1-2. Kii di ga tehe munu yigil ini?

U GA boñ lelaa ibale u mbem ngim yom ndi i lôl bé i ngéda u bemek yo? Baa hala a ga tééñga we? Ibale hala, u nla ni nok inyuki kaat Bingéngén 13:12 i nkal le: “Botñem i kiiñakiiña i nkônôs ñem.” Ndi kii w’a boñ ibale ba nti we manjom malam, ma ma mboñ le i yom u mbem, i nlo bé i ngéda u bé bémlak yo. Ha ngéda i, bebek u ga ba bebee i bem ibabé waa.

² Munu yigil ini, di ga tehe ngim matiñ ma Bibel ma ma nla hôla bés i “bem Nyambe . . . ibabé waa.” (Mika 7:7, MN.) I mbus, di ga tehe makas ma niñ ima ma tôbôtôbô i het di nlama bem Yéhôva. Sôk i nsôk, di ga tehe bisai bi mbem i bet ba mbem Yéhôva.

3. Kii litiñ li yé i kaat Bingéngén 13:11 li niiga bés?

³ Kaat Bingéngén 13:11 i nhôla bés i nok inyuki di nlama hônba, i nkal le: “Nkus ngi ndumbba u nyoi, ndi nu a nkôhle [ndék ni ndék] nyen a’ keñep.” Baa u ntibil nok i yom u nlôñ unu u niiga bés? Le mut pék a nyoñ ngéda mu kiki a mboñ mam, a nkot ndék ni ndék, a nke bé ngwéé.

4. Kii litiñ di nléba i kaat Bingéngén 4:18 li niiga bés?

⁴ Kaat Bingéngén 4:18 i nkal le: “Ndi njel bôt ba téé sép i yé kiki mapubi ma maye ma kel, mon ma mbai, bai ni bai letee ni njamuha yaga.” Bibuk bini le njel i bôt ba téé sép, i yé loñge titii inyu nôgha bés lelaa Yéhôva a mboñ inyu hôla bagwélél bé i nok sômbôl yé.  A mboñ hala ndék ni ndék. Ba nla yak gwélél i titii i inyu pôdôl mahol kristen i mboñ i pes mbuu. I mbéda toi ngéda inyu boñ le mut a kôôge bebee ni Yéhôva. Ibale di nyoñ ngéda i tibil nigil Bañga i Djob ni maéba ntôñ wé u nti bés, di bii i yom di nigil i bisélél, ndék ni ndék, di nkahal hôlôs bilem bi Kristô. Hala a ga boñ ki le, di pam i yi Nyambe loñge. Di tehe hihéga hiada Yésu a bi ti inyu nôgha bés i jam li.

5. Himbe hihéga Yésu a bi ti inyu unda le i hol i pes mbuu i mbat ngéda?

⁵ Yésu a bi yoñ hihéga inyu unda bés lelaa mbôô Ane ba mbel i ñem u mut a ngwés maliga i nhol, hol ni hol. A kal le: “A nyi bé lelaa mbôô i ño to lelaa i nañ, hisi hiomede hi mboñ le mbôô i ño ndék ni ndék, hi nti ndugi man kai, i mbus ntudu u pam, sôk i nsôk, u yila nhôôlak ntudu nyonok ni mis.” (Markô 4:27, 28) Kii Yésu a bé sômbôl niiga bés hana? A bé sômbôl toñle bés le, kiki bebela i nañ, mbeñel mbeñel, hala nyen, i mut a neebe ñañ nlam, a nhol ndék ni ndék i pes mbuu. Kiki hihéga, i ngéda bôt bés ni bo di nigil Bibel, ba nkahal kôôge Yéhôva bebee, di mbôdôl tehe mahéñha ba mboñ, ndék ni ndék. (Éfésô 4:22-24) Ndi di hôya bañ le, Yéhôva nyen a mboñ le i mbôô di mbel i nañ.​—1 Korintô 3:7.

6-7. I ngéda di mbéñge lelaa Yéhôva a bi hek hisi, hala a niiga kii bés?

⁶ Di nigil le, ikété mam momasôna Yéhôva a mboñ, a nyoñ ngéda i mbéda, inyu mélés nson wé. A mboñ hala inyu ti jôl jé lipém, ni inyu hôla bôt bape. Kiki hihéga, di témb di mbigda kiki a bi kôôba hisi inyu bôt ba binam. A bi gwel i nson u, mbeñel mbeñel.

⁷ Inyu unda bés lelaa Yéhôva a bi hek hisi, Bibel i ngwélél bibuk kiki bo, “a bi téé minwaa mi hisi,” “mél mé ma umne,” ni “a bi tek ngok yé likas.”  (Hiôb 38:5, 6, MN.) A bi yoñ yak ngéda i wan bôlô yé. (Bibôdle 1:10, 12) Baa ni nhégha i yom biañgel bi bi boñ, i ngéda bi bi tehe i mam ma mondo Yéhôva a bé hek? Biañgel bi bé maséé ngandak inyu hala nyen bi bi kahal ‘kon maséé.’ (Hiôb 38:7, MN.) Kii hala a niiga bés? Le inyu hek hisi, tjôdôt ni bini bihégél bipe gwobisôna bi niñ, hala a bi bat dikôô di nwii, ndi i ngéda Yéhôva a bi wan i mam momasôna a bi yoñ ngéda i hek, a sugus le “ma [bé] loñge ngandak.”​—Bibôdle 1:31.

8. Kii di ga tehe nano?

⁸ Kiki di ntehe munu dihéga dini, ngandak matiñ ma Bibel ma nhôla i nok nseñ i hônba. Nano di tehe makas ma niñ ima ma tôbôtôbô, i het, di nlama bem Yéhôva.

9. Imbe ngéda tôbôtôbô di gwé ngôñ i bem Yéhôva?

⁹ Di bem le Yéhôva a timbhe masoohe més. I ngéda di nsoohe Yéhôva, le a ti bés ngui i hônba manoodana tole i yémbél ngim bomb di gwé, di nla nôgda wee, a ntiñha i timbhe masoohe més. Inyuki Yéhôva a mpala bé timbhe masoohe momasôna?

10. Inyuki di nlama bé waa bem le Yéhôva a timbhe masoohe més?

¹⁰ Yéhôva a nyoñ ngéda i emble masoohe més. (Tjémbi 65:3) I ngéda di nsoohe Yéhôva ni ñem wés wonsôna, hala a ñunda nye le di nhémle toi nye. (Lôk Héber 11:6) Ibale di mbat nye le a hôla bés i boñ sômbôl yé, a ga ba maséé ibale a ntehe le di mboñ biliya bi nkiha ni masoohe més. (1 Yôhanes 3:22) Jon i ngéda di nsoohe Yéhôva le a hôla bés i yémbél ngim bomb i i ntééñga bés, di nlama boñ kii yosôna di nla i boñ mahéñha. Yésu a bi unda le, ngim mangéda i nla pam le di kôs bé ndimbhe i masoohe més kunda yada. A kal le: “Ni bat ibabé waa, ndi n’a kôhna; ni yéñ ibabé waa, ndi n’a léba; ni koode ibabé waa, ndi b’a yible bé; inyule hiki mut a mbat, a nkôhna; hiki mut a nyéñ, a nléba; hiki mut a nkoode, b’a yible nye.” (Matéô 7:7, 8) Ibale di noñ maéba ma, ndi di ‘téñbe ni masoohe,’ di nla ba nkwoog nkaa le Tata wés Nungingii a ñemble masoohe més, a ga timbhe ki mo.​—Kôlôsé 4:2.

11. Lelaa kaat Lôk Héber 4:16 i nhôla bés i ngéda di nhoñol le Nyambe a mpala bé timbhe masoohe més?

¹¹ Tolakii i nla pam ngim mangéda le Yéhôva a timbhe bé masoohé més, a mbôn bés le, a ntimbhe masoohe més “i loñge ngéda.” (Añ Lôk Héber 4:16.) Jon di nlama bé unbene Yéhôva, ibale di mbat nye ngim yom ndi di yé ngi kôhna yo. Kiki hihéga, hala a yé ngandak nwii le ngandak bôt i nsoohe le Ane i Djob i loo i mélés i hiai hibe hini. Yésu nyemede a bi kal le, di nlama soohe inyu jam li. (Matéô 6:10) Ndi kinje bijôñ ibale mut a nimis hémle yé, ndik inyule lisuk li nlo bé i ngéda bôt ba binam ba bé bem jo! (Habakuk 2:3; Matéô 24:44) I ga ba loñge le di kee ni bisu i bem Yéhôva, di soohege ni botñem le a ga timbhe i loñge ngéda. Lisuk li ga lo i loñge ngéda, inyule Yéhôva a bi mal téé “kel ni ngeñ.” I ngéda hilo hi hi ga kola, bôt bobasôna ba ga nôgda le, hi nlo i loñge ngéda.​—Matéô 24:36; 2 Pétrô 3:15.

12. Imbe ngéda téntén i nla ba ndutu i hônba?

 ¹² Di bem le Yéhôva a lona telepsép. Munu nkoñ ’isi unu, bôt ba mbéna tééñga i bet ba gwé bé kôgôô yada ni bo, ba ba ta bé litén jada ni bo tole ba ba ta bé loñ yada ni bo. Ba ntééñga bape inyule ba yé bibôk bi bôt, tole inyule miño mi téé bé bo. Ba ntééñga ngandak Mbôgi Yéhôva inyu hémle yap, i ngéda ba ntééñga bés hala di nlama bé hôya bini bibuk bi Yésu le: “Nu a nhônba letee ni lisuk nyen a’ tohlana.” (Matéô 24:13) Ndi kii u ga boñ ibale u nyi le mankéé wada a mboñ béba ikeñi ikété likoda? Ibale mimañ mi mal yi i jam li, baa w’a nwas mam i moo map, u bak nkwoog nkaa le ba ga boñ mam inoñnaga ni sômbôl i Djob? Kii mimañ mi ga boñ?

13. Kii Yéhôva a mbémél mimañ i ngéda mut a mboñ béba ikeñi?

¹³ I ngéda mimañ mi nyi le mankéé wada a mboñ béba ikeñi ikété likoda, mi nsoohe inyu bat “pék i i nlôl i ngii,” yon i ga hôla bo i bana litehge li Yéhôva mu jam li. (Yakôbô 3:17) Njômbi yap i yé le, ba hôla i nwet a mboñ béba, i “nwas béba yé” ibale a nla. (Yakôbô 5:19, 20) Ba gwé ki ngôñ i boñ kii yosôna ba nla, inyu sôñ likoda ni inyu hôgbaha ba bobasôna i béba i i ntééñga. (2 Korintô 1:3, 4) I ngéda mimañ mi nhôla mut a mboñ béba ikeñi, mi nlama tibil wan mam momasôna, hala a nyoñ ngéda. I mbus, ba nsoohe, ba ti mboñbéba maéba ma ma nlôl Bitilna, ba kodol ki nye “i nya i kôli.” (Yérémia 30:11) Tolakii mimañ mi ntiñha bé i ngéda mi nok i nya jam i, to pabla mi mpabla bé. I ngéda mimañ mi ntibil noñ maéba Yéhôva a bi ti bo inyu kodol i nya jam i, likoda jolisôna li nkon maséé. To ibale mimañ mi nkodol i jam li, i nla pam le i nwet i jam li li mpémél, a kee ni bisu i nok njôghe. Ibale wen hala a mpémél, kii u nla boñ inyu kôs hogbe?

14. Umbe ñañ u Bibel u nla hôgbaha we i ngéda mankéé wada a ñunbaha we?

¹⁴ Baa i ma pam le mut wada tole mankéé wada ikété likoda a bep unbaha we? U nla léba dihéga dilam  ikété Bibel, di di nla hôla we i yi lelaa u boñ inyu bem le Yéhôva a kodol mam. Yôsep a bi nok ndutu ngandak inyu ngitelepsép bilôk binyañ bi bééna ipañ yé, ndi a bi nwas bé le mahôha map ma tinde nye i bana lôlha ñem. Maselna ni hala, Yôsep a bi ke ni bisu i gwélél Yéhôva, ni Yéhôva a sayap nye inyu hônba yé. (Bibôdle 39:21) Kiki ngéda i bé tagbe, Yôsep a bi pam i nwéhél lôk kéé yé, a tehe ki bisai Yéhôva a bi kôp nye. (Bibôdle 45:5) Kiki Yôsep, di nkôs hogbe i ngéda di nkôôge Yéhôva bebee, di nwas le nyen a kodol mam i loñge ngéda.​—Tjémbi 7:18; 73:28.

15. Kii i bi hôla sita yada i ba nwee tolakii ba bé ôm nye nsohi yañga?

¹⁵ I yé maliga le, bun bé le di kôs i jam Yôsep a bi kôhna, ndi bésbobasôna di yé di nok njôghe ngandak i ngeñ mut a ntééñga bés. Ibale di gwééna ni mut to a ta bé Mbôgi Yéhôva, di ga kôs bisai ibale di noñ matiñ ma Bibel. (Filipi 2:3, 4) Di nyoñ hihéga hi sita yada. I sita i, i bi bep unup i ngéda i bi léba le muda wada bo nye ba bé sal, a bé tôp nye jôl ipañ solôñ yap i bôlô ipe, a teembak inyu yé. Iloole a kee i tehe nye ngwéé ngwéé, sita a bi yoñ ngéda i ôt pék mu ndémbél i Yésu. A bigda le i ngéda ba bé sol nye, a bé timbhe bé sol inyu sol. (1 Pétrô 2:21, 23) Jon a bi kit le, a nwas i jam li. I mbus, i ngéda sita i bi yik nok le i muda nu a bé kon ngandak, ni le kon wé u bé tééñga nye ngandak, sita i bi kon maséé le i bi hônba i muda nu, i nôgda ki hogbe.

16. Kii i nla hôgbaha we ibale u mboma ngitelepsép? (1 Pétrô 3:12)

¹⁶ Ibale u nhônba ngitelepsép tole yom ipe i i ntééñga we, bigda le Yéhôva a yé bebee ni ba ba gwé “miñem mi nyodop.” (Tjémbi 34:19) Yéhôva a ngwés we, inyule u nhônba, a gwé ki ngôñ le u suha mbegee yoñ i nyeni. (Tjémbi 55:23) Nyen a Ñane nkoñ ’isi wonsôna. Yom yo ki yo i mbôña bé hana ’isi le a nyi bé. (Añ 1 Pétrô 3:12.)  Jon i ngéda u mboma mandutu makeñi, ma u nla bé mélés, bigda le i yé nseñ i bem Yéhôva.

17. Inoñnaga ni kaat Yésaya 30:18, kii Yéhôva a mbôn bés?

¹⁷ Ndék ngéda Tata wés Nungingii a ga kôp bés bisai ni njel Ane yé. Yésaya 30:18 a nkal le: “Yéhôva a’ bem le a kôp bé karis; jon a’ koyop le a kon bé ngoo, inyule Yéhôva a yé Nyambe nu mbagi sép. Ba ba mbôdôl nye ñem, bobasôna ba yé bokimasoda.” I bet ba nwaa bé bôdôl Yéhôva ñem ba ga kôs ngandak bisai nano, ni i mbok yondo.

18. Bimbe bisai bi mbem bés?

¹⁸ I ngéda bagwélél ba Djob ba njôp i mbok yondo, ba ga hônba ha bé mandutu momasôna di mboma i len ini. Ngitelepsép y’a ba ha bé, to njôghe yo ki yo. (Masoola 21:4) Di ga bana ha bé ngôñ i nihbe njal, inyule bijek bi ga ba ni mbok yosôna. (Tjémbi 72:16; Yésaya 54:13) Kinje bisai bi ga ba ha i ngéda i!

19. Yéhôva a nkôôba bés nano inyu niñ hee?

¹⁹ I len ini, Yéhôva a nhôla bés i yémbél bilem bibe di gwé ni i hôlôs bilem bilam inyu boñ le di niñ hana ’isi i ngéda a ga yoñ mam i moo. Jon di tomb bañ, di waa bañ to gwélél Yéhôva. Mam malam ma mbem bés i dilo di nlo. Mu kiki di mbem dilo dilam di, di kee di bisu i bem ibabé waa le Yéhôva a yônôs mimbônga nwé!