1. Ino aby fan̈ontanian̈a mety handalo amy jerintsika, atsika koa fa mandiniky raha jiaby niasainy Jehovah?

ATSIKA koa fa mandiniky raha jiaby niasainy Jehovah, mitovy amy raha nikoran̈iny Davida panoratra Salamo raha tsapantsika. Karaha ty ho izy koa fa nivavaka tamy Jehovah: ‘Zaho koa fa mahita lan̈itrinao sady asany tan̈ananao, baka io fanjava ndreky iro lakintan̈a namboarinao aby io, ino ma zahay olombelon̈o mety maty ke ho tsaroanao? Ino ma zahay zanakolombelon̈o ke ho karakarainao?’ (Sal. 8:3, 4) Karaha nataony Davida, mety hieritreritry atsika fa tsisy kontiny foeky atsika izikoa ampiran̈iny amy lakintan̈a niasainy Jehovah. Kanefa ny raha mahagaga, mbala mikarakara atsika fo izy. Ho hitantsika ato fa Jehovah tsy vitany nikararaka Adama ndreky Eva, olombelon̈o voanalohany niasainy fo fa, nikonteny ho an̈isany fianakavian̈anany koa iro.

2. Tiany Jehovah han̈ino ma Adama ndreky Eva?

² Adama ndreky Eva zanakany Jehovah tambony tany teto voanalohany. Jehovah Babandro ten̈a tia iro. Tiany Jehovah iro hiteraka ndreky hikarakara tany ty. Ke ho izy tamindro: ‘Manàn̈a taranaka, baka io irarian̈a anaro ho maro ke hameno tany ty ndreky hanjaka aminizity.’ (Gen. 1:28) Izikoa iro nan̈araka volan̈any Jehovah, ôtrizay iro ndreky taranakandro jiaby mbala an̈isany fianakavian̈a Jehovah fo mandrakizay.

3. Nan̈ino atsika mivolan̈a fa namezany Jehovah voninahitry i Adama ndreky Eva?

³ Namezany Jehovah voninahitry i Adama ndreky Eva. Mankamarin̈y zen̈y raha volan̈iny Salamo 8:5 ndreky lamariky amy pazy ambany aminy andininy io. Karaha ty nambarany Davida amizio ao mikasiky fomba nan̈amboarany Jehovah olombelon̈o: ‘Izy [olombelon̈o] efa nataonao ambanimbany helindro anjely aby io, sady efa namezanao voninahitry.’ Marin̈y ndraiky  fa olombelon̈o tsy miran̈a aminy anjely, na amy resaka angovo zen̈y, na fahaizan̈a, na raha mety ho vita. (Sal. 103:20) Kanefa, nataony Jehovah ‘ambanimbany helindro’ anjely mahery aby io fo olombelon̈o. Miniminia hely baka ty! Jehovah koa fa niasa Adama ndreky Eva, namezany fiain̈ana tsara mare iro.

4. Nan̈ano akory Adama ndreky Eva koa fa tsy nan̈araka volan̈any Jehovah? Ino aby raha hidinihintsika ato?

 ⁴ Nampalahelo fa Adama ndreky Eva tsy nan̈araka volan̈any Jehovah, ke nanjary tsy an̈isany fianakavian̈anany eky iro. Mbala hidinihintsika ato fa nisy vokany ratsy mare tamy taranakandro raha zen̈y. Fa nahatsara izy, fikasan̈any Jehovah tsy niova. Mbala tiany hanjary zanakanany mandrakizay fo olombelon̈o. Voanalohany, hizahavantsika akory nataony Jehovah nan̈amia voninahitry atsika. Ho hitantsika koa ino raha mila ataontsika rango izioty, izikoa atsika tiho an̈isany fianakavian̈any Jehovah. Farany, hikoran̈intsika ato koa hatsaran̈a ho azonolo an̈isany fianakavian̈any Jehovah, lera iro hiain̈y mandrakizay ambony tany.

5. Akory an̈aboahantsika fa mankasitraka Jehovah atsika nohony atsika namiany toetry miran̈a amy ninany?

⁵ Jehovah koa fa niasa atsika, nataony manan̈a toetry miran̈a amy ninany atsika. (Gen. 1:26, 27) Jehovah baka be fitiavan̈a, mahay mahinakinaka, tsy mivadiky baka io tia rariny. Atsika nataony mahavita mangala tahaka toetrinany aby zen̈y. (Sal. 86:15; 145:17) Man̈amia voninahitry Jehovah atsika izikoa mifen̈y hanan̈a toetry aby io. Zen̈y koa fomba an̈aboahantsika fa mankasitraka izy atsika. (1 Pet. 1:14-16) Izikoa atsika man̈ano raha mamparavoravo Babantsika andan̈itry an̈y, atsika ho sambatra avio ho afapô amy fiain̈ana. Atsika lastio nataony Jehovah manan̈a toetry miran̈a amy ninany, amy zay atsika afaka manan̈a toetrinolo tiany ho an̈isany fianakavian̈anany.

6. Izikoa dinihin̈y fomba niasany Jehovah tany, akory nan̈amezany voninahitry olombelon̈o?

⁶ Ten̈a miavaka fomba niasany Jehovah tany ty. Tsendriky honohono niasa olombelon̈o izy, efa noman̈iny tany ty hipitrahanolo. (Joba 38:4-6; Jer. 10:12) Tsara fan̈ahy sady tsy matity i Jehovah, ke niasa raha maro tsara izy, baka atsika ho sambatra. (Sal. 104:14, 15, 24) Jehovah koa fa nandiniky raha namboariny, hitany fa ‘ten̈a tsara raha zen̈y.’ (Gen. 1:10, 12, 31) Namezany Jehovah voninahitry olombelon̈o taminizy nan̈iraka iro “hanjaka” amy raha tsara jiaby niasainy, ndreky hikarakara izio. (Sal. 8:6) Tiany Jehovah ho ravoravo han̈ano zen̈y fo olombelon̈o lavorary, mandrakizay. Matetiky ma anao man̈ano mersy Jehovah nohony fampan̈antinan̈a tsarabe nataony zen̈y?

7. Izikoa zahan̈a Josoa 24:15, akory ahitan̈a fa manan̈a safidy malalaka atsika olombelon̈o?

⁷ Namezany Jehovah safidy malalaka atsika. Atsika afaka mifidy raha tiantsika hatao amy fiain̈ana. (Vakia Josoa 24:15.) Ravoravo Zan̈aharintsika be fitiavan̈a io izikoa atsika mifidy hanompo izy. (Sal. 84:11; Ohab. 27:11) Fan̈ampinizen̈y, mbala maro fomba mety hampiasantsika safidy malalaka namian̈a atsika. Alô zahavantsika akory nataony Jesosy nampiasa safidinany.

8. Akory nataony Jesosy nampiasa safidy malalaka nanan̈any?

⁸ Nieritreritry raha mahatsara olo fo i Jesosy alohany ninany. Tandraraiky, Jesosy ndreky apostolinany aby io kajo mare, ke iro nitady tany mangin̈y mety nangalan̈a kajo. Natao ndraiky, hitandro vahoaka aby io tany nisy iro ke tsy nahavita nangala kajo foeky iro. Fa Jesosy tsy nahinihiny. Ndray izy aby nahinakinaka iro! Ke “izy nanomboko nampianatra iro raha maro.” (Mar. 6:30-34) Mangala  tahaka raha nataony Jesosy atsika, izikoa mahafoe fotoan̈a ndreky angovo han̈ampian̈a olo. Man̈amia voninahitry Babantsika andan̈itry an̈y atsika izikoa man̈ano zen̈y. (Mat. 5:14-16) Zen̈y koa fomba an̈aboahantsika amy Jehovah fa atsika tiho an̈isany fianakavian̈anany.

9. Ino ma raha tsy tokony hadin̈any raimandreny?

⁹ Nataony Jehovah afaka miteraka olombelon̈o, avio raimandreny nan̈ankin̈any andraikitry hampianatra zanakanandro ho tia izy ndreky hanompo izy. Raimandreny ma anao? Asa anao mba mankasitraka kadô ten̈a miavaka baka amy Jehovah io? Miniminia hely baka ty: Maro raha mahagaga vitandro anjely aby io, kanefa iro tsy nataony Jehovah afaka miteraka na mitaiza. Ke izikoa anao mananjanaka, ankasitraha tombontsoa be zen̈y. Aza adin̈a fa matoa anao nan̈ankin̈any Jehovah andraikitry masin̈y hitarimy zanakanao ‘mifan̈araka amy fan̈anaran̈a ndreky fisain̈ananany’, dikanizen̈y, anao atokisany. (Efes. 6:4; Deot. 6:5-7; Sal. 127:3) Maro fitaovan̈a efa naboakany fandaminan̈a natao han̈ampian̈a raimandreny. An̈isanizen̈y boky, video, lamoziky, ndreky lahatsoratra amy jw.org. Hita baka amy zen̈y fa ten̈a tiany Jehovah ndreky Jesosy iro zanakantsika aby io. (Lioka 18:15-17) Ho ravoravo mare Jehovah izikoa raimandreny mitavandra izy sady man̈ano erakany farany tsara vitandro hikarakaran̈a zanakandro. Hahavita han̈ampy zanakandro hanjary ho an̈isany fianakavian̈any Jehovah mandrakizay koa iro, izikoa man̈ano zen̈y.

10-11. Ino aby raha nanjary pôsibla baka amy soron̈o nataony Jesosy?

¹⁰ Namezany Jehovah atsika i Jesosy, Zanany ten̈a tiany, amy zen̈y atsika mety hanjary fianakavian̈anany ndraiky. Efa hitantsika tamy  fehintsoratra faha-4 fa Adama ndreky Eva koa fa nanota, iro nanjary tsy an̈isany fianakavian̈any Jehovah eky. (Rom. 5:12) Rariny iro koa tsy nikeny Jehovah ho zanany eky, fotony iro kinia tsy nan̈araka volan̈any Jehovah. Akory ndraiky taranakandro? Jehovah ten̈a tia olombelon̈o, ke nataony soron̈o i Jesosy Kristy, Zanany lahy tokan̈a, baka lan̈iany olo man̈araka volan̈any Jehovah hanjary ho an̈isany fianakavian̈anany ndraiky. (Jaona 3:16; Rom. 5:19) Baka amy soron̈o io koa mahavy olo tsy mivadiky 144 000 atsangany Jehovah ho zanany.​—Rom. 8:15-17; Apok. 14:1.

¹¹ Antapitrisany olo tsy mivadiky mifen̈y man̈araka volan̈any Jehovah ndreky man̈ano sitraponany. Iro io man̈anten̈a ho an̈isany fianakavian̈any Jehovah, afarany fitsapan̈a farany, amy farany arivo taon̈o. (Sal. 25:14; Rom. 8:20, 21) Zen̈y koa mahavy iro mikaiky Jehovah, Zan̈ahary Pamôron̈o io: “Baba.” (Mat. 6:9) Ho afaka hianatra momba raha takiany Jehovah amindro koa iro olo hatsangana amy maty aby io. Ke lan̈iany mifidy han̈araka volan̈any Jehovah, hanjary ho an̈isany fianakavian̈anany koa.

12. Ino fan̈ontanian̈a handeha hivaliantsika iziô?

¹² Hitantsika tio fa maro fomba han̈amezany Jehovah voninahitry atsika olombelon̈o. Efa natsangany ho zanany iro voahosotro aby io. Nampan̈anten̈a koa Jehovah fa hanjary zanany koa iro olo an̈isany “vahoaka be” aby io, amy donia vaovao. (Apok. 7:9) Ino raha mety hataontsika rango izioty, han̈aboahan̈a fa atsika tiho an̈isany fianakavian̈any Jehovah mandrakizay?

13. Ino raha mila ataontsika izikoa tiantsika hanjary ho an̈isany fianakavian̈any Jehovah? (Marka 12:30)

¹³ Aboaha fa anao tia Jehovah, ke manompoa izy amy fô jiaby. (Vakia Marka 12:30.) Tsara fan̈ahy amintsika Jehovah ke maro kadô namezany atsika. Fa ny farany tsara amindro jiaby zen̈y donko, lay atsika afaka manompo izy.  Aboakantsika fa tia izy atsika izikoa “mitandrin̈y didinany.” (1 Jaona 5:3) Man̈ano zen̈y atsika, izikoa man̈araka bekony Jesosy man̈iraka atsika hampianatra olo ndreky han̈ano batisa. (Mat. 28:19) Jesosy koa nan̈iraka atsika hifankatia. (Jaona 13:35) Hikeny Jehovah ho an̈isany fianakavian̈anany zay olo man̈araka volan̈anany.​—Sal. 15:1, 2.

14. Akory han̈aboahantsika fa atsika tia olo? (Matio 9:36-38; Romanina 12:10)

¹⁴ Aboaha fa anao tia olo. Fitiavan̈a toetriny Jehovah farany maventy. (1 Jaona 4:8) Atsika tsendriky honohono hahay Jehovah, izy efa tia atsika edy. (1 Jaona 4:9, 10) Mangala tahaka izy atsika izikoa tia olo. (Efes. 5:1) Araiky amy fomba ten̈a tsara mety han̈anaovantsika zen̈y, man̈ampy olo hahay raha momba Jehovah. Iziô fotoan̈a mbala mety han̈anaovan̈a zen̈y. (Vakia Matio 9:36-38.) Izikoa atsika man̈ano zen̈y, ho haindro raha mila ataondro izikoa iro tiho an̈isany fianakavian̈any Jehovah. Avio ndray efa vita batisa olo araiky, atsika mbala mila tia izy ndreky man̈aja izy fo. (1 Jaona 4:20, 21) Akory han̈anaovantsika zen̈y? Atsika mila matoky izy. Izikoa tsy mazava amintsika antony mahavy izy man̈ano raha araiky, atsika tsy tokony hieritreritry fa izy manan̈a fô ratsy. Mifanohitry amy zen̈y, atsika tokony han̈amia voninahitry piaramanompo amintsika io fo, ke hihevitry izy ho an̈abo mandilatra ain̈intsika.​—Vakia Romanina 12:10; Fil. 2:3.

15. Aminjovy aby atsika tokony hamindra fô ndreky ho tsara fan̈ahy?

¹⁵ Aboaha fa anao mamindra fô ndreky tsara fan̈ahy aminolo jiaby. Izikoa tiantsika ho an̈isany fianakavian̈any Jehovah fo mandrakizay, mila arehantsika raha nianarantsika tamy Volan̈a Zan̈ahary. Jesosy nampianatra fa atsika mila mamindra fô ndreky tsara fan̈ahy aminolo jiaby, firaka amy fahavalontsika. (Lioka 6:32-36) Mety tsy ho mora amintsika han̈ano zen̈y ndraikindraiky. Fa mila miezaka fo atsika hanan̈a toetsain̈y miran̈a amy niny Jesosy ndreky mianatra fomba fan̈anaovany raha. Atsika koa mifen̈y fo man̈araka volan̈any Jehovah ndreky mangala tahaka Jesosy, ho hitany Jehovah fa atsika tiho an̈isany fianakavian̈anany mandrakizay.

16. Akory mety hiarovantsika lazany fianakavian̈any Jehovah?

¹⁶ Atsika mila miaro lazany fianakavian̈any Jehovah. Matetiky, farandraha tiany tsaiky lelahy hely eky mangala tahaka raha ataony zôky lahiny. Izikoa araiky zôky man̈araka fitsipikiny Zan̈ahary, hanjary modely tsara arehany zandriny edy izy. Fa araiky zôky io ndraiky koa man̈ano raha ratsy, mety hangala tahaka raha ataony edy zandriny. Karaha zen̈y koa amy fianakavian̈any Jehovah. Ino iziô raha mety ho hisy izikoa misy Kristianin̈y araiky tsy nivadiky tan̈atiny taon̈otaon̈o, nanjary pivadipinoan̈a na maloto fitondranten̈a na man̈ano raha ratsy hafa? Mety hangala tahaka izy olo hafa. Mandrobaka lazany fianakavian̈any Jehovah olo karaha zen̈y. (1 Tes. 4:3-8) Mila mitandrin̈y atsika tsao tafan̈araka modely ratsy zen̈y. Tsisy raha tokony hambelantsika handrobaka fihavanan̈antsika amy Babantsika be fitiavan̈a io foeky.

17. Ino toetsain̈y tsy tokony hanan̈antsika? Nan̈ino?

¹⁷ Matokisa Jehovah fo fa aza matoky fanan̈ana. Jehovah mampan̈anten̈a fa hamezany hanin̈y, lamba, ndreky tran̈o hipitrahan̈a fo atsika, izikoa atsika man̈ano voalohantoeran̈a Fanjakan̈anany ndreky man̈araka fitsipikinany. (Sal. 55:22; Mat. 6:33) Izikoa atsika matoky fampan̈antinan̈a zen̈y, atsika tsy mety hieritreritry fa vola na fanan̈ana amy donia ty ny raha hiaro atsika ndreky hampasambatra atsika. Efa fan̈anaovan̈a sitrapony Jehovah edy ny raha hampilamin̈y jerintsika. (Fil. 4:6, 7) Ary ndray atsika mahavanga raha isankarazany,  mila dinihintsika fo fotoan̈a ndreky angovo mety ho lanintsika hampiasan̈a izio ndreky hikobabian̈a izio. Mila mandiniky atsika tsao mba efa fanan̈ana ny raha ten̈a maventy amintsika. Tsaraova fa misy raha irahiny Jehovah hataontsika izikoa tiantsika hanjary ho an̈isany fianakavian̈anany. Tsisy raha tokony hambelantsika handrikian̈a atsika. Tsy tiantsika foeky hanjary karaha lelahy pan̈arivo taminandrany Jesosy in̈y. Ôtrizay lelahy io afaka nanompo Jehovah ndreky nanjary ho an̈isany olo atsangany Jehovah ho zanany. Kanefa, tsy nazony raha aby zen̈y fotony tiany loatra fanan̈ananany.​—Mar. 10:17-22.

18. Ino voninahitry maventy ndreky hatsaran̈a ho azonolo man̈araka volan̈any Jehovah?

¹⁸ Ino voninahitry maventy ho azonolo man̈araka volan̈any Jehovah? Iro afaka ho tia Jehovah ndreky hanompo izy fo mandrakizay. Lan̈iany man̈anten̈a hiain̈y mandrakizay ambony tany eto, ho ravoravo hikarakara tany tsara niasainy Jehovah ty. Tsy ho ela, hampodiny Fanjakan̈any Zan̈ahary ho tsara mare tany ndreky raha jiaby aminizity. Jesosy han̈adoso raha jiaby mampijaly vokatrany fahotan̈any Adama ndreky Eva. Handeha hivilôminy Jehovah ndraiky olo antapitrisany efa maty, avio iro amiany fahafahan̈a hiain̈y mandrakizay. Iro ho salama vatan̈a ndreky tsy harary eky, lera tany ty manjary paradisa an̈y. (Lioka 23:42, 43) Hahazo ‘voninahitry’ nikoran̈iny Davida amy Salamo 8:5 ao olo jiaby manompo Jehovah, lera iro lavorary an̈y.

19. Ino raha tokony halaintsika onon̈o fo?

¹⁹ Maro raha tsara antin̈ainao izikoa anao an̈isany “vahoaka be.” Tiany Jehovah hanjary an̈isany fianakavian̈anany anao, fotony anao tiany. Ke mifen̈a angovo jiaby han̈ano raha mamparavoravo izy. Aza adoso amy jerinao ndreky amy fônao fampan̈antinan̈any Zan̈ahary aby io, baka io man̈anaova raha mifan̈araka amy zen̈y fo isanandra. Aza adin̈a foeky fa tombontsoa tsisy ambaka izy manompo Jehovah Babantsika andan̈itry an̈y io, ndreky midera izy fo mandrakizay.