1-2. Aha do na naeng tabahas di artikel on?

BAYAKKON ma nga dipaima-ima hamu donganmuna mamboan barang na massai porlu di hamu. Hape dang marna ro ibana. Boha do perasaanmuna? Gabe sogo do rohamuna tu ibana? Poda 13:12 mandok, “Pahaccitton roha do molo sundat na dipaima-ima.” Alai molo taboto do alasanna boasa dang marna ro donganta i, gabe boi ma hita sabar paimahon ibana.

² Di artikel on, tabahas ma akka prinsip ni Bibel na boi mangurupi hita asa toktong ‘sabar paima-imahon Debata’. (Mik. 7:7) Tabahas ma muse dua situasi na maol, jala songon dia hita patuduhon hasabaron molo masa i. Dung i, tabahas ma pasu-pasu na lao tajalo molo toktong hita sabar paimahon Jahowa.

3. Aha do na boi taparsiajari sian Poda 13:11?

³ Di Poda 13:11, dibahen do ilustrasi na patuduhon massai porlu do hasabaron i. Didok ma disi, “Hatop do suda hamoraon na mura didapot, alai lam martamba do hamoraon na dipapungu sasaotik.” Aha do na taparsiajari sian i? Sabar do halak na marbisuk i jala manat do ibana mangulahon karejona. Ujungna gabe denggan ma hasilna.

4. Aha do na boi taparsiajari sian Poda 4:18?

⁴ Poda 4:18 mandok, “Songon mataniari bissar do dalan ni  halak na tigor marroha na lam tiur sahat tu tonga ari.” Sian ayat on, taboto ma songon dia Jahowa mangurupi naposona mangattusi aha lomo ni rohana. Alai ayat i, boi do tong patuduhon songon dia halak Kristen mambahen kemajuan asa boi jonok tu Jahowa. Taingot ma, porlu do tikki asa boi hita jonok tu Jahowa. Ikkon ringgas do hita marsiajar Bibel, taulahon ma na taparsiajari i, jala taihutton ma petunjuk sian organisasi ni Jahowa. Molo taulahon i sude, lam leleng lam mirip ma sifatta tu Kristus. Jala, lam takkas ma tatanda Jahowa. Saonari, taida ma ilustrasi ni Jesus taringot i.

5. Aha do na boi taparsiajari sian ilustrasi ni Jesus taringot boni na gelleng i?

⁵ Dipatudos Jesus do barita Harajaon na tapasahat i tu boni manang bibit na gelleng na tubu di roha ni halak na tulus marroha. Didok Jesus, “Martunas ma boni i, jala lam timbo ma tubu. Alai dang diboto ibana [panabur i] songon dia i masa. Tano i sandiri do na mangalehon parbuena sian tikki tu tikki, mulana ro ma tumburna, dung i biurna, ujungna marisi ma biurna i.” (Mrk. 4:27, 28) Aha do na boi taparsiajari sian i? Songon na didok Jesus, butuh waktu do asa boi martunas jala lam timbo bibit na gelleng i. Suang songon i ma halak na manjalo barita Harajaon i. Porlu do di nasida godang tikki asa boi nasida mambahen kemajuan. Boi do taida i tikki taurupi sasahalak marsiajar Bibel. Molo nga lam jonok ibana tu Jahowa, lam leleng lam denggan ma pangalahona. (Eps. 4:22-24) Ikkon taingot do muse, Jahowa do na mambahen tubu boni na gelleng i di roha ni sasahalak.​—1 Kor. 3:7.

6-7. Aha do na boi taparsiajari sian cara ni Jahowa manoppa tano on?

⁶ Tikki ditoppa Jahowa sude toppaanna, porlu do sabar Ibana. Alana porlu do godang tikki pasaehon i sude. Dibahen Jahowa pe songon i, ala parohon sangap do i tu goarna jala bermanfaat do i tu akka toppaanna. Taida ma jo contohna tikki ditoppa Jahowa tano on.

⁷ Bibel mandok, adong do prosesna tikki  ditoppa Jahowa tano on. Na parjolo ditottuhon ma jo “ukkuranna”, dibahen ma “tiang panukkol ni tano on”, dungi i dibahen ma “batu parsuhi-suhina”. (Job 38:5, 6) Jala dung sae dibahen Jahowa sude toppaanna i, diparade Jahowa dope tikkina lao mamareso sude karejona i. (1 Mus. 1:10, 12) Boi do dibayakkon hamu songon dia perasaan ni akka suru-suruan tikki dibereng nasida dibahen Jahowa akka toppaanna i? Pasti las hian do roha ni nasida. Bibel mandok, sappe “marsurak marlas ni roha” do akka suru-suruan i. (Job 38:7) Aha do na boi taparsiajari sian i? Memang porlu do tikki marribu taon asa sae ditoppa Jahowa saluhutna. Alai dung dipareso Jahowa sude na ditoppana i, didok Ibana “massai denggan do i sude”.​—1 Mus. 1:31.

8. Aha do na naeng tabahas saonari?

⁸ Akka prinsip ni Bibel naung tabahas nakkin patuduhon, porlu do hita sabar. Saonari tabahas ma jo dua situasi na maol, jala songon dia hita patuduhon na sabar do hita paimahon Jahowa di situasi sisongon i.

9. Situasi na songon dia do na mambahen hita ikkon sabar?

⁹ Sabar tikki dang marna dialusi dope tangiangta. Hea do ra hita martangiang mangido gogo sian Jahowa asa boi togu mangadopi hasusaatta, manang asa unang taulahon be na so dihalomohon Jahowa. Alai olo do ra hita merasa, dang marna dialusi Jahowa tangiangta i. Menurut hamu, boasa ma dang langsung dialusi Jahowa tangiangta?

10. Boasa ikkon sabar hita paimahon Jahowa mangalusi tangiangta?

¹⁰ Lomo do roha ni Jahowa manangihon tangiangta. (Ps. 65:2) Molo diida Ibana hita martangiang sian nasa rohatta, i patuduhon na porsea do hita tu Ibana. (Heb. 11:6) Tikki tajalo tu Jahowa asa diurupi hita mangulahon lomo ni rohana, lomo do roha ni Jahowa asa sesuai tangiangta i tu tindakanta. (1 Joh. 3:22) Molo martangiang hita tu Jahowa asa unang taulahon be na so dihalomohon rohana, ikkon sabar do hita. Jala, ikkon tabahen do upaya asa boi muba. Alana songon na didok Jesus, dang sude tangiangta i langsung dialusi Jahowa. Didok ibana, “Sai pangido hamu ma, ai na lehononna do i tu hamu. Sai lului hamu ma, ai na dapotmuna do i. Sai tuktuki hamu ma, ai na bukkaonna do i tu hamu. Ai pasti adong do jaloon ni ganup halak na toktong mangido, pasti adong do dapot ni ganup halak na toktong mangalului, jala pasti dibukka do pintu tu ganup halak na toktong manuktuki.” (Mat. 7:7, 8) Molo taihutton do hata ni Jesus i, jala “sai martangiang” hita, pos ma rohatta pasti dialusi Jahowa do i.​—Kol. 4:2.

11. Molo dang marna dialusi Jahowa tangiangta, aha do na ikkon taulahon? (Heber 4:16)

¹¹ Molo dang marna dialusi Jahowa tangiangta, taingot ma marjanji do Jahowa mangalusi tangiangta i “di tikki na tahaporluhon” menurut Ibana. (Jaha Heber 4:16.) Unang ma tasalahon Jahowa molo dang langsung dialusi tangiangta i songon na taharappon. Misalna, nungnga martaon-taon ra hita martangiang asa ro Harajaon ni Debata i pasaehon sude masalah di portibi on. Jala Jesus pe disuru do hita manangiakkon i. (Mat. 6:10) Alai molo dang marna masa dope i songon na taharappon, unang ma gabe gale haporseaotta, ala dang marbisuk hita disi! (Hab. 2:3; Mat. 24:44) Sabar ma hita paimahon Jahowa, jala torus ma hita martangiang. Pos ma rohatta, masa nama satokkin nai sude janji ni Debata i. Nungnga ditottuhon Jahowa “ari dohot jamna”. Jala tikki naung dittottuhon  Jahowa i ma tikki na paling pas di sude toppaanna.​—Mat. 24:36; 2 Ptr. 3:15.

12. Situasi aha dope muse na mambahen hita ikkon toktong sabar?

¹² Sabar tikki dibahen na so adil tu hita. Godang do halak na mambeda-bedahon jenis kelamin, suku, ras, budaya, manang bangsa. Dibahen do na so adil tu akka halak na cacat manang tu halak na adong penyakit mentalna. Jala godang do jolma na mambahen na so adil tu Saksi Jahowa ala asing haporseaotta sian nasida. Molo hea do dibahen tindakan na so adil sisongon i tu hita, torus ma taingot hata ni Jesus on, “paluaonna do manang ise na setia jala na martahan sahat tu ujungna”. (Mat. 24:13) Alai boha do molo adong dongan di huria na mangulahon dosa serius? Sabar do hita paimahon akka sintua menangani masalah i? Pos do rohatta na diihutton nasida do petunjuk ni Jahowa? Jala, aha do na ikkon diulahon akka sintua molo adong dongan di huria na mangulahon dosa serius?

13. Aha do na ikkon diulahon akka sintua molo adong na mangulahon dosa serius di huria?

¹³ Tikki adong na mangulahon dosa serius di huria, martangiang do akka sintua mangido “bisuk” sian Jahowa, asa diurupi nasida manangani kasus i. (Jak. 3:17) Alana tujuan ni nasida, i ma “mamboan mulak sahalak pardosa sian dalanna na lilu i”. (Jak. 5:19, 20) Ikkon berupaya do akka sintua manjaga huria asa toktong ias sian pengaruh ni halak na mangulahon dosa serius i. Jala molo berdampak do dosana i tu donganta di huria, ikkon diurupi sintua do asa unang lungun be rohana. (2 Kor. 1:3, 4) Na parjolo diulahon akka sintua i, ikkon dipastihon nasida do aha na sebenarna terjadi. Porlu do godang tikki lao mangulahon i. Ikkon martangiang do nasida, jala manat dilului prinsip ni Bibel lao mandisiplin halak na mangulahon dosa serius i “marhite cara na sittong”. (Jer. 30:11) Ikkon hatop do ditangani akka sintua masalah i, alai ikkon manat do nasida mangulahon i. Molo diihutton akka sintua do petunjuk sian Jahowa, pasti bermanfaat do i tu akka dongan di huria. Alai nang pe nungnga ditangani masalah i sesuai tu cara ni Jahowa, olo dope ra adong dongan di huria na sai lungun rohana. Alana mungkin berdampak do tindakan ni halak na mangulahon dosa serius i tu ibana. Molo songon i do na dihilala hamu, aha ma na boi diulahon hamu asa unang sai lungun be rohamuna?

14. Contoh ni ise do na boi tatiru molo adong dongan na mambahen haccit rohatta?

 ¹⁴ Hea do hamu mandapot perlakuan na so adil sian akka donganta? Boi ma hita marsiajar sian contoh ni naposo ni Jahowa na toktong sabar paimahon Jahowa pasaehon masalahna. Misalna marsiajar ma hita sian si Josep. Kejam do akka abangna tu ibana. Alai disalpuhon ibana do hasalaan ni nasida i jala dang muruk ibana. Torus do ibana fokus manomba Jahowa, jala dipasu-pasu Jahowa do hasabaronna i. (1 Mus. 39:21) Dang sai diingot-ingot si Josep hasalaan ni akka abangna i. Disalpuhon do i sian rohana. Gabe boi ma diida ibana songon dia Jahowa mangupahi tindakanna i. (1 Mus. 45:5) Molo hea do dibahen na so adil tu hita, tatiru ma si Josep. Toktong ma jonok hita tu Jahowa jala tapasahat ma masalahta i tu Ibana.​—Ps. 7:17; 73:28.

15. Aha do na mangurupi sahalak donganta asa boi toktong sabar?

¹⁵ Dang sude hita mangadopi masalah na serius songon si Josep, alai olo do ra adong halak na mambahen haccit rohatta. Bermanfaat do molo taihutton prinsip ni Bibel lao mangatasi i. (Plp. 2:3, 4) Taparrohahon ma jo pengalaman ni sahalak donganta borua. Hea do ibana digosipi donganna sakarejo. Alai dang gabe muruk ibana. Ditiru ibana do Jesus na so olo mambalos halak na mangaleai ibana. (1 Ptr. 2:21, 23) Alani i, dang dibalos ibana pambahenan ni donganna sakarejo i. Di pudian ni ari, diboto ibana ma na lagi marsak do hape donganna i, ala adong masalah kesehatanna na serius. Jadi diboto donganta i ma, dang na sengaja dongan sakarejona i mambahen songon i tu ibana. Ala toktong sabar donganta i nang pe haccit rohana, boi ma gabe dame pakkilalaanna.

16. Aha do na porlu taingot tikki adong halak na mambahen haccit rohatta? (1 Petrus 3:12)

¹⁶ Molo adong na mambahen na so adil tu hamu manang dibahen haccit rohamuna, ingot ma jonok do Jahowa tu “halak na mandele”. (Ps. 34:18) Jadi, toktong ma hita sabar paimahon Jahowa. Tapasahat ma sude holso ni rohatta tu ibana. Pos ma rohatta holong hian do roha ni Jahowa tu hita. (Ps. 55:22) Ibana do Hakim ni saluhut tano on. Jadi diida Ibana do sude na masa i. (Jaha 1 Petrus 3:12.) Alani i, molo adong masalahmuna na so  tarpasae hamu saonari, sabar ma hamu paimahon Jahowa pasaehon i sude.

17. Aha do janji ni Jahowa na disurat di Jesaya 30:18?

¹⁷ Satokkin nai ro nama Harajaon ni Debata. Jala gok do pasu-pasu na lao tajalo marhite Harajaon i. Songon na didok si Jesaya, “Alai sabar do Jahowa paima-imahon lao patuduhon asi ni rohana tu hamu . . . Ai Debata na adil do Jahowa. Marlas ni roha do sude na sai paimahon Ibana.” (Jes. 30:18, surat na di toru) Jadi molo toktong hita sabar paimahon Jahowa, dapotta ma pasu-pasu saonari dohot di portibi na imbaru.

18. Aha do pasu-pasu na tapaima-ima di portibi na imbaru?

¹⁸ Molo dung sahat hita di portibi na imbaru, dang tahilala be annon hasusaan songon na tahilala saonari. Dang adong be annon na mambahen na so adil manang na mambahen lungun rohatta. (Pgk. 21:4) Terpenuhi ma sude kebutuhanta, ala gok do haduan sipanganon di tano on. (Ps. 72:16; Jes. 54:13) Pasu-pasu na luar biasa do i!

19. Aha do na diulahon Jahowa saonari asa boi hita mangolu di tano na imbaru?

¹⁹ Saonari diurupi Jahowa do hita padenggatton sifat dohot pangalahotta, asa boi hita mangolu di tano na imbaru. Alani i, molo adong masalahta, unang ma mura hita menyerah manang gabe tatinggalhon Jahowa. Satokkin nai tahilala nama ngolu na dumenggan i! Toktong ma marlas ni roha hita jala sabar paimahon Jahowa pasautton sude lomo ni rohana.