1. Nuupuwelaka itthu sootheene Yehova opattunxaawe, nikoho heeni nneeraahu niikoheke?

NUUPUWELAKA wunnuwa wa elapo Yehova opattunxaawe, pooti weera hiyo nnimoonela moota nasalmu David oonenlaawe. Ekwaha emoha anvekela Yehova ni aamukoha “Vanwehexexaka sa wirimu, miteko sa ikatha sanyu, mweri ni itheneri mulipihalanyu’wo vano mutthu tani wera mmùpuwelele ni mwana Àdamu tani wera mmusamarye?” (Nsal. 8:4, 5 [8:3, 4 NM]) Ntoko Davidi, hiyo ninnuupuwelela moota nraahu ooyeva niilikanxera ni wunnuwa wa elapo. Nto mwaha wa yeeyo, hiyo ninnatikhina moota Yehova onnaakhulelaawe weerela empari emusi awe. Ntoko ninkelaahu woona Yehova khoiyono aawaakhulenle paahi atthu oopatxera Àdamu ni Heva weerela empari emusi awe, me owo tho onnawaakhulela atthu ootheene antthuna weerela empari emusi awe.

2. Muritti heeni Yehova aavanhaawe Àdamu ni Heva?

² Ádamu ni Heva yaari atthu oopatxera okhala valaponi tiithaahu Yehova a nsivelo aapattunxaawe. Yehova aatthuana weera yaayare anamwane esareye elapo ya vathi tiyeeyo yaamweerinhe Yehova waavaha muritti ola: “Muyaraneke ni mpuhuwihaneke, ni musarihe elapo.” (Eph. 1:28) Àdamu yaaheereke waayara anamwane ni okosoopa elapo. Waakhanle weera awo aamwiiwelela Muluku ni okwanihera muritti Yehova aavanhaawe, Àdamu ni osuulu aya yanvirelela weerela empari ya emusi ya Yehova mahuku ootheene.

3. Heeni ninhimaahu weera Àdamu ni Heva yaari atthu ootthuneya veemusini va Yehova?

³ Àdamu ni Heva yaari atthu ootthuneya veemusini va Yehova. Va Nsalmu 8:6, [8:5 NM] ni enoota, Davidi oothanli ettthu  yaamweerinhe Yehova waapaka atthu owo ohimme ha: “Momuyeviha yowo vakhani opwaha miluku, munwariha nampurutxi òvuwa ni ottittimiheya.” Ekhaikhai weera atthu khaakhalanne owera osuwela ni miteko waapwaha malaika. (Nsal. 103:20) Atthu “tooyevaxa” naalikanxera ni malaika, eyo ti yootikhiniha! Woopatxerani Yehova ahaavaha asitithihu ekumi yoohakalaliha!

4. Etthu heeni yooriipiha murima ekhumelenle mwaha woohiiwelela wa Àdamu ni Heva ni eheeni ninkelaahu woona mwa yoosomeene yeela?

 ⁴ Mooripiha murima, Àdamu yaayeleela weerela empari emusi ya Yehova. Ntoko ninkelaahu woona mwa yoosomeene yela, eyo yohaawiihera maxupo osuulu aya. Nnaamweera vareene hiiho yootthuana ya Yehova kheetxentxale. Mpaka olelova, Yehova ontthuna weera atthu oowiiwele ekhaleke mahuku ootheene. Mwa yoosomeene yeela, ninkela woona etthu Yehova opankaawe weera oonihere weera atthu tootthuneya vamaithoni vawe. Navinya vaavo, nnimoona etthu nintthuneyaahu opaka weera noonihere weera ninnatthuna weerela empari emusi ya Yehova. Omamaliheroni ninkela woona mareeliho atthu oowiiwelela eneereeya yaakhele valaponi mahuku ootheene.

5. Nnoonihere hayi mwaha wa Muluku woonipaka mwa eneneero awe?

⁵ Yehova onipattunxe mwa eneneero awe. (Eph. 1:26, 27) Hiyo atthu nipakiwe nlikanyihiwaka ni Muluku. Yehova oonivaha mukhalelo woolikanxa mikhalelo sawe woonihera makhalelo awo onnanikhavihera weerala empari emusi awe. Mwa ntakihero, nsivelo omoriwa ikharari, ororomeleya ni exariya. (Nsal. 86:15; 145:17) Niilipiheraka woonihera makhalelo awo, ninnamoonihera Yehova weera asantte mwaha woonipaka mwa eneneero awe. (1 Ped. 1:14-16) Ohiya eyo, ekumi ahu ennakhumela nnene ni enkhala yoohakalaliha

6. Itthu heeni Yehova opankaawe valaponi sinoonihera weera atthu tootthuneya?

⁶ Yehova oonipakela elapo yooreera. Ahinaakuve waapaka atthu oopatxera, Yehova aapaka elapo weera ekhalekemo atthu. (Yobi 38:4-6; Yer. 10:12) Mwaha wa nsivelo ni ovaha Yehova oraaweno, aahela itthu sintxipale seiyo seera sinihakalaliheke. (Nsal. 104:15, 16, 26 [104:14, 15, 24 NM]) Nto vaavo iitthuwalaawe weera uupuwele itthu soothesene aapattuxalaawe, “aahoona weera sootheene saari sooreera.” (Eph. 1:10, 12, 31) Ooniheraka weera atthu tootthuneya, Yehova aahaavaha owera weera “elamuleleke itthu soothesene” Yehova opattunxaawe valaponi. (Nsal. 8:7 [8:6 NM]) Yoolakela ya Muluku ti yooweera atthu ookwanela ehakalaleke ni ekosoopeke itthu soothesene sooreera Yehova opattunxaawe mahuku ootheene. Neereeke nyuwo munnaxukurela yoovaha yooreera Yehova oovanhaaweni?

7. Moovarihana ni Yehoxuwa 24:15, onoonihera hayi weera atthu aakhalano othanla?

⁷ Yehova oonivaha othanla. Hiyo pooti othanla itthu nintthunaahu opaka mweekumini mwahu. (Mmusomee Yehoxuwa 24:15.) Mukhalelo owo nivahiwaahu oneeriwa othanla mootaphuwa. Vaavo ninthanlaahu onvarela muteko Yehova, owo onnahakalala. (Nsal. 84:11; Mir. 27:11) Sookhala itthu sintxipale hiyo nintthuneyaahu othanla. Moone ntakihero Yesu onivanhaawe.

8. Ekwaha emoha Yesu oonihenre hayi othanala?

⁸ Nimutakihaka Yesu, hiyo pooti othanla ohela vahoolo sootthuna sa atthu akina opwaha sawihu. Ekwaha Yesu areene vamoha ni oohuseraawe yaakhulumuwa vantxipale, mwa yeeyo yaahaasaasa nipuro weera yiitthuuwe vakhaaniini mene eyo yaahootxeeleya. Atthu antxipale esuwelakaru yaamutthara mwaha weera yaatthuna oxuttihiwa niiyoowo. Yesu  khaanyoonyinwe ni awo, ohiya eyo, Yesu aahaamorela ikharari. Vano Yesu, oonihenre hayi othanla? “Ni apatxera wahusiha yawo sintxipale.” (Mar. 6:30-34) Hiyo pooti omutakihanha Yesu, hiyo pooti ovarela ehuhu ahu ni ikuru sahu weera naakhavihere atthu akina. Napaka eyo, nnonvuwiha tiithi ahu a wiirimu. (Math. 5:14-16) Nitho nnimoonihera weera ninnatthuna weerela empari emusi ya Yehova.

9. Asipaapa eheleke mwiitti eheeni?

⁹ Yehova ohaavaha atthu woowaayara anamwane ni muritti woowaaxuttiha omusivela ni onvarela yoowo. Nyuwo mwaareene paapa naari maaye, munnahela mwiitti eparakha ela yoowaayara anamwane? Ekhaikhai weera Yehova ohaavaha miteko sintxipale malaika mene khaavanhe eparakha yoowaayara anamwane. Asipaapa, muheleke mwiitti eparakha ela yoowaahuwa anamwane. ‘Waahuwa anamwane ni woowaalaka mwa aphiya,’ muritti woororomeleya asipaapa yaakhenlaaya muteko owo ti wootteela. (Aef. 6:4; Ola. 6:5-7; Nsal. 127:4 [127:3 NM]]) Weera ekhaviheriwe asipaapa mareherero a Yehova, aavaha ikaruma sinrweela mBiblyani ntoko ibuukhu, iviidiyu itxipo ni inyaha sa mwinterneetini. Eyo enoonihera weera Yehova ni mwanawe Yesu Kristu, annaahela mwiitti amiravo ahu. (Lu. 18:15-17) Wakhala weera asitiithi ennimuroromela Yehova ni enapaka ele enweraaya, weera yaahuwe anamwane aya, Yehova onnahakalala. Asipaapa awo ennaavaha eparakha anamwane aya yooweerela empari tho emusi ya Yehova mahuku ootheene!

10-11. Mwaha wa mukuttho, eparakha heeni Yehova aavanhaawe atthu?

¹⁰ Yehova oovaha ekumi yootthuneya ya mwanawe weera niwere weerela empari emusi awe. Ntoko nonnaahu  ettima 4, Àdamu ni Heva yaahiya weerela empari emusi ya Yehova, ni eyo yaaheereya ni osuulu aya. (Arom. 5:12) Àdamu ni Heva yaaphwanela ohiya opakela empari emusi ya Yehova mwaha weera yaarootthuna othanla ohimwiiwelela Muluku. Vanonto ankha osuulu aya? Yehova onnaasivela vantxipale atthu, avarelaka muteko mukuttho wa mwanawe Yesu kristu, ohaavaha eparakha atthu yaale ammwiiwelela. (Yoh. 3:16; Arom. 5:19) Mwaha wa mukuttho oliviwe ni mwaana oopatxera a Muluku, atthu oororomeleya amphiyera, 144,000 anoowera olamulela vamoha ni Yesu Kristu.—Arom. 8:15-17, Apok. 14:1.

¹¹ Ohiya atthu oothanliwa paahi, atthu antxipale oororomeleya anniilipihera opaka yootthuna ya Muluku olelo va. Awo annaweherera weerela empari emusi ya Muluku ovinreene weereriwa woomalihera mpuwa mwa iyaakha 1000. (Nsal. 25:14; Arom. 8:20, 21) Mwaha wookhalano yooweherera eyo, atthu antxipale, atthu enoowera omwiitthana Yehova okhala mpattuxaaya ni “Tiithaaya.” (Math. 6:9) Atthu eneera evinyererihiwe mparadizo, enookhalano eparakha yooxuttera woohima sa ele Yehova onwehereraawe wa yaawo. Yathanla ommwiiwelela Muluku, awo enoowera weerela empari emusi ya Yehova.

12. Nikoho heeni nneeraahu naakhule vaanaano?

¹² Ntoko nonnaahu, Yehova ohoonihera mikhalelo sintxipale weera atthu tootthuneyaxa, owo ohaathanla atthu enkela olamulela ni Yesu weera ekhale anamwane awe. Ni oovaha “muloko mutokotoko waatthu” eparakha yookhala anamwane a Muluku elapo enyowani. (Apok. 7:9) Vano nnipake heeni weera noonihere weera ninnatthuna weerela empari emusi ya Yehova mahuku ootheene? Nikoho nna nnimwaakhula vaanaano.

13. Nniipake heeni weera neerele empari emusi ya Muluku mahuku ootheene? (Mar. 12:30)

¹³ Munvarele Yehova muteko ni murimaanyu wootheene. (Mmusome Marko 12:30.) Ooniheraka oreera murima, Yehova ohaavaha atthu  itthu sintxipale. Etthu emoha onivanhaawe ori omukokhorela. Hiyo nnoowereya omoonihera weera ninnamusivela ‘naattharaka malamulo awe.’ (1 Yoh. 5:3) Uulumaka mwa nsina naatithawe,Yesu ooniruma waapaka atthareli ni waabatiza. (Math. 28:19) Owo tho oonivaha nlamulo noosivelana mukina ni mukhwaawe (Yoh. 13:35) Ale aniiwelela malamulo awo, anoowera weerela empari emusi ya Yehova mahuku ootheene.—Nsal. 15:1, 2.

14. Nnoonihere hayi weera ninnaasivela atthu akina? (Math. 9:36-38; Arom. 12:10)

¹⁴ Nwoonihere nsivelo atthu akina. Nsivelo mukhalelo Yehova okhalannaawe. (1 Yoh. 4:8) Yehova tonipatxenre onisivela nihinaakuve hiyo omusuwela. (1 Yoh. 4:9, 10) Hiyo pooti omutakiha Yehova naasivelaka atthu akina. (Aef. 5:1) Moota hiyo nneeraahu noonihere weera ninnaasivela atthu akina ori waakhavihera waaxuttiha woohima sa Yehova ehinaakuve omala elapo ela. (Mmusome Matheyo 9:36-38.) Napaka eyo nnimwaakhavihera waavaha eparakha yooweerela empari emusi ya Yehova. Hata mutthu aBatizinweene, hiyo pooti omoonihera nsivelo ni nttittimiho. (1 Yoh. 4:20, 21) Nimpaka hayi eyo? Ninnapaka eyo, vaavo hiyo nnaakhulaahu makoho awe naari neere ha, wakhala weera oopaka etthu ehinnisivela, khaninkela weera opanke ni muupuwelo woonanara. Opwaha mwa yeeyo, nimuttittimiheke munnihu nave nimooneke okhala vasulu onipwaha hiyo.—Mmusome Aroma 12:10; Afil. 2:3.

15. Taani nintthuneyaahu waamorela ikharari ni waareerela murima?

¹⁵ Mwaamoreleke ikharari ni mwaareereleke murima atthu ootheene. Naatthunaka okhala naale ekhalanne eparakha yoomweera Yehova Tiithi, ontthuneya ovarelaka muteko sootheene masu a Muluku anhimaaya. Mwa ntakihero, Yesu oonixuttiha weera naareereleke ni waamorela ikharari atthu ootheene mpaka amwiittanaahu. (Lu. 6:32-36) Hiyo pooti woona oxupa opaka eyo. Wakhala weera hiyo nnoonela hiiho, hiyo onnitthuneya oxuttera wuupuwela ni opaka ntoko Yesu. Naapakaka ele ninweraahu ni omutakiha Yesu, ninnamoonihera Tiithiihu a wiirimu weera ninnatthuna weerela empari emusi ya Yehova mahuku ootheene.

16. Ninkela okosoopa hayi emusi ya Yehova? Nvahe ntakihero.

¹⁶ Mukosoope makhalelo a emusi ya Yehova. Veemusini ennoonaneya weera mwaana mukhaanini onnimutakiha mwaana oopatxera oyariwa. Wakhala weera mwaana oopatxera oyariwa onnatthara miruku sa mBiblyani, owo onookhala ntakihero nooreera wa munnawe mukhaanini. Ni apatxera otthara itthu soonanara pooti weera onootthara ntakihero nawe. Etthu emoharu enneereya veemusini va Yehova. Muupuwele weera mukristu oororomeleya onnathatuwa anapatxera opaka itthu soonanara mweekumini mwawe ni etthu eyo pooti oweeriha atthu akina omutakiha. Mene nto atthu ampaka itthu mooteene hiiho annanariha emusi ya Yehova. (1 Ates. 4:3-8) Tiyeeyo nto ontthuneyaawe weera nisempeke otthara matakihero oonanara ni ohihiya matakihero awo weera enrakamelihe Tiithi ahu a wiirimu.

17. Itthu heeni nihintthuneyaahu ororomela ni mwaha wa heeni?

¹⁷ Mmuroromeleke Yehova ohiya mihakhu. Yehova ooniroromeliha weera napatxera waasaasa omwene ni omwiiwelela, owo onoonivaha yootxa, ikuwo soowara ni nipuro nookhala. (Nsal. 55:23; [55:22 NM] Math. 6:33) Nuupuwelaka eyo, nihiroromeleke weera itthu sa weerutthuni ntoko mihakhu elapo ela ennivahaaya, sinoonivaha ovareleleya ni ohakalala. Hiyo noosuwela, weera mukhalelo mmoha wookhalano murettele mmuupuweleloni ori opaka yootthuna ya Yehova. (Afil. 4:6, 7) Nnaamweera nikhalanneene owera woothuma itthu iyo, nuupuweleke waari weera nriki nikhalane ehuhu ikuru woovarela muteko itthu iyo. Neereke  hiyo atthu ninroromela mihakhu sahu? Nuupuweleke weera Yehova ontthuna weera nikhale atthu ankhavihera emusi awe. Eyo entthuna ohima weera nihihiye etthu naari mutthu aakanyeraka muupuwelo ahu. Hiyo khanintthuna okhala ntoko mmiravo yoole a ehuhu ya Yesu aakhontte eparakha yoonvarela Yehova ni okhala mmoha a anamwane awe—eyo yaakhumelenle mwaha wooweera owo sannamusivelaxa mihakhu!—Marko 10:17-22.

18. Iparakha heeni ni mareeliho atthu oowiiwelela ankelaaya waakhela?

¹⁸ Atthu ammwiiwelela Muluku anoophwanya mareeliho oohimala—omusivela ni omukokhorela Yehova mahuku ootheene! Ale ankela okhala elapo ya vathi, anoohakalala mwaha woohiyeriwa okosoopa elapo [eplaneta] yeeyo Yehova opattunxaawe weera ekhalekemo atthu. Moohipisa wapatxera olamulela Omwene wa Muluku elapo ni irutthu sahu sinoorehereriwa weera sikhale ntoko Yehova aatthunaawe woopatxerani. Yesu onkela omaliha maxupo ootheene ekumiheriwe ni Àdamu ni Heva mwaha woohiya weerela empari emusi ya Muluku. Nave-tho Yehova onkela ovinyereriha imilhau sinntxipale saatthu navetho awo enookhalano eparakha yookhala mahuku ootheene ni ekumi yooreera mparadiso. (Lu. 23:42, 43) Vaavo atthu oowiiwelela eneeraaya ekhale atthu oowiiwelela, wa yoole ori mutthu a yaawo onookhalano “ovuwa ni nttittimiho” ntoko olempaawe mwene Davidi.—Nsal. 8:5.

19. Vaavo musuwenlaanyu sootheseneiya yoowiithanlela anyu tiivi?

¹⁹ Wakhala weera nyuwo muneerela empari “muloko mutokotoko,” mookhalano yooweherera yooreera. Muluku onnoosivelani nyuwo ni ontthuna weera mweereleke empari emusi awe. Mwa yeeyo, mpakeke sootheene munwerelaanyu weera mmusiveliheke Muluku. Mukhaleke mahuku ootheene muupuwelaka soolaihera sa Muluku mmurimani mwanyu. Muxukureleke eparakha muraanyuno yoomukokhorela Tiithiinyu oosivela a wiirimu. Yooweherera mukhalannaanyu muheleke mwiitti!