarunji, ŵazamuŵa na “uchindami na ntchindi” ivyo Davide wakalemba.​—Sal. 8:5.

19. Kasi tikwenera kukumbuka vichi?

¹⁹ Usange muli mu gulu la ŵa “mzinda ukuru,” muli na chigomezgo chiwemi chomene. Chiuta wakumutemwani, ndipo wakukhumba kuti mulutilire kuŵa mu mbumba yake. Ntheura chitani vyose ivyo mungafiska kuti mumukondweskenge. Zuŵa lililose mukumbukirenge ivyo Chiuta walayizga. Muzirwiskenge mwaŵi uwo muli nawo wakusopa Adada ŵithu ŵakutemweka ŵakuchanya, ndipo kondwani na chigomezgo cha kuzakasopa Yehova kwamuyirayira.