1, 2. Kaba wakutiha lidan aturiahani le?

SAMINA wamá wagurabahaña lan aban katei le wemegeirubei saragu, ani darasaguaali lachülürün luéi yebe le wagurabahabei ani sügühali luéi dan le wagurabubei. Ida luba hamuga san wasandiragun woungua? Másiñati wasandiruba lan saragu idiheri. Ligía lariñagubei Ariñawagúni 13:12: “Emenigini masaliti, anigi nidiheritu”. Ánheinti waganba anihein lan aban resun buiti ka lan uagu machülügili lubéi le wagurabahabei? Lídanti kesi libe le, chóuruti aranseñu waba lan lun wagurabaha lau gurasu.

² Lidan aturiahani le, warihiba saragu adundehani tídangiñeti Bíbülia le lunbei líderaguniwa lun wasigirun agurabaha lau gurasu (Mik. 7:7). Lárigiñe, wayanuhaba luagu bián sügǘ le lunbei larufuduni woun buidu lan lun gaguraasun wamá aguraba wagíame lun ladügüni Heowá katei. Lagumuhóun, wayanuhaba luagu abiniruni le lubéi heresibiruni sun ha aransebaña lun hadügüni.

3. Ka adundehani arufudubei lidan Ariñawagúni 13:11?

³ Lidan Ariñawagúni 13:11 daritiwa aban hénpulu le arufudubei súdini lan lun gaguraasun wamá. Ariñagati: “Ha ibihubaña irisini furese, lau eyeedúni, murusun murusun lidin hawéi; ha óundaragutiña irisini murusun murusun, lau arumani, gánwoungüda hamuti”. Ka adundehani wafurendeirubei lídangiñe bérusu le? Buídutimati lan ladügǘn katei lau gurasu, murusun murusun.

4. Ka adundehani wadarirubei lidan Ariñawagúni 4:18?

⁴ Ariñagati Ariñawagúni 4:18 “Ítara liña hémeri ha harumabaña kei lagumeserun larugadun, Arugoungadeinatima murusun murusun darí lun larugoungadun sunsuinagubei”. Furanguti  larufuduni dimurei le woun arufudaha lan Heowá houn lubúeingu luagu le lubéi ladügüni murusun murusun. Gayaraati giñe, líderaguniwa bérusu le lun gunfuranda wamani ida liña lan ladügǘn asansiruni lun laganwoundun lumadagua gürigia luma Heowá. Anhein wadüga katei le buidu buidu ani ru wameime adundehani le wibihubei tídangiñe Lererun Bungiu luma túmagiñe lóundarun lidan wabagari, wáyeihañein ligaburi Kristu murusun murusun lau lani hénpulu ani subudi wameime Bungiu buidu. Afuranguagüda lumuti Hesusu katei le lau aban hénpulu. Warihaali.

5. Ka hénpulu layusurubei Hesusu lun larufudahan murusun murusun lan laweirida inarüni tidan lanigi gürigia?

⁵ Lidan aban sügǘ, góubaguagüda lumuti Hesusu uganu lánina Arúeihani le wapurichihabei luma aban ilaü le áhüchüti murusun murusun tidan lanigi aban gürigia buiti. Ariñagati: “boumemeti nadü ani weiri ligía, gama lumoun ibidiñeti lun ábunaguti ida liña lan lasuseredun. Múa guánarügü arandarati; furumiñe aba láfuridun ídibu, ñéingiñe aba legelewehan, ñéingiñe aba labuinchun ílewei lau ilaü” (Mar. 4:27, 28). Ka labusenrunbei Hesusu lariñagun? Gürigia lan le ánharuti lun uganu lánina Arúeihani sigiti lumadagua luma Bungiu aweirida kei aban nadü: murusun murusun. Kei hénpulu, gayaraati warihini le, dan warihini hayarafadun aturiahatiña Bíbülia lun Heowá aba wagumeserun ariha asansireina liña lan habagari (Efe. 4:22-24). Lau sun lira mabulieida waméi Heowá lan adügübei lun láhüchün ilaü ligía (1 Ko. 3:7).

6, 7. Ka wafurendeirubei lídangiñe ligaburi ladügüni Heowá Ubóu?

⁶ Gaguraasunti Heowá sagü ladügün somu katei, ani barǘ lumuti lidaani dan ladügüni. Ani adüga lumuti dandu luagu luéirigun liri kei luagu habuidun amu. Ariha waméi, le ladügübei dan le laransehabalin Ubóu haba gürigia.

⁷ Dan le lafuranguagüdüniwa ida liña lan ladügüni Heowá Ubóu, ariñagatu Bíbülia ariñaga lani Heowá “átiribei lan lueirin”, ka lan lébubei ani rulei “dübü le wéirigutimabei, le  ágüdahabalin” (Hob. 38:5, 6). Darí lun sagá lan dan lun lararamagun asaminara luagu le ladügübei (Agu. 1:10, 12). Samina humá, ida liña funa san hasandiragun ánheligu houngua dan le harihinbalin Heowá adügeina kada katei? Másiñati, sandí hamá aban lueirin ugundani, lugundun anihein burí dan “eremuhatiña lau ugundani” lun halawahani Heowá (Hob. 38:7). Ka wafurendeirubei lídangiñe le? Lau sun barǘ lan Heowá saragu milu irumu adügei Ubóu, waruguma, hama kátaña gabagaritiña ha añaheinbaña, ani dan le lararamagun arihei sun le adüga láalibei, ariñagati luagu “buidu lan sun le ladügübei” (Agu. 1:31).

8. Kaba wariha guentó?

⁸ Kei warihini lidan burí hénpulu le íñugiñebei anihein adundehani tídangiñeti Bíbülia, le arufudahabei woun súdini lan lun gaguraasun wamá. Ariha wamá bián sügǘ lun gagurabaguadi wamá darime ladügün Heowá somu katei.

9. Ka burí sügǘ mosu lan wagurabun lun ladügün Heowá somu katei?

⁹ Dan le genege lan woun móunabun lani Heowá wafurieidun lau lóufudagun. Dan le wamuriaha luma lun líchugun erei woun lun wagagibudagun luma aban turobuli o lun líderaguniwa lidan somu wadebilin, másiñati sandí wama darasa lan lóunabuni wafurieidun sügǘ luéi le wagurabubei. Ka uagu móunabun lubalin Heowá sun wafurieidun lau lóufudagun?

10. Ka uagu lunti lubéi gaguraasun wamá dan le wafurieidun?

¹⁰ Téniti Heowá lun wafurieidun (Sal. 65:2). Ariha lumuti kei aban hénpulu lánina afiñe wama luagu (Ebü. 11:6). Lanwoun lira, busenti larihini anhein le lubéi lúgubu wawinwanduñein lubéi le wamuriahabei luma ani busén wagía wadügüni lugundan (1 Huan 3:22). Ligíati, anhein wáfaguña lubéi, lun wígirun aban luriban échuni o somu débili, másiñati mosu lan gaguraasun wamá ani falá wameime le wamuriahabei lidan furíei. Afuranguagüdati Hesusu ñeinbei lan dan másiña lan móunabun lubéi lan Heowá wafurieidun lau lóufudagun, dan le lariñagubei: “Hamuriaha, ábame lichugún hun; háluaha, ábame hadarirun, daün humá luagu bena, ábame ladaarúniwa hubá. Ladüga le amuriahati, ibihati; le áluahati, dariti; le adaünhati luagu bena, darawati lubá” (Mat. 7:7, 8). Ánhawa afalarei adundehani le furíei wagía súnwandan gayarabei wachoururuni aganba lániwa Wáguchi le siélubei ani lóunabubadiwa lan (Kol. 4:2).

11. Ida liña líderaguniwa Ebüréu 4:16 dan le genege lan woun móunabun lan wafurieidun lau lóufudagun?

¹¹ Másiñati genege lan woun darasa lan lóunabuni Heowá wafurieidun, lau sun lira füramaseti woun lóunabubei lan wafurieidun “lidan dan” le mégeiwabei (aliiha huméi Ebüréu 4:16). Ligíati masaminara wamá chará lan Heowá lau móunabun lani wafurieidun dan genege lan woun lunti lan ladügüni. Kei hénpulu, añahein íbirigu barühaña saragu irumu afurieida lun lígiruniña Bungiu lun harihini ida luba lan lagumuchun Larúeiha lau ubóu le. Ariñagati giñe Hesusu lun wamuriaha lun liabin Larúeiha Bungiu (Mat. 6:10). Mama warufuduña lichú aau lau weferidiruni wafiñen luagu Bungiu ladügarügü miábingili lan lagumuchagüle ubóu lidan dan le wagurabubei (Abak. 2:3; Mat. 24:44). Le lunbei wadügüni wasigirun agurabaha darime ladügün Heowá somu katei, ani furíei wamá lun lau afiñeni. Liábinba lagumuchagüle ubóu lidan dan le lunbei liabin ladüga ariñaga laali Heowá “kaba lan weyu luma oura”. Ani liábinba lidan aban dan le buídutimabei houn súngubei (Mat. 24:36; 2 Fe. 3:15).

12. Ka burí sügǘ ídanbei hénrengu lan woun lun gaguraasun wamá?

 ¹² Dan le wasufurirun marichaü. Uguñe weyu, wuribati hóuseruniña gürigia, gürigia háledigu meberesenga anhein wügüriña habéi o würiña hama, meberesenga ka lan harasanbei, hechu, hageira, ligaburi haríawagun, o ligaburi hasandiragun houngua. Saragu hádangiñe lubúeingu Bungiu ouserúaaña lau marichaü ladüga afiñe hama luagu le tariñagubei Bíbülia. Anhein wásügürüña lubéi lídangiñe ligiaméme, aritagua waméi dimurei le lariñagubei Hesusu: “Le áfaaguti darí lumoun lagumuhóun, ligíaba asalbara” (Mat. 24:13). Ánhawa san íchiga fe anihein lan aban lílana damuriguaü le adügaali aban figóu le wéiriti? Anhein ru haña lubéi wéiyaaña lidan afiñeni fe, gaguraasun báadiwa san ani afiñe wagíame harihiba lan luagu kesi le lau hafalaruni ladundehan Heowá? Kaba hadüga?

13. Ida liña labusenrun Heowá lun lahandilihoun kesi lánina figóu wéiriti?

¹³ Dan le híchugun wéiyaaña lidan afiñeni fe adügaali lan aban lílana damuriguaü aban figóu wéiriti, aba hamuriahan “lichú aau le lúmagiñebei Bungiu” lun harihini katei kei larihini Heowá (Sant. 3:17). Le habusenrunbei lun híderaguni gürigia le afigouhabei lun lagiribudun lidoun “üma le richabei”, anhein gayara (Sant. 5:19, 20). Busentiña giñe hadügüni sun hayaraati lun hóunigiruni damuriguaü luma lun híchugun dǘgüdaguaü houn ha asufurirubaña (2 Ko. 1:3, 4). Dan le hahandilihani wéiyaaña lidan afiñeni aban kesi lánina figóu wéiriti, furumiñe katei le lunbei hadügüni lun hakutihani sun le anügübei fulasu. Barüti lira dan. Lárigiñe, mosu hafurieidun, góunigi hameime ida liña lan híchugun adundehani lau hayusurunu Bíbülia ru hagía ererehóuni “keisi ladüna” (Her. 30:11). Chóuruti, madarasahan habéi lan hanúadiruni kaba lan hadüga, ani madügün habéi giñe éibaagueina. Dan le hafalaruni wéiyaaña lidan afiñeni ladundehan Heowá, sagatiña lílana damuriguaü saragu buiti lídangiñe. Lau sun, gayara lan ñein lan aban madurunti le sandiguati lungua lau saragu igarigu. Anhein ligía lubéi wásügürübei, ka lubéi wadügüni lun maweirin lan wasandiruni igarigu le wawagubei?

14. Ka hénpulu tídangiñeti Bíbülia gayarabei líderaguniwa anhein anihein lubéi aban íbiri le adügübei saragu wuribani woun?

¹⁴ Adügaali san somu gürigia saragu dañu hun, háfuga aban lílana damuriguaü? Anhein  ítara liña lubéi, wadariruba hénpulu tidan Lererun Bungiu le gayarabei líderaguniwa agurabahei laranseruni Heowá katei. Kei hénpulu, mígirunti meha Hosé lun lagifidun libagari ladüga marichaü luma burí figóu le hadügübei líbirigu lun. Ábatima, lasigirun Hosé etenira lun leseriwidun lun Heowá, ani biní lumuti Heowá luagu luguraasun luma lawandun (Agu. 39:21). Lau lásügürün dan, aba feruduna lániña Hosé líbirigu ani ariha hamuti ida liña lan labiniruni Heowá Hosé (Agu. 45:5). Ítara kei Hosé, buiti wasandiragun woungua dan le wayarafadun lun Heowá ani ígira wameime marichaü lúhaburugu (Sal. 7:17; 73:28).

15. Ka íderagubarun aban íbiri lun tawandun marichaü lau gurasu?

¹⁵ Másiñati, masufurirunbadün lan lanarime marichaü kei le lásügürübei Hosé, lau sun lira mínsiñeti lun ni aban lun lóuseruniwa wuriba. Lidan furumiñeguarügü kesi, anhein gaturobulin wabéi luma somu gürigia, íbini anhein aban lubéi Gefenti, buídubei lun wasigiruni adundehani le tídangiñebei Bíbülia (Fili. 2:3, 4). Ariha waméi le tadügübei aban íbiri to íchuguboun fe tayanuhaña lan aban tupaaná lidan wadagimanu iyeeni tuagu. Lau sun weiri lan ligari katei le tun íbiri, mígiraguagüdüntu tungua lun lagañeirunu igañi, aban tagumeserun asaminara luagu lani Hesusu hénpulu. Dan le hanabuni, móunabunti lau anabahani (1 Fe. 2:21, 23). Ligíati, aba tanúadirun íbiri lun tíchugun mebereseni luagu le asuseredubei. Lárigiñe aba tíchugun fe gibe lan katei lun tíchugun tupaaná to buga ayanuhaboun tuagu. Aba tíchugun íbiri fe, ua lan buga saminaü wuribati lanagangiñe le tariñagubei tupaaná tuagu. Ligíati aba terederun íbiri darangilañu ani gúndaatu lau tarufudun gaguraasuni dan le tóuseru lau marichaü.

16. Ka gayarabei líderaguniwa anhein hasufuriruña lubéi marichaü? (1 Féduru 3:12).

¹⁶ Anhein ladügüña lubéi marichaü woun o wásügürüña lan lídangiñe somu turobuli le adügüti lun wasandiragun woungua lau saragu igarigu, samina wamá yarafa lan Heowá houn “ha gáribei hasandirunu hanigi” (Sal. 34:18). Hínsiñetiwa lun ladüga gaguraasun wamá ani ígira wamuti wadiheri lúhaburugun (Sal. 55:22). Ligía Aguseragüdüti le íñugutimabei lidan sun Ubóu ani ariha lumuti sun katei (aliiha huméi 1 Féduru 3:12). Anhein, wásügürüña lubéi lídangiñe dan hénrenguti, le siñá wabéi  aransera, mabulieida waméi lunti lan aranseñu wamá lun wagurabun laransehani Heowá katei.

17. Ka füramasei lubéi Heowá lidan Isaíasi 30:18?

¹⁷ Yarafa madise, líchuguba Wáguchi le siélubei saragu abiniruni woun lau Larúeiha. Ariñagati Isaíasi 30:18: “Lagurabuñadün [Heowá] lau lugudemehabu hun; busenti larufuduni línsiñehabu hun, lugundun richati [Heowá] le Wabungiute. Fuleseiwatiña sun ha hemenigibaña luagu”. Ha agurabubalin ladügüni Heowá katei hibihiba saragu abiniruni guentó luma ámuñegü lidan iseri ubóu.

18. Ka abiniruni wagurabubei?

¹⁸ Lídanme iseri ubóu, magagibudagun hañame lubúeingu Bungiu luma saragu turobuli ni luma idiheri le úmabei hagagibudagua uguñe weyu. Úaalime marichaü ni igarigu (Aru. 21:4). Mámaalime mosu wadiheridun lun wibihini le wemegeirubei, ladüga aniheinbei saragu katei (Sal. 72:16; Isa. 54:13). Maame lubuidun!

19. Ka uagu laransehawa Heowá murusun murusun?

¹⁹ Sun aniha lan, Heowá íderaguawa lun wígiruni luriban échuni ani furendei wagíame igaburi buiti le aubei lagundaara, laransehañádiwa lúbanme wawinwandun lábugiñe Larúeihan. Mábürüha lan warüna. Anite le buídutimabei. Sun awanha lan agurabei lubuidun dan le lunbei liabin ámuñegü lau ugundani luma gurasu, sigí wamá agurabei ladügüni Heowá le füramase lubéi.