1-2. Kai kari sibahas bas artikel enda?

 UGA nge perasanndu adi barang si pesanndu lalap lenga seh-seh padahal perlu kel kam? Kecewa nge kam? Banci saja bali perasanndu ras kata-kata bas Kuan-kuanen 13:12 si ngataken, “Arapen si la terjadi erban getem pusuh.” Tapi uga nge perasanndu adi tehndu alasen si masuk akal engkai maka barangndu e lenga seh? Adi tehndu kai alasenna, banci saja nggit kam sabar nimai.

² Bas artikel enda, sibahas kari piga-piga prinsip Pustaka si banci nampati kita gelah ‘sabar nimai.’ (Mi. 7:7) Kenca si e, sibahas kari dua situasi engkai maka kita arus sabar nimai Jahwe ertindak. Bas pendungi artikel enda sibahas kari pasu-pasu kai saja si idat kalak si nggit sabar nimai Jahwe.

3. Pelajaren kai si banci sidat arah Kuan-kuanen 13:11?

³ Kuan-kuanen 13:11 ngajari kita engkai maka arus kita sabar. Nina bas ayat e, “Erta si nukah ndatkenca meter pagi keri, tapi erta si ipepulung sitik-sitik, tambah pagi lalap.” Kai si banci sipelajari arah ayat enda? Kalak si pentar hati-hati ia ngelakoken kai pe janah sabar. Alu bage, datna hasil si mehulina.

4. Pelajaren kai si banci sidat arah Kuan-kuanen 4:18?

⁴ Nina Kuan-kuanen 4:18, “Dalan kalak benar bagi terang erpagi-pagi, si reh dekahna reh terangna seh ku ciger wari.” Arah kata-kata bas ayat e, jelas teridah maka sampati Jahwe umatNa guna ngangkai sura-suraNa alu manjar-anjar. Ayat enda pe nampati kita ka ngangkai uga kalak Kristen erban perubahen janah reh deherna ras  Jahwe. Iperluken waktu man sekalak jelma gelah banci reh deherna ras Jahwe. Adi tutus ateta erlajar janah sidalanken nasehat si enggo sidat arah Kata Dibata ras organisasiNa, banci reh ulina sipat-sipatta selaku kalak Kristen. Selain si e, banci ka reh buena pemetehta kerna Dibata. Mari sibahas uga Jesus nggambarken si e alu perumpaman.

5. Perumpaman kai si igunaken Jesus guna ncidahken maka perlu waktu erban perubahen?

⁵ Igunaken Jesus sada perumpaman njelasken uga berita Kerajan si enggo siberitaken bali bagi benih si kitik si turah bas pusuh kalak si ngena atena kai si benar. Nina, ‘Turah me benih e janah reh ganjangna. La teh si nuan benih e uga e terjadi. Alu manjar-anjar taneh e ngasilken buah, tangtangna ertangke, kenca si e reh ruhina, dungna erbuah.’ (Mrk. 4:27, 28) Kai nge maksud Jesus? Ijelaskenna maka bali bagi sinuan-sinuan si reh galangna, kalak si tek man berita Kerajan pe perlu waktu guna erban perubahen. Contohna, sanga kalak si erlajar Pustaka ras kita reh deherna ras Jahwe, banci siidah melala perubahen si enggo ibanna. (Ep. 4:22-24) Tapi arus siinget maka si erban benih si kitik e turah eme Jahwe.​—1 Kor. 3:7.

6-7. Kai si banci sipelajari arah cara Jahwe nciptaken doni enda?

⁶ Melala kel waktu si iperluken Jahwe guna ngelakoken pendahinNa. LakokenNa bage guna kemulian gelarNa ras nampati kalak si deban. Contohna, sikapken Jahwe doni enda man manusia alu manjar-anjar ras teratur.

⁷ Ikataken bas Pustaka maka sanga ciptaken Jahwe doni enda aturkenNa “asa kai belangna,” ‘tiang-tiang si natangsa,’ ras “batu utamana.” (Jop 38:5, 6) BanNa ka waktuna guna mperdiateken enggo mejile ntah lang si ciptakenNa e. (Kej. 1:10, 12) Banci nge bayangkenndu uga perasan malekat-malekat sanga idahna  kerina si mbaru iciptaken Jahwe? Pasti meriah kel ukur kalak e! E me sebapna ‘ersurak malekat-malekat e perban riahna.’ (Jop 38:7) Kai si banci sipelajari? Lit ribun tahun dekahna maka dung ciptaken Jahwe doni, bintang-bintang, ras kerina si nggeluh. Tapi sanga perdiatekenNa kerina si ciptakenNa e, ikatakenNa maka “seh kel ulina” akapNa.​—Kej. 1:31.

8. Kai si nandangi sibahas?

⁸ Contoh-contoh ndai ncidahken man banta maka melala prinsip bas Pustaka si ngajari kita engkai maka perlu kita sabar. Gundari mari sibahas dua situasi si ncidahken maka perlu kita sabar nimai Jahwe.

9. Bas situasi kai kita perlu sabar nimai Jahwe?

⁹ Sanga totota la mis ijawap. Sanga ertoto kita mindo gegeh gelah ngasup ngadapi masalah ntah pe gelah nampati kita mpedauh perbahanen si segat ate Jahwe, banci saja ndekahsa siakap ijawap Jahwe totota. Engkai maka la mis ijawap Jahwe kerina totota?

10. Engkai maka perlu kita sabar nimai Jahwe njawap totota?

¹⁰ Tutus ate Jahwe megi totota. (Ms. 65:2) Totota si enggo sipeseh arah pusuhta nari mbuktiken maka kita erkiniteken. (Heb. 11:6) Meriah ka ukur Jahwe sanga idahNa perbahanenta si sesuai ras totota bage pe sanga silakoken peratenNa. (1 Joh. 3:22) Emaka sanga sipindo penampat Jahwe gelah lanai silakoken kai si segat ateNa, banci saja perlu kita sabar janah silakoken asa ngasupta gelah banci kita robah. Ajarken Jesus man banta maka piga-piga totota banci saja la mis ijawap. Nina, “Teruslah pindo, aloken kena nge pagi. Teruslah darami, dat kena nge pagi. Teruslah tuktuk, ibukaken nge pagi man kena. Sebap ise pe si mindo pasti ngalo, ise pe si ndarami pasti idatna, janah ise pe si nuktuk pasti ibukaken.” (Mat. 7:7, 8) Adi siikutken nasehat Jesus e janah ‘terus kita ertoto,’ tek kita maka pasti begiken Dibata si i surga totota janah pasti jawapNa.​—Kol. 4:2.

11. Uga Heber 4:16 banci nampati kita sanga totota la mis ijawap?

¹¹ Amin pe tempa-tempa totota lalap lenga ijawap, erjanji Jahwe maka jawapNa totota e bas “waktu si tepat.” (Baca Heber 4:16.) Emaka ula ndigan pe sisalahken Jahwe adi totota e la mis ijawap. Contohna, enggo ertahun-tahun dekahna enterem kalak ertoto gelah igantiken Kerajan Dibata min pemerentahen si lit bas doni enda. Jesus pe suruhna gelah sitotoken kerna si e. (Mat. 6:10) Motu kel kita adi lanai kita erkiniteken man Dibata perban kedungen doni enda lenga reh bagi sura-surata. (Hab. 2:3; Mat. 24:44) Kita kalak si pentar adi tetap sitimai Jahwe janah tek kita maka pasti jawapNa totota. Kedungen doni enda pasti reh bas waktu si tepat perban enggo tetapken Jahwe ndigan “wari ras jamna” janah e me waktu si tepatna man kerinana.​—Mat. 24:36; 2 Pet. 3:15.

12. Situasi kai saja si banci erban mesera siakap sabar?

¹² Sanga lit perbahanen si la adil. Enterem kalak bas doni enda la adil perbahanenna man kalak si beda jenis kelaminna, sukuna, budayana, bangsana, bage pe warna kulitna. Lit ka si la adil perbahanenna man kalak si cacat ntah pe sakit mental. Enterem umat Jahwe megenggeng  sanga la adil perbahanen kalak man bana perban kinitekenna erpalasken Pustaka. Adi la adil perbahanen kalak man banta arus siinget kata-kata Jesus enda, nina, “Kalak si megenggeng seh ku kedungenna iselamatken pagi.” (Mat. 24:13) Tapi kai si arus silakoken adi siteh lit kalak si ngelakoken kesalahen si serius bas runggun? Adi enggo teh pertua masalah e, sabar ras tek nge kita maka banci dungina masalah e alu cara Jahwe? Situhuna kai saja nge si arus ilakoken pertua-pertua?

13. Kai si arapken Jahwe arah pertua-pertua sanga lit kalak si ngelakoken kesalahen si serius?

¹³ Adi teh pertua maka lit kalak si ngelakoken kesalahen si serius bas runggun, ertoto kalak e mindo “kepentaren si rehna surga nari” gelah teh kalak e uga kin perasan Jahwe kerna situasi e. (Jak. 3:17) Tujun kalak e guna nampati kalak si ersalah e gelah “mulihken ku dalan si benar.” (Jak. 5:19, 20) Lakoken kalak e ka kai pe si banci ilakokenna guna ngelindungi runggun janah ngapuli kalak si sakit hati perban perbahanen kalak si ersalah ndai. (2 Kor. 1:3, 4) Sanga teh pertua lit kalak si ngelakoken kesalahen si serius, arus lebe teh kalak e kai kin situhuna si terjadi janah e merluken waktu. Kenca si e, ertoto kalak e janah berekenna nasehat “si cocok” arah Pustaka man kalak si ersalah e. (Jer. 30:11) Amin pe labo ipedekah-dekah pertua guna ndungi masalah e, labo ka metersa iban kalak e keputusen. Sanga ikutken pertua-pertua petunjuk Jahwe, banci idah anggota runggun maka e me keputusen si mehulina man kerina. Tapi amin pe enggo ilakoken pertua alu cara si benar, banci saja sakit hati denga kalak si kena pengaruh arah perbahanen kalak si ersalah ndai. Adi bage si terjadi man bandu, kai nge si banci lakokenndu gelah malem-malem sitik pusuhndu?

14. Ise contoh bas Pustaka si banci ngapuli kam adi sakit hati kel kam ban turang seninandu?

¹⁴ Pernah nge sakit hati kel kam iban kalak si deban termasuk turang seninandu? Adi pernah, banci usihndu contoh-contoh si lit bas Pustaka si banci ngajari kam uga carana sabar nimai Jahwe  ndungi masalahndu. Contohna eme Jusup. Amin pe la adil perbahanen abang-abangna, la pediatna kesalahen kalak e erban ia merawa. Tapi lakokenna si mehulina bas ngelayani Jahwe janah pasu-pasu Jahwe ia perban sabar ras megenggeng. (Kej. 39:21) Dungna, banci ampuni Jusup abang-abangna ras idahna uga Jahwe masu-masu ia. (Kej. 45:5) Bali bagi Jusup, banci kita terapuli perban ndeher ras Jahwe janah sabar kita nimai Jahwe ndungi perbahanen si la adil bas waktu si tepat.​—Ms. 7:17; 73:28.

15. Kai si nampati sekalak turang seninata sanga la adil perbahanen kalak man bana?

¹⁵ Pasti labo bagi Jusup kel beratna masalahta, tapi adi siadapi perbahanen si la adil banci kitik ukurta. Adi lit masalahta ras kalak si deban termasuk ras kalak si la nembah Jahwe, banci sidat manpaat adi sidalanken prinsip-prinsip Pustaka. (Pil. 2:3, 4) Cuba ukuri pengalamen enda. Sekalak turang seninata sakit hati kel sanga lit teman sada dahinna si la mehuli man bana. Cikurakkenna ka ia man kalak si deban. Tapi labo mis merawa turang seninata e. Ukurina usihen Jesus. Sanga Jesus ihina, labo balasna. (1 Pet. 2:21, 23) Perban ukurina usihen Jesus, la kapna masalah perbahanen temanna ndai. Dungna tehna maka mekelek kepe penakit temanna e janah stres kel ia. Isimpulken turang seninata e maka situhuna labo nokoh ate temanna e. Emaka meriah ukur turang seninata e perban banci ia sabar ras megenggeng janah dame pusuhna amin pe la adil perbahanen kalak man bana.

16. Adi lit si la adil man bandu, kai si banci ngapuli kam? (1 Petrus 3:12)

¹⁶ Adi susah akapndu perban lit kalak si la adil man bandu ntah pe perban alasen si deban, ingetlah maka ndeher kap Jahwe ras “kalak si getem pusuhna.” (Ms. 34:18) Keleng ate Jahwe kam perban nggit kam sabar ras benterkenndu kerina masalahndu man baNa. (Ms. 55:22) Jahwe kap Hakim man kerina si lit i doni ras tehNa kerina si terjadi. (Baca 1 Petrus 3:12.) Sanga adapindu masalah si mberat  si la terdungindu, ingetlah maka penting kel sabar nimai Jahwe ertindak.

17. Bagi si itulis bas Jesaya 30:18, kai janji Jahwe man banta?

¹⁷ Lanai ndekah sialoken me pasu-pasu si la tanggung buena arah Bapakta si i surga bas KerajanNa. Nina Jesaya 30:18, “Sabar Jahwe nimai guna ncidahken perkuah ateNa man kena. Ertindak pagi Ia guna ncidahken perkuah ateNa man kena. Sebap Jahwe eme Dibata si adil. Ermeriah ukur kap kalak si ngarap man baNa.” Kalak si sabar nimai Jahwe, alokenna me pasu-pasu gundari bage pe bas doni si mbaru pagi.

18. Pasu-pasu kai pagi sinanami bas doni si mbaru?

¹⁸ Bas doni si mbaru pagi, lanai kita perlu erjuang ngadapi masalah ras tentangen bagi si gundari. Lanai pagi lit i je perbahanen si la adil ras ate mesui. (Ket. 21:4) Lanai pagi kita kuatir kerna keperlunta perban enggo bias pangan man kerina kalak. (Ms. 72:16; Jes. 54:13) Luar biasa kel pagi pasu-pasu e!

19. Kai si lakoken Jahwe guna nikapken kita gelah banci nggeluh bas pemerentahenNa?

¹⁹ Gundari sangana isikapken Jahwe kita gelah banci nggeluh bas pemerentahenNa. SampatiNa kita mpengadi kebiasan si la mehuli ras sampatiNa kita gelah sipat-sipatta erban meriah ukurNa. Emaka ula kitik ukurta janah teruslah silayani Jahwe. Kegeluhen si terulin enggo ndeher! Janahta nimai masa depan si luar biasa e, marilah kita ermeriah ukur janah sabar nimai Jahwe ngelakoken kai si janjikenNa!