1. Mang deer e rayog ni nge yib ngan’dad u nap’an ni gad ra lemnag urngin ban’en ni ke sunmiy Jehovah?

NAP’AN ni gad ra lemnag urngin ban’en ni ke sunmiy Jehovah, ma sana gad ra lem ni bod David ni faani yoloy e Psalm ni meybil ni gaar: “Faan gu ra yaliy lan e lang ni gur e kam sunumiy, nge pul nge pi t’uf nu lan e lang, ni gur e mu ta’rad nga tagil’rad, me lungug u wun’ug, Girdi’ e mang ni ngam lemnag; mang ni ngam lemnag ni yugu aram rogon ni ir e ke mus ni girdi’?” (Ps. 8:3, 4) Rayog ni ngad lemnaged nri gad ba achig ni faanra ngad taareb rogonnaged gadad ko pi t’uf ni ke sunmiy Jehovah, ma gad ngat nga rogon nri ma lemnagdad ni bod David. Machane gad ra guy nib t’uf e gal nsom’on e girdi’ rok Jehovah ni aram Adam nge Efa, me tayrow ni yow bang ko tabinaw rok.

2. Mang e baadag Jehovah ni nge rin’ Adam nge Efa?

² Adam nge Efa e yow e gal nsom’on i fak Jehovah ni ur moyew u fayleng, ma ir e Chitamangirow ni bay u tharmiy. Ba m’agan’ ngay ni ngar rin’ew e n’en nib milfan ngorow ni yow bang ko tabinaw rok. Ere gaar ngorow: “Mu diyengow nge yoor pi fakmew, nge wer e piin ni owchemew nga gubin yang u fayleng ngar pired riy mi yad suwey.” (Gen. 1:28) Baadag ni ngar fakayew e bitir mar ayuwegew e fayleng. Faan gomanga ra folgow mar rin’ew e n’en ke yog Jehovah ngorow, ma aram e rayog ni ngar pared pi fakrow ni yad bang ko tabinaw rok Got ndariy n’umngin nap’an.

3. Mang fan nrayog ni nga dogned ni Adam nge Efa e yow bang ko tabinaw rok Jehovah ni kub ga’ farow?

³ Adam nge Efa e yow bang ko tabinaw rok Jehovah ni kub ga’ farow. Baaray e n’en ni be yog e Bible u murung’agen e girdi’ ni sunmiy Jehovah ko Hebrews 2:7. Be gaar: “Kam ta’ . . . nib sobut’ ngak e pi engel, kam flaabnag ma kam ta’ fan.” Riyul’ ni girdi’ nge engel e ba thil gelngirad, nge tamilangan’ rorad, nge tin rayog rorad.  (Ps. 103:20) Yugu aram rogon, ma girdi’ e yugu ba “sobut’” buchuuw ko pi engel nem nib gel gelngirad. Aygum lemnag e re n’ey! Rib manigil e yafos ni pi’ Jehovah ko gal ga’ rodad.

4. Mang e buch rok Adam nge Efa ni bochan e dar folgow rok Jehovah? Mang e gad ra weliy ko re article ney?

 ⁴ Machane ba gel e kireban’ riy, ya dar folgow rok Jehovah ma da kur mangew bang ko tabinaw rok. Gad ra fil u lan e re article ney nib kireb wenegan e re n’ey ni yib ngak pi fakrow. Machane dawori thil e n’en nib m’agan’ Jehovah ngay. Baadag ni nge fol e girdi’ rok mar manged pi fak ndariy n’umngin nap’an. Ere som’on e ngad weliyed rogon ni ke dag Jehovah ni kub ga’ fadad u wan’. Ngemu’ mu kud weliyed rogon nrayog ni ngad daged e chiney ni gad baadag ni ngad manged bang ko tabinaw rok. Bin tomur e gad ra weliy murung’agen boch e tow’ath nra yag ngak chon e tabinaw rok Jehovah u fayleng ndariy n’umngin nap’an.

5. Uw rogon ni ngad daged ni gad be pining e magar ngak Got ni ke sunmiydad ni gad bod yaan?

⁵ Ke tay Jehovah fadad ni aram e ke sunmiydad ni gad bod yaan. (Gen. 1:26, 27) Bochan ni kan sunmiydad ni gad bod yaan Got, ma aram fan nrayog ni ngad filed rogon ni ngad daged pi fel’ngin ni bod e t’ufeg, nge runguy, nge yul’yul’, nge ngongol nib mat’aw. (Ps. 86:15; 145:17) Faan gad ra guy rogon ni nge m’ug e pi fel’ngin ney rodad, ma aram e gad be tayfan Jehovah ma gad be dag ni gad be pining e magar ngak. (1 Pet. 1:14-16) Faan gad ra rin’ e tin nib m’agan’ e Chitamangidad ngay ni bay u tharmiy, ma gad ra felfelan’. Maku reb e, bochan ni bay pi fel’ngin Jehovah rodad, ma rayog ni ngad manged e re miti girdi’ ni baadag ni nge par u lan e tabinaw rok.

6. Uw rogon ni dag Jehovah ni be tayfan e girdi’ u nap’an ni be ngongliy rogon e fayleng?

⁶ Rib manigil tafedad ni ke ngongliy Jehovah. Ba n’uw nap’an u m’on ni nge sunmiy Jehovah Adam, me ngongliy rogon e fayleng ni nge par e girdi’ riy. (Job 38:4-6; Jer. 10:12) Bochan ni ir be’ nib gol, ma boor ban’en nib manigil ni ke sunmiy ni ngad felfelan’gad ngay. (Ps. 104:14, 15, 24) Yu ngiyal’ e ma lemnag rarogon e tin ke sunmiy “ma ba fel’ u wan’.” (Gen. 1:10, 12, 31) Ke tay e girdi’ ni ngar ‘gagiyegnaged urngin ban’en’ nib manigil ni ke sunmiy u fayleng ni bochan e be tay farad. (Ps. 8:6) Baadag ni nge felfelan’ e girdi’ ni yad ba flont ni ngar ayuweged e pi n’en ke sunmiy nrib manigil ndariy n’umngin nap’an. Ere ga ma pining e magar ngak Jehovah ni gubin ngiyal’ ko re n’ey nib manigil ni ke micheg, fa?

7. Uw rogon ni be dag e Joshua 24:15 ni bay e puf rogon ko girdi’?

⁷ Ke pi’ Jehovah e puf rogon ngodad nib tow’ath. Ere rayog ni ngad dugliyed e n’en ngad rin’ed ko yafos rodad. (Mu beeg e Joshua 24:15.) Re n’ey nrayog ni ngad mel’eged e n’en ngad rin’ed e aram e puf rogon. Ma felfelan’ Got u nap’an ni gad ra mel’eg ni ngad pigpiggad ngak. (Ps. 84:11; Prov. 27:11) Boor e kanawo’ nrayog ni ngad fanayed e puf rogon rodad riy nib fel’ rogon. Am lemnag reb e kanawo’ ni fanay Jesus e puf rogon rok riy.

8. Mang reb e kanawo’ ni fanay Jesus e puf rogon rok riy?

⁸ Rayog ni ngad folwokgad rok Jesus ni aram e ngad mel’eged ni ngad m’oneged e tin nra yib angin ngak yugu boch e girdi’ me tomur e tirodad. Bay bayay ni kari aw parawon Jesus nge pi apostal rok, ma aram mar milekaggad nga bang nib gapas nrayog ni ngar toffangad riy. Machane de yag ni ngar toffangad ni bochan e piriegrad ba ulung i girdi’ ni yad baadag ni nge machibnagrad Jesus. Yugu aram rogon, ma de kankanan’ Jesus ngorad ya runguyrad. Ere mang e rin’? I tabab ni nge “machibnag boor ban’en ngorad.” (Mark 6:30-34) Nap’an ni gad ra folwok rok Jesus ni aram e ngad fanayed e  tayim rodad nge gelngidad ni ngad ayuweged yugu boch e girdi’, ma aram e gad be pining e sorok ngak e Chitamangidad ni bay tharmiy. (Matt. 5:14-16) Ku aram reb e kanawo’ ni gad be dag ngak Jehovah ni gad baadag ni ngad manged bang ko tabinaw rok.

9. Mang reb e tow’ath nib manigil ni ke pi’ Jehovah ko girdi’?

⁹ Ke sunmiy Jehovah e girdi’ nrayog ni ngar fakayed e bitir, ma kub milfan ngorad ni ngar filed ngak pi fakrad ni ngar t’ufeged Jehovah mar pigpiggad ngak. Faanra gur reb e gallabthir, mab ga’ fan u wan’um e re tow’ath ney ni kan pi’ ngom, fa? Yugu aram rogon ni ke sunmiy Jehovah e pi engel ni boor ban’en nrayog ni ngar rin’ed, machane de pi’ e biney e tow’ath ngorad. Ere piin bay pi fakrad e nge ga’ fan u wan’rad e biney e tow’ath ni bay rorad. Ba milfan ngorad ni ngar chuguliyed pi fakrad ‘mi yad llowan’nagrad nrogon, mi yad fonownagrad nrogon girdien Kristus.’ (Efe. 6:4; Deut. 6:5-7; Ps. 127:3) Boor ban’en ni ke ngongliy e ulung rok Got ni nge ayuweg e piin gallabthir ni bod yu ken e babyor, nge video, nge musik, nge boch ban’en u online. Ere ba tamilang nrib t’uf e piin bitir rok e Chitamangidad ni bay u tharmiy nge Fak. (Luke 18:15-17) Nap’an nra taga’ e piin gallabthir ngak Jehovah mar athamgilgad u rogon nrayog rorad ni ngar ayuweged pi fakrad, ma ra felfelan’ Jehovah ngorad. Pi gallabthir ney e ku yad be ayuweg pi fakrad ni ngar manged bang ko tabinaw rok Jehovah ndariy n’umngin nap’an!

10-11. Mang e ke bing Jehovah e kanawo’ riy ngodad u daken fare biyul?

¹⁰ Ke pi’ Jehovah Fak nrib t’uf rok ya nge yag ni ngkud manged bang ko tabinaw rok bayay. Kad weliyed ko  paragraph 4 nnap’an ni denen Adam nge Efa, ma daki yag ni ngar mangew bang ko tabinaw rok Jehovah ni kub muun pi fakrow ngay. (Rom. 5:12) Dar folgow rok ni lem rorow. Ere bay rogon ni nge chuwegrow u lan e tabinaw rok. Machane mang e ra buch rok pi fakrow? Bochan nib t’uf e girdi’ rok Jehovah, ma aram fan ni ke bing e kanawo’ ngak pi fakrow ni faan yad ra fol rok ma ra fekrad ngar manged bang ko tabinaw rok. I rin’ e re n’ey u daken e maligach ni pi’ Jesus Kristus ni Fak ni kari maagirag rok. (John 3:16; Rom. 5:19) Bochan e re n’ey ma ke yag ni nge fek Got 144,000 e girdi’ ni yad ba yul’yul’ ni ngar manged pi fak.​—Rom. 8:15-17; Rev. 14:1.

¹¹ Ku bay bokum milyon e girdi’ ni yad ba yul’yul’ ni ku yad be rin’ e n’en nib m’agan’ Got ngay. Yad be athapeg ni ngar manged bang ko tabinaw rok Got u tomuren e bin tomur e skeng ni yira tay ngorad u tungun fare Biyu’ i Duw. (Ps. 25:14; Rom. 8:20, 21) Bochan e re athap ney ni bay rorad, ma aram fan ni mus ko chiney ma yad ma yog e “Chitamangimad” ngak Jehovah ni Ir e Sunmiyrad. (Matt. 6:9) Ma piin yira fasegrad ko yam’ e rayog ni ngkur filed e n’en nib m’agan’ Jehovah ngay ni ngar rin’ed. Piin yad ra mel’eg ni ngar folgad rok e ra munmun mu kur manged bang ko tabinaw rok.

12. Mang deer e ngad weliyed e fulweg riy e chiney?

¹² Kad filed ni boor ban’en ni ke rin’ Jehovah ni nge dag ni be tayfan e girdi’. Ke fek e piin kan dugliyrad ni ngar manged pi fak, miki pi’ e athap ko fapi “girdi’ ni ke muulung ni pire’ ni pire’” ni ngkur manged pi fak u lan e bin beech e fayleng. (Rev. 7:9) Ere uw rogon ni ngad daged e chiney ni gad baadag ni ngad manged bang ko tabinaw rok Jehovah ndariy n’umngin nap’an?

13. Mang e rayog ni ngad rin’ed ya nge yag nda manged bang ko tabinaw rok Got? (Mark 12:30)

¹³ Mu dag nib t’uf Jehovah rom ni aram e ngam pigpig ngak u polo’ i gum’irchaem. (Mu beeg e Mark 12:30.) Boor e tow’ath ni ke pi’ Got ngodad. Machane reb riy nrib manigil e aram e ke bing e kanawo’ ngodad ni ngad liyorgad ngak.  Rayog ni ngad daged ngak Jehovah nib t’uf rodad ni faan gad ra ‘fol ko tin ni ke yog ni ngad rin’ed.’ (1 John 5:3) Reb e ban’en ni baadag Jehovah ni ngad folgad riy e aram fare thin ni tay Jesus chilen ngak pi gachalpen ni ngar ayuweged e girdi’ ngar manged boch i gachalpen, mi yad taufenagrad. (Matt. 28:19) Ki tay chilen ngodad ni nge bagadad me t’uf rok bagadad. (John 13:35) Piin yad ra fol rok Jehovah e ra fekrad ni ngar manged bang ko tabinaw rok.​—Ps. 15:1, 2. 

14. Uw rogon ni ngad t’ufeged yugu boch e girdi’? (Matthew 9:36-38; Roma 12:10)

¹⁴ Mu t’ufeg yugu boch e girdi’. T’ufeg e aram e bin th’abi ga’ fan i fel’ngin Jehovah. (1 John 4:8) Ke dag Jehovah ni gad ba t’uf rok u m’on ni ngad nanged. (1 John 4:9, 10) Ere gad ra t’ufeg e girdi’ ma aram e gad be folwok rok. (Efe. 5:1) Reb e kanawo’ nib manigil nrayog ni ngad daged nib t’uf e girdi’ rodad e aram e ngad ayuweged yad ngar filed murung’agen Jehovah e chiney ni ka bay e tayim riy. (Mu beeg e Matthew 9:36-38.) Gad ra rin’ e re n’ey, ma aram e gad be bing e kanawo’ ngorad ni ngar manged bang ko tabinaw rok Got. Tomuren nra un be’ ko taufe, ma thingar da ululgad ni ngaud daged e t’ufeg ngak ma gad be tayfan. (1 John 4:20, 21) Uw rogon ni ngad rin’ed e re n’ey? Reb e kanawo’ e aram e nge pagan’dad ngak. Bod ndab da lemnaged nde puluw e n’en ke rin’ ni bochan e dad nanged fan ni ke rin’ fare n’em. Ya ngad daged ni gad be tayfan walagdad.​—Mu beeg e Roma 12:10; Fil. 2:3.

15. Mini’ e susun ni ngad daged e runguy nge gol ngorad?

¹⁵ Mu runguy urngin e girdi’ mag gol ngorad. Faanra gad baadag ni ngad manged bang ko tabinaw rok Jehovah ndariy n’umngin nap’an, ma thingar da folgad ko Thin rok. Bod ni fil Jesus nsusun e ngad runguyed urngin e girdi’, ma gad gol ngorad ni kub muun e pi toogor rodad ngay. (Luke 6:32-36) Machane yu ngiyal’ e rayog nib mo’maw’ ni ngad rin’ed e re n’ey. Faanra aray rogon ma thingar da filed rogon ni ngaud lemgad ma gad be ngongol ni bod Jesus. Faan gad ra athamgil ni ngad folgad rok Jehovah ma gad folwok rok Jesus, ma aram e gad be dag ngak e Chitamangidad ni bay u tharmiy ni gad baadag ni ngad manged bang ko tabinaw rok ndariy n’umngin nap’an.

16. Uw rogon ni nge dab da kirebnaged thin e tabinaw rok Jehovah?

¹⁶ Dab mu kirebnag thin e tabinaw rok Jehovah. Faanra bay bochi pagel u lan reb e tabinaw, mab ga’ ni ma folwok ko n’en ma rin’ e bin nib ilal e pagel ni walagen. Faanra fol fare pagel ko pi kenggin e motochiyel u Bible, ma aram e be dag e kanawo’ nib manigil nrayog ni nge folwok walagen nib bitir riy. Ma faanra rin’ boch ban’en nib kireb maku rayog ni nge folwok walagen nib bitir rok. Ku arrogon e tabinaw rok Jehovah. Faanra bay reb e Kristiano nib yul’yul’, me boch nga tomuren me chel nge togopuluw ko tin riyul’ ara rin’ boch e ngongol nib kireb, ma rayog ni ngki un boch e girdi’ ko ngongol nib kireb ni be rin’. Piin yad ra rin’ e re n’ey e yad ra kirebnag thin e tabinaw rok Jehovah. (1 Thess. 4:3-8) Thingar dab da folwokgad ko piin nib kireb e ngongol rorad, ma dab da paged ban’en ni nge kirebnag e tha’ u thildad e Chitamangidad ni bay u tharmiy ni gad ba t’uf rok.

17. Ba miti mang lem e susun ni ngad siyeged, ma mang fan?

¹⁷ Nge pagan’um ngak Jehovah ko bin nge pagan’um ko chugum. Ke micheg Jehovah ni faan gad ra m’oneg Gil’ilungun ma gad fol ko pi motochiyel rok, ma aram e ra pi’ e ggan, nge mad, nge gin ngad pared riy. (Ps. 55:22; Matt. 6:33) Faanra mich u wan’dad e re n’ey, ma aram e dab da lemnaged nra ayuwegdad e pi n’en bay ko re fayleng ney me yibnag e felfelan’ ngodad. Gad manang ni kemus nrogon ni nge yag e bin riyul’ e gapas nga lanin’dad e aram e ngad rin’ed e n’en nib m’agan’ Jehovah ngay. (Fil. 4:6, 7) Mus  ni faanra rayog puluwon boor e chugum rodad, ma thingar da lemnaged ko bay e tayim rodad ara gelngidad ni gad maruwelgad ngay mad ayuweged fa dariy. Gur, gathi kaygi pag feni ga’ fan e chugum rodad u wan’dad? Thingar dab da paged talin ni bay e maruwel ni ke pi’ Got ni ngad rin’ed u lan e tabinaw rok. Re n’ey e be yip’ fan nsusun e dab da paged ban’en ni nge chefeg lanin’dad nga bang. Dubdad ni ngad boded fare moon nib ga’ fan e chugum rok u wan’ me dugliy ndabi mang reb i gachalpen Jesus. Bochan e re n’ey, ma de yag ni nge mang reb e tapigpig rok Jehovah nge bagayad e piin ke mel’eg ni ngar manged pi fak!​—Mark 10:17-22.

18. Mang boch e tow’ath nra yag ko piin yad ra fol ndariy n’umngin nap’an?

¹⁸ Piin yad ra fol e ra yag e bin th’abi fel’ e tow’ath ngorad ni aram e ngar t’ufeged Jehovah mar liyorgad ngak ndariy n’umngin nap’an! Piin yad be athapeg e par u fayleng e ku yad ra felfelan’ ni ngar ayuweged e fayleng ni aram taferad ni ke ngongliy Jehovah nrib manigil. Dabki n’uw nap’an ma ra fal’eg Gil’ilungun Got e re fayleng ney nge urngin ban’en ni bay riy ngki manigil bayay. Ra pithig Jesus urngin e magawon ni ke k’aring Adam nge Efa u nap’an nra dugliyew ni ngar chuwgow u lan e tabinaw rok Got. Ra faseg Jehovah bokum milyon e girdi’ ni kar m’ad me bing e kanawo’ ngorad ni nge yag e yafos ni manemus ngorad u paradis u fayleng ni ke fel’ fithik’ i dowrad. (Luke 23:42, 43) Nap’an nra flont urngin e girdi’ ni yad be pigpig ngak Jehovah, ma yad gubin ni yira ‘flaabnagrad min tay farad’ ni bod rogon ni be yog e Bible.​—Heb. 2:7.

19. Mang e susun ni nga i par u lanin’dad?

¹⁹ Faanra gur bagayad fapi “girdi’ ni ke muulung ni pire’ ni pire’,” ma rib manigil e athap rom. Gab t’uf rok Got ma baadag ni ngam mang bang ko tabinaw rok. Ere mu athamgil u rogon nrayog rom ni ngam rin’ e tin nib m’agan’ ngay. Nga i par e pi n’en ke micheg Got u lanin’um ngu gum’irchaem ni gubin e rran. Ma ngki ga’ fan u wan’um e tow’ath rom ni aram e ga be pigpig ngak e Chitamangidad ni bay u tharmiy, nge athap ni bay rom nrayog ni ngam pining e sorok ngak ndariy n’umngin nap’an!