1. ¿Xi zándaca guinabadiidxanu ora guiníʼ íquenu lu guiráʼ ni bizáʼ Jehová?

ORA guiníʼ íquenu pabiáʼ naroʼbaʼ universu ni bizáʼ Jehová, zándaca guni sentirnu cásica biʼniʼ sentir David, laa gunabadiidxaʼ lu ti oración ni biʼniʼ: «Ora guuyaʼ guibáʼ stiluʼ, cani bizaʼluʼ ne ca bicuini naluʼ, beeu ne ca beleguí ni bizaʼluʼ, ¿tuu nga binni guidxilayú para guietenaláʼdxiluʼ laa, ne tuu nga xiiñiʼ hombre para gápaluʼ laa yaʼ?» (Sal. 8:3, 4). Cásica bizaaca David, ora guiníʼ íquenu pabiáʼ nahuiininu cueʼ ca estrella ni bizáʼ Jehová, zándaca guidxagayaanu ora gánnanu ruuyaʼ Jehová laanu. Peru casi zazíʼdinu, cadi biiyadxí si Jehová Adán ne Eva, sínuque bíʼnibe laacaʼ parte de familia stibe.

2. ¿Xi gucalaʼdxiʼ Jehová ñuni ca primé xiiñiʼ ni bibani lu Guidxilayú riʼ?

² Adán ne Eva nga ca primé xiiñiʼ Jehová ni gupa lu Guidxilayú riʼ ne laabe nga beeda gácabe Bixhózecaʼ. Gucaláʼdxibe nutálecaʼ familia stibe ngue runi gúdxibe laacaʼ: «Lagapa xiiñitu ne lagaca stale, laguchá guidxilayú riʼ ne laguni dxiiñaʼ luni» (Gén. 1:28). Gucalaʼdxiʼ Jehová ñápacabe xiiñicabe ne ñápacabe Guidxilayú riʼ. Pa nuzuubaʼ Adán ne Eva stiidxaʼ Jehová la? ñúnicaʼ ni racaláʼdxibe ne qué nusaana de ñácacaʼ parte de familia stiʼ Jehová, laacaʼ ne ca xiiñicaʼ.

3. ¿Ximodo bisisaca Jehová Adán ne Eva?

³ Bisisaca Jehová Adán ne Eva ra bíʼnibe laacaʼ parte de familia stibe. Sicaríʼ gudxi David Jehová ora caníʼ modo bizaʼbe binni: «Bíʼniluʼ laabe caadxihuiiniʼ jma huaxiéʼ risaca que ca ángel, ne guluuluʼ ti corona de gloria ne de  guendanandxóʼ íquebe» (Sal. 8:5). Qué nudii diʼ Dios poder ne guendabiaaniʼ binni cásica bidiibe ca ángel (Sal. 103:20). Peru bíʼnibe binni «caadxihuiiniʼ jma huaxiéʼ risaca que ca ángel» ni napa poder. ¡Guníʼ ique si pabiáʼ galán ndiʼ! Dxi bizáʼ Jehová Adán ne Eva bidiibe laacaʼ ti guendanabani guizáʼ sicarú.

4. ¿Xi bizaaca Adán ne Eva, ne xi zazíʼdinu lu artículo riʼ?

 ⁴ Triste guininu ni peru biniti Adán ne Eva lugar ni nápacaʼ ndaaniʼ familia stiʼ Jehová. Ne casi zazíʼdinu lu artículo riʼ, ni bíʼnicabe que bedaneni stale guendanagana para ca xiiñicabe. Peru caʼruʼ guchaa Jehová, racaláʼdxirube gaca ca binni ni ruzuubaʼ diidxaʼ xiiñibe para siempre. Primeru guidúʼyanu ximodo maʼ bisisaca Jehová laanu. Despué, zazíʼdinu xi zanda gúninu dede yanna para gusihuínninu racaláʼdxinu gácanu parte de familia stiʼ Jehová. Ne últimu la? zaninu de ca ndaayaʼ ni zacaa ca xiiñiʼ Jehová lu Guidxilayú riʼ.

5. ¿Ximodo rusihuínninu rudiʼnu xquixe peʼ Dios pur bizáʼ laanu casi laa?

⁵ Bisisaca Jehová laanu ra bizáʼ laanu casi laa (Gén. 1:26, 27). Cumu bizáʼ Dios laanu casi laa, zanda gannaxhiinu, guianu, gácanu leal ne gúninu ni jneza cásica rúnibe ni (Sal. 86:15; 145:17). Ora rúninu stipa gusihuínninu ca cualidad riʼ, rusisácanu Jehová ne rusihuínninu rudiʼnu xquixe peʼ laa (1 Ped. 1:14-16). Pa gúninu ni riuulaʼdxiʼ Bixhózenu ni nuu guibáʼ, ziuʼnu nayecheʼ ne zuni sentirnu galán. Ne cumu bizáʼ Jehová laanu casi laa la? zanda gácanu binni ni riuuláʼdxibe chuʼ ndaaniʼ familia stibe.

6. ¿Ximodo bisisaca Jehová binni dxi bizáʼ Guidxilayú riʼ?

⁶ Bizáʼ Jehová ti lugar nabé galán para laanu. Ante guzaʼbe primé hombre, bizaʼbe Guidxilayú para guibani binni ndaaniʼ ni (Job 38:4-6; Jer. 10:12). Cumu guizáʼ nachaʼhuiʼ Jehová ne riuulaʼdxiʼ gudii de ni napa la? bizaʼbe stale cosa para guibáninu galán (Sal. 104:14, 15, 24). Gatigá gulee Jehová tiempu para guiníʼ ique lu guiráʼ ni bizáʼ ne biiyabe «guizáʼ galán cani» (Gén. 1:10, 12, 31). Bisisaca Jehová binni ra bidiibe lugar guni dominarcaʼ guiráʼ cosa ni bizaʼbe lu Guidxilayú (Sal. 8:6). Racalaʼdxiʼ Dios chuulaʼdxiʼ binni perfectu gapa ca cosa ni bizaʼbe sin chuʼ dxi gáticaʼ. ¿Ñee rudiʼnu xquixe peʼ Jehová pur promesa riʼ la?

7. ¿Ximodo rusihuinni Josué 24:15 bizáʼ Jehová binni ne libertad para cuí xi guni?

⁷ Bidii Jehová laanu libertad para cuinu xi gúninu. Ne pur regalu riʼ zanda cuinu xi gúninu né xquendanabáninu (biindaʼ Josué 24:15). Riecheʼ Dios ni nadxii laanu ora riguixe íquenu gúninu ni ná (Sal. 84:11; Prov. 27:11). Zanda iquiiñenu libertad ni bidii Dios laanu para gúninu ni jneza. Guidúʼyanu ejemplu ni bisaana Jesús.

8. Bizeeteʼ ti modo biquiiñeʼ Jesús libertad stiʼ jneza.

⁸ Jma bizaalaʼdxiʼ Jesús ni caquiiñeʼ xcaadxi ne zanda chinándanu ejemplu stiʼ. Ti biaje, guizáʼ maʼ bidxaga Jesús ne ca apóstol stiʼ, ngue runi biyúbicaʼ ti lugar para guiziiláʼdxicaʼ. Peru qué ñanda niziiláʼdxiʼcabe purtiʼ yendá ti grupu de binni ra nuucabe para gucaadiágacaʼ Jesús. Lugar de nidxiichibe, biabe ca binni que ne «bizulú bisiidibe laacaʼ stale cosa» (Mar. 6:30-34). Rinándanu ejemplu stiʼ  Jesús ora riquiiñenu tiempu stinu ne stipa stinu para gacanenu xcaadxi, ne ra gúninu ni rusisácanu Bixhózenu ni nuu guibáʼ (Mat. 5:14-16). Ne zacá rusihuínninu racaláʼdxinu gácanu parte de familia stibe.

9. ¿Xi cadi naquiiñeʼ guiaandaʼ ca binni ni napa xiiñiʼ?

⁹ Bizáʼ Jehová binni para ganda gapa xiiñiʼ ne gusiidiʼ laacabe gannaxhiicabe laa ne gúnicabe ni ná. Pa nápaluʼ xiiñiluʼ, ¿ñee rusisácaluʼ regalu ni bidii Jehová lii la? Neca bidii Jehová poder ca ángel ca para gúnicaʼ stale cosa, peru qué nuzáʼdibe laacaʼ para gápacaʼ xiiñicaʼ. Nga runi, naquiiñeʼ gusisaca binni ni napa xiiñiʼ privilegiu riʼ. Ne naquiiñeʼ gusiniisi xiiñiʼ «casi ná Jehová ne casi ná ca conseju stiʼ» (Efes. 6:4; Deut. 6:5-7; Sal. 127:3). Para gacané xquidxi Dios ca binni ni napa xiiñiʼ rudii laacabe stale herramienta ni zeeda lu Biblia, casi ca publicación, videu, canción ne tema ni zeeda lu sitiu jw.org. Rihuinni dxichi nadxii Bixhózenu ni nuu guibáʼ ne xiiñiʼ ca baʼduhuiiniʼ stinu (Luc. 18:15-17). Riuulaʼdxiʼ Jehová gapa ca padre confianza laabe ne gúnicaʼ stipa pur gápacaʼ ca xiiñicaʼ. Ca padre ni runi ca ni bizéʼtenu riʼ racanecaʼ xiiñicaʼ para cadi gusaana de gácacaʼ parte de familia stiʼ Jehová.

10, 11. ¿Xi zanda guizaaca pur bidii Jehová Xiiñiʼ gatiʼ pur laanu?

¹⁰ Bidii Jehová xiiñiʼ ni jma nadxii para gatiʼ pur laanu para ganda gácanu parte de familia stibe sti biaje. Casi bidúʼyanu lu  párrafo tapa que, ra bichee Adán ne Eva, maʼ qué ñácacaʼ parte de familia stiʼ Jehová ne ngaca bizaaca ca xiiñicabe (Rom. 5:12). Cumu Adán ne Eva peʼ gulí cadi guzuubaʼ stiidxaʼ Dios la? ngue runi bireecabe de ndaaniʼ familia stiʼ Dios. Peru, ¿xi guizaaca de ca xiiñicabe yaʼ? Cumu nadxii Jehová binni la? biyubi modo gaca ca binni ni guzuubaʼ diidxaʼ parte de familia stiʼ. ¿Ximodo bíʼnibe ni yaʼ? Ra biseendabe tobi lucha xiiñibe Jesucristu gatiʼ pur laanu (Juan 3:16; Rom. 5:19). Ne pur guti Jesús zanda gaca 144,000 binni parte de familia stiʼ Jehová (Rom. 8:15-17; Apoc. 14:1).

¹¹ Nuu millón de binni ni ruzuubaʼ diidxaʼ ni cayuni ni ná Dios ne nápacaʼ esperanza guiaanacaʼ ndaaniʼ familia stiʼ Jehová tidiʼ si ti mil iza (Sal. 25:14; Rom. 8:20, 21). Pur esperanza ca dede ca yanna ruuyacabe Jehová Dios ni bizáʼ laacabe casi Bixhózecabe (Mat. 6:9). Ne ca binni ni guiasa de lade gueʼtuʼ laaca zápacaʼ oportunidad de gánnacaʼ xi ribeza Jehová gúnicaʼ. Ne ca ni guzuubaʼ diidxaʼ la? zanda gueeda gácacaʼ parte de familia stibe ra tidiʼ tiempu.

12. ¿Xi pregunta chiguicábinu?

¹² Casi maʼ bizíʼdinu, maʼ biʼniʼ Jehová stale cosa para gusisaca binni. Maʼ biʼniʼ adoptar Dios ca xpinni Cristu ni bibí casi xiiñiʼ ne laaca maʼ bidiibe esperanza «stale binni» para gueeda gácacaʼ xiiñibe ora maʼ chuʼcaʼ lu guidxilayú cubi (Apoc. 7:9). ¿Xi zanda gúninu dede ca yanna para gácanu parte de familia stiʼ Jehová yaʼ?

13. ¿Xi naquiiñeʼ gúninu pa racaláʼdxinu gácanu parte de familia stiʼ Jehová? (Marcos 12:30).

¹³ Gusihuínninu nadxiinu Jehová ra gúninu ni ná de guidubi ladxidoʼno (biindaʼ Marcos 12:30). Maʼ bidii Jehová laanu stale regalu, ne tobi de ca regalu  jma risaca nga guni adorarnu laabe. Ora rúninu ni ná ca mandamientu stibe rusihuínninu nadxiinu laabe (1 Juan 5:3). Tobi de ca mandamientu ca nga ni bidii Jesús ora guníʼ gacanenu binni gaca discípulo ne chuʼnísacaʼ (Mat. 28:19). Laaca biʼniʼ mandar Jesús laanu gannaxhiisaanu (Juan 13:35). Ca binni ni ruzuubaʼ stiidxaʼ Jehová, riguube laacaʼ ndaaniʼ familia stibe (Sal. 15:1, 2).

14. ¿Ximodo rusihuínninu nadxiinu binni? (Mateo 9:36-38; Romanos 12:10).

¹⁴ Gannaxhiinu binni. Guendarannaxhii nga cualidad jma risaca napa Jehová (1 Juan 4:8). Maca nadxiibe laanu dede ante gunibiaʼnu laabe (1 Juan 4:9, 10). Ora rannaxhiinu binni rinándanu ejemplu stiʼ Jehová (Efes. 5:1). Ti modo rusihuínninu nadxiinu binni nga ra gacanenu laacaʼ gunibiaʼcaʼ Jehová laga nuuruʼ tiempu (biindaʼ Mateo 9:36-38). Zacá racanenu laacaʼ gueeda gácacaʼ parte de familia stiʼ Jehová. Ne ora chúʼnisa tuuxa cadi naquiiñeʼ gusaana de gannaxhiinu ne guni respetarnu laa (1 Juan 4:20, 21). Laaca cadi naquiiñeʼ guiníʼ íquenu biʼniʼ ti hermanu xiixa para si guniná stobi, sínuque guni respetarnu ca hermanu ne guiníʼ íquenu jma risácacaʼ que laanu (biindaʼ Romanos 12:10; Filip. 2:3).

15. ¿Ñee ca hermanu si stinu nga naquiiñeʼ guianu ne gácanu nachaʼhuiʼ né laacaʼ la? Bisiene ni.

¹⁵ Guianu ne gácanu nachaʼhuiʼ ne guiráʼ binni. Pa qué racaláʼdxinu guireʼnu de ndaaniʼ familia stiʼ Dios caquiiñeʼ gúninu guiráʼ ni rusiidiʼ Biblia. Guzéʼtenu ti ejemplu, bisiidiʼ Jesús naquiiñeʼ guianu ne gácanu nachaʼhuiʼ né guiráʼ binni dede né ca enemigu stinu (Luc. 6:32-36). Zándaca nuu biaje guiníʼ íquenu nagana gúninu ndiʼ. Pa zacá cazaacanu, naquiiñeʼ gúninu ne guiníʼ íquenu cásica biʼniʼ Jesús. Ora gúninu stipa pur guzúʼbanu stiidxaʼ Jehová ne chinándanu ejemplu stiʼ Jesús rusihuínninu racaláʼdxinu gácanu parte de familia stiʼ Jehová.

16. ¿Xi zanda gúninu para cadi guiníʼ binni mal de familia stiʼ Jehová?

¹⁶ Cadi naquiiñeʼ gudiʼnu lugar guiníʼ binni mal de familia stiʼ Jehová. Ndaaniʼ ti familia, stale biaje runi xiiñiʼ binni ni nahuiiniʼ ni runi ca bizaʼnaʼ, benda o biʼchiʼ ni jma huaniisi. Pa chinanda ca ni huaniisi ca principiu ni zeeda lu Biblia zudiicaʼ ti ejemplu galán ca ni jma nahuiiniʼ. Peru pa gúnicabe ni cadi jneza laaca ngaca zuni ca ni nahuiiniʼ. Zacagá nga rizaaca ndaaniʼ familia stiʼ Jehová. Pa gueeda gaca ti xpinni Cristu apóstata o guni cometer pecadu sexual zándaca laaca ngaca guni xcaadxi hermanu. Ne ca ni runi ca ni bizéʼtenu riʼ, rucaacabe binni guiníʼ mal de familia stiʼ Jehová (1 Tes. 4:3-8). Cadi gúninu ca cosa ni cadi jneza ni runi sti binni ne cadi gudiʼnu lugar chuʼ tuuxa guxheleʼ laanu de Bixhózenu ni nuu guibáʼ.

17. ¿Xi cadi naquiiñeʼ guiníʼ íquenu ne xiñee?

¹⁷ Gápanu confianza Jehová ne cadi ca cosa material. Jehová cayabi laanu pa gúninu ni ná Reinu primé lu xquendanabáninu ne gúninu ni ná ca ley stiʼ zudii laanu ni guidoʼno, lari gácunu ne ti lugar ra cuézanu (Sal. 55:22; Mat. 6:33). Nga runi cadi naquiiñeʼ guiníʼ íquenu zapa ca cosa material ni nuu lu Guidxilayú riʼ laanu ne zacanécani laanu guibáninu nayecheʼ. Nánnanu pa gúninu ni ná Jehová zápanu guendariuudxi (Filip. 4:6, 7). Dede pa nápanu bueltu para sinu stale cosa caquiiñeʼ guiníʼ íquenu pa nápanu tiempu ne stipa para iquiiñenu  ne gápanu ca ni. Guiníʼ íquenu ndiʼ: «¿Ñee runiteʼ stale tiempu lu ca cosa ni napaʼ la?». Cadi guiaandaʼ laanu, ribeza Jehová guni ca ni nuu ndaaniʼ familia stiʼ xhiiñaʼ. Nga runi cadi naquiiñeʼ gudiʼnu lugar chuʼ xiixa ni gucueeza laanu para cadi gúninu ni. Qué racaláʼdxinu gácanu casi xa hombre ni bibani tiempu stiʼ Jesús, ni qué niná ñuni ni ná Jehová ne ñaca tobi de ca xiiñibe. ¿Xiñee qué ñúnibe ni yaʼ? Purtiʼ qué ninabe nusaanabe ca cosa material ni nápabe (Mar. 10:17-22).

18. ¿Xi privilegiu ne xi ndaayaʼ zacaa ca binni ni guzuubaʼ diidxaʼ?

¹⁸ Ca binni ni guzuubaʼ diidxaʼ, ziéchecaʼ purtiʼ zápacaʼ privilegiu de gannaxhiicaʼ ne guni adorarcaʼ Jehová para siempre. Laaca ziecheʼ ca binni riʼ purtiʼ zápacaʼ Guidxilayú sicarú ni bizáʼ Jehová para cuézacaʼ. Maʼ cadi candaa, pur Reinu stiʼ Jehová zabiguetaʼ zaca Guidxilayú riʼ sicarú casi dxi bizáʼ Jehová ni. Zabee Jesús guiráʼ ca guendananá ni bisaanané Adán ne Eva laanu pur bidxiidéchecaʼ familia stiʼ Dios. Ne zusibani Jehová millón binni ni maʼ guti ne zanda guibánicaʼ sin gaca huaracaʼ ne sin gáticaʼ lu Guidxilayú riʼ ndaaniʼ ti paraísu (Luc. 23:42, 43). Ora maʼ gaca ca ni nuu ndaaniʼ familia stiʼ Jehová perfectu, cada tobi de laacaʼ zusihuínnicaʼ guendanandxóʼ ne guendarisaca ni bizeeteʼ David (Sal. 8:5).

19. ¿Xi cadi naquiiñeʼ guiaandaʼ laanu?

¹⁹ Pa lii nga tobi de ca «stale binni» ni napa esperanza riʼ, cadi guiaandaʼ lii nadxii Dios lii ne racalaʼdxiʼ gácaluʼ parte de familia stiʼ. Nga runi biʼniʼ stipa gúniluʼ ni riuuláʼdxibe. Guníʼ ique ca promesa stiʼ Dios guiráʼ dxi ne cadi gusiaandaluʼ ca ni. Bisisaca privilegiu ni nápaluʼ de guni adorarluʼ Bixhózenu ni nuu guibáʼ ne gusisácaluʼ laabe para siempre.