1-2. Asuh nup min kahakkö hī el ngih ātiköl?

SITIH inlahen öm öre yěm hökken öp töhěng tak tarik, ngaich öt yanīhivö anga-aṅ? Pi-a lohten öm haṙivölōn öm fēken ò. Pi-a öm sā mufē ngam tövënyu imat ngam Inchōḵ-oṙô 13:12, “Vāhav tī an tö ellōn ngam tö hāṅtö yīhi mineūka.” Yēḵ meh pöri öm akahakūö töp lanyngen ò nö hāṅtö yīhi, möl min më-eṅ öt kihngen hökken ò, holtö manöiyö re pöri min öm hökken ò.

² In ngih ātiköl min ayī-ö öi kakkö minë lökngörit chööngö aṅ mat ngam Paipöl, mahayööken hī öi ‘hökkö ngam ṙētak ngam Tēv.’ (Mai. 7:7) Ngëichkö nup tönët min ayī-ö kamngö hī öi hökkö ngam ṙētak Yāvē nö kē-elkuö alaha re. Unôich min öi mikatökūöre tö nup inkôlò taneūngen yip tarik hamökkö ngam ṙētak Yāvē.

3. Asup haköplö hī in ngam tövënyu im Inchōḵ-oṙô 13:11?

³ Vënyu nang in töm Inchōḵ-oṙô 13:11 tö hī öi hòṅ aṅhav in tö ngam manöiyö. Ngö kinuchngö ön, “Ka-eūingen nö keheūt tö veūtö yanīhi kanôlò, ṙūöhölre sanīöpötī pöri ngòh töng rahëch rahëchyen hamūl.” Haköplu ayī-ö tö hī hòṅ holtö ṙanëmen re yēḵ hī hòṅ meuk nup tö vai ṙòng minë la-enre ötkô öi veut lōn.

4. Asuh öp tövënyu imat ngam Inchōḵ-oṙô 4:18?

⁴ Ngöṙô ngam Inchōḵ-oṙô 4:18 “Öp kanröönö tölöök pöri sā minlīlö peuheū, öp töyanglöre yanāngö inrē söl ip sakāmö.” In ngih miröökö ayī-ö mikahtukūö tö inlahen  Yāvē nö hiṙeūt tö tī re nö vë-eny minë kuilōn re nö in hī. Mikahtukūö inrē ayī-ö tö inlahen ngòh Kristīön yěn halööktit re nöng öt hěnglöh inlahen pön hiṙeūtken re inrē. Yēḵ ngòh tarik nö haköpmat ngam Paipöl ngaich asīnken minë haköp re, hang minë inlēnö re inrē lamöktö el ngam söngkötön, ngaich sīöp min minë tövai tinrīken ò. Ṙūöhlöre mikahkūö inrē anga-aṅ tö Yāvē. Ta-a chěi töi ngëichkö ṙô Yēsū nö hachōḵ-elmat hī.

5. Asup öp inchōḵṙô Yēsū inmeuktö ngòh tarik nö hiṙeūtkenre nö halöktit re?

⁵ Hachōḵ elmat hī ang Yēsū nö ngö ṙô: “Meuinylö ngaich minë kulöl, nö sīöp, öt akahalōn pöri anga-aṅ [ngam tameūch] tö inlahen u. Ngam tumlat an töṙôngu nö kahngenre, urěh ngam elkui, hēk ngam chūök ṙòng, ngaich hēk ngam ṙòng takô nö el chūökre.” (Māk. 4:27, 28) Ngam kulöl tövënyu, ngam Pūlngö ngam Tēv angū-ö. Sā ngam chōn nö hiṙeūt sanīöpö re, ngatī inlahen ngòh tarik yěn vënyu nang tö inlahen ngam Pūlngö, mikahtukūö inrē tö ngam kanô-en aṅmat ngam Paipöl, ngaich halöktit re anga-aṅ. Sā inlahen yip kahë istötī hī yěn haröhtöre nö in Yāvē ngaich halööktit re. (Efi. 4:22-24) Hòṅ köpölōn pöri ayī-ö tö Yāvē nö anga-aṅ ma-asīöp ngam kulöl.—1 Kòr. 3:7.

6-7. Asup haköplö hī öi i inlahen Yāvē nö vī ngih panam?

⁶ Nup la-en kahēken Yāvē, öthō anga-aṅ nö veut alaha, pön holtö mikah elmat re nö la-envö. Löktö in e ngam minë-eny ò nö hā-öinyö, yöölen inrē yip tahëng. Töi chumkūöṙen ngëchkö inlahen Yāvē ik sā ò nö vī ngih panam, nö hiṙeūtkenre nö kēken minë la-en re.

⁷ Vë-eny nang hī ngam Paipöl tö inlahen ò nö ‘halēnlö ṙôkö ngam tumlat,’ töp ‘chūök rööntö e nö ultu’ hēk ‘ṙātö ngam ihong sinkeukngö e inrē.’  (Yōp 38:5, 6) Kēnyö ṙētakre inrē anga-aṅ nö ngëchkö minë la-en re. (Ran. 1:10, 12) Kô-òṙen öi fē-a, sitih mufē yik vöh ma-ahānga hē cha nö meūkö Yāvē nö vī nuk vahīlö re? Holtö ṙanamlōn re cha-a nö “tikökṙôre.” (Yōp 38:7) Asup haköplö hī öi in Yāvē? Kööinyu samheūheu rò-òten ang Yāvē nö vī ngih panam, töm tavūöi, chingeṅt, taneūsömat hēk minë töng aṅkūö e inrē. Öt yëḵngen pöri ngam rô-òten ò nö vīlen u, pön “löök takô anū-ö” nö meūkö.—Ran. 1:31.

8. Asuh nup min haköp hī?

⁸ Pōyen minë chööngö imat ngam Paipöl hamôten hī öi aṅhavin tö ngam manöiyö. Töi ngëichkö minë tönët kamngö chūök hī öi sā hamökken Yāvē.

9. Asuh öp chūök hī min hökkö ngam ṙētak Yāvē?

⁹ Lohten ayī-ö hökkö minë sanapṙô re vë-ekūötēv. Ṙōlheuh ṙô in ṙung öi havëkö kūö Yāvē tö kumlēḵ re öi la-al në kanihngen re. Inyööken re inrē öi ṙāngen minë töchōich la-en re. Öt ilööṙen pöri ayī-ö öi teūngen tö sanapṙô re. Kūöyòh nö ngatī, nö öt ilööṙen ang Yāvē nö sap ṙô hī öi vë-ekūötēv?

10. Kūöyòh öi hòṅ möi, öi hökkö sanap ṙô re yěi vë-ekūötēv?

¹⁰ Chumkūöṙen ang Yāvē nö hangihtö ṙô hī yěi vë-ekūötēv. (Sal. 65:2) Yēḵ hī vë-ekūötēv, ngaich meūk ṙôken ngam ṙinatö ellōn hī anga-aṅ öi in ò. (Hep. 11:6) Ngëichkö inlahen hī inrē anga-aṅ yēḵ hī asīnkö minë havëköre in ò. (1 Yôh. 3:22) Lökten yēḵ hī öi havëkö kūö ò tö inyööken re öi ṙāngen minë töchōch la-en re ngaich hòṅ ṙāngenre ayī-ö tö minë tövaich la-en re, īnū inrē tö ngam manöiyö. Vë-eny nang hī inrē Yēsū tö hī öt ilööṙen sapöṙô yěi vë-ekūötēv. Ngö ṙô anga-aṅ: “Have-a yī-ö, ngaich kô-òren teūngen, lūka yī-ö, ngaich kô-òren kôtökūö, kuröönga yī-ö, ngaich kô-òren nö löpnyukūö ngam inkūp. Pòn teūngen ngòh mahave-a kôtökūö ngòh lamūka löpnyukūö ngòh kumröngkökūö inkūp.” (Mët. 7:7, 8) Yēḵ hī min hang ṙô Yēsū öi “haköpöre im vinë-eṅkūötēv”, ngaich mihôiṅ öi ṙatö ellōn re tö Yāvē nö kētö nup sanapṙô hī min.—Kòl. 4:2.

11. Sitih mikahkūö öi tö ṙô ngam Heprāi 4:16 tö Yāvē nö öt ha-aṅken re nö sapṙô hī yěi vë-ekūötēv?

¹¹ Pī-a öi ngö lōn lohten, hāṅ-en an ngam Tēv nö sapṙô hī, kilēḵngôre pöri Yāvē töre nö ‘löngö ṙētak’ nö sap minë ṙô hī vë-ekūötēv. (Vë-evkūö Heprāi 4:16.) Lökten ayī-ö öt kô öi vīlö fālen Yāvē. Töi hachōḵ elmat re, samyeūheu ṙô-òten ayī-ö öi havëkö yanīhih ngam Pūlngö ngam Tēv nö ha-etngen në ötlanöökö ikūöng panam. Ngatī ṙô inrē Yēsū nö hachōḵtô hī vë-ekūötēv. (Mët. 6:10) Sitih inlahen pöri yěn öt yih ngam manāngen nö im ṙētak lōn hī? Öt ṙātö ellōnre hòng ngaich min ayī-ö im Tēv pön öt teung angū-ö nö sā lōn hī, hö-ö, höng kumlō-ov min angū-ö yěi ngatī mufē! (Hap. 2:3; Mët. 24:44) Iṙūöhen pöri ayī-ö öi hökken Yāvē, ṙinātu ellōn inrē öi in ò tö ò min nö sapṙô hī. Ötlöktu an Yāvē nö ha-aṅkenre nö ha-etngen yip tötlöök tarik. Lēnngö tī anga-aṅ nö ṙātö ngam ‘sakamö hēk ṙētak’ re. Tölöng min angū-ö nö ṙētak.—Mët. 24:36; 2 Pīt. 3:15.

12. Ihē öi mihôiṅ kihngen hameuktö manöiyö re?

¹² Yě hī ötlēkaṙen, ngaich hòṅ aṅhav in ayī-ö tö ngam manöiyö. Pōyen yip ikūö  ngih panam tötlēkaṙen tö kūö minë mineukö arëkūö cha, ëlò cha, tinrīken cha hēḵ kūö cha nö aṅ tahëng panam. Ōt inrē tötlēkaṙen tö kūö nup invah re. Pōyen inrē yip Vamënyen Yāvē tötlēkaṙen, kūö cha nö ṙātö ellōn re nö im Paipöl. Yēḵ hī ngatī inlānken ngaich hòṅ kööpölōn ayī-ö tö ṙô Yēsū: “Ngòh tö köp pöri nö söl ip manāngen, hayöökaṙen min anga-aṅ.” (Mët. 24:13) Sitih inlahen öm pöri yēḵ meh akahalōn tö öp tö fāluṙen el ngam māṅ? Ngaich inrē yip minṙöinylen nö akahalōn tö e? Höktöre öm min tö inlahen tī cha nö ngëichken e, ṙinātu ellōn öm min in cha nö halööktit e nö asā minë inlēnö lamöktö in Yāvē? Sitih inlahen yip minṙöinylen min nö halööktit e?

13. Yēḵ öp tarik nö fāluṙen sitih inlahen yip minṙöinylen nö halööktit e?

¹³ Yěn akahalōn yip minṙöinylen tö öp tö fāluṙen el ngam māṅ, ngaich havëkö kūö Yāvē cha-a tö ngam ‘mikah ṙamā-ang lātulöng’ hòṅ cha nö lööngö tī nö kahòkken ngam fālen. (Yāk. 3:17) Hōten ngam tö fāluṙen cha-a nö ‘havan nö ṙā-ang im tövaich talöökö ò.’ (Yāk. 5:19, 20) Hòṅ laklen ngam māṅ inrē tö nup tö chōich, ngaich hòṅ hareuskö alaha yip tö haṙivölōn inrē tö kūö tī ngam tö fāluṙen. (2 Kòr. 1:3, 4) Urēhěkūö më minṙöinylen nö halööktit ngam fālen, urěh cha-a nö chöh öp tö kò-en inlahen, ngaich kò-en öi pōyen ṙētak öi in e. Vë-ekūötēv min cha-a ngaich halen ngam tö fāluṙen nö löktö in minë ṙô ngam Tēv nö ‘löökö ṙôken tī nö chökṙen cha.’ (Yar. 30:11) Öt ha-āṅken re më minṙöinylen nö ngëchkö minë fālen öt kurāten pöri nö kēḵ fësla. Yě cha pöri nö vayö inlahen nö halöktit ngam fālen ngaich yöölen min ngam māṅ. Ōt re pöri yip tö haṙivlōn kūö tī ngam tö fāluṙen. Yěn ōt tö ngatī inlahen nö in meh ngaich hòṅ sitih inlahen më-eṅ?

14. Yěn ōtre öp mumṙivngö lōn meh, achiö öp tövai nö inchōḵelmat meh?

¹⁴ Ōtre hòng prötör sistör mumṙiv ngölōn meh? Yěn hòṅ, ngaich pōyen minë inchōḵ elmat hī imat ngam Paipöl mahyööken hī hökkö ngam ṙētak Yāvē. Töi ngëichkö inlahen Yôsěf. Öt lēkaṙen  anga-aṅ tö yik mem re. Hö-ö pöri ang Yôsěf nö kunyaha elmat tö cha. Iṙuöhen pöri anga-aṅ nö löklōn Yāvē, hamöiyö re inrē lökten ang Yāvē nö kētö inkôlò ò. (Ran. 39:21) Im rôtòng ngam ṙētak anga-aṅ nö aṙēlen yik mem re ngaich meuk ṙôken minë inkôlò re kahëtö Yāvē. (Ran. 45:5) Yēḵ hī öi asīnken Yôsěf, öi hangön ngam innôlö re öi in Yāvē hēk yěi ṙatö ellōn re tö ò min nö löngö ṙētak nö kahôkhen hī, lökten in e min ayī-ö öi teūngen tö inreuskö alaha re.—Sal. 7:17; 73:28.

15. Asuh ök mahayööken ngam sistör nö möi hē ò nö öt lëkaṙen?

¹⁵ Pī-a in lohten öt uroh sā inlinken Yôsěf. Haṙivölōn pöri ayī-ö yěi ötlēkaṙen tö yip holmaneuk re hēk tö yip aṅ el kahôiṙen inrē. Yöölen pöri ayī-ö yěi hang minë inlēnö re aṅmat ngam Paipöl. (Filip. 2:3,4) Töi ngëichkö inlahen öp töhěng tak ihih kanānö hī. Suöchka inlahen anga-aṅ tö yik holre ik chūök ò nö kamān. Haṙivölōn anga-aṅ töm sinuöchkö inlahen re, hö-ö pöri anga-aṅ nö tainy. Kēnyö ṙētak re anga-aṅ nö fēkö inlahen Yēsū. Ik sā Yēsū nö ötlēkaṙen, öt havahal vah re anga-aṅ. (1 Pīt. 2:21, 23) Lökten ngam kanānö hī nö öt ruöhlö minë ṙô nö hēk. Unôchngöre anga-aṅ nö akahalōn tö ök samūöchkö inlahen ò nö tö ōt ök invah ò lökten ò nöng örheūheu nö haṙivlōn lökten ò inrē nö chökhuṙô. Ṙamlōn ngam sistör tö inlahen re nö öt ṙūöhlö minë ṙô höng möi pöri anga-aṅ nö la-al u.

16. Yēḵ meh ötlēkaṙen, asup öp min ṙô mahareuskö alaha meh? (1 Pītör 3:12)

¹⁶ Yēḵ meh öm ötlēkaṙen hēk haṙivölōn inrē, ngaich kööpölōn më-eṅ tö Yāvē nö röhta nö in “yip töpaṙööyi ellōn.” (Sal. 34:18) Hangenlōn anga-aṅ tö hī, lōnu inrē tö hī hamöiyö re ngaich hakeunlö nup lumngan re öi in ò. (Sal. 55:22) Yāvē an Kamhòkken ngih panam, öt hěng tö hayunngöre nö ikūö ò. (Vë-evkūö 1 Pītör 3:12.) Yēḵ meh ngatī kanihngen hēk ötkô inrē öm la-al u, hōḵ öm min hökken Yāvē nö halööktit u?

17. Asup öp kinlēngô Yāvē in ngam Isayā 30:18?

¹⁷ Röhta inlahen an ngam Yöng hī nö kētö inkôlò hī nö löktö im Pūlngö re tī. Ngö kinuchngö ön in ngam Isayā 30:18: “Lökten an min ngam Mā Tēv (Yāvē) nö höktöre, pò ò nö hòṅ aṙē-ělōn tö yīö, lökten ò min inrē nö hapōilöngö, pòn hòṅ aheūkölōn tö yīö, pò ngam Mā Tēv nö Tēv inkaha fālen. Tökôlò yip cha-a yip hamökken ò.” Yip tö maheūṅkkuvö nö in Yāvē, acha-a min tö teūnglen tö nup tö pōyen inkôlò, ngaich iyöng kūö ngam tufömngöre panam inrē min cha-a.

18. Asuh nup min inkôlò hī in nup yamih ṙētak?

¹⁸ Yěn yih min ngam tufömngöre panam ngaich öthō min ayī-ö öi la-al minë kanihngen re minë maheūṅk hī töngamuh. Rôkhöre min minë öt linēken hī tö minë chanöökö na ha-etiyö. (Inm. 21:4) Pōyen aṅ in min ayī-ö tö nup töng sitih, lökten min ayī-ö öi öt yaha mufē. (Sal. 72:16; Isa. 54:13) Kô-en ön ngih nö tö kirööngen nö inkôlò hī!

19. Asup öp halēnkö Yāvē nö in hī in nup yamih ṙētak?

¹⁹ Hayööken hī an Yāvē töngamuh öi ṙāngen minë tötlöök la-en, hēk kē minë tö vai tinrīken re hòṅ hī öi aṅ yěn yīh ngam Pūlngö ò. Lökten ayī-ö i ngih ṙētak öt kò öi heūlngöre hòṅ iṙūöhen i linöökö lōn Yāvē. Pòn ṙöhta ngam tö vai kumchikṙen hī min kahëtö ò. Ta-a chěi töi hamôiyö re öi hökkö ngam ṙētak hanang saha ngam kuilōn Yāvē nö öl nö teung!