1. ¿Bin ya xtal ta koʼtantik kʼalal ya kiltik te bintik spasoj te Jehová?

TE KʼALAL ya jnopilan ta koʼtantik te bin la spas te Jehová ta chʼulchan sok ta Balumilal, jichniwan ya kaʼiy jbatik bitʼil te David, te jich la yal: «Cʼalal ya quil te chʼulchan awuʼun, te yaʼtel acʼab, soc te u soc te eqʼuetic te apasoje ¿Bin a te ants-winic yuʼun yac anaʼ, te yal-snichʼan ants-winic yuʼun yac acanantay?» (Sal. 8:3, 4). Jichniwan ya kaʼiy jbatik bitʼil te David, te kʼax chʼin la yaʼiy sba te kʼalal la spajaltay sba sok te ekʼetik manchukme jich-abi, ay jkʼoplaltik ta yoʼtan te Jehová. Ya kiltik bin kʼot ta stojol te Adán sok te Eva, te Jehová ma jaʼuknax la yil te bin la spasike, jaʼ jich la yil bitʼil sfamilia.

2. ¿Bin-a te skʼanojel yoʼtan te Jehová ta stojol te Adán sok te Eva?

² Te Adán sok te Eva jaʼ nail pasotik yuʼun te Jehová te kuxinik liʼ ta Balumilal sok jaʼ Tatil yuʼunik te Jehová te bayal skʼuxul yoʼtan. Jaʼ la skʼan te ayuk yal snichʼnabik te jich albotik: «Sitinan sok pʼohla abahic, nojesahic ta swohlol te bahlumilal, soc tuhunahic te qʼuinale» (Gén. 1:28). Jaʼ la skʼan te yakuk staik yal snichʼnabik sok ya skanantayik te Balumilal. Te lajuk schʼuunik mantal sok te lajuk spasbeyik skʼanojel yoʼtan te Jehová, te Adán sok te Eva sok te yal snichʼnabike ayik ta sfamilia te Jehová ta sbajtelkʼinal te jichuke.

3. ¿Bin yuʼun te Jehová mukʼ skʼoplal la yil te Adán sok te Eva?

³ Te Jehová mukʼ skʼoplal la yil te Adán sok te Eva kʼalal la yikʼ ta sfamilia. Te bitʼil la yichʼ pasel te ants winik, te David jich la yal ta stojol te Jehová: «Jteb ma pajaluc soc chʼul aʼbatetic la apas, la awaʼbe scoronahin yutsilal soc ichʼel ta mucʼ» (Sal. 8:5). Te ants winiketik ma jichuk pasbilik bitʼil  te chʼul-abatetik te ay yuʼelik, te ay spʼijilik sok te bayal bin ya xjuʼ yuʼunik spasel (Sal. 103:20). Pero te ants winiketik «jteb ma pajaluc» la yichʼik pasel bitʼil te chʼul-abatetik te bayal yuʼelike. ¡Tʼujbil ta aʼiyel! Kʼalal te Jehová la spas te sbabial jmeʼ jtatik, la sjapbey tʼujbil kuxlejalil.

4. ¿Bin kʼot ta stojol te Adán sok te Eva sok bin ya kiltik ta artículo ini?

 ⁴ Mel-oʼtantik sba, te Adán sok te Eva maʼyukik ta sfamilia te Jehová. Jich bitʼil ya kiltik ta artículo ini, bayal wokolil la staik te stsʼumbale. Te Jehová maba yanajem te skʼanojel yoʼtane, jaʼ ya skʼan te machʼatik ya schʼuunbeyik smantal jichuk ya xkʼotik bitʼil yal snichʼnab ta spisil-ora. Ta ora ini, ya kiltik bin-utʼil te Jehová mukʼ jkʼoplaltik ta yoʼtan. Ta patil ya kiltik bin ya xjuʼ ya jpastik yuʼun ya x-ayinotik ta sfamilia. Ta slajibal ya kiltik bintik bendición ya staik te snichʼnab te Jehová liʼ ta Balumilal.

5. ¿Bin-utʼil ya kalbeytik wokol te Jehová te la spasotik jich bitʼil te stalel?

⁵ Te Jehová la spasotik jich bitʼil te stalel (Gén. 1:26, 27). Te bitʼil jich la spasotik te Jehová, ya xjuʼ ya kakʼtik ta ilel tʼujbil taleliletik, jich bitʼil te kʼuxul oʼtanil, snaʼbeyel yoʼbolil sba te yantik, te jun koʼtantik sok te ya jpastik te bin toj (Sal. 86:15; 145:17). Jich ya kakʼtik ta ilel, te ya kichʼtik ta mukʼ sok ya kaltik wokol ta stojol (1 Ped. 1:14-16). Teme ya jpastik te bin ya smulan te jTatik te ay ta chʼulchan, tseʼelnax koʼtantik yuʼun. Te Jehová la spasotik jich bitʼil te stalel, jich ya xjuʼ ya yikʼotik ta sfamilia.

6. ¿Bin-utʼil la yakʼ ta ilel te Jehová te mukʼ skʼoplal ta yoʼtan te ants winiketik kʼalal la spas te Balumilal?

⁶ Te Jehová la schajpan ta lek te Balumilal. Te kʼalal mato spasoj-a te Adán, te Dios la schajpan ta lek te Balumilal yuʼun tey ya x-ayinik-a te ants winiketik (Job 38:4-6; Jer. 10:12). Ta swenta te kʼax lek yoʼtan, bayal bintik la spas yuʼun ya jmulantik (Sal. 104:14, 15, 24). Ay baeltik la snopilan ta yoʼtan te bintik la spas sok «lec la yil» (Gén. 1:10, 12, 31). Te bitʼil la yakʼbey te ants winiketik yuʼun ya swentainik te bin tʼujbil ay ta Balumilal, jich la yakʼ ta ilel te ay skʼoplal ta yoʼtan (Sal. 8:6). Te Dios ya skʼan te tseʼelnax yoʼtanik te ants winiketik ta skanantayel ta sbajtelkʼinal te bintik spasoje. ¿Yabal kalbeytik wokol te Jehová ta swenta te bintik tʼujbil spasoje?

7. ¿Bin ya yakʼ ta nopel te Josué 24:15 te libre ayotik?

⁷ Te Jehová yakʼojotik ta libre yuʼun te bin ya jpastik. Ta swenta te majtanil ini, ya xjuʼ ya jnoptik bin ya jpastik ta jkuxlejaltik (kʼopona Josué 24:15). Te Dios te kʼuxotik ta yoʼtan tseʼelnax yoʼtan kʼalal jaʼ ya x-abatinotik ta stojol (Sal. 84:11; Prov. 27:11). Ay bayal te banti ya xjuʼ ya jtuuntestik te libre ayotik ta snopel te bin ya jpastike. Kiltik te ejemplo te la yakʼ jilel te Jesús.

8. ¿Bin la spas Jesús te bitʼil libre ay?

⁸ Te Jesús jaʼ la yakʼ ta yoʼtan skoltayel te yantik, jaʼnix jich ya xjuʼ ya jtʼunbeytik te stalel. Jun buelta te Jesús sok te jnopojeletik yuʼun kʼax lujbenik, jaʼ yuʼun bajt sleik te banti ya xjuʼ skux yoʼtanik. Pero maba juʼ yuʼunik, melel bayal ants winiketik kʼotik tey-a yuʼun ya skʼan ya yaʼiyik te nojptesel yuʼun te Jesús. Maba ilin ta stojol te ants winiketik, jich «bayel bin hahch yaʼbe snopic» (Mar. 6:30-34). Kʼalal ya jtʼunbeytik te stalel te Jesús ta stuuntesel jtiempotik sok te kiptik yuʼun ya jkoltaytik te yantik, ya kalbeytik yutsil skʼoplal te jTatik te ay ta chʼulchan  (Mat. 5:14-16). Jich ya kakʼtik ta ilel te ya jkʼan x-ayinotik ta sfamilia.

9. ¿Bin ya skʼan ayuk ta yoʼtanik te meʼil tatiletik?

⁹ Te Jehová spasojotik yuʼun ya jta kal jnichʼnabtik sok yakuk jnojptestik te kʼuxuk ta yoʼtanik sok ya x-abatinik ta stojol. Teme ay awal anichʼnab, ¿mukʼbal skʼoplal ya awil te majtanil ini? Manchukme te Jehová yakʼbeyoj yuʼel te chʼul-abatetik, ma xjuʼ ya x-ayin yal snichʼnabik. Teme kʼoem ta yoʼtanik te meʼil tatiletik, ya yalik wokol yuʼun te mukʼul majtanil akʼbilik. Akʼbil yaʼtelik ta schʼitesel te yal snichʼnabik «ta scuenta te tojobtesel soc te tsitsel yuʼun te Cajwaltique» (Efes. 6:4; Deut. 6:5-7; Sal. 127:3). Te organización yuʼun Jehová yakʼoj bayal aʼtejibaletik te lokʼemik ta Biblia, jich bitʼil publicacionetik, videoetik, kʼayojil sok articuloetik te ay ta página kuʼuntik. Chikan ta ilel te kʼux ta yoʼtanik te alaletik te Jehová sok te Jesús (Luc. 18:15-17). Te Jehová ya smulan kʼalal te meʼil tatiletik ya yakʼ smukʼul yoʼtanik ta stojol sok te ya spasik tulan ta skanantayel te yal snichʼnabik te bantito kʼalal ya xjuʼ yuʼunik. Kʼalal jich ya spasik te meʼil tatiletik ya skoltayik te yal snichʼnabik yuʼun spisil-ora ya x-ayinik ta sfamilia te Jehová.

10, 11. ¿Bin spasoj te Jehová ta swenta te la yakʼ ta lajel te sNichʼan?

¹⁰ Te Jehová la stikun tal te sNichʼan yuʼun ya x-ayinotik yan buelta ta sfamilia. Jich bitʼil la kiltik ta  párrafo 4, te Adán sok te Eva lokʼik ta sfamilia te Jehová sok jich kʼot ta stojol te yal snichʼnabik (Rom. 5:12). Te bitʼil spasemal yoʼtanik la skʼaxuntaybeyik smantal Dios te Adán sok te Eva, jaʼ yuʼun la yichʼik lokʼesel ta sfamilia te Jehová. ¿Bin kʼot ta stojol te stsʼumbalike? Ta swenta te skʼuxul yoʼtan te Jehová, la yikʼ ta sfamilia te machʼatik ya schʼuunbey te skʼop. ¿Bin-utʼil? Jaʼ ta swenta te la yakʼ ta lajel te sNichʼan (Juan 3:16; Rom. 5:19). Ta swenta te la yakʼ sba ta lajel te Jesús, jich la yikʼ ta sfamilia Jehová te 144,000 ants winiketik te jun yoʼtanik ta stojol (Rom. 8:15-17; Apoc. 14:1).

¹¹ Jaʼnix jich ay bayal millón ta tul ants winiketik te yakik ta spasel te skʼanojel yoʼtan te Jehová, ay smukʼul yoʼtanik yuʼun ya xkʼotik ta sfamilia, kʼalal ya xlaj te jmil jaʼbil (Sal. 25:14; Rom. 8:20, 21). Ta swenta te bin ya jmaliytik ta pajel chaʼbej, ta ora ini ya kalbeytik «Jtatic» te Jehová, te Jpaswanej kuʼuntik (Mat. 6:9). Yan te machʼatik ya xchaʼkuxajik tal, jaʼnix jich ya snopik te bin ya skʼan te Jehová ta stojolik. Te machʼatik ya yakʼ ta yoʼtanik schʼuunbeyel smantal ya x-ochik ta sfamilia.

12. ¿Bin jojkʼoyel ya kakʼbeytik sujtib?

¹² Jich bitʼil la jnoptikix, te Jehová bayal bin spasoj yuʼun ay skʼoplal ta yoʼtan te ants winiketik. Ta ora ini jaʼix snichʼnab te Jehová te machʼatik ya xbajtik ta chʼulchan sok te ipal ants winiketik, ay smukʼul yoʼtanik yuʼun jich ya xkʼotik bitʼil snichʼnab Dios ta achʼ balumilal (Apoc. 7:9). ¿Bin ya xjuʼ ya jpastik yuʼun ya kakʼbeytik yil Jehová te spisil-ora ya jkʼan x-ayinotik ta sfamilia?

13. ¿Bin ya skʼan ya jpastik yuʼun ya x-ayinotik ta sfamilia te Jehová? (Marcos 12:30).

¹³ Abatinukotik ta stojol te Jehová sok spisil koʼtantik (kʼopona Marcos 12:30). Ta spisil te majtanil yakʼojbotik te Jehová sok skʼuxul yoʼtan, jaʼ te ya kichʼtik ta mukʼ. Kʼalal ya jchʼuunbeytik te mantaliletik yuʼun, ya kakʼtik ta ilel te kʼux ta koʼtantik (1 Juan 5:3). Jich bitʼil te ya  jchʼuuntik te bin la yal ta mantal te Jesús te ya kotsestik jnopojeletik sok te ya yichʼik jaʼ (Mat. 28:19). Jaʼnix jich la yal te Jesús te kʼuxuk ya kaʼiy jbatik (Juan 13:35). Te Jehová ya yikʼ ta sfamilia te machʼatik ya schʼuunbey te smantale (Sal. 15:1, 2).

14. ¿Bin-utʼil ya kakʼtik ta ilel te kʼux ta koʼtantik te yantik? (Mateo 9:36-38; Romanos 12:10).

¹⁴ Kʼuxuk ta koʼtantik te yantik. Te kʼuxul oʼtanil, jaʼ te talelil te mukʼxan skʼoplal te ay yuʼun te Jehová (1 Juan 4:8). Mato jnaʼbeytik sba-a te kʼuxotikix ta yoʼtane (1 Juan 4:9, 10). Kʼalal kʼux ta koʼtantik te yantik, jich ya jnopbeytik stalel te Jehová (Efes. 5:1). Te bitʼil ya kakʼtik ta ilel te kʼux ta koʼtantik te ants winiketik, jaʼ te ya jkoltaytik ta snaʼbeyel sba te Jehová te bitʼil yakʼojto tiempoe (kʼopona Mateo 9:36-38). Jich ya jkoltaytik te ants winiketik, yuʼun ya xkʼotik ta sfamilia te Jehová ta pajel chaʼbej. Kʼalal ay machʼa ya yichʼ jaʼ, ya skʼan kʼuxuk ta koʼtantik sok ya kichʼtik ta mukʼ (1 Juan 4:20, 21). Jich bitʼil manchuk ya jnop ta koʼtantik te ay machʼa sok spasemal yoʼtan ay bin ma lek la spas o ta swenta sbikʼtal yoʼtan, jaʼ lek te ya kichʼtik ta mukʼ sok te ay skʼoplal ta koʼtantik (kʼopona Romanos 12:10; Filip. 2:3).

15. ¿Machʼatik ya skʼan ya jnaʼbeytik yoʼbolil sba sok ay yutsil koʼtantik ta stojolik?

¹⁵ Yakuk jnaʼbeytik yoʼbolil sba te ants winiketik sok ayuk yutsil koʼtantik ta stojolik. Teme ya jkʼantik te spisil-ora ya x-ayinotik ta sfamilia te Jehová, ya skʼan te ya jpas ta jkuxlejaltik te bin ya jnoptik ta Biblia. Te Jesús la yakʼ ta nopel te yakuk jnaʼbeytik yoʼbolil sba te ants winiketik sok ayuk yutsil koʼtantik ta stojolik, jaʼnix jich ta stojol te jkontrataktik (Luc. 6:32-36). Tulan-niwan ya kaʼiytik te jich ya jpastike. Teme jich ya kaʼiy jbatike, ya skʼan jnopbeytik yoʼtan sok te jichuk ya jpastik te bitʼil la spas te Jesús. Kʼalal ya jchʼuunbeytik smantal te Jehová sok ya jkʼayinbeytik te stalel te Jesús, ya kakʼbeytik yil te ya jkʼan x-ayinotik ta spisil-ora ta sfamilia te Jehová.

16. ¿Bin ya skʼan jpastik yuʼun maba ya yichʼ bolobtesbeyel skʼoplal te sfamilia te Jehová?

¹⁶ Mame jbolobtesbeytik skʼoplal te sfamilia te Jehová. Ta jun familia, te machʼatik chʼinikto jaʼ ya stʼunbeyik stalel te bankilal o te wixilale. Teme jaʼ ya spas ta skuxlejalik te bin ya yal te Biblia te machʼatik mukʼikixe, jaʼ ya yakʼbeyik yil lekil ejemplo te machʼatik chʼiniktoe. Pero teme jaʼ ya spasik te bin ma lek, te machʼatik chʼinikto, jaʼnix jich ya spasik. Jichnix ya xkʼot ta pasel ta sfamilia te Jehová. Teme ay jtul hermano te ma junukix yoʼtan sok ya xjajch spas te bin ya yal te apostataetik o ya xjajch spas bayal ta chajp muliletik, ayniwan hermanoetik te ya stʼunbeyik te stalele. Te machʼatik jich ya spasik, ya sbolobtesbeyik skʼoplal te sfamilia te Jehová (1 Tes. 4:3-8). Mame jtʼuntik te bin ma lek ya yichʼ pasel sok mame xkakʼtik te ay bin ya yakʼ xnamajotik ta stojol te Jehová.

17. ¿Bin ma skʼan ya xbajt ta koʼtantik, sok bin yuʼun?

¹⁷ Akʼa smukʼulin koʼtantik te Jehová, ma jaʼuk te bin ay kuʼuntik. Te Jehová jamal ya yalbotik teme jaʼ nail ya kakʼ ta jkuxlejaltik te Wentainel sok ya jchʼuunbeytik te smantal, jaʼ ya yakʼ te bin ya xtuun kuʼuntik, jich bitʼil te jweʼeltik, jkʼuʼ jpakʼtik sok jnatik (Sal. 55:22; Mat. 6:33). Jaʼ yuʼun mame jnop ta koʼtantik te jaʼ ya yakʼ stseʼelil koʼtantik sok ya skanantayotik te bintik ay kuʼuntik. Ya jnaʼtik te jaʼnax ya yakʼ slamalil koʼtantik te spasbeyel skʼanojel yoʼtan te Jehová (Filip. 4:6, 7). Teme  ay jtakʼintik yuʼun ya jmantik bayal jbiluktik, ya skʼan kiltik teme ay jtiempotik, ay kiptik ta yilel sok ta stuuntesel. Jojkʼoybey jbatik: «¿Jaʼbal baem ta koʼtan yilel te bintik ay kuʼun?». Ayuk ta koʼtantik te Jehová ya skʼan te jaʼuk baem ta koʼtantik spasbeyel te yaʼtel. Jaʼ yuʼun mame xkakʼtik te ay bin ya schʼaytes koʼtantik. Mame jichukotik bitʼil te kerem ta skʼajkʼalel te Jesús te la spʼaj te ya x-abatin ta stojol te Jehová sok ma la skʼan te jichuk ya xkʼot bitʼil snichʼan. ¿Bin yuʼun te jich la spas? Jaʼ ta swenta te baem ta yoʼtan sleel bayal sbiluk (Mar. 10:17-22).

18. ¿Bin majtanil sok bin bendición ya staik te machʼatik ya schʼuunik mantal?

¹⁸ Te machʼatik ya schʼuunbeyik smantal te Jehová ya smulanik te mukʼul majtanil ay ta swentaik: jaʼ te kʼux ta yoʼtanik sok ya yichʼik ta mukʼ ta sbajtelkʼinal te Jehová. Te machʼatik ya xkuxinik liʼ ta Balumilal ya smulanik skanantayel te bintik ay, te jaʼ spasoj te Jehová yuʼun ya xkuxinik tey-a. Ta swenta te Wentainel yuʼun Dios, te Balumilal ya yichʼ achʼubtesel jich bitʼil ta nailal. Te Jesús ya slajin spisil te wokoliletik la yakʼ te Adán sok te Eva kʼalal lokʼik ta sfamilia te Jehová. Te Jehová ya schaʼkuxajtes bayal millón ta jtul ants winiketik yuʼun ya xkuxinik ta sbajtelkʼinal liʼ ta Balumilal sok ma stsakotikix ta chamel (Luc. 23:42, 43). Kʼalal stojil ants winiketik ya xkʼotik te machʼatik ya xkuxinik liʼ ta Balumilal ta jujuntul ya yakʼik ta ilel te «yutsilal soc ichʼel ta muc» jich bitʼil la yal te David (Sal. 8:5).

19. ¿Bin ya skʼan ayuk ta koʼtantik?

¹⁹ Teme tey ochem akʼoplal ta ipal ants winiketik, ay bin tʼujbil ya amaliy ta pajel chaʼbej. Te Dios kʼuxat ta yoʼtan sok ya skʼan te ayukat ta sfamilia. Pasa tulan yuʼun lekuk ya yilat te Jehová. Ayuk ta awoʼtan ta jujun kʼajkʼal te bin ya amaliy ta pajel chaʼbej. Mukʼuk skʼoplal ya awil te yichʼel ta mukʼ te jTatik te ay ta chʼulchan sok ayuk ta awoʼtan te spisil-ora ya awalbey yutsil skʼoplal.