1. Ginipai naye ku berã rani yo ho ani aberã ni kuriipa agu ahe dunduko Yekova nakusihe?

HO ANI aberã ni kuriipa agu ahe dunduko nga gu Yekova nakusihe, ani ima rengba kadu na kina gu bipai gu bake papara Atambuahe nangia Davide adu na ni, ko amangi kparakpee fu Yekova na ki sanahe ki ya: “Ho mi nangana gamo angbangbaturũ ni, nga gu mangaapai nga ga wirinzagaro, na gu diwi mo amoi ru na akerekuru; gini he nga boro, mo naaberã pa ni? na wiri boro, mo naandu ka bi ni?” (Tam. 8:3, 4) Wakina Davide, ka ani ringbisi tirani kuti agu akerekuru Yekova akusi ra, ani ima rengba ka bihe nga parani niumba ha, ono kina ngbarani rengbe ka zera ka bi gupai nga Yekova naberãpa rani aberã. Ono ani nika bi gupai abi nga Yekova aaberãpa aAdamu na Eva aberã, na ko asayo i da ni papara gako aborokporo.

2. Ginipai Yekova aaida aAdamu na Eva mangihe?

² AAdamu na Eva nangia bambata awiri Yekova auru kpotosende ane, na Yekova nangia gu Bayo nga boro nyemuse du ngbangbaturũ yo. Ko aaida agi arogotise nangia gako aborokporo re zúga azuga. Mbori aya fu yo wẽ: “Oni zúga azuga, ki nge ange, ki hiisi kpotosende berewe ki zogo ho.” (Bam. P. 1:28) Ko aaida i vungu agude na kini ngerefuo kpotosende. Ka aAdamu na Eva agisangba Yekova na kini mangi agu apai ko aya i niimangi he, i gbiati atitayo ka nye ni gako aborokporo nyeanye kindi.

3. Tipagine rengbe ani ka ya ti ni wẽ Yekova afu iriiri bangiriba fu aAdamu na Eva rogo gako riikporo?

³ AAdamu na Eva adu na iriiri bangiriba beyo rogo ga Yekova riikporo. A wa duhe ni kekehe rogo AEbere 2:7, Ziazia Kekeapai  nape gupai tipa gu ga Yekova kusikusihe nga boro nga: “Mo asa ko ko du ni umba pa ko toni ti amaraika; mo amoi kpakpari irisa na taarimo ku riko yo.” Nirengo, Yekova aafunga kina gu bangisa ome, inohe, tatamana gbiati tandu mangaapai fu wiri aboro wa gu du be amaraika te. (Tam. 103:20) Ono tie, aboro ‘na umba pa yo’ gbua tooni ti ga amaraika. Nga gu bawenepai! Ho Yekova akusi bambata avungurani ni, ko aima fu bawene raka fuyo!

4. Ginipai namangi tipa aAdamu na Eva mbiko gupai nga i abasasangba Yekova, na gini apai ani nika sakapai tipaha rogo gi kekeapai re?

⁴ Si nafu kina gberãrago nga, bambiko aAdamu na Eva asia ka basasangba Yekova, i aadunga berewe ni papara gako aborokporo te. Si aima ye na bakere akpakarapai kuti atitayo a wa ani nika bihe kusa rogo gi kekeapai re. Ono ga Yekova aringbisapai ata arianga tihe te. Ko kindi naida agu aboro nagiasangba du ni awiriko nyeanye kindi. Ani nika sakapai tipa wai Yekova naima yugoho furani nga ani na nyanyakipa rani fuko. Fuo gure, ani nika sakapai tipa gupai rengbe ani ka mangaha awere tipa ka yugo na ni nga ani naida kadu ni papara ga Mbori aborokporo. Ni yangaraha, ani nika sakapai tipa agu amaku agu awiri Yekova du auru kpotosende nika gbia ngbarago ti ni nyeanye kindi.

5. Waigu rengbe ani ka fu taarimo fu Yekova mbiko gupai nga ko akusi rani ni kpiako?

⁵ Yekova ayugu irisa furani ni kusako rani ni kpiako. (Bam.P. 1:26, 27) Bambiko i akusi rani ni kpia Mbori, ani ima rengba ka wirika wai ka yugo gako bawene asino. Ni kpiapai, ani ima rengba ka yugo nyemuse, nunga, weneringise, gbiati kakuti manga rurupai. (Tam. 86:15; 145:17) Ho ani asonosa agi asino re ni, ani nafu taarimo fu Yekova na ani kini yuguhe nga ani na bakere tambuahe fuko. (1 Pet. 1:14-16) Ho ani amangapai ni ngba gu gene nga gu nasa ngbarago ti gu Barani du ngbangbaturũ yo, ani nadu na ngbarago. Berewe a, mbiko gupai nga ani na agu asino tirani du Yekova na ni, ani ima rengba ka da ni gu ngbatunga aboro ko aida yo rogo gako riikporo.

6. Waigu Yekova ayugu irisa fu wiri aboro ho ko ambakadi kpotosende ni?

⁶ Yekova ambakadi bawene kporo furani. Bakuru kusayo mbata fu Yekova kusi bambata kumba, ko aima mbakada kpotosende tipa wiri aboro. (Eyo. 38:4-6; Yere. 10:12) Wa duhe nga Yekova naberãpa rani aberã na kingia bagamu ahe, ko akusi badungu wene ahe furani tipa ani gbia ngbarago ti ni. (Tam. 104:14, 15, 24) Ti kura aregbo, ko anadia regbo adia kaa berãkuriipa agu ahe ko akusihe na ko “ki bi he ya si ni wene he.” (Bam.P. 1:10, 12, 31) Ko ayugu irisa fu aboro nimaa ko yo i “nizogo” gu bawene ahe dunduko ko akusihe auru kpotosende. (Tam. 8:6) Ga Mbori ringbisapai nga, ko naida rengberengbe aboro gbia ngbarago ti ngerafuo gako kusikusi ahe nyeanye kindi. Ya mo mo naafu tambuahe fu Yekova dedede tipa gu bawene kidohe re?

7. Waigu Yosua 24:15 ayugo gupai nga aboro na kina gu ranirii beyo nga ga siapai?

⁷ Yekova ima fu gu gamahe furani nga ga du na ranirii ka siapai. Ani ima rengba ka sia gupai ani nika mangaha rogo raka yo. (Oni gedi Yosua 24:15.) Du na ranirii nga du na rengba ka siapai. Gaani Mbori nyemuse nangiangi ho ani asia gupai ni nga ka irisoko. (Tam. 84:11; Snz. 27:11) Ani ima rengba ka mangasunge na gaani ranirii nga ga siapai ka manga gu kura badungu wene adiaberã. Ani makianga gu kpiapai Yesu amoihe.

8. Gini kura gene sa Yesu amangisunge ngbaha na gako ranirii nga ga siapai?

⁸ Ani ima rengba ka wirika Yesu nisia ani ka maa gu nyemuapai nga ga kura aboro mbatayo fu gaani. Rogo kura uru sa, ho Yesu na gako abawiriki adu ni na bakere mbugo, i andu ku rogo zezeredi ba tipa wa ka i ongodi rogoho tooni.  Ono tie, i aaongoda nga te. Bakere rimbasa aboro agbiayo na i aaida Yesu yugupai fu yo. Ono ngbadu Yesu aaimanga te. Kuba gure, nunga agu aboro re aziko. Sidu, ginipai Yesu amangihe? ‘Ko atona yugo dungu apai fu yo.’ (Mk. 6:30-34) Ho ani awirika Yesu ni nimanga ani sunge na gaani regbo gbiati gaani ome tipa ka undo kura aboro, si naye na taarimo fu gu Barani du ngbangbaturũ yo. (Mt. 5:14-16) Na ani nayugo gupai a fu Yekova nga ani naida kadu ni papara gako aborokporo.

9. Gini kparakpara gamahe Yekova nafuhe fu avunguagude?

⁹ Yekova ima fu gu tandu fu wiri aboro nga ga vunga agude, gbiati gu tindiro nga ga yugopai fuyo tipa i kpinyemu ko na kini irisiko. Ka singia mo nga vungugude, ya mo mo na tambuahe tipa gi kparakpara gamahe re? Wa vura duhe nga Yekova ima fu bakere tandu mangaapai fu amaraika, ko afunga gu momu fuyo nga ga vunga agude te. Sidu, ka singia vungugude nga mo, mo du na tambuahe tipa gu momu du bero nga ga sonosa agude. I ima fu gu nyanyakipa tindiro fu avunguagude nga ga raba awiriyo rogo “ga Gbia rabahe na rugahe.” (Ef. 6:4; Pa Rug. 6:5-7; Tam. 127:3) Tipa ka undo avunguagude, ga Mbori riigbu ima fu badungu aũsunge du mburuhe ri Ziazia Kekeapai, wa gu nga awaraga, avidio, abia, na agu akeke apai du rogo Internet. Si tie ziazia nga, gu Barani du ngbangbaturũ yo gbiati Wiriko ima kpinyemu rukutu agude. (Rk. 18:15-17) Ho avunguagude amanga gupai ni rengbe omeyo na ni tipa kaa ngera fuo awiriyo, Yekova nadu na ngbarago. Na gu ngbatunga avunguagude re na fu gu maabangirise fu awiriyo nga ga du ni ga Yekova aborokporo nyeanye kindi!

10-11. Ginipai Yekova nasaha ni taataha furani bambiko ga Yesu motumo tumorii?

¹⁰ Yekova afu Wiriko ko naima kpinyemuko gbe tipa gupai nga ani du na rengba berewe kada ni papara Gako aborokporo. A wa ani nifura tipaha rogo genewaraga 4, ho aAdamu na Eva aingipai ni, i aadunga na rengba berewe kadu ni papara ga Yekova aborokporo te, na zavura awiriyo a. (Rom. 5:12) AAdamu na Eva asia ka basasangba Mbori, si arẽarẽ tipa i kusiyo kusayo dagba gako aborokporo yo. Ono ginipai narengbe ka manga tipa awiriyo? Yekova ima kpinyemu aboro, sidu, ko asaha taata tipa ka dia agu awiri aAdamu na Eva nagiasangbako ku dagba gako aborokporo yo. Ko amangi gipai re ni fuko bangisa Wiriko nga Yesu Kristo ni motumo tumorii. (Yo. 3:16; Rom. 5:19) Yekova aima du na rengba ka dia ruru aboro nga 144,000 ni awiriko bambiko ga Yesu motumo tumorii.—Rom. 8:15-17; Yugo. 14:1.

¹¹ Badungu amirioni ruru aboro nagiasangba Yekova na kini mangi gupai ko akpinyemuhe. I na gu maabangirise nga ga da ni papara gako aborokporo tingbafuo gu bakere asada nika manga ti digido Agarã Kutu. (Tam. 25:14; Rom. 8:20, 21) Bambiko i na gi maabangirise re, i nayamba Yekova ayamba nga bakusiyo nga “Barani.” (Mt. 6:9) Agu aboro nika zinga be kpio a nika duadu na rengba ka wirika gupai Yekova aidaha beyo. Aguyo nika sia ka mangapai kuti gako arugapai nika da a ni papara gako aborokporo.

12. Gini sanahe ani nika karagapai awere kutini?

¹² A wa ani nabihe, Yekova ima manga badungu apai tipa ka yugo irisa fu wiri aboro. Yekova ima dia mbedimbedi aKristano ni awiriko na ko ima fu maabangirise fu “bakere rimbasa aboro” nga ga da ni awiriko rogo vovo zegino. (Yugo. 7:9) Ginipai rengbe ani ka mangaha awere tipa ka yugo na ni nga ani naida kadu ni papara ga Yekova aborokporo nyeanye kindi?

13. Ginipai rengbe ani ka mangaha tipa kadu ni papara ga Mbori aborokporo? (Marako 12:30)

¹³ Mo yugu gamo nyemuse tipa Yekova niiriso mo ko na kpotoroyo dũ. (Oni gedi Marako 12:30.) Yekova ima fu badungu agamahe  furani, gu nyakipaha gbe dagba agu agamahe re nga du ani na rengba ka irisoko. Ani nayugo gupai fu Yekova nga ani ima kpinyemu ko ni “ka ani kuti gako rugute.” (1 Yo. 5:3) Rugute watadu zinahe sa dagba agu azinahe yo nga gu Yekova aida ani irisihe nga gu zinahe Yesu afuhe tipa sa aboro ni abawiriki na kini bapatizi yo. (Mt. 28:19) Ko afu zinahe furani a ani kpinyemu akuarani. (Yo. 13:35) Yekova nadia agu aboro dunduko kugume nga aguyo nagiasangbako ni papara gu gako aborokporo du rogo zegino dunduko nga aguyo nairisako.—Tam. 15:1, 2.

14. Waigu rengbe ani ka yugo nyemuse fu akuarani? (Matayo 9:36-38; ARomo 12:10)

¹⁴ Mo yugu nyemuse fu akuaro. Nyemuse nga gu sino Yekova nyakipaha gbe. (1 Yo. 4:8) Yekova ayugu nyemuse furani mbata fu ani iniko. (1 Yo. 4:9, 10) Ani nawirika ko ho ani ayugo nyemuse ni fu kura aboro. (Ef. 5:1) Gene sa nga gu rengbe ani ka yugo nyemuse fu aboro ngbaha nga ni undo ani yo i ye ka wirikapai tipa Yekova wa du regbo kindi koyo. (Oni gedi Matayo 9:36-38.) Ho ani aundo yo ni, i nawirika wai kada ni papara ga Mbori aborokporo. Fuo boro zi bapatiza, si naida ani naandu kindi kumbatayo kaa kpinyemu ni na kini yugu irisa funi. (1 Yo. 4:20, 21) Waigu rengbe ani ka manga gipai re? Kpiapai sa nga, nidu ani na kido kuti ni. Ka si du nga ani aruganga tirani na ndu gupai ni namangipai ti ni te, ani aberãnga gupai nga ni namangaha mbiko gbangbati te. Kuba gure, ani nika yugo nyemuse fu wirinarani kini bi ni nga ni pa ni nakii kisusi gaani.—Oni gedi ARomo 12:10; Frp. 2:3.

15. Ada si aida ani yugu inapai na wenesino fuyo?

¹⁵ Mo yugu inapai na wenesino fu aboro dunduko. Ka ani aida kadu ni papara ga Yekova aborokporo nyeanye kindi, si naida ani naamanga agu apai rogo gaani raka yo du rogo Fugoko yo. Ni kpiapai, Yesu ayugu gupai nga, ani yugu inapai na wenesino fu aboro dunduko, zavura fu avurarani. (Rk. 6:32-36) Ti kura aregbo, gipai re ima rengba kadu ni kpakarakpakaraha furani tipa ka mangaha. Ka singia wo duhe, si naida ani wiriki wai kaa berã na kini mangipai wakina Yesu. Ho ani amanga ome ni wa rẽ omerani na ni tipa ka giasangba Yekova na kini wiriki Yesu, ani nayugoho fu gu Barani du ngbangbaturũ yo nga, ani naida kadu ni papara gako aborokporo nyeanye kindi.

16. Waigu rengbe ani ka banda gu wene rimo nga ga ga Yekova aborokporo?

¹⁶ Mo bandapa gu wene rimo nga ga ga Yekova aborokporo. Dedede rogo riikporo, tooni paranga ninaawirika kina gupai unvura ni amangaha. Ka si du nga unvura gu tooni paranga re namangapai kuti gupai Baibiri apehe, ko nadu ni wene kpiapai fu tameko. Ka unvura gu tooni paranga re aamanga kina gbegberẽ apai, gi tooni paranga re ima rengba ka pekafuo ga unvurako gbegberẽ kpiapai. Kina gu bangisapai re du tipa ga Yekova riikporo. Ka si du nga gu Kristano naanidu ni ruru ni da kusa ni basamungu kuti ndikidi pambori, watadu ni mangi wasiwasi mangapai watadu gbegberẽ apai, gu kura aboro ima rengba ka wirika ni na ki mangi gupai a du ni gbegberẽhe. Agu aboro namanga gipai re naye na gbarasarimo kuti rimo ga Yekova aborokporo nga airisiko. (1 Tesa. 4:3-8) Si naida ani mbu pekafuo gbegberẽ akpiapai na ki zanga mbu ai pai si gberani kusayo ti gu Barani nga boro nyemuse du ngbangbaturũ yo.

17. Gini ngbatunga berãpai si aida ani nehe, na tipagine?

¹⁷ Mo kido kuti Yekova angianga kuti aũborose ya. Yekova kidohe nga, ko nika fu riahe, roko, gbiati bambu afu furani ka ani aagbata gako Kindo mbata na kini raki kuti gako ruru arugute. (Tam. 55:22; Mt. 6:33) Ho ani akido ni kuti gu kidohe re, ani aberãnga gupai nga agi aũzegino re nika sarani ani du ni bandabanda rani na ki sarani ani du na ngbarago te. Ani ima ino gupai nga, gu yangara gene nga gu rengbe ani ka gbia gu ndikidi zereda nga ga berãseyo ngbaha nga, nimanga ani gupai Yekova akpinyemuhe. (Frp.  4:6, 7) Ka si vura du vurũ nga rengba kinaho berani tipa ka ngbe badungu ahe, si naida ani bihe singia ani na gu regbo gbiati gu ome si aidaha tipa ka mangasunge na agu ahe re na kini ngerefuo ho. Ya mo ani rengbe ka zio tirani gbe kuti gaani ahe? Si naida ani tingidi gupai nga, Mbori ima fu sunge furani ani mangihe rogo gako riikporo. Gure nayugo gupai nga si aidanga ani mbu gu kura apai si gbe berãrani kusayo te. Nirengo, ani aidanga kadu wa gu paranga kumba nga guko naakpinyemu gako ahe nikerehe na ki diberã ka zanga pekafuo Yesu te. Sidu, ko aima zanga gu momu nga ga du ni boro sa dagba awiri Yekova yo—Mk. 10:17-22

18. Gini ngbatunga pa irisa na amaku aboro giasangba nika gbia ngbarago ti ni nyeanye kindi?

¹⁸ Aboro giasangba nika gbia ngbarago tigu bakerepa irisa nga—kadu na gu momu nga ga kpinyemu Yekova na kini irisiko nyeanye kindi! Agu aboro du na gu maabangirise nga ga raka auru kpotosende ane nika du a na ngbarago ka ngerafuo kpotosende nga gu Yekova ambakadihe fuyo tipa si du ni bawene kpuyo. Barambeda, ga Mbori Kindo nika sa agu ahe berewe dunduko du auru kpotosende ni bawenehe. Yesu nika nyasa riipa agu akpakarapai dunduko nga gu ye mbiko ga aAdamu na Eva diaberã ka mbu ga Yekova aborokporo. Yekova nika zingisa amirioni aboro be kpio na ki fu gu momu fuyo nga ga raka nyeanye kindi na wene kpotose auru gu kpotosende i nika saha ni paradizo. (Rk. 23:42, 43) Ho agu aboro nairiso Yekova nika da ni ni rengberengbeyo, i dunduko nika gbia gu “irisa na taarimo” i nafura tipaha rogo Ziazia Kekeapai yo.—Eb. 2:7.

19. Ginipai si aida si du berãrani yo?

¹⁹ Ka si du nga mo dagba “bakere rimbasa aboro” yo, mo na bawene maabangirise. Mbori ima kpinyemu ro; ko naida mo du ni boro sa dagba gako aborokporo yo. Sidu, mo mangi ai gupai rengbe mo ka mangaha tipa ka fu ngbarago fuko. Mo naaraka na aˈuru dunduko na ga Yekova akidohe berãro yo na ngbaduro yo. Mo naabi gu momu nga ga iriso gu Barani du ngbangbaturũ yo na nyanyakipaha, na mo naabi gu maabangirise nga ga fu taarimo fuko nyeanye kindi na nyanyakipaha a!