1, 2. Бу јӧрмӧлдӧ нени кӧрӧрис?

СЛЕР посылканыҥ келерин сакып јадаар, је ол јок ло јок. Мынаҥ улам санааркайдыгар. Укаа сӧстӧр 13:12-де тегиндӱ айдылбаган. «Узак ӧйгӧ бӱтпей турган ижемји јӱректи сыстадат». Је посылканыҥ нениҥ учун узак келбей турганын билип ийзеер, сакыырга кӱч эмес боло берет.

² Бу јӧрмӧлдӧ биске чыдамкай болорго болужатан кезик библиялык принциптер кӧрӧрис (Мих. 7:7). Анайда ок кандый эки айалгада Иегованы чыдажып сакыыр керек деген сурак шӱӱжерис. Бого коштой чыдамкай болуп, сакыырга белен улуска Иегова кандый алкыштар берерин кӧрӧрис.

3. Укаа сӧстӧр 13:11-деги принцип бисти неге ӱредет?

³ Укаа сӧстӧр 13:11-деги принцип бисти чыдамкай болорына ӱредет. Ондо мынайып айдылат: «Меҥдеп јууган јӧӧжӧ тӱрген божоор, бир эмештеҥ јууганы арбынду болор». Бу сӧстӧрлӧ болзо, ойгор кижи немени меҥдеш јогынаҥ эдет, оныҥ эткен ижи једимдӱ болот.

4. Укаа сӧстӧр 4:18-теги принцип нени кӧргӱзет?

⁴ Укаа сӧстӧр 4:18-те мынайып айдылган: «Чындык улустыҥ јолы јаркындалып турган таҥ ошкош, ол кӱн чыкканча там ла там јарыйт». Бис бу сӧстӧрди Иегова улуска бойыныҥ амадузын араайынаҥ ачып турган деп айткан тушта тузаланадыс. Анайда ок бу принципти христиан кижиниҥ кӧгӱс ӧзӱми керегинде айткан тушта  тузаланарга јараар. Кижи кӧгӱс јанынаҥ ӧссин деп ӧй керек болуп јат. Бис Кудайдыҥ сӧзи ле оныҥ организациязы ажыра берилип турган јӧптӧрди лаптап угуп, тузаланып турзаас, Христостыҥ кылык-јаҥдарына араайынаҥ ӱренип аларыс. Анайда ок Иегованы оноҥ јакшы билип аларыс. Бу шӱӱлтени Иисус кандый темниҥ болужыла јартаганын кӧрӱп ийектер.

5. Иисус кижиниҥ кӧгӱс ӧзӱмин кӧргӱзерге, кандый тем тузаланган?

⁵ Каандык керегинде јар ачык јӱректӱ кижиниҥ јӱрегинде кичинек ӱрен чилеп араайынаҥ ӧзӧт деп, Иисус айткан. «[Аш ӱрендеечи] ӱрен чачат... је ӱрен канайда чыгып, ӧзӱп турганын билбейт. Јер дезе бойы-бойынаҥ озо баштап кӧк ӧскӱрет, оноҥ мажак, оноҥ мажакты ашла толтырат» (Марк 4:27, 28). Иисус нени айдарга сананган? Канайып ӱрен араайынаҥ ӧзӱп јат, анайып ла Каандык керегинде јарды алынган кижи кӧгӱс јанынаҥ араайынаҥ ӧзӧт (Еф. 4:22—24). Агару Бичикти ӱренип турган кижи Иеговага канча ла кире јуук болуп калза, оныҥ солынып турганы биске ончо ло кире јакшы кӧрӱнип турар. Је «кичинек ӱренди» Иегова ӧскӱрет деп ундыбас керек (1 Кор. 3:7).

6, 7. Иегованыҥ Јерди јайаганынаҥ нени билип аладыс?

⁶ Иегова кандый бир ишти эдип јатса, чыдамкай болуп, бу ишке ӧйди јеткилинче берип јат. Оны ол бойыныҥ адын макка чыгарарга ла јайаандарына јакшы болзын деп эдет. Темдектезе, Иегова јерди улуска араайынаҥ белетеген.

⁷ Агару Бичикле болзо, Иегова Јердиҥ «кемин тургускан», «оныҥ тӧзӧгӧзин салган» ла оны «бек тӧзӧлгӧлӱ тургускан» (Иов 38:5, 6; Сар. 104:5). Анайда ок ол иштеп тура, ижиниҥ аайы-тӧйин кӧрӧргӧ ӧй табып туратан (Баш. 1:10, 12). Сананып ийзеер де, ангелдерде Иегованыҥ кажы ла јаҥы  јайаанын кӧрӱп, кандый сезимдер болгон деп. Олор Иегованыҥ бийик кеминде эткен ижин кайкап, тыҥ ӱнденип, мак јетирген (Иов 38:7). Бис мынаҥ нени билип јадыс? Јерди јайаарга канча муҥдар јылдар барган да болзо, Иегованыҥ эткен кижи «ончозы јакшы» болгон (Баш. 1:31).

8. Бис кандый сурак кӧрӧрис?

⁸ Агару Бичикте чыдамкай болор керек деп кӧргӱзип турган кӧп принциптер бар деп кӧрдис. Је эмди кандый эки айалгада Иегованы сакыыр керек деп кӧрӱп ийектер.

9. Иегованы кандый айалгада сакыыр керек?

⁹ Кезикте мӱргӱӱлдеристиҥ каруузын сакыырга келижет. Бис кезикте ченелтени ӧдӧргӧ ле кандый бир уйан јанысла тартыжарга Иегованаҥ болуш сурап јадыс. Је мӱргӱӱлистиҥ каруузы узак ӧйгӧ јок деп билдирер болор. Нениҥ учун Иегова кезик мӱргӱӱлдериске каруузын капшай бербей јат?

10. Мӱргӱӱлдеристиҥ каруузын нениҥ учун чыдамкай болуп, сакыыр керек?

¹⁰ Иегова бистиҥ мӱргӱӱлдеристи лаптап угуп јат (Сар. 65:2). Ого акту јӱректеҥ мӱргӱгенис бӱдӱмјибисти кӧргӱзет (Евр. 11:6). Анайда ок мӱргӱӱлдеристеҥ Иегова бисти мӱргӱӱлдерис аайынча эдерис пе, оныҥ кӱӱн-табын бӱдӱрерис пе деп кӧрӧргӧ јат (1 Иоанн 3:22). Темдектезе, бис кандый бир уйан јанысла эмезе јаман кылыгысла тартыжып, Иегованаҥ болуш сурап јадыс. Бу айалгада биске чыдамкай болуп, андый кылыгысла тартыжарга, бойыска албаданар керек. Иегова кезик мӱргӱӱлдерге карууны капшай бербей турган деп, Иисустыҥ сӧстӧринеҥ кӧрӱнет. Ол айткан: «Сурагар, слерге берилер; бедирегер, табарыгар; токылдадыгар, слерге ачып берер. Сураган кижи алат, бедирегени табат, токылдатканга ачып берер» (Матф. 7:7, 8). Бис бу јӧпти тузаланып, јаантайын мӱргӱп турзаас, теҥеридеги Адабыс мӱргӱӱлдеристи угуп, каруузын кыйалта јогынаҥ берер деп, алаҥзыбас аргалу (Кол. 4:2).

11. Мӱргӱӱлистиҥ каруузы удап турган деп билдирзе, Еврейлерге 4:16-гы сӧстӧр канайып болужар?

¹¹ Бистиҥ мӱргӱӱлдериске Иегова карууны узак бербей турган деп билдирер болор. Је ол карууны керектӱ ӧйдӧ берип јат. (Еврейлерге 4:16 кычырыгар.) Бис мӱргӱӱлистиҥ каруузын кӱӱнзегенисле тӱрген албай турзаас, Иеговага ачынбас керек. Темдектезе, кӧп ака-эјелер канча јылдыҥ туркунына Кудайдыҥ Каандыгы бу калју телекейди јоголтсын деп мӱргӱп јат. Иисус бу керегинде мӱргӱзин деп айткан (Матф. 6:10). Је јаҥы телекей улустыҥ сакыган ӧйинде келбегенинеҥ улам Кудайга бӱтпей барары ойгор эмес болор (Авв. 2:3; Матф. 24:44). Оныҥ учун биске Иегова мӱргӱӱлдериске карууны берер деп бӱдӱп, оноҥ ло ары мӱргӱӱр керек. Бу телекейдиҥ учы ӧйи-ӧйинде једип келер, нениҥ учун дезе ол кӱнди ле саатты Иегова тургузып салган. Анайда ок оныҥ тургузып салган ӧйи Иегованы сӱӱп турган ончо улуска эҥ эптӱ ӧй болор (Матф. 24:36; 2 Петр 3:15).

12. Биске база кандый айалгада анчада ла чыдамкай болор керек?

¹² Справедливость качан болорын кезикте биске сакыырга келижип јат. Бу телекейде кӧп саба улус эдиниҥ ӧҥи,  угы, культуразы башка улуска јаман баштанат. Анайда ок кенек, психический оорулу улусты уйан кӧрӱп јат. Иегованыҥ Керечилерин де јаман кӧргӱлейт. Биске анайып баштанып турган болзо, Иисустыҥ сӧстӧрин ундыбас керек. Ол айткан: «Учына јетире чыдашканы дезе, аргадалар» (Матф. 24:13). Ака-эјелердиҥ кемизи де уур кинчек эдип салган болзын, бу керегинде слер билип ийгенеер, мыны аксагалдар база билер. Слер олордыҥ кандый јӧп чыгарарын сакып болороор бо? Мындый керектерди кӧргӧн тушта, Иегова аксагалдардаҥ нени некеп турганын билип турзагар, сакыырга јеҥил болор.

13. Уур кинчектерле колбулу керектерди кӧрӱп турган аксагалдарга Иегова кандый некелтелер тургускан?

¹³ Аксагалдар јуунда уур кинчек эдилгенин билип ийзе, бу айалгага Иегованыҥ кӧрӱмиле кӧрӧргӧ, ого мӱргӱп, ӧрӧртинеҥ келип турган ойгорлык сурап јат (Иак. 3:17). Олордыҥ амадузы — кинчек эткен кижиге «јастыра јолын» артыргызарга болужары (Иак. 5:19, 20). Анайда ок олор јуунды корулаарга ла бу кинчектеҥ улам каршу јетирилген ака-эјелерди токунадарга албаданат (2 Кор. 1:3, 4). Мындый керектерди кӧрӱп, аксагалдар керек чыннаҥ ла кандый болгонын билип аларга, ончо јетирӱлерди јуур учурлу. Бого дезе бир канча ӧй керек болуп јат. Оноҥ олор мӱргӱп, кижиге тӱзединерге болужатан библиялык ӱлгерлерди јазап талдап алала, тӱзединетен эп-аргаларды ӧйи кеминде тузаланат (Иер. 30:11). Аксагалдар јӧпти чыгарарга, ӧйди чӧйбӧй јат. Је бу ок ӧйдӧ јӧпти тӱрген-тӱкей база чыгарбай јат. Аксагалдар мындый керектерди кӧрӱп, Иегованыҥ јакарулары аайынча этсе ончо јуунга туза болот. Је андый да болзо, бу кинчектеҥ улам каршу јетирилген ака-эјелердиҥ ачузы, узак ӧйгӧ ӧтпӧй јат. Слерде мындый айалга болгон бо? Эйе болзо, слерге не болужар?

14. Слерге кем-кем несправедливо баштанган болзо, кандый библиялык тем болужар?

¹⁴ Слерге качан бирде кем-кем, керек дезе јуунда да несправедливо баштанган ба? Эйе болзо, слерге Агару Бичиктеги Иегованы чыдамкай болуп сакыган улустыҥ темдери болужар.  Иосифтиҥ темин эске алып ийектер. Ол кожо чыккан акаларынаҥ улам шыралаган. Је Иосиф бир де катуланбаган, оныҥ ордына ол бастыра кӱчинеҥ Иеговага иштеген. Иегова оны чыдамкайы ла турумкайы учун кайралдаган (Баш. 39:21). Кийнинде Иосиф акаларыныҥ јаманын таштап, бу айалгала Иегова башкарган деп оҥдоп ийген (Баш. 45:5). Мындый айалгада Иегова справедливостьты тургуспаганча, бис те Иосиф чилеп, Иеговага јууктазаас, бир де чӧкӧбӧзис (Сар. 7:17; 73:28).

15. Бир эјеге јаманга удура јаман этпеске не болушкан?

¹⁵ Бисте Иосифтиҥ кӱчтериндий кӱчтер болбос болор. Је биске кем-кем јаман баштанза, ачу болот. Бисти ачындырган кижи Иегованыҥ Керечизи эмезе Керечи эмес те болзо, биске библиялык принциптер болужар (Флп. 2:3, 4). Яна деп эјеле болгон учуралды кӧрӱп ийектер. Ол кожо иштеп турган кижизи оны јамандап, тӧгӱн неме айдып турганын угуп ийген. Бу ачынчылу да болгон болзо, Яна капшай ла керектиҥ аайына чыгарга албаданбаган. Ого не болушкан? Ол Иисустыҥ темин шӱӱп сананган. Иисусты улус канча катап јамандаган да болзо, ол удура јамандабаган (1 Петр 2:21, 23). Оныҥ учун Яна ол кижиниҥ айткан сӧстӧрин јӱрекке јуук алынбас деп сананган. Јаан удабай оны јамандаган кижи тыҥ оорып турганынаҥ санааркаган деп билип ийген. Бу дезе Яна эјеге ол кижи немени јазап сананбай јадып айткан болор деп, оҥдоорго болушкан. Яна чыдамкай болуп, изӱ тарый неме этпегенине сӱӱнген. Ол ончо јаманды ундып салган.

16. Слерге несправедливо баштанган болзо, слерди кандый шӱӱлте токунадар аргалу? (1 Петр 3:12).

¹⁶ Слерге несправедливостьтоҥ эмезе ӧскӧ кандый бир шылтактаҥ улам ачу болуп турган болзо, Иегова санааркап турган улусты бир де артыргыспай јат деп ундыбагар (Сар. 34:18). Ол слерди кӱч айалгада чыдамкай болуп, ого иженип турганаар учун сӱӱп јат (Сар. 55:22). Иегова — ончо јердиҥ Јаргычызы.  Оныҥ кӧзинеҥ не де туура калбай јат. (1 Петр 3:12 кычырыгар.) Оныҥ учун кандый бир кӱч айалгага кирип, мыныҥ аайына канайып чыгарын билбей турган болзоор, чыдамкай болуп, Иегованы сакыгар.

17. Исаия 30:18-те Иегова нени эдер деп сӧзин берет?

¹⁷ Удабас Кудайдыҥ Каандыгы бистиҥ теҥеридеги кысканбас Адабыстыҥ берген ончо сӧстӧрин бӱдӱрип салар. Исаия 30:18-те мынайып айдылат: «Је Иегова слерге болужарга, чыдамкай болуп сакыйт, ол слерди килеерге кӧдӱрилер. Нениҥ учун дезе Иегова — справедливый Кудай. Оны сакып турган улустыҥ ончозы ырысту». Айдарда, Иеговага иженип, оны сакып турган улус бӱгӱнги де кӱнде, келер де ӧйдӧ кӧп алкыштар алар.

18. Бисти кандый кайрал сакып јат?

¹⁸ Јаҥы јӱрӱмде Кудайдыҥ ишчилеринде кандый да санааркаштар ла кӱчтер болбос. Несправедливость то, оноҥ улам болуп турган санааркаштар да ӱргӱлјиге јоголып калар (Ачыл. 21:4). Кем де нени кийер, нени ичер, нени јиир деп санааркабас. Нениҥ учун дезе ончо неме артыгынча болор (Сар. 72:16; Иса. 54:13). Сӱреен јакшы алкыштар дезеер?

19. Иегова бисти араайынаҥ неге белетеп јат?

¹⁹ Је эм тура Иегованыҥ башкарар ӧйи келгелек. Ол биске јаман кылык-јаҥдарыстаҥ айрылып, ого јараар кылык-јаҥдарга ӱренерге болужат. Бисти сӱреен јакшы ӧй сакып јат, оныҥ учун турумкай болугар. Иегова берген ончо сӧстӧрин бӱдӱрбегенче чыдамкай болуп, оны сакып јӱректер.