1. Enọ vọ yen a sa nọ siẹrẹ e de roro kpahen erọvwon eje rẹ Jihova mare?

AVWANRE de roro kpahen erọnvwọn eje rẹ Jihova mare, kẹ avwanre se vwo oka rẹ ẹwẹn ro rhe ọbuine Devid rọ vwọ nọ vwẹ ẹrhovwo: “Ọke mi de ni idjuvwu wẹn na, iruo rẹ irhiabọ wẹn, te emeranvwe kugbe isio ru wọ mare na; Die ohwo rẹ akpọ ru wọ davwerhọ rọye, kugbe ọmọ rẹ ohwo ru wo nenesi rọye?” (Une 8:3, 4) Kerẹ Devid, avwanre se roro kpahen oborẹ avwanre hanvwe te vwẹ usun rẹ emama ri Jihova eje, o mi gbe avwanre unu nẹ ọ nabọ vwẹrote avwanre. Kirobo re che yono, Jihova vwẹrote Adam vẹ Ivi, ọ je vwẹ ayen ba orua rọyen.

2. Die yen Jihova guọnọ nẹ Adam vẹ Ivi ru?

² Adam vẹ Ivi yen ihwo rẹsosuọ rẹ Jihova mare vwẹ akpọ na, Jihova yen Ọsẹ rayen. O rhẹro rọyen nẹ ayen che vwiẹ akpọ na vọn. Ọ da ta kẹ ayen: “We vwiẹ ri we bun phihọ, re wa vọn akpọ na, ru we phio kparobọ.” (Jẹn. 1:28) Ayen che vwiẹ emọ je vwẹrote akpọ na. Mane kẹ Adam vẹ Ivi kerhọ ri Jihova jovwo, ayen vẹ emọ rayen rha dia evunrẹ orua rẹ Ọghẹnẹ bẹdẹ.

3. Diesorọ a sa vwọ tanẹ Adam vẹ Ivi vwo omamọ rẹ ẹdia vwẹ orua rẹ Ọghẹnẹ jovwo?

³ Adam vẹ Ivi vwo omamọ rẹ ẹdia vwẹ orua rẹ Ọghẹnẹ jovwo. Devid ta eta nana vwẹ Une Rẹ Ejiro 8:5 (NW ) kpahen ohworakpọ rẹ Jihova mare: “Wọ marọ kpotọ emerha nọ ihwo re pha kerẹ ọghẹnẹ, Wọ da vwẹ erhu rẹ urinrin vẹ ọghọ vwo tughẹ.” Vwọrẹ uyota, ihworakpọ vwo oka rẹ ẹgba vẹ aghwanre ro rhe emekashe-e. (Une 103:20) Dedena, “emerha” yen ihworakpọ vwo “kpotọ” vrẹ emekashe.  Kọyen Jihova kẹ ọsẹ vẹ oni rẹ avwanre rẹsosuọ omamọ rẹ ọtonphiyọ!

4. Die yen phia kẹ ẹdia rẹ Adam vẹ Ivi vwẹ orua ri Jihova, kẹ die yen a cha ta ota kpahen vwẹ uyono nana?

 ⁴ Jẹ, ọ da ohwo mamọ nẹ Adam vẹ Ivi kpare ẹdia rayen vwẹ orua ri Jihova kufia. Ọnana ghwa ọmiaovwẹ rode rhe emọ rayen, kirobo ra cha mrẹ vwẹ uyono nana. Ẹkẹvuọvo, ọhọre ri Jihova ji rhi wene-e. Ọ guọnọre nẹ ihwo ri nyo upho rọyen dia emọ rọyen bẹdẹ. Ẹsosuọ, e ja ta ota kpahen oborẹ Jihova ruru vwo brọghọ phiyọ avwanre oma. A je cha ta ota kpahen obo re se ru asaọkiephana vwo djephia nẹ avwanre guọnọ dia evunrẹ orua rẹ Ọghẹnẹ. Ukuotọ rọyen, ka cha ta ota kpahen ebruphiyọ rẹ emọ ri Jihova rehẹ otọrakpọ na cha riavwerhen rọyen bẹdẹ bẹdẹ.

5. Mavọ yen e se vwo dje ọdavwaro phia kẹ Ọghẹnẹ rọ ma avwanre họhọ oma rọyen?

⁵ Jihova brọghọ phiyọ avwanre oma, rọ vwọ ma avwanre họhọ oma rayen. (Jẹn. 1:26, 27) Kidie nẹ Jihova ma avwanre họhọ oma rọyen, kẹ avwanre se vwo iruemu iyoyovwin kerẹ ẹguọnọ, arodọnvwẹ, kugbe evun-ẹfuọn, avwanre je sa dia evwata. (Une 86:15; 145:17) Avwanre vwọ davwẹngba vwo vwo iruemu iyoyovwin nana ye, jẹ avwanre brọghọ phiyọ Jihova oma, ji dje ọdavwaro phia kẹ. (1 Pita 1:14-16) Oma vwerhen avwanre siẹrẹ avwanre de ru obo re nẹrhẹ ubiudu ri Jihova ghọghọ. Avwanre sa dia oka rẹ ihwo rẹ Jihova guọnọre vwẹ orua rọyen, kidie ọ ma avwanre họhọ oma rọyen.

6. Mavọ yen Jihova vwo brọghọ phiyọ ihworakpọ oma ọke ro vwo muegbe rẹ akpọ na?

⁶ Jihova muegbe rẹ asan oghẹresan kẹ avwanre. Jihova muegbe rẹ otọrakpọ na phiyotọ ọke grongron tavwen ọ ke ma ọshare rẹsosuọ na. (Job 38:4-6; Jer. 10:12) Jihova kẹ avwanre erọnvwọn iyoyovwin buebun, kidie ọyen ohwo esiri rọ kokẹ ghwologhwolo. (Une 104:14, 15, 24) Ọ ghwọrọ ọke evo vwo roro kpahen obo rọ mare, ọ “da mrẹ nẹ oyoma.” (Jẹn. 1:10, 12, 31) O brọghọ phiyọ ihworakpọ oma, rọ vwọ vwẹ ayen “vwo ru ovie” vwẹ enu rẹ erọnvwọn iyoyovwin na eje rọ mare vwẹ akpọ na. (Une 8:6) Ọghẹnẹ guọnọre nẹ ihworakpọ egbagba vwẹrote emama igbevwunu nana eje bẹdẹ bẹdẹ. Wọ kpẹvwẹ Jihova kẹdẹ kẹdẹ fikirẹ ive oyoyovwin nana?

7. Mavọ yen Joshua 24:15 vwo djephia nẹ avwanre vwo ugbomọphẹ?

⁷ Jihova kẹ avwanre ugbomọphẹ. Avwanre sa jẹ oka rẹ akpọ rẹ avwanre che yerin. (Se Joshua 24:15.) Ugbomọphẹ ọyen ẹgba re vwo brorhiẹn romobọ. Oma vwerhen Jihova siẹrẹ avwanre de brorhiẹn avwanre vwọ ga. (Une 84:11; Isẹ  27:11) Avwanre sa reyọ ugbomọphẹ rẹ avwanre vwo bru omamọ rẹ orhiẹn sansan. Roro kpahen udje ri Jesu.

8. Djudje rẹ oborẹ Jesu reyọ ugbomọphẹ rọyen vwo ruiruo wan?

⁸ Avwanre sa vwẹrokere Jesu siẹrẹ avwanre da vwẹ ọdavwẹ rẹ ihwo efa vwọ kobaro kẹ ọ rẹ avwanre. O vwo ọke ọvo rẹ oma vwọ bẹn Jesu vẹ idibo rọyen, ayen de kpo asan rọ fọre de re rovwoma. Ẹkẹvuọvo ayen se rovwoma-a. Otu buebun de nene ayen, kidie ayen guọnọre nẹ Jesu yono ayen. Dedena, ivun miovwo Jesu-u. Ukperẹ ọtiọyen, aro rẹ ihwo na da dọn. Kẹ die yen o ruru? “O de yono ayen emu buebu.” (Mak 6:30-34) Avwanre da vwẹrokere Jesu vwọ vwẹ ọke vẹ ẹgba rẹ avwanre vwọ chọn ihwo efa uko, jẹ avwanre vwẹ  ujiri vwo rhe ọsẹ rẹ avwanre rọhẹ obo odjuvwu. (Mat. 5:14-16) Avwanre ji dje kẹ Jihova nẹ avwanre guọnọ dia ẹbẹre ọvo rẹ orua rọyen.

9. Okẹ ọghanghanre vọ yen Jihova vwọ kẹ emiọvwọn?

⁹ Jihova kẹ ihworakpọ ẹgba rẹ ayen se vwo vwiẹ emọ, kugbe oghwa rẹ ayen vwo yono emọ na vwo vwo ẹguọnọ rọyen, je vwẹ ẹga kẹ. Wọ da dia ọmiọvwọn, wo ni okẹ nana ghanghanre? Dede nẹ Jihova kẹ emekashe na ẹgba rọ vrẹ ọ rẹ ihworakpọ, jẹ ayen vwo uphẹn nana-a. Ọtiọyena, ofori nẹ ọmiọvwọn ni uphẹn nana ghanghanre. Jihova vwẹroso emiọvwọn, ọ da kẹ ayen uphẹn oghẹresan rẹ ayen vwọ ghẹrẹ ayen vwẹ “ẹghwọ kuo kugbe uyono rẹ Ọrovwohwo.” (Ẹfe. 6:4; Urhi 6:5-7; Une 127:3) Ukoko ri Jihova ru ẹbe, ividio, uhworo, kugbe erọnvwọn efa re phi phiyọ wẹbsaiti, re sa chọn emiọvwọn uko. O phẹnre dẹn nẹ Jihova vẹ Jesu ni ighene rẹ avwanre ghanghanre. (Luk 18:15-17) Oma cha vwerhen Jihova siẹrẹ emiọvwọn da vwẹrosuọ, ji ru asan rẹ ẹgba rayen teri vwọ vwẹrote emọ eghanghanre nana. Emiọvwọn tiọyena je kẹ emọ rẹ ayen uphẹn rẹ ayen vwọ dia ẹbẹre ọvo rẹ orua ri Jihova bẹdẹ bẹdẹ!

10-11. Uphẹn vọ yen avwanre vwori fikirẹ ọtanhirhe na?

¹⁰ Jihova vwẹ Ọmọ ọghanghanre rọyen vwọ kpahotọ rere avwanre sa vwọ rhoma dia ẹbẹre ọvo rẹ orua rọyen. Kirobo ra tare vwẹ  ẹkorota 4, Adam vẹ Ivi ku uphẹn rẹ ayen vẹ emọ rayen vwọ dia orua ri Jihova kufia. (Rom 5:12) Arogba yen Adam vẹ Ivi vwọ chọn urhi ri Jihova, ọtiọyena ayen fo ihwo re si nẹ orua rọyen. Kẹ emọ rayen vwo? Kidie nẹ Jihova vwo ẹguọnọ rẹ ihworakpọ, o de vwo ọrhuẹrẹphiyotọ rẹ emọ rayen ri nyo upho rọyen sa vwọ dia ẹbẹre ọvo rẹ orua rọyen. O ru ọnana womarẹ izobo ọtanhirhe rẹ Ọmọ ọghanghanre rọyen, Jesu Kristi. (Jọn 3:16; Rom 5:19) Fikirẹ izobo rọ Ọmọ rọyen na, Jihova da jẹ ihwo 144,000 re fuevun reyọ kerẹ emọ rọyen.—Rom 8:15-17; Ẹvwọ. 14:1.

¹¹ Vwọba, o ji vwo iduduru rẹ ihwo ri ruẹ ọhọre rẹ Ọghẹnẹ. Ayen vwo iphiẹrophiyọ rẹ ayen vwọ dia evunrẹ orua rọyen siẹrẹ ayen da wan ọdavwini rọ koba vwẹ oba rẹ ẹgbukpe uriorin rẹ usuon ri Jesu na. (Une 25:14; Rom 8:20, 21) Fikirẹ iphiẹrophiyọ yena, kẹ ayen tobọ se Jihova rọ dia Ọmemama rayen “Ọsẹ” enẹna. (Mat. 6:9) Ihwo ra cha rhọvwọn nushi, ji che vwo uphẹn rẹ ayen vwo yono kpahen oborẹ Jihova guọnọ miẹ ayen. Ihwo ri nyo upho rẹ Ọghẹnẹ je cha dia ẹbẹre ọvo rẹ orua rọyen.

12. Onọ vọ yen a cha kpahen phiyọ?

¹² Kirobo rẹ avwanre yonori, Jihova ru emu buebun vwo brọghọ phiyọ avwanre oma. O rhiabọreyọ ihwo rọ jẹreyọ kerẹ emọ rọyen, ọ da rha kẹ “urogho rẹ ihwo buebu” yẹrẹ otu gbidigbidi na iphiẹrophiyọ rẹ ayen vwọ dia emọ rọyen vwẹ akpọ kpokpọ na. (Ẹvwọ. 7:9) Die yen e se ru enẹna vwo dje kẹ Jihova nẹ avwanre guọnọ dia ẹbẹre ọvo rẹ orua rọyen na bẹdẹ?

13. Die yen avwanre se ru rere a sa vwọ dia ẹbẹre ọvo rẹ orua ri Jihova? (Mak 12:30)

¹³ Dje ẹguọnọ wẹn vwọ kẹ Jihova womarẹ wọ vwọ vwẹ udu wẹn ejobi vwọ ga. (Se Mak 12:30.) Jihova vwẹ erọnvwọn eghanghanre buebun vwo ruẹse kẹ avwanre. Ọvo vwẹ usun rẹ okẹ re ma ghanre kparobọ rọ vwọ kẹ avwanre yen ẹgba ra  sa vwọ vwẹ ẹga kẹ. ‘Avwanre da yọnrọn irhi rọyen,’ ke se djephia nẹ avwanre vwo ẹguọnọ rọyen. (1 Jọn 5:3) Jihova guọnọre nẹ avwanre nene urhi rẹ Jesu ji kẹ avwanre nẹ e gbe idibo ji bru ihwo phiyame. (Mat. 28:19) Ọ je tanẹ avwanre vwo ẹguọnọ rẹ ohwohwo. (Jọn 13:35) Jihova cha reyọ ihwo ri nyo upho rọyen vwọba orua rẹ idibo rọyen rehẹ akpọeje.—Une 15:1, 2.

14. Mavọ yen e se vwo dje ẹguọnọ kẹ ihwo efa? (Matiu 9:36-38; Rom 12:10)

¹⁴ Dje ẹguọnọ kẹ ihwo efa. Ẹguọnọ yen uruemu ri Jihova rọ ma ghanre kparobọ. (1 Jọn 4:8) Jihova dje ẹguọnọ kẹ avwanre tavwen avwanre ke rhe riẹn. (1 Jọn 4:9, 10) Avwanre de dje ẹguọnọ kẹ ihwo efa, kọyen avwanre vwẹrokere. (Ẹfe. 5:1) Ọvo usun rẹ idjerhe ro me yovwin kparobọ re se vwo dje ẹguọnọ kẹ ihwo, ọyen a vwọ chọn ayen uko vwo yono kpahen Jihova enẹna rẹ ọke je vwọ herọ na. (Se Matiu 9:36-38.) E de ru ọtiọyen, ka sa chọn ayen uko vwọ riẹn oborẹ ayen che ru, ayen sa vwọ dia ẹbẹre ọvo rẹ orua rẹ Ọghẹnẹ. Ohwo de bromaphiyame nu, e jẹ avwanre ji dje ẹguọnọ kẹ, ji brọghọ phiyọ oma. (1 Jọn 4:20, 21) Die yen ọnana churobọsi? O mudiaphiyọ nẹ avwanre cha vwẹrosuọ. Kerẹ udje, avwanre che vwo ẹwẹn ivivẹ kpahen erọnvwọn ro ruru-u. Ukperẹ ọtiọyen, e che muọghọ kẹ oniọvo rẹ avwanre, ji no nẹ o yovwin nọ avwanre.—Se Rom 12:10; Fil. 2:3.

15. Ono yen ofori nẹ avwanre dje uruemuesiri ji ruẹse kẹ?

¹⁵ Gbe arodọnvwẹ ji dje uruemuesiri kẹ ihwo. Avwanre da guọnọ dia usun rẹ ihwo ri se se Jihova Ọsẹ rayen, kẹ avwanre vwẹ Ota rẹ Ọghẹnẹ vwo ruiruo. Kerẹ udje, Jesu yonori nẹ e dje uruemuesiri vẹ ẹguọnọ phia, ji ruẹse kẹ ihwo efa, ọtiọyen ji te ivwighrẹn rẹ avwanre. (Luk 6:32-36) Ọnana sa bẹn avwanre eruo ọkievo. Ọ da dia ọtiọyen, kọyen e che yono obo ra sa vwọ dia kerẹ Jesu. Avwanre da davwẹngba vwo nyo upho ri Jihova je vwẹrokere Jesu, ọyena che djephia nẹ avwanre guọnọ dia ẹbẹre ọvo rẹ orua rọyen bẹdẹ.

16. Mavọ yen avwanre sa vwọ sẹro rẹ omamọ odẹ rẹ orua ri Jihova?

¹⁶ Sẹro rẹ omamọ rẹ odẹ rẹ orua ri Jihova. Kirobo rẹ avwanre riẹnre, vwevunrẹ orua, omotete sa vwẹrokere oniọvo rọyen ọkpako. Ọniọvo rọyen ọkpako na da vwẹ obo ro yono vwẹ Baibol na vwo ruiruo, kọ cha dia omamọ rẹ udje kẹ oniọvo rọyen otete. Ọ rẹ ọkpako na de ru obore brare ọ rẹ otete na je sa vwẹrokere udje rọyena. Ọtiọyen ọ je hepha vwẹ orua ri Jihova. Siẹrẹ odibo ri Jihova rọ fuẹvun de rhiabọreyọ iroro rẹ ihwo ri she nẹ ukoko na re vwọsuọ, yẹrẹ ru obo re brare, ihwo efa je sa vwẹrokere. Ihwo ri ru ọtiọyen miovwo odẹ rẹ orua rẹ idibo ri Jihova. (1 Tẹsa. 4:3-8) E jẹ avwanre vwẹrokere ihwo re dia erharhe rẹ udje-e. E jẹ a kẹnoma kẹ kemu kemu ro se miovwo oyerinkugbe rẹ avwanre vẹ Jihova.

17. Oka rẹ iroro vọ yen ofori nẹ a kẹnoma kẹ, kẹ diesorọ?

¹⁷ Vwẹroso Jihova ukperẹ ekuakua rẹ akpeyeren. Jihova veri nẹ ọyen cha kẹ avwanre emuọre, obo re che kuphiyọ, kugbe uwevwin ra cha dia, siẹrẹ a da guọnọ Uvie na ẹsosuọ, ji yeren akpọ nene irhi rọyen. (Une 55:22; Mat. 6:33) Avwanre de vwo imuẹro kpahen ive yena, e rhe che roro nẹ ekuakua rẹ akpeyeren cha kẹ avwanre ofuvwegbe kugbe omavwerhovwẹ-ẹn. Avwanre riẹnre nẹ eruo rẹ ọhọre ri Jihova ọvo yen sa kẹ avwanre obọdẹn rẹ ufuoma. (Fil. 4:6, 7) Avwanre da tobọ vwo igho ra sa vwọ dẹ ekuakua  buebun, ofori nẹ a nọ oma rẹ avwanre sẹ avwanre vwo ọke vẹ ẹgba ra sa vwọ reyọ ayen vwo ruiruo, je vwẹrote ayen. Ekuakua na cha reyọ ọke rẹ avwanre? E jẹ a karophiyọ nẹ Ọghẹnẹ kẹ ihwo rẹ orua rọyen eje owian. E jẹ emu vuọvo mu ẹwẹn rẹ avwanre no-o. Avwanre guọnọ dia kerẹ eghene ọshare yena rọ sen uphẹn rọ vwọ ga Jihova je dia ọvo usun rẹ emọ rọyen, fikirẹ ekuakua rẹ akpeyeren evo-o!—Mak 10:17-22.

18. Ebruphiyọ vọ yen ihwo ri nyo upho ri Jihova cha riavwerhen rọyen bẹdẹ?

¹⁸ Ihwo ri nene irhi rẹ Ọghẹnẹ cha riavwerhen rẹ uphẹn rọ ma ghanre kparobọ, rọ dia uphẹn rẹ ayen vwo vwo ẹguọnọ rọyen ji vwẹ ẹga kẹ bẹdẹ! Ihwo re cha dia otọrakpọ na bẹdẹ che vwo uphẹn rẹ ayen vwọ vwẹrote otọrakpọ oyoyovwin nana rẹ Jihova nabọ rhuẹrẹ fia gbagba kẹ avwanre na. O rhe che kri-i, Uvie rẹ Ọghẹnẹ ko ru akpọ na vẹ obo rehẹ evun rọyen eje phiyọ ọkpokpọ. Jesu che phioba phiyọ ebẹnbẹn na eje rẹ Adam vẹ Ivi soro ọke rẹ ayen vwo vrẹn nẹ orua rẹ Ọghẹnẹ. Jihova cha kpare iduduru rẹ ihwo vrẹn, ọ me kẹ ayen uphẹn rẹ ayen vwọ dia bẹdẹ vẹ uvi rẹ omakpokpọ vwẹ otọrakpọ re ru phiyọ Iparadaisi na. (Luk 23:42, 43) Ihwo re ga Jihova vwo hirhephiyọ ihwo egbagba ye, jẹ ayen dje “urinrin vẹ ọghọ” rẹ Devid ta ota kpahen phia.—Une 8:5, NW.

19. Die yen ofori nẹ avwanre karophiyọ?

¹⁹ Wọ da dia ọvo usun rẹ “urogho rẹ ihwo buebu” na, wọ me mrẹvughe nẹ wo vwo uvi rẹ iphiẹrophiyọ. Ọghẹnẹ vwo ẹguọnọ wẹ; ọ guọnọre nẹ wọ dia ẹbẹre ọvo rẹ orua rọyen. Ọtiọyena, davwẹngba wẹn eje vwo ru obo rọ guọnọre. Karophiyọ ive ri Jihova ọkieje. Ni uphẹn ru wọ vwọ vwẹ ẹga kẹ Ọsẹ rẹ avwanre rọhẹ obo odjuvwu ghanghanre, ọtiọyen ji te iphiẹrophiyọ rẹ wọ vwọ vwẹ ẹga kẹ bẹdẹ!