1. Ano an bangin maipakiana naton kon ginhuhunahuna naton an ngatanan nga ginlarang ni Jehova?

KON ginhuhunahuna naton an haluag nga uniberso nga ginhimo ni Jehova, bangin abaton naton an pariho han inabat han salmista nga hi David, nga nag-ampo kan Jehova ngan nagsiring: “Kon akon nakikita an imo langit, an mga buhat han imo mga tudlo, an bulan ngan an mga bitoon nga imo ginhimo, ano ba an mortal nga tawo nga pirme mo hiya nahinunumdoman, ngan an anak han tawo nga imo hiya ginmamangnoan?” (Sal. 8:3, 4) Pariho kan David, bangin mahunahuna naton nga gutiay gud la kita kon ikompara ha mga bitoon nga ginhimo ni Jehova, ngan bangin mahipausa kita nga iya kita gintatagan hin atensyon. Pero sugad han aton mahibabaroan, waray la hi Jehova basta maghatag hin atensyon ha siyahan nga mga tawo nga hira Adan ngan Eva, kondi iya liwat hira ginhimo nga membro han iya pamilya.

2. Ano an katuyoan ni Jehova para ha iya siyahan nga mga anak ha tuna?

² Hira Adan ngan Eva an siyahan nga mga anak ni Jehova dinhi ha tuna, ngan hi Jehova an ira mahigugmaon nga Amay ha langit. Gintagan niya ini nga mag-asawa hin buruhaton. An Dios nagsiring ha ira: “Manganak ngan magdamu kamo, pun-on niyo an tuna ngan kultibara ito.” (Gen. 1:28) Karuyag niya nga magkaada hira mga anak ngan atamanon an tuna. Kon nagsunod ngan nagkooperar la unta hira Adan ngan Eva ha katuyoan ni Jehova para ha ira, nagpabilin unta hira nga membro han pamilya han Dios ha kadayonan pati an ira mga anak.

3. Kay ano nga masisiring naton nga hira Adan ngan Eva importante gud nga membro han pamilya ni Jehova?

³ Hira Adan ngan Eva importante gud nga membro han pamilya ni Jehova. Sugad han nakarekord ha Salmo 8:5 ngan ha footnote, hi David nagsiring mahitungod ha ginhimo ni Jehova nga tawo: “Ginhimo mo hiya nga uroubos la hin gutiay ha mga anghel, ngan ginkoronahan mo hiya hin himaya ngan dungog.” Oo, waray tagi ni Jehova an tawo hin gahum, kabaltok, ngan abilidad nga pariho han  kanan anghel. (Sal. 103:20) Pero an tawo “uroubos la hin gutiay” kay ha gamhanan nga mga anghel. Hunahunaa la ito! Gintagan ni Jehova an aton siyahan nga mga kag-anak hin maopay gud nga kinabuhi.

4. Ano an nahitabo han gintalapas nira Adan ngan Eva hi Jehova, ngan ano an aton hihisgotan hini nga artikulo?

 ⁴ Makasurubo, tungod kay gintalapas nira Adan ngan Eva hi Jehova, waray na hira magin membro han iya pamilya. Nagkaada ito maraot gud nga mga resulta ha ira mga tulin, sugad han aton mahibabaroan hini nga artikulo. Pero waray magbag-o an katuyoan ni Jehova. Karuyag niya nga an masinugtanon nga mga tawo magin iya mga anak ha kadayonan. Siyahan, hisgotan naton kon paonan-o kita ginpapasidunggan ni Jehova. Sunod, hihisgotan naton kon ano an mahimo naton buhaton yana basi maipakita naton nga karuyag naton magin membro han pamilya han Dios. Katapos, hihisgotan naton an mga bendisyon nga mapapahimulosan ha kadayonan han mga anak ni Jehova dinhi ha tuna.

5. Paonan-o naton maipapakita nga mapasalamaton kita ha Dios tungod kay ginhimo kita niya uyon ha iya dagway?

⁵ Ginpasidunggan kita ni Jehova pinaagi ha paghimoa ha aton uyon ha iya dagway. (Gen. 1:26, 27) Tungod kay ginlarang kita uyon ha dagway han Dios, mahimo naton makultibar ngan maipakita an damu han iya mag-opay nga kalidad sugad han gugma, pagpaid, pagkamaunungon, ngan pagkamatadong. (Sal. 86:15; 145:17) Kon ginkukultibar naton an sugad nga mga kalidad, ginpapasidunggan naton hi Jehova ngan iginpapakita naton nga mapasalamaton kita ha iya. (1 Ped. 1:14-16) Kon nagawi kita ha paagi nga nakakapalipay ha aton langitnon nga Amay, malipayon kita. Ngan tungod kay ginhimo kita ni Jehova uyon ha iya dagway, may abilidad kita nga magkaada han personalidad nga karuyag niya para ha mga membro han iya pamilya.

6. Paonan-o ginpasidunggan ni Jehova an mga tawo han gin-andam niya an tuna?

⁶ Nag-andam hi Jehova hin espesyal nga urukyan para ha aton. Maiha pa antes larangon ni Jehova an siyahan nga tawo, igin-andam na niya an tuna para ha mga tawo. (Job 38:4-6; Jer. 10:12) Tungod kay buotan ngan mahinatagon hiya, naghimo hiya hin damu gud nga mag-opay nga butang para magin malipayon kita. (Sal. 104:14, 15, 24) May mga panahon hadto nga ginhunahuna ni Jehova an iya mga linarang, ngan ‘nakita niya nga maopay ito.’ (Gen. 1:10, 12, 31) Iya ginpasidunggan an mga tawo pinaagi ha pagsugo ha ira nga ‘mandoan’ an ngatanan niya nga mag-opay nga linarang dinhi ha tuna. (Sal. 8:6) Katuyoan han Dios nga an perpekto nga mga tawo magin malipayon ha pag-ataman hito nga iya mag-opay nga mga linarang ha kadayonan. Pirme mo ba ginpapasalamatan hi Jehova hiton maopay nga saad?

7. Paonan-o iginpapakita han Josue 24:15 nga an tawo may kagawasan ha pagbuot?

⁷ Gintagan kita ni Jehova han regalo nga kagawasan ha pagbuot. Makakapili kita kon ano an aton bubuhaton ha aton kinabuhi. (Basaha an Josue 24:15.) An aton abilidad ha pagpili gintatawag nga kagawasan ha pagbuot. Nalilipay an aton mahigugmaon nga Dios kon ginpipili naton nga mag-alagad ha iya. (Sal. 84:11; Prob. 27:11) Magagamit naton an aton kagawasan ha pagbuot ha paghimo hin damu pa nga mag-opay nga desisyon. Tagda an susbaranan ni Jesus.

8. Paghatag hin ehemplo kon paonan-o gin-gamit ni Jesus an iya abilidad ha pagpili.

⁸ Pariho kan Jesus, mahimo naton pilion nga unahon an kaopayan han iba kay han aton kaopayan. Makausa, han kapoy gud hi Jesus ngan an iya mga apostol, nagkadto hira ha mamingaw nga lugar basi pumahuway unta. Pero diri ito an nahitabo. Nabilngan hira han damu nga tawo, ngan karuyag gud hito nga mga tawo nga tutdoan hira ni Jesus. Pero waray maaringit hi Jesus. Lugod, nalooy hiya ha ira. Salit ano an iya ginbuhat? “Nagtikang hiya pagtutdo ha ira hin damu nga butang.” (Mar. 6:30-34) Kon ginsusubad naton hi Jesus  pinaagi han paggamit han aton panahon ngan kusog ha pagbulig ha iba, nahihimaya naton an aton langitnon nga Amay. (Mat. 5:14-16) Iginpapakita liwat naton kan Jehova nga karuyag naton magin parte han iya pamilya.

9. Ano nga espesyal nga regalo an iginhatag ni Jehova ha mga tawo?

⁹ Gintagan ni Jehova an mga tawo hin abilidad nga magkaada mga anak, sugad man han responsabilidad nga tutdoan hira nga higugmaon ngan mag-alagad ha iya. Kon usa ka nga kag-anak, gin-aapresyar mo ba inin espesyal nga regalo? Bisan kon gintagan ni Jehova an mga anghel hin damu nga mag-opay nga abilidad, waray niya hira tagi hini nga pribilehiyo. Salit kinahanglan magin mapasalamaton an mga kag-anak ha ira pribilehiyo nga magpadaku hin mga anak. An mga kag-anak gintagan hin importante nga responsabilidad nga padakuon an ira mga anak ha “disiplina ngan sagdon ni Jehova.” (Efe. 6:4; Deut. 6:5-7; Sal. 127:3) Basi mabuligan an mga kag-anak, nagtatagana an organisasyon han Dios hin damu nga garamiton nga basado ha Biblia, sugad han mga publikasyon, video, musika, ngan mga artikulo ha aton website. Klaro, hinigugma gud han aton langitnon nga Amay ngan han iya Anak an mga kabataan. (Luc. 18:15-17) Kon an mga kag-anak nasarig kan Jehova ngan ginbubuhat nira an ira pinakamaopay ha pag-ataman han ira presyoso nga mga anak, nalilipay hi Jehova. Ngan ginbubuligan liwat han sugad nga mga kag-anak an ira mga anak nga magkaada paglaom nga magin membro han pamilya ni Jehova ha kadayonan!

10-11. Ano an nagin posible para ha aton tungod han igintagana ni Jehova nga lukat?

¹⁰ Iginhatag ni Jehova an iya pinakapresyoso nga Anak basi magin membro kita utro han iya pamilya. Sugad han ginsiring ha  parapo 4, tungod han pakasala nira Adan ngan Eva, waray na hira magin membro han pamilya ni Jehova pati an ira mga anak. (Roma 5:12) Tinuyo nga nagtalapas hira Adan ngan Eva ha Dios, salit angayan la nga paiwason niya hira ha iya pamilya. Pero kumusta man an ira mga tulin? Tungod han gugma ni Jehova, may ginhimo hiya basi maampon niya an masinugtanon nga mga tawo. Ginbuhat niya ito pinaagi han halad han iya bugtong nga Anak nga hi Jesu-Kristo. (Juan 3:16; Roma 5:19) Tungod han halad ni Jesus, 144,000 nga matinumanon nga mga tawo an gin-ampon sugad nga mga anak han Dios.​—Roma 8:15-17; Pah. 14:1.

¹¹ Dugang pa, minilyon liwat nga matinumanon nga mga tawo an masinugtanon nga nagbubuhat han kaburut-on han Dios. May paglaom hira nga magin bug-os na nga membro han pamilya han Dios kahuman han ultimo nga pagsari ha kataposan han Milenyo. (Sal. 25:14; Roma 8:20, 21) Tungod kay may-ada hira hito nga paglaom, gintatawag na nira yana nga “Amay” hi Jehova nga ira Maglalarang. (Mat. 6:9) An mga babanhawon liwat tatagan hin oportunidad nga mahibaro kon ano an ginlalaoman ha ira ni Jehova. Adton masunod han iya giya magigin membro liwat han iya pamilya.

12. Ano nga pakiana an aton yana babatunon?

¹² Sugad han aton nahibaroan, damu na an mag-opay nga ginhimo ni Jehova basi pasidunggan an mga tawo. Gin-ampon na niya sugad nga iya mga anak an mga dinihogan. Ngan an mga kaapi han “daku nga grupo” gintagan niya hin paglaom nga magin iya mga anak ha bag-o nga kalibotan. (Pah. 7:9) Ano an mahimo naton buhaton yana basi maipakita naton kan Jehova nga karuyag naton magin membro han iya pamilya ha kadayonan?

13. Ano an mahimo naton buhaton basi magin membro kita han pamilya han Dios? (Marcos 12:30)

¹³ Ipakita an imo gugma kan Jehova pinaagi ha pag-alagad ha iya ha imo bug-os nga kasingkasing. (Basaha an Marcos 12:30.) Ha ngatanan nga butang nga may pagkabuotan nga iginhatag ha aton han Dios, an usa han pinakamaopay nga regalo amo an aton abilidad nga singbahon hiya. Iginpapakita naton kan Jehova nga hinigugma naton hiya kon ‘gintutuman naton an iya mga sugo.’  (1 Juan 5:3) Usa han mga sugo nga karuyag ni Jehova nga sundon naton amo an sugo ha aton ni Jesus nga manhimo hin disipulo ngan bawtismohan hira. (Mat. 28:19) Ginsugo liwat kita niya nga higugmaon an usa kag usa. (Juan 13:35) Kakarawaton ni Jehova an mga masinugtanon nga magin bahin han pamilya han iya mga magsiringba ha bug-os nga kalibotan.​—Sal. 15:1, 2.

14. Paonan-o naton maipapakita an gugma ha iba? (Mateo 9:36-38; Roma 12:10)

¹⁴ Pagpakita hin gugma ha iba. Gugma an nangunguna nga kalidad ni Jehova. (1 Juan 4:8) Nagpakita na hi Jehova ha aton hin gugma antes pa naton hiya makilala. (1 Juan 4:9, 10) Ginsusubad naton hiya kon nagpapakita kita hin gugma ha iba. (Efe. 5:1) Usa han pinakamaopay nga paagi nga maipapakita naton an gugma ha mga tawo amo an pagbulig ha ira nga mahibaro mahitungod kan Jehova samtang may panahon pa. (Basaha an Mateo 9:36-38.) Kon ginbubuhat naton ito, gintatagan naton hira hin oportunidad nga magin membro han pamilya han Dios. Kon mabawtismohan na an usa, kinahanglan padayon naton hiya nga higugmaon ngan respetuhon. (1 Juan 4:20, 21) Paonan-o naton ito ginhihimo? An usa nga paagi amo an pagsarig nga may maopay hiya nga mga motibo. Pananglitan, kon may ginhimo hiya nga diri naton naiintindihan, diri kita maghuhunahuna nga ginbuhat niya ito tungod han maraot o makikalugaringon nga mga motibo. Lugod, papasidunggan naton an aton bugto ngan huhunahunaon nga mas labaw hiya kay ha aton.​—Basaha an Roma 12:10; Fil. 2:3.

15. Kan kanay kita angay magpakita hin kalooy ngan pagkabuotan?

¹⁵ Pagpakita hin kalooy ngan pagkabuotan ha ngatanan nga tawo. Kon karuyag naton magin kaapi hadton angayan tumawag kan Jehova nga ira Amay ha kadayonan, kinahanglan iaplikar naton an Pulong han Dios ha aton kinabuhi. Pananglitan, nagtutdo hi Jesus nga kinahanglan magpakita kita hin kalooy ngan pagkabuotan ha ngatanan nga tawo, bisan ha aton mga kaaway. (Luc. 6:32-36) Usahay, bangin nakukurian kita ha pagbuhat hito. Kon amo, kinahanglan pangalimbasogan naton nga an aton panhunahuna ngan panggios magin pariho han kan Jesus. Kon ginhihimo naton an aton pinakamaopay basi sundon hi Jehova ngan subaron hi Jesus, iginpapakita naton ha aton langitnon nga Amay nga karuyag naton magin membro han iya pamilya ha kadayonan.

16. Paonan-o naton mapuproteksyonan an reputasyon han pamilya ni Jehova?

¹⁶ Proteksyuni an reputasyon han pamilya ni Jehova. Ha usa nga literal nga pamilya, kaurogan na nga ginsusubad han manghod an iya magurang nga bugto. Kon gin-aaplikar han magurang an mga prinsipyo han Biblia, magigin maopay hiya nga ehemplo ha iya manghod. Kon an magurang magbuhat hin maraot, bangin subaron han iya manghod an iya maraot nga ehemplo. Sugad liwat hito ha pamilya ni Jehova. Kon an usa nga matinumanon hadto nga Kristiano nagin apostata o nagkaada imoral o maraot nga pagkinabuhi, an iba bangin masulay nga subaron hiya. Adton mga nagbubuhat hito, nagdadaot han reputasyon han pamilya han mga magsiringba ni Jehova. (1 Tes. 4:3-8) Kinahanglan diri kita magsubad ha maraot nga mga ehemplo, ngan diri naton pabay-an nga madaot han bisan ano an aton relasyon ha aton mahigugmaon nga Amay ha langit.

17. Ano nga klase hin panhunahuna an kinahanglan naton likyan, ngan kay ano?

¹⁷ Sarig kan Jehova imbes ha materyal nga mga butang. Nagsasaad hi Jehova nga tataganahan kita niya hin pagkaon, bado, ngan urukyan kon uunahon naton an iya Ginhadian ngan magkikinabuhi kita uyon ha iya matadong nga mga suruklan. (Sal. 55:22; Mat. 6:33) Kon nasarig kita hito nga saad, diri naton huhunahunaon nga an materyal nga mga butang hini nga kalibotan maghahatag ha aton hin seguridad ngan nagpapadayon nga kalipay. Maaram kita nga an paagi la basi magkaada kita tinuod nga kamurayawan ha hunahuna amo an pagbuhat han kaburut-on ni Jehova. (Fil. 4:6, 7) Bisan kon kaya ta pumalit hin damu nga butang,  kinahanglan hunahunaon naton kon may-ada gud ba kita panahon o kusog ha paggamit ngan pagmintinar hito. Posible ba nga hinigugma na gud naton an aton mga panag-iya? Kinahanglan hinumdoman naton nga sugad nga membro han pamilya han Dios, naglalaom hiya nga magigin maduruto kita ha buruhaton nga iya iginhatag ha aton. Karuyag sidngon, diri naton angay tugotan an bisan ano nga makagwara han aton pokus. Diri gud naton karuyag magin pariho ha batan-on nga lalaki nga waray kumarawat han oportunidad nga mag-alagad kan Jehova ngan han paglaom nga maampon sugad nga usa han iya mga anak​—tungod la kay hinigugma na niya an iya materyal nga mga panag-iya!​—Mar. 10:17-22.

18. Ano nga daku nga kadungganan ngan mga bendisyon an mapapahimulsan ha kadayonan han masinugtanon nga mga tawo?

¹⁸ Mapapahimulsan han masinugtanon nga mga tawo an pinakadaku nga kadungganan​—an pribilehiyo nga higugmaon ngan singbahon hi Jehova ha kadayonan! Adton may tunan-on nga paglaom malilipay liwat ha pag-ataman hinin maopay nga planeta nga ginhimo ni Jehova basi magin perpekto nira nga urukyan. Diri na mag-iiha, an tuna ngan an ngatanan nga aada hito magigin maopay utro ilarom han pagmando han Ginhadian. Susolusyonan ni Jesus an ngatanan nga problema nga resulta han desisyon nira Adan ngan Eva nga bumaya ha pamilya han Dios. Babanhawon ni Jehova an minilyon, ngan tatagan hira hin oportunidad nga mabuhi ha waray kataposan nga may perpekto nga kahimsog dinhi ha tuna nga usa na nga paraiso. (Luc. 23:42, 43) Kon magin perpekto na an tunan-on nga bahin han pamilya han mga magsiringba ni Jehova, maipapakita na han kada tagsa an “himaya ngan dungog” nga ginsiring ni David.​—Sal. 8:5.

19. Ano an kinahanglan naton hinumdoman pirme?

¹⁹ Kon kaapi ka ha “daku nga grupo,” may makalilipay ka nga paglaom. Hinigugma ka han Dios; karuyag niya nga magin membro ka han iya pamilya. Salit himoa an imo bug-os nga makakaya basi mapalipay hiya. Pagkinabuhi kada adlaw nga gintitipigan ha imo hunahuna ngan kasingkasing an mga saad han Dios. Apresyara an imo pribilehiyo nga singbahon an aton hinigugma nga langitnon nga Amay, ngan pabilhi an paglaom nga dayawon hiya ha kadayonan!