1-2. Finshi twalasambilila muli cino cipande?

BUSHE mumfwa shani nga ca kuti icipe mulefwaisha ukupokelela cakokola ukufika? Bushe mulomfwa ububi? Baibolo pa Amapinda 13:12 itila: “Icile-enekelwa nga cakokola ukwisa cilalwalika umutima.” Bushe kuti mwacita shani nga mwaishiba ukuti kwali icalengele icipe cenu cifika pa bushiku mwale-enekela ukuti calafikilapo? Nga mwaishiba icilengele kuti mwatekanya kabili mwalolela.

² Muli cino cipande, twalasambilila pa mashinte ya mafunde ya mu Baibolo ayengatwafwa ukuba abatekanya no ‘kulalindilila Lesa.’ (Mika 7:7) Lyena twalasambilila pa nshita shibili ilyo tulingile ukuba abatekanya no kulolela pali Yehova. Na mu kulekelesha, twalasambilila pa fyo akapaala bonse abaitemenwa ukulolela pali ena.

3. Finshi tulesambilila kwi shinte lye funde ilyaba pa Amapinda 13:11?

³ Amashiwi yaba pa Amapinda 13:11 yalalangilila bwino ico tufwile ukubela abatekanya. Patila: “Ifyuma ifinonkwa mu lubilo tafifula, lelo uulonganya ku minwe [panono panono] alafilenga ukufula.” Finshi tulesambilila kwi shinte lye funde ilyaba pali ili ilembo? Tulesambililako ukuti umuntu wa mano alatekanya ilyo alecita ifintu.

4. Finshi tulesambilila kwi shinte lye funde ilyaba pa Amapinda 4:18?

⁴ Pa Amapinda 4:18 patila: “Inshila ya balungami yaba ngo lubuuto lwa lucelo uluya lulebuutilako fye ukufikila akasuba kasaama.” Aya amashiwi yalosha ku fyo Yehova afwa  abantu bakwe ukumfwikisha ubufwayo bwakwe panono panono. Na kabili ili ilembo lilatwafwa no kumfwikisha ifyo Umwina Kristu aya alealuka panono panono, ne fyo bucibusa bwakwe na Yehova buya bulekoselako. Palapita inshita pa kuti umuntu abe sana cibusa wa kwa Yehova. Nga tulekonka ifyo tusambilila mu Cebo ca kwa Lesa e lyo ne fyo icilonganino cakwe citusambilisha, tukalaya tulekwatilako imibele iyo Kristu akwata. Na kabili tukaya tuleishibilako Lesa. Natulande pa cilangililo Yesu alandile pa kulanda pali ici cishinka.

5. Cilangililo nshi Yesu alandile pa kulangilila ukuti palapita inshita pa kuti umuntu aaluke?

⁵ Yesu alilandile icilangililo pa kulondolola ifyo imbila ya Bufumu tubila yaba nga ka luseke akanono akaya kalekula panono panono mu mitima ya bantu abafwaya ukwishiba icine. Atile: “Shasuka imbuto shapuuka no kukula, na o [katanda] teshiba ne fyo shimena. Umushili uwine weka e umesha ifisabo panono panono, umusonga e ubalilapo, e lyo pakonka umutwe, na pa kulekelesha inseke ishituntulu mu mutwe.” (Marko 4:27, 28) Finshi Yesu alesambilisha ilyo alandile ici cilangililo? Alesambilisha ukuti filya fine icimenwa ciya cilekula panono panono, e fyo no muntu uwasumina ukukutika ku mbila ya Bufumu aya alekula mu fya kwa Lesa panono panono. Ku ca kumwenako, ilyo abasambi besu aba Baibolo baleya baletemenwako Yehova, balaaluka mu fingi. (Efes. 4:22-24) Lelo tulingile ukulaibukisha ukuti ni Yehova eulenga ulubuto lwa cine ukumena.—1 Kor. 3:7.

6-7. Finshi tulesambililako ku fyo Yehova alecita pa kubumba isonde?

⁶ Yehova alatekanya muli fyonse ifyo acita. Ico acitile ifi ni pa kuti ishina lyakwe licindikwe, e lyo na pa kuti bambi banonkelemo. Ku ca kumwenako, moneni ifyo Yehova atekenye ilyo alebumba isonde.

⁷ Pa kulondolola ifyo Yehova abumbile isonde, Baibolo itila “apimine ubukulu bwa liko,” ashimpile “amashinte ya liko,” kabili  “abikile ilibwe lye sonde ilya pa koona.” (Yobo 38:5, 6) Na kabili nga abumba fimo alebala alolesha no kumona ifyo fyalemoneka. (Ukute. 1:10, 12) Elenganyeni ifyo bamalaika baletemwa ilyo balemona Yehova alebumba ifintu ifipya panono panono. Balyumfwile bwino ica kuti ‘baliweleshe’ no kuwelesha! (Yobo 38:7) Finshi tulesambililako kuli ici? Palipitile imyaka iingi nga nshi pa kuti Yehova apwishe ukubumba ifintu fyonse, kabili ilyo Yehova amwene ifyo ifyo abumbile fyaweme, atile “nafiwama nga nshi.”—Ukute. 1:31.

8. Finshi twalalandapo nomba?

⁸ Ifi ifya kumwenako filetulanga ukuti kwaliba amashinte ya mafunde ayaba mu Cebo ca kwa Lesa ayengi, ayatusambilisha ukuti tulingile ukuba abatekanya. Nomba twalalanda pa nshita shibili ilyo tulingile ukuba abatekanya no kulolela pali Yehova.

9. Ni nshita nshi imo ilyo tulingile ukulolela pali Yehova?

⁹ Nalimo kuti twalolela ukuti akasuke amapepo yesu. Ilyo twapepa ukuti Yehova atukoshe ukushipikisha ubwesho nelyo ukuti atwafwe ukuleka ukucita ifyo ashatemwa, nalimo kuti twamona kwati alekokola ukwasuka amapepo yesu. Mulandu nshi Yehova inshita shimo ashasukila amapepo yesu ilyo line fye?

10. Mulandu nshi tulingile ukubela abatekanya ilyo tulelolela ukuti Yehova asuke amapepo yesu?

¹⁰ Yehova alakutika ku mapepo yesu. (Amalu. 65:2) Nga twapepa alamona ukuti twalimucetekela. (Heb. 11:6) Na kabili nga twapepa kuli Yehova ukuti atwafwe ukulacita ifilenga alesekelela, alafwaya ukumona tulecita ifintu ukulingana ne fyo tulepepelapo. (1 Yoh. 3:22) Kanshi inshita shimo tulingile ukutekanya ilyo tulefwaya ukuleka ukucita ifyo Yehova apata. Amashiwi Yesu alandile yalangilila ukuti inshita shimo Lesa te kuti asuke amapepo yesu apo pene fye. Atile: “Mulelomba, kabili mukapeelwa; mulefwaya, kabili mukasanga; mulekonkonsha, kabili bakamwiswila. Pantu onse uulomba balamupeela, na onse uufwaya alasanga, na onse uukonkonsha balamwiswila.” (Mat. 7:7, 8) Nga tulecita ifyo Yesu alandile kabili tuli “no mute wa kupepa,” te kuti tutwishike no kutwishika ukuti Shifwe wa ku muulu akakutika amapepo yesu kabili akasuka.—Kol. 4:2.

11. Bushe ilembo lya AbaHebere 4:16 kuti lyatwafwa shani nga tulemona kwati Yehova alekokola ukwasuka ipepo lyesu?

¹¹ Nangu ca kuti inshita shimo kuti twamona kwati Yehova taleasuka amapepo yesu, alaya ukuti akasuka amapepo “pa nshita tulekabila ubwafwilisho” atemwa pa nshita yalinga. (Belengeni AbaHebere 4:16.) E mulandu wine tushilingile ukupelela Yehova umulandu nga ca kuti taswike ipepo pa nshita tulefwaya ukuti asukilepo. Ku ca kumwenako, pa myaka iingi abantu abengi balipepa ukuti Ubufumu bwa kwa Lesa bwise no kufumyapo cino calo cabipa. Na kuba Yesu atile ifi fine e fyo tulingile ukulapepelapo. (Mat. 6:10) Kanshi te kuti cibe bwino umuntu nga aleka ukutetekela Lesa pa mulandu wa kuti impela taishile pa nshita abantu balefwaya ukuti ishilepo! (Haba. 2:3; Mat. 24:44) Ukulolela pali Yehova no kuba ne citetekelo ilyo tulepepa e cintu icisuma ico twingacita, kabili tufwile ukwishiba ukuti akasuka. Impela ikesa pa nshita yalinga, pantu Yehova alisala kale “ubushiku . . . ne nshita” ilyo ikesa. Kabili ilyo impela  ikesa, bonse tukamona ukuti e nshita yalinga.—Mat. 24:36; 2 Pet. 3:15.

12. Ni lilali twingakabila sana ukuba abatekanya?

¹² Tulingile ukutekanya ilyo tuleshipikisha nga batufyenga. Ilingi line abantu mu calo balacusha abantu banabo pa mulandu wa kuti te baume banabo nelyo te banakashi banabo, balipusana nabo inkanda, ba mushobo umbi, bakonka intambi ishapusana, nelyo bafuma ku calo cimbi. Bamo balabacusha pa mulandu wa kuti balilemana nelyo balilwala ubulwele bwa kuli bongobongo. Abantu ba kwa Yehova abengi balabafyenga pa mulandu wa kuti bakonka ifyaba mu Baibolo. Nga ca kuti batufyenga pa mulandu ne fi twalandapo, tufwile ukulaibukisha amashiwi Yesu alandile aya kuti: “Uwashipikisha ukufika na ku mpela, e ukapusuka.” (Mat. 24:13) Nomba finshi mufwile ukucita nga mwaishiba ukuti umo mu cilonganino nacita ulubembu ulukalamba? Bushe baeluda nga baishiba ificitike, mukalolela ukuti bakabombelepo ukulingana ne fyo Yehova afwaya? Finshi nalimo baeluda bengacita nga ca kuti umo nacita ulubembu ulukalamba?

13. Finshi Yehova afwaya baeluda balecita nga ca kuti uwa mu cilonganino acita ulubembu ulukalamba?

¹³ Ilyo baeluda baishiba ukuti uwa bwananyina nacita ulubembu ulukalamba, balapepa kuli Yehova ukuti abapeele “amano ayafuma ku muulu” pa kuti beshibe ifyo balabombela pali uyo mulandu. (Yako. 3:17) Ico bafwaisha kubwesha umubembu “ukumufumya ku cilubo cakwe.” (Yako. 5:19, 20) Na kabili balesha apapela amaka yabo ukucingilila icilonganino no kusansamusha abomfwile ububi pa mulandu wa ficitike. (2 Kor. 1:3, 4) Ilyo baeluda balebombela pa membu ishikalamba balabalilapo ukufwaya ifishinka fyonse, kabili palapita inshita pa kuti basange ifishinka. Lyena balapepa kuli Yehova kabili balabomfya bwino Icebo cakwe pa kwafwa uulufyenye. Kabili balamusalapula “ukusalapula ukwalinga.” (Yer. 30:11) Nangu ca kuti baeluda tabalolela papita inshita iitali sana, tabapingula umulandu lubilo lubilo, lelo balatekanya. Baeluda nga bapingula umulandu ukulingana ne fyo Yehova afwaya, bonse mu cilonganino balanonkelamo. Na lyo line, nangu ca kuti baeluda nababombela fye bwino pa mulandu,  nalimo uo babembukile kuti atwalilila fye ukumfwa ububi pa fyacitike. Nga ni mwe umuntu abembukile, kuti mwacita shani pa kuti muleke ukumfwa sana ububi?

14. Lyashi nshi ilya mu Baibolo ilyo mwingasambililako ukushipikisha nga ca kuti uwa bwananyina amukalifya?

¹⁴ Bushe balimukalifyapo sana ku wa bwananyina nelyo ku muntu fye umbi? Mu Baibolo mwaliba abantu abengi nga nshi abo twingasambililako ukulolela pali Yehova ukuti akapwishe ulufyengo. Ku ca kumwenako, nangu ca kuti Yosefe balimufyengele kuli bandume nankwe, talekele ifyabipa ifyo bacitile fyalenga alaenda ne cikonko ku mukoshi. Lelo abikile fye amano ku kubombela Yehova, kabili Yehova alimulambwile pa fyo atwalilile ukushipikisha. (Ukute. 39:21) Mu kupita kwa nshita, Yosefe alilekele ukumfwa ububi pa fyo bamukalifye, kabili alimwene ifyo Yehova amupaalile. (Ukute. 45:5) Nga filya Yosefe acitile, na ifwe tulaleka ukusakamikwa nga twapalama kuli Yehova kabili nga twatwalilila ukulolela pali ena ukuti akafumyepo ulufyengo pa nshita yalinga.—Amalu. 7:17; 73:28.

15. Cinshi ca-afwile nkashi umo ukutekanya no kutwalilila ukushipikisha?

¹⁵ Kwena te kuti batufyenge nga filya bafyengele Yosefe, lelo ifyabipa ifili fyonse ifyo umuntu engatucita kuti fyatukalifya umutima. Nga natupusana no wa bwananyina nelyo no muntu uushibombela Yehova, tukanonkelamo nga tulekonka amashinte ya mafunde ya mu Baibolo. (Fil. 2:3, 4) Natulande pali nkashi umo. Alyumfwile sana ububi ilyo aishibe ukuti uo abomba nankwe alelanda ifyabipa pali ena ku bantu bambi. Mu cifulo ca kukalipa bwangu, uyu nkashi atontonkenye pa fyo Yesu acitile. Ilyo balemutuka, ena tabatukilemo. (1 Pet. 2:21, 23) Ilyo atontonkenye pa fyo Yesu acitile, na o asalilepo ukusuulako fye ku fyo bamukalifye. Pa numa aishileishiba ukuti ulya uo alebomba nankwe, alilwele ubulwele ubukalamba kabili alisakamikwe sana. Na kabili aishileiluka ukuti ico uo alebomba nankwe alelandila filya, te kuti alefwaya ukumukalifya. Nkashi alitemenwe sana filya atwalilile ukuba uwatekanya no kushipikisha, kabili ici calengele ukuti abe ne nsansa.

16. Cinshi cingamusansamusha nga ca kuti bamufyenga? (1 Petro 3:12)

 ¹⁶ Nga ca kuti na imwe mulacula pa mulandu wa kumufyenga nelyo pa mulandu ne fintu fye fimbi, muleibukisha ukuti Yehova aba mupepi ku “baba ne mitima ya bulanda.” (Amalu. 34:18) Alimutemwa pa fyo mwatekanya na pa fyo mupoosa icisendo cenu pali ena. (Amalu. 55:22) Apo Yehova e Kapingula wa bantu bonse pano isonde, alamona fyonse ificitika. (Belengeni 1 Petro 3:12.) Bushe mulaitemenwa ukulolela pali Yehova nga mwaba na mafya ayo mushingapwisha?

17. Ukulingana na Esaya 30:18, finshi Yehova alaya ukutucitila?

¹⁷ Nomba line fye Shifwe wa ku muulu akabomfya Ubufumu bwakwe pa kutupaala. Baibolo pali Esaya 30:18 itila: “Yehova akatwalilila ukulolela ukumupaala, kabili akema pa kuti amubelele uluse. Pantu Yehova ni Lesa wa mulinganya. Ba nsansa bonse abamulolela.” Bonse abalolela pali Yehova akabapaala pali ino nshita e lyo na ku ntanshi mu calo cipya.

18. Mapaalo nshi Yehova akatupeela?

¹⁸ Ilyo abantu ba kwa Lesa bakengila mu calo cipya, tabakalaba na mafya ayo bakwata pali ino nshita. Takwakabe ulufyengo no kukalipwa. (Ukus. 21:4) Na kabili takwakabe uukalasakamikwa, pantu bonse tukalakwata ifyo tukabila. (Amalu. 72:16; Esa. 54:13) Ala iyi nshita ikawama nga nshi!

19. Cinshi Yehova atwafwila ukuba ne mibele iisuma pali ino nshita?

¹⁹ Pali ino nshita Yehova alatwafwa ukuleka ukucita ifyabipa, kabili alatwafwa ukuba ne mibele iilenga alasekelela. Ico acitila ifi ni co alafwaya ukutusambilisha ifyo tukalaikala mu calo cipya. Te kwesha ukufuupuka no kuleka ukubombela Yehova! Apo ifintu fili no kuwama ku ntanshi, natutwalilile ukulalola pali Yehova ukufikila lintu akawamya ifintu!